Sosue

20 Pea neʼe ui e Sehova kia Sosue: 2 “Ke ke ui ki te kau Iselaele: ‘Kotou filifili maʼa koutou he ʼu kolo ʼo te haofaki+ ʼae neʼe au fakaha atu ʼaki ia Moisese, 3 ke feala ai kia ia ʼae neʼe ina matehi he tahi kae neʼe mole loto ki ai ke hola ki ai. ʼE liliu anai te ʼu kolo ʼaia ko hokotou haofakiʼaga mai te tagata lagavaka.*+ 4 ʼE tonu anai ke hola ia ia ʼae neʼe ina matehi he tahi ki he kolo ʼi te ʼu kolo ʼaia,+ ʼo tuʼu ʼi te huʼaga ʼo te matapa ʼo te kolo,+ pea mo fakamahino ki te kau takitaki ʼo te kolo ʼaia te aluʼaga ʼae neʼe hoko. ʼE tuku anai e te kau takitaki ke hu ki te kolo pea mo foaki age ki ai he koga meʼa ke nofo ai, pea ʼe maʼuli ai anai mo natou. 5 Kapau ʼe tuli ia ia e te tagata lagavaka, ʼe mole tonu anai ke tuku ia ia e te kau takitaki kia nima ʼo te tagata ʼaia, koteʼuhi neʼe ina matehi tona tatau kae neʼe mole loto ia ki ai, pea neʼe mole fehiʼa ia ki ai ʼi muʼa atu.+ 6 ʼE tonu anai ke nofo ʼi te kolo ʼaia ʼo aʼu ki tona fakamauʼi e te hahaʼi,+ pea ʼe nofo ai anai ʼo aʼu ki te mate ʼa te pelepitelo lahi,+ ʼae ʼe gaue ʼi te temi ʼaia. Pea ʼe feala anai ke toe liliu ki te kolo ʼae neʼe hola mai ai, ʼei, ʼe toe liliu leva ki tona ʼapi ʼi tona kolo.’ ”+

7 Neʼe natou tuku keheʼi te ʼu kolo ʼaeni: ko Ketesi+ ʼi Kalilea, ʼi te potu moʼugaʼia ʼo Nefetali, mo Sekemi+ ʼi te potu moʼugaʼia ʼo Efalaimi, pea mo Kiliate-alepa,+ ʼae ʼe toe higoa ko Hepelone, ʼi te potu moʼugaʼia ʼo Suta. 8 ʼI te potu fenua ʼo te Solotane, ʼi te potu esite ʼo Seliko, neʼe natou filifili ai ia Petesele,+ ʼi te toafa ʼo te potu maʼoluga, ʼi te fenua ʼo te telepi ʼo Lupeni. Neʼe natou toe filifili ia Lamoti+ ʼi Kileate, ʼi te fenua ʼo te telepi ʼo Kate, pea mo Kolani+ ʼi Pasani, ʼi te fenua ʼo te telepi ʼo Manase.+

9 Neʼe filifili te ʼu kolo ʼaia maʼa te kau Iselaele fuli pea mo te kau matapule ʼae ʼi te lotolotoiga ʼo natou. Neʼe feala pe ke hola ki ai ia ia ʼae neʼe ina matehi he tahi kae neʼe mole loto ki ai.+ Pea neʼe mole feala ke matehi ia ia e te tagata lagavaka, kae heʼeki fakamauʼi e te hahaʼi.+