Lua Samuele
8 Ki muli age, neʼe tauʼi e Tavite te kau Filisitini+ pea neʼe malo.+ Neʼe toʼo e Tavite te kolo ko Mete-ama mai te ʼu nima ʼo te kau Filisitini.
2 Neʼe toe malo ʼi te kau Moape.+ Neʼe ina fakatakoto leva natou ki te kele, pea neʼe ina vae tolu natou.* Neʼe tonu ke matehi te ʼu kutuga ʼe lua, kae ko te tahi kutuga neʼe tonu ke tuku ke maʼuʼuli.+ Pea neʼe liliu te kau Moape ko he hahaʼi faifekau ʼa Tavite pea neʼe tonu ke natou totogi te tukuhau.+
3 Neʼe malo ia Tavite ia Atatesele, te foha ʼo Leopi, te hau ʼo Tesopa,+ ʼae neʼe alu ʼo toe fakatuʼu tana pule ʼi te Vai Tafe ʼo Efalate.+ 4 Neʼe puke e Tavite te ʼu tagata heka hosi ʼe toko 1 700 pea mo te kau solia ʼae neʼe haʼele lalo ʼe toko 20 000. Neʼe tuʼusi leva e Tavite te ʼu ivi ʼo te ʼu vaʼe ʼo te ʼu hosi ʼae neʼe toho saliote. Kae neʼe mole ina fai te faʼahi ʼaia ki te ʼu hosi ʼe 100.+
5 Pea neʼe ʼomai te kau Silia ʼo Tamaso+ ʼo tokoni kia Atatesele, te Hau ʼo Tesopa, kae neʼe haga ia Tavite ʼo matehi te toko 22 000 kau Silia.+ 6 Neʼe fakatuʼu e Tavite he ʼu nofoʼaga solia ʼi Silia, ʼae ko tona kolo muʼa ko Tamaso. Neʼe liliu ai te kau Silia ko he hahaʼi faifekau ʼa Tavite pea neʼe tonu ke natou totogi te tukuhau. Neʼe foaki e Sehova te malo kia Tavite ʼi te ʼu faʼahi fuli pe ʼae neʼe alu ki ai.+ 7 Neʼe toʼo e Tavite mai te hahaʼi faifekau ʼa Atatesele te ʼu meʼa tali tau aulo takafuafua, ʼo ina ʼave ki Selusalemi.+ 8 Neʼe toe toʼo foki e te Hau ko Tavite he ʼu tuʼuga kapa mai Petaki mo Pelotai, ʼae ko te ʼu kolo ʼo Atatesele.
9 Pea neʼe logo ia Toi, te Hau ʼo Hamate+ ki te malo ʼa Tavite ʼi te foʼi kautau katoa ʼa Atatesele.+ 10 Koia neʼe fekauʼi ai e Toi tona foha ko Solame ke alu ki te Hau ko Tavite, ʼo vakaʼi pe ʼe feafeaʼi mo fakamalo age kia ia ʼi tana tauʼi pea mo malo ia Atatesele (he ʼe ki muʼa atu, neʼe tuʼa lahi te tauʼi e Atatesele ia Toi). Pea neʼe alu mo he ʼu meʼa neʼe fai ʼaki te siliva, mo te aulo mo te kapa. 11 Neʼe fakatapuʼi e te Hau ko Tavite te ʼu meʼa ʼaia maʼa Sehova, ʼo feia mo te siliva pea mo te aulo ʼae neʼe ina toʼo mai te ʼu puleʼaga fuli ʼae neʼe malo ai:+ 12 mai Silia mo Moape,+ mai te kau Amone, mai te kau Filisitini,+ mai te kau Amaleke,+ pea mo te ʼu koloa ʼo Atatesele,+ te foha ʼo Leopi, te hau ʼo Tesopa. 13 Neʼe toe iloa foki te higoa ʼo Tavite, ʼi te temi ʼae neʼe toe liliu mai ai ʼi tana ʼosi matehi te kau Etome ʼe toko 18 000 ʼi te Potu Fenua ʼo Te Masima.+ 14 Neʼe ina fakatuʼu he ʼu nofoʼaga solia ʼi Etome katoa, pea neʼe liliu te kau Etome fuli ko he hahaʼi faifekau ʼa Tavite.+ Neʼe foaki e Sehova te malo kia Tavite ʼi te ʼu faʼahi fuli pe ʼae neʼe alu ki ai.+
15 Neʼe pule ia Tavite ʼi Iselaele katoa,+ pea neʼe fakamauʼi e Tavite tana hahaʼi katoa+ ʼi te faitotonu.+ 16 Neʼe pule ia Soape,+ te tama ʼa Teselusa ki te kautau, pea ko Sosafate,+ te foha ʼo Asilute neʼe ko te sikalaipe ʼa te hau. 17 Ko Satoke+ te foha ʼo Ahitupe mo Asimeleke te foha ʼo Apiata neʼe ko he ʼu pelepitelo, pea ko Selasa neʼe ko he sikalaipe. 18 Neʼe pule ia Penaia+ te foha ʼo Seosata ki te kau Keleti mo te kau Peletite.+ Pea neʼe liliu te ʼu foha ʼo Tavite ko he ʼu minisi.*