Sosue

10 Neʼe logo leva ia Atoni-seteki, te Hau ʼo Selusalemi, neʼe maʼu e Sosue te kolo ko Ai, pea neʼe ina maumauʼi. Neʼe ina fai ki te kolo ko Ai mo tona hau+ te meʼa ʼae neʼe ina fai ki Seliko mo tona hau.+ Neʼe toe logo foki ia Atoni-seteki neʼe fai e te hahaʼi ʼo Kipeone he fuakava ʼo te tokalelei mo Iselaele,+ pea neʼe natou maʼuʼuli ʼi te lotolotoiga ʼo natou. 2 Neʼe mataku ai+ koteʼuhi neʼe lahi te kolo ko Kipeone, ohage ko he kolo hau. Pea neʼe lahi age ʼi te kolo ko Ai,+ pea ko ʼana tagata fuli neʼe ko te ʼu tagata tau. 3 Koia, neʼe fekauʼi ai e Atoni-seteki, te hau ʼo Selusalemi, he ʼu tagata ke olo kia Soame, te hau ʼo Hepelone,+ mo Pilame, te hau ʼo Salamuti, mo Safia, te hau ʼo Lakisi, pea mo Tepile, te hau ʼo Ekeloni,+ ʼo ui age kia natou: 4 “Kotou ʼomai ʼo tokoni mai ki te tauʼi ʼo te kolo ko Kipeone, he neʼe fai e te hahaʼi ʼo Kipeone he fuakava ʼo te tokalelei mo Sosue pea mo te kau Iselaele.”+ 5 Neʼe fakatahitahi ai te ʼu hau ʼaeni ʼe toko nima ʼo te kau Amole+ mo ʼanatou foʼi kautau: ko te hau ʼo Selusalemi, mo te hau ʼo Hepelone, mo te hau ʼo Salamuti, mo te hau ʼo Lakisi, pea mo te hau ʼo Ekeloni. Neʼe natou olo ai leva ki Kipeone, ʼo ʼa takai te kolo ke natou tauʼi.

6 Neʼe fekauʼi leva e te ʼu tagata ʼo Kipeone he ʼu tagata ke olo ʼo ui kia Sosue, ʼi te nofoʼaga ʼae ʼi Kilekale:+ “ ʼAua naʼa ke liʼaki ia matou ʼaeni ko ʼau tagata kaugana.+ Kae ke ke foimo haʼu, ʼo haofaki ia matou pea mo tokoni mai kia matou! Kua fakatahitahi te ʼu hau fuli ʼo te kau Amole, ʼae ʼe nonofo ʼi te potu moʼugaʼia ke natou tauʼi matou.” 7 Koia, neʼe mavae ai ia Sosue ʼi Kilekale mo ʼana tagata solia fuli pea mo ʼana tagata tau malolohi fuli.+

8 Pea neʼe ui e Sehova kia Sosue: “ ʼAua naʼa ke mataku ki te ʼu hau ʼaia,+ koteʼuhi ʼe au tuku atu ia natou ki ʼou nima.+ Pea ʼe mole feala anai ke natou malo ia koe.”+ 9 Neʼe haʼele po katoa ia Sosue mai Kilekale pea neʼe ina ʼohofi fakapunamaʼuli leva ia natou. 10 Neʼe fakatupu e Sehova he maveuveu ia natou.+ Neʼe matehi e te kau Iselaele ia te kau Amole ʼo lahi ai te mātea ʼi Kipeone. Neʼe natou tuli ʼihi ia natou ʼi te ala ʼae ʼe hake ki Pete-oloni pea neʼe natou matematehi ia natou ʼo kaku ki Aseka mo Maketa. 11 ʼI tanatou feholaki ʼaia ia muʼa ʼo te kau Iselaele ʼi te mahifo ʼo Pete-oloni, neʼe fakato e Sehova he toe ʼuamaka lahi kia natou, ʼo kaku ki Aseka, pea neʼe natou mamate ai. Neʼe lahi age te kau solia ʼae neʼe mamate ʼi te ʼuamaka ʼi te kau solia ʼae neʼe matehi e te kau Iselaele ʼaki te heleta.

12 ʼI te ʼaho ʼaia, neʼe malo ia Sehova ʼi te kau Amole ia muʼa ʼo te kau Iselaele. Pea neʼe ui e Sosue kia Sehova ia muʼa ʼo Iselaele:

13 Neʼe tuʼu maʼu ai te laʼa, ʼo feia mo te mahina ʼo kaku ki te malo ʼa te puleʼaga ʼo Iselaele ʼi ʼonatou fili. ʼE fakamatala te aluʼaga ʼaia neʼe hoko ʼi te tohi ʼo Sasale.+ ʼI te ʼaho ʼaia, neʼe mole to te laʼa. Neʼe tuʼu maʼu ʼi te lagi lolotoga te ʼaho katoa. 14 Neʼe mole he ʼaho neʼe tatau mo te ʼaho ʼaia, ʼi muʼa atu peʼe ki muli mai, ʼei he ʼaho neʼe fakalogo ai ia Sehova ki te leʼo ʼo he tagata.+ Neʼe tau ai ia Sehova maʼa Iselaele.+

15 Hili ʼaia, neʼe toe liliu ia Sosue mo te kau Iselaele fuli ki tonatou nofoʼaga, ʼi Kilekale.+

16 ʼI te temi ʼaia, neʼe feholaki ia te ʼu hau ʼe toko nima, ʼo fenonoʼi ʼi te ʼana ʼo Maketa.+ 17 Pea neʼe fakaha age kia Sosue ʼe fenonoʼi te ʼu hau ʼe toko nima ʼi te ʼana ʼo Maketa.+ 18 Neʼe ui leva e Sosue: “Kotou teka he ʼu foʼi maka lalahi ki te huʼaga ʼo te ʼana pea kotou hinoʼi he ʼu tagata ke natou leʼohi te ʼu hau. 19 Kae ko koutou, ke hoko atu takotou tuli ʼokotou fili pea ke kotou ʼohofi ia natou mai muli.+ ʼAua naʼa kotou tuku ke natou feulufi ki ʼonatou kolo, he ʼe tuku atu e Sehova tokotou ʼAtua ia natou ki ʼokotou nima.”

20 Neʼe lahi ai te mātea neʼe fai e Sosue mo te kau Iselaele, neʼe mamate ʼonatou fili fuli, gata pe kia natou ʼae neʼe lava feholaki pea mo feulufi ki te ʼu kolo tau. 21 Hili ʼaia, neʼe toe liliu haohaoa mai te foʼi kautau katoa ʼo Iselaele kia Sosue, ʼi te nofoʼaga, ʼi Maketa. Neʼe mole toe palalau kovi he tahi ki te kau Iselaele. 22 Pea neʼe ui e Sosue: “Kotou toʼo kehe te ʼu foʼi maka ʼae ʼi te huʼaga ʼo te ʼana, pea kotou fakahu mai ki tuʼa te ʼu hau ʼe toko nima ʼo kotou ʼaumai kia au.” 23 Neʼe ʼaumai ai ki tuʼa te ʼu hau ʼe toko nima, ia te hau ʼo Selusalemi, mo te hau ʼo Hepelone, mo te hau ʼo Salamuti, mo te hau ʼo Lakisi, pea mo te hau ʼo Ekeloni.+ Pea neʼe ʼave leva ia natou kia Sosue. 24 ʼI te ʼaumai ʼo te ʼu hau ʼaia kia ia, neʼe fakatahiʼi e Sosue te ʼu tagata fuli ʼo Iselaele pea neʼe ina ui ki te ʼu pule ʼo te kau solia ʼae neʼe olo mo ia: “Kotou fakaovi mai. Kotou ʼai ʼokotou vaʼe ki te ʼu tuʼa kia ʼo te ʼu hau ʼaeni.” Neʼe natou fakaovi mai ai ʼo ʼai ʼonatou vaʼe ki ʼonatou tuʼa kia.+ 25 Pea neʼe ui e Sosue kia natou: “ ʼAua naʼa kotou matataku.+ Kotou lotomalohi mo lototoʼa, koteʼuhi ʼe ko te meʼa ʼaia ka fai e Sehova ki ʼokotou fili fuli ʼae ʼe kotou tauʼi.”+

26 Neʼe matehi leva e Sosue ia natou pea neʼe ina tautau ʼonatou sino ki he ʼu pou* ʼe nima. Pea neʼe tautau aipe ʼonatou sino ʼo kaku ki te afiafi. 27 ʼI te ʼosi to ʼo te laʼa, neʼe fakatotonu leva e Sosue ke fakahifo te ʼu sino mai te ʼu pou+ pea ke li ki te ʼana ʼae neʼe fenonoʼi ai te ʼu hau. Pea neʼe fakatuʼu ʼi te huʼaga ʼo te ʼana he ʼu foʼi maka lalahi, pea ʼe kei tuʼu aipe ia ʼaho nei.

28 ʼI te ʼaho pe ʼaia, neʼe maʼu e Sosue te kolo ko Maketa,+ pea neʼe ina matehi te hahaʼi ʼo Maketa ʼaki te heleta. Neʼe ina matehi te hau ʼo Maketa pea mo natou* fuli ʼae neʼe nonofo ai. Neʼe mole ina tuku ke maʼuli he tahi.+ Neʼe ina fai pe ki te hau ʼo Maketa+ te meʼa ʼae neʼe ina fai ki te hau ʼo Seliko.

29 Neʼe mavae leva ia Sosue mo Iselaele katoa mai Maketa ʼo olo ʼo tauʼi ia Lipina.+ 30 Neʼe toe tuku e Sehova te kolo ʼaia mo tona hau+ ki te kau Iselaele. Neʼe matehi e te kau Iselaele ia natou fuli ʼae neʼe nonofo ʼi te kolo ʼaki te heleta. Neʼe mole natou tuku ke maʼuli he tahi. Neʼe natou fai pe ki te hau te meʼa ʼae neʼe natou fai ki te hau ʼo Seliko.+

31 Hili ʼaia, neʼe mavae ia Sosue mo Iselaele katoa mai Lipina ʼo olo ki te kolo ko Lakisi.+ Neʼe natou fakatuʼu ai tonatou nofoʼaga pea neʼe natou ʼohofi leva te kolo. 32 Neʼe tuku e Sehova te kolo ko Lakisi ki te kau Iselaele, pea neʼe natou maʼu leva te kolo ʼi te lua ʼaho. Neʼe natou matehi ia natou fuli ʼae neʼe nonofo ʼi te kolo ʼaki te heleta,+ ohage pe ko tanatou fai ʼi Lipina.

33 Neʼe haʼu leva ia Olami, te hau ʼo Kesele+ ʼo tokoni ki te hahaʼi ʼo Lakisi, kae neʼe matehi e Sosue ia ia ʼo feia mo ʼana tagata solia. Neʼe mole ina tuku ke maʼuli he tahi.

34 Pea neʼe mavae ia Sosue mo Iselaele katoa mai Lakisi ʼo olo ki te kolo ko Ekeloni.+ Neʼe natou fakatuʼu ai tonatou nofoʼaga pea neʼe natou ʼohofi leva te kolo. 35 Neʼe natou maʼu te kolo ʼi te ʼaho pe ʼaia, pea neʼe natou matehi te hahaʼi ʼo te kolo ʼaia ʼaki te heleta. ʼI te ʼaho ʼaia, neʼe natou matehi ia natou fuli ʼae neʼe nonofo ai, ohage pe ko tanatou fai ʼi Lakisi.+

36 Pea neʼe mavae leva ia Sosue mo Iselaele katoa mai Ekeloni ʼo olo ʼo ʼohofi te kolo ko Hepelone.+ 37 Neʼe natou maʼu leva te kolo, ʼo feia mo te ʼu kolo fuli ʼae ʼi ʼona tafaʼaki, pea neʼe natou matehi te hau ʼo Hepelone mo natou fuli ʼae neʼe nonofo ʼi te ʼu kolo ʼaia ʼaki te heleta. Neʼe mole ina tuku ke maʼuli he tahi. Neʼe ina maumauʼi te ʼu kolo ʼaia pea mo matehi ia natou fuli ʼae neʼe nonofo ai, ohage pe ko tana fai ʼi Ekeloni.

38 Pea neʼe alu leva ia Sosue mo Iselaele katoa ʼo ʼohofi te kolo ko Tepile.+ 39 Neʼe natou maʼu leva te kolo, pea neʼe natou matehi te hahaʼi ʼo te kolo ʼaia, mo tona hau pea mo te hahaʼi ʼo te ʼu kolo ʼae ʼi ʼona tafaʼaki ʼaki te heleta. Neʼe natou matehi ia natou fuli ʼae neʼe nonofo ʼi te ʼu kolo ʼaia.+ Neʼe mole natou tuku ke maʼuli he tahi.+ Neʼe fai e Sosue ki te kolo ko Tepile pea mo tona hau te meʼa pe ʼae neʼe ina fai ki Hepelone, pea mo Lipina mo tona hau.

40 Neʼe maʼu e Sosue ia te fenua katoa ʼaeni: ia te potu moʼugaʼia, mo te Nekepe, mo te Sefela,+ mo te ʼu kiʼi moʼuga. Pea neʼe malo ʼi te ʼu hau fuli ʼaia. Neʼe mole ina tuku ke maʼuli he tahi. Neʼe ina matehi te hahaʼi fuli,+ ohage pe ko tona fakatotonu age e Sehova, te ʼAtua ʼo Iselaele.+ 41 Neʼe maʼu e Sosue te potu fenua ʼae ʼe kamata mai Katesi-palenea+ ʼo kaku ki Kasa,+ pea mo te fenua katoa ʼo Koseni+ ʼo kaku ki Kipeone.+ 42 Neʼe malo ia Sosue ʼi te ʼu hau fuli ʼaia ʼaki pe tana ʼohofiʼaga ʼe tahi, he neʼe tau ia Sehova, te ʼAtua ʼo Iselaele maʼa Iselaele.+ 43 Pea neʼe toe liliu leva ia Sosue mo te kau Iselaele fuli ki tonatou nofoʼaga, ʼi Kilekale.+