Sosue
5 Neʼe iloʼi leva e te ʼu hau fuli ʼo te kau Amole+ ʼae neʼe ʼi te potu uesite ʼo te Solotane,* pea mo te ʼu hau fuli ʼo te kau Kanaane+ ʼae neʼe nonofo ovi ki te tai, neʼe fakamamaha e Sehova te vai ʼo te Solotane ia muʼa ʼo te kau Iselaele, ʼo kaku ki tanatou ʼosi fakalaka ai. Neʼe natou lotovaivai+ ai pea neʼe mole kei lototoʼa he tahi ʼuhi ko te kau Iselaele.+
2 ʼI te temi ʼaia, neʼe ui e Sehova kia Sosue: “Fai ni hele ʼaki ni maka masila, pea ke ke toe silikosisioʼi+ te hahaʼi tagata ʼo Iselaele.” 3 Koia, neʼe fai ai e Sosue ni hele ʼaki ni maka masila pea neʼe ina silikosisioʼi* ai te hahaʼi tagata ʼo Iselaele, ʼi Kipeate-alaloti.+ 4 Neʼe silikosisioʼi natou e Sosue he neʼe kua mamate te hahaʼi tagata fuli ʼae neʼe mavae mai Esipito ʼi te toafa, lolotoga tanatou faifagona ʼi tanatou ʼosi mavae mai Esipito. Ko te hahaʼi tagata ʼaia neʼe ko te ʼu tagata tau fuli.*+ 5 Neʼe kua ʼosi silikosisioʼi te ʼu tagata fuli ʼae neʼe mavae mai Esipito, kae neʼe heʼeki silikosisioʼi ia natou fuli ʼae neʼe tutupu ʼi te toafa, lolotoga tanatou faifagona ʼi tanatou kua mavae mai Esipito. 6 Neʼe haʼele te kau Iselaele lolotoga taʼu ʼe 40+ ʼi te toafa, ʼo kaku ki te pulihi ʼo te puleʼaga katoa, ia te ʼu tagata tau ʼae neʼe mavae mai Esipito pea neʼe mole natou fakalogo kia Sehova.+ Neʼe fakaha lelei age e Sehova kia natou, ʼe mole ina tuku anai ke natou sisio ki te fenua+ ʼae neʼe fakapapauʼi e Sehova ki ʼanatou kui ke ina foaki mai kia tatou,+ ko he fenua ʼe tafe ai te huʼa pipi mo te meli.+ 7 Koia, neʼe fetogi ai natou e ʼonatou foha.+ Ko natou ʼaia neʼe silikosisioʼi e Sosue, he neʼe mole silikosisioʼi ia natou lolotoga tanatou faifagona.
8 ʼI te ʼosi silikosisioʼi ʼo te hahaʼi tagata fuli, neʼe nonofo maʼu te kau Iselaele ʼi te nofoʼaga ʼo kaku ki tanatou kua lelei.
9 Neʼe ui leva e Sehova kia Sosue: “ ʼI te ʼaho nei, neʼe au fakagata tokotou fakalainoaʼi e te kau Esipito.” Koia, neʼe fakahigoaʼi ai te koga meʼa ʼaia ko Kilekale,*+ ʼo kaku mai ki te ʼaho nei.
10 Neʼe hoko atu pe te nonofo ʼa te kau Iselaele ʼi Kilekale. Neʼe natou fai te Pasikate ʼi te afiafi ʼo te ʼaho 14 ʼo te mahina,+ ʼi te ʼu kele toafa ʼae ʼe ina ʼa takai ia Seliko. 11 Pea ʼi te ʼaho ake ʼo te Pasikate, neʼe natou kai te ʼu fua ʼo te fenua: te ʼu pane hala fakatupu+ pea mo te olose ʼae neʼe tunu. 12 ʼI te ʼaho ʼae neʼe natou kai ai te ʼu fua ʼo te fenua, neʼe mole kei ha ai te mane. Neʼe mole kei maʼu e te kau Iselaele he mane.+ ʼI te taʼu ʼaia, neʼe natou kai leva te ʼu fua ʼo te fenua ʼo Kanaane.+
13 ʼI te fakaovi atu ʼa Sosue ki Seliko, neʼe sio ki te tuʼu ʼa te tagata+ ʼi ʼona muʼa, mo te heleta ʼi tona nima.+ Neʼe alu ia Sosue ki ai ʼo fehuʼi age: “ ʼE ke kau mo matou peʼe ke kau mo ʼomatou fili?” 14 Neʼe tali age e te tagata: “Neʼe au* haʼu ʼi toku ʼuhiga tama ʼaliki* ʼo te kautau ʼa Sehova.”+ Pea neʼe tuʼutuli ifo ai ia Sosue ʼo tulolo ʼi ʼona muʼa, pea neʼe ina ui age: “Siʼoku ʼaliki, kotea ʼae ʼe ke fia ui mai?” 15 Neʼe tali e te tama ʼaliki ʼo te kautau ʼa Sehova kia Sosue: “Huʼi ʼou sulie, koteʼuhi ʼe taputapu te koga meʼa ʼae ʼe ke tuʼu ai.” Neʼe huʼi atu aipe e Sosue ʼona sulie.+