LUTE

1 ʼI te temi ʼo te ʼu tuʼi fakamau,*+ neʼe hoko ai he hoge ʼi te fenua. Pea neʼe mavae he tagata mai Petelehemi+ ʼi Suta, ʼo alu ʼo nofo ohage ko he matapule ʼi te fenua* ʼo Moape.+ Neʼe ko ia mo tona ʼohoana pea mo ʼona foha ʼe lua. 2 Neʼe higoa te tagata ʼaia ko Elimeleke,* ko tona ʼohoana ko Naomi,* pea ko ʼona foha ʼae ʼe lua ko Malone* pea mo Kilisoni.* Neʼe natou ʼomai mai Efalata, ʼae ʼe toe higoa ko Petelehemi ʼi Suta, ʼo olo ki te fenua ʼo Moape ʼo nonofo ai.

3 Hili he temi, neʼe mate leva ia Elimeleke, te ʼohoana ʼo Naomi, pea neʼe nofo tokotahi ai leva mo ʼana tama ʼae ʼe lua. 4 Ki muli age, neʼe ʼohoana ʼana tama mo te ʼu fafine Moape, neʼe higoa te tahi ko Olipa pea ko te tahi ko Lute.+ Neʼe teitei taʼu hogofulu tanatou nonofo ai. 5 Pea neʼe mamate leva mo te ʼu tama ʼaia ʼe lua, ia Malone mo Kilisoni. Koia, neʼe mole kei ʼi ai he ʼohoana ʼo Naomi pea mo hana fanau. 6 Koia, neʼe mavae ai mo te ʼu ʼohoana ʼo ʼana tama mai te fenua ʼo Moape ʼo toe liliu ki tona fenua, he neʼe logo ʼi Moape ki te tokaga ʼa Sehova ki tana hahaʼi ʼo ina foaki age kia natou he meʼa kai.*

7 Neʼe mavae leva mai te koga meʼa ʼae neʼe nofo ai, ʼo alu mo te ʼu ʼohoana ʼo ʼana tama. ʼI tanatou faifagona ʼi te ala, ʼo toe liliu ki Suta, 8 neʼe ui age e Naomi ki te ʼu ʼohoana ʼo ʼana tama: “Kolua olo, pea kolua tahi liliu la ki te ʼapi ʼo tana faʼe. ʼOfa pe ke fakaha atu e Sehova kia koulua tona ʼofa agatonu,+ ohage pe ko takolua ʼoʼofa kia au pea mo te ʼu tagata ʼae kua mamate. 9 ʼOfa pe ke fakagafua atu e Sehova* ke kolua tahi maʼu he fimalie* ʼi te ʼapi ʼae ʼe kolua toe ʼohoana ai anai.”+ Neʼe ʼuma leva kia naua, mo natou faifetagihi leʼo lahi. 10 Neʼe nā ui age kia ia: “Kailoa, ʼe ma olo anai mo koe ki tau hahaʼi.” 11 Kae neʼe ui e Naomi: “Kolua toe liliu, siʼaku ʼu taʼahine. He koʼe ʼe kolua olo anai mo au? ʼE kei feala koa ke au toe fanauʼi he ʼu tama ke koulua ʼohoanaʼi?+ 12 Kolua toe liliu, siʼaku ʼu taʼahine. Kolua olo, he ʼe mole kei feala ke au ʼohoana koteʼuhi kua au finematuʼa. Pea tatau aipe pe ʼe au ʼohoana ʼi te ʼaho ʼaeni pea mo toe fanauʼi he ʼu tama, 13 ʼe kolua fakatalitali anai koa ʼo kaku ki tanā hoki lalahi? ʼE kolua fakafisi anai koa ke mole kolua ʼohoana ʼuhi ko naua? Kailoa ia, siʼaku ʼu taʼahine, kua au lotomamahi ʼaupito ʼo ʼuhiga mo koulua, he neʼe fakafeagai mai kia au te nima ʼo Sehova.”+

14 Neʼe natou toe faifetagihi leʼo lalahi. Hili ia neʼe ʼuma leva ia Olipa ki te faʼe ʼo tona ʼohoana pea neʼe alu leva ia. Kae neʼe faiga malohi pe ia Lute ke nofo mo ia. 15 Koia, neʼe ui age e Naomi: “Sio, kua toe liliu ia Olipa ki tana hahaʼi pea mo ʼona ʼatua. Ke ke toe liliu foki mo ia.”

16 Kae neʼe ui e Lute: “ ʼAua naʼa ke kole mai ke au liʼaki koe, ke mole au alu mo koe. Koteʼuhi ko te faʼahi ʼae ʼe ke alu ki ai, ʼe au alu anai ki ai, pea ko te koga meʼa ʼae ka ke moe ai, ʼe au moe ai anai. ʼE liliu anai tau hahaʼi ko taku hahaʼi, pea ʼe liliu anai tou ʼAtua ko toku ʼAtua.+ 17 Ko te koga meʼa ʼae ʼe ke mate ai, ʼe au mate ai anai pea ʼe tanu ai anai au. Ke tauteaʼi lahi au e Sehova mo kapau ʼe au tuku he meʼa ke ina veteki taua, gata pe ki te mate.”

18 ʼI te sio ʼa Naomi ki te faiga malohi ʼa Lute ke alu mo ia, neʼe tuku ai leva tana kole age ʼae ke toe liliu kio ia. 19 Pea neʼe hoko atu leva tanā faifagona ʼo kaku ki Petelehemi.+ ʼI tanā tau atu pe ki ai, neʼe gatutu te kolo katoa ʼuhi ko naua, pea neʼe ui e te ʼu fafine: “ ʼE mole koa la ko Naomi?” 20 Kae neʼe ina ui age ki te ʼu fafine ʼaia: “ ʼAua naʼa kotou fakahigoaʼi au ko Naomi.* Kotou fakahigoaʼi au ko Mala,* he ʼe kua lahi ʼoku mamahi ʼuhi ko te Mafimafi.+ 21 Neʼe au maʼu ia meʼa fuli ʼi taku alu, kae neʼe fakaliliu ʼatea mai au e Sehova. He koʼe koa ʼe kotou fakahigoaʼi au ko Naomi, kae ko Sehova ʼae neʼe fakafeagai mai kia au pea ʼe ko te Mafimafi ʼae neʼe ina fakatupu toku malaʼia?”+

22 Ko te fakamatala ʼaia ʼo te toe liliu mai ʼa Naomi mai te fenua ʼo Moape,+ mo Lute, te fafine Moape ʼae neʼe ʼohoana mo tana tama. Neʼe nā tau atu ki Petelehemi ʼi te kamata ʼo te tanaki ʼo te olose.+

2 Neʼe ʼi ai te tagata neʼe kaiga mo Elimeleke, te ʼohoana ʼo Naomi. Neʼe higoa te tagata ʼaia ko Poase+ pea neʼe koloaʼia.

2 Neʼe ui e Lute, te fafine Moape kia Naomi: “Fakalelei siʼou loto, tuku ke au alu ʼo tae te ʼu olose,+ ʼi te ʼu gaueʼaga ʼo mulimuli ki te kau tanaki taʼukai ʼae ka agalelei mai kia au.” Neʼe ui age e Naomi kia ia: “Alu siʼaku taʼahine.” 3 Neʼe alu ai leva ki te gaueʼaga ʼo tae te ʼu olose ʼo mulimuli ki te kau tanaki taʼukai. Meʼa lelei foki he neʼe alu ki te kele ʼo Poase,+ ʼae neʼe kaiga mo Elimeleke.+ 4 Neʼe tau mai leva ia Poase mai Petelehemi pea neʼe ina ui age ki te kau tanaki taʼukai: “Ke nofo ia Sehova mo koutou.” Pea neʼe natou tali age: “Ke tapuakiʼi koe e Sehova.”

5 Pea neʼe fehuʼi e Poase ki te tagata tupulaga ʼae neʼe pule ki te kau tanaki taʼukai: “Ko ai te fafine ʼae age?” 6 Neʼe tali age e te tagata tupulaga ʼae neʼe pule ki te kau tanaki taʼukai: “Ko he fafine Moape+ neʼe ʼomai mo Naomi mai te fenua ʼo Moape.+ 7 Neʼe ina kole mai: ‘Fakalelei siʼou loto, pe ʼe feala la ke au tae te ʼu olose+ ʼae neʼe mole tae e te kau tanaki taʼukai?’ Pea talu tana tau mai ananai uhu mo tana gaue ʼo kaku mai ki te temi ʼaeni, pea neʼe heka ʼi te pola ʼo ʼai tana kiʼi manava.”

8 Pea neʼe ui e Poase kia Lute: “Fakalogo mai, siʼoku ʼofafine. ʼAua naʼa ke alu ʼo tae olose ʼi he tahi age gaueʼaga, pea ʼaua naʼa ke alu ki he tahi age faʼahi. Ke ke mulimuli ʼi ʼaku fafine kaugana.+ 9 Ke ke haga tokaga pe ki te gaueʼaga ʼae ʼe natou tanaki ai te taʼukai pea ke mulimuli ia natou. Neʼe au fakatotonu ki te kau tagata tupulaga ke ʼaua naʼa natou fakakinakinaʼi koe. Pea ka ke fia inu, alu ki te ʼu ʼaiʼaga vai pea ke inu te moʼi vai ʼae neʼe ohu e te kau tagata tupulaga.”

10 Neʼe tuʼutuli ifo ai ia Lute mo tulolo ʼi ʼona muʼa, ʼo tali age ki ai: “He koʼe ʼe ke agalelei mai kia au, pea he koʼe neʼe ke tokagaʼi au, kae ko au ko he matapule?”+ 11 Neʼe tali age e Poase ki ai: “Neʼe fakamatala mai te ʼu meʼa fuli ʼae neʼe ke fai maʼa te faʼe ʼo tou ʼohoana ʼi te ʼosi mate ʼo tou ʼohoana, pea mo tau mavae ʼae mai tau tamai mo tau faʼe pea mo te fenua ʼo ʼou kaiga, ʼo ke alu ki he hahaʼi neʼe mole heʼeki ke iloʼi ʼi muʼa atu.+ 12 ʼOfa pe ke fakapale koe e Sehova ʼuhi ko te ʼu meʼa ʼae neʼe ke fai,+ pea ʼofa pe ke katoa te totogi* ʼae ʼe foaki atu e Sehova te ʼAtua ʼo Iselaele. Koteʼuhi neʼe ke haʼu ʼo kumi nonoʼaga ʼi ʼona lalo pakakau.”+ 13 Pea neʼe ina tali age: “ ʼE au fakafetaʼi atu, siʼoku ʼaliki, ki tau agalelei mai kia au, he neʼe ke fakafimalieʼi au pea neʼe ke fai he ʼu palalau fakalotomalohi ki* tau kaugana, logo la ʼe mole ko au ko hau kaugana.”

14 ʼI te temi kai, neʼe ui age e Poase ki ai: “Haʼu ki heni ʼo kai hau moʼi pane, pea mo ke peke tau moʼi pane ki te vinika.” Neʼe haʼu leva ʼo heka ia tafa ʼo te kau tanaki taʼukai. Neʼe ina foaki age ki ai he ʼu olose neʼe tunu, pea neʼe ina kai ʼo makona ai, pea neʼe ʼi ai mo tona toe. 15 ʼI te temi ʼae neʼe tuʼu ake ai ke alu ʼo tae olose,+ neʼe fakatotonu e Poase ki ʼana tagata tupulaga: “Kotou tuku ke ina tae te olose ʼae neʼe mole kotou tae, pea ʼaua naʼa kotou gaohi koviʼi ia ia.+ 16 ʼE tonu foki ke kotou toʼo he ʼu olose ʼi te ʼu olose ʼae kua haʼi fakafuhiga pea ke kotou tuku ke ina tae maʼa ia. ʼAua naʼa kotou taʼofi tana gaue.”

17 Pea neʼe hoko atu pe tana tae olose ʼi te gaueʼaga ʼo kaku ki te afiafi.+ ʼI te temi ʼae neʼe ina haha ai te olose ʼae neʼe ina tae, neʼe teitei pe ko he efa* olose ʼe tahi. 18 Neʼe ina toʼo leva ʼo alu mo ia ki te kolo, pea neʼe sio leva te faʼe ʼo tona ʼohoana ki te olose ʼae neʼe ina tae. Neʼe toe toʼo ake leva e Lute tana toega kai,+ ʼo foaki age ki ai.

19 Pea neʼe fehuʼi age e te faʼe ʼo tona ʼohoana: “Neʼe ke tae olose ʼifea ʼi te ʼaho nei? Neʼe ke gaue ʼifea? Ke maʼu tapuakina ia ia ʼae neʼe ina tokagaʼi koe.”+ Neʼe ina fakaha age leva ki te faʼe ʼo tona ʼohoana pe ko ai te tagata ʼae neʼe gaue ai, ʼo ina ui age: “Ko te higoa ʼo te tagata ʼae neʼe au gaue ai ʼi te ʼaho nei ko Poase.” 20 Pea neʼe ui e Naomi ki tana taʼahine: “Ke tapuakiʼi ia ia e Sehova, ʼae neʼe mole ina taʼofi tona ʼofa agatonu ki te kau maʼuʼuli pea mo te kau mate.”+ Neʼe hoko atu e Naomi: “Ko te tagata ʼaia ʼe ko he tahi ʼo totatou famili.+ Ko he tahi ʼi ʼotā kaiga ʼe feala ke ina totogi* taua mai ʼotā faigataʼaʼia.”+ 21 Pea neʼe ui e Lute, te fafine Moape: “Neʼe ina toe ui mai: ‘Ke ke mulimuli ’i taku kau gaue ʼo kaku ki te ʼosi ʼo tanatou tanaki te taʼukai.’ ”+ 22 Neʼe ui e Naomi kia Lute, tana taʼahine: “ ʼE lelei age, siʼaku taʼahine, ke ke mulimuli ki ʼana fafine kaugana naʼa fakakinakinaʼi koe ʼi he tahi age gaueʼaga.”

23 Koia, neʼe mulimuli pe ia ʼi te ʼu fafine kaugana ʼa Poase pea mo hoko atu tana tanaki te olose+ mo te fulumeto ʼo kaku ki te ʼosi ʼo te taʼukai. Pea neʼe maʼuli pe ia mo te faʼe ʼo tona ʼohoana.+

3 Neʼe ui leva e Naomi, te faʼe ʼo tona ʼohoana, ki ai: “Siʼaku taʼahine, ʼe mole tonu koa la ke au kumi hou ʼapi,*+ ke feala hau maʼuli fimalie ai? 2 ʼE mole koa la ko Poase totā kaiga?+ ʼE ko ia ʼae neʼe ke gaue ai mo ʼana fafine kaugana. ʼI te afiafi ʼaeni, ʼe gaue anai* ʼi te hahaʼaga olose. 3 Koia, ke ke maʼanu pea ke vali he moʼi lolo magoni. Ke ke teuteu* pea ke hifo ki te hahaʼaga olose. Tokaga naʼa iloʼi koe e te tagata ʼo kaku ki tana ʼosi kai pea mo inu. 4 Ka alu ʼo takoto, sioʼi te faʼahi ʼae ʼe takoto ai, pea ke alu ʼo toʼo te kie ʼi ʼona vaʼe ʼo takoto ai. ʼE hoki ina fakaha atu pe anai te ʼu meʼa ʼae ʼe tonu ke ke fai.”

5 Pea neʼe ina tali age leva: “ ʼE au fai anai ia meʼa fuli ʼae ʼe ke ui mai.” 6 Koia, neʼe alu ai ki te hahaʼaga olose pea neʼe ina fai ia meʼa fuli ʼae neʼe fakatotonu age e te faʼe ʼo tona ʼohoana. 7 Lolotoga te temi ʼaia, neʼe kai mo inu ia Poase pea neʼe fiafia tona loto. Neʼe alu leva ʼo takoto ovi ki he tuʼuga olose. Hili ʼaia, neʼe haʼu fakalogologo ia Lute ʼo toʼo te kie ʼi ʼona vaʼe pea mo takoto ai. 8 ʼI te maʼupo, neʼe ʼoho ia Poase ʼi tana moe pea neʼe tete. Neʼe mafuta ake ʼo sio ki te takoto ʼa te fafine ʼi ʼona vaʼe. 9 Neʼe ina ui: “Ko ai ia koe?” Neʼe ina tali age: “Ko au ia Lute, tau fafine kaugana. Ke ke ʼuʼufi tau fafine kaugana ʼaki tou kofu,* he ʼe ko koe ʼae ʼe feala ke ke totogi maua mai ʼoma faigataʼaʼia.”+ 10 Pea neʼe ina ui age ki ai: “Ke tapuakiʼi koe e Sehova, siʼoku ʼofafine. Neʼe ke fakaha tou ʼofa agatonu ʼi te lakaga ʼaeni ʼo laka age ʼi te ʼuluaki,+ he neʼe mole ke kumi he tagata tupulaga, ʼe masiva peʼe koloaʼia. 11 Koia, siʼoku ʼofafine, ʼaua naʼa ke mataku. ʼE au fai anai te ʼu meʼa fuli ʼae neʼe ke ui mai,+ he ʼe iloʼi e te hahaʼi fuli ʼo te kolo, ko koe ʼe ko te fafine agalelei ʼaupito. 12 ʼE moʼoni, logo la ʼe feala ke au totogi koulua,+ kae ʼe ʼi ai te tahi age tagata ʼe feala ke ina totogi koulua, he ʼe kaiga totonu age ia mo Elimeleke.+ 13 Nofo ʼi heni ʼi te po ʼaeni, pea kapau ʼi te uhu ʼe ina totogi anai koe, pea ʼe ko he meʼa lelei, ke ina totogi koe.+ Pea kapau ʼe mole ina fia totogi koe, ʼe au fakapapau atu ia muʼa ʼo Sehova, te ʼAtua maʼuli, ʼe au totogi anai koe. Takoto ʼi hena ʼo kaku ki te uhu.”

14 Pea neʼe takoto ʼi ʼona vaʼe ʼo kaku ki te uhu pea neʼe tuʼu ake leva kae kei poʼuli neʼe heʼeki feala ke iloʼi mai ia ia e he tahi. Pea neʼe ui e Poase: “Ke ʼaua naʼa iloʼi neʼe haʼu he fafine ki te hahaʼaga olose.” 15 Neʼe ina toe ui age: “ ʼAumai tou pulupulu, pea ke haga ʼo folahi.” Neʼe ina haga ʼo folahi, pea neʼe huaʼi ki ai e Poase te ʼu fua olose ʼe ono.* Neʼe ina foaki age leva ke ina ʼamo. Hili ʼaia, neʼe alu leva ia Poase ki te kolo.

16 Neʼe toe liliu ia Lute ki te faʼe ʼo tona ʼohoana. Neʼe fehuʼi age e Naomi: “Neʼe feafeaʼi,* siʼaku taʼahine?” Neʼe ina fakamatala age te ʼu meʼa fuli ʼae neʼe fai e te tagata maʼa ia. 17 Neʼe ina toe ui: “Neʼe ina foaki mai ia fua olose ʼe ono pea neʼe ina ui mai: ‘ ʼAua naʼa ke liliu ʼatea ki te faʼe ʼo tou ʼohoana.’ ” 18 Neʼe ui leva e Naomi: “Siʼaku taʼahine, nofo ʼo fakatalitali ʼo aʼu ki he temi ʼe ke iloʼi ai anai te meʼa ka hoko, koteʼuhi ʼe fai anai e te tagata ʼaia ia meʼa fuli moʼo fakatokatoka te faʼahi ʼaia ʼi te ʼaho nei.”

4 Neʼe alu leva ia Poase ki te matapa ʼo te kolo+ ʼo heka ai. Pea koʼeni, neʼe fakalaka te kaiga totonu ʼo Elimeleke, ʼae neʼe talanoa ki ai Poase.+ Neʼe ui leva e Poase ki ai:* “Haʼu muʼa ʼo heka ʼi he.” Pea neʼe haʼu ʼo heka. 2 Neʼe toʼo leva e Poase he toko hogofulu ʼo te kau takitaki ʼo te kolo+ pea neʼe ina ui age kia natou: “Kotou ʼomai ʼo heheka age ʼi he.” Neʼe natou heheka ai.

3 Pea neʼe ui e Poase ki te kaiga ʼo Elimeleke:+ “Ko Naomi, ʼae neʼe toe liliu mai te fenua ʼo Moape,+ ʼe tonu ke ina fakatau te moʼi kele ʼo Elimeleke, totā tehina.+ 4 Koia neʼe au manatu ai ke au fakaha atu te faʼahi ʼaia pea mo ui atu: ‘Ke ke totogi te moʼi kele ia muʼa ʼo te hahaʼi ʼo te kolo pea mo te kau takitaki ʼo totatou hahaʼi.+ Kapau ʼe ke fia totogi te moʼi kele, pea ke totogi. Kae kapau ʼe mole ke fia totogi, fakaha mai ke au iloʼi, he ʼe ko koe ʼae ʼe feala ke ke ʼuluaki totogi, pea ʼe ko au leva ʼae ʼe hoa atu kia koe.’ ” Neʼe ina tali age: “ ʼE au fia totogi te moʼi kele.”+ 5 Neʼe ui leva e Poase: “ ʼI te ʼaho ʼae ka ke totogi ai te moʼi kele mai ia Naomi, ʼe tonu foki ke ke toe totogi mai ia Lute, te fafine Moape, te ʼohoana ʼo te tagata ʼae kua mate. Koteʼuhi ke maʼu tuʼumaʼu pe te moʼi kele ʼaia e te hologa ʼo te tagata ʼae kua mate.”+ 6 Pea neʼe ui age e te kaiga ʼaia ʼo Elimeleke: “ ʼE mole feala ke au totogi te moʼi kele, naʼa lahi ai te puli ʼo toku tofiʼa. Ke ke fakahoko e koe toku maʼua, pea ke ke totogi maʼa koe te moʼi kele, he ʼe mole au lava totogi.”

7 Pea koʼeni te agaʼi fenua neʼe fai ʼi Iselaele ʼi te temi muʼa, moka fakamoʼoni e he tahi ʼe ina fakatau he meʼa peʼe ina foaki tona maʼua ke fakahoko e he tahi age tagata: Neʼe tonu ke huʼi e te tagata tona sulie+ ʼo ina foaki ki he tahi age tagata, pea neʼe ko te faʼahiga fai ʼaia moʼo fakamoʼoni he tonu neʼe fai ʼi Iselaele. 8 Koia, ʼi te ui e te kaiga ʼo Elimeleke kia Poase: “Ke ke totogi maʼa koe te moʼi kele,” neʼe ina huʼi tona sulie. 9 Neʼe ui leva e Poase ki te kau takitaki pea mo te hahaʼi fuli: “ ʼE kotou sisio mata+ ʼi te ʼaho nei ki taku totogi mai ia Naomi te ʼu koloa fuli ʼo Elimeleke pea mo te ʼu koloa fuli ʼo Kilisoni pea mo Malone. 10 ʼE au toe ʼohoana anai mo Lute, te fafine Moape, te ʼohoana ʼo Malone, ke maʼu tuʼumaʼu pe te moʼi kele e te hologa ʼo te tagata ʼae kua mate,+ ke ʼaua naʼa puli ai te higoa ʼo te tagata ʼae kua mate mai ʼona tehina pea mo te hahaʼi ʼo te kolo. ʼE kotou fakamoʼoni ki ai ʼi te ʼaho nei.”+

11 Neʼe tali age e te hahaʼi fuli ʼae neʼe ʼi te matapa ʼo te kolo, pea mo te kau takitaki: “ ʼE matou fakamoʼoni ki ai! ʼOfa pe ke tapuakiʼi e Sehova te fafine ʼaia ʼe hu ki tou loto fale pea ke hage ko Lasele pea mo Lea, ʼae neʼe nā laga te puleʼaga ʼo Iselaele.+ ʼOfa pe ke ke maʼuli lelei ʼi Efalata+ pea mo ke maʼu he higoa ʼe lelei* ʼi Petelehemi.+ 12 Pea ʼofa pe ke liliu tou loto fale ohage ko te loto fale ʼo Pelesi,+ te tama ʼa Tamale mo Suta, ʼaki te hakoga ʼae ka foaki atu e Sehova ʼaki te fafine ʼaia kei finemui.”+

13 Neʼe toʼo leva e Poase ia Lute pea neʼe ina ʼohoanaʼi. Neʼe nā momoe, pea neʼe fakafealagia e Sehova ke faitama pea ke ina fanauʼi he tamasiʼi tagata. 14 Neʼe ui e te hahaʼi fafine kia Naomi: “Ke vikiʼi ia Sehova, ʼae neʼe ina fakafealagia ke ʼi ai he tagata ʼe ina totogi koe ʼi te ʼaho nei. ʼOfa pe ke tala tona higoa ʼi Iselaele! 15 Kua ke toe maʼu he malohi* ʼuhi ko ia* pea ʼe tokoni atu anai ʼi tou temi matuʼa, he neʼe fanauʼi e te ʼohoana ʼo tau tama pea ʼe ʼofa mamahi te fafine ʼaia kia koe,+ ʼe lelei age ia ʼi hau maʼu ni ʼau tama ʼe fitu.” 16 Neʼe fua e Naomi te tamasiʼi pea neʼe tokaga ki ai.* 17 Pea neʼe foaki leva e te ʼu fafine ʼo tona vahaʼa fale ia he higoa ki te tamasiʼi. Neʼe natou ui: “Kua tupu he tamasiʼi tagata maʼa Naomi,” pea neʼe natou fakahigoaʼi ko Opete.+ ʼE ko te tamai ʼaia ʼa Sese,+ te tamai ʼa Tavite.

18 Koʼeni te hologa ʼo te famili ʼo* Pelesi: Ko Pelesi+ ko te tamai ʼa Eselone,+ 19 pea ko Eselone ko te tamai ʼa Lame, ko Lame ko te tamai ʼa Aminatape,+ 20 pea ko Aminatape+ ko te tamai ʼa Naasone, ko Naasone ko te tamai ʼa Salemone, 21 pea ko Salemone ko te tamai ʼa Poase, ko Poase ko te tamai ʼa Opete, 22 ko Opete ko te tamai ʼa Sese+ pea ko Sese ko te tamai ʼa Tavite.+