TAGILAULAU
א [Alefa]*
1 Oie! Kua lavaki ʼosi te kolo ʼae neʼe kaugamalie ʼi te temi muʼa!+
ʼEi, kua liliu ohage ko he vitua, ia ia ʼae neʼe kaugamalie age ʼi te ʼu puleʼaga!+
Kua fakakauganaʼi leva ia ia ʼae neʼe ko he fineʼaliki ʼi te ʼu potu fenua!+
ב [Peta]
2 ʼE tagi mamahi ʼi te poʼuli+ mo maligi ʼona loʼimata.
ʼE mole pe la he tahi ʼi ʼana tagata laukau moʼona fakapelepeleʼi.+
Neʼe kakaʼi ia ia e ʼona kaumeʼa fuli.+ Kua natou liliu ko ʼona fili.
ג [Kimela]
3 Kua ʼave popula ia Suta,+ kua fakaʼofaʼofa he ʼe kua maʼuli popula.+
ʼE maʼua ia ke maʼuli mo te ʼu puleʼaga.+ ʼE mole ina maʼu hona fimalie.
Kua maʼu ia ia e natou fuli ʼae neʼe natou fakatagaʼi kae lolotoga tau mo te malaʼia.
ד [Taleta]
4 Kua putu te ʼu ala ʼae ki Sione he ʼe mole kei haʼu he tahi ki te ʼu ʼaho lalahi.+
Kua maumau ʼona matapa fuli.+ ʼE lauga ʼona pelepitelo.
ʼE lotomamahi ʼosi ʼona taʼahine taupoʼou mo lotohoha ʼaupito.
ה [He]
5 Kua liliu te kau fakafeagai ko tona pule pea ʼe maʼuli fimalie ʼona fili.+
Neʼe fakalotomamahiʼi ia ia e Sehova ʼi te lahi ʼo ʼana talagataʼa.+
Kua ʼave popula ʼana fanau e ʼona fili.+
ו [Vave]
6 Kua puli katoa te taulekaleka ʼo te taʼahine ʼo Sione.+
ʼE hage ʼona tama ʼaliki ko ni tia neʼe mole natou maʼu he koga meʼa lunaʼia,
Pea ʼe natou haʼele gaʼegagaʼe ʼi muʼa ʼo ia ʼae ʼe ina tuli natou.
ז [Saini]
7 Kua fakaʼofaʼofa ia Selusalemi pea ʼe mole kei ʼi ai hona nofoʼaga, pea ʼe ina manatuʼi ai leva
Te ʼu meʼa maʼuhiga fuli ʼae neʼe ina maʼu ʼi te temi muʼa.+
ʼI te temi ʼae neʼe to ai tana hahaʼi kia nima ʼo te fili pea neʼe mole he tahi neʼe tokoni age ki ai,+
ח [Heti]
8 Neʼe fai e Selusalemi ni agahala mamafa.+
Koia kua liliu ai ko he meʼa ʼe fakalialia.
Kua fehiʼaʼinaʼi e natou fuli ʼae neʼe fakaʼapaʼapa ki ai he kua natou sisio ki tona telefua.+
ʼE lauga+ pea ʼe lituʼa he ʼe ufiufi.
ט [Teta]
9 Kua pulepule tona kofu ʼi tana heʼe maʼa.
Neʼe mole ina fakakaukauʼi tona ka haʼu.+
Neʼe fakapunamaʼuli tana to. ʼE mole ʼi ai he tahi moʼona fakapelepeleʼi.
Sehova e, sio ki toku mamahi he ʼe fiameʼameʼa ia te fili ʼi tana malo.+
י [Iota]
10 Neʼe faʼao e te fili te ʼu koloa fuli ʼae neʼe ina maʼu.+
Neʼe sio ki ni puleʼaga ʼe hu ki tona sagatualio,+
Te ʼu puleʼaga ʼae neʼe ke ui ʼe mole tonu ke natou fakatahi mo tau hahaʼi.
כ [Kafa]
11 ʼE lauga tana hahaʼi katoa. ʼE natou kumi moʼi pane.+
Neʼe tonu ke natou foaki ʼanatou meʼa maʼuhiga moʼo fetogi ʼaki he meʼa kai ke natou maʼuʼuli ai.
Sehova e, sio, kua au liliu ko he fafine* ʼe mole maʼuhiga.
ל [Lameta]
12 Ia koutou fuli ʼae ʼe fakalaka ʼi te ala, ʼe mole kotou ʼoʼofa koa koutou?
Kotou sisio mo fakatokagaʼi!
ʼE ʼi ai koa he mamahi ʼe tatau mo ʼae ʼe au tau mo ia,
Te mamahi ʼae neʼe fakatupu e Sehova ʼi te temi ʼo tona hauhau?+
מ [Mema]
13 Neʼe ina fakato ifo mai ʼoluga he afi ki ʼoku hui.+ ʼE ina puleʼi ʼoku hui takitahi.
Neʼe ina fakatuʼu he hele ki ʼoku vaʼe. Neʼe ina fakamalohiʼi au ke au toe liliu ki muli.
Neʼe ina fakaliliu au ko he fafine kua liʼakina.
ʼE au mahaki ʼi te ʼaho katoa.
נ [Nuna]
14 Neʼe ina tanaki ʼaku talagataʼa ki tona nima moʼo fai ʼaki he ʼakau ʼamo ʼo ina haʼi ki toku kia.
Neʼe hili ki toku kia pea ʼe mole kei maʼu hoku malohi.
Neʼe tuku au e Sehova kia nima ʼo ni tagata ʼe mole au lava tauʼi.+
ס [Sameke]
15 Neʼe toʼo kehe e Sehova te ʼu tagata tau malolohi fuli ʼae neʼe au maʼu.+
Neʼe ina fakatahiʼi te kau solia moʼo matehi ʼaku tama tupulaga.+
ʼI te lomiʼaga vite, neʼe malamalaki e Sehova ia te taʼahine taupoʼou ʼo Suta.+
ע [Aini]
16 Ko te tupuʼaga la ʼaia ʼo taku tagi+ mo maligi ai ʼoku loʼimata.
Kua mamaʼo ia natou fuli ʼae neʼe feala ke natou fakapelepeleʼi mo fakalotomalohiʼi au.
ʼE mole kei ʼi ai he ʼamanaki ʼo ʼaku tama he ʼe kua malo te fili.
פ [Pe]
17 Neʼe faoʼi e Sione ʼona nima+ kae ʼe mole he tahi moʼona fakapelepeleʼi.
Kua ʼa takai ia Sakopo e ʼona fili fuli. Neʼe fakatotonu e Sehova ke natou tauʼi ia ia.+
Kua liliu ia Selusalemi kia natou ko he meʼa fakalialia.+
צ [Sati]
18 ʼE faitotonu ia Sehova+ he neʼe au talagataʼa ki ʼana fakatotonu.+
ʼU puleʼaga fuli, kotou fakalogo, pea kotou sisio ki toku mamahi!
Kua ʼave popula ʼaku taʼahine taupoʼou pea mo ʼaku tama tupulaga.+
ק [Kofi]
19 Neʼe au pauʼi ʼaku tagata laukau kae neʼe natou kakaʼi au.+
ʼI te kolo, kua mamate ʼaku pelepitelo mo ʼaku takitaki
ʼI tanatou kumi meʼa kai ke natou maʼuʼuli ai.+
ר [Lesa]
20 Sehova e, sio! ʼE au lotomamahi ʼaupito.
ʼE mamahi toku fatu.
ʼE au lotohoha he neʼe au agatuʼu.+
ʼI tuʼa ʼe mamate ʼihi ʼi te heleta,+ pea ʼe toe maʼu pe ʼi te loto fale te mate.
ש [Sini]
21 Neʼe logoʼi ʼaku lauga. ʼE mole he tahi moʼoku fakapelepeleʼi.
Neʼe iloʼi e ʼoku fili fuli toku malaʼia.
ʼE natou fiafia he neʼe tupu ko koe.+
Kae ʼe ke fakahoko anai te ʼaho ʼae neʼe ke tala,+ te ʼaho ʼae ʼe natou liliu ai anai ohage pe ko au.+
ת [Tau]
22 Ke fakaha ʼi ʼou muʼa ʼanatou agakovi fuli. Ke ke agafefeka kia natou+
Ohage pe ko tau agafefeka mai kia au ʼuhi ko ʼaku talagataʼa fuli.
Kua lahi ʼaku lauga pea ʼe mahaki toku loto.
א [Alefa]
2 Oie! Neʼe ʼuʼufi e Sehova te taʼahine ʼo Sione ʼaki he ʼao ʼuhi ko tona hauhau.
Neʼe ina li ifo mai te lagi ki te kele ia te taulekaleka ʼo Iselaele.+
Neʼe mole ina manatuʼi tona hiliʼaga vaʼe+ ʼi te temi ʼo tona hauhau.
ב [Peta]
2 Neʼe mole ʼofa ia Sehova ki te ʼu nofoʼaga fuli ʼo Sakopo, ʼo ina maumauʼi ai.
Neʼe ina holoʼi te ʼu tule malohi ʼo te taʼahine ʼo Suta ʼi tona hauhau.+
Neʼe ina lipaki ki te kele mo ina fakalainoaʼi ʼona tama ʼaliki+ pea mo te puleʼaga.+
ג [Kimela]
3 ʼI tona hauhau, neʼe ina toʼo te malohi ʼo Iselaele.
Neʼe ina toʼo kehe tona nima mataʼu ʼi te fakaovi mai ʼo te fili.+
Pea neʼe hoko atu tona hauhau kia Sakopo ohage he afi ʼe ina tutu ia meʼa fuli ʼae ʼi ʼona tafaʼaki.+
ד [Taleta]
4 Neʼe ina faoʼi tana nahau ohage pe ko he fili pea kua tokalelei tona nima mataʼu ohage pe ko he tahi ʼe fakafeagai.+
Neʼe ina haga matematehi ia natou fuli ʼae ʼe matalelei ki te sio.+
Pea neʼe ina fakato tona hauhau ohage ko he afi+ ki te fale la ʼo te taʼahine ʼo Sione.+
ה [He]
5 Kua liliu ia Sehova ohage ko he fili.+
Neʼe ina maumauʼi ia Iselaele.
Neʼe ina maumauʼi ʼona tule fuli. Neʼe ina holoʼi ʼona kaupa fuli.
Pea ʼe ina fakalahi te mamahi mo te tagi ʼa te taʼahine ʼo Suta.
ו [Vave]
6 ʼE ina maumauʼi tona pola+ ohage ko he pola ʼi he ʼoloto.
Neʼe ina fakagata tona ʼaho lahi.+
Neʼe fakagaloʼi e Sehova te ʼu ʼaho lalahi pea mo te ʼu sapato ʼi Sione.
Pea ʼi tona hauhau neʼe ina liʼaki te ʼu hau pea mo te ʼu pelepitelo.+
ז [Saini]
7 Neʼe liʼaki e Sehova tona ʼaletale.
Neʼe fehiʼa ki tona sagatualio.+
Neʼe ina tuku kia nima ʼo te fili ia te ʼu kaupa ʼo te ʼu tule malolohi ʼo Sione.+
Neʼe logoʼi ni kalaga leʼo lahi ʼi te fale ʼo Sehova+ ohage ko he ʼaho lahi.
ח [Heti]
8 Kua fakatotonu e Sehova ke ina holoʼi te kaupa ʼo te taʼahine ʼo Sione.+
Neʼe ina faoʼi te maea ʼae moʼo fakafuafua.+
Neʼe mole ina taʼofi tona nima kae neʼe ina fakahoko te maumau.
Kua tuʼu lavaki te ʼu kaupa
Pea kua maumau.
ט [Teta]
9 Kua tanumia ʼona matapa ʼi te kele.+
Kua ina maumauʼi mo fasifasiʼi ʼona ʼakau fakalava.
Kua mavetevete ʼi te ʼu puleʼaga tona hau mo ʼona tama ʼaliki.+
ʼE mole kei ʼi ai he lao.* Maʼia mo ʼana polofeta ʼe mole kei fakaha e Sehova he meʼa kia natou.+
י [Iota]
10 ʼE felalāʼi fakalogologo ʼi te kele te kau takitaki ʼo te taʼahine ʼo Sione.+
ʼE natou tui ni taga* pea ʼe natou tahi laku te efu ki tona ʼulu.+
Neʼe punonou ki te kele te ʼu taʼahine taupoʼou ʼo Selusalemi.
כ [Kafa]
11 ʼE gaʼegaʼe ʼoku mata ʼi te tagi.+
ʼE mamahi toku fatu.
ʼE mamahi toku loto ʼi te to ʼo te taʼahine* ʼo taku hahaʼi,+
Koteʼuhi ʼe pogigia te ʼu fanau mo te ʼu toe kei meamea ʼi te ʼu malaʼe lalahi ʼo te kolo.+
ל [Lameta]
12 ʼE natou fehuʼi tuʼumaʼu ki ʼanatou faʼe: “Kofea ʼae ʼe maʼu ai he meʼa kai pea mo he meʼa inu?”+
Kae ʼe natou pogigia ohage he tahi ʼe lavea ʼi te ʼu malaʼe lalahi ʼo te kolo,
Pea mo mamate mamalie ʼi te ʼu nima ʼo ʼanatou faʼe.
מ [Mema]
13 Kotea la he faʼifaʼitaki ʼe feala ke au fakaha atu?
Pe ʼe au fakatatau anai koe kitea, taʼahine ʼo Selusalemi?
ʼE au fakatatau anai koe kitea moʼou fakapelepeleʼi, taʼahine taupoʼou ʼo Sione?
ʼE mafola tou malaʼia ohage ko te tai.+ Ko ai ʼae ʼe ina lava faitoʼo koe?+
נ [Nuna]
14 Ko te ʼu meʼa ʼae neʼe ha ki ʼau polofeta mo natou fakamatala atu ʼe ko ni loi pea ʼe mole honatou ʼuhiga,+
Pea neʼe mole natou tala tau hala ke ke hao mai te popula.+
Kae ko te ʼu meʼa ʼae neʼe ha kia natou mo natou fakamatala atu ʼe ko ni loi pea mo ni kaka.+
ס [Sameke]
15 ʼE pasipasi atu ’i te fehiʼa ia natou fuli ʼae ʼe fakalaka ʼi te ala.+
ʼE natou punamaʼuli, mo veka+ pea mo kalokalo ʼonatou ʼulu ʼi tanatou sisio ki te taʼahine ʼo Selusalemi. ʼE natou ui:
“ ʼE mole koa la ko te kolo ʼae neʼe ui ki ai: ‘ ʼE taulekaleka pea ʼe ko te fiafiaʼaga ʼo te kele katoa’?”+
פ [Pe]
16 Neʼe palalau kovi kia koe ʼou fili fuli.
ʼE natou veka mo gugu nifo. ʼE natou ui: “Neʼe matou maumauʼi ia ia!+
Kua hoko mai leva te ʼaho ʼae neʼe matou talitali ki ai!+ Kua hoko mai pea kua matou sisio ki ai!”+
ע [Aini]
17 Neʼe fakahoko e Sehova ia tana fakatuʼutuʼu,+ neʼe ina fakahoko ia tana folafola,+
Te meʼa ʼae neʼe ina fakatotonu ʼi te temi muʼa.+
Neʼe mole manavaʼofa ʼo ina maumauʼi.+
Neʼe ina tuku te fili ke fakafiafia ʼo ʼuhiga mo koe. Neʼe ina fakaliliu ʼou fili ʼo malolohi age.
צ [Sati]
18 Taʼahine ʼo Sione, ʼe tagi tau hahaʼi kia Sehova ʼaki tonatou loto katoa!
Ke maligi ʼou loʼimata ʼi te ʼaho mo te po ohage ko he vai tafe.
ʼAua naʼa ke malolo pea ʼaua naʼa tuku tau tagi.
ק [Kofi]
19 Tuʼu ki ʼoluga pea ke tagi leʼo lahi ʼi te poʼuli.
Ke maligi ʼou loʼimata ia muʼa ʼo Sehova ʼo ke fakaha ia te meʼa ʼae ʼi tou loto.
Hiki ʼou nima kia te ia ʼo kole ke maʼuli ʼau fanau
ʼAe ʼe pogigia ʼi te ʼu magaʼi ala fuli ʼuhi ko te hoge.+
ר [Lesa]
20 Sehova e, sio ki te hahaʼi ʼae neʼe ke agafefeka ki ai.
ʼE tonu koa ke haga kai e te ʼu fafine ʼanatou kiʼi toe ʼae neʼe tupu haohaoa mai te mahaki?+
ʼE tonu koa ke matehi te ʼu pelepitelo mo te ʼu polofeta ʼi te sagatualio ʼo Sehova?+
ש [Sini]
21 Kua mamate te ʼu tama mo te kau matuʼa mo leta ʼi te ʼu ala.+
Kua mamate ʼaku taʼahine taupoʼou mo ʼaku tupulaga ʼi te heleta.+
ʼI te ʼaho ʼo tou hauhau, neʼe mole ke manavaʼofa ʼo ke tamateʼi natou.+
ת [Tau]
22 ʼE ke pauʼi mai te ʼu potu fuli te ʼu fili ohage ʼe tonu ke natou kau ki he ʼaho lahi.+
ʼI te ʼaho ʼo te hauhau ʼo Sehova, neʼe mole hao he tahi, neʼe mamate fuli.+
Neʼe matehi e toku fili ia natou ʼae neʼe au fanauʼi* mo taupau.+
א [Alefa]
3 Ko au te tagata ʼae neʼe sio ki te mamahi ʼuhi ko te toko ʼo tona hauhau.
2 Neʼe ina kapu au pea ʼe ina fakahaʼele au ʼi te fakapoʼuli kae mole ʼi te malama.+
3 ʼEi, ʼi te ʼaho katoa, ʼe ina faoʼi tuʼumaʼu tona nima moʼoku fakatuʼā.+
ב [Peta]
4 Neʼe ina fakavaivaiʼi toku kakano mo fakafefe toku kili,
Neʼe ina fasiʼi ʼoku hui.
5 Neʼe ina ʼa takai au, ʼo ina tuku ʼi ʼoku tafaʼaki fuli ia he meʼa kona+ mo te malaʼia.
6 Neʼe ina fakakinauʼi au ke au nofo ʼi he ʼu koga meʼa fakapoʼuli, ohage ko te ʼu tagata ʼae kua fualoa tanatou mamate.
ג [Kimela]
7 Neʼe ina ʼa takai au ʼaki he kaupa ke mole feala ai haku hola.
Neʼe ina haʼi au ʼaki ni seini kapa mamafa.+
8 Pea ka au kole tokoni ʼi toku mamahi, ʼe mole fia logo ia ki taku faikole.+
9 Neʼe ina mapunuʼi ʼoku ala foufou ʼaki he kaupa maka.
Neʼe ina fakaliliu ʼoku ala ʼo pikopiko.+
ד [Taleta]
10 ʼE ina lamalama au ohage ko he uluso peʼe ko he laione ʼe nono.+
12 Neʼe ina faoʼi tana nahau pea ʼe ina fakatuʼu au ohage ko he tauʼaga ʼo tana kauʼi nahau.
ה [He]
13 Neʼe ina fana ʼoku ifiifi ʼaki te ʼu kauʼi nahau ʼo tana ʼaiʼaga nahau.
14 ʼE fakalainoaʼi au e te ʼu puleʼaga fuli. ʼE natou vaʼi au ʼi te ʼaho katoa ʼi ʼanatou hiva.
15 Neʼe ina fakamakonaʼi au ʼaki ni meʼa kona mo ina fakainu au ʼaki te apiseneto.*+
ו [Vave]
17 ʼE ke pulihi toku tokalelei. Kua galo kia au te meʼa ʼae ʼe lelei.
18 Koia ʼe au ui: “Kua puli toku taulekaleka, pea ʼe mole kei au maʼu he ʼamanaki ʼo ʼuhiga mo Sehova.”
ז [Saini]
19 Manatuʼi kua au fakaʼofaʼofa pea ʼe mole kei ʼi ai hoku nofoʼaga,+ manatuʼi te apiseneto mo te meʼa kona.+
20 ʼEi, ʼe ke manatuʼi anai pea ʼe ke falele anai ʼo sio mai.+
21 ʼE au manatuʼi te faʼahi ʼaia. Koia ʼe au faʼa kataki anai ʼo atalitali.+
ח [Heti]
22 Neʼe mole matou mamate ʼuhi ko te ʼofa agatonu ʼo Sehova,+
Koteʼuhi ʼe mole gata ʼi he temi ia tana fakaha tona manavaʼofa.+
23 ʼE fakafoʼou tona manavaʼofa ʼi te uhu fuli.+ ʼE ke agatonu ʼosi.+
24 Neʼe au ui: “Ko Sehova ko toku tofiʼa.+ Koia ʼae ʼe au faʼa kataki ai ʼo atalitali.”+
ט [Teta]
25 ʼE agalelei ia Sehova ki ʼae ʼe ina tuku tana ʼamanaki kia te ia,+ kia ia ʼae ʼe ina kumi tuʼumaʼu ia ia.+
26 ʼE lelei te atalitali fakalogologo*+ ki te haofaki ʼa Sehova.+
27 ʼE ko he meʼa lelei ki te tagata hana tauʼi ni fihifihia* ʼi tona temi tupulaga.+
י [Iota]
28 Ke heka tokotahi mo fakalogologo moka tau mo he fihifihia mai te ʼAtua.*+
29 Ke punou ʼo ʼai tona fofoga ki te efu.+ ʼE lagi kei maʼu pe he ʼamanaki.+
30 Ke ina fakahaga tona kauʼahe kia ia ʼae ʼe ina pāki. Ke ina tali tona laukoviʼi.
כ [Kafa]
31 ʼE mole liʼaki anai tatou e Sehova ʼo talu ai.+
32 Tatau aipe pe neʼe ina fakamamahiʼi tatou, kae ʼe ina toe fakaha anai tona manavaʼofa, ʼuhi ko te lahi ʼaupito ʼo tona ʼofa agatonu.+
33 ʼE mole loto ia ke ina fakamamahiʼi te ʼu foha ʼo te tagata.+
ל [Lameta]
34 ʼE ʼi ai koa he tahi ʼe ina malamalaki te kau pilisoni fuli ʼo te kele?+
35 ʼE taʼofi koa e he tahi ke fakahoko te faitotonu ki he tagata ia muʼa ʼo te Maʼoluga?+
36 ʼE fakahalaʼi koa he tagata ʼi tona fakamauʼi?
ʼE mole tali e Sehova te ʼu aga ʼaia.
מ [Mema]
37 Koia ko ai ʼae ʼe ina lava fai he palalau mo fakahoko kae neʼe mole fakatotonu e Sehova?
38 ʼE mole haʼu fakatahi ni meʼa ʼe kovi mo ni meʼa ʼe lelei
Mai te gutu ʼo te Maʼoluga.
39 ʼE lava koa ki he tahi ke meo ki te ʼu nunuʼa ʼo tana agahala?+
נ [Nuna]
40 Tou vakavakaʼi mo sivisivi tatatou aga+ pea tou toe liliu mai kia Sehova.+
41 Tou hiki ʼotatou nima ʼo tou pauʼi ki te ʼAtua ʼi te lagi ʼaki he loto katoa, mo ui:+
42 “Neʼe matou agahala mo agatuʼu+ pea neʼe mole ke fakamolemole mai.+
ס [Sameke]
43 ʼI tou hauhau, neʼe mole ke fakagafua ke matou fakaovi atu.+
Pea neʼe mole ke manavaʼofa ʼo tuli mo matehi matou.+
44 ʼAki he ʼao, neʼe ke taʼofi tamatou fakaovi atu ke mole kaku atu tamatou faikole.+
45 ʼE ke fakaliliu matou ko ni ʼotaʼota ʼi te ʼu puleʼaga.”
פ [Pe]
46 ʼE palalau kovi ʼomatou fili fuli ʼo ʼuhiga mo matou.+
47 ʼE matou mamahi tuʼumaʼu pe ʼuhi ko te mataku, mo te ʼu hele,+ mo te maumau pea mo te malaʼia.+
48 ʼE maligi ʼoku loʼimata ohage ko ni vai tafe ʼuhi ko te malaʼia ʼae ʼe hoko ki te taʼahine ʼo taku hahaʼi.+
ע [Aini]
51 ʼE au lotomamahi moka au sio ki te ʼu meʼa ʼae neʼe hoko ki te ʼu taʼahine fuli ʼo toku kolo.+
צ [Sati]
52 Neʼe kapu au e ʼoku fili ohage ko he kapu ʼo he manulele kae neʼe mole hona tupuʼaga.
53 Neʼe natou li au ki te luo ke au mate ai. Neʼe natou tuki makaʼi tuʼumaʼu au.
54 Kua hake te vai ʼo ʼū ai toku ʼulu pea neʼe au ui: “Kua au vave mate.”
ק [Kofi]
55 Sehova e, mai te takele ʼo te luo neʼe au kalagaʼi ai tou huafa!+
56 Fakalogo ki toku leʼo! ʼAua naʼa ke pupunu tou taliga ki taku tagi mo taku kole tokoni.
57 ʼI te ʼaho ʼae neʼe au pauʼi atu ai, neʼe ke fakaovi mai kia au. Pea neʼe ke ui mai: “ ʼAua naʼa ke mataku.”
ר [Lesa]
58 Sehova e, neʼe ke fakafofoga au ʼi te faifakamau pea neʼe ke totogi toku maʼuli.+
59 Sehova e, neʼe ke sio ki te kovi ʼae neʼe fai mai kia au. Fakalelei siʼou loto ke fakahoko te faitotonu ʼo ʼuhiga mo au.+
60 Neʼe ke sio ki te lahi ʼo tanatou fia lagavaka mo ʼanatou fakatuʼutuʼu kovi fuli ʼo ʼuhiga mo au.
ש [Sini] peʼe [Sihini]
61 Sehova e, neʼe ke logo ki ʼanatou laukovi pea mo ʼanatou fakatuʼutuʼu kovi fuli ʼo ʼuhiga mo au,+
62 Te ʼu meʼa ʼae ʼe lau e ʼoku fili mo ʼanatou muhumuhu ʼo ʼuhiga mo au ʼi te ʼaho katoa.
63 Sio kia natou! ʼE natou vaʼi pe au ʼi ʼanatou hiva pe ʼe natou heheka peʼe natou tutuʼu.
ת [Tau]
64 Sehova e, ʼe ke liufaki anai kia natou te meʼa ʼae ʼe tuha mo ʼanatou gaue.
65 ʼE ke tauteaʼi anai natou ʼo natou liliu ai ʼo lotofefeka.
66 Sehova e, ʼe ke tuli anai ia natou ʼi tou hauhau pea ʼe ke pulihi anai ia natou ʼi te lalo lagi.
א [Alefa]
4 Kua puli te gigila ʼo te aulo, maʼia mo te aulo maʼa.+
Kua leta te ʼu maka ʼo te sagatualio+ ʼi te ʼu magaʼi ala fuli.+
ב [Peta]
2 Kae ki te ʼu foha ʼo Sione, ʼae neʼe maʼuhiga ohage ko he aulo maʼa,
Kua sioʼi natou ohage ko ni ipu kele
Neʼe faʼu e he tagata faʼu ipu.
ג [Kimela]
3 Maʼia mo te ʼu kuli vao ʼe natou fafaga ʼonatou kiʼi ʼuhi.
Kae ki te taʼahine ʼo taku hahaʼi, kua agakovi+ ohage ko te ʼu otulusi ʼo te toafa.+
ד [Taleta]
4 Kua mate noa te ʼalelo ʼo te kiʼi toe meamea ʼi tona fia inu.
ʼE kole moʼi pane te ʼu kiʼi tamaliki+ kae ʼe mole pe la he tahi ʼe ina foaki age.+
ה [He]
5 Ko natou ʼae neʼe mahani ʼi te kai meʼa lelei, kua natou takokoto pakupaku ʼi te ʼu ala.+
Pea ko natou ʼae neʼe mahani ʼi te tui ʼo ni mutuʼi meʼa totogi kovi,+ kua natou takokoto ʼi te ʼu tuʼuga lefulefu.
ו [Vave]
6 ʼE mamafa age te fakatuʼā ʼo* te taʼahine ʼo taku hahaʼi ʼi te fakatuʼā ʼo* Sotoma,+
ʼAe neʼe fakahoko ʼi he kiʼi temi pe pea neʼe mole he tokoni ki ai.+
ז [Saini]
7 Neʼe maʼa age te kau Nasilea+ ʼi te nive, pea natou hihina age ʼi te huʼa pipi.
Neʼe natou lanu kula age ʼi te ʼu feo pea natou gigila ohage ko te ʼu maka maʼuhiga ʼae ko te safile.
ח [Heti]
8 Kua natou ʼuʼuli age ʼi te mamala.
ʼE mole kei iloʼi natou ʼi te ʼu ala.
Kua pipiki tonatou kili ki ʼonatou hui+ ʼo liliu ai ohage ko he fafie.
ט [Teta]
9 ʼE lelei age te mate ʼi te heleta ʼi te mate pakupaku,+
Peʼe ʼi te mamahi ʼae ʼo te mole maʼu ʼo he fua ʼi te ʼu gaueʼaga.
י [Iota]
10 Neʼe fakamoho tonu e ni fafine manavaʼofa ʼanatou fanau.+
Pea ko tanatou meʼa kai ʼaia ʼi te temi ʼae neʼe hoko ai te malaʼia ki te taʼahine ʼo taku hahaʼi.+
כ [Kafa]
11 Neʼe fakaha e Sehova tona hauhau,
Pea neʼe ina fakato tona toe ita lahi.+
ʼE ina tutu he afi ʼi Sione ʼo vela ai te ʼu fakatafito.+
ל [Lameta]
12 Neʼe mole manatu te ʼu hau ʼo te kele pea mo te hahaʼi fuli
ʼE fehufi anai te kau fakafeagai mo te ʼu fili ʼi te ʼu matapa ʼo Selusalemi.+
מ [Mema]
13 ʼE hoko te aluʼaga ʼaia ʼuhi ko te ʼu agahala ʼo ʼona polofeta mo te ʼu hala ʼo ʼona pelepitelo,+
ʼAe neʼe natou liligi te toto ʼo te kau faitotonu ʼi te loto kolo.+
נ [Nuna]
14 Neʼe natou hehe ohage ko ni kivi+ ʼi te ʼu ala.
Kua natou ʼuli ʼi te toto,+
Koia ʼe mole feala ai ke fāfā he tahi ki ʼonatou teu.
ס [Sameke]
15 ʼE kalaga te hahaʼi kia natou: “Kotou olo nei, hahaʼi heʼe maʼa! Kotou olo nei! Kotou olo nei! ʼAua naʼa kotou fāfā mai!”
Kua natou liliu ko ni hahaʼi ʼe mole kei ʼi ai honatou nofoʼaga pea ʼe natou feoloʼaki ʼi he mo he.
ʼE ui e te hahaʼi ʼo te ʼu puleʼaga: “ ʼE mole feala hanatou nonofo fakatahi mo tatou ʼi heni.*+
פ [Pe]
16 Ko Sehova totonu ʼae neʼe ina fakamavetevete ia natou.+
ʼE mole toe manavaʼofa anai ia kia natou.
ʼE mole toe fakaʼapaʼapa anai te hahaʼi ki te kau pelepitelo+ mo te kau takitaki.”+
ע [Aini]
17 Kua gaʼegaʼe noa ʼomatou mata ʼi te fakatalitali pe ʼe haʼu anai he tahi ʼo tokoni mai.+
Neʼe matou fakatalitali mo ʼamanaki ki he puleʼaga ke tokoni mai. Kae neʼe mole feala hana haofaki matou.+
צ [Sati]
18 Neʼe natou lamalama ʼamatou feoloʼaki mo tuli matou,+ ʼo mole kei feala ai hamatou olo ki te ʼu malaʼe lalahi ʼo tomatou kolo.
Kua katoa ʼomatou ʼaho he ʼe kua hoko mai tomatou fakaʼosi.
ק [Kofi]
19 Neʼe gaholo age ia natou ʼae neʼe natou tuli matou ʼi te ʼu akuila ʼo te lagi.+
Neʼe natou tuli matou ʼi te ʼu moʼuga pea neʼe natou fenonoʼi moʼo ʼohofi matou ʼi te toafa.
ר [Lesa]
20 Neʼe to te fakanofo ʼa Sehova ki tonatou luo loloto, ia ia ʼae neʼe hage maʼa matou ko te manava ʼo te maʼuli,+
ʼAe neʼe matou ui ʼo ʼuhiga mo ia: “ ʼE matou maʼuli anai ʼi tona malu ʼi te ʼu puleʼaga.”
ש [Sini]
21 Ke ke fakafiafia taʼahine ʼo Etome,+ ʼae ʼe maʼuli ʼi te fenua ʼo Usia.
Kae ʼe toe foaki atu anai kia koe te ipu.+ ʼE ke konahia anai mo ke fakaha tou telefua.+
ת [Tau]
22 Taʼahine ʼo Sione, kua ʼosi tou fakatuʼā.
ʼE mole toe ʼave popula anai koe.+
Kae ʼe ina tokagaʼi anai ia tau hala, taʼahine ʼo Etome!
ʼE ina fakaha anai ʼau agahala.+
5 Sehova e, manatuʼi te aluʼaga ʼae neʼe hoko kia matou.
Sio ki tomatou fakalainoaʼi.+
2 Neʼe foaki tomatou tofiʼa ki ni hahaʼi kehe, mo ʼomatou ʼapi ki ni matapule.+
3 Kua matou liliu ko ni fanau hala mo tamai. Kua hage ʼamatou faʼe ko ni vitua.+
4 Ka matou fia iinu, ʼe tonu ke matou totogi tomatou vai,+ pea ʼe matou toe totogi mo tamatou fafie.
5 Kua vave maʼu pe matou e natou ʼae ʼe natou tuli matou.
Kua matou gaʼegagaʼe kae ʼe mole tuku mai he temi malolo.+
6 ʼE matou faoʼi ʼomatou nima ki Esipito+ mo Asilia+ ke matou maʼu hamatou meʼa kai.
7 Kua pupuli ʼamatou kui ʼae neʼe agahala kae ʼe tonu ke matou ʼamo te ʼu mamahi ʼo ʼanatou hala.
8 Kua puleʼi matou e ni kaugana, pea ʼe mole ʼi ai he tahi ke ina haofaki matou mai ʼonatou nima.
9 Ka matou olo ʼo kumi meʼa kai, ʼe tuʼutamakiʼia ʼomatou maʼuli+ ʼuhi ko te ʼu tagata toʼo mahafu ʼo te toafa.
10 Kua vela pe ʼomatou kili ohage ko he gutuʼumu kakaha, ʼuhi ko te ʼu mamahi ʼo te pakupaku.+
11 Neʼe natou fakalainoaʼi* te ʼu fafine ʼi Sione, te ʼu taʼahine taupoʼou ʼi te ʼu kolo ʼo Suta.+
12 Neʼe natou tautau nima tahi te ʼu tama ʼaliki+ pea neʼe mole natou fakaʼapaʼapa ki te kau takitaki.+
13 ʼE fata e te kau tupulaga ia te maka momosi fulumeto pea ʼe fetokaʼi te ʼu tama ʼi te mamafa ʼo te ʼu ʼamoga fafie.
14 ʼE mole kei olo te kau takitaki ki te matapa ʼo te kolo,+ pea ʼe mole kei faimaholo te kau tupulaga.+
15 Kua puli te fiafia ʼi ʼomatou loto pea kua fetogi e te putu ia tamatou meʼe.+
16 Kua to te kolona ʼi ʼomatou ʼulu. Malaʼia kia matou he neʼe matou agahala!
17 ʼE mahaki ʼomatou loto ʼuhi ko te ʼu meʼa ʼaia,+
Mo vaivai ai ʼomatou mata,+
18 Pea ʼuhi ko te Moʼuga ʼo Sione ʼae kua liliu ko he koga meʼa lavaki+ ʼe tataka ai te ʼu lenato.
19 Kae ko koe Sehova e, ʼe ke ʼafio ki te heʼe gata.
ʼE tuʼu tou hekaʼaga fakahau mai he taʼiake ki he tahi taʼiake.+
20 He koʼe ʼe ke galoʼi anai matou ʼo talu ai? He koʼe ʼe ke liʼaki anai matou ʼo fualoa?+
21 Sehova e, taki atu matou kia te koe, pea ʼe matou fiafia anai ʼi te toe liliu atu.+
Fakafoʼou ia meʼa fuli ohage ko te temi muʼa.+
22 Kae kua ke liʼaki ʼosi koe matou.
ʼE kei kovi ʼosi pe tou ita kia matou.+
Ko te kapite 1 ki te 4 ʼe ko he ʼu hiva. Ko te vaega takitahi ʼe kamata ʼaki te ʼu mataʼi tohi ʼo te ʼalafapeti Fakahepeleo ʼo mulimuli ki tonatou fefakahoahoaʼaki.
Peʼe “fakafiafia ai.”
ʼE fakaʼuhiga ki Selusalemi.
Peʼe “akonaki.”
Vakaʼi Te ʼu Kupu.
ʼE lagi ko he palalau fakatuketuke ʼe fakaʼuhiga ki te ʼofa peʼe ko te manavaʼofa.
Peʼe “fanauʼi mo haohaoa mai te mahaki.”
Peʼe lagi “pea ʼe ina tuku au ohage ko he kele ʼe mole gaueʼi.”
Vakaʼi Te ʼu Kupu.
Peʼe “mo he kataki fualoa.”
Hep. “ke ina ʼamo tona ʼakau toho.” Vakaʼi te kupu “ ʼAkau ʼamo” ʼi Te ʼu Kupu.
Peʼe “moka hili e te ʼAtua he ʼakau ʼamo ʼi tona kia.”
Hep. “hala ʼa.”
Hep. “agahala ʼa.”
Peʼe “nonofo ʼi heni ohage ko ni matapule.”
Peʼe “fakaʼalikiʼi.”