Te ʼu Gaue ʼa Te Kau Apositolo

21 Neʼe faigataʼa tamatou tuku ia natou. ʼOsi ʼaia neʼe matou heheka ki te vaka ʼo folau fakahagatonu ki Kose. ʼI te ʼaho ake, neʼe matou tau ki Lota, pea mai ai ki Patala. 2 Neʼe matou maʼu he vaka neʼe alu ki Fenisia, koia neʼe matou heheka ai ʼo mavae. 3 Neʼe matou sisio leva mai mamaʼo ki te motu ʼo Sipele ʼi te faʼahi hema, kae neʼe matou fakalaka ai ʼo olo ki Silia pea neʼe matou tau ki Tile, ʼae neʼe tonu ke laku ai te uta ʼo te vaka. 4 Neʼe matou kumi pea mo maʼu te ʼu tisipulo ʼo matou nonofo ai lolotoga ʼaho ʼe fitu. Kae ʼuhi ko te meʼa ʼae neʼe fakaha age e te laumalie maʼoniʼoni kia natou, neʼe natou ui liuliuga kia Paulo ke ʼaua naʼa alu ki Selusalemi.+ 5 ʼI te kua hoko mai ʼo te temi ʼae ke matou mavae ai, neʼe hoko atu tamatou folau. Neʼe natou ʼomai fuli mo matou, fakatahi mo te hahaʼi fafine mo te ʼu fanau, ʼo kaku ki te tuʼa kolo. Pea neʼe matou tuʼutuli ifo ʼi te mataʼone ʼo faikole 6 mo fetauʼineʼaki. Neʼe matou heheka leva ki te vaka kae natou toe liliu ki ʼonatou ʼapi.

7 Neʼe matou fakaʼosi leva tamatou folau mai Tile ʼo matou tau ki Tolemaise, pea neʼe matou fakafelaveʼi ki te ʼu tehina pea mo nonofo mo natou ʼi he ʼaho katoa. 8 ʼI te ʼaho ake, neʼe matou mavae ʼo olo ki Sesalea. Neʼe matou hu ki te ʼapi ʼo Filipo, te tagata faifakamafola. Pea neʼe kau ʼi te ʼu tagata ʼe toko fitu neʼe fakaʼapaʼapaʼi,+ ʼo matou nonofo mo ia. 9 Neʼe maʼu e te tagata ʼaia ʼona ʼofafine ʼe toko fa neʼe heʼeki ʼohoana pea neʼe faifakakikite.+ 10 Kae hili ni ʼaho ʼi tamatou kua nonofo ai, neʼe haʼu mai Sutea te polofeta neʼe higoa ko Akapusi.+ 11 Neʼe haʼu kia matou pea neʼe ina toʼo te kiliʼi pipi ʼo Paulo ʼo ina haʼi ʼaki ʼona vaʼe mo ʼona nima pea ina ui: “ ʼE ui e te laumalie maʼoniʼoni: ‘Ko te tagata ʼae ʼoʼona te kiliʼi pipi ʼaeni, ʼe haʼi fenei anai ia ia e te kau Sutea ʼi Selusalemi,+ pea ʼe natou tuku anai ki te ʼu nima ʼo te hahaʼi ʼae ʼe mole Sutea.’ ”+ 12 ʼI tamatou logo ki ai, ʼo feia mo natou ʼae neʼe ʼi ai, neʼe matou kole mamahi kia Paulo ke ʼaua naʼa hake ki Selusalemi. 13 Kae neʼe ui e Paulo: “He koʼe ʼe kotou fetagihi mo faigaʼi ke kotou fakalotovaivaiʼi au? Ke kotou iloʼi, kua au teuteu ke pilisoniʼi au pea ke au mate foki ʼi Selusalemi ʼuhi ko te huafa ʼo te ʼAliki ko Sesu.”+ 14 ʼI tamatou sisio ʼae ʼe mole fetogi anai tana manatu, neʼe matou haganoa* ai leva pea mo ui: “Ke hoko te finegalo ʼo Sehova.”*

15 Hili te ʼu ʼaho ʼaia, neʼe matou teuteuʼi ai tomatou fagona pea matou olo ai leva ki Selusalemi. 16 Neʼe toe olo foki mo matou ʼihi tisipulo mai Sesalea ʼo natou ʼave matou ki te ʼapi ʼae neʼe tonu ke matou nonofo ai. Neʼe ko te ʼapi ʼo Manasone mai Sipele, pea neʼe kau ia ʼi te ʼu ʼuluaki tisipulo. 17 ʼI tamatou tau atu ki Selusalemi, neʼe fakatalitali fakafiafia matou e te ʼu tehina. 18 Pea ʼi te ʼaho ake, neʼe matou olo mo Paulo kia Sakopo,+ pea neʼe katoa fuli te kau tagata ʼafeā. 19 Neʼe ʼalofa leva kia natou pea ina fakamatalatala te ʼu meʼa ʼae neʼe fai e te ʼAtua ʼi te hahaʼi ʼae ʼe mole Sutea ʼi tana gaue faifakamafola.

20 ʼI tanatou ʼosi logo ki te ʼu meʼa ʼaia, neʼe natou fakakololiaʼi ai te ʼAtua, kae neʼe natou ui ki ai: “Tehina, ʼe ke sio ko te toko lauʼi afe ʼi te kau Sutea kua natou liliu ko he ʼu tisipulo, pea ʼe natou agatonu fuli ki te Lao.+ 21 Kae neʼe natou maʼu logo ʼo ʼuhiga mo koe, ʼe ke akoʼi ki te kau Sutea fuli ʼi te ʼu fenua matapule ke natou liʼaki te Lao ʼa Moisese,* ʼo ke ui age kia natou ke ʼaua naʼa natou silikosisioʼi* ʼanatou fanau pea ke ʼaua naʼa natou mulimuli ki ʼatatou agaʼi fenua.+ 22 Kotea ʼae ʼe tonu ke tou fai? ʼE mahino ia, ʼe natou logo anai kua ke tau mai. 23 Koia ke ke fai te meʼa ʼaeni ʼe matou ui atu: ʼE ʼi ai he ʼu tagata ʼe toko fa ʼi heni neʼe natou fai he fakapapau. 24 Toʼo te ʼu tagata ʼaia pea kotou fakamaʼa ʼo mulimuli ki te Lao, mo ke totogi te ʼu meʼa ʼae ʼe ʼaoga kia natou, ke feala ke tele ʼonatou ʼulu. Pea ʼe iloʼi anai e te hahaʼi fuli ʼe mole moʼoni te ʼu faʼahi ʼae neʼe natou logo ki ai ʼo ʼuhiga mo koe, kae ʼe lelei tau aga pea ʼe ke taupau foki mo te Lao.+ 25 Ki te ʼu tisipulo ʼae ʼe mole Sutea, kua matou faitohi kia natou ʼo fakaha tamatou tonu, ʼae ke natou fakamamaʼo mai te ʼu meʼa ʼae neʼe sakilifisioʼi ki te ʼu taula ʼatua,+ mo te toto,+ mo te ʼu manu ʼae neʼe tege*+ pea mo te ʼu felaveʼi fakasino heʼe ʼaoga.”*+

26 ʼI te ʼaho ake, neʼe toʼo leva e Paulo te ʼu tagata ʼaia ʼo natou fakamaʼa ʼo mulimuli ki te Lao.+ Neʼe natou hu ki te fale lotu ʼo fakaha te temi ʼae ka fakaʼosi ai te ʼu ʼaho ʼo tanatou fakamaʼa ʼaia pea ke momoli ai e te pelepitelo ia he molaga maʼa natou takitokotahi.

27 ʼI te ʼamanaki ʼosi ʼo te ʼu ʼaho ʼaia ʼe fitu, neʼe sisio te kau Sutea ʼo Asia kia ia ʼi te fale lotu. Neʼe natou fakamaveuveuʼi leva te hahaʼi, pea mo natou puke ia ia, 28 ʼo natou kalaga: “ ʼU tagata ʼo Iselaele, kotou tokoni mai! Koʼeni te tagata ʼae ʼe ina akoʼi ki te hahaʼi fuli ʼi te ʼu potu fuli, ia te ʼu faʼahi ʼe fakafeagai ki tatatou hahaʼi, mo tatatou Lao pea mo te fale ʼaeni. Neʼe ina toe ʼaumai foki mo te ʼu hahaʼi Keleka ki te fale lotu pea ina ʼulihi te fale taputapu ʼaeni.”+ 29 Koteʼuhi ki muʼa atu, neʼe natou sisio neʼe fakatahi mo te tagata Efeso ko Tolofime+ ʼi te kolo, pea neʼe natou manatu ai neʼe ʼaumai e Paulo ki te fale lotu. 30 Neʼe maveuveu ia te kolo katoa, pea neʼe feleleʼi mai te hahaʼi fuli ʼo puke ia Paulo mo toho ki tuʼa mai te fale lotu, pea neʼe pupunu atu aipe te ʼu matapa. 31 ʼI tanatou faigaʼi ʼae ke natou matehi ia Paulo, neʼe fakaha age ki te kamutoa* kua maveuveu ia Selusalemi katoa. 32 Neʼe ina toʼo atu aipe te kau solia pea mo te ʼu pule solia* ʼo feleleʼi kia natou. ʼI tanatou sisio ki te kamutoa pea mo te kau solia, neʼe natou tuku leva tanatou ta ia Paulo.

33 Pea neʼe fakaovi age te kamutoa ʼo ina puke ia Paulo pea ina fakatotonu ke haʼi ʼaki he ʼu seini ʼe lua.+ Neʼe ina fehuʼi leva pe ko ai ia ia pea kotea ʼae neʼe ina fai. 34 Kae ʼi te hahaʼi, neʼe kalagaʼi e ʼihi he meʼa kae kalagaʼi e ʼihi he tahi age meʼa. ʼI tana mole lava mahino ki he meʼa ʼuhi ko te maveuveu, neʼe ina fakatotonu ke ʼave ia ia ki te fale solia. 35 Kae ʼi te kaku ʼa Paulo ki te mata tuʼuga, neʼe maʼua leva ke fata e te kau solia ʼi te agamalohi ʼa te hahaʼi, 36 he neʼe haga muliʼi natou e te hahaʼi ʼo natou kalaga: “Kotou matehi ia ia!”

37 ʼI te temi ʼae neʼe fakahu ai ia Paulo ki te fale solia, neʼe ina ui ki te kamutoa: “ ʼE gafua koa ke au palalau atu?” Neʼe ina ui: “ ʼE ke poto koa koe ʼi te Fakakeleka? 38 ʼE mole ko koe koa la te tagata Esipito ʼae neʼe ina lagaʼi he agatuʼu ʼi he ʼu kiʼi temi ki muʼa atu pea mo ina taki ki te toafa te toko 4 000 kau tagata faifakapo?” 39 Pea neʼe tali age e Paulo: “Kailoa ia, ko au ko te tagata Sutea,+ mai Talesi+ ʼi Silisia, ko he kolo ʼe logologona. Koia ʼe au kole atu ke ke fakagafua mai ke au palalau ki te hahaʼi.” 40 ʼI te fakagafua age e te kamutoa, neʼe tuʼu ia Paulo ʼi te mata tuʼuga pea neʼe ina hiki tona nima ki te hahaʼi. Neʼe natou fakalologo ai, pea neʼe palalau kia natou ʼi te Fakahepeleo,+ ʼo ina ui: