Lua Samuele

17 Pea neʼe ui leva e Asitofele kia Apesalone: “Fakalelei siʼou loto, kae ke ke fakagafua mai ke au filifili he ʼu tagata ʼe toko 12 000, pea ke matou olo ʼo tuli ia Tavite ʼi te po ʼaeni. 2 ʼE au ʼohofi anai ia ia ʼi te temi ʼae ʼe gaʼegaʼe ai pea ʼe mole kei ʼi ai hona malohi,*+ pea ʼe au fakamatakuʼi anai ia ia. ʼE feholaki anai te hahaʼi fuli ʼae ʼe fakatahi mo ia, pea ʼe au matehi pe anai ia te hau.+ 3 Pea ʼe au toe fakaliliu mai anai te hahaʼi fuli kia koe. ʼE fakalogo anai te toe liliu mai ʼa te hahaʼi fuli ki te meʼa ʼae ka hoko ki te tagata ʼae ʼe ke kumi. Pea ʼe maʼuʼuli anai te hahaʼi fuli ʼi te tokalelei.” 4 Neʼe lelei te manatu ʼaia kia Apesalone pea mo te kau takitaki fuli ʼo Iselaele.

5 Kae neʼe ui e Apesalone: “Ke pauʼi mai muʼa ia Usai,+ te tagata Alaki, pea tou fakalogo ki te meʼa ʼae ka ina ui.” 6 Neʼe haʼu ai ia Usai kia Apesalone. Neʼe ui leva e Apesalone: “Koʼeni te tokoni ʼae neʼe tuku mai e Asitofele. ʼE tonu koa ke matou mulimuli ki ai peʼe kailoa? Fakaha mai te meʼa ʼae ʼe tonu ke matou fai.” 7 Pea neʼe ui e Usai kia Apesalone: “ ʼI te aluʼaga leva ʼaeni, ʼe mole lelei te tokoni ʼa Asitofele!”+

8 Neʼe hoko atu e Usai: “ ʼE ke iloʼi lelei pe ko tau tamai mo ʼana tagata ʼe ko ni hahaʼi malolohi+ pea ʼe natou itaita, ohage ko he uluso fafine kua puli ʼona ʼuhi.+ Pea tahi ʼae meʼa, ko tau tamai ʼe ko he tagata tau,+ ʼe mole nofo anai mo te hahaʼi ʼi te poʼuli. 9 ʼE lolotoga nono nei ia ʼi he ʼana* peʼe ʼi he tahi age faʼahi.+ Pea kapau ʼe ko ia ʼae ʼe ina ʼuluaki ʼohofi tatou, ʼe ui anai e natou ʼae ka logo ki ai: ‘Kua to te hahaʼi ʼae neʼe mulimuli ia Apesalone!’ 10 Maʼia mo te tagata ʼae ʼe lototoʼa ohage ko he laione,*+ ʼe liliu anai ia ʼo vaivai ʼuhi ko tana mataku, he ʼe iloʼi e Iselaele katoa ko tau tamai ʼe ko he tagata malohi+ pea ʼe lototoʼa te ʼu tagata ʼae ʼe fakatahi mo ia. 11 Koʼeni taku tokoni: Ke maʼopoʼopo mai ia Iselaele katoa kia koe, mai Tane ki Pele-sepa,+ ʼae ʼe natou kaugamalie ohage ko te ʼu fisiʼi ʼone ʼo te tai,+ pea ke ke taki natou ki te tau. 12 ʼE tou tauʼi anai ia ia ʼi he faʼahi pe ʼe nofo ai, pea ʼe tou ʼohofi anai ia ia ohage ko te to ʼo te hahau ki te kele. Pea ʼe mole hao anai he tahi ia natou, pe ʼe ko ia peʼe ko te ʼu tagata ʼae ʼe fakatahi mo ia. 13 Kapau ʼe hola ki he kolo, ʼe olo anai ia Iselaele katoa mo he ʼu maea, pea ʼe tou toho anai te kolo ʼaia ki te vai tafe.* ʼE mole toe maʼu ai anai he ʼu foʼi maka.”

14 Neʼe ui leva e Apesalone mo te ʼu tagata fuli ʼo Iselaele: “ ʼE lelei age te tokoni ʼa Usai, te tagata Alaki+ ʼi te tokoni ʼa Asitofele!” Koteʼuhi neʼe kua fakatuʼutuʼu* e Sehova ke to noa te tokoni lelei ʼa Asitofele,+ ke feala ai kia Sehova ke ina fakahoko he malaʼia kia Apesalone.+

15 Ki muli age, neʼe ui age e Usai kia Satoke mo Apiata,+ te ʼu pelepitelo: “Koʼeni te tokoni ʼae neʼe fai e Asitofele kia Apesalone mo te kau tagata takitaki ʼo Iselaele, pea koʼeni te tokoni ʼae neʼe au fai. 16 Koia, kolua foimo fakatokaga age kia Tavite: ‘ ʼI te po ʼaeni, ʼaua naʼa ke nofo ʼi te toafa, ʼi te ʼu faʼahi ʼae ʼe feala ke fakalaka ai te hahaʼi ʼi te Solotane,* kae ke ke foimo fakalaka ʼi te vai tafe, naʼa pulihi* katoa ia koe mo te hahaʼi ʼae ʼe fakatahi mo koe.’ ”+

17 Neʼe nonofo ia Sonatane+ mo Asimaate+ ʼi Ene-lokeli,+ he neʼe mole tonu ke sio mai he tahi ki tanā ulu ki te kolo. Koia neʼe alu ai he taʼahine faifekau ʼo fakaha age kia naua te logo, pea neʼe nā olo ai ʼo fakaha ki te Hau ko Tavite. 18 Kae neʼe sio he tagata tupulaga kia naua pea neʼe ina tala kia Apesalone. Neʼe nā olo fakavilivili ai. Pea neʼe nā tau leva ki te ʼapi ʼo he tagata ʼi Pasulimi,+ neʼe ʼi ai te vai keli ʼi tona malaʼe. Neʼe nā hihifo ʼo fenonoʼi ai, 19 pea neʼe folahi e te ʼohoana ʼo te tagata he kie ʼi te vai keli, pea neʼe ina fola ʼi ai he ʼu tegaʼi fulumeto* neʼe lailaiʼi. Pea neʼe mole iloʼi pe la e he tahi te faʼahi ʼaia. 20 Neʼe ʼomai leva te hahaʼi faifekau ʼa Apesalone ki te ʼapi ʼaia, ʼo natou fehuʼi ki te fafine: “ ʼE ʼifea ia Asimaate mo Sonatane?” Neʼe tali age e te fafine: “Neʼe nā fakalaka ʼi heni ʼo olo ki te vai tafe.”+ Neʼe kumi ai naua e te ʼu tagata kae neʼe mole natou maʼu. Neʼe natou toe liliu ai ki Selusalemi.

21 ʼI te ʼosi mavae ʼa te ʼu tagata ʼaia, neʼe nā ʼomai ki tuʼa mai te vai keli ʼo nā olo ʼo fakaha te logo ki te Hau ko Tavite. Neʼe nā ui age ki ai: “Kotou tutuʼu ake ʼo fakalaka fakavilivili ʼi te vai tafe, he ʼe koʼeni te tokoni ʼae neʼe fai e Asitofele ʼo ʼuhiga mo koutou.”+ 22 Neʼe tutuʼu ake aipe ia Tavite mo te hahaʼi fuli ʼae neʼe fakatahi mo ia, ʼo fakalaka ʼi te Solotane. ʼI te mafoata, neʼe kua natou ʼosi fakalaka fuli ʼi te Solotane.

23 ʼI te sio ʼa Asitofele neʼe mole natou mulimuli ki tana tokoni, neʼe ina teuteuʼi ai he asino ʼo toe liliu ki tona ʼapi, ʼi tona kolo.+ ʼI tana ʼosi foaki he ʼu fakatotonu ki tona loto fale,+ neʼe ina tautau leva tona kia.+ Neʼe mate ai pea neʼe tuku tona sino ki te fale maka fakafamili.

24 Lolotoga te temi ʼaia, neʼe alu ia Tavite ki Mahanaimi,+ pea neʼe fakalaka ia Apesalone mo te ʼu tagata fuli ʼo Iselaele ʼi te Solotane. 25 Neʼe fakanofo e Apesalone ia Amasa+ ke pule ki te foʼi kautau, moʼo fetogi ia Soape.+ Ko Amasa neʼe ko te foha ʼo te tagata neʼe higoa ko Sitila, te tagata Iselaele ʼae neʼe momoe mo Apikaile,+ te ʼofafine ʼo Nakase pea mo te tehina ʼo Teselusa, te faʼe ʼa Soape. 26 Neʼe nonofo leva ia Apesalone mo te kau Iselaele ʼi te fenua ʼo Kileate.+

27 ʼI te tau atu pe ʼa Tavite ki Mahanaimi, neʼe ʼomai kia ia ia Sopi, te foha ʼo Nakase mai Lapa+ te kolo ʼo te kau Amone, mo Makile,+ te foha ʼo Amiele mai Lotepale, pea mo Palesilai,+ te tagata Kileate mai Lokelime. 28 Neʼe natou ʼaumai he ʼu palepale, mo he ʼu pesini, mo he ʼu kulo, mo he fulumeto, mo he olose, mo he falena, mo he ʼu tegaʼi fulumeto neʼe taʼo, mo he ʼu aliko, mo he ʼu lenitili, mo he ʼu tegaʼi fulumeto neʼe tunu, 29 mo he meli, mo he potilo, mo he ʼu ovi pea mo he ʼu folomasi.* Neʼe natou ʼaumai te ʼu meʼa fuli ʼaia kia Tavite mo te hahaʼi ʼae neʼe fakatahi mo ia,+ he neʼe natou ui: “ ʼE gaʼegagaʼe, mo fia kakai pea mo fia iinu te hahaʼi ʼaia ʼi te toafa.”+