HIVA ʼA SALOMONE (KATIKO ʼO TE ʼU KATIKO)
1 Ko te hiva ʼaeni ʼa Salomone, ko he hiva mālie tokotahi:+
3 ʼE magoni fakaʼofaʼofa ʼou lolo.+
ʼE hage tou higoa ko he ʼaele ʼo he lolo magoni.+
Koia ʼae ʼe ʼofainaʼi ai koe e te kau finemui.
4 ʼAve au, ta feleleʼi,
He neʼe fakahu au e te hau ki ʼona koga fale.
Ta fiafia, ke ta fakafiafia fakatahi.
Ke ta vikiʼi ʼau fakapelepele ʼae ʼe lelei age ʼi te vino.
ʼE tonu tanatou ʼoʼofa* ʼae ia koe.
5 ʼU taʼahine ʼo Selusalemi, ʼe au kili ʼuli kae ʼe au matalelei,
Ohage ko te ʼu fale la ʼo Keta+ mo te ʼu fale la+ ʼo Salomone.
6 ʼAua naʼa kotou sioʼi au ʼi toku kili ʼuli,
He neʼe tokagaʼi au e te laʼa.
Neʼe iita kia au te ʼu tama ʼo taku faʼe,
Pea neʼe natou fekauʼi ke au alu ʼo leʼo te ʼu gaueʼaga vite,
Kae neʼe mole au leʼo taku gaueʼaga vite.
7 Ia koe ʼae ʼe au ʼofa ai,
Fakaha mai pe ʼe ke taki kifea ʼau faga manu,+
Peʼe ke fakamalolo ʼifea ʼi te hoʼata.
He koʼe ʼe tonu ke au hage ko te fafine ʼae ʼe pulouʼi tona fofoga,
ʼI te lotolotoiga ʼo te faga manu ʼo ʼou kaumeʼa?”
8 “Kapau ʼe mole ke iloʼi, ia koe ʼae ʼe finemui age ʼi te ʼu fafine,
Alu ʼi te ala ʼo te faga manu
Mo taki ʼau ʼuhiʼi tao ʼo ovi ki te ʼu fale la ʼo te kau tauhi ovi.”
9 “Ia koe ʼae ʼe au ʼofa ai, ʼe ke toe finelelei ohage ko he hosi fafine ʼe haʼi ki te saliote ʼa Falaone.+
10 ʼE matalelei ʼou kauʼahe ʼi te ʼu meʼa gigila,*
Mo tou kia ʼi te kahoa lopa.
11 ʼE matou fai anai hou ʼu meʼa gigila aulo
ʼE teuteuʼi ʼaki te siliva.”
12 “ ʼI te lolotoga heka ʼa te hau ʼi tona laupapa
ʼE ʼaele magoni+ toku moʼi lolo.
13 ʼE hage kia au toku ʼofaina ko te magoni ʼo te taga mila*+
ʼAe ʼe au hili ki ʼoku fatafata ʼi te poʼuli.
14 ʼE hage kia au toku ʼofaina ko he ʼakau magoni+
ʼI te lotolotoiga ʼo te ʼu gaueʼaga vite ʼo Ene-keti.”+
15 “ ʼE ke finelelei siʼoku ʼofaʼaga!
ʼE ke finelelei! ʼE hage ʼou mata ko te ʼu mata ʼo he lupe.”+
16 “Siʼoku ʼofaina, ʼe ke talavou mo tupulaga!+
Ko te moeʼaga ʼo taua ko te lauʼakau,
17 ʼE lalago totā ʼapi ʼaki te ʼakau ʼae ko te sete,
Pea ko tona ʼato ʼaki te ʼakau ʼae ko te senelie.
2 “Ohage ko he lilio ʼi te vao talatala,
ʼE feia toku ʼofaʼaga ʼi te kau finemui.”
3 “Ohage ko he fuʼu pome ʼi te vao matuʼa,
ʼE feia toku ʼofaina ʼi te kau talavou.
ʼE au manumanū ke au heka ʼi tona malu,
Pea ʼe malie tona fuaʼi ʼakau ki toku gutu.
4 Neʼe ina fakahu au ki te fale ʼo te ʼu kaitahi,
Pea ʼe hage tona ʼofa ko he fuka ʼi ʼoluga ia au.
5 Fakamalohiʼi au ʼaki ni keke fuaʼi vite,+
Fakafimalieʼi au ʼaki ni pome,
He ʼe au mahaki ʼi te laukau.
ʼAua naʼa kotou uga ke au manako kae ʼe heʼeki au logoʼi.+
8 ʼE au logo ki te leʼo ʼo toku ʼofaina!
Kotou sisio koʼeni ʼe haʼu,
ʼE haʼu ʼi te ʼu moʼuga mo hopohopo ʼi te ʼu kiʼi moʼuga.
9 ʼE hage toku ʼofaina ko he tia, ko he ʼuhiʼi tia.+
Kua tau mai, ʼe tuʼu ʼi tuʼa ʼo tomatou kaupa,
ʼE sio mai ʼi te ʼu matapa fakamalama,
ʼAe ʼe vagavaga.
10 ʼE ui mai e siʼoku ʼofaina:
‘Tuʼu ake siʼoku ʼofaʼaga,
Kae ta olo fakatahi, siʼoku mafu.
11 Koʼeni, kua ʼosi te temi nive.
ʼE mole kei to te ʼua, kua gata ia.
12 Kua fisi te ʼu matalaʼi ʼakau ʼo te fenua,+
Kua hoko mai te temi fakagata ʼo te ʼu fuʼu ʼakau,+
Pea kua logo te tagi ʼa te ʼu kulukulu ʼi totatou fenua.+
13 ʼI te fuʼu fiku, kua momoho tautonu ʼona fua.+
Kua fisi te ʼu fuʼu vite pea kua ʼaele magoni.
Tuʼu ake siʼoku ʼofaʼaga pea ke haʼu!
Ta olo fakatahi, siʼoku mafu.
14 Siʼaku lupe, ʼae ʼe nofo ʼi te ʼutu,+
ʼI te ʼu luo ʼo te mata mato,
ʼE au fia sio kia koe mo logo ki tou leʼo,+
He ʼe mālie pea ʼe ke hoihoifua lelei.’ ”+
15 “Kotou puke te ʼu lenato maʼa matou,
Te ʼu ʼuhiʼi lenato ʼae ʼe natou maumauʼi te ʼu gaueʼaga vite,
He ʼe kua fisi.”
16 “Ko toku ʼofaina ʼaʼaku ia, pea ko au ʼa ia.+
ʼE ina taki tana faga manu+ ʼi te ʼulu lilio.+
17 ʼI muʼa ʼo te hoko mai ʼo te ʼaele mokomoko pea mo te hola ʼo te malu,
Siʼoku ʼofaina, ke ke mavae fakavilivili,
Ohage ko te tia+ peʼe ko te ʼuhiʼi tia+ ʼi te ʼu moʼuga ʼae ʼe ta vaha ai.
3 “ ʼI toku palepale ʼi te ʼu poʼuli,
Neʼe au kumi ia ia ʼae ʼe au ʼofa ai.+
Neʼe au kumi ia ia, kae neʼe mole au maʼu pe la.+
2 ʼE au tuʼu ake anai ʼo alu ʼo foli te kolo.
ʼI te ʼu ala mo te ʼu malaʼe lalahi,
ʼE au kumi anai ia ia ʼae ʼe au ʼofa ai.
Neʼe au kumi ia ia, kae neʼe mole au maʼu pe la.
3 Neʼe maʼu mai au e te kau tagata ʼae ʼe natou leʼo te kolo.+
‘Neʼe kotou sisio la kia ia ʼae ʼe au ʼofa ai?’
4 ʼOsi pe tamatou fetaulaki,
Neʼe au maʼu leva ia ia ʼae ʼe au ʼofa ai.
Neʼe au tapiki kia ia pea neʼe mole au fia tuku age
ʼI muʼa ʼo taku fakahu ki te ʼapi ʼo taku faʼe,+
Ki te koga fale ʼo ia ʼae neʼe ina fuafatuʼi au.
5 ʼAki te ʼu tia fafine ʼo te vao,
ʼE au kole atu ke kotou fakapapau ʼu taʼahine ʼo Selusalemi:
ʼAua naʼa kotou uga ke au manako kae ʼe heʼeki au logoʼi.”+
6 “Kotea koa te meʼa ʼae ʼe hage ko te kohu ʼe hake mai te toafa,
ʼE ʼaele magoni ko te mila mo te iseso hina,*
Mo te ʼu pauta magoni fuli ʼa te tagata faikoloa?”+
7 “Ko te palepale ʼo Salomone!
ʼE ʼa takai ia ia e ni tagata malolohi ʼe 60,
Neʼe filifili mai te ʼu tagata malolohi ʼo Iselaele.+
8 Ko natou fuli ʼae ʼe toʼo heleta,
Mo natou faiva fuli ʼi te tau.
ʼE natou takitahi te heleta ʼi tona koga loto
Moʼo tauʼi te ʼu tuʼutamaki ʼae ʼe hoko ʼi te poʼuli.”
9 “Ko te palepale fata ʼo te Hau ko Salomone,
Neʼe ina faʼu ʼaki te ʼu ʼakau ʼo Lipane.+
10 Ko ʼona pou neʼe ina faʼu ʼaki te siliva,
Pea ʼe aulo ʼona tekeni.
Ko tona hekaʼaga neʼe faʼu ʼaki te fuluʼi ovi huʼa lotuma fakapoʼuli.
Pea ko loto, neʼe teuteuʼi ʼaki te ʼofa
E te ʼu taʼahine ʼo Selusalemi.”
11 “ ʼU taʼahine ʼo Sione,
Kotou ʼomai ʼo sisio ki te Hau ko Salomone!
ʼE ina ʼai tona pale ʼohoana* ʼae neʼe fai e tana faʼe+
ʼI te ʼaho ʼo tona ʼohoana,
Te ʼaho ʼae neʼe fiafia ai tona loto.”
4 “ ʼE ke finelelei siʼoku ʼofaʼaga!
ʼE ke finelelei!
ʼE hage ʼou mata ʼae ʼe pulouʼi ko te ʼu mata ʼo he lupe.
ʼE hage tou lauʼulu ko he faga tao
ʼE hihifo mai te ʼu moʼuga ʼo Kileate.+
2 ʼE hage ʼou nifo ko he faga ovi neʼe hoki tele
ʼE hahake mai mai te foʼi vai ʼi tanatou ʼosi maʼaʼanu.
ʼE natou fua fuli he ʼu ʼuhi ʼe lua,
Pea neʼe mole mate he ʼuhi.
3 ʼE hage ʼou laugutu ko he filo kula,
Pea ʼe mālie ʼau palalau.
Pea ʼe hage ʼou kauʼahe ʼae ʼe pulouʼi
Ko he kogaʼi kelenate.
4 ʼE hage tou kia+ ko te tule ʼa Tavite,+
ʼAe neʼe laga ʼaki ni maka,
ʼAe ʼe tautau ai te ʼu meʼa tali tau ʼe afe,
Te ʼu meʼa tali tau takafuafua fuli ʼa te ʼu tagata malolohi.+
5 ʼE hage ʼou fatafata ko he ʼu ʼuhiʼi tia ʼe lua,
ʼEi, he ʼu ʼuhi ʼe lua ʼo te tia fafine+ ʼo te vao
ʼE kakai ʼi te ʼulu lilio.”
6 “ ʼI muʼa ʼo te hoko mai ʼo te ʼaele mokomoko, pea mo te hola ʼo te malu,
ʼE au alu anai ki te moʼuga ʼo te mila
Pea mo te kiʼi moʼuga ʼo te iseso hina.”+
8 Ta mavae fakatahi mai Lipane, siʼoku ʼofaʼaga,
Ta mavae fakatahi mai Lipane.+
Hifo mai te ʼu tumutumu ʼo Amana,
ʼO Senili, ʼo Helemoni,+
Mai te ʼu nofoʼaga ʼo te ʼu laione mo te ʼu moʼuga ʼo te ʼu leopa.
9 Siʼoku ʼofaʼaga, siʼoku foʼi hui, kua ke maʼu toku mafu.+
Neʼe ke maʼu toku mafu ʼi he kiʼi sio pe ʼe tahi,
ʼI te sio pe ki he foʼi lopa ʼe tahi ʼo tou kahoa.
10 ʼE lelei tukupau ʼau fakapelepele,+ siʼoku foʼi hui, siʼoku ʼofaʼaga!
ʼE lelei age ʼau fakapelepele ʼi te vino,+
Te ʼaele magoni ʼo tou lolo ʼi te ʼu meʼa fakamagoni fuli!+
11 Siʼoku ʼofaʼaga ʼe huʼa malie te meli ʼae ʼe haʼu mai ʼou laugutu.+
Te meli mo te huʼa pipi ʼae ʼi tou gutu,+
Pea ʼe magoni ʼou mutuʼi meʼa ohage ko te Lipane.
12 ʼE hage toku foʼi hui, siʼoku ʼofaʼaga, ko he ʼoloto ʼe lokaʼi,
ʼEi, ko he ʼoloto ʼe lokaʼi, ko he matapuna vai ʼe tapuʼi.
13 ʼE ke hage* ko he palatiso* ʼe hohomo ai ni fuʼu kelenate,
Ko he ʼu fuaʼi ʼakau ʼe kano lelei, mo ni ʼakau magoni kehekehe,
14 Mo te safalani, mo te kaho fakamagoni,+ mo te kasia,+
Mo te ʼu fuʼu ʼakau kehekehe fuli ʼo te iseso hina, mo te mila, mo te aloese+
Pea mo te ʼu ʼakau fuli ʼae ʼe magoni ʼosi.+
15 Ko koe ko he matapuna vai ʼi te ʼoloto, ko he vai keli ʼe malie tona vai,
Ko he vai ʼe tafe mai Lipane.+
16 Matagi ʼo te potu noleto, ʼala ake!
Haʼu, matagi ʼo te potu saute!
Agiagi mai ki toku ʼoloto.
Ke mafola tona ʼaele magoni.”
“Ke ulu toku ʼofaʼaga ki tona ʼoloto
ʼO kai te ʼu fuaʼi ʼakau ʼae ʼe kano lelei ʼosi.”
5 “Siʼoku foʼi hui, siʼoku ʼofaʼaga,
Neʼe au ulu ki toku ʼoloto!+
Neʼe au toli taku mila mo ʼaku ʼakau fakamagoni.+
Neʼe au kai taku huʼa meli,
Neʼe au inu taku vino mo taku huʼa pipi.”+
“Kolua kakai, ʼomatou kaumeʼa!
Kolua iinu mo konahihia ʼi ʼakolua fakapelepele!”+
2 “ ʼE au tulemoe, kae ʼala pe toku loto.+
ʼE au logo ki toku ʼofaina ʼe ina tata te matapa!
‘Avahi mai, siʼoku foʼi hui, siʼoku ʼofaʼaga,
Ia koe ʼae ko taku lupe, toku kaumeʼa heʼe mele!
Kua palapala toku ʼulu ʼi te hahau,
Toku lauʼulu ʼi te mosiʼi hahau ʼo te poʼuli.’+
3 Neʼe kua au huʼi toku kofu.
ʼE tonu koa ke au toe tui?
Neʼe kua au fufulu ʼoku vaʼe.
ʼE tonu koa ke au toe ʼulihi?
4 Neʼe toʼo e toku ʼofaina tona nima mai te pu ʼo te matapa,
Pea neʼe tete ai toku mafu.
5 Neʼe au tuʼu ake ʼo avahi ki toku ʼofaina.
Neʼe hali te mila ʼi ʼoku nima,
Mai ʼoku tuhi te lolo mila
Ki te loka ʼo te matapa.
6 Neʼe au avahi ki toku ʼofaina,
Kae neʼe kua alu siʼoku ia ʼofaina, kua puli ia.
Neʼe mamahi toku loto ʼi tana alu.*
Neʼe au kumi ia ia, kae neʼe mole au maʼu pe la.+
Neʼe au pauʼi ia ia, kae neʼe mole ina tali mai pe la.
7 Neʼe maʼu mai au e te kau tagata ʼae ʼe natou leʼo te kolo.
Neʼe natou ta au ʼo au lavea ai.
Neʼe toʼo e te kau leʼo ʼo te ʼu kaupa toku pulupulu.*
8 ʼE au kole atu ke kotou fakapapau ʼu taʼahine ʼo Selusalemi:
Kapau ʼe kotou felaveʼi mo siʼoku ʼofaina,
Kotou fakaha age ki ai ʼe au mahaki ʼi te laukau.”
9 “Kotea ʼae ʼe makehe ai siʼou ʼofaina,
Ia koe ʼae ʼe finelelei ʼi te ʼu fafine fuli?
Kotea ʼae ʼe makehe ai siʼou ʼofaina,
Ke ke kole mai ke matou fai he fakapapau feia?”
10 “Ko siʼoku ʼofaina ʼe talavou, ʼe malohi,
ʼE iloga kehe ia ʼi he toko hogofulu afe.
11 Ko tona ʼulu ko te aulo, te aulo maʼa.
ʼE hage tona lauʼulu ko he ʼu lau palema ʼe viligia.*
ʼE lauʼulu ʼuʼuli ʼosi ohage ko te kolopo.
12 ʼE hage ʼona mata ko ni lupe ʼe ovi ki te tafega vai,
ʼAe ʼe maʼaʼanu ʼi te huʼa pipi,
ʼE ovi ki he foʼi tane vai fonu.*
13 ʼE hage ʼona kauʼahe ko he ʼoloto ʼakau fakamagoni,+
Peʼe ko ni mahifo ʼe fola ai ni lauʼakau magoni.
Ko ʼona laugutu ko ni lilio ʼe hali mai ai te lolo mila.+
14 Ko ʼona tuhi ko he aulo ʼe teuteuʼi ʼaki te kisolite.*
Ko tona fatu ko te lauʼi ivuale* ʼe teuteuʼi ʼaki te maka ʼae ko te safile.
15 Ko ʼona vaʼe ko ni pou maka maʼugataʼa ʼe hili ʼi ni tuʼuʼaga aulo.
ʼE hage siʼoku ʼofaina ko te Lipane, ʼe taulekaleka ohage ko te ʼu fuʼu sete.+
16 ʼE huʼa malie ʼona laugutu ohage ko te meli,
Pea ʼe taulekaleka ia meʼa fuli ia ia.+
Ko te ʼuhiga ʼaia ʼo siʼoku ʼofaina, ʼei, siʼoku ʼofaʼaga, ʼu taʼahine ʼo Selusalemi!”
6 “Kua alu kifea siʼou ʼofaina,
Ia koe ʼae ʼe finelelei ʼi te ʼu fafine fuli?
Neʼe alu ki te faʼahi fea siʼou ʼofaina?
ʼE matou kumi anai ia ia mo koe!”
2 “Neʼe hifo siʼoku ʼofaina ki tona ʼoloto,
Tona ʼoloto ʼakau fakamagoni,
ʼO taki tana faga manu ki te ʼu ʼoloto
Pea mo fusi te lilio.+
3 Ko au ʼo siʼoku ʼofaina,
Pea ko siʼoku ʼofaina ʼe ʼaʼaku.+
ʼE ina taki tana faga manu ʼi te ʼulu lilio.”+
4 “Ia koe ʼae ʼe au ʼofa ai,+ ʼe ke matalelei ohage ko Tilitesa,*+
ʼEi, ʼe ke matalelei ohage ko Selusalemi,+
Pea ʼe ke fakaofoofo ohage ko he kau solia mo ʼanatou fuka.+
ʼE hage tou lauʼulu ko he faga tao
ʼE hihifo mai mai te ʼu moʼuga ʼo Kileate.+
6 ʼE hage ʼou nifo ko he faga ovi
ʼE hahake mai mai te foʼi vai ʼi tanatou ʼosi maʼaʼanu.
ʼE natou fua fuli he ʼu ʼuhi ʼe lua,
Pea neʼe mole mate he ʼuhi.
7 ʼE hage ʼou kauʼahe ʼae ʼe pulouʼi
Ko he kogaʼi kelenate.
9 Kae ko te tokotahi pe ko taku lupe,+ toku kaumeʼa heʼe mele.
ʼE makehe ia kia mata ʼo tana faʼe.
ʼE ko he pele ia ʼa ia ʼae neʼe ina fanauʼi.
ʼE sisio ki ai te kau finemui pea ʼe natou ui ʼe manuʼia.
ʼE sisio ki ai te kau fineʼaliki mo te ʼu fafine pea ʼe natou vikiʼi ia ia.
10 ‘Ko ai te fafine ʼae ʼe gigila ohage ko te mafoata,
Pea ʼe matalelei ohage ko te katoa ʼo te mahina,
Pea ʼe maʼa ohage ko te mu ʼo te laʼa,
Pea ʼe fakaofoofo ohage ko he kau solia mo ʼanatou fuka?’ ”+
11 “Neʼe au hifo ki te ʼoloto ʼo te ʼu fuʼu pinati+
ʼO fakasiosio te ʼu huli ʼae ʼi te vaʼe vai tafe,
ʼO fakasiosio pe ʼe kua moto te ʼu fuʼu vite,
Pe ʼe kua fisi te ʼu fuʼu kelenate.
12 Kae neʼe mole fualoa ki ai,
Neʼe au hifo au
ʼO kaku ki te ʼu saliote ʼo taku hahaʼi ʼaliki.”
13 “Toe liliu mai, toe liliu mai siʼi Sulamite!
Toe liliu mai, toe liliu mai,
Ke feala ke matou sioʼi ia koe!”
“He koʼe ʼe kotou sioʼi te Sulamite?”+
“ ʼE hage ia ia ko te meʼe ʼa he ʼu kutuga ʼe lua.”*
7 “ ʼI matalelei leva ʼo ʼou vaʼe ʼi ʼou sulie,
Siʼaku finemui, ʼe ke tuha mo te fakaʼapaʼapa!
ʼE hoihoifua ʼou kauaga ohage ko ni meʼa gigila,
Ko te gaue ia ʼa he tagata tufuga faiva.
2 ʼE hage tou pito ko he ipu takafuafua.
Ke mole ʼago ai te vino ʼi he temi!
ʼE hage tou fatu ko he tuʼuga fulumeto
ʼAe ʼe ʼa takai e te ʼu lilio.
3 ʼE hage ʼou fatafata ko he ʼu ʼuhiʼi tia ʼe lua,
ʼEi, he ʼu ʼuhi ʼe lua ʼo te tia fafine+ ʼo te vao.
4 ʼE hage tou kia+ ko he tule ivuale.+
ʼE hage tou ihu ko te tule ʼo Lipane,
ʼAe ʼe haga ki Tamaso.
5 ʼE taulekaleka tou ʼulu ohage ko te Kalemelo,+
Pea ʼe hage tou lauʼulu+ ko te fuluʼi ovi huʼa lotuma fakapoʼuli.+
ʼE ofo te hau ʼi tou lauʼulu miomio.
6 Siʼi koe ʼae ʼe au ʼofa ai, ʼe ke finelelei mo finemui,
ʼO laka age ia meʼa lelei fuli ʼae!
7 ʼE ke lahi ohage ko he fuʼu palema,
Pea ʼe hage ʼou fatafata ko he ʼu fuhiga fuaʼi palema.+
8 Neʼe au ui: ‘ ʼE au kake anai ʼi te fuʼu palema
ʼO toli ʼona fua.’
Ke hage ʼou fatafata ko ni fuhiga vite,
Ke ʼaele magoni tau manava ohage ko ni pome,
9 Pea ke hage tou gutu ko te vino ʼae ʼe lelei tukupau!”
“Ke hifo lelei ʼi te kia ʼo siʼoku ʼofaina,
Ohage ko te vino ʼae ʼe hali mamalie ʼi te ʼu laugutu ʼo natou ʼae ʼe tulemomoe!
10 Ko au ʼo siʼoku ʼofaina,+
Pea ko au pe ʼae ʼe holi ki ai.
12 ʼE ta tutuʼu ake anai ʼi te mafoata ʼo olo ki te ʼu gaueʼaga vite
ʼO fakasiosio pe ʼe kua moto te ʼu fuʼu vite,
Pe ʼe kua mātala,+
Pe ʼe kua fisi te ʼu fuʼu kelenate.+
ʼE au fakaha atu anai ʼi ai toku ʼofa.+
13 Kua ʼaele magoni te ʼu fuaʼi ʼakau ʼae ko te matakole.*+
ʼE maʼu ʼi ʼotā matapa ni fuaʼi ʼakau kehekehe ʼe kano lelei.+
Siʼoku ʼofaina, neʼe au taupau maʼa koe,
Te ʼu fuaʼi ʼakau ʼae neʼe hoki toli age pe mo ni fuaʼi ʼakau kua ʼafeā.
8 “Ka na pau la neʼe ke hage ko toku tokolua,
ʼAe neʼe fafaga e taku faʼe,
ʼE feala ai anai ke au ʼumaʼi koe moka ʼe ta felaveʼi ʼi tuʼa+
ʼO mole meʼa noaʼi ai au e he tahi.
ʼE au foaki atu anai ke ke inu he vino magoni,
Mo he huʼa fuaʼi kelenate neʼe hoki fai.
3 ʼE ʼuluga anai toku ʼulu ki tona nima hema,
Pea ʼe ina ʼaofi anai au ʼaki tona nima mataʼu.+
4 ʼE au kole atu ke kotou fakapapau ʼu taʼahine ʼo Selusalemi:
ʼAua naʼa kotou uga ke au manako kae ʼe heʼeki au logoʼi.”+
5 “Ko ai te fafine ʼae ʼe hake mai te toafa,
ʼAe ʼe tapiki ki tona ʼofaina?”
“Neʼe au fafagu ia koe ʼi te lalo fuʼu pome.
Neʼe fanauʼi ai koe e tau faʼe.
Pea neʼe ke sio ai ki te malama ʼo te ʼaho.
6 Tohi au ohage ko he fakailoga ʼi tou mafu,
Ohage ko he fakailoga ʼi tou nima,
Koteʼuhi ʼe malohi te ʼofa ohage ko te mate,+
Pea ʼe malohi te agatonu ohage ko te Faitoka.*
ʼE ulo ohage ko he afi kakaha, ko he afi mai ia Sehova.*+
7 ʼE mole feala ki te ʼu vai ʼae ʼe hou ke natou taʼofi te ʼofa,+
Pea ʼe mole feala ke ʼave e te ʼu vai tafe.+
Kapau ʼe foaki e he tagata te ʼu koloa fuli ʼo tona ʼapi moʼo totogi ʼo te ʼofa,
ʼE meʼa noaʼi ʼosi anai te ʼu koloa ʼaia.”*
8 “ ʼE ʼi ai tomatou kiʼi tokolua,+
Heʼeki ʼi ai hona ʼu fatafata.
Kotea anai ka matou fai ʼo ʼuhiga mo ia,
ʼI te ʼaho ʼae ʼe koleʼi ai e he tahi ke nā ʼohoana?”
9 “Kapau ko he kaupa,
ʼE matou faʼu anai ki ai ni ʼa siliva.
Kae kapau ko he matapa,
ʼE matou pupunu anai ʼaki he lauʼi papa sete.”
10 “Ko au ko he kaupa,
Pea ʼe hage ʼoku fatafata ko he ʼu tule.
Koia ʼe feala ai ke sio
ʼE tokalelei toku ʼatamai.
11 Neʼe ʼi ai te gaueʼaga vite ʼa Salomone+ ʼi Paale-hamone.
Neʼe ina tuku age tana gaueʼaga vite ki ni tagata gaue kele.
Neʼe natou tahi totogi piesi siliva ʼe afe ki te ʼu fuaʼi ʼakau ʼae neʼe toli.
12 ʼE ʼi ai taku gaueʼaga vite pea ʼe au faʼifaʼitaliha ki ai.
ʼE ʼa koe, Salomone, te ʼu piesi siliva ʼae ʼe afe,
Pea ko foʼi piesi ʼe luageau maʼa natou ʼae ʼe tokakaga ki te ʼu fuaʼi vite.”
13 “Ia koe ʼae ʼe nofo ʼi te ʼu ʼoloto,+
ʼE fia logo te ʼu kaumeʼa ki tou leʼo.
ʼE au fia logo mo au ki tou leʼo.”+
14 “Fakavilivili, siʼoku ʼofaina,
Ke ke lele vave ohage ko he tia,+
Ohage ko he ʼuhiʼi tia
ʼI te ʼu moʼuga ʼae ʼe maʼuʼuli ai te ʼu ʼakau fakamagoni.”
ʼE fakaʼuhiga ki te kau finemui.
Peʼe lagi “ ʼi te fi ʼo tou lauʼulu.”
Vakaʼi Te ʼu Kupu.
Vakaʼi Te ʼu Kupu.
ʼE feala ke fakaʼuhiga ki he pale matalaʼi teu peʼe ko he pale lau.
Peʼe lagi “ ʼE hage tou kili.”
Peʼe “ ʼoloto.”
Peʼe lagi “Neʼe meʼa pe ke au matapopo ʼi tana palalau.”
Peʼe “pulou.”
Peʼe lagi “ko he ʼu fuhiga fuaʼi palema.”
Peʼe lagi “ki te tafaʼaki ʼo he matapuna vai.”
Ko he maka legalega peʼe lagi fuluʼi hega.
ʼE ko he meʼa maʼuhiga ʼe lanu hina pea ʼe haʼu mai te ʼu nifoʼi alefani pea mo ʼihi manu.
Peʼe “Kolo Matalelei.”
Peʼe “ ʼa Mahanaimi.”
Neʼe kai e te hahaʼi fafine te fuaʼi ʼakau ʼaia he neʼe natou manatu neʼe feala ke tokoni age ke natou fanaunau.
Vakaʼi Te ʼu Kupu.
ʼI te Fakahepeleo, ʼe tuʼu ʼi heni te fakanounou ʼo te huafa ʼo Sehova.
Peʼe lagi “ia ia.”