Lua Samuele

20 Pea neʼe ʼi ai he tagata fakatupu maveuveu neʼe higoa ko Sepa,+ te foha ʼo Pikili, te tagata Pesamino. Neʼe ina pupuhi te fakatagi pupuhi+ pea mo ina ui: “ ʼE mole ʼi ai hotatou vahe ia Tavite pea ʼe mole ʼi ai hotatou tofiʼa ʼi te foha ʼo Sese.+ Koia, hahaʼi ʼo Iselaele, kotou tahi olo ki ʼona ʼatua!”*+ 2 Neʼe mole kei muliʼi leva e te ʼu tagata fuli ʼo Iselaele ia Tavite kae neʼe natou muliʼi ia Sepa, te foha ʼo Pikili.+ Kae neʼe nonofo te ʼu tagata ʼo Suta mo tonatou hau pea neʼe natou muliʼi ia ia, mai te Solotane ki Selusalemi.+

3 ʼI te temi pe ʼae neʼe tau ai ia Tavite ki tona fale hau ʼi Selusalemi,+ neʼe ina toʼo ai ʼana fafine ʼe toko hogofulu ʼae neʼe ina tuku ke natou tokakaga ki te fale hau,+ ʼo ina ʼave ki he ʼapi neʼe leʼo. Neʼe ina fafaga natou, kae neʼe mole kei momoe mo natou.+ Neʼe mole natou mavae ʼi te fale ʼaia ʼo kaku ki tanatou mamate, ʼo natou maʼuʼuli ai ohage ko he ʼu fafine vitua, logo la neʼe kei maʼuli tonatou ʼohoana.

4 Pea neʼe ui e te hau kia Amasa:+ “ ʼE au tuku atu ʼaho ʼe tolu ke ke pauʼi te ʼu tagata ʼo Suta ke natou maʼopoʼopo mai. Pea ʼe tonu ke ke toe haʼu mo koe.” 5 Neʼe alu ai ia Amasa ʼo pauʼi te ʼu tagata ʼo Suta ke natou maʼopoʼopo age. Kae neʼe haʼu tauhala ia, he neʼe mole liliu mai ʼi te temi ʼae neʼe kua fakatuʼutuʼu ki ai te hau. 6 Neʼe ui leva e Tavite kia Apisai:+ “ ʼE lagi kovi age anai te meʼa ʼae ka fai e Sepa,+ te foha ʼo Pikili kia tatou ʼi te meʼa ʼae neʼe fai e Apesalone.+ Koia, toʼo ʼaku hahaʼi faifekau pea mo ke tuli ia ia, ke ʼaua naʼa ina maʼu ni kolo tau pea ke hao ai mai ia tatou.” 7 Pea neʼe mavae ʼi Selusalemi te ʼu tagata ʼa Soape,+ mo te kau Keleti, mo te kau Peletite+ pea mo te ʼu tagata malolohi fuli, ʼo natou tuli ia Sepa, te foha ʼo Pikili. 8 ʼI tanatou ovi ki te fuʼu maka lahi ʼi Kipeone,+ neʼe haʼu ia Amasa+ ʼo fakafelaveʼi kia natou. Neʼe tui e Soape tona teu tau, pea neʼe ina ʼai tana heleta ʼi tona ʼaiʼaga ʼo ina haʼi ʼi tona faʼahi vakavaka. ʼI tana fakaoviovi atu kia Amasa, neʼe to tana heleta.

9 Neʼe ui e Soape kia Amasa: “Siʼoku tehina, ʼe ke lelei pe?” Pea neʼe puke e Soape ʼaki tona nima mataʼu te kava ʼo Amasa, ohage ʼe fia ʼuma ki ai. 10 Neʼe mole tokagaʼi e Amasa te heleta ʼae neʼe ʼi te nima ʼo Soape, pea neʼe hukiʼi ia ia e Soape ʼi tona fatu,+ ʼo haʼu ai tona gākau ki tuʼa. Neʼe mole ʼaoga ke toe hukiʼi tuʼa lua ia ia, ke mate ai. Neʼe hoko atu leva e Soape mo Apisai, tona tehina te tuli ʼo Sepa, te foha ʼo Pikili.

11 Neʼe tuʼu ovi kia ia te tagata tupulaga ʼo te ʼu tagata tupulaga ʼa Soape, ʼo ina ui: “Ko ia ʼae ʼe kau mo Soape, pea ko ia ʼae ʼe ʼa Tavite ke ina muliʼi ia Soape!” 12 Kae ʼi te temi ʼaia, neʼe kei takoto ia Amasa ʼi tona toto ʼi te loto ala. Pea ʼi te sio ʼa te tagata neʼe tutuʼu te hahaʼi fuli, neʼe ina toho ai ia Amasa ki he gaueʼaga. Neʼe ina ʼuʼufi leva ia ia ʼaki he kofu, he neʼe ina tokagaʼi neʼe tutuʼu te hahaʼi fuli ʼi ai. 13 ʼI tana ʼosi toʼo kehe ia ia mai te ala, neʼe muliʼi leva e te ʼu tagata fuli ia Soape, ʼo natou tuli ia Sepa,+ te foha ʼo Pikili.

14 Neʼe fakalaka ia Sepa ʼi te ʼu telepi fuli ʼo Iselaele ʼo kaku ki Apele-pete-maaka.+ Neʼe fakatahitahi te kau Pikili ʼo natou olo mo ia.

15 Neʼe ʼomai leva ia Soape mo ʼana tagata* ʼo ʼa takai ia Apele-pete-maaka, te kolo ʼae neʼe nofo ai ia Sepa. Neʼe natou fakatuʼuga he kele ke natou kaku ki te kaupa ʼo te kolo, he neʼe tuʼu ʼi he faʼahi maʼoluga. Pea neʼe keli e te ʼu tagata fuli ʼa Soape te ʼu fakatafito ʼo te kaupa ke holo ai. 16 Pea neʼe kalaga he fafine poto mai te kolo, ʼo ina ui: “Kotou fakalogo mai, ʼu tagata, kotou fakalogo mai! Fakalelei siʼokotou loto, kae kotou fakaha age kia Soape ke haʼu he ʼe au fia palalau ki ai.” 17 Neʼe fakaovi ai kia ia, pea neʼe ui age e te fafine: “Ko koe koa ko Soape?” Neʼe ina tali age: “ ʼEi, ko au.” Pea neʼe ui age e te fafine: “Fagono mai ki ʼaku palalau.” Neʼe ina ui: “ ʼE au fakalogo atu.” 18 Neʼe hoko atu e te fafine: “ ʼI te temi muʼa, neʼe ui tuʼumaʼu e te hahaʼi: ‘Ke natou olo ki te kolo ko Apele ʼo kumi tokoni ai,’ pea ʼe mahino papau ia ʼe fakatokatoka anai ʼonatou fihifihia. 19 ʼE au fakafofoga te hahaʼi tokalelei mo agatonu ʼo Iselaele. Pea ʼe ke faiga ke ke maumauʼi he kolo ʼe hage ko hamatou faʼe ʼi Iselaele. He koʼe koa ʼe ke pulihi anai te hahaʼi ʼa* Sehova?”+ 20 Kae neʼe tali age e Soape: “Neʼe mole au fakatuʼutuʼu ke au pulihi mo maumauʼi ia te kolo. 21 ʼE mole koia ʼaia. Kae ʼe ʼi ai he tagata ʼi tokotou kolo ʼe higoa ko Sepa,+ te foha ʼo Pikili mai te potu moʼugaʼia ʼo Efalaimi,+ neʼe agatuʼu ia* ki te Hau ko Tavite. Kapau ʼe kotou tuku mai ia te tagata ʼaia, ʼe au mavae anai ʼi te kolo.” Pea neʼe ui age leva e te fafine kia Soape: “ ʼIo, ʼe li atu anai tona foʼi ʼulu ʼi ʼoluga ʼo te kaupa!”

22 Neʼe alu atu aipe ia te fafine poto ʼaia ki te hahaʼi fuli, pea neʼe natou tuʼusi leva te foʼi ʼulu ʼo Sepa, te foha ʼo Pikili pea natou li age kia Soape. Neʼe ina pupuhi te fakatagi pupuhi, pea neʼe natou mavae ai ʼi te kolo ʼo tahi olo ki tona ʼapi.+ Pea neʼe toe liliu ia Soape ki te hau ʼi Selusalemi.

23 Neʼe pule ia Soape ki te foʼi kautau katoa ʼo Iselaele.+ Pea neʼe pule ia Penaia,+ te foha ʼo Seosata+ ki te kau Keleti mo te kau Peletite.+ 24 Neʼe tokaga ia Atolame+ kia natou ʼae neʼe fakamaʼua ke gaue maʼa te hau. Ko Sosafate,+ te foha ʼo Asilute, neʼe ko te sikalaipe ʼa te hau. 25 Ko Sesa neʼe ko te sikalaipe. Ko Satoke+ mo Apiata+ neʼe ko he ʼu pelepitelo. 26 Pea ko Ila, te tagata Saile, neʼe toe liliu mo ia ko he minisi* ʼa Tavite.