ʼUluaki Koloniko
10 Neʼe tauʼi leva e te kau Filisitini ia Iselaele. Pea neʼe feholaki te kau solia ʼo Iselaele ia muʼa ʼo te kau Filisitini. Neʼe mamate ai te tokolahi ʼi te Moʼuga ʼo Kilipoa.+ 2 Neʼe tuli e te kau Filisitini ia Saulo mo ʼona foha. Neʼe natou matehi leva ia Sonatane, mo Apinatape pea mo Malekisua,+ te ʼu foha ʼo Saulo. 3 Neʼe kovi ʼosi tanatou tauʼi ia Saulo. Neʼe maʼu leva ia ia e te kau fainahau, pea neʼe lavea ai ia natou.+ 4 Neʼe ui e Saulo ki tana tagata toʼo mahafu: “Tohoʼi ake tau heleta ʼo hukiʼi ʼaki au, ke mole ʼomai te kau tagata heʼe silikosisio ʼaia* ʼo gaohi koviʼi*+ au.” Kae neʼe mole loto ki ai tana tagata toʼo mahafu he neʼe mataku ʼaupito. Koia neʼe toʼo ai e Saulo tana heleta ʼo fakamate ia ia.+ 5 ʼI te sio ʼa tana tagata toʼo mahafu kua mate ia Saulo, neʼe ina toe toʼo mo tana heleta ʼo toe fakamate mo ia. 6 Koia ʼi te ʼaho ʼaia, neʼe mamate ai ia Saulo, mo ʼona foha ʼe tolu, ʼo feia mo natou fuli ʼo tona loto fale.+ 7 Neʼe sisio te hahaʼi fuli ʼo Iselaele ʼae neʼe ʼi te potu fenua laulelei ki te feholaki ʼa te kau solia fuli pea mo te kua mamate ʼa Saulo mo ʼona foha. Neʼe natou liʼaki ai ʼonatou kolo kae natou feholaki. Neʼe ʼomai leva te kau Filisitini ʼo nofoʼi te ʼu kolo ʼaia.
8 ʼI te ʼaho ake, ʼi te ʼomai ʼa te kau Filisitini ʼo toʼo te ʼu koloa ʼo natou ʼae kua mamate, neʼe natou maʼu te ʼu sino ʼo Saulo mo ʼona foha ʼi te Moʼuga ʼo Kilipoa.+ 9 Neʼe natou huʼi ai tona teu tau, mo tuʼusi tona ʼulu pea neʼe natou ʼave leva tona teu tau. Neʼe natou fakaha te logo ʼi te fenua katoa ʼo te kau Filisitini, ʼo mafola ai ʼi te hahaʼi pea mo te ʼu fale ʼo ʼonatou taula ʼatua.+ 10 Neʼe natou tuku leva tona teu tau ki te fale* ʼo tonatou ʼatua kae natou tautau tona foʼi ʼulu ʼi te fale ʼo Takone.+
11 ʼI te logo ʼa natou fuli ʼae ʼo Sapesi+ ʼi Kileate ki te ʼu meʼa fuli ʼae neʼe fai e te kau Filisitini kia Saulo,+ 12 neʼe tutuʼu ake te kau tagata toʼa fuli, ʼo olo ʼo toʼo mai te sino ʼo Saulo pea mo te ʼu sino ʼo ʼona foha. Neʼe natou ʼaumai ki Sapesi ʼo natou tanu ʼonatou hui ʼi te lalo fuʼu ʼakau lahi ʼae ʼi Sapesi,+ pea neʼe natou sesunio lolotoga ʼaho ʼe fitu.
13 Koia, neʼe mate ia Saulo he neʼe mole nofo agatonu kia Sehova ʼo mole fakalogo ki te folafola ʼa Sehova,+ pea neʼe alu ʼo fakafehuʼi he tahi neʼe felogoi mo te kau mate+ 14 kae neʼe mole ina fakafehuʼi ia Sehova. Koia neʼe matehi ai ia ia e te ʼAtua pea neʼe ina foaki te pule fakahau kia Tavite, te foha ʼo Sese.+