Sopo
3 Hili ʼaia, neʼe palalau leva ia Sopo ʼo ina laukoviʼi te ʼaho ʼae neʼe tupu ai.+ 2 Neʼe ina ui:
3 “Ke pulinoa te ʼaho ʼae neʼe au tupu ai,+
ʼO feia mo te po ʼae neʼe ui ai: ‘Kua tupu he tagata!’
4 Ke fakapoʼuli te ʼaho ʼaia.
Pea ke mole tokagaʼi e te ʼAtua ʼae ʼi te lagi.
Ke ʼaua naʼa mu te malama ʼi te ʼaho ʼaia.
5 Kae ke pule te fakapoʼuli gaogao ki te ʼaho ʼaia.
Pea ke ʼaofi e he ʼao fakapoʼuli.
Ke fakamataku te fakapoʼuli.
6 Ke fakapoʼuli gaogao te po ʼaia.+
Ke ʼaua naʼa ʼi ai he ʼaho fiafia ʼo te taʼu,
Pea ke mole kau ʼi te lau ʼo te ʼu mahina.
7 ʼEi, ke paʼa te po ʼaia.
Ke mole logo ki he kalaga fakafiafia.
8 Ko natou ʼae ʼe natou laukoviʼi te ʼaho ke natou toe laukoviʼi mo te po ʼaia,
9 Ke mole ha te ʼu fetuʼu moka mafoa te ʼaho.
Ke noa te atalitali ʼa te poʼuli ki te mafoa ʼo te ʼaho
Pea ke mole sio ki te tuʼu ʼo te ʼaho.
10 Koteʼuhi ʼi te po ʼaia neʼe mole mapunu te ʼu matapa ʼo te fatu ʼo taku faʼe+
Pea neʼe mole ʼū ai te malaʼia ki ʼoku mata.
11 He koʼe neʼe mole au mate ʼi toku fanauʼi?
ʼEi, he koʼe neʼe mole au mate ʼi taku mavae mai te fatu ʼo taku faʼe?+
12 He koʼe neʼe fakatalitali au e taku faʼe ʼi ʼona tuli?
Pea he koʼe neʼe ina fafaga au?
13 Ka na ʼaua la kua au takoto nei ʼi te fimalie.+
ʼEi, ʼe au moe anai pea mo malolo+
14 Mo te ʼu hau ʼo te kele pea mo ʼanatou tagata faitokoni,
ʼAe neʼe natou laga ni koga meʼa kua maumau ʼi te temi nei,
15 Pea mo te ʼu ʼaliki ʼae ʼe maʼu aulo,
Pea ʼe fonu ʼonatou ʼapi ko te siliva.
16 He koʼe koa neʼe mole fufu au ohage ko he tamasiʼi neʼe to,
ʼEi, ohage ko te ʼu fanau ʼae neʼe mole sisio ki te malama?
17 ʼI te potu ʼaia, maʼiape la mo te kau agakovi ʼe mole kei natou maveuveu.
ʼEi, ʼi te potu ʼaia, ʼe malolo ai te kau gaʼegagaʼe.+
18 Pea ʼe fimalie ai te kau pilisoni.
ʼE mole fakakinauʼi natou e he tahi ke natou gaue.
19 ʼI te potu ʼaia, ʼe tatau pe ia natou ʼae ʼe liliki mo natou ʼae ʼe lalahi,+
Pea ʼe fakaʼateainaʼi te kaugana mai tona pule.
20 He koʼe ʼe foaki e te ʼAtua te malama kia ia ʼae ʼe mamahi?
He koʼe ʼe ina foaki te maʼuli kia natou ʼae ʼe lotohoha?+
21 He koʼe ʼe natou fia mamate, kae ʼe mole hoko ia?+
ʼE lahi age tanatou kumi te mate ʼi ni koloa neʼe fufu,
22 Ia natou ʼae ʼe fakafiafia lahi,
ʼEi, ia natou ʼae ʼe manuʼia, moka natou maʼu te faitoka.
23 He koʼe ʼe ina foaki te malama ki he tagata ʼe mole kei ina iloʼi tona ala,
ʼEi, ki he tagata ʼe ʼa takai e te ʼAtua?+
25 Koteʼuhi kua hoko mai te meʼa ʼae neʼe au tuʼania ki ai,
ʼEi, kua au tau mo te meʼa ʼae neʼe au mataku ki ai.
26 Neʼe mole au maʼu he tokalelei, peʼe ko he fimalie, peʼe ko he malolo,
Kae ʼe hoko pe te malaʼia kia au.”