Te Evaselio ʼa Soane

11 Neʼe ʼi ai te tagata neʼe higoa ko Lasalo pea neʼe mahaki. Neʼe maʼuli ʼi Petania, te kolo ʼo Malia mo tona tehina ko Maleta.+ 2 Neʼe ko Malia ʼae neʼe ina tākai lolo magoni te ʼu vaʼe ʼo te ʼAliki pea mo holoholoʼi ʼaki tona lauʼulu.+ Neʼe ko tona tokolua ia Lasalo, ʼae neʼe mahaki. 3 Neʼe fekauʼi e te tau tehina ia he tahi ke alu ʼo fakaha kia Sesu te logo ʼaeni: “ ʼAliki, ko ia ʼae ʼe ke ʼofa ai kua mahaki.” 4 Kae ʼi te logo ʼa Sesu ki te faʼahi ʼaia, neʼe ina ui: “Ko te mahaki ʼaeni ʼe mole iku anai ki te mate, kae ke fakakololiaʼi ai te ʼAtua,+ pea ke fakakololiaʼi te ʼAlo ʼo te ʼAtua.”

5 Neʼe ʼofa ia Sesu ia Maleta pea mo tona tehina pea mo Lasalo. 6 Kae ʼi tana logo ʼae kua mahaki ia Lasalo, neʼe hoko atu tana nofo ia ʼaho ʼe lua ʼi te koga meʼa ʼae neʼe ʼi ai. 7 Pea hili ia, neʼe ina ui ki te kau tisipulo: “Tou toe olo ki Sutea.” 8 Neʼe ui e te kau tisipulo kia te ia: “Lapi,+ heʼeki faʼa fualoa neʼe faigaʼi e te kau Sutea ke natou taumakaʼi koe,+ kae ʼe ke toe fia alu pe koe ki ai?” 9 Neʼe tali e Sesu: “ ʼE mahino ia, ko hola ʼe 12 ʼi te ʼaho.+ Kapau ʼe haʼele he tahi ʼi te ʼaho, ʼe mole tukia ʼi he meʼa, koteʼuhi ʼe sio ki te malama ʼo te malamanei. 10 Kae kapau ʼe haʼele he tahi ʼi te poʼuli, ʼe tukia koteʼuhi ʼe mole ia ia te malama.”

11 Hili tana fai te ʼu palalau ʼaia, neʼe ina ui: “ ʼE moe ia totatou kaumeʼa ko Lasalo,+ kae ʼe au alu ʼo fafagu ia ia.” 12 Pea neʼe ui e te kau tisipulo kia te ia: “ ʼAliki, kapau ʼe moe, ʼe lelei anai ia.” 13 Kae neʼe palalau ia Sesu ʼo ʼuhiga mo tona mate. Kae neʼe natou manatu neʼe ina ui ʼe moe ia Lasalo mo malolo. 14 Koia, neʼe ui fakahagatonu e Sesu kia natou: “Kua mate ia Lasalo,+ 15 pea ʼe au fiafia ʼo ʼuhiga mo koutou ʼi taku mole ʼi ai, ke feala ai hakotou tui. Kae tou olo ki ai.” 16 Ko Tomasi, ʼae neʼe toe higoa ko Mahagā, neʼe ina ui ki te tahi ʼu tisipulo: “Tou olo mo tatou, ke tou mamate mo ia.”+

17 ʼI te tau atu ʼa Sesu, neʼe kua ʼaho fa ia te tuku ʼo te sino ʼo Lasalo ʼi te fale maka.* 18 Neʼe tuʼu ovi ia Petania ki Selusalemi ia teitei kilometa ʼe tolu.* 19 Pea tokolahi te kau Sutea neʼe ʼomai ʼo fakafimalieʼi ia Maleta mo Malia ʼo ʼuhiga mo tonā tokolua. 20 ʼI te logo ʼa Maleta ʼe haʼu ia Sesu, neʼe alu ʼo fakafelaveʼi kia te ia. Kae neʼe nofo ia Malia+ ʼi fale. 21 Neʼe ui leva e Maleta kia Sesu: “ ʼAliki, ka na neʼe ke ʼi heni la, neʼe mole mate toku tokolua. 22 Kae ʼe kei au tui pe, ko he meʼa ʼe ke kole ki te ʼAtua, ʼe ina foaki atu anai.” 23 Neʼe ui e Sesu ki ai: “ ʼE toe maʼuli ake anai tou tokolua.” 24 Neʼe ui e Maleta kia te ia: “ ʼE au iloʼi ʼe toe maʼuli ake anai ʼi te temi ʼo te fakatuʼuake+ ʼi te ʼaho fakamuli.” 25 Neʼe ui e Sesu ki ai: “Ko au te fakatuʼuake pea mo te maʼuli.+ Ko ʼae ʼe tui kia te au, tatau aipe pe ʼe mate, ʼe toe maʼuli anai. 26 Pea ko ʼae ʼe maʼuli pea mo tui kia te au, ʼe mole mate anai ʼi he temi.+ ʼE ke tui koa ki ai?” 27 Neʼe ina tali age: “ ʼEi, ʼAliki, ʼe au tui ko koe ia Kilisito,* te ʼAlo ʼo te ʼAtua, ia ia ʼae ʼe haʼu ki te malamanei.” 28 ʼI te ʼosi palalau ʼa Maleta, neʼe alu leva ʼo pauʼi tona tehina ko Malia. Neʼe fanafana ki ai: “Kua tau mai te ʼAliki+ pea ʼe ina pauʼi koe.” 29 ʼI te logo ki ai ʼa Malia, neʼe tuʼu fakavilivili ake ʼo alu kia te ia.

30 Neʼe heʼeki hu ia Sesu ki te kolo kae neʼe kei nofo ʼi te faʼahi ʼae neʼe felaveʼi ai mo Maleta. 31 Ko te kau Sutea ʼae neʼe nonofo mo Malia ʼi te loto fale ʼo fakafimalieʼi ia ia, neʼe natou sisio ki tana tuʼu fakavilivili ake ʼo alu. Neʼe natou muliʼi ia ia, he neʼe natou manatu ʼe alu ki te fale maka*+ ʼo tagi ai. 32 ʼI te tau atu ʼa Malia ki te faʼahi ʼae neʼe ʼi ai ia Sesu pea mo sio kia te ia, neʼe tuʼutuli ifo ki ʼona vaʼe ʼo ui: “ ʼAliki, ka na neʼe ke ʼi heni la, neʼe mole mate toku tokolua.” 33 ʼI te sio ʼa Sesu ki te tagi ʼa Malia mo te fetagihi ʼa te kau Sutea ʼae neʼe ʼomai mo ia, neʼe lotomamahi ʼaupito mo lotohoha. 34 Neʼe ina ui: “Neʼe kotou tuku ia ia ʼifea?” Neʼe natou tali kia te ia: “ ʼAliki, haʼu ʼo sio.” 35 Neʼe tagi leva ia Sesu.+ 36 Neʼe ui ai e te kau Sutea: “ ʼE iloga tona ʼofa ia ia!” 37 Kae neʼe ui e ʼihi: “Ko te tagata ʼaeni neʼe ina fakamalolo te tagata kivi.+ Neʼe mole feala koa la ia ke ina faigaʼi ke ʼaua naʼa mate ia Lasalo?”

38 Neʼe toe manava lahi ia Sesu, pea neʼe alu leva ki te fale maka.* Neʼe ko te ʼana pea neʼe pupunu ʼaki te foʼi maka. 39 Neʼe ui e Sesu: “Kotou toʼo kehe te foʼi maka.” Ko Maleta, te tokolua ʼo ia ʼae kua mate, neʼe ina ui age: “ ʼAliki, kua lagi mamanu, koteʼuhi kua hili ʼaho ʼe fa.” 40 Neʼe ui e Sesu ki ai: “Neʼe mole au ui atu koa la, kapau ʼe ke tui, pea ʼe ke sio anai ki te kololia ʼo te ʼAtua?”+ 41 Koia, neʼe natou toʼo kehe ai te foʼi maka. Neʼe hiki ake e Sesu ʼona mata ki te lagi+ ʼo ina ui: “Tamai, ʼe au fakafetaʼi atu he neʼe ke fagono mai ki taku faikole. 42 ʼE moʼoni, ʼe au iloʼi ʼe ke fagono tuʼumaʼu mai kia te au. Kae neʼe au palalau ʼuhi ko te hahaʼi tokolahi ʼae ʼe tutuʼu ʼi heni, ke feala hanatou tui neʼe ke fekauʼi mai au.”+ 43 ʼI tana ʼosi fai te ʼu palalau ʼaia, neʼe kalaga: “Lasalo, haʼu ki tuʼa!”+ 44 Pea neʼe hu mai ki tuʼa te tagata ʼae neʼe kua mate. Neʼe haʼihaʼi ʼona vaʼe mo ʼona nima ʼaki he ʼu moʼi kie, pea neʼe pulouʼi tona fofoga ʼaki te kie. Neʼe ui e Sesu kia natou: “Kotou vevete ia ia pea kotou tuku age ke alu.”

45 Koia, tokolahi ʼi te kau Sutea ʼae neʼe ʼomai kia Malia pea neʼe sisio ki te meʼa ʼae neʼe ina fai neʼe natou tui kia te ia.+ 46 Kae ko ʼihi ia natou neʼe olo ki te kau Faliseo ʼo fakamatala age te meʼa ʼae neʼe fai e Sesu. 47 Neʼe fakatahiʼi e te kau pelepitelo pule mo te kau Faliseo ia te Sanetualio* pea neʼe natou ui: “Kotea ʼae ka tou fai? Koteʼuhi ʼe lahi te ʼu milakulo ʼe fakahoko e te tagata ʼaeni.+ 48 Kapau ʼe tou tuku ia ia ke hoko atu feia, ʼe natou tui fuli anai kia te ia, pea ʼe ʼomai anai te kau Loma ʼo puleʼi totatou fale lotu pea mo totatou puleʼaga.” 49 Kae ko te tahi ia natou, ko Kaifa,+ neʼe ko te pelepitelo lahi ʼi te taʼu ʼaia, neʼe ina ui kia natou: “ ʼE mole kotou iloʼi he meʼa, 50 pea ʼe mole kotou mahino ʼe lelei age kia koutou ke mate he tagata ʼe tahi maʼa te hahaʼi ʼi te pulihi ʼo te puleʼaga katoa.” 51 Neʼe mole haʼu te ʼu palalau ʼaia mai ia ia totonu, kae ʼuhi ʼae neʼe ko ia te pelepitelo lahi ʼi te taʼu ʼaia, neʼe ina fakakikite ai neʼe tonu ke mate ia Sesu maʼa te puleʼaga, 52 pea ʼe mole gata pe maʼa te puleʼaga, kae ke toe fakatahi foki ʼi te logo tahi ia te ʼu fanau ʼa te ʼAtua ʼae kua mavetevete. 53 Talu mai te ʼaho ʼaia, neʼe natou fonofono ke natou matehi ia ia.

54 Koia, neʼe mole kei fealuʼaki fakahaha ia Sesu ʼi te kau Sutea. Kae neʼe mavae mai ai ʼo alu ki te koga fenua ʼe tuʼu ovi ki te toafa, ki te kolo neʼe higoa ko Efalaimi.+ Neʼe nofo ai mo te kau tisipulo. 55 Pea neʼe kua ovi mai te Pasikate+ ʼa te kau Sutea. Ko te hahaʼi tokolahi mai te fenua katoa neʼe natou hake ki Selusalemi ʼi muʼa ʼo te Pasikate, ke fakamaʼa natou ʼo mulimuli ki te Lao. 56 Neʼe natou kumi ia Sesu, pea neʼe natou feuiʼaki ʼi tanatou ʼi te fale lotu: “Kotea takotou manatu? ʼE haʼu anai koa ki te ʼaho lahi?” 57 Kae neʼe fai e te kau pelepitelo pule mo te kau Faliseo te fakatotonu ʼae, kapau ʼe iloʼi e he tahi pe ʼe ʼifea ia Sesu, pea ʼe tonu ke ina fakaha age, ke feala hanatou puke ia ia.