ʼUluaki Koloniko
27 Koʼeni te kaugamalie ʼo te kau Iselaele, ia te ʼu pule famili, mo te kau pule ʼo he toko afe mo te kau pule ʼo he toko teau,+ pea mo ʼonatou pule ʼae neʼe gaue maʼa te hau.+ Neʼe natou tokakaga ki te ʼu kalasi ʼae neʼe fesuisuiʼaki ʼi te ʼu mahina fuli ʼo te taʼu: Neʼe natou toko 24 000 ʼi te ʼu kalasi takitahi.
2 Neʼe pule ia Sakopeame+ te foha ʼo Sapetiele ki te ʼuluaki kalasi ʼo te ʼuluaki mahina, pea neʼe natou toko 24 000 ʼi tana kalasi. 3 Neʼe hifo mai te hologa ʼo Pelesi+ pea neʼe pule ki te ʼu pule fuli ʼo te ʼu kutuga ʼae neʼe tonu ke gaue ʼi te ʼuluaki mahina. 4 Neʼe pule ia Totai,+ te tagata Akoki+ ki te kalasi ʼo te lua mahina. Neʼe natou toko 24 000 ʼi tana kalasi pea neʼe tokoni ki ai ia Mikelote. 5 Ko te pule ʼo te tolu kutuga ʼae neʼe tonu ke gaue ʼi te tolu mahina, neʼe ko Penaia,+ te foha ʼo Seosata+ te pelepitelo pule, pea neʼe natou toko 24 000 ʼi tana kalasi. 6 Neʼe kau ia Penaia ʼi te ʼu tagata tau malolohi ʼe toko tolugofulu pea neʼe pule kia natou. Neʼe pule ia Amisatape, tona foha ki te kalasi ʼaia. 7 Ko te pule ʼo te fa kalasi ʼo te fa mahina, neʼe ko Asaele,+ te tehina ʼo Soape+ pea neʼe fetogi leva ia ia e tona foha ko Sepatesa. Neʼe natou toko 24 000 ʼi tana kalasi. 8 Ko te nima pule ʼo te nima mahina neʼe ko Sameute, te tagata Siselakia, pea neʼe natou toko 24 000 ʼi tana kalasi. 9 Ko te ono pule ʼo te ono mahina neʼe ko Ila+ te foha ʼo Isese, te tagata Tekoa,+ pea neʼe natou toko 24 000 ʼi tana kalasi. 10 Ko te fitu pule ʼo te fitu mahina neʼe ko Eletesi,+ te tagata Palone, ʼae neʼe hifo mai ia Efalaimi, pea neʼe natou toko 24 000 ʼi tana kalasi. 11 Ko te valu pule ʼo te valu mahina neʼe ko Sipekai,+ te tagata Husa, ʼae neʼe hifo mai ia Sela,+ pea neʼe natou toko 24 000 ʼi tana kalasi. 12 Ko te hiva pule ʼo te hiva mahina neʼe ko Apiesele,+ te tagata Anatote,+ ʼae neʼe hifo mai ia Pesamino, pea neʼe natou toko 24 000 ʼi tana kalasi. 13 Ko te hogofulu pule ʼo te hogofulu mahina neʼe ko Maalai,+ te tagata Netofa, ʼae neʼe hifo mai ia Sela,+ pea neʼe natou toko 24 000 ʼi tana kalasi. 14 Ko te 11 pule ʼo te 11 mahina neʼe ko Penaia,+ te tagata Pilatoni, ʼae neʼe hifo mai ia Efalaimi, pea neʼe natou toko 24 000 ʼi tana kalasi. 15 Ko te 12 pule ʼo te 12 mahina, neʼe ko Eletai, te tagata Netofa, ʼae neʼe hifo mai ia Oteniele, pea neʼe natou toko 24 000 ʼi tana kalasi.
16 Koʼeni te kau takitaki ʼo te ʼu telepi ʼo Iselaele: ʼI te kau Lupeni, neʼe ko Eliesele te foha ʼo Sikili ʼae neʼe takitaki. ʼI te kau Simeone, neʼe ko Sefatia te foha ʼo Maaka. 17 ʼI te telepi ʼo Levi, neʼe ko Asapea te foha ʼo Kemuele. ʼI te hologa ʼo Alone, neʼe ko Satoke. 18 ʼI te telepi ʼo Suta, neʼe ko Eliu,+ ko he tahi ʼo te ʼu tehina ʼo Tavite. ʼI te telepi ʼo Isakale, neʼe ko Omeli te foha ʼo Mikaele. 19 ʼI te telepi ʼo Sepulone, neʼe ko Sisemaesa, te foha ʼo Apetiasi. ʼI te telepi ʼo Nefetali, neʼe ko Selimote, te foha ʼo Aselieli. 20 ʼI te kau Efalaimi, neʼe ko Oseo te foha ʼo Asasia. ʼI te vaelua ʼo te telepi ʼo Manase, neʼe ko Soele te foha ʼo Petasa. 21 ʼI te vaelua ʼo te telepi ʼo Manase ʼae ʼi Kileate, neʼe ko Ito te foha ʼo Sakalia. ʼI te telepi ʼo Pesamino, neʼe ko Sasiele te foha ʼo Apenele.+ 22 ʼI te telepi ʼo Tane, neʼe ko Asaleele te foha ʼo Seloame. Neʼe ko te kau ʼaliki ʼaia ʼo te ʼu telepi ʼo Iselaele.
23 Neʼe mole lau e Tavite te kaugamalie ʼo natou ʼae neʼe taʼu 20 ʼo fai ki lalo, he neʼe fakapapau e Sehova ʼe ina fakaliliu anai ʼo kaugamalie ia Iselaele ohage ko te ʼu fetuʼu ʼo te ʼatu lagi.+ 24 Neʼe kamata lau e Soape te tama ʼa Teselusa, tonatou kaugamalie, kae neʼe mole ina fakaʼosi. Neʼe ita te ʼAtua ki Iselaele ʼuhi ko te faʼahi ʼaia,+ pea neʼe mole tohi tonatou kaugamalie ʼi te tohi ʼo te hisitolia ʼo te temi ʼo te Hau ko Tavite.
25 Neʼe pule ia Asimaveti te foha ʼo Atiele ki te ʼu fale tanakiʼaga koloa ʼo te hau.+ Neʼe pule ia Sonatane te foha ʼo Osiasi ki te ʼu fale tanakiʼaga meʼa kehekehe,* ʼae neʼe ʼi te ʼu gaueʼaga, mo te ʼu kolo, mo te ʼu kolo liliki pea mo te ʼu tule. 26 Neʼe pule ia Esili te foha ʼo Kelupe ki te hahaʼi ʼae neʼe gaue kele. 27 Neʼe pule ia Simei, te tagata Lama ki te ʼu gaueʼaga vite. Pea neʼe pule ia Sapeti, te tagata Sefami* ki te ʼu fale tanakiʼaga vino. 28 Neʼe tokaga ia Paale-anane, te tagata Keteli ki te ʼu gaueʼaga oliveto mo te ʼu fuʼu sikomole+ ʼae ʼi te Sefela.+ Pea neʼe tokaga ia Soasi ki te ʼu fale tanakiʼaga lolo. 29 Neʼe tokaga ia Sitelai, te tagata Salona ki te faga pipi ʼae neʼe ʼi te ʼu koga meʼa lunaʼia ʼo Salona,+ pea neʼe tokaga ia Sapate, te foha ʼo Atelai ki te faga pipi ʼae neʼe ʼi te ʼu potu fenua laulelei. 30 Neʼe tokaga ia Opile, te tagata Isemaele ki te ʼu kamelo pea neʼe tokaga ia Sesetia, te tagata Melonote ki te ʼu asino.* 31 Pea neʼe tokaga ia Sasise, te tagata Hakali ki te faga ovi. Neʼe ko te ʼu pule fuli ʼaia ʼo te ʼu koloa ʼo te Hau ko Tavite.
32 Ko Sonatane+ te ʼilamutu ʼo Tavite, neʼe ko he tagata faitokoni, mo ʼatamai pea neʼe ko he sikalaipe. Neʼe tokaga ia Sehiele te foha ʼo Hakomoni ki te ʼu foha ʼo te hau.+ 33 Ko Asitofele+ neʼe ko he tagata faitokoni ʼa te hau, pea ko Usai,+ te tagata Alaki neʼe ko he kaumeʼa ʼo te hau. 34 Neʼe ko Seosata te foha ʼo Penaia+ pea mo Apiata+ ʼae neʼe nā fetogi ia Asitofele. Pea neʼe pule ia Soape+ ki te foʼi kautau ʼa te hau.