Selemia
47 Koʼeni te folafola ʼa Sehova ki te polofeta ko Selemia ʼo ʼuhiga mo te kau Filisitini,+ ʼi muʼa ʼo te maʼu e Falaone ia Kasa. 2 Koʼeni te logo ʼa Sehova:
“Kotou fagono! ʼE tatafe mai ni vai mai te potu noleto.
ʼE natou liliu anai ko he vai tafe ʼe hake.
ʼE lofia ai anai te fenua pea mo meʼa fuli ʼe maʼu ai,
Te kolo mo ʼona hahaʼi.
ʼE kalaga anai te hahaʼi tagata,
Pea ʼe lauga anai te hahaʼi fuli ʼo te fenua.
3 ʼI te logo ʼae ki te patato ʼo te ʼu vaʼe ʼo te ʼu hosi,
Mo te logoaʼa ʼa te ʼu saliote,
Pea mo te logoaʼa ʼo te ʼu foʼi teka,
ʼE mole pe la toe sisio ki muli te ʼu tamai moʼo haofaki ʼonatou foha,
Koteʼuhi kua natou lotovaivai.
4 ʼE hoko te ʼaho ʼae ʼe molehi ai anai te kau Filisitini fuli.+
ʼE pulihi anai ʼi Tile+ mo Sitoni+ ia te hahaʼi fuli ʼae neʼe kau mo natou.
5 Kua ʼulu tula* ia Kasa.
Kua fakalogologo ia Asekaloni.+
Ia koe ʼae ʼe kei nofo ʼi te potu fenua laulelei,
ʼE kaku anai ki ʼafea tau hifi tou sino?+
6 Ia koe te heleta ʼa Sehova,+
ʼE ke malolo anai koa ʼafea?
Toe liliu ki tou ʼaiʼaga!
Malolo ai mo fakalogologo.
7 ʼO feafeaʼi pe hana malolo
Kae neʼe foaki age e Sehova te fakatotonu kia ia?
Neʼe ina fekauʼi
Ke alu ʼo tauʼi ia Asekaloni pea mo te matatai.”+