Selemia
23 ʼE ui e Sehova: “Malaʼia ki te ʼu tauhi ovi ʼae ʼe natou maumauʼi mo fakamavetevete te ʼu ovi ʼae ʼe au tokaga ki ai!”+
2 Koia, koʼeni te folafola ʼa Sehova, te ʼAtua ʼo Iselaele ʼo ʼuhiga mo te ʼu tauhi ovi ʼo tana hahaʼi: “Neʼe kotou fakamavetevete ʼaku ovi, ʼei, neʼe kotou fakamavetevete ia natou pea neʼe mole kotou tokakaga kia natou.”+
“Koia ʼe au tauteaʼi anai koutou ʼuhi ko ʼakotou aga ʼae ʼe kovi,” ko te ui ʼaia ʼa Sehova.
3 “Pea ʼe au fakatahiʼi anai te toe ʼo ʼaku ovi mai te ʼu fenua fuli ʼae neʼe au fakamavetevete ai natou.+ ʼE au toe ʼaumai anai natou ki tonatou koga meʼa lunaʼia,+ pea ʼe natou liliu anai ʼo kaugamalie.+ 4 ʼEi, ʼe au filifili anai ni tauhi ovi ʼe tokakaga moʼoni anai kia natou.+ ʼE mole natou toe matataku anai mo tekelili pea ʼe mole puli anai he tahi,” ko te ui ʼaia ʼa Sehova.
5 ʼE ui e Sehova: “Koʼeni ʼe hoko mai anai he ʼaho ʼe au fakatupu anai he huli* ʼe faitotonu maʼa Tavite.+ ʼE pule anai+ mo he fakasiosio poto, pea ʼe lagolago anai ki te faitotonu ʼi te fenua.+ 6 ʼE haofaki anai ia Suta ʼi te temi ʼaia,+ pea ʼe maʼuli fimalie anai ia Iselaele.+ Pea ʼe fakahigoaʼi anai: Ko Sehova Ko Tomatou Faitotonu.”+
7 ʼE ui e Sehova: “ ʼE ʼi ai anai he ʼaho ʼe mole natou toe ui ai: ‘ ʼE matou fakapapau ia muʼa ʼo Sehova te ʼAtua maʼuli, ʼae neʼe ina fakamavae te hahaʼi ʼo Iselaele mai Esipito!’+ 8 Kae ʼe natou ui anai: ‘ ʼE matou fakapapau ia muʼa ʼo Sehova te ʼAtua maʼuli, ʼae neʼe ina ʼaumai te hakoga ʼo Iselaele mai te fenua ʼo te potu noleto pea mo te ʼu fenua fuli ʼae neʼe ina fakamavetevete ai natou,’ pea ʼe natou nonofo anai ʼi tonatou fenua.”+
9 ʼE au ui ʼo ʼuhiga mo te kau polofeta:
ʼE mamahi toku loto.
ʼE tekelili ʼoku hui fuli.
ʼE au hage ko he tagata ʼe konahia,
He tagata neʼe inu vino,
ʼUhi ko Sehova mo ʼana folafola taputapu.
10 Kua tokolahi te hahaʼi tono ʼi te fenua.+
Kua putu te fenua ʼuhi ko te malaʼia ʼae kua hoko ki ai,+
Pea kua moamoa te ʼu koga meʼa lunaʼia ʼo te toafa.+
ʼE natou agakovi pea mo pule’i fakamalohi te hahaʼi.
11 “ ʼE heʼe maʼa* te kau polofeta ohage pe ko te kau pelepitelo.+
Kua kaku mai tanatou agakovi ki toku loto fale,”+ ko te ui ʼaia ʼa Sehova.
12 “Koia ʼe hekeheke anai mo fakapoʼuli te ala ʼae ʼe natou haʼele ai.+
ʼE humuki anai ia natou pea ʼe natou fetokaʼi anai.
ʼE au fakahoko anai he malaʼia kia natou,
ʼI te taʼu ʼae ka fakamauʼi ai natou,” ko te ui ʼaia ʼa Sehova.
13 “Neʼe au sio ki he meʼa fakalialia ʼi te kau polofeta ʼo Samalia:+
ʼE natou faifakakikite ʼi te higoa ʼo Paale,
Pea ʼe natou fakahehe taku hahaʼi ko Iselaele.
14 Neʼe au sio ki ni meʼa fakalialia ʼi te kau polofeta ʼo Selusalemi:
ʼE natou tono+ pea ʼe natou maʼuli kaka.+
ʼE natou ʼekenaki te aga ʼa te hahaʼi agakovi
Pea ʼe mole natou tuku tanatou aga ʼae ʼe kovi.
15 Koia, koʼeni te folafola ʼa Sehova ʼo te ʼatu kautau ʼo ʼuhiga mo te kau polofeta:
“ ʼE au fafaga anai natou ʼaki te apiseneto
Mo fakainu natou ʼaki he vai kona.+
Neʼe uga e te kau polofeta ʼo Selusalemi ke heʼe agatonu te hahaʼi ʼi te fenua katoa.”
16 Koʼeni te folafola ʼa Sehova ʼo te ʼatu kautau:
“ ʼAua naʼa kotou fakalogo ki te ʼu faifakakikite ʼa te ʼu polofeta.+
ʼE natou kakaʼi koutou.
ʼE natou fakamatala atu neʼe ha he meʼa kia natou kae neʼe natou faʼufaʼu pe,+
ʼE mole haʼu ia mai te gutu ʼo Sehova.+
17 ʼE natou ui tuʼumaʼu pe kia natou ʼae ʼe fehihiʼa kia au,
‘Neʼe ui e Sehova: “ ʼE kotou maʼuli tokalelei anai.” ’+
Pea ʼe natou ui kia natou fuli ʼae ʼe uigataʼa mo mulimuli ki ʼonatou loto:
‘ ʼE mole hoko anai he malaʼia kia koutou.’+
18 Ko ai ʼae ʼe kau ʼi te ʼu kaumeʼa lelei ʼo Sehova
ʼO feala ai hana logo ke mahino ki tana folafola?
Ko ai ʼae neʼe ina tokagaʼi ke logo ki tana folafola?
19 Kotou fakalogo mai! ʼE agi malohi anai te tuʼani matagi ʼae ʼe haʼu mai ia Sehova.
ʼE to anai ki te kau agakovi ohage he afā.+
20 ʼE hoki malū ifo anai te hauhau ʼo Sehova
Moka ina fakahoko ʼana fakatuʼutuʼu.
ʼE kotou mahino lelei anai ki ai ʼi te ʼu ʼaho fakamuli.
21 Neʼe mole au fekauʼi atu te kau polofeta, kae neʼe natou feleleʼi atu pe.
Neʼe mole au palalau kia natou, kae neʼe natou faifakakikite pe.+
22 Ka na pau la neʼe natou kau ʼi ʼoku kaumeʼa lelei,
Ka na ʼaua la ʼe natou fakaha ʼaku folafola ki taku hahaʼi,
Pea ʼe natou fakatafoki anai natou mai ʼanatou aga ʼae ʼe kovi mo ʼanatou gaue ʼae ʼe kovi.”+
23 ʼE fehuʼi e Sehova: “ ʼE ha pe koa toku ʼuhiga ʼAtua moka au nofo ovi kia koutou? ʼE mole toe ha koa la moka au nofo mamaʼo ia koutou?”
24 “ ʼE feala koa ke nono he tagata kae ʼe mole au sio ki ai?”+ ko te ui ʼaia ʼa Sehova.
“ ʼE mole feala koa la ke au sio kia meʼa fuli ʼi te lagi mo te kele?”+ ko te ui ʼaia ʼa Sehova.
25 “Neʼe au logo neʼe fakakikite e te kau polofeta ni loi ʼi toku huafa ʼo natou ui: ‘Neʼe au fai taku moemisi! Neʼe au fai taku moemisi!’+ 26 ʼE kaku anai ki ʼafea ia te fakakikite ʼae e te kau polofeta ni loi? Ko te ʼu meʼa ʼae ʼe natou fakakikite ko ni loi neʼe natou faʼufaʼu pe.+ 27 ʼE natou fefakahaʼaki ʼanatou moemisi ke galoʼi e taku hahaʼi ia toku huafa, ohage pe ko te galoʼi e ʼanatou kui ia toku huafa ʼuhi ko Paale.+ 28 Kapau ʼe moemisi ia he polofeta, ke ina fakaha. Kae ko ia ʼae ʼe ina maʼu taku folafola, ke agatonu ʼi tana fakaha.”
“Kotea ʼae ʼe tatau ai te luna moamoa mo te tegaʼi fulumeto?” ko te ui ʼaia ʼa Sehova.
29 “ ʼE mole hage koa la taku folafola ko he afi+ peʼe ko he hamale ʼe ina laliki he maka?”+ ko te ui ʼaia ʼa Sehova.
30 “Koia, ʼe au tauteaʼi anai te kau polofeta ʼae ʼe natou fekaihaʼaʼaki ʼaku folafola,” ko te ui ʼaia ʼa Sehova.+
31 ʼE toe ui e Sehova: “ ʼE au tauteaʼi anai te kau polofeta ia natou ʼae ʼe natou ui: ‘Koʼeni te folafola ʼa te ʼAtua!’ ”+
32 “ ʼE au tauteaʼi anai te kau polofeta ʼae ʼe natou fakakikite ni moemisi loi,” ko te ui ʼaia ʼa Sehova. “ ʼE natou fakamatala te ʼu moemisi ʼaia mo natou fakahehe taku hahaʼi ʼaki ʼanatou loi mo ʼanatou laupisi.”+
“Kae neʼe mole au fekauʼi natou. Neʼe mole au fakatotonu age he meʼa. Koia ʼe mole natou fai anai he meʼa ʼe lelei ki te hahaʼi ʼaeni,”+ ko te ui ʼaia ʼa Sehova.
33 “Ka fehuʼi atu e te hahaʼi ʼaeni, peʼe ko he polofeta, peʼe ko he pelepitelo: ‘Kotea te kavega* ʼae ʼa Sehova?’ ʼe ke tali anai kia natou: ‘ “Ko koutou ia te kavega! ʼEi, ʼe au liʼaki anai koutou,”+ ko te ui ʼaia ʼa Sehova.’ 34 Pea ka ui e he polofeta, peʼe ko he pelepitelo, peʼe ko he tahi pe: ‘Koʼeni te kavega ʼa Sehova!’ ʼe au tauteaʼi anai te tagata ʼaia mo tona famili. 35 ʼE kotou tahi fehuʼi ki tona kaumeʼa mo tona tehina: ‘Neʼe kotea te tali ʼa Sehova? Pea kotea ʼae neʼe ui e Sehova?’ 36 Kae ʼaua naʼa kotou toe palalau ki te kavega ʼa Sehova. Ko te kavega ʼe ko ʼakotou palalau ʼa koutou takitokotahi. Neʼe kotou fetogi te ʼu folafola ʼa te ʼAtua maʼuli, ia Sehova ʼo te ʼatu kautau, totatou ʼAtua.
37 “ ʼE ke ui anai ki te polofeta: ‘Kotea ʼae neʼe tali atu e Sehova? Pea kotea ʼae neʼe ui e Sehova? 38 ʼAua naʼa ke toe ui: “Koʼeni te kavega ʼa Sehova!” he ʼe fakaha atu e Sehova: “ ʼUhi ʼae ʼe ke ui: ‘Ko te folafola ʼaia ʼe ko te kavega ʼa Sehova,’ kae neʼe au tapuʼi atu ke ke ui: ‘Koʼeni te kavega ʼa Sehova!’ 39 ʼe au hiki ake anai ia koe ʼo li mamaʼo ia te au, ia koe mo te kolo ʼae neʼe au foaki atu kia koe mo ʼau kui. 40 ʼEi, ʼe au fakatupu anai tou ufiufi ʼo heʼe gata mo tou lainoa ʼo heʼe gata, pea ʼe mole toe galoʼi anai ʼi he temi.” ’ ”+