Lua Samuele
1 ʼI te ʼosi mate ʼa Saulo, ʼi te toe liliu mai ʼa Tavite mai tana malo ʼi* te kau Amaleke, neʼe nofo leva ʼi Tesikelake+ lolotoga ʼaho ʼe lua. 2 ʼI te tolu ʼaho, neʼe haʼu he tagata mai te nofoʼaga ʼo Saulo mo ʼona mutuʼi meʼa kua makahaehae pea kua kelekeleʼia tona ʼulu. ʼI tana fakaovi age kia Tavite, neʼe tuʼutuli ifo mo tulolo ki te kele.
3 Neʼe fehuʼi age e Tavite ki ai: “ ʼE ke haʼu maifea?” Neʼe ina tali: “Neʼe au hola mai te nofoʼaga ʼo Iselaele.” 4 Neʼe toe fehuʼi age e Tavite: “Kotea ʼae neʼe hoko? Fakalelei siʼou loto, kae ke ke fakaha mai.” Neʼe ina tali: “Neʼe feholaki te hahaʼi ʼi te tau pea tokolahi kua mamate, ʼo kau ai foki ia Saulo mo tona foha ko Sonatane.”+ 5 Pea neʼe fehuʼi e Tavite ki te tagata tupulaga ʼaia neʼe haʼu mo te logo: “ ʼE ke iloʼi feafeaʼi kua mamate ia Saulo mo Sonatane, tona foha?” 6 Neʼe tali age e te tupulaga: “Neʼe au ʼi te Moʼuga ʼo Kilipoa,+ pea neʼe au sio kia Saulo ʼe falanaki ki tana tao, pea neʼe kua ovi age kia ia te ʼu saliote mo te ʼu tagata heka hosi.+ 7 ʼI tana maliu ʼo sio mai, neʼe ina pauʼi au, pea neʼe au ui age: ‘Koʼeni au!’ 8 Neʼe ina fehuʼi mai: ‘Ko ai ia koe?’ pea neʼe au tali age: ‘Ko au ko te tagata Amaleke.’+ 9 Pea neʼe ina ui leva: ‘Fakalelei siʼou loto, kae ke ke haʼu ʼo matehi au. Logo la kei au maʼuli kae ʼe mole kei au lavaʼi toku mamahi.’ 10 Neʼe au alu ai ʼo matehi ia ia,+ koteʼuhi neʼe au iloʼi neʼe mole feala ke maʼuli he neʼe kua lavea kovi. Neʼe au toʼo leva te pale ʼae neʼe ʼi tona ʼulu mo te vesa ʼae neʼe ʼi tona nima, pea neʼe au ʼaumai kia koe, siʼoku ʼaliki.”
11 Neʼe hae leva e Tavite ʼona kofu pea neʼe toe fai feia mo te kau tagata fuli ʼae neʼe fakatahi mo ia. 12 Pea neʼe natou lauga, mo fetagihi pea mo sesunio+ ʼo kaku ki te afiafi he neʼe kua mamate ia Saulo, mo tona foha ko Sonatane, mo te hahaʼi tokolahi ʼa Sehova, ʼei, te hahaʼi tokolahi ʼo Iselaele,+ ʼi te heleta.
13 Pea neʼe fehuʼi e Tavite ki te tupulaga ʼae neʼe haʼu mo te logo: “Ko ai ia koe pea ʼe ke haʼu maifea?” Neʼe ina tali age: “Ko au ʼe ko te foha ʼo he tagata matapule, ko he tagata Amaleke.” 14 Pea neʼe ui e Tavite ki ai: “Neʼe mole ke mataku koa koe ʼi te hiki ʼo tou nima ke ke matehi te tagata fakanofo ʼa Sehova?”+ 15 Neʼe pauʼi ai e Tavite he tahi ʼo tana kau tagata pea mo ui age: “Fakaovi mai pea ke matehi ia ia.” Pea neʼe ina matehi ai ia ia.+ 16 Neʼe ui e Tavite: “ ʼE ko tau ia hala mo kapau ʼe ke mate, koteʼuhi neʼe ke fakaha e koe totonu tau hala, ʼi tau ui: ‘Neʼe au matehi te tagata fakanofo ʼa Sehova.’ ”+
17 Pea neʼe hiva leva e Tavite te hiva mate ʼo ʼuhiga mo Saulo pea mo tona foha ko Sonatane.+ 18 Pea neʼe ina fakatotonu ke ako e te hahaʼi ʼo Suta te hiva mate ʼaia ʼe higoa ko “Te Nahau,” ʼe tuʼu ʼi te tohi ʼa Sasale.+ Koʼeni te hiva mate ʼaia:
19 “Iselaele, kua mamate te kau taulekaleka ʼi ʼou faʼahi maʼoluga.+
Kua mamate te kau toʼa ʼi te tau!
20 ʼAua naʼa fakamatala ʼi Kiete,+
ʼAua naʼa tala ʼi te ʼu ala ʼo Asekaloni,
Naʼa fiafia te ʼu ʼofafine ʼo te kau Filisitini,
Naʼa fakafiafia te ʼu ʼofafine ʼo te kau tagata heʼe silikosisio.*
21 Ke mole ʼi ai he hahau pea ke mole to he ʼua
ʼI te ʼu moʼuga ʼo Kilipoa,+
Pea ke mole ʼi ai he ʼu fua ʼo te ʼu gaueʼaga ke momoli ai ki te ʼAtua,+
Koteʼuhi neʼe ʼulihi ʼi ai te ʼu meʼa tali tau ʼa te kau toʼa,
ʼE mole kei vali lolo te meʼa tali tau ʼa Saulo.
22 Mai te toto ʼo natou ʼae neʼe matehi, mai te gako ʼo te kau toʼa
Neʼe mole pe holomuli te nahau ʼa Sonatane,+
Pea neʼe malo tuʼumaʼu pe te heleta ʼa Saulo.+
23 Neʼe ʼofainaʼi mo leleiʼia e te hahaʼi ia Saulo mo Sonatane,+ ʼi tonā maʼuli katoa,
Pea neʼe mole nā mavete ʼi te mate.+
24 ʼU taʼahine ʼo Iselaele, kotou fetagihi kia Saulo,
ʼAe neʼe ina fakateuteuʼi koutou ʼaki he ʼu teu kula mo he ʼu meʼa matalelei,
ʼAe neʼe ina teuteuʼi ʼokotou teu ʼaki te aulo.
25 Kua mamate te kau toʼa ʼi te tau!
Kua mate ia Sonatane ʼi ʼou faʼahi maʼoluga!+
26 ʼE au lotomamahi ʼo ʼuhiga mo koe, Sonatane siʼoku tehina.
Neʼe au ʼofa mamahi ia koe.+
Neʼe taulekaleka age tou ʼofa ia au ʼi te ʼofa ʼo te hahaʼi fafine.+
27 Kua mamate te kau toʼa ʼi te tau
Pea kua maumauʼi te ʼu mahafu tau!”