Ki Te Kau Kalate

1 Ko au Paulo, he apositolo neʼe mole fakanofo e he tagata kae ko Sesu Kilisito*+ pea mo te ʼAtua te Tamai,+ ʼae neʼe ina fakatuʼuake ia Kilisito mai te kau mate. 2 Ko au mo te ʼu tehina fuli ʼae ʼe fakatahi mo au, ʼe matou faitohi ki te ʼu kokelekasio ʼo Kalate:

3 Ke foaki atu e te ʼAtua tatatou Tamai pea mo te ʼAliki ko Sesu Kilisito ia te ʼofa makehe pea mo te tokalelei. 4 Neʼe foaki e Kilisito ia ia totonu moʼo molehi ʼatatou agahala,+ ke feala hana haofaki tatou mai te malama* agakovi ʼaeni+ ʼo mulimuli ki te finegalo ʼo totatou ʼAtua pea mo Tamai.+ 5 Ke fakakololiaʼi te ʼAtua ʼo talu ai. Ameni.

6 ʼE au punamaʼuli ʼi takotou maliu kehe* fakavilivili mai ia Ia ʼae neʼe ina pauʼi koutou ʼaki te ʼofa makehe ʼo Kilisito, ʼo kotou tali te tahi age faʼahiga logo lelei.+ 7 ʼE mole ʼi ai he tahi age logo lelei. Kae ʼe ʼi ai ʼihi ʼe natou fakatupu maveuveu ia koutou+ pea mo natou faiga ke natou fulihi hala ia te logo lelei ʼo ʼuhiga mo Kilisito. 8 Kae ke malaʼia ia ia ʼae ʼe ina tala atu he logo lelei ʼe kehe age mo te logo lelei ʼae neʼe matou tala atu, tatau aipe pe ʼe ko he tahi ia matou peʼe ko he ʼaselo mai te lagi. 9 Ohage ko tamatou ui ʼi muʼa atu, ʼe au toe ui atu: Ke malaʼia ia ia ʼae ʼe ina tala atu he logo lelei ʼe kehe age mo ʼae neʼe kotou tali.

10 ʼE au faigaʼi nei koa ke au fakalotoʼi ni tagata peʼe ko te ʼAtua? Peʼe au faigaʼi koa ke leleiʼia au e te tagata? Ka na pau la neʼe kei leleiʼia au e te tagata, neʼe mole au liliu ko he kaugana ʼa Kilisito. 11 Koteʼuhi ʼu tehina, ʼe au loto ke kotou iloʼi ko te logo lelei ʼae neʼe au tala atu ʼe mole haʼu ia mai te tagata.+ 12 Koteʼuhi neʼe mole au tali te logo lelei ʼaia mai he tagata, pea neʼe mole akoʼi mai e he tagata, kae neʼe fakaha mai e Sesu Kilisito.

13 ʼE mahino ia, neʼe kotou logo ki te palalauʼi ʼo taku aga ʼi taku kau ʼi te temi muʼa ʼi te Lotu Sutea,+ ia te kovi ʼo taku fakatagaʼi pea mo taku maumauʼi ia te kokelekasio ʼa te ʼAtua.+ 14 Pea neʼe laka age taku lakalaka ki muʼa ʼi te Lotu Sutea ʼi te tokolahi ʼo taku hahaʼi ʼae neʼe matou taʼu tahi. Pea neʼe lahi age taku faʼafai ʼo ʼuhiga mo te ʼu talatisio ʼo ʼaku kui.+ 15 Kae neʼe fakagafua e te ʼAtua ke fanauʼi au e taku faʼe pea neʼe ina pauʼi au ʼaki tona ʼofa makehe.+ Neʼe ina leleiʼia 16 ke ina fakaʼaogaʼi au moʼo tala te logo lelei ki te hahaʼi ʼo te tahi atu ʼu puleʼaga ke natou iloʼi ai tona ʼAlo.+ ʼI tana filifili au ke au fai te faʼahi ʼaia, neʼe mole au kumi tokoni atu aipe ki he tahi.* 17 Pea neʼe mole au hake ki Selusalemi kia natou ʼae neʼe ʼuluaki apositolo ia au, kae neʼe au alu ki Alapi, pea neʼe au toe liliu leva ki Tamaso.+

18 Hili ki ai taʼu ʼe tolu, neʼe au hake leva ki Selusalemi+ ʼo ʼaʼahi ia Sefasi,*+ pea neʼe au nofo mo ia lolotoga ʼaho ʼe 15. 19 Kae neʼe mole au sio ki he tahi ʼo te kau apositolo, gata pe kia Sakopo+ te tehina ʼo te ʼAliki. 20 Pea ʼe au ui atu ia muʼa ʼo te ʼAtua, ko te ʼu meʼa ʼae ʼe au tohi atu ʼe mole ko ni loi.

21 Hili ia neʼe au alu ki te ʼu potu fenua ʼo Silia pea mo Silisia.+ 22 Kae neʼe heʼeki sisio te ʼu tisipulo ʼa Kilisito ʼo te ʼu kokelekasio ʼi Sutea kia au. 23 Neʼe gata pe tanatou logo ki te ʼu palalau ʼaeni: “Ko te tagata ʼae neʼe ina fakatagaʼi tatou ʼi te temi muʼa,+ kua ina tala ʼi te temi nei ia te logo lelei ʼo ʼuhiga mo te lotu ʼae neʼe ina faigaʼi ke ina pulihi.”+ 24 Koia neʼe natou fakakololiaʼi ai te ʼAtua ʼuhi ko au.