Te ʼu Gaue ʼa Te Kau Apositolo
11 Neʼe logo leva te kau apositolo mo te ʼu tehina ʼae neʼe ʼi Sutea ki te kua tali foki e te hahaʼi ʼae neʼe mole Sutea ia te folafola ʼa te ʼAtua. 2 Pea ʼi te hake ake ʼa Petelo ki Selusalemi, neʼe valokiʼi* e natou ʼae neʼe loto ke silikosisioʼi* te hahaʼi ʼae neʼe mole Sutea.+ 3 Neʼe natou ui: “Neʼe ke hu ki te loto fale ʼo te ʼu hahaʼi neʼe mole silikosisioʼi pea neʼe ke kakai fakatahi mo natou.” 4 Neʼe fakamahinohino leva e Petelo kia natou ia te faʼahi ʼaia, ʼo ina ui:
5 “Neʼe au nofo ʼi te kolo ko Sope pea ʼi taku lolotoga faikole, neʼe au sio ki te meʼa neʼe ha mai, neʼe hage ko he kie lino lahi neʼe hifo mai te lagi ʼi ʼona tapa ʼe fa, pea neʼe kaku mai kia au.+ 6 Neʼe au fakasiosio ki loto, pea neʼe au sio ki te ʼu manu vaʼe fa ʼo te kele, mo te ʼu manu fekai, mo te ʼu manu totolo pea mo te ʼu manulele. 7 Neʼe au toe logo foki ki he leʼo ʼe ina ui mai: ‘Petelo, tuʼu ake, matehi he manu pea ke kai!’ 8 Kae neʼe au ui: ‘Kailoa ia ʼAliki, koteʼuhi neʼe heʼeki au kai he meʼa ʼe ʼuli pea mo heʼe maʼa.’ 9 Neʼe ui e te leʼo mai te lagi, neʼe ko tona tuʼa lua ʼaia: ‘Tuku tau ui ʼae ʼe ʼuli te ʼu meʼa ʼae kua fakamaʼa e te ʼAtua.’ 10 Neʼe hoko tuʼa tolu te faʼahi ʼaia, pea neʼe toʼo ake leva ia meʼa fuli ki te lagi. 11 Pea ʼi te temi pe ʼaia, neʼe tutuʼu te ʼu tagata ʼe toko tolu ʼi te ʼapi ʼae neʼe matou nonofo ai. Neʼe fekauʼi mai natou mai Sesalea ke ʼomai ʼo kumi atu au.+ 12 Neʼe ui mai leva e te laumalie maʼoniʼoni ke au alu mo natou, pea ke ʼaua naʼa au lotolotolua. Kae neʼe kaugā fagona mo au te ʼu tehina ʼaeni ʼe toko ono, pea neʼe matou hu ki te loto fale ʼo Kolonelio.
13 “Neʼe ina fakamatala mai tana sio ki te ʼaselo ʼe tuʼu ʼi tona loto fale ʼo ina ui age: ‘Fekauʼi he ʼu tagata ki Sope ke natou kumi mai te tagata ko Simone ʼae ʼe toe higoa ko Petelo,+ 14 pea ʼe ina fakaha atu anai te ʼu meʼa ʼae ʼe feala ke haofaki ai ia koe mo tou loto fale katoa.’ 15 Kae ʼi taku kamata palalau, neʼe foaki age kia natou ia te laumalie maʼoniʼoni ohage pe ko tona foaki mai kia tatou ʼi te kamata mai.+ 16 Neʼe au manatuʼi ai te folafola ʼa te ʼAliki, ʼi tana ui: ‘Neʼe faipapitema ia Soane ʼaki te vai,+ kae ʼe papitemaʼi anai koutou ʼaki te laumalie maʼoniʼoni.’+ 17 Koia, kapau neʼe foaki age kia natou e te ʼAtua ia te meʼa ʼofa ʼaeni neʼe ina foaki mai kia tatou ʼae ʼe tui ki te ʼAliki ko Sesu Kilisito,* pea neʼe ko ai koa ia au ke au taʼofi te ʼAtua?”+
18 ʼI tanatou logo ki te ʼu faʼahi ʼaia, neʼe tuku ai tanatou fakafifihi,* pea neʼe natou fakakololiaʼi te ʼAtua, ʼo natou ui: “Kua toe foaki foki e te ʼAtua ki te hahaʼi ʼae ʼe mole Sutea te fakahemala ʼae ʼe ina taki ki te maʼuli.”+
19 Pea ko natou ʼae neʼe mavetevete+ ʼuhi ko te fakataga ʼae neʼe hoko hili te mate ʼo Setefano, neʼe natou kaku ki Fenisia, mo Sipele pea mo Atiokia, kae neʼe natou fakaha pe te folafola ki te kau Sutea.+ 20 Kae neʼe nonofo mo natou ni tagata mai Sipele mo Silene neʼe ʼomai ki Atiokia pea neʼe natou palalau ki te hahaʼi ʼae neʼe lea Fakakeleka, ʼo natou tala age ia te logo lelei ʼo ʼuhiga mo te ʼAliki ko Sesu. 21 Neʼe nofo ia Sehova* mo natou, pea neʼe liliu te hahaʼi kaugamalie ʼo tui pea mo tafoki ki te ʼAliki.+
22 Neʼe logo ia te kokelekasio ʼae ʼi Selusalemi ki te talanoa ʼo ʼuhiga mo natou, pea neʼe natou fekauʼi ia Palenapa+ ki Atiokia. 23 ʼI tana tau atu ʼo sio ki te ʼofa makehe ʼo te ʼAtua, neʼe fiafia ai pea neʼe ina fakalotomalohiʼi ia natou fuli ke nonofo agatonu ki te ʼAliki ʼaki he loto moʼoni.+ 24 Neʼe ko he tagata agalelei, mo tui pea mo fonu ʼi te laumalie maʼoniʼoni. Pea ʼuhi ko te faʼahi ʼaia, tokolahi neʼe natou tui ki te ʼAliki.+ 25 Neʼe alu leva ki Talesi ʼo taka kumi ia Saulo.+ 26 ʼI tana ʼosi maʼu, neʼe ina ʼave leva ki Atiokia. Neʼe nā fakatahi mo te kokelekasio ʼi te taʼu katoa, pea neʼe nā akoʼi he hahaʼi kaugamalie. Pea ʼaki te takitaki ʼa te ʼAtua, neʼe kamata fakahigoaʼi ʼi Atiokia te ʼu tisipulo ko te kau Kilisitiano.+
27 ʼI te ʼu ʼaho ʼaia, neʼe hihifo ni kau polofeta+ mai Selusalemi ʼo olo ki Atiokia. 28 Ko te tahi ia natou, neʼe higoa ko Akapusi,+ neʼe tuʼu ake ʼo fakakikite ʼaki te laumalie maʼoniʼoni ʼe hoko anai he toe hoge lahi ʼi te kele katoa,+ pea neʼe hoko moʼoni ʼi te temi ʼo te hau ko Kolote. 29 Koia, neʼe fakatuʼutuʼu ai e te ʼu tisipulo ke momoli he tokoni+ ki te ʼu tehina ʼae ʼe maʼuʼuli ʼi Sutea, ʼo tahi mulimuli pe ki tona fealagia.+ 30 Pea neʼe natou fai te faʼahi ʼaia, ʼo natou momoli te tokoni ki te kau tagata ʼafeā ʼaki ia Palenapa mo Saulo.+