Lua Samuele
15 Hili te ʼu meʼa fuli ʼaia, neʼe toʼo leva e Apesalone hana saliote fakahau, mo ʼana hosi pea mo he ʼu tagata ʼe toko 50 ke natou feleleʼi ʼi ʼona muʼa.+ 2 Neʼe ʼala uhuuhu ia Apesalone ʼo alu ʼo tuʼu ʼi te vaʼe ala ʼo te ala ʼae ʼe alu ki te matapa ʼo te kolo.+ Pea ka alu he tagata mo hona fihifihia ke fakamauʼi e te hau,+ neʼe pauʼi ia ia e Apesalone ʼo ina ui age: “ ʼE ke haʼu mai te kolo fea?” pea neʼe ina tali age: “ ʼE au haʼu mai he telepi ʼi te ʼu telepi ʼo Iselaele.” 3 Pea neʼe ui e Apesalone ki ai: “Sio mai, ʼe lelei mo totonu tau tagi, kae neʼe mole fakatuʼutuʼu e te hau he tahi ke fagono atu.” 4 Neʼe hoko atu e Apesalone: “Ka na neʼe fakanofo la ia au ko he tuʼi fakamau ʼi te fenua! ʼE au tokaga anai ke fakahoko te faitotonu ki te tagata ʼae ʼe haʼu kia au mo hona fihifihia ke au fakamauʼi.”
5 Pea ka fakaovi age he tahi kia Apesalone mo fia tulolo ʼi ʼona muʼa, neʼe ina faoʼi tona nima ke ina puke ia ia pea neʼe ʼuma ki ai.+ 6 Neʼe fai feia e Apesalone ki te kau Iselaele fuli ʼae neʼe olo ke fakamauʼi natou e te hau. Neʼe fakamaliu ai e Apesalone te loto ʼo te hahaʼi ʼo Iselaele kia ia.+
7 ʼI te fakaʼosi ʼo te ʼu taʼu ʼe fa,* neʼe ui leva e Apesalone ki te hau: “Fakalelei siʼou loto, kae ke ke fakagafua mai ke au alu ki Hepelone+ ʼo fakahoko te fakapapau ʼae neʼe au fai kia Sehova. 8 Koteʼuhi, ʼi te temi ʼae neʼe au nofo ai ʼi Kesuli,+ ʼi Silia, neʼe au fai te fakapapau ʼaeni:+ ‘Kapau ʼe fakaliliu au e Sehova ki Selusalemi, ʼe au momoli anai he molaga* kia Sehova.’ ” 9 Pea neʼe ui e te hau ki ai: “Alu ʼi te fimalie.” Neʼe tuʼu ake ai ʼo alu ki Hepelone.
10 Kae neʼe fekauʼi leva e Apesalone he kau ʼave logo ke olo fakafufu ki te ʼu telepi fuli ʼo Iselaele, ʼo ina ui age kia natou: “ ʼI te temi pe ʼae ʼe kotou logo ai ki te pupuhi ʼo te fakatagi pupuhi, kotou tala: ‘Kua hau ia Apesalone ʼi Hepelone!’ ”+ 11 Neʼe mavae mai Selusalemi te kau tagata ʼe toko 200 ʼo natou olo fakatahi mo Apesalone. Neʼe fakaafe natou pea neʼe natou olo ai mo ia, kae neʼe mole natou malama ki te meʼa ʼae neʼe hoko. 12 Pea tahi ʼae meʼa, ʼi tana momoli te ʼu sakilifisio, neʼe pauʼi e Apesalone ia Asitofele,+ te tagata Kilone pea mo faitokoni ʼa Tavite,+ ʼi tana nofo ʼi tona kolo ko Kilone.+ Neʼe malohi ʼaupito te fakafeagai, pea neʼe kaugamalie age te hahaʼi ʼae neʼe lagolago kia Apesalone.+
13 Ki muli age, neʼe fakaha leva kia Tavite: “Kua maliu te loto ʼo te hahaʼi ʼo Iselaele kia Apesalone.” 14 ʼI te temi pe ʼaia, neʼe ui e Tavite ki ʼana hahaʼi faifekau fuli ʼae neʼe fakatahi mo ia ʼi Selusalemi: “Tou feholaki,+ he ʼe mole tuku anai e Apesalone ke maʼuli he tahi ia tatou! Kotou fakavilivili, naʼa ina ʼohofi fakafokifa tatou, mo matehi tatou ʼaki te heleta pea mo maumauʼi te kolo!”+ 15 Neʼe tali e te hahaʼi faifekau ʼa te hau: “Siʼomatou ʼaliki te hau, ko he tonu pe ʼe ke fai ʼe matou mulimuli pe anai ki ai.”+ 16 Koia, neʼe mavae ai te hau pea neʼe mulimuli ia ia tona loto fale katoa, kae neʼe tuku e te hau ʼana fafine ʼe toko hogofulu+ ke tokakaga ki te fale hau. 17 Neʼe alu te hau pea neʼe mulimuli ia ia te hahaʼi katoa, pea neʼe natou tutuʼu leva ʼi Pete-melake.
18 Neʼe fakalaka leva ia muʼa ʼo te hau ʼana hahaʼi faifekau fuli ʼae neʼe mavae mo ia, mo te kau Keleti, mo te kau Peletite+ pea mo te kau Kiete+ fuli, te ʼu tagata ʼe toko 600 ʼae neʼe natou mulimuli ia ia mai Kiete.+ Pea neʼe ina sioʼi leva natou. 19 Neʼe ui leva e te hau kia Itai,+ te tagata Kiete: “He koʼe ʼe ke haʼu anai mo matou? Toe liliu pea ke nofo mo te hau foʼou, he ʼe ko koe ko he matapule pea neʼe ke hola mai foki la mai tou fenua. 20 Neʼe hoki ke tau mai pe ʼanafi, pea ʼe tonu koa ʼi te ʼaho nei ke au feʼaveʼaki koe mo matou, kae ʼe mole pe la au iloʼi pe ʼe au alu kifea? Toe liliu pea ke ke alu mo ʼou tehina, pea ʼofa pe ke fakaha atu e Sehova tona ʼofa* mo tana agatonu!”+ 21 Kae neʼe tali age e Itai ki te hau: “Siʼoku ʼaliki te hau, ʼe au tala moʼoni atu kia koe pea ia muʼa ʼo Sehova: Ko he faʼahi pe ʼe ke nofo ai anai, pe ʼe ki te mate peʼe ki te maʼuli, ʼe au nofo ai anai!”+ 22 Neʼe ui leva e Tavite kia Itai:+ “ ʼIo, alu pea ke fakalaka.” Pea neʼe fakalaka ai ia Itai, te tagata Kiete mo ʼana tagata mo te ʼu fanau fuli.
23 Neʼe fetagihi leʼo lahi te hahaʼi fuli ʼo te fenua ʼi te fakalaka ʼa te hahaʼi fuli ʼaia, pea neʼe tuʼu ovi te hau ki te Vai Tafe* ʼo Kitelone ʼae kua mamaha.+ Neʼe fakalaka te hahaʼi fuli ʼo olo ki te ala ʼae ʼe alu ki te toafa. 24 Neʼe toe ʼi ai foki mo Satoke+ pea mo te kau Levite+ fuli ʼae ʼe natou fata te aleka+ ʼo te fuakava ʼo te ʼAtua moʼoni.+ Neʼe natou tuku ifo leva ki lalo te Aleka ʼo te ʼAtua moʼoni. Pea neʼe alu Apiata+ ki ai kae fakaʼosiʼosi age te fakalaka ʼa te hahaʼi fuli ʼae neʼe mavae ʼi te kolo. 25 Kae neʼe ui e te hau kia Satoke: “Toe ʼave te Aleka ʼo te ʼAtua moʼoni ki te kolo.+ Kapau ʼe ʼofa ia Sehova, ʼe ina toe fakaliliu mai anai ia au, pea mo ina fakafealagia anai ke au sio ki ai pea mo te faʼahi ʼae ʼe tuku ai.+ 26 Kae kapau ʼe ina ui: ‘ ʼE mole au ʼofa ia koe,’ pea ke ina fai kia au te meʼa ʼae ʼe lelei ki ʼona mata.” 27 Pea neʼe ui e te hau kia Satoke, te pelepitelo: “ ʼE mole ko koe koa la ko he tagata ʼe ina iloʼi ia te ʼu meʼa ʼae neʼe ha?+ ʼE tonu ke kolua toe liliu mo Apiata ki te kolo ʼi te fimalie. Pea ʼe tonu ke olo mo koe tou foha ko Asimaate pea mo Sonatane,+ te foha ʼo Apiata. 28 Pea ʼe au nofo anai ʼi te toafa, ʼi te ʼu faʼahi ʼae ʼe fakalaka ʼi te Solotane, ʼo kaku ki te tau mai ʼo he ʼu logo mai ia koulua.”+ 29 Koia, neʼe toe ʼave ai e Satoke mo Apiata te Aleka ʼo te ʼAtua moʼoni ki Selusalemi, pea neʼe nā nonofo ai.
30 ʼI te hake ʼa Tavite ʼi te Moʼuga ʼo Oliveto,+ neʼe tagi ʼi tana alu ʼaia. Neʼe pulou tona ʼulu pea neʼe haʼele kiliʼi vaʼe. Neʼe toe pulouʼi foki e te hahaʼi fuli ʼae neʼe olo mo ia ʼonatou ʼulu pea mo fetagihi ʼi tanatou hake ʼaia. 31 Pea neʼe fakaha age kia Tavite te faʼahi ʼaeni: “ ʼE kau ia Asitofele ʼi te kau fakafeagai+ ʼae ʼe lagolago kia Apesalone.”+ Neʼe ui leva e Tavite: “Sehova e,+ fakalelei siʼou loto, kae ke to noa te ʼu tokoni ʼae ʼe fai e Asitofele!”+
32 ʼI te tau atu ʼa Tavite ki te tumutumu ʼo te moʼuga ʼae ʼe olo mahani ki ai te hahaʼi ʼo tulolo ia muʼa ʼo te ʼAtua, neʼe alu age ia Usai,+ te tagata Alaki+ ʼo fakafelaveʼi kia ia, pea neʼe makahaehae tona kofu mo kelekeleʼia tona ʼulu. 33 Kae neʼe ui age e Tavite ki ai: “Kapau ʼe ke fakalaka mo au, ʼe ke liliu anai ko he kavega kia au. 34 Kae kapau ʼe ke toe liliu ki te kolo, ʼe tonu ke ke ui kia Apesalone: ‘Siʼoku Hau, ko au ko tau tagata faifekau. ʼI te temi muʼa, neʼe ko au ko te tagata faifekau ʼo tau tamai, kae ʼi te temi leva ʼaeni, kua au liliu ko tau tagata faifekau.’+ Kapau ʼe ke fai feia, pea ʼe feala ai ke ke fakato noa te ʼu tokoni ʼa Asitofele pea mo ke tokoni mai.+ 35 ʼE mole ke nofo anai koa la mo Satoke pea mo Apiata, te ʼu pelepitelo? ʼE tonu anai ke ke fakaha age kia Satoke mo Apiata, te ʼu pelepitelo ia meʼa fuli ʼe ke logo anai ki ai ʼi te fale hau.+ 36 Pea ʼe toe fakatahi foki mo naua ʼonā foha, ia Asimaate+ te foha ʼo Satoke pea mo Sonatane+ te foha ʼo Apiata, pea kotou fekauʼi mai ia naua ʼaia ke nā fakaha mai te ʼu meʼa fuli ʼae ʼe kotou logo anai ki ai.” 37 Neʼe toe liliu ai ia Usai, te kaumeʼa ʼo Tavite+ ki te kolo. Neʼe tau atu pe ʼi te temi ʼae neʼe ulu ai ia Apesalone ki Selusalemi.