Selemia
9 Oie, ka na pau la neʼe hage toku ʼulu ko he vai keli,
Ka na pau la neʼe hage ʼoku mata ko he matapuna ʼo ni loʼimata,+
ʼE au tagiʼi anai ʼi te ʼaho mo te po
Te kau mātea ʼo taku hahaʼi.
2 Oie, ka na pau la neʼe au iloʼi ʼe ʼi ai he nofoʼaga maʼa te kau faifolau ʼi te toafa,
3 ʼE hage ʼonatou ʼalelo ko he nahau kua teuteu, ke ina fana ni loi.
Kua fonu pe te fenua ko te kaka, ʼe mole maʼu ai te agatonu.+
“Kua ʼasili kovi ʼosi tanatou aga,
Pea ʼe mole natou tokagaʼi pe la ia au,”+ ko te ui ʼaia ʼa Sehova.
4 “Kotou nofo tokaga ki ʼokotou kaumeʼa fuli
Pea ʼaua naʼa kotou falala ki he tahi, maʼiape la mo tokotou tehina,
5 ʼE natou tahi kaihaʼa pe tona kaumeʼa
Pea ʼe mole ʼi ai he tahi ʼe ina tala te moʼoni.
Neʼe natou akoʼi tonatou ʼalelo ke loi.+
Kua natou fiu ʼi te fai ʼo te meʼa ʼae ʼe kovi.
6 ʼE ke maʼuli ʼi te lotolotoiga ʼo te hahaʼi kaka.
Neʼe mole natou fia iloʼi ia au ʼuhi ko ʼanatou kaka,” ko te ui ʼaia ʼa Sehova.
7 Koia, koʼeni te folafola ʼa Sehova ʼo te ʼatu kautau:
“ ʼE au fakamaʼa anai natou ʼaki te afi ke au iloʼi tonatou ʼuhiga,+
He ʼe mole feala ke au fai he tahi age meʼa mo te taʼahine ʼo taku hahaʼi.
8 ʼE hage ʼonatou ʼalelo ko he kauʼi nahau fakatupu mate ʼe ina tala ni loi.
ʼAki tona gutu ʼe palalau he tagata ki tona tatau ʼo ʼuhiga mo te tokalelei,
Kae ʼi ʼana manatu ʼe ina fakatuʼu ki ai he hele.”
9 ʼE ui e Sehova: “ ʼE mole tonu koa la ke au fakatuʼā ia natou ʼuhi ko te ʼu meʼa fuli ʼaia?
ʼE mole tonu koa la ke au lagavaka ki te taʼi puleʼaga ʼaia?+
10 ʼE au tagi anai mo lauga ʼo ʼuhiga mo te ʼu moʼuga,
ʼE au hiva anai he tagilaulau* ʼo ʼuhiga mo te ʼu koga meʼa lunaʼia ʼae ʼi te vao,
He ʼe kua tutu ia ʼo mole kei feala ke fakalaka ai he tahi.
ʼE mole kei logo te tagi ʼa te ʼu faga manu.
Kua feholaki te ʼu manulele pea mo te ʼu manu ʼo te vao, kua olo ia.+
11 ʼE au fakaliliu anai ia Selusalemi ko ni tuʼuga maka,+ he nofoʼaga ʼo te ʼu kuli vao,+
Pea ʼe au fakaliliu anai te ʼu kolo ʼo Suta ko he koga meʼa lavaki ʼo mole kei nofoʼi.+
12 Ko ai ʼae ʼe feʼauga tona poto ke mahino ki te faʼahi ʼaia?
Kapau neʼe palalau ia Sehova kia ia, ke ina fakaha!
He koʼe kua maumau te fenua?
He koʼe kua gosigosi ohage ko te toafa,
ʼO mole kei fakalaka ai he tahi?”
13 Neʼe tali leva e Sehova: “Koteʼuhi neʼe natou liʼaki te lao* ʼae neʼe au foaki age, neʼe mole natou fakaʼapaʼapa ki ai pea neʼe mole natou fakalogo kia te au. 14 Kae neʼe uigataʼa natou ʼo mulimuli ki ʼonatou holi kovi.+ Neʼe natou atolasio ki te ʼu fakatata ʼo Paale ohage ko tona akoʼi age e ʼanatou tamai.+ 15 Koia, koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘ ʼE au fafaga anai te hahaʼi ʼaeni ʼaki te apiseneto* pea ʼe au fakainu anai ʼaki he vai kona.+ 16 ʼE au fakamavetevete anai natou ʼi te ʼu puleʼaga ʼae neʼe mole natou iloʼi mo ʼanatou kui,+ pea ʼe au uga anai ʼonatou fili ke natou tuli natou ʼo kaku ki taku pulihi natou.’+
17 Koʼeni te folafola ʼa Sehova ʼo te ʼatu kautau:
‘Kotou aga fakapotopoto.
Kotou fekauʼi mai te ʼu fafine ʼae ʼe natou hiva te ʼu hiva mate,+
Pea kotou pauʼi mai te ʼu fafine faiva ʼi te tagilaulau.
18 Ke natou fakavilivili mai pea ke natou tagilaulau maʼa tatou
Ke hali ai ʼotatou loʼimata,
Ke maligi te vai ʼi ʼotatou laumata.+
19 Neʼe logo mai he tagilaulau mai Sione:+
“ ʼI toe malaʼia leva ʼae neʼe hoko kia tatou!
ʼI toe ufiufi leva!
Neʼe tou mavae ʼi te fenua pea neʼe natou maumauʼi ʼotatou ʼapi.”+
20 ʼU fafine, kotou fagono ki te folafola ʼa Sehova.
Ke mahino ʼokotou taliga ki te folafola ʼae ʼe haʼu mai ia te ia.
21 He ʼe kua hake mai te mate pea kua ulu mai ʼi ʼotatou matapa fakamalama.
Kua hu mai ki ʼotatou tule malolohi
Moʼo ʼave te ʼu fanau ʼae ʼi te ʼu ala
Pea mo te kau tupulaga ʼae ʼi te ʼu malaʼe lalahi.’+
22 Ke ke tala: ‘Koʼeni te folafola ʼa Sehova:
“ ʼE leta anai te ʼu sino mate ʼo te hahaʼi ohage ko he meʼa fakagako kele ʼi he gaueʼaga,
Ohage ko he fuhiga fulumeto neʼe hoki tuʼusi e te tagata tanaki taʼukai,
Pea ʼe mole tae anai e he tahi.” ’ ”+
23 Koʼeni te folafola ʼa Sehova:
“Ke ʼaua naʼa laupisi te tagata poto ʼuhi ko tona poto.+
Ke ʼaua naʼa laupisi ia ia ʼae ʼe malohi ʼuhi ko tona malohi.
Pea ke ʼaua naʼa laupisi ia ia ʼae ʼe maʼu koloa ʼuhi ko ʼona koloa.”+
24 “Kae ko ia ʼae ʼe laupisi,
Ke laupisi ʼi tana fakasiosio poto pea mo tana iloʼi ia au,+
ʼI tana iloʼi ʼae ko au ia Sehova, ia Ia ʼae ʼe ʼofa agatonu, ʼae ʼe ina fakahoko te faitotonu pea mo agatonu ʼi te kele,+
Koteʼuhi ʼe au fiafia ʼi te ʼu meʼa ʼaia,”+ ko te ui ʼaia ʼa Sehova.
25 ʼE tala e Sehova: “Kotou fakalogo! ʼE hoko mai anai he ʼaho ʼe au fakamauʼi ai ia natou fuli ʼae kua silikosisioʼi, kae ʼe natou heʼe silikosisio,+ 26 ia Esipito,+ mo Suta,+ mo Etome,+ mo te kau Amone+ pea mo Moape,+ ʼo toe feia pe mo natou fuli ʼae neʼe tuʼusi ʼonatou lauʼulu ki ʼonatou niania mo nonofo ʼi te toafa.+ Ko te ʼu puleʼaga fuli ʼaia ʼe heʼe silikosisio pea ko te hahaʼi fuli ʼo Iselaele ʼe heʼe silikosisio ʼonatou loto.”+