Sosue
9 Neʼe logo ia te ʼu hau fuli ʼae neʼe nonofo ʼi te potu uesite ʼo te Solotane+ ki te meʼa ʼae neʼe hoko. Neʼe ko te ʼu hau ʼae neʼe nonofo ʼi te potu moʼugaʼia, mo te Sefela, mo te matafenua ʼo te Tai Lahi,*+ ʼae ʼe haga ki Lipane. Neʼe ko te ʼu hau ʼaia ʼo te kau Heti, mo te kau Amole, mo te kau Kanaane, mo te kau Pelesite, mo te kau Hevi, pea mo te kau Sepusi.+ 2 Neʼe natou felogoi ke natou tauʼi ia Sosue mo Iselaele.+
3 Neʼe toe logo foki te hahaʼi ʼo Kipeone+ ki te meʼa ʼae neʼe fai e Sosue ki te ʼu kolo ko Seliko+ mo Ai.+ 4 Neʼe natou fai ai he puleʼaki fakapotopoto: neʼe natou hili he ʼu taga meʼa kai kua popo ki ʼanatou asino pea mo he ʼu ʼaiʼaga* vino kua ʼafeā mo pūpū, pea neʼe toe tui hokohoko. 5 Neʼe natou tui he ʼu sulie neʼe kua maumau pea neʼe toe faʼu, mo ni mutuʼi meʼa kua penu. Ko te ʼu pane fuli ʼae neʼe natou toʼo neʼe kua ʼafeā pea kua maeveeve. 6 Neʼe natou olo ai leva kia Sosue, ʼae neʼe ina fakatuʼu tona nofoʼaga ʼi Kilekale,+ pea neʼe natou ui age ki ai mo te hahaʼi tagata ʼo Iselaele: “ ʼE matou ʼomai mai he fenua mamaʼo. Fakalelei siʼokotou ʼu loto, kotou fai he fuakava ʼo te tokalelei mo matou.” 7 Kae neʼe tali age e te ʼu tagata ʼo Iselaele ki te kau Hevi:+ “ ʼE lagi kotou nonofo ovi mai pe. Koia, ʼe natou fai feafeaʼi anai he fuakava mo koutou?”+ 8 Neʼe ui e te kau Hevi kia Sosue: “Ko matou ko ʼau hahaʼi faifekau.”*
Pea neʼe fehuʼi age e Sosue kia natou: “Ko ai ia koutou pea ʼe kotou ʼomai maifea?” 9 Neʼe natou tali age ki ai: “Siʼomatou ʼaliki, ʼe matou ʼomai mai he fenua ʼe mamaʼo ʼaupito+ ʼuhi ko te huafa ʼo Sehova tou ʼAtua, he neʼe matou logo ki tona logona pea mo te ʼu meʼa fuli ʼae neʼe ina fai ʼi Esipito,+ 10 pea mo te ʼu meʼa fuli ʼae neʼe ina fai ki te ʼu hau ʼe lua ʼo te kau Amole, ʼae neʼe nonofo ʼi te tahi faʼahi* ʼo te Solotane: ia te Hau ʼo Heseponi ko Sihone+ pea mo te Hau ʼo Pasani ko Oke,+ ʼae neʼe nofo ʼi Asetaloti. 11 Koia, neʼe ui mai e ʼomatou tagata takitaki pea mo te hahaʼi fuli ʼo tomatou fenua: ‘Kotou ʼave hakotou meʼa kai ki takotou faifagona pea kotou olo kia natou. ʼE kotou ui age anai kia natou: “ ʼE matou liliu anai ko ʼakotou hahaʼi faifekau.+ Fakalelei siʼokotou ʼu loto, kotou fai he fuakava ʼo te tokalelei mo matou.” ’+ 12 Ko te ʼu pane ʼaeni neʼe matou toʼo, neʼe kei vela ʼi te temi ʼae neʼe matou mavae ai mai ʼomatou ʼapi ʼo ʼomai ki heni. Pea koʼeni, kua ʼafeā pea kua maeveeve.+ 13 Pea neʼe kei foʼou te ʼu ʼaiʼaga vino ʼaeni ʼi te temi ʼae neʼe matou ʼuʼutu ai. Pea koʼeni, kua pūpū.+ Pea kua penu ʼomatou mutuʼi meʼa mo maumau ʼomatou sulie, ʼuhi ko te loaloaga ʼaupito ʼo tamatou faifagona.”
14 Neʼe toʼo ai e te ʼu tagata ʼo Iselaele he koga ʼo tanatou meʼa kai ʼo vakaʼi, kae neʼe mole natou fakafehuʼi ia Sehova.+ 15 Neʼe fai ai leva e Sosue he fuakava ʼo te tokalelei mo natou,+ ʼo ina fakapapau age ai ʼe mole ina matehi anai ia natou. Neʼe toe fakapapau e te ʼu pule ʼo te hahaʼi ʼe natou fakaʼapaʼapa anai ki te fuakava ʼaia.+
16 Hili ʼaho ʼe tolu ki tanatou fai te fuakava, neʼe iloʼi leva e te ʼu tagata ʼo Iselaele neʼe nonofo te ʼu tagata ʼaia ʼi ʼonatou tafaʼaki, neʼe natou nonofo ovi mai pe. 17 Neʼe faifagona leva te kau Iselaele pea hili ʼaho ʼe tolu pea natou tau leva ki te ʼu kolo ʼae ʼe nonofo ai te ʼu tagata ʼaia: ko Kipeone,+ mo Kefila, mo Peeloti, pea mo Kiliate-sealimi.+ 18 Kae neʼe mole ʼohofi natou e te kau Iselaele, ʼuhi ko te fakapapau ʼae neʼe fai age e te ʼu pule ʼo te hahaʼi ʼi te huafa ʼo Sehova,+ te ʼAtua ʼo Iselaele. Neʼe kamata muhumuhu ai ia te hahaʼi katoa ki te kau pule. 19 Pea neʼe ui e te ʼu pule ki te hahaʼi katoa: “ ʼE mole feala ke tou fai he meʼa ʼe kovi kia natou, koteʼuhi kua matou ʼosi fai age he fakapapau ʼi te huafa ʼo Sehova, te ʼAtua ʼo Iselaele. 20 Koʼeni te meʼa ʼae ka tou fai anai kia natou: ʼE tou tuku anai ke natou maʼuʼuli, ke mole to te hauhau ʼo te ʼAtua kia tatou, koteʼuhi kua matou ʼosi fai he fakapapau kia natou.”+ 21 Pea neʼe toe ui e te kau pule, ohage pe ko tanatou fakapapau age ki te hahaʼi ʼo Kipeone: “ ʼE mole kotou matehi anai ia natou, kae ʼe natou tae fafie anai pea mo ohu vai maʼa te hahaʼi katoa, ʼo kamata atu ʼi te ʼaho nei.”
22 Pea neʼe pauʼi e Sosue te hahaʼi ʼo Kipeone pea neʼe ina ui age kia natou: “He koʼe neʼe kotou kakaʼi ia matou, ʼo kotou ui mai: ‘ ʼE matou ʼomai mai he fenua mamaʼo,’ kae ta la ia ʼe kotou nonofo ovi mai pe?+ 23 Koia, ʼe kotou malaʼia anai+ ʼo kamata atu ʼi te ʼaho nei pea ʼe kotou maʼuli kaugana anai ʼo talu ai. ʼE kotou tae fafie anai pea mo ohu vai maʼa te fale ʼo toku ʼAtua.” 24 Pea neʼe natou tali kia Sosue: “Siʼomatou ʼaliki, neʼe matou fai te faʼahi ʼaia he neʼe fakaha lelei mai neʼe ko Sehova, tou ʼAtua ʼae neʼe ina fakatotonu ki tana tagata faifekau ko Moisese ke ina foaki atu kia koutou te fenua katoa, pea ke ina matehi te hahaʼi ʼo te fenua, moka kotou hu anai ki ai.+ Koia, neʼe matou matataku ai+ naʼa kotou matehi matou.*+ 25 ʼI te lakaga nei, ʼe matou fakalogo anai kia meʼa fuli ʼe ke fakatotonu mai. Fai kia matou te meʼa ʼae ʼe ke sio ʼe lelei mo totonu.” 26 Pea koʼeni te meʼa ʼae neʼe fai e Sosue kia natou: neʼe ina puipui natou pea neʼe mole ina tuku ke matehi natou e te kau Iselaele, ʼae neʼe iita. 27 Kae neʼe fakatotonu e Sosue ʼi te ʼaho ʼaia ke natou tae fafie pea mo ohu vai maʼa te hahaʼi+ pea mo te ʼaletale ʼo Sehova, ʼi te koga meʼa ʼae ka Ina* filifili.+ Pea ʼe kei natou fai pe te gaue ʼaia ia ʼaho nei.+