Selemia
22 Koʼeni te folafola ʼa Sehova: “Alu ki te fale ʼo te hau ʼo Suta ʼo ʼave te logo ʼaeni. 2 ʼE ke ui anai ki ai: ‘Fagono ki te folafola ʼa Sehova hau ʼo Suta, ia koe ʼae ʼe ʼafio ʼi te hekaʼaga fakahau ʼo Tavite, pea ke toe fagono mo ʼau tagata faifekau pea mo tau hahaʼi ʼae ʼe feulufi ʼi te ʼu matapa ʼaeni. 3 Koʼeni te meʼa ʼae ʼe ui e Sehova: “Kotou lagolago ki te faitotonu. Kotou puipui ia natou ʼae ʼe kaihaʼa e te hahaʼi agakaka. ʼAua takotou gaohi koviʼi te kau matapule. ʼAua naʼa kotou fakamamahiʼi te ʼu fanau hala mo tamai pea mo te ʼu fafine vitua.+ Pea ʼaua naʼa kotou liligi ʼi te fenua ʼaeni te toto ʼo natou ʼae ʼe mole natou fai he meʼa ʼe kovi.+ 4 Kapau ʼe kotou tokaga ʼo maʼuliʼi te ʼu folafola ʼaeni, ʼe fehufi anai ʼi te ʼu matapa ʼo te fale hau ʼaeni te ʼu hau ʼae ʼe ʼafio ʼi te hekaʼaga fakahau ʼo Tavite,+ ʼe natou heheka ʼi ni saliote mo ni hosi, ʼei, ʼe fehufi anai te ʼu hau mo ʼanatou tagata faifekau pea mo tanatou hahaʼi.” ’+
5 “ ʼE ui e Sehova: ‘Kapau ʼe mole kotou fakalogo ki te ʼu folafola ʼaia, ʼe au fakapapau e au totonu, ʼe maumauʼi anai ia te fale hau ʼaeni.’+
6 “Koʼeni te meʼa ʼae ʼe ui e Sehova ʼo ʼuhiga mo te fale ʼo te hau ʼo Suta:
‘ ʼE ke hage kia au ko Kileate,
Ohage ko te tumutumu ʼo Lipane.
Kae ʼe au fakaliliu anai koe ko he toafa,
ʼE mole toe nofoʼi anai ʼou kolo fuli.+
7 ʼEi, ʼe au hinoʼi anai ni tagata fakatupu maumau ke natou tauʼi koe,
ʼO takitahi mo ia tana mahafu.+
ʼE natou tuʼusi anai ʼou fuʼu sete ʼae ʼe matalelei
Pea ʼe natou laku anai ki te afi.+
8 “ ‘Pea ʼe fakalaka anai ia tafa ʼo te kolo ʼaia ni hahaʼi mai ni puleʼaga kehekehe pea ʼe natou feuiʼaki anai: “He koʼe neʼe fai e Sehova te meʼa ʼaia ki te kolo lahi ʼaeni?”+ 9 Pea ʼe tali age anai: “ ʼUhi he neʼe natou liʼaki te fuakava ʼa Sehova tonatou ʼAtua pea neʼe natou tulolo mo tauhi ki ʼihi ʼatua.” ’+
10 ʼAua naʼa kotou tagiʼi te mate
Pea ʼaua naʼa kotou fakaʼofaʼofa ki ai.
Kae kotou tagi mamahi kia ia ʼae ʼe mavae,
He ʼe mole toe liliu mai anai ki te fenua ʼae neʼe tupu ai, kailoa ia, ʼe mole toe sio anai ia ki ai.
11 “Koʼeni te meʼa ʼae neʼe ui e Sehova ʼo ʼuhiga mo Salume*+ foha ʼo Sosiasi, te hau ʼo Suta ʼae neʼe ina fetogi ia Sosiasi+ ʼi tona ʼuhiga hau pea kua mavae ʼi te koga meʼa ʼaeni: ‘ ʼE mole toe liliu mai anai ia, 12 he ʼe mate anai ʼi te fenua ʼae neʼe ʼave popula ki ai pea ʼe mole toe sio anai ia ki te fenua ʼaeni.’+
13 Malaʼia kia ia ʼae ʼe ina laga he ʼapi kae ʼe mole fakaʼapaʼapa ki te faitotonu,
Mo ina fai ni koga fale ʼi te laufata kae ʼe heʼe faitotonu,
Mo ina fakamaʼua ki tona tatau ke gaue noa maʼa ia,
Kae ʼe mole ina totogi,+
14 Pea ʼe ina ui: ‘ ʼE au laga anai hoku toe ʼapi
Mo ni koga fale lalahi ʼi te laufata.
ʼE au fai anai ni matapa fakamalama,
Pea ʼe au ʼaofi anai ʼona kaupa ʼaki te ʼakau ʼae ko te sete ʼo au pena kula.’
15 ʼE hoko atu anai koa ia tau ʼafio ʼuhi he ʼe lahi age tau fakaʼaogaʼi te ʼakau ʼae ko te sete ʼi ʼihi?
Neʼe toe kai pe la tau tamai pea mo inu,
Kae neʼe lagolago ia ki te faitotonu,+
Pea neʼe fua lelei ia meʼa fuli kia ia.
16 Neʼe tokaga ia ke fakamauʼi ʼi te faitotonu ia natou ʼae ʼe lotomamahi mo natou ʼae ʼe masisiva,
ʼO fua lelei ai ia meʼa fuli.
‘ ʼE mole tonu koa la ke feia te aga ʼa natou ʼae ʼe natou ui ʼe natou iloʼi au?’ ko te ui ʼaia ʼa Sehova.
17 ‘Kae ko koe, ʼe tuku pe ʼou mata mo tou loto ki te ʼu meʼa ʼaeni: ko te maʼu fakakaka ʼo ni koloa,
Te liligi ʼo te toto ʼo natou ʼae ʼe mole natou fai he meʼa ʼe kovi,
Pea mo te kaka mo te kaihaʼa.’
18 “Koia, koʼeni te folafola ʼa Sehova ʼo ʼuhiga mo Soakimi+ foha ʼo Sosiasi, hau ʼo Suta:
‘ ʼE mole putu anai he tahi maʼa ia mo ui:
“Oie siʼoku tehina! Oie siʼoku tuagaʼane!”
ʼE mole putu anai he tahi mo ui:
“Oie siʼoku pule! Oie siʼoku hau!”
19 ʼE tanu anai ia ia ohage ko he asino.+
ʼE toho anai tona sino pea ʼe li anai
Ki tuʼa ʼi te ʼu matapa ʼo Selusalemi.’+
20 Hake* ki Lipane ʼo kalaga.
Ke logo tou leʼo ʼi Pasani
Pea ke kalaga mai Apalimi!+
Kua laliki te ʼu tagata fuli ʼae neʼe laukau ia koe.+
21 Neʼe au palalau atu ʼi te temi ʼae neʼe ke fimalie ai.
Kae neʼe ke tali mai:
‘ ʼE mole au fakalogo anai.’+
Neʼe feia pe tau aga talu tau kei tupulaga.
ʼEi, neʼe mole ke fakalogo mai.+
22 ʼE ʼave mamaʼo anai ʼau tauhi ovi fuli e te matagi,+
Pea ʼe ʼave popula anai te ʼu tagata ʼae ʼe laukau ia koe.
ʼE ke ufiufi anai pea ʼe fakalainoaʼi anai koe ʼuhi ko ʼou malaʼia fuli.
23 Ia koe ʼae ʼe nofo ʼi Lipane,+
ʼI te lotolotoiga ʼo te ʼu fuʼu sete,+
ʼE ke lauga anai moka hoko mai ʼou mamahi,
Ohage ko te mamahi ʼo he fafine ʼe fanau!”+
24 “ ʼE ui e Sehova: ‘ ʼE au tala moʼoni atu, tatau aipe pe ʼe ko Konia*+ foha ʼo Soakimi,+ te hau ʼo Suta, neʼe ko ia te mama fakailoga ʼae ʼi toku nima mataʼu, ʼe au toʼo anai mai ai! 25 “ ʼE au tuku anai koe ki te nima ʼo natou ʼae ʼe natou fia matehi koe, ʼei, ki te nima ʼo natou ʼae ʼe ke mataku ai, ki te nima ʼo te Hau ʼo Papiloni ko Nepukanesa pea ki te nima ʼo te kau Kaletea.+ 26 ʼE au li anai ia koe mo tau faʼe ʼae neʼe ina fanauʼi koe ki he tahi fenua, ko he fenua neʼe mole kolua tutupu ai pea ʼe kolua mamate ai anai.” 27 ʼE mole natou toe liliu anai ki te fenua ʼae ʼe natou manatu tuʼumaʼu ki ai.+
28 Ko te tagata ʼae ko Konia, ʼe mole koa la ko he ipu ʼe meʼa noaʼi mo foa,
He ipu ʼe mole loto ki ai he tahi?
He koʼe ʼe lipaki ki te kele ia ia mo tona hakoga
Pea mo li natou ki he fenua ʼe mole natou iloʼi?’+
29 Hahaʼi ʼo te kele, kotou fagono ki te folafola ʼa Sehova.
30 Koʼeni te folafola ʼa Sehova:
‘Kotou tohi te tagata ʼaeni ohage ko he tahi neʼe mole maʼu fanau,
Ohage ko he tahi neʼe mole iku hana fakatuʼutuʼu ʼi tona maʼuli.
ʼE mole anai he tahi ʼo tona hakoga
ʼE lava heka ʼi te hekaʼaga fakahau ʼo Tavite pea mo ʼafio ʼi Suta.’ ”+