Sosue

21 Neʼe fakatahitahi leva te ʼu pule famili ʼo te kau Levite ia muʼa ʼo te pelepitelo ko Eleasale,+ mo Sosue te foha ʼo Nune, pea mo te ʼu pule famili ʼo te ʼu telepi ʼo Iselaele, 2 ʼi Silo,+ ʼi te fenua ʼo Kanaane. Neʼe natou ui age: “Neʼe fakatotonu e Sehova ʼaki ia Moisese ke foaki mai kia matou he ʼu kolo ke matou nonofo ai, pea mo ʼonatou koga meʼa lunaʼia ke tuku ki ai tamatou faga manu.”+ 3 Koia neʼe mulimuli te kau Iselaele ki te fakatotonu ʼa Sehova, ʼo natou foaki ki te kau Levite he ʼu kolo+ pea mo ʼonatou koga meʼa lunaʼia, neʼe natou toʼo mai ʼonatou tofiʼa.+

4 Neʼe fai he toho ʼo maʼu ai he vahe ʼo te famili ʼo te kau Keate.+ ʼI te ʼosi fai ʼo te toho, neʼe maʼu leva e* te kau Levite, te hologa ʼo te pelepitelo ko Alone ia he ʼu kolo ʼe 13 mai te fenua ʼo te telepi ʼo Suta,+ mo te telepi ʼo Simeone,+ pea mo te telepi ʼo Pesamino.+

5 Pea neʼe foaki ki* te tahi kau Keate he ʼu kolo ʼe hogofulu, neʼe toʼo mai te fenua ʼo te ʼu famili ʼo te telepi ʼo Efalaimi,+ mo te telepi ʼo Tane, pea mo te vaelua ʼo te telepi ʼo Manase.+

6 Pea neʼe foaki ki te kau Kelesoni+ he ʼu kolo ʼe 13, neʼe toʼo mai te fenua ʼo te ʼu famili ʼo te telepi ʼo Isakale, mo te telepi ʼo Asele, mo te telepi ʼo Nefetali, pea mo te vaelua ʼo te telepi ʼo Manase, ʼae ʼi te potu fenua ʼo Pasani.+

7 Pea neʼe foaki ki te kau Melali+ he ʼu kolo ʼe 12, neʼe toʼo mai te fenua ʼo te ʼu famili ʼo te telepi ʼo Lupeni, mo te telepi ʼo Kate, pea mo te telepi ʼo Sepulone. Neʼe vaevae leva ʼi ʼonatou famili.+

8 Koia neʼe fai ai e te kau Iselaele he toho ke foaki ki te kau Levite he ʼu kolo pea mo ʼonatou koga meʼa lunaʼia, ʼo mulimuli pe ki te fakatotonu ʼae neʼe fai e Sehova ʼaki ia Moisese.+

9 Neʼe toʼo ai leva he ʼu kolo mai te fenua ʼo te telepi ʼo Suta pea mo te telepi ʼo Simeone. ʼE tuʼu ʼi heni te ʼu higoa ʼo te ʼu kolo ʼaia.+ 10 Pea neʼe foaki ai ki te kau Levite ʼo te hologa ʼo Alone, ʼae neʼe kau ki te ʼu famili ʼo te kau Keate. Ko natou ʼaia neʼe natou maʼu te ʼuluaki vahe ʼi te toho ʼae neʼe fai. 11 Neʼe foaki age kia natou ia Kiliate-alepa,+ ʼae ʼe toe higoa ko Hepelone,+ ʼi te potu moʼugaʼia ʼo Suta (ko Alepa neʼe ko te tamai ʼa Anake). Neʼe toe foaki age mo te ʼu koga meʼa lunaʼia ʼae ʼi ʼona tafaʼaki. 12 Kae ko te kele mo te ʼu kolo liliki ʼi te ʼu tafaʼaki ʼo te kolo, neʼe foaki ia kia Kalepo te foha ʼo Sefune.+

13 Neʼe foaki ki te hologa ʼo te pelepitelo ko Alone ia Hepelone+ mo ʼona koga meʼa lunaʼia. Neʼe ko he kolo ʼo te haofaki kia ia ʼae neʼe ina matehi he tahi kae neʼe mole loto ki ai.+ Neʼe toe foaki ki te hologa ʼaia ia Lipina+ mo ʼona koga meʼa lunaʼia, 14 mo Satili+ mo ʼona koga meʼa lunaʼia, mo Esetemoa+ mo ʼona koga meʼa lunaʼia, 15 mo Oloni+ mo ʼona koga meʼa lunaʼia, mo Tepile+ mo ʼona koga meʼa lunaʼia, 16 mo Aine+ mo ʼona koga meʼa lunaʼia, mo Siuta+ mo ʼona koga meʼa lunaʼia, pea mo Pete-semesi mo ʼona koga meʼa lunaʼia. Ko kolo ʼe hiva neʼe toʼo mai te ʼu fenua ʼo te ʼu telepi ʼaia ʼe lua.

17 Neʼe toʼo mai te fenua ʼo te telepi ʼo Pesamino ia Kipeone+ mo ʼona koga meʼa lunaʼia, mo Kepa mo ʼona koga meʼa lunaʼia,+ 18 mo Anatote+ mo ʼona koga meʼa lunaʼia, pea mo Alemone mo ʼona koga meʼa lunaʼia. Neʼe fakatahiʼi ko kolo ʼe fa.

19 Neʼe fakatahiʼi ai te ʼu kolo ʼae neʼe maʼu e te kau pelepitelo, te hologa ʼo Alone, ko kolo ʼe 13 pea mo ʼonatou koga meʼa lunaʼia.+

20 ʼI te ʼosi fai ʼo te toho, neʼe maʼu e te tahi ʼu famili Keate, ʼae neʼe kau ʼi te kau Levite, he ʼu kolo mai te fenua ʼo te telepi ʼo Efalaimi. 21 Neʼe foaki kia natou ia Sekemi+ mo ʼona koga meʼa lunaʼia, ʼi te potu moʼugaʼia ʼo Efalaimi. Neʼe ko he kolo ʼo te haofaki kia ia ʼae neʼe ina matehi he tahi kae neʼe mole loto ki ai.+ Neʼe toe foaki kia natou ia Kesele+ mo ʼona koga meʼa lunaʼia, 22 mo Kipisaimi mo ʼona koga meʼa lunaʼia, pea mo Pete-oloni+ mo ʼona koga meʼa lunaʼia. Neʼe fakatahiʼi ko kolo ʼe fa.

23 Neʼe toʼo mai te fenua ʼo te telepi ʼo Tane ia Eleteke mo ʼona koga meʼa lunaʼia, mo Kipetoni mo ʼona koga meʼa lunaʼia, 24 mo Asaloni+ mo ʼona koga meʼa lunaʼia, pea mo Kiete-limoni mo ʼona koga meʼa lunaʼia. Neʼe fakatahiʼi ko kolo ʼe fa.

25 Neʼe toʼo mai te fenua ʼo te vaelua ʼo te telepi ʼo Manase ia Taanake+ mo ʼona koga meʼa lunaʼia, pea mo Kiete-limoni mo ʼona koga meʼa lunaʼia. Neʼe fakatahiʼi ko kolo ʼe lua.

26 Neʼe fakatahiʼi ai te ʼu kolo ʼae neʼe maʼu e te tahi ʼu famili Keate, ko kolo ʼe hogofulu pea mo ʼonatou koga meʼa lunaʼia.

27 Neʼe maʼu e te kau Kelesoni,+ ʼae neʼe kau ʼi te ʼu famili ʼo te kau Levite, he ʼu kolo mai te fenua ʼo te vaelua ʼo te telepi ʼo Manase. Neʼe ko Kolani+ ʼi te potu fenua ʼo Pasani mo ʼona koga meʼa lunaʼia. Neʼe ko he kolo ʼo te haofaki kia ia ʼae neʼe ina matehi he tahi kae neʼe mole loto ki ai. Neʼe toe foaki kia natou ia Peesetela mo ʼona koga meʼa lunaʼia. Neʼe fakatahiʼi ko kolo ʼe lua.

28 Neʼe toʼo mai te fenua ʼo te telepi ʼo Isakale+ ia Kisioni mo ʼona koga meʼa lunaʼia, mo Tapelati+ mo ʼona koga meʼa lunaʼia, 29 mo Salamuti mo ʼona koga meʼa lunaʼia, pea mo Ene-kanimi mo ʼona koga meʼa lunaʼia. Neʼe fakatahiʼi ko kolo ʼe fa.

30 Neʼe toʼo mai te fenua ʼo te telepi ʼo Asele+ ia Miseale mo ʼona koga meʼa lunaʼia, mo Apitoni mo ʼona koga meʼa lunaʼia, 31 mo Elekati+ mo ʼona koga meʼa lunaʼia, pea mo Leopi+ mo ʼona koga meʼa lunaʼia. Neʼe fakatahiʼi ko kolo ʼe fa.

32 Neʼe toʼo mai te fenua ʼo te telepi ʼo Nefetali ia Ketesi+ ʼi Kalilea mo ʼona koga meʼa lunaʼia. Neʼe ko he kolo ʼo te haofaki+ kia ia ʼae neʼe ina matehi he tahi kae neʼe mole loto ki ai. Neʼe toe foaki kia natou ia Amote-tesoa mo ʼona koga meʼa lunaʼia, pea mo Kalatani mo ʼona koga meʼa lunaʼia. Neʼe fakatahiʼi ko kolo ʼe tolu.

33 Neʼe fakatahiʼi ai te ʼu kolo ʼae neʼe maʼu e te kau Kelesoni, ko kolo ʼe 13 pea mo ʼonatou koga meʼa lunaʼia. Neʼe vaevae leva ʼi ʼonatou famili.

34 Neʼe maʼu e te ʼu famili ʼo Melali,+ ʼae ko te tahi kau Levite he ʼu kolo neʼe toʼo mai te fenua ʼo te telepi ʼo Sepulone.+ Ko te ʼu kolo ʼaia neʼe ko Sokineami+ mo ʼona koga meʼa lunaʼia, mo Kaleta mo ʼona koga meʼa lunaʼia, 35 mo Timena mo ʼona koga meʼa lunaʼia, pea mo Nalali+ mo ʼona koga meʼa lunaʼia. Neʼe fakatahiʼi ko kolo ʼe fa.

36 Neʼe toʼo mai te fenua ʼo te telepi ʼo Lupeni ia Petesele+ mo ʼona koga meʼa lunaʼia, mo Saatesi mo ʼona koga meʼa lunaʼia,+ 37 mo Ketemoti mo ʼona koga meʼa lunaʼia, pea mo Mefaati mo ʼona koga meʼa lunaʼia. Neʼe fakatahiʼi ko kolo ʼe fa.

38 Neʼe toʼo mai te fenua ʼo te telepi ʼo Kate,+ ia Lamoti ʼae ʼi Kileate+ mo ʼona koga meʼa lunaʼia. Neʼe ko he kolo ʼo te haofaki kia ia ʼae neʼe ina matehi he tahi kae neʼe mole loto ki ai. Neʼe toe foaki kia natou ia Mahanaimi+ mo ʼona koga meʼa lunaʼia, 39 mo Heseponi+ mo ʼona koga meʼa lunaʼia, pea mo Saesele+ mo ʼona koga meʼa lunaʼia. Neʼe fakatahiʼi ko kolo ʼe fa.

40 Neʼe fakatahiʼi ai ko kolo ʼe 12 ʼae neʼe maʼu e te kau Melali, ia te tahi ʼu famili ʼae neʼe kau ki te kau Levite. Neʼe vaevae leva ʼi ʼonatou famili.

41 Neʼe fakatahiʼi leva ko kolo ʼe 48 ʼae neʼe maʼu e te kau Levite mo ʼonatou koga meʼa lunaʼia. Neʼe tuʼu te ʼu kolo ʼaia ʼi te ʼu fenua ʼae neʼe maʼu e te kau Iselaele.+ 42 Neʼe tahi maʼu e te ʼu kolo ʼaia ʼona koga meʼa lunaʼia ʼi te ʼu tafaʼaki, ʼei, neʼe feia te ʼu kolo fuli ʼaia.

43 Koia neʼe foaki leva e Sehova ki te kau Iselaele te fenua katoa ʼae neʼe ina fakapapau ki ʼanatou kui.+ Neʼe natou maʼu leva te fenua pea neʼe natou nonofo ai.+ 44 Pea tahi ʼae meʼa, neʼe foaki e Sehova kia natou te tokalelei ʼi ʼonatou tafaʼaki fuli, ohage pe ko tana fakapapau age ki ʼanatou kui.+ Neʼe mole feala ke fakafeagai ʼonatou fili kia natou+ he neʼe foaki age e Sehova te malo ʼi ʼonatou fili fuli.+ 45 Neʼe mole to noa he fakapapau ʼe tahi ʼi te ʼu fakapapau taulekaleka* fuli ʼae neʼe fai e Sehova ki te hahaʼi ʼo Iselaele, kae neʼe hoko fuli te ʼu fakapapau ʼaia.+