ʼUluaki Koloniko
26 Koʼeni te ʼu kalasi ʼo te ʼu tagata leʼo matapa:+ ʼI te kau Kole, neʼe ko Meselemia+ te foha ʼo Koli, ʼi te ʼu foha ʼo Asafe. 2 Pea neʼe maʼu e Meselemia ʼona foha: ko Sakalia tona ʼuluaki, mo Setiaele te lua, mo Sepatesa te tolu, mo Sateniele te fa, 3 mo Elame te nima, mo Sokanane te ono, pea mo Elieonai te fitu. 4 Pea neʼe maʼu e Opeto-etome ʼona foha: ko Semaea tona ʼuluaki, mo Seosapate te lua, mo Soake te tolu, mo Sakale te fa, mo Netanele te nima, 5 mo Amiele te ono, mo Isakale te fitu, pea mo Pelutai te valu, he neʼe tapuakiʼi e te ʼAtua ia Opeto-etome.
6 Pea ko tona foha ko Semaea neʼe ina maʼu leva ʼona foha, neʼe ko he ʼu pule ʼo tonatou famili, he neʼe ko he ʼu tagata malolohi pea neʼe tuha mo te falala. 7 Ko te ʼu foha ʼo Semaea neʼe ko Oteni, mo Lefaele, mo Opete, pea mo Elesapate. Pea ko ʼona tehina, ia Eliu mo Semaesa, neʼe ko he ʼu tagata neʼe toe tuha mo te falala. 8 Ko natou fuli ʼaia neʼe kau ʼi te hologa ʼo Opeto-etome. Ko natou ʼaia, mo ʼonatou foha pea mo ʼonatou tehina neʼe ko he ʼu tagata neʼe tuha mo te falala pea mo tuha mo te gaue. Neʼe ko te ʼu tagata ʼe toko 62 neʼe hifo mai ia Opeto-etome. 9 Pea neʼe maʼu e Meselemia+ ʼona foha pea mo ʼona tehina, neʼe ko te ʼu tagata ʼe toko 18 neʼe tuha mo te falala. 10 Pea ko Hosa, ʼi te ʼu foha ʼo Melali, neʼe ina maʼu ʼona foha. Neʼe ko Simeli te pule, he neʼe fakanofo ia ia e tana tamai ke pule, logo la neʼe mole ko ia te ʼuluaki foha. 11 Pea neʼe ko Ilekisa te lua, mo Tepalia te tolu, pea mo Sakalia te fa. Neʼe fakatahiʼi te ʼu foha mo te ʼu tehina fuli ʼo Hosa, ko te toko 13.
12 ʼI te ʼu kalasi ʼaia ʼo te ʼu tagata leʼo matapa, neʼe tonu ke fai e te ʼu pule he ʼu gaue ohage pe ko ʼonatou tehina, ʼi tanatou tauhi ʼae ʼi te fale ʼo Sehova. 13 Koia, neʼe natou fai ai ni toho+ ʼi te ʼu famili, ʼo natou fai tatau ki ʼae neʼe veliveli mo ʼae neʼe lahi, ke iloʼi ai pe ko ai ʼae ka ina maʼu te ʼu matapa. 14 ʼI tanatou fai te ʼu toho ʼaia, neʼe to kia Selemi te matapa ʼo te potu esite. Pea neʼe to ki tona foha ko Sakalia, ʼae neʼe ko he tagata faitokoni poto, ia te potu noleto. 15 Neʼe to kia Opeto-etome te potu saute, pea neʼe tonu ke tokakaga ʼona foha+ ki te ʼu fale ʼae neʼe tanaki ai te ʼu meʼa kehekehe. 16 Neʼe to kia Supime pea mo Hosa+ ia te potu uesite, ʼo ovi ki te Matapa ʼo Salekete, ʼi te ala lahi ʼae ʼe hake. Neʼe tuʼu he kutuga leʼo ʼo tafa ki he tahi kutuga leʼo. 17 Neʼe ʼi ai te ʼu Levite ʼe toko ono ʼi te potu esite. ʼI te potu noleto neʼe tutuʼu ai te toko fa ʼi te ʼaho fuli, pea ʼi te potu saute neʼe tutuʼu ai te toko fa ʼi te ʼaho fuli. Pea ʼi te ʼu fale ʼae neʼe tanaki ai te ʼu meʼa kehekehe,+ neʼe ʼi ai te ʼu tagata leʼo ʼe toko lua neʼe tutuʼu ovi ki te tahi ʼu tagata leʼo ʼe toko lua. 18 ʼI te fakaheketalaʼa ʼae ʼi te potu uesite, neʼe ʼi ai te toko fa ʼi te ala lahi+ pea mo te toko lua ʼi te fakaheketalaʼa. 19 Neʼe ko te ʼu kalasi ʼaia ʼo te ʼu tagata leʼo matapa ʼi te ʼu foha ʼo Kole pea mo Melali.
20 ʼI te kau Levite, neʼe tokaga ia Akisa ki te ʼu tanakiʼaga koloa ʼo te fale ʼo te ʼAtua moʼoni pea mo te ʼu fale ʼae neʼe tanaki ai te ʼu meʼa ʼae neʼe fakamaʼoniʼoniʼi.*+ 21 ʼI te ʼu foha ʼo Laetane, te ʼu foha ʼo te tagata Kelesoni ʼae neʼe hifo mai ia Laetane, te ʼu pule ʼo te ʼu famili ʼae neʼe hifo mai ia Laetane, te tagata Kelesoni, neʼe ko Seieli+ 22 mo te ʼu foha ʼo Seieli, mo Setame pea mo tona tehina ko Soele. Neʼe natou tokakaga ki te ʼu tanakiʼaga koloa ʼo te fale ʼo Sehova.+ 23 ʼI te kau Amilame, mo te kau Siteseale, mo te kau Hepelone pea mo te kau Usiele,+ 24 neʼe ko Sepuele te foha ʼo Kelesomi, te foha ʼo Moisese ʼae neʼe pule pea neʼe tokaga ki te ʼu fale ʼae neʼe tanaki ai te ʼu meʼa kehekehe. 25 Ko ʼona tehina, ʼae neʼe hifo mai ia Eliesele,+ neʼe ko Lesapea,+ mo Iesaia, mo Solame, mo Sikili, pea mo Selomote. 26 Neʼe tokaga ia Selomote mo ʼona tehina ki te ʼu fale fuli ʼae neʼe tanaki ai te ʼu meʼa ʼae neʼe fakamaʼoniʼoniʼi+ e te Hau ko Tavite,+ mo te ʼu pule famili,+ mo te ʼu pule ʼo he toko teau, mo te ʼu pule ʼo he toko afe pea mo te ʼu pule ʼo te foʼi kautau. 27 Neʼe natou fakamaʼoniʼoniʼi he ʼu koloa+ neʼe toʼo ʼi te ʼu tau+ pea neʼe natou fakaʼaogaʼi moʼo taupau te fale ʼo Sehova. 28 Neʼe toe ʼi ai foki mo te ʼu meʼa fuli ʼae neʼe fakamaʼoniʼoniʼi e Samuele, te tagata ʼae ʼe ina iloʼi te ʼu meʼa ʼae neʼe ha,+ mo Saulo te foha ʼo Kisi, mo Apenele+ te foha ʼo Nele pea mo Soape+ te tama ʼa Teselusa.+ Ko he meʼa pe neʼe fakamaʼoniʼoniʼi e he tahi, neʼe tokaga ki ai ia Selomita* pea mo ʼona tehina.
29 ʼI te kau Siteseale,+ neʼe fakanofo ia Kenania mo ʼona foha ke natou tokakaga ki he ʼu gaue neʼe mole fai ʼi te fale ʼo te ʼAtua. Neʼe ko ni pule pea mo ni tuʼi fakamau+ ʼi Iselaele.
30 ʼI te kau Hepelone,+ neʼe tokaga ia Asapea mo ʼona tehina ki Iselaele, ʼi te potu uesite ʼo te Solotane, ʼo ʼuhiga mo te ʼu gaue fuli ʼae neʼe fai ʼi te tauhi kia Sehova pea mo te tauhi ki te hau. Neʼe ko he ʼu tagata ʼe toko 1 700 neʼe tuha mo te falala. 31 ʼI te kau Hepelone, neʼe ko Ielisa+ te pule ʼo te kau Hepelone ʼo mulimuli ki te ʼu tohi hako. ʼI te 40 taʼu ʼo te pule ʼa Tavite,+ neʼe fai ni fekumi, pea neʼe maʼu ia natou ʼaia ʼi Saesele,+ ʼi Kileate he ʼu tagata malolohi pea mo tuha mo te falala. 32 Neʼe ko ʼona tehina ʼe toko 2 700 neʼe tuha mo te falala pea neʼe ko he ʼu pule famili. Koia neʼe fakanofo ai ia natou e te Hau ko Tavite ke natou pule ki te kau Lupeni, mo te kau Kate pea mo te vaelua ʼo te telepi ʼo Manase. Neʼe tonu ke natou vakaʼi te ʼu faʼahi fuli ʼo ʼuhiga mo te ʼAtua moʼoni pea mo ʼae ʼo te hau.