TANIELA

1 ʼI te tolu taʼu ʼo te pule ʼa te Hau ʼo Suta ko Soakimi,+ neʼe haʼu ia te Hau ʼo Papiloni ko Nepukanesa ʼo ʼa takai ia Selusalemi.+ 2 Neʼe tuku leva e Sehova ia te Hau ʼo Suta ko Soakimi ki ʼona nima,+ pea mo tuku ke ina ʼave he ʼu meʼa kehekehe ʼo te fale lotu* ʼo te ʼAtua moʼoni. Koia neʼe ʼave leva e te hau ko Nepukanesa te ʼu meʼa ʼaia ki te fale lotu* ʼo tona ʼatua, ʼi te fenua ʼo Sinea.*+ Pea neʼe ina tuku te ʼu meʼa ʼaia ki te fale tanakiʼaga koloa ʼo tona ʼatua.+

3 Pea neʼe fakatotonu e te hau kia Asipenasi, te pule ʼo te hahaʼi ʼae ʼe gaue ʼi tona fale hau, ke ina ʼaumai he kau Iselaele. Neʼe tonu ke ʼaumai tafito ia natou ʼae ʼe kau ʼi te hologa hau peʼe ʼi te ʼu famili ʼaliki.+ 4 Neʼe tonu ke filifili he ʼu tama* talavou ʼe mole ʼi ai honatou ʼu mele. Neʼe tonu ke natou popoto, mo ʼatamai, mo maʼu te fakasiosio poto+ pea mo lavaʼi te ʼu gaue ʼae ʼi te fale hau. Pea ʼe akoʼi age anai kia natou e Asipenasi te faitohi pea mo te lea ʼa te kau Kaletea. 5 Pea neʼe toe loto e te hau ke foaki kia natou ʼi te ʼaho fuli honatou vahe ʼi te ʼu meʼa kai kano lelei ʼo tona laupapa pea mo te vino ʼae neʼe ina inu. ʼE natou ako anai* lolotoga taʼu ʼe tolu. Pea ka ʼosi pe te ʼu taʼu ʼaia, ʼe hoki feala leva hanatou gaue maʼa te hau.

6 Neʼe kau ʼihi ia natou ʼaia ʼi te telepi* ʼo Suta: ko Taniela,*+ mo Hanania,* mo Misaele* pea mo Asalia.*+ 7 Neʼe toe foaki age kia natou e te pule ʼo te hahaʼi ʼae ʼe gaue ʼi te fale hau honatou ʼu higoa.* Neʼe ina fakahigoaʼi ia Taniela ko Peletesasa,+ ia Hanania ko Satalake, ia Misaele ko Mesake pea ko Asalia ko Apeteneko.+

8 Kae neʼe fakatotonu e Taniela ʼi tona loto ke ʼaua naʼa heʼe maʼa ʼuhi ko te ʼu meʼa kai kano lelei ʼo te laupapa ʼo te hau pea mo te vino ʼae neʼe ina inu. Koia neʼe ina kole ai ki te pule ʼo te hahaʼi ʼae ʼe gaue ʼi te fale hau ke mole kai ki te ʼu meʼa kai ʼaia naʼa heʼe maʼa ai. 9 Pea neʼe uga e te ʼAtua moʼoni ia te tagata pule ʼaia ke agalelei pea mo manavaʼofa kia Taniela.+ 10 Kae neʼe ui e te tagata pule ʼaia kia Taniela: “ ʼE au mataku ki toku ʼaliki te hau he neʼe kua ina fakatuʼutuʼu te ʼu meʼa ʼae ʼe tonu ke kotou kai pea mo inu. Kotea ʼae ka hoko mo kapau ʼe kotou mata gaʼegaʼe age ʼi te tahi ʼu tama* ʼae ʼe kotou taʼu tahi? ʼE tukugakoviʼi anai au e te hau ʼuhi ko koutou.” 11 Neʼe palalau leva ia Taniela ki te tagata leʼo ʼae neʼe hinoʼi e te tagata pule ke tokaga kia ia, mo Hanania, mo Misaele pea mo Asalia. Neʼe ina ui age ki ai: 12 “Fakalelei siʼou loto, ke ke ʼahiʼahi fai te faʼahi ʼaeni lolotoga ʼaho ʼe hogofulu: ke foaki mai ni lauʼakau ke matou kai pea mo he moʼi vai ke matou inu. 13 ʼE ke vakaʼi anai pe ʼe feafeaʼi ʼomatou fofoga mo te ʼu fofoga ʼo te ʼu tama* ʼae ʼe kai ki te ʼu meʼa kai kano lelei ʼo te laupapa ʼo te hau. ʼE ke sio anai pe ko ai ʼae ʼe malohi pea ʼe ke fai leva he tonu.”

14 Neʼe tali e te tagata leʼo tanatou kole, pea neʼe ina ʼahiʼahi fai te faʼahi ʼaia lolotoga ʼaho ʼe hogofulu. 15 ʼI te ʼosi ʼo te ʼu ʼaho ʼe hogofulu, neʼe natou mata maʼuli. Pea neʼe natou malolohi* age ʼi te kau tama* fuli ʼae neʼe kai ki te ʼu meʼa kai kano lelei ʼo te laupapa ʼo te hau. 16 Koia neʼe mole ʼavage ai kia natou e te tagata leʼo te ʼu meʼa kai kano lelei pea mo te vino, kae neʼe ina foaki age ni lauʼakau. 17 Pea neʼe foaki e te ʼAtua moʼoni ki te ʼu tama* ʼaia ʼe toko fa te poto, mo te ʼatamai malama pea mo te fakasiosio tonu ke natou mahino ki te ʼu faʼahiga tohi* fuli. Pea neʼe toe foaki kia Taniela te fealagia ʼae ke mahino ki te ʼu moemisi fuli pea mo te ʼu meʼa fuli ʼae ʼe ha.+

18 Neʼe kua ʼosi fakatuʼutuʼu e te hau ko Nepukanesa te temi ʼae ke ʼaumai fuli ai te kau tama.+ Pea neʼe haʼu leva ʼi te temi ʼaia te pule ʼo te hahaʼi ʼae ʼe gaue ʼi te fale hau, ʼo ʼave ia natou ki te hau. 19 Neʼe palalau leva ia te hau mo natou. Pea neʼe mole he tahi ia natou fuli ʼaia neʼe hage ko Taniela, mo Hanania, mo Misaele pea mo Asalia.+ Koia neʼe natou nonofo ai ʼo gaue maʼa te hau. 20 Neʼe fakafehuʼi natou e te hau ʼo ʼuhiga mo te ʼu meʼa fuli ʼae neʼe ʼaoga ki ai he poto mo he ʼatamai. Pea neʼe ina tokagaʼi leva ʼe tuʼa teau age tonatou popoto ʼi te kau pelepitelo fuli ʼae ʼe gaohi meʼa fakamanamana mo te hahaʼi faifakakikite fakatemonio fuli ʼo tona puleʼaga katoa.+ 21 Pea neʼe nofo ia Taniela ʼi te fenua ʼaia, ʼo kaku ki te ʼuluaki taʼu ʼo te temi pule ʼo te Hau ko Siliusi.+

2 Neʼe fai leva e Nepukanesa ni moemisi ʼi te lua taʼu ʼo tona temi pule. Pea neʼe hoha ʼaupito+ leva ʼo puli ai tana fia moe. 2 Koia neʼe fakatotonu ai e te hau ke pauʼi te kau pelepitelo ʼae ʼe gaohi meʼa fakamanamana, mo te hahaʼi faifakakikite fakatemonio, mo te hahaʼi faifakalauʼakau pea mo te kau Kaletea.* Neʼe ina loto ke natou fakamatala age ʼana moemisi. Neʼe natou ʼomai leva ki te hau.+ 3 Neʼe ui age e te hau: “Neʼe au fai he moemisi, pea ʼe au hoha he ʼe au fia iloʼi te meʼa ʼae neʼe au moemisi ki ai.” 4 Neʼe tali e te kau Kaletea ki te hau ʼi te lea Fakaalamea:*+ “Siʼomatou hau, ke ke maʼuli ʼo heʼe gata. Fakalelei siʼou loto, fakamatala mai tau moemisi pea ʼe matou fakamahino atu anai.”

5 Neʼe tali e te hau ki te kau Kaletea: “Koʼeni taku tonu: Kapau ʼe mole kotou fakaha pea mo fakamahino mai taku moemisi, ʼe taʼataʼaga liki anai koutou pea ʼe fakaliliu anai ʼokotou ʼapi ko he ʼu fale mamaʼo ki te hahaʼi.* 6 Kae kapau ʼe kotou fakamatala pea mo fakamahino mai taku moemisi, ʼe au foaki atu anai ni meʼa ʼofa. ʼE au fakapale pea mo fakamaʼuhigaʼi lahi anai koutou.+ Koia kotou fakamatala pea mo fakamahino mai taku moemisi.”

7 Neʼe natou toe tali ki te hau: “Siʼomatou hau, ke ke fakamatala mai tau moemisi pea ʼe matou fakamahino atu anai.”

8 Neʼe tali age e te hau: “ ʼE au iloʼi lelei pe, ʼe kotou faiga ke kotou maʼu he temi ke kotou fakakaukauʼi koteʼuhi kua kotou mahino ki te tonu ʼae kua au fakaha atu. 9 Kapau ʼe mole kotou fakaha mai taku moemisi, ʼe hoko anai kia koutou fuli he tautea pe ʼe tahi. Kua kotou tonu tahi ke kotou loiʼi mo kakaʼi au ʼo kotou fakaʼamu ʼe fetogi anai taku manatu. Koia kotou fakamatala mai taku moemisi pea ʼe au iloʼi ai anai ʼe feala hakotou fakamahino.”

10 Neʼe tali e te kau Kaletea ki te hau: “Siʼomatou hau, ʼe mole he tagata ʼi te kele ʼe ina lavaʼi te meʼa ʼaia ʼe ke kole mai. ʼE heʼeki ʼi ai he hau malohi, peʼe ko he kovana kua ina kole he meʼa feia ki he pelepitelo ʼe gaohi meʼa fakamanamana, peʼe ki he tagata faifakakikite, peʼe ki he Kaletea. 11 Siʼomatou hau, ʼe faigataʼa te faʼahi ʼaia ʼe ke kole mai. ʼE mole he tahi ʼe ina lavaʼi te faʼahi ʼaia, gata pe ki te ʼu ʼatua, ʼae ʼe mole maʼuʼuli mo te tagata.”

12 Neʼe kovi ʼosi te ita ʼo te hau ʼi tana logo ki te ʼu palalau ʼaia. Pea neʼe ina fakatotonu ai ke matematehi te kau popoto fuli ʼo Papiloni.+ 13 Neʼe logologo leva te fakatotonu ʼaia pea neʼe toe kumi ai ia Taniela pea mo ʼona kaumeʼa ke matehi he neʼe ʼamanaki matehi te kau popoto fuli.

14 ʼI te temi ʼaia, neʼe palalau fakaʼeteʼete ai ia Taniela kia Alioke, te pule ʼo te kau leʼo ʼa te hau. Neʼe palalau ki te pule ʼaia ʼi te temi ʼae neʼe alu ai ke ina matehi te kau popoto ʼo Papiloni. 15 Neʼe ina fehuʼi kia Alioke, te pule ʼo te kau leʼo ʼa te hau: “He koʼe neʼe fai e te hau te toe fakatotonu mamafa ʼaia?” Neʼe fakaha leva e Alioke kia Taniela te aluʼaga ʼae neʼe hoko.+ 16 Neʼe alu ai ia Taniela ki te hau ʼo kole ki ai ke ina tuku age he temi ke ina fakamahino age te moemisi.

17 Neʼe alu leva ia Taniela kio ia ʼo fakaha te aluʼaga ʼaia ki ʼona kaumeʼa ko Hanania, mo Misaele pea mo Asalia. 18 Neʼe ina kole age ke natou faikole ki te ʼAtua ʼo te lagi ke ʼofa ʼo fakaha age kia natou te meʼa fakalilo ʼaia ke ʼaua naʼa matehi ia ia, mo ʼona kaumeʼa pea mo te kau popoto ʼo Papiloni.

19 Neʼe fakaha leva te meʼa fakalilo ʼaia kia Taniela, ʼi he meʼa neʼe ha age ki ai ʼi te poʼuli.+ Neʼe vikiʼi ai e Taniela te ʼAtua ʼo te lagi. 20 Neʼe ui e Taniela:

24 Neʼe alu leva ia Taniela kio Alioke, ʼae neʼe hinoʼi e te hau ke ina matematehi te kau popoto ʼo Papiloni.+ Neʼe ina ui age: “ ʼAua naʼa ke matehi te kau popoto ʼo Papiloni. ʼAve au ki te hau pea ʼe au fakamahino age anai tana moemisi.”

25 Neʼe ʼave fakavilivili leva e Alioke ia Taniela ki te hau, pea neʼe ina ui age ki te hau: “Siʼoku hau, kua au maʼu he tagata ʼe feala hana fakamahino atu tau moemisi. ʼE kau te tagata ʼaia ʼi te hahaʼi popula ʼo Suta.”+ 26 Neʼe fehuʼi age e te hau kia Taniela, ʼae neʼe toe higoa ko Peletesasa:+ “ ʼE feala moʼoni koa ke ke fakaha pea mo fakamahino mai taku moemisi?”+ 27 Neʼe tali age e Taniela: “Siʼoku hau, ʼe mole feala ki he tagata poto, peʼe ko he pelepitelo ʼe gaohi meʼa fakamanamana, peʼe ko he tagata sivi fetuʼu, peʼe ko he tagata faifakakikite ke ina fakaha atu te meʼa fakalilo ʼae ʼe ke fia mahino ki ai.+ 28 Kae, Hau ko Nepukanesa, ʼe ʼi ai te ʼAtua ʼi te lagi ʼe ina fakaha te ʼu meʼa fakalilo.+ Pea kua ina fakaha atu te ʼu meʼa ʼae ka hoko ʼi te ʼu ʼaho fakamuli. Koʼeni tau moemisi pea mo te ʼu meʼa ʼae neʼe ha kia koe ʼi tau takoto ʼi tou moeʼaga:

29 “Siʼoku hau, neʼe ke fakakaukauʼi ʼi tou moeʼaga te ʼu meʼa ʼae ka hoko. Pea ko Ia ʼae ʼe ina fakaha te ʼu meʼa fakalilo, neʼe ina fakaha atu te ka haʼu. 30 Neʼe mole fakaha mai te meʼa fakalilo ʼaia he ʼe au poto age ʼi ʼihi. Kailoa ia, kae neʼe fakaha mai ke au fakamahino atu, ke feala hau iloʼi te ʼu meʼa ʼae neʼe ke fakakaukauʼi.+

31 “Koia, siʼoku hau, neʼe ke sio ki he toe fakatata lahi.* Neʼe tuʼu te toe fakatata lahi ʼaia ʼi ʼou muʼa. Neʼe fakaofoofo tona gigila pea neʼe fakamataku ʼaupito tona agaaga. 32 Neʼe faʼu te ʼulu ʼo te fakatata ʼaia ʼaki te aulo maʼa.+ Neʼe faʼu tona fatafata pea mo ʼona nima ʼaki te siliva.+ Neʼe faʼu tona fatu pea mo ʼona kauaga ʼaki te kapa.+ 33 Neʼe faʼu ʼona vaʼe ʼaki te ukamea,+ pea neʼe faʼu ʼona ʼuluʼuluʼi vaʼe ʼaki te ukamea pea mo te kele.*+ 34 Neʼe ke sioʼi te fakatata ʼaia pea neʼe mataʼaki mai he foʼi maka mai he moʼuga. Kae neʼe mole fai te faʼahi ʼaia e he tagata.* Neʼe haʼu ʼo ʼi malohi ki te ʼu ʼuluʼuluʼi vaʼe ʼae neʼe faʼu ʼaki te ukamea pea mo te kele. Pea neʼe ina laliki ai te ʼu ʼuluʼuluʼi vaʼe.+ 35 Neʼe laliki fuli ai te ukamea, mo te kele, mo te kapa, mo te siliva pea mo te aulo. Pea neʼe liliu ai ohage ko te kiliʼi fulumeto ʼae ʼe viligia mai te hahaʼaga fulumeto ʼi te temi vela. Neʼe ʼave fuli leva e te matagi pea neʼe mole kei toe he meʼa. Pea ko te foʼi maka ʼae neʼe ʼi malohi ki te fakatata, neʼe liliu ko he moʼuga lahi neʼe ina ʼaofi te kele katoa.

36 “Siʼomatou hau, koʼena tau moemisi. Pea ʼe matou fakamahino atu anai. 37 Siʼomatou hau, ko koe te hau ʼo te ʼatu hau, pea neʼe foaki atu e te ʼAtua ʼo te lagi ia te pule fakahau,+ mo te malohi pea mo te kololia. 38 Neʼe ina toe tuku atu ke ke pule ki te hahaʼi ʼi te ʼu potu fuli ʼae ʼe natou maʼuʼuli ai, ʼo feia mo te ʼu manu ʼo te vao pea mo te ʼu manulele. ʼEi, neʼe ina tuku atu ke ke pule ki te ʼu meʼa fuli ʼaia.+ Koia ʼe ko koe te ʼulu ʼae neʼe faʼu ʼaki te aulo.+

39 “ ʼE hoa atu anai kia koe he tahi puleʼaga+ kae ʼe malalo age anai ia koe. Pea ʼe toe ha anai he tahi puleʼaga, ko te tolu ʼaia. ʼE fakata e te kapa ia te puleʼaga ʼaia. Pea ʼe ina puleʼi anai te kele katoa.+

40 “Pea ko te fa puleʼaga leva, ʼe malohi anai ohage ko te ukamea.+ ʼE ina maumauʼi pea mo pulihi anai te ʼu puleʼaga fuli ʼaia, ohage pe ko te laliki pea mo te maumauʼi e te ukamea ia meʼa fuli.+

41 “Pea neʼe ke sio neʼe faʼu te tahi koga ʼo te ʼu ʼuluʼuluʼi vaʼe pea mo te ʼu kauʼi vaʼe ʼaki te kele pea mo te tahi koga ʼaki te ukamea. Koia ʼe mavetevete anai te puleʼaga ʼaia. Kae ʼe ʼi ai anai he koga ʼo te puleʼaga ʼaia ʼe malohi ohage ko te ukamea, he neʼe ke sio ki te fio ʼo te ukamea mo te kele.* 42 Neʼe faʼu te tahi koga ʼo te ʼu kauʼi vaʼe ʼaki te ukamea pea mo te tahi koga ʼaki te kele. Koia ʼe malohi anai te tahi faʼahi ʼo te puleʼaga ʼaia kae ʼe vaivai anai tona tahi faʼahi. 43 Pea neʼe ke sio ki te fio ʼo te ukamea mo te kele.* Koia ʼe natou* fakatahi anai mo te hahaʼi.* Kae ʼe mole natou logo tahi anai ohage pe ko te mole lava pipiki tahi ʼo te ukamea mo te kele.

44 “ ʼI te temi ʼo te ʼu hau ʼaia, ʼe fakatuʼu anai e te ʼAtua ʼo te lagi he puleʼaga+ ʼe mole maumauʼi anai ʼi he temi.+ Pea ʼe mole tuku anai te puleʼaga ʼaia ke pule ki ai he tahi hahaʼi.+ ʼE ina maumauʼi pea mo pulihi anai te ʼu puleʼaga fuli ʼaia+ pea ko te puleʼaga pe ʼaia ka tuʼu anai ʼo talu ai.+ 45 ʼE hoko anai te ʼu aluʼaga fuli ʼaia koteʼuhi neʼe ke sio ki te mataʼaki mai ʼo he foʼi maka mai te moʼuga, kae neʼe mole fai te faʼahi ʼaia e he tagata.* Pea neʼe ke toe sio ki te laliki e te foʼi maka te ukamea, mo te kapa, mo te kele, mo te siliva pea mo te aulo.+ Siʼomatou hau, neʼe fakaha atu e te ʼAtua Lahi te ʼu meʼa ʼae ka hoko.+ ʼEi, ʼe hoko moʼoni anai tau moemisi pea ʼe tuha mo te falala tona fakamahino.”

46 Neʼe tulolo leva te Hau ko Nepukanesa ki te kele ia muʼa ʼo Taniela ʼo fakaʼapaʼapa ki ai. Pea neʼe ina fakatotonu ke foaki age ki ai he meʼa ʼofa pea ke tutu he iseso maʼa ia. 47 Neʼe ui e te hau kia Taniela: “ ʼE moʼoni, ko tokotou ʼAtua ʼe ko te ʼAtua ʼo te ʼu ʼatua pea mo te ʼAliki ʼo te ʼu hau. Pea ʼe ko Ia ʼae ʼe ina fakaha te ʼu meʼa fakalilo he neʼe ke lava fakaha mai te meʼa fakalilo ʼaia.”+ 48 Neʼe fakanofo leva e te hau ia Taniela ki he tuʼulaga maʼoluga, pea neʼe ina foaki age ni tuʼuga meʼa ʼofa taulekaleka. Pea neʼe ina tuku ke pule ki te potu fenua katoa ʼo Papiloni+ pea mo te kau popoto fuli ʼo Papiloni. 49 Pea neʼe kole leva e Taniela ki te hau ke tokakaga ia Satalake, mo Mesake pea mo Apeteneko+ ki te potu fenua ʼo Papiloni. Kae neʼe gaue ia Taniela ʼi te fale hau.

3 Neʼe fai leva e te hau ko Nepukanesa he fakatata aulo neʼe fasiga nima 60* tona maʼoluga mo fasiga nima 6* tona laulahi. Neʼe ina fakatuʼu ʼi te potu fenua laulelei ʼo Tula, ʼi te potu fenua ʼo Papiloni. 2 Pea neʼe pauʼi e te Hau ko Nepukanesa te kau pule taki,* mo te kau minisi, mo te ʼu kovana, mo te kau tagata faitokoni, mo te kau pule koloa, mo te kau tuʼi fakamau, mo te kau tagata ʼo te lao pea mo natou fuli ʼae neʼe tokakaga ki te ʼu potu fenua kehekehe. Neʼe ina fakatotonu kia natou ʼaia ke ʼomai ki te fakatapuʼi ʼo te fakatata ʼae neʼe ina fakatuʼu.

3 Koia neʼe fakatahitahi ai te kau pule taki, mo te kau minisi, mo te ʼu kovana, mo te kau tagata faitokoni, mo te kau pule koloa, mo te kau tuʼi fakamau, mo te kau tagata ʼo te lao pea mo natou fuli ʼae neʼe tokakaga ki te ʼu potu fenua kehekehe. Neʼe natou kau leva ki te fakatapuʼi ʼo te fakatata ʼae neʼe fakatuʼu e te Hau ko Nepukanesa. Neʼe natou tutuʼu ia muʼa ʼo te fakatata ʼaia. 4 Neʼe kalaga te tagata ʼave logo ʼa te hau: “Hahaʼi ʼo te ʼu puleʼaga mo te ʼu lea kehekehe, koʼeni te fakatotonu ʼae ʼe fai atu: 5 ʼE kotou logo anai ki te pupuhi ʼo te fakatagi pupuhi, mo te ʼu faʼahiga puhi fagufagu kehekehe, ʼo feia mo te ta ʼo te kiʼi alepa, mo te ʼu faʼahiga meʼa faimaholo kauʼi uka pea mo te tagi ʼo te tahi ʼu meʼa faimaholo. Pea ʼe tonu anai ke kotou tuʼutuli ʼo atolasio ki te fakatata aulo ʼae neʼe fakatuʼu e te Hau ko Nepukanesa. 6 Kae ko ia ʼae ʼe mole tuʼutuli ʼo atolasio ki te fakatata ʼaia, ʼe li atu aipe ki te gutuʼumu kakaha.”+ 7 Neʼe logo leva te hahaʼi ʼo te ʼu puleʼaga mo te ʼu lea kehekehe ki te pupuhi ʼo te fakatagi pupuhi, mo te ʼu faʼahiga puhi fagufagu kehekehe, ʼo feia mo te ta ʼo te kiʼi alepa, mo te ʼu faʼahiga meʼa faimaholo kauʼi uka pea mo te tagi ʼo te tahi ʼu meʼa faimaholo. Neʼe natou tuʼutuli fuli ai ʼo atolasio ki te fakatata aulo ʼae neʼe fakatuʼu e te Hau ko Nepukanesa.

8 Pea neʼe ʼomai leva te kau Kaletea ki te hau ʼo tukugakoviʼi* te kau Sutea. 9 Neʼe natou ui ki te hau ko Nepukanesa: “Siʼomatou hau, ke ke maʼuli ʼo heʼe gata. 10 Neʼe ke fakatotonu ke tuʼutuli te tagata fuli ʼo atolasio ki te fakatata aulo. Pea ʼe tonu ke natou fai te faʼahi ʼaia moka natou logo ki te pupuhi ʼo te fakatagi pupuhi, mo te ʼu faʼahiga puhi fagufagu kehekehe, ʼo feia mo te ta ʼo te kiʼi alepa, mo te ʼu faʼahiga meʼa faimaholo kauʼi uka pea mo te tagi ʼo te tahi ʼu meʼa faimaholo. 11 Pea neʼe ke toe fakatotonu ke li ki te gutuʼumu kakaha ia ia ʼae ʼe mole tuʼutuli ʼo atolasio ki te fakatata ʼaia.+ 12 Kae siʼomatou hau, ʼe mole fakaʼapaʼapa ʼihi tagata Sutea kia koe. ʼE ko te ʼu tagata ʼae neʼe ke hinoʼi ke tokakaga ki te potu fenua ʼo Papiloni. ʼE ko Satalake, mo Mesake pea mo Apeteneko.+ ʼE mole natou tauhi ki ʼou ʼatua pea ʼe mole natou fia atolasio ki te fakatata aulo ʼae neʼe ke fakatuʼu.”

13 Neʼe kovi ʼosi leva te ita ʼo Nepukanesa pea neʼe ina fakatotonu ke ʼaumai ia Satalake, mo Mesake pea mo Apeteneko. Neʼe ʼave leva te ʼu tagata ʼaia kia ia. 14 Neʼe ui age e Nepukanesa kia natou: “Satalake, mo Mesake pea mo Apeteneko, ʼe moʼoni koa la ʼe mole kotou tauhi ki ʼoku ʼatua+ pea ʼe mole kotou fia atolasio ki te fakatata aulo ʼae neʼe au fakatuʼu? 15 Koia ʼe kotou logo anai ki te pupuhi ʼo te fakatagi pupuhi, mo te ʼu faʼahiga puhi fagufagu kehekehe, ʼo feia mo te ta ʼo te kiʼi alepa, mo te ʼu faʼahiga meʼa faimaholo kauʼi uka pea mo te tagi ʼo te tahi ʼu meʼa faimaholo. Pea kapau ʼe kotou lotolelei ʼo tuʼutuli pea mo atolasio ki te fakatata ʼae neʼe au fai, ʼe lelei ia. Kae kapau ʼe mole kotou fia atolasio ki ai, ʼe li atu aipe koutou ki te gutuʼumu kakaha. Pea ko te ʼatua fea ʼae ʼe feala anai ke ina haofaki koutou mai ʼoku nima?”+

16 Neʼe tali age e Satalake, mo Mesake pea mo Apeteneko ki te hau: “Hau ko Nepukanesa, ʼe mole ʼaoga ke tou palalau fualoa ki te faʼahi ʼaia. 17 Koia siʼomatou hau, kapau ʼe tonu ke li matou ki te gutuʼumu* kakaha, ʼe feala ke haofaki matou e te ʼAtua ʼae ʼe matou tauhi ki ai. ʼEi, ʼe feala ke ina haofaki matou mai ʼou nima!+ 18 Kae siʼomatou hau, ʼe tonu ke ke iloʼi ʼe mole matou tauhi anai ki ʼou ʼatua, peʼe ko te fakatata aulo ʼae neʼe ke fakatuʼu, tatau aipe pe ʼe mole haofaki matou e tomatou ʼAtua.”+

19 Neʼe kovi ʼosi ai te ita ʼo Nepukanesa kia Satalake, mo Mesake pea mo Apeteneko. Pea neʼe fetogi katoa tana aga* kia natou. Neʼe ina fakatotonu leva ke fakakakaha te gutuʼumu ke tuʼa fitu age te malohi ʼo tona vela ʼi te fai mahani. 20 Neʼe ina fakatotonu ki he ʼu tagata solia ʼe malolohi ʼaupito ʼo tana kautau ke natou haʼihaʼi ia Satalake, mo Mesake pea mo Apeteneko, ʼo li ki te gutuʼumu kakaha.

21 Koia neʼe haʼihaʼi ai te ʼu tagata ʼaia kae neʼe kei natou tui ʼonatou teu, mo ʼonatou tahi ʼu mutuʼi meʼa, pea mo ʼai ʼonatou pulupulu mo ʼonatou puloga. Pea neʼe li natou ki te gutuʼumu kakaha. 22 Neʼe mamafa ʼosi te fakatotonu ʼa te hau, pea neʼe malohi kehe te vela ʼo te gutuʼumu ʼo liu mamate ai te ʼu tagata ʼae neʼe natou li ia Satalake, mo Mesake pea mo Apeteneko. 23 Neʼe fetoki leva te ʼu tagata ʼaia ʼe toko tolu neʼe haʼihaʼi ki te loto gutuʼumu kakaha. Neʼe ko Satalake, mo Mesake pea mo Apeteneko.

24 Neʼe mataku leva te Hau ko Nepukanesa. Neʼe tuʼu ake aipe ki ʼoluga ʼo ui ki tana kau ʼaliki: “ ʼE mole koa la ko tagata ʼe toko tolu ʼae neʼe tou haʼihaʼi ʼo li ki te afi?” Neʼe natou tali age: “ ʼEi, siʼomatou hau.” 25 Neʼe ina toe ui age: “Koʼeni, ʼe au sio ki he ʼu tagata ʼe toko fa. ʼE natou feoloʼaki faʼifaʼitaliha ʼi te loto afi pea ʼe natou haohaoa pe. Pea ʼe hage te fa tagata ko he foha ʼo te ʼu ʼatua.”

26 Neʼe fakaovi leva ia Nepukanesa ki te matapa ʼo te gutuʼumu kakaha, ʼo ui: “Satalake, mo Mesake pea mo Apeteneko, ʼu tagata faifekau ʼa te ʼAtua Maʼoluga,+ kotou hu mai ki tuʼa ʼo kotou ʼomai ki heni!” Neʼe mavae leva ia Satalake, mo Mesake pea mo Apeteneko mai te loto afi. 27 Neʼe kua fakatahitahi ai te kau pule taki, mo te kau minisi, mo te ʼu kovana pea mo te kau ʼaliki ʼa te hau.+ Neʼe natou tokagaʼi ai neʼe mole pe la vela te sino ʼo te ʼu tagata ʼaia.+ Neʼe mole pe la vela honatou fuluʼi ʼulu, ʼo feia mo ʼonatou pulupulu, pea neʼe mole natou manu ʼahu.

28 Neʼe ui leva e Nepukanesa: “Ke vikiʼi te ʼAtua ʼo Satalake, mo Mesake pea mo Apeteneko.+ Neʼe ina fekauʼi mai tana ʼaselo pea neʼe ina haofaki ʼana tagata faifekau. Neʼe natou tuku tanatou falala kia te ia pea neʼe mole natou fakalogo ki taku fakatotonu. Pea neʼe mole natou fia tauhi peʼe atolasio ki he tahi age ʼatua, gata pe ki tonatou ʼAtua, tatau aipe pe neʼe feala ke natou mamate ai.+ 29 Ko te tupuʼaga la ʼaia ʼo taku fai te fakatotonu ʼaeni: Hahaʼi ʼo te ʼu puleʼaga fuli mo te ʼu lea fuli, ʼe tapu te palalau kovi ki te ʼAtua ʼo Satalake, mo Mesake pea mo Apeteneko. Kapau ʼe fai e he tahi ia te faʼahi ʼaia, ʼe taʼataʼaga liki anai pea ʼe fakaliliu anai tona ʼapi ko he fale mamaʼo ki te hahaʼi.* ʼE au fai te fakatotonu ʼaia koteʼuhi ʼe mole he ʼatua ʼe feala ke ina haofaki tana hahaʼi ohage ko te ʼAtua ʼaia.”+

30 Pea neʼe fakanofo leva e te hau ia Satalake, mo Mesake pea mo Apeteneko ki he ʼu tuʼulaga ʼe maʼoluga age,* ʼi te potu fenua ʼo Papiloni.+

4 “Koʼeni te logo ʼae ʼe fakaha e te Hau ko Nepukanesa ki te hahaʼi ʼo te ʼu puleʼaga fuli pea mo te ʼu lea fuli ʼae ʼe nonofo ʼi te kele katoa: Ke lahi tokotou tokalelei! 2 ʼE au fiafia ʼi te fakaha atu ia te ʼu fakailoga pea mo te ʼu gaue fakaofoofo ʼae neʼe fakahoko e te ʼAtua Maʼoluga maʼaku. 3 ʼE fakaofoofo ʼaupito ʼana fakailoga pea mo ʼana gaue! ʼE tuʼu tona puleʼaga ʼo heʼe gata pea ʼe tuʼu tana pule mai he taʼiake ki he tahi taʼiake.+

4 “Ko au ia Nepukanesa, neʼe au maʼuli fimalie ʼi toku fale hau pea mo maʼu koloa. 5 Neʼe au moemisi pea neʼe au mataku ai. ʼEi, neʼe au mataku ʼi taku sio ki ni pāki pea mo ni meʼa neʼe ha kae au takoto ʼi toku moeʼaga.+ 6 Koia neʼe au fakatotonu ai ke ʼaumai te kau popoto fuli ʼo Papiloni ke natou fakamahino mai taku moemisi.+

7 “Neʼe ʼomai leva te kau pelepitelo ʼae ʼe gaohi meʼa fakamanamana, mo te hahaʼi faifakakikite, mo te kau Kaletea* pea mo te kau sivi fetuʼu.+ Neʼe au fakamatala age taku moemisi kae neʼe mole natou lava fakamahino mai.+ 8 Neʼe haʼu leva ia Taniela. ʼE toe higoa ko Peletesasa+ ʼuhi ko toku ʼatua,+ pea ʼe nofo mo te laumalie ʼo te ʼu ʼatua maʼoniʼoni.+ Pea neʼe au fakamatala age te moemisi ʼaeni neʼe au fai:

9 “Peletesasa, ko koe te pule ʼo te kau pelepitelo ʼae ʼe gaohi meʼa fakamanamana.+ ʼE au iloʼi lelei pe ʼe ke nofo mo te laumalie ʼo te ʼu ʼatua maʼoniʼoni,+ pea ʼe mole faigataʼa kia koe te fakaha ʼo he meʼa fakalilo.+ Koia fakamahino mai te fakaʼuhiga ʼo te ʼu meʼa ʼae neʼe au sio ki ai ʼi taku moemisi.

10 “ ‘ ʼI te ʼu meʼa ʼae neʼe au sio ki ai ʼi toku moeʼaga, neʼe au sio ki he fuʼu ʼakau+ ʼi te lotomalie ʼo te kele. Neʼe maʼoluga ʼaupito.+ 11 Neʼe liliu leva te fuʼu ʼakau ʼaia ʼo lahi mo malohi, pea neʼe kaku tona tumutumu ki te lagi. Neʼe lava sisio ki ai te hahaʼi mai te ʼu potu taupotu ʼo te kele. 12 Neʼe matalelei ʼona lau pea neʼe lahi ʼona fua ʼo hokohoko fuli ai te tagata mo te ʼu manu. Pea neʼe olo te ʼu manu ʼo te vao ʼo fakamalumalu ai, pea neʼe fai ai e te ʼu manulele ʼonatou moeʼaga ʼi ʼona vaʼa. Neʼe maʼu e te ʼu meʼa maʼuli fuli tanatou meʼa kai mai te fuʼu ʼakau ʼaia.

13 “ ‘ ʼI te ʼu meʼa ʼaia neʼe ha mai kia au ʼi toku moeʼaga, neʼe au sio ai ki he tagata leʼo* ʼe maʼoniʼoni neʼe hifo mai te lagi.+ 14 Neʼe kalaga: “Kotou taʼaga te fuʼu ʼakau+ pea mo tuʼutuʼusi ʼona vaʼa. Kotou lulu ʼona vaʼa ke maluku ʼona lau pea mo fakaleta ʼona fua. Ke feholaki te ʼu manu mai te lalo fuʼu ʼakau ʼaia pea mo te ʼu manulele mai ʼona vaʼa. 15 Kae kotou tuku pe ʼi te kele te tafitoʼi ʼakau mo ʼona aka. Kotou tuku ai ʼi te vao pea kotou haʼihaʼi ʼaki ni lauʼi ukamea mo ni lauʼi kapa. Pea ke palapala ia ia ʼi te hahau, ʼi tana tuʼu ʼi te lotolotoiga ʼo te ʼu manu pea mo te vao ʼakau.+ 16 Ke liliu tona mafu* ko te mafu ʼo he manu. Pea ʼe tonu ke fakalaka+ he ʼu temi ʼe fitu.+ 17 ʼE kalagaʼi e te kau tagata leʼo te tonu ʼaia,+ ʼei, ʼe fakaha e te kau maʼoniʼoni te fakamau* ʼaia. ʼE iloʼi ai anai e te hahaʼi fuli, ʼe puleʼi e te Maʼoluga te ʼu puleʼaga ʼo te tagata.+ Pea ʼe natou toe iloʼi anai ʼe ina tuku te pule kia ia ʼae ʼe ina fia foaki ki ai, pea ʼe ina fakanofo ke pule ia te tagata ʼae ʼe malalo ʼosi.”

18 “ ‘Koʼena te moemisi ʼae neʼe au fai, e au ʼaeni ko te Hau ko Nepukanesa. Koia Peletesasa, fakamahino mai taku moemisi, koteʼuhi ʼe mole lava fakamahino mai e te kau popoto fuli ʼo toku puleʼaga.+ Kae ʼe ke lavaʼi he ʼe ke nofo mo te laumalie ʼo te ʼu ʼatua maʼoniʼoni.’

19 “Kae neʼe mole gu ia Taniela ʼae ʼe toe higoa ko Peletesasa,+ lolotoga he kiʼi temi. Neʼe mataku ʼi tana fakakaukauʼi te ʼu meʼa ʼaia.

“Neʼe ui age e te hau: ‘Peletesasa, ʼaua naʼa ke mataku ʼuhi ko te moemisi pea mo tona fakamahino.’

“Neʼe tali age e Peletesasa: ‘Siʼoku ʼaliki, ʼofa pe ke hoko tau moemisi kia natou ʼae ʼe fehihiʼa kia koe, pea ke hoko tona fakamahino ki ʼou fili.

20 “ ‘Neʼe ke sio ki he fuʼu ʼakau neʼe liliu ʼo lahi mo malohi, pea neʼe kaku tona tumutumu ki te lagi. Pea neʼe lava sisio ki ai te hahaʼi mai te ʼu potu fuli ʼo te kele.+ 21 Neʼe matalelei ʼona lau pea neʼe lahi ʼona fua ʼo hokohoko fuli ai te tagata mo te ʼu manu. Neʼe olo te ʼu manu ʼo te vao ʼo fakamalumalu ai, pea neʼe fai ai e te ʼu manulele ʼonatou moeʼaga ʼi ʼona vaʼa.+ 22 Siʼoku hau, ʼe ko koe te fuʼu ʼakau ʼaia, he ʼe kua ke liliu ʼo lahi mo malohi. ʼEi, kua kaku tou maʼoluga ki te lagi+ pea mo tau pule ki te ʼu potu taupotu ʼo te kele.+

23 “ ‘Pea siʼoku hau, neʼe ke toe sio ki he tagata leʼo ʼe maʼoniʼoni+ neʼe hifo mai te lagi ʼo ui: “Kotou taʼaga pea mo maumauʼi te fuʼu ʼakau. Kae kotou tuku pe ʼi te kele te tafitoʼi ʼakau mo ʼona aka ʼi te lotolotoiga ʼo te vao ʼakau. Pea kotou haʼihaʼi ʼaki ni lauʼi ukamea mo ni lauʼi kapa. Ke palapala ia ia ʼi te hahau, ʼi tana tuʼu ʼi te lotolotoiga ʼo te ʼu manu ʼo te vao, ʼo kaku ki te fakalaka ʼo he ʼu temi ʼe fitu.”+ 24 Siʼoku ʼaliki te hau, koʼeni tona fakamahino: ʼE fakaʼuhiga ki te ʼu meʼa ʼae neʼe fakatotonu e te Maʼoluga ke hoko kia koe. 25 ʼE kapu anai koe mai te hahaʼi pea ʼe ke nofo fakatahi anai mo te ʼu manu ʼo te vao. ʼE fafaga anai koe ʼaki te luna ohage pe ko te ʼu vitulo, pea ʼe ke palapala anai ʼi te hahau.+ Pea ʼe fakalaka+ anai he ʼu temi ʼe fitu,+ ʼo kaku ki tau hoki mahino ʼe puleʼi e te Maʼoluga te ʼu puleʼaga ʼo te tagata. Pea ʼe ina tuku te pule kia ia ʼae ʼe ina fia foaki ki ai.+

26 “ ‘Kae neʼe fakatotonu ke tuku pe te tafitoʼi ʼakau mo ʼona aka.+ Koia ʼe hoki liufaki atu anai tau pule fakahau, mo kapau kua ke mahino ʼe ko te ʼAtua ʼae ʼe pule mai te lagi. 27 Koia, siʼoku hau, ʼofa pe ke ke tali taku tokoni ʼaeni: Tuku tau agahala kae ke ke fai te meʼa ʼae ʼe lelei. Pea tuku tau agakovi kae ke ke manavaʼofa ki te kau masisiva. Pea ʼe lagi hoko atu anai tau maʼuli fimalie mo maʼu koloa.’ ”+

28 Neʼe hoko fuli leva te ʼu meʼa ʼaia ki te Hau ko Nepukanesa.

29 Hili mahina ʼe 12 ki tana moemisi, neʼe haʼele leva ʼi tona fuga fale ʼi Papiloni. 30 Pea neʼe ina ui: “ ʼE mole koa la ko Papiloni Lahi ʼaeni neʼe au laga ʼaki toku malohi ke liliu ko hoku nofoʼaga fakahau? Neʼe mole au laga koa la ke ha ai toku kololia ʼi toku ʼuhiga hau?”

31 Neʼe kei palalau te hau kae neʼe logo mai he leʼo mai te lagi ʼo ui: “Hau ko Nepukanesa, koʼeni te logo ʼae ʼe fakaha atu: ‘Kua toʼo mai ia koe tau pule fakahau,+ 32 pea ʼe kapu anai koe mai te hahaʼi. ʼE ke nofo fakatahi anai mo te ʼu manu ʼo te vao pea ʼe fafaga anai koe ʼaki te luna ohage pe ko te ʼu vitulo. Pea ʼe fakalaka anai he ʼu temi ʼe fitu, ʼo kaku ki tau hoki mahino ʼe puleʼi e te Maʼoluga te ʼu puleʼaga ʼo te tagata. Pea ʼe ina tuku te pule kia ia ʼae ʼe ina fia foaki ki ai.’ ”+

33 Neʼe hoko ai te ʼu folafola ʼaia kia Nepukanesa ʼi te moʼi temi pe ʼaia. Neʼe kapu ia ia mai te hahaʼi pea neʼe ina kai leva te luna ohage pe ko te ʼu vitulo. Neʼe palapala tona sino ʼi te hahau. Pea neʼe loloa leva tona lauʼulu ohage ko te ʼu fuluʼi akuila, pea neʼe hage ʼona paninia ko te ʼu pasikuku ʼo he manulele.+

34 “ ʼI te ʼosi ʼo te temi ʼaia,+ ko au ia Nepukanesa, neʼe au sio ki te lagi pea neʼe au toe maʼu toku ʼatamai. Neʼe au vikiʼi leva te Maʼoluga. ʼEi, neʼe au fakakololiaʼi mo vikiʼi ia Ia ʼae ʼe maʼuli ʼo heʼe gata, he ʼe tuʼu tana pule ʼo talu ai pea ʼe tuʼu tona puleʼaga mai he taʼiake ki he tahi taʼiake.+ 35 ʼE hage pe te hahaʼi fuli ʼo te kele ki ʼona mata ko ni meʼa noa. Pea ʼe ina fai te meʼa ʼae ʼe loto ki ai ki te foʼi kautau ʼo te ʼatu lagi pea mo te hahaʼi ʼo te kele. Pea ʼe mole lava taʼofi e he tahi te meʼa ʼae ʼe ina fakahoko*+ peʼe ui age ki ai: ‘Kotea ʼae neʼe ke fai?’+

36 “Neʼe au toe maʼu toku ʼatamai ʼi te temi pe ʼaia. Pea neʼe toe liufaki mai te kololia ʼo toku puleʼaga, mo toku tuʼulaga hau pea mo toku taulekaleka.+ Neʼe toe ʼomai te kau maʼu tuʼulaga pea mo taku kau ʼaliki ʼo kumi tokoni mai kia au. Neʼe au toe maʼu te pule fakahau pea neʼe tuku mai he kololia ʼe lahi age ʼi ʼae ʼo te temi muʼa.

37 “Koia ʼi te lakaga nei, ko au ia Nepukanesa, ʼe au vikiʼi mo fakakololiaʼi te Hau ʼo te lagi.+ ʼE moʼoni ʼana gaue fuli pea ʼe faitotonu ʼana aga fuli.+ Pea ʼe ina lava fakamalaloʼi ia natou ʼae ʼe fiameʼalahi.”+

5 Neʼe fai leva e te Hau ko Paletasa+ he kaitahi lahi ki te toko 1 000 ʼo tana kau ʼaliki. Pea neʼe inu vino ʼi ʼonatou muʼa.+ 2 Neʼe konahia ai ia Paletasa. Pea neʼe ina fakatotonu ke ʼaumai te ʼu ipu aulo mo te ʼu ipu siliva ʼae neʼe toʼo e tana tamai ko Nepukanesa mai te fale lotu ʼi Selusalemi.+ Neʼe fia inu ʼi ai ia Paletasa fakatahi mo tana kau ʼaliki, mo ʼana fafine pea mo ʼona tahi age ʼu ʼohoana. 3 Neʼe ʼaumai leva te ʼu ipu aulo ʼae neʼe toʼo ʼi te sagatualio* ʼo te fale ʼo te ʼAtua ʼi Selusalemi. Pea neʼe inu ʼi ai te hau, mo tana kau ʼaliki, mo ʼana fafine pea mo ʼona tahi age ʼu ʼohoana. 4 Neʼe natou inu te vino, pea neʼe natou vikiʼi ai te ʼu ʼatua ʼae neʼe faʼu ʼaki te aulo, mo te siliva, mo te kapa, mo te ukamea, mo te ʼakau pea mo te maka.

5 Pea fokifa pe, neʼe ha te nima ʼo he tagata pea neʼe ina tohi te kaupa ʼo te fale hau, ʼae ʼe tuʼu ʼi te faʼahi ʼae ʼe haga ki te tuʼulaga malama. Pea neʼe sio te hau ki te nima ʼae neʼe faitohi. 6 Neʼe lau tetea ai tona fofoga* he neʼe mataku ʼi tana fakakaukauʼi te ʼu meʼa ʼae neʼe sio ki ai.+ Neʼe lumaʼea ai ʼona vaʼe pea mo feʼiʼaki ʼona tuli.

7 Neʼe kalaga leva te hau ke ʼaumai te kau Kaletea,* mo te kau sivi fetuʼu pea mo te hahaʼi faifakakikite fakatemonio.+ Neʼe ina ui ki te kau popoto ʼo Papiloni: “Ko ia ʼae ka ina lau pea mo fakamahino mai te ʼu mataʼi tohi ʼaeni, ʼe fakatui anai ki ai he teu huʼa lotuma fakapoʼuli. Pea ʼe toe fakatau anai ki ai he kahoa aulo+ pea ʼe ina maʼu anai te tuʼulaga tolu ʼi te puleʼaga.”+

8 Neʼe ʼomai leva te kau popoto fuli ʼa te hau, kae neʼe mole natou lava lau pea mo fakamahino age ki te hau te ʼu mataʼi tohi ʼaia.+ 9 Koia neʼe mataku ʼaupito ai te Hau ko Paletasa, pea neʼe lau tetea ai tona fofoga. Pea neʼe mole iloʼi e tana kau ʼaliki he meʼa ke natou fai.+

10 Neʼe logo leva te fineʼaliki ki te ʼu palalau ʼa te hau pea mo tana kau ʼaliki. Koia neʼe hu ai ki te faʼahi ʼae neʼe fai ai te kaitahi ʼo ina ui: “Siʼoku hau, ke ke maʼuli ʼo heʼe gata. He koʼe kua lau tetea tou fofoga? ʼAua naʼa ke mataku. 11 ʼE ʼi ai te tagata* ʼi tou puleʼaga ʼe nofo mo te laumalie ʼo te ʼu ʼatua maʼoniʼoni. ʼI te temi ʼo tau tamai, neʼe iloa te tagata ʼaia he neʼe ina maʼu te ʼatamai malama, mo te fakasiosio poto pea mo te poto ʼae ʼe tatau mo te poto ʼo te ʼu ʼatua.+ Neʼe fakanofo ia ia e tau tamai, te Hau ko Nepukanesa ke pule ki te kau pelepitelo ʼae ʼe gaohi meʼa fakamanamana, mo te hahaʼi faifakakikite, mo te kau Kaletea* pea mo te kau sivi fetuʼu.+ ʼEi, siʼoku hau, neʼe fai e tau tamai te faʼahi ʼaia. 12 Neʼe fakaofoofo te ʼatamai ʼo Taniela, ʼae neʼe toe fakahigoaʼi e te hau ko Peletesasa.+ Neʼe ina maʼu mo te ʼatamai malama pea mo te fakasiosio poto ʼo feala ai hana fakamahino te ʼu moemisi, mo te ʼu matetea. Pea neʼe toe feala ai ke ina maʼu he puleʼaki ki te ʼu aluʼaga faigataʼa.+ Koia ke ke pauʼi mai ia Taniela pea ʼe ina fakamahino atu anai te ʼu mataʼi tohi.”

13 Neʼe ʼaumai leva ia Taniela ki te hau. Pea neʼe fehuʼi age e te hau: “ ʼE ko koe koa ia Taniela, ʼae ʼe kau ʼi te kau popula ʼo Suta+ pea neʼe ʼaumai e siʼaku tamai, te hau?+ 14 Neʼe au maʼu logo ʼe ke nofo mo te laumalie ʼo te ʼu ʼatua.+ Pea ʼe ke iloa he ʼe ke maʼu te ʼatamai malama, mo te fakasiosio poto pea mo he poto ʼe fakaofoofo.+ 15 Neʼe ʼaumai te kau popoto pea mo te hahaʼi faifakakikite ke natou lau pea mo fakamahino mai te ʼu mataʼi tohi. Kae neʼe mole natou lavaʼi te faʼahi ʼaia.+ 16 Neʼe au maʼu logo ʼe ke lava fakaha he ʼu meʼa fakalilo+ pea mo maʼu he puleʼaki ki te ʼu aluʼaga faigataʼa. Koia kapau ʼe ke lava lau pea mo fakamahino mai te ʼu mataʼi tohi, ʼe fakatui anai he teu huʼa lotuma fakapoʼuli kia koe. Pea ʼe toe fakatau anai kia koe he kahoa aulo, pea ʼe ke maʼu anai te tuʼulaga tolu ʼi te puleʼaga.”+

17 Neʼe tali age e Taniela ki te hau: “Siʼoku hau, ke ke taupau ʼou meʼa ʼofa peʼe ke foaki ki ʼihi atu hahaʼi. Kae ʼe au lau pea mo fakamahino atu pe anai te meʼa ʼae ʼe tohi. 18 Siʼoku hau, neʼe foaki e te ʼAtua Maʼoluga ki tau tamai ko Nepukanesa te pule, mo te malohi, mo te fakaʼapaʼapa pea mo te kololia.+ 19 Pea neʼe matataku ia ia te hahaʼi fuli ʼo te ʼu puleʼaga kehekehe mo te ʼu lea kehekehe, ʼuhi ko te malohi ʼae neʼe foaki ki ai e te ʼAtua.+ Neʼe ina matehi peʼe tuku ke maʼuli ia ia ʼae neʼe loto ki ai. Pea neʼe ina hikihiki peʼe fakamalaloʼi ia ia ʼae neʼe loto ki ai.+ 20 Kae neʼe lotolahi leva pea mo uigataʼa ʼo falala pe kia ia totonu.+ Koia neʼe fakahifo ai ia ia mai tona hekaʼaga fakahau pea neʼe mole kei fakaʼapaʼapaʼi. 21 Neʼe kapu leva mai te hahaʼi, pea neʼe hage tona mafu ko te mafu ʼo he manu. Pea neʼe nofo fakatahi mo te ʼu asino ʼo te vao. Neʼe fafaga ia ia ʼaki te luna ohage pe ko te ʼu vitulo, pea neʼe palapala tona sino ʼi te hahau. Pea neʼe hoko te ʼu aluʼaga ʼaia ʼo kaku ki tana hoki mahino ʼe puleʼi e te ʼAtua Maʼoluga te ʼu puleʼaga ʼo te tagata, pea ʼe ina tuku te pule kia ia ʼae ʼe ina fia foaki ki ai.+

22 “Kae Paletasa, neʼe mole ke fakamalaloʼi ifo ia koe ʼae ko tona foha, logo la tau iloʼi te ʼu faʼahi fuli ʼaia. 23 Kailoa ia, kae neʼe ke agatuʼu ki te ʼAliki ʼo te lagi+ pea neʼe ke fakatotonu ke ʼaumai te ʼu ipu ʼo tona fale.+ Pea neʼe ke inu ʼi ai te vino, fakatahi mo tau kau ʼaliki, mo ʼau fafine pea mo ʼou tahi age ʼu ʼohoana. Pea neʼe kotou vikiʼi ni ʼatua neʼe faʼu ʼaki te siliva, mo te aulo, mo te kapa, mo te ukamea, mo te ʼakau pea mo te maka. ʼE ko he ʼu ʼatua ʼe mole pe la natou sisio, ʼe mole pe la natou logo, pea ʼe mole pe la natou iloʼi he meʼa.+ Kae neʼe mole ke fakakololiaʼi te ʼAtua ʼae ʼe pule ki tou maʼuli+ pea mo te ʼu meʼa fuli ʼae ʼe ke fai. 24 Ko te tupuʼaga la ʼaia ʼo tana tuku ke ha he nima ke ina tohi te ʼu mataʼi tohi ʼi te kaupa.+ 25 Koʼeni te meʼa ʼae ʼe tohi: MENE, MENE, TEKELE pea mo PALESINI.

26 “Pea koʼeni te fakaʼuhiga ʼo te ʼu kupu ʼaia: MENE: neʼe lau e te ʼAtua te ʼu ʼaho ʼo tou puleʼaga pea kua ina fakagata.+

27 “TEKELE: neʼe fua ia koe ʼi he meʼa fua pea ʼe ke maʼamaʼa noa.

28 “PELESI: neʼe vaevae tou puleʼaga pea mo foaki ki te kau Metia mo te kau Pelesia.”+

29 Koia neʼe fakatotonu ai e Paletasa ke fakatui kia Taniela he teu huʼa lotuma fakapoʼuli pea ke fakatau ki ai he kahoa aulo. Pea neʼe tala ʼi te fenua ʼe ina maʼu anai te tuʼulaga tolu ʼi te puleʼaga.+

30 Neʼe matehi leva te hau Kaletea ko Paletasa, ʼi te po pe ʼaia.+ 31 Pea neʼe maʼu leva e Taliusi,+ te tagata Metia ia te puleʼaga ʼaia, ʼi tona taʼu 62.

6 Neʼe fakatotonu leva e Taliusi ke fakanofo he kau pule taki* ʼe toko 120 ʼi te puleʼaga katoa.+ 2 Neʼe pule kia natou ni tagata maʼu tuʼulaga ʼe toko tolu, pea neʼe kau ai ia Taniela.+ Neʼe natou sivi te gaue ʼa te kau pule taki,+ ke ʼaua naʼa kakaʼi te hau. 3 Pea neʼe maʼoluga age ia Taniela ʼi te tahi ʼu tagata maʼu tuʼulaga pea mo te kau pule taki, he neʼe fakaofoofo tona ʼatamai.+ Pea neʼe fia fakanofo ia ia e te hau ke pule ki te puleʼaga katoa.

4 ʼI te temi ʼaia, neʼe kumi ai e te kau maʼu tuʼulaga pea mo te kau pule taki ni aluʼaga ke tukugakoviʼi ai ia Taniela. Neʼe natou fia valoki tana faʼahiga tokaga ki te puleʼaga. Kae neʼe mole natou maʼu he aluʼaga ke tukugakoviʼi ai ia ia. Neʼe mole maʼu he agakaka ia Taniela he neʼe tuha mo te falala. ʼEi, neʼe mole maʼu ia ia he hala peʼe ko he agakaka. 5 Koia neʼe feuiʼaki e te ʼu tagata ʼaia: “ ʼE mole tou maʼu anai he aluʼaga ke tukugakoviʼi ai ia Taniela. Kae ʼe tonu ke tou kumi he aluʼaga ʼe ʼi ai hona pikipikiga mo te lao ʼo tona ʼAtua.”+

6 Neʼe olo fakatahi leva te kau maʼu tuʼulaga pea mo te kau pule taki ki te hau, ʼo ui age ki ai: “Hau ko Taliusi, ke ke maʼuli ʼo heʼe gata. 7 Neʼe felogoi fuli te kau maʼu tuʼulaga ʼo te puleʼaga, mo te kau minisi, mo te kau pule taki, mo te kau faitokoni ʼa te hau pea mo te ʼu kovana. Pea ʼe matou kole atu ke ke tohi te fakatotonu ʼaeni pea ke ke fakamaʼua ke mulimuli ki ai te hahaʼi fuli: Siʼomatou hau, ʼe tonu anai ke faikole ʼateaina pe te hahaʼi kia koe lolotoga ʼaho ʼe 30. Kapau ʼe faikole he tahi ki he tahi age ʼatua, peʼe ki he tahi age tagata, ʼe li anai ki te luo ʼo te ʼu laione.+ 8 Koia, siʼomatou hau, ʼofa pe ke ke fakamoʼoni ki te fakatotonu ʼaia ʼo ke tohi ai tou higoa.+ ʼE mole feala anai ke fetogi, ʼo mulimuli pe ki te lao ʼa te kau Metia mo te kau Pelesia, ʼae ʼe mole feala ke molehi.”+

9 Neʼe fakamoʼoni ai leva e te Hau ko Taliusi ia te fakatotonu ʼaia.

10 Neʼe iloʼi leva e Taniela kua fakamoʼoni e te hau te fakatotonu ʼaia. Koia neʼe foimo alu ai kio ia. Neʼe tuʼu tona koga fale ʼi te fuga fale pea neʼe ava te ʼu matapa fakamalama ʼae ʼe haga ki Selusalemi.+ Pea neʼe tuʼutuli ifo ai ʼo faikole pea mo fakavikiviki ki tona ʼAtua. Neʼe ina fai te faʼahi ʼaia tuʼa tolu ʼi te ʼaho, ohage pe ko tana fai mahani ʼi muʼa atu. 11 Neʼe hufi leva te fale ʼo Taniela e ʼona fili. Pea neʼe natou maʼu atu ia ia ʼe faikole ki tona ʼAtua pea mo kole mamahi ia tona manavaʼofa.

12 Neʼe natou olo leva ki te hau ʼo fakamanatuʼi age te tapu ʼae neʼe ina fai. Neʼe natou ui age: “Siʼomatou hau, kua ke fakamoʼoni ki te fakatotonu ʼaeni: ʼE tonu anai ke faikole ʼateaina pe te hahaʼi kia koe lolotoga ʼaho ʼe 30. Pea kapau ʼe faikole he tahi ki he tahi age ʼatua, peʼe ki he tahi age tagata, ʼe li anai ki te luo ʼo te ʼu laione.” Neʼe tali age e te hau: “ ʼEi, ʼe moʼoni te faʼahi ʼaia. ʼE mulimuli pe ki te lao ʼa te kau Metia mo te kau Pelesia, ʼae ʼe mole feala ke molehi.”+ 13 Neʼe natou ui atu aipe ki te hau: “Siʼomatou hau, ʼe mole fakaʼapaʼapa kia koe ia Taniela, ʼae ʼe kau ʼi te kau popula ʼo Suta.+ Pea ʼe mole mulimuli ki te fakatotonu ʼae neʼe ke fakamoʼoni ki ai, he ʼe faikole tuʼa tolu ʼi te ʼaho.”+ 14 Neʼe lotomamahi ʼaupito ai te hau ʼi tana logo ki te ʼu palalau ʼaia. Pea neʼe ina kumi he puleʼaki ke tokoni ai kia Taniela. Neʼe faiga malohi ke ina haofaki ia ia, ʼo kaku ki te to ʼo te laʼa. 15 Neʼe toe olo fakatahi leva te ʼu tagata ʼaia ki te hau, ʼo ui age ki ai: “Siʼomatou hau, ke ke manatuʼi ʼe mole feala ke fetogi he fakatotonu peʼe ko he tapu neʼe fakamoʼoni ki ai he hau, ʼo mulimuli pe ki te lao ʼa te kau Metia mo te kau Pelesia.”+

16 Neʼe fakatotonu leva e te hau ke ʼaumai ia Taniela, pea neʼe li ki te luo ʼo te ʼu laione.+ Pea neʼe ina ui age kia Taniela: “ ʼE haofaki anai koe e tou ʼAtua, ʼae ʼe ke tauhi tuʼumaʼu ki ai.” 17 Hili ʼaia, neʼe ʼaumai leva he foʼi maka ʼo pupunu ʼaki te luo. Neʼe fakailoga leva e te hau te foʼi maka ʼaia ʼaki tona mama pea mo te mama ʼo tana kau ʼaliki. Koia neʼe mole kei feala ai ke fetogi te tonu ʼae neʼe fai ʼo ʼuhiga mo Taniela.

18 Neʼe toe liliu leva te hau ki tona fale hau. Neʼe sesunio ʼi te po katoa ʼaia pea neʼe mole loto ki he faʼahiga fakafiafia.* Pea neʼe mole mamoe. 19 Neʼe tuʼu ake leva te hau ʼi te kua mafoa ʼo te ʼaho, pea neʼe alu fakavilivili ki te luo ʼo te ʼu laione. 20 Pea neʼe pauʼi kia Taniela ʼi tana fakaovi atu ki te luo, pea neʼe ha ʼi tona leʼo te mamahi ʼo tona loto. Neʼe ina ui age: “Taniela, ia koe ʼae ko te tagata faifekau ʼa te ʼAtua maʼuli. Neʼe lava haofaki koa koe mai te ʼu laione e tou ʼAtua ʼae ʼe ke tauhi tuʼumaʼu ki ai?” 21 Neʼe tali atu aipe e Taniela ki te hau: “Siʼoku hau, ke ke maʼuli ʼo heʼe gata. 22 Neʼe fekauʼi mai e toku ʼAtua tana ʼaselo pea neʼe ina mapunuʼi te gutu ʼo te ʼu laione.+ ʼE mole hoku lavea he ʼe ina iloʼi ʼe mole ʼi ai haku hala.+ Pea siʼoku hau, neʼe mole au fai he meʼa ʼe kovi kia koe.”

23 Neʼe fiafia ʼaupito ai te hau pea neʼe ina fakatotonu ke toho ake ia Taniela mai te luo. Neʼe toho ake leva ia Taniela mai ai, pea neʼe mole pe la hona lavea, he neʼe falala ki tona ʼAtua.+

24 Pea neʼe fakatotonu e te hau ke ʼaumai te ʼu tagata ʼae neʼe natou tukugakoviʼi ia* Taniela. Pea neʼe li natou ki te luo ʼo te ʼu laione, ʼo feia mo ʼonatou foha pea mo ʼonatou ʼohoana. Neʼe heʼeki natou kaku pe la ki te takele ʼo te luo kae kua ʼohofi natou ia e te ʼu laione ʼo fasifasi ai ʼonatou hui fuli.+

25 Neʼe faitohi leva ia te Hau ko Taliusi ki te hahaʼi ʼo te ʼu puleʼaga fuli mo te ʼu lea fuli ʼae neʼe nonofo ʼi te kele katoa.+ Koʼeni te logo ʼae neʼe ina tohi: “Ke lahi tokotou tokalelei! 26 Pea koʼeni taku fakatotonu: ʼE tonu ke manavasiʼi mo fakaʼapaʼapa te hahaʼi ʼo toku puleʼaga katoa ki te ʼAtua ʼo Taniela.+ ʼE ko ia te ʼAtua maʼuli pea ʼe maʼuli ʼo heʼe gata. ʼE mole maumauʼi anai tona puleʼaga ʼi he temi, pea ʼe tuʼu anai tana pule* ʼo talu ai.+ 27 ʼE tokoni+ ki tana hahaʼi pea mo haofaki natou, pea ʼe ina fakahoko he ʼu fakailoga mo he ʼu gaue fakaofoofo ʼi te lagi mo te kele.+ ʼEi, ʼe ko ia ʼae neʼe ina haofaki ia Taniela mai te ʼu pasikuku ʼo te ʼu laione.”

28 Neʼe maʼuli fimalie ia Taniela ʼi te puleʼaga ʼo Taliusi+ pea mo te puleʼaga ʼo Siliusi, te tagata Pelesia.+

7 ʼI te ʼuluaki taʼu ʼo te pule ʼa Paletasa,+ te Hau ʼo Papiloni, neʼe fai ai e Taniela he moemisi. Pea neʼe ha age ki ai ni meʼa ʼi tana takoto ʼi tona moeʼaga.+ Ki muli age, neʼe ina tohi tana moemisi ʼaia.+ ʼEi, neʼe ina tohi te ʼu meʼa fuli ʼaia. 2 Neʼe ui e Taniela:

“Neʼe ha mai kia au ni meʼa ʼi te poʼuli. Pea koʼeni, neʼe au sio ki ni tuʼani matagi lalahi ʼe fa ʼo te lagi ʼe agi ʼo fakahou te tai lahi.+ 3 Pea neʼe hake ake mai te tai ni manu lalahi ʼe fa.+ Neʼe tahi alu pe te manu mo tona agaaga.

4 “Neʼe hage te ʼuluaki manu ko he laione,+ kae neʼe ʼi ai ʼona pakakauʼi akuila.+ Neʼe au haga sioʼi pea neʼe taʼaki ʼona pakakau. Neʼe hiki ake leva ia ia ke tuʼu vaʼe lua, ohage ko he tagata. Pea neʼe foaki leva ki ai te mafu ʼo he tagata.

5 “Pea koʼeni, neʼe hage te lua manu ko he uluso.+ Neʼe tuʼu fakafahaʼi pea neʼe ina ʼuʼusi ʼi tona gutu ni hui vakavaka ʼe tolu. Pea neʼe ui age ki ai: ‘Haʼu ʼo kai lahi te kanoʼi manu.’+

6 “Hili ʼaia, neʼe au haga sioʼi pe, pea koʼeni, neʼe hage te tahi manu ko he leopa.+ Kae neʼe ʼi ai ʼona pakakau ʼe fa ʼi tona tuʼa neʼe hage ko ni pakakau ʼo he manulele. Neʼe toe ʼi ai mo ʼona foʼi ʼulu ʼe fa+ pea neʼe foaki ki ai te pule.

7 “Neʼe au haga sioʼi leva te ʼu meʼa ʼae neʼe ha mai kia au ʼi te poʼuli, pea neʼe au sio ki te fa manu. Neʼe fakamataku mo malohi ʼaupito pea neʼe ʼi ai ʼona nifo ukamea lalahi. Neʼe ina kai mo maumauʼi ia meʼa fuli ʼi ʼona tafaʼaki, pea neʼe ina malamalaki te ʼu meʼa ʼae neʼe kei toe.+ Neʼe kehe ia ʼi te ʼu ʼuluaki manu pea neʼe ʼi ai ʼona tala ʼe hogofulu. 8 Neʼe au sioʼi te ʼu tala ʼaia pea koʼeni, neʼe homo ake he tahi kiʼi tala+ ʼi te ʼu tala ʼaia. Kae neʼe taʼaki te ʼu tala ʼe tolu. Pea koʼeni, neʼe ʼi ai te ʼu mata ʼo te kiʼi tala ʼaia ʼe hage ko te ʼu mata ʼo he tagata, pea mo tona gutu neʼe palalau fiameʼameʼa.+

9 “Neʼe au haga sioʼi pea neʼe fakatuʼu ni hekaʼaga fakahau. Neʼe heka+ leva te Matuʼa ʼo Te ʼu ʼAho.+ Neʼe hihina ʼona mutuʼi meʼa ohage ko te nive+ pea neʼe hina ʼona fuluʼi ʼulu ohage ko te fuluʼi ovi. Neʼe hage tona hekaʼaga fakahau ko te ʼu uloʼi afi, pea neʼe hage te ʼu teka ʼo tona hekaʼaga fakahau ko he afi kakaha.+ 10 Neʼe tafe mai ai he vai tafe afi. Neʼe tauhi te toko lauʼi afe mo afe* kia te ia+ pea neʼe tutuʼu te toko teau miliona ʼi ʼona muʼa.+ Neʼe kamata ai te faifakamau+ pea neʼe avahi leva ni tohi.

11 “Neʼe au haga sioʼi ʼuhi ko te logo kovi ʼo te ʼu palalau fiameʼameʼa ʼa te tala.+ Pea neʼe au sio ki te matehi ʼo te manu pea mo te li ʼo tona sino ki te afi ke tutu ai. 12 Pea neʼe toʼo te pule ʼae neʼe maʼu e te tahi ʼu manu.+ Kae neʼe tuku pe ke hoko atu ʼonatou maʼuli ʼi he temi.

13 “Pea neʼe au haga sioʼi te ʼu meʼa ʼae neʼe ha mai kia au ʼi te poʼuli. Neʼe au sio leva ki he tahi neʼe hage ko he foha ʼo he tagata neʼe haʼu ʼi te ʼu ʼao.+ Neʼe fakagafua age ke alu ki te Matuʼa ʼo Te ʼu ʼAho+ pea neʼe ʼave ia ia ki ai. 14 Neʼe foaki age te pule,+ mo te fakaʼapaʼapa+ pea mo he puleʼaga, ke tauhi fuli ki ai te hahaʼi ʼo te ʼu puleʼaga mo te ʼu lea kehekehe.+ ʼE tuʼu anai tana pule ʼo talu ai, ʼei, ʼe heʼe gata anai. Pea ʼe mole pulihi anai tona puleʼaga.+

15 “Pea ko au ia Taniela, neʼe au lotohoha ʼaupito, he neʼe au mataku ʼi te ʼu meʼa ʼae neʼe ha mai kia au.+ 16 Neʼe au fakaovi leva ki he tahi neʼe tuʼu ai. Neʼe au kole age ke ina fakaha mai te fakaʼuhiga moʼoni ʼo te ʼu meʼa fuli ʼaia. Pea neʼe ina tali taku kole ʼo ina fakamahino mai:

17 “ ‘Ko te ʼu manu lalahi ʼaia ʼe fa,+ ʼe ko ni hau ʼe toko fa ʼe ʼomai anai mai te kele.+ 18 Kae ʼe maʼu anai e te kau maʼoniʼoni ʼa te Maʼoluga ʼAupito*+ ia te puleʼaga.+ ʼEi, ʼe natou maʼu anai+ ʼo talu ai.’

19 “Neʼe lahi taku fia mahino ki te fa manu, ʼae neʼe makehe ʼi te tahi ʼu manu. Neʼe fakamataku ʼaupito ʼuhi ko ʼona nifo ukamea pea mo ʼona pasikuku kapa. Neʼe ina kai mo maumauʼi ia meʼa fuli ʼi ʼona tafaʼaki, pea neʼe ina malamalaki te ʼu meʼa ʼae neʼe kei toe.+ 20 Pea neʼe lahi taku fia mahino ki te ʼu tala ʼe hogofulu+ ʼae ʼi tona foʼi ʼulu. Neʼe toe lahi taku fia mahino ki te tahi tala ʼae neʼe homo ake ai, pea neʼe fetoki ai te ʼu tala ʼe tolu ʼi ʼona muʼa.+ Neʼe ʼi ai ʼona mata pea mo tona gutu neʼe palalau fiameʼameʼa. Pea neʼe hage ia neʼe lahi age te tala ʼaia ʼi te ʼu tala ʼae.

21 “Neʼe au haga sioʼi pea neʼe tauʼi leva e te tala ʼaia te kau maʼoniʼoni. Pea neʼe malohi age ia natou,+ 22 ʼo kaku ki te haʼu ʼa te Matuʼa ʼo Te ʼu ʼAho+ ʼo fai he fakamau neʼe iku lelei ki te kau maʼoniʼoni ʼa te Maʼoluga ʼAupito.*+ Pea neʼe hoko mai leva te temi ʼae kua fakatuʼutuʼu ke maʼu e te kau maʼoniʼoni ia te puleʼaga.+

23 “Koʼeni te fakamahino ʼae neʼe fakaha mai: ‘Ko te fa manu ʼe ko te fa puleʼaga. ʼE ha anai ʼi te kele pea ʼe kehe age anai ʼi te ʼu puleʼaga fuli. ʼE ina kai, mo malamalaki pea mo maumauʼi anai te kele katoa.+ 24 Ko te ʼu tala ʼe hogofulu ʼe ko ni hau ʼe hogofulu ʼe ʼomai anai mai te puleʼaga ʼaia. Pea ʼe hoa mai anai kia natou ʼaia he tahi hau. ʼE kehe age anai ʼi te ʼu ʼuluaki hau, pea ʼe ina fakamalaloʼi anai he ʼu hau ʼe tolu.+ 25 ʼE palalau kovi anai ki te Maʼoluga+ pea ʼe ina fakatagaʼi tuʼumaʼu pe anai te kau maʼoniʼoni ʼa te Maʼoluga ʼAupito.* ʼE ina fakatuʼutuʼu anai ke ina fetogi te ʼu temi mo te lao. Pea ʼe tuku anai te kau maʼoniʼoni ki ʼona nima lolotoga he temi, mo he ʼu temi pea mo he vaeluaʼi temi.*+ 26 Kae neʼe fai leva te fakamau. Pea neʼe toʼo te pule ʼa te hau ʼaia ke feala hona pulihi pea mo fakaʼauha katoa.+

27 “ ‘Pea neʼe foaki te puleʼaga, mo te pule pea mo te malohi ʼo te ʼu puleʼaga ʼo te kele katoa, ki te hahaʼi maʼoniʼoni ʼa te Maʼoluga ʼAupito.*+ ʼE tuʼu anai tonatou puleʼaga ʼo heʼe gata,+ pea ʼe tauhi mo fakalogo anai te ʼu puleʼaga fuli kia natou.’

28 “Ko te gataʼaga ʼaia ʼo te ʼu meʼa ʼae neʼe au logo mo sio ki ai, ia au ʼaeni ko Taniela. Pea neʼe au mataku ʼaupito ʼi taku fakakaukauʼi te ʼu meʼa ʼaia, pea neʼe lau tetea ai toku fofoga.* Kae neʼe au taupau pe te ʼu meʼa ʼaia ʼi toku loto.”

8 Neʼe au sio ia au ʼaeni ko Taniela ki ni meʼa neʼe ha, ʼi te tolu taʼu ʼo te pule ʼa te Hau ko Paletasa.+ Pea neʼe kehe age ia ʼi te ʼu meʼa ʼae neʼe ha mai kia au ʼi muʼa atu.+ 2 Neʼe au haga sioʼi, pea neʼe au tokagaʼi neʼe au nofo ʼi Suse,+ te kolo tau,* ʼae ʼe tuʼu ʼi te potu fenua ʼo Elame.+ Pea neʼe au toe sio ai neʼe au tuʼu ovi ʼi he vai tafe, ko te Ulaia. 3 Neʼe hiki ake ʼoku mata pea neʼe au sio ki he ovi tagata.+ Neʼe tuʼu ʼi te muʼa vai tafe pea neʼe ʼi ai ʼona tala ʼe lua.+ Neʼe ko ni tala lalahi kae neʼe lahi age te tala ʼae neʼe homo fakamuli.+ 4 Pea neʼe au sio ki te ʼohofi e te ovi tagata ʼona fili ʼi te potu uesite, mo te potu noleto pea mo te potu saute. Neʼe mole lava tauʼi ia ia e te ʼu manu ʼo te vao, pea neʼe mole feala ki he tahi ke ina haofaki natou mai ai.+ Neʼe ina fai te meʼa ʼae neʼe ina leleiʼia pea neʼe fiameʼalahi.

5 Neʼe au haga sioʼi pea koʼeni, neʼe haʼu he tao tagata+ mai te potu uesite.* Neʼe fakalaka ʼi te fuga kele katoa. Neʼe ʼi ai te tala ʼi ʼona vahaʼa mata, pea neʼe ʼasi lelei te tala ʼaia.+ 6 Neʼe alu ki te ovi tagata ʼae neʼe tuʼu ʼi te muʼa vai tafe pea neʼe ʼi ai ʼona tala ʼe lua. Neʼe lele ki ai mo hona toe ita lahi.

7 Neʼe au sio ki tana fakaovi ki te ovi tagata pea neʼe kovi ʼosi tona ita ki ai. Neʼe ina ʼohofi te ovi tagata ʼaia pea mo fasiʼi ʼona tala ʼe lua. Pea neʼe mole maʼu leva e te ovi tagata he malohi ke ina tauʼi ia ia. Neʼe li ia ia e te tao tagata ki te kele ʼo ina malamalaki. Pea neʼe mole feala ki he tahi ke ina haofaki te ovi tagata ʼaia.

8 Pea neʼe fiameʼalahi te tao tagata. Kae neʼe fasiʼi leva tona tala ʼi tana kua liliu ʼo malohi. Pea neʼe homo ake ni tala ʼe fa ʼo fetogi ia ia. Neʼe ʼasi lelei te ʼu tala ʼaia, ʼo haga ki te ʼu potu taupotu ʼe fa ʼo te kele.*+

9 Neʼe homo ake he kiʼi tala veliveli mai he tala ʼo te ʼu tala ʼaia. Pea neʼe lahilahi ake ʼo haga ki te potu saute, mo te potu esite* pea mo te Fenua Taulekaleka.+ 10 Neʼe lahilahi ake ʼo kaku ki te foʼi kautau ʼo te ʼatu lagi. Pea neʼe ina fakato ifo ki te kele ʼihi ʼo te foʼi kautau ʼaia pea mo ni fetuʼu, pea neʼe ina malamalaki. 11 Neʼe toe fiameʼalahi ki te Tama ʼAliki ʼo te foʼi kautau ʼaia. Pea neʼe mole kei fai te sakilifisio ʼae ʼe tonu ke momoli tuʼumaʼu ki te Tama ʼAliki.* Pea neʼe holoʼi ai te sagatualio ʼae neʼe Ina fakatuʼu malohi.+ 12 Neʼe tuku te foʼi kautau ʼaia ki te tala ʼuhi ko te talagataʼa. Pea neʼe toe gata ai leva te fai ʼo te sakilifisio ʼae ʼe tonu ke momoli tuʼumaʼu. Neʼe toe li e te tala ʼaia te moʼoni ki te kele. Pea neʼe iku lelei te ʼu meʼa ʼae neʼe ina fai.

13 Pea neʼe au logo ki te palalau ʼa he ʼaselo, pea neʼe fehuʼi age e te tahi ʼaselo: “ ʼE fualoa anai koa te ʼu meʼa ʼaia neʼe ha, ia te sakilifisio ʼae ʼe tonu ke momoli tuʼumaʼu, mo te talagataʼa ʼae ʼe iku ki te maumau,+ pea mo te malamalaki ʼo te koga meʼa taputapu mo te foʼi kautau?” 14 Pea neʼe ina tali mai: “ ʼE hoko anai ia afiafi mo uhu ʼe 2 300. Pea ʼe toe fakatuʼu moʼoni anai te koga meʼa taputapu ʼaia ohage pe ko tona fakatuʼutuʼu ki ai.”

15 Pea neʼe au sioʼi e au ʼaeni ko Taniela ki te ʼu meʼa ʼae neʼe ha pea neʼe au fia mahino ki ai. Pea fokifa pe neʼe au sio ki he tahi neʼe tuʼu ʼi ʼoku muʼa pea neʼe hage ko he tagata. 16 Neʼe au logo leva ki te leʼo ʼo he tagata mai te Ulaia.+ Pea neʼe kalaga: “Kapeliele,+ fakamahino age te meʼa ʼae neʼe sio ki ai.”+ 17 Koia neʼe fakaovi mai ai ki te faʼahi ʼae neʼe au tuʼu ai. Kae neʼe au mataku ʼaupito, pea neʼe au punou mo tulolo ki te kele ʼi tana tau mai. Neʼe ina ui mai: “Foha ʼo te tagata, ʼe tonu ke ke iloʼi ʼe hoki hoko anai te ʼu meʼa ʼae neʼe ha ʼi te temi fakaʼosi.”+ 18 Neʼe au mate moe leva ʼo haga toku fofoga ki te kele, kae neʼe kei palalau mai. Neʼe fa mai kia au pea neʼe ina fakatuʼu ake au ʼi te faʼahi pe ʼae neʼe au nofo ai.+ 19 Pea neʼe ina ui mai: “ ʼE au fakamahino atu anai te ʼu meʼa ʼae ka hoko ʼi te temi fakaʼosi ʼo te hauhau ʼo* te ʼAtua. ʼEi, ʼe hoko anai te ʼu meʼa ʼaia ʼi te temi ʼae kua ʼosi fakatuʼutuʼu ki ai, ia te temi fakaʼosi.+

20 “ ʼE fakata e te ovi tagata ʼae neʼe ke sio ki ai mo ʼona tala ʼe lua, ia te ʼu hau ʼo Metia mo Pelesia.+ 21 Pea ʼe fakata e te tao tagata ʼae ʼe fulufulu ia te hau ʼo Keleka,+ pea ʼe fakata e te tala lahi ʼae neʼe tuʼu ʼi ʼona vahaʼa mata ia te ʼuluaki hau.+ 22 Neʼe fasiʼi te tala ʼaia pea neʼe homo ake ai ni tala ʼe fa ʼo fetogi ia ia.+ ʼE fakata kia puleʼaga ʼe fa ʼe ʼomai anai mai te puleʼaga ʼo te ʼuluaki hau ʼaia. Kae ʼe mole natou maʼu anai tona malohi.

23 “Pea ʼe kovi ʼosi anai te talagataʼa ʼa te hahaʼi ʼi te fakaʼosi ʼo tonatou temi pule. ʼE ha ai anai he hau ʼe fakamataku tona agaaga pea ʼe mahino ki te ʼu palalau fakakaka.* 24 ʼE liliu anai ʼo malohi ʼaupito kae mole ʼuhi ko tona malohi ʼo ia totonu. ʼE lahi anai te ʼu maumau ʼae ka ina fakahoko pea ʼe fakaofoofo anai.* ʼE iku lelei anai te ʼu meʼa ʼae ka ina fai. Pea ʼe ina maumauʼi anai te kau malolohi pea mo te hahaʼi maʼoniʼoni.+ 25 ʼE agakaka anai pea ʼe ina kakaʼi anai te tokolahi ke iku ai ʼana fakatuʼutuʼu. Pea ʼe lotolahi anai. Pea ʼe ina maumauʼi anai te tokolahi, ʼi he temi ʼe maʼuli fimalie ai te hahaʼi.* ʼE fakatutuʼu anai te hau ʼaia ki te Tama ʼAliki ʼo te ʼu tama ʼaliki, pea ʼe fakaʼauha anai kae ʼe mole fakahoko anai e te tagata.

26 “ ʼE moʼoni te ʼu palalau ʼae neʼe fai ʼo ʼuhiga mo te ʼu afiafi pea mo te ʼu uhu, ʼi te ʼu meʼa ʼae neʼe ha. Kae ʼe tonu ke ke taupau te ʼu meʼa ʼaia neʼe ha pea ʼaua naʼa fakaha koteʼuhi ʼe heʼeki vave fakahoko.”*+

27 Pea ko au ia Taniela, neʼe kovi ʼosi toku gaʼegaʼe pea neʼe au mahaki lolotoga ni ʼaho.+ Neʼe au tuʼu ake leva ʼo fakahoko taku gaue ki te hau.+ Kae neʼe kei au punamaʼuli pe ʼi te ʼu meʼa ʼae neʼe ha mai kia au, pea neʼe mole mahino he tahi ki te ʼu meʼa ʼaia.+

9 Neʼe ko te ʼuluaki taʼu ʼo te pule ʼa Taliusi,+ te foha ʼo Asuelusi. Neʼe kau ia Taliusi ʼi te hologa ʼo te kau Metia, pea neʼe fakanofo ke hau ki te puleʼaga ʼo te kau Kaletea.+ 2 ʼI te ʼuluaki taʼu ʼaia ʼo tana pule, neʼe au mahino ai, ia au ʼaeni ko Taniela, ʼe tuʼu maumau anai ia Selusalemi+ ia taʼu ʼe 70.+ Neʼe au mahino ki te faʼahi ʼaia ʼuhi ko te ʼu tohi,* ʼo mulimuli pe ki te ʼu folafola ʼae neʼe fakaha e Sehova ki te polofeta ko Selemia. 3 Koia neʼe au haga ai kia Sehova, te ʼAtua moʼoni. Pea neʼe au fai ni kole mamahi pea mo sesunio.+ Neʼe au tui he taga* pea mo tu te lefulefu kia au. 4 Neʼe au faikole kia Sehova, toku ʼAtua ʼo vetevete ʼamatou agahala. Neʼe au ui:

“Sehova e, ko koe te ʼAtua moʼoni, te ʼAtua lahi mo fakamanavahe. ʼE ke fakaʼapaʼapa ki tau fuakava pea mo fakaha tou ʼofa agatonu+ kia natou ʼae ʼe ʼoʼofa kia te koe pea mo fakalogo ki ʼau fakatotonu.+ 5 Neʼe matou agahala, ʼei, neʼe matou fai ni aga ʼe kovi pea neʼe matou agatuʼu kia te koe.+ Neʼe matou liʼaki ʼau fakatotonu pea mo ʼau lao. 6 Neʼe mole matou fakalogo ki ʼau tagata faifekau, ia te kau polofeta.+ Kae neʼe natou palalau ʼi tou huafa ki ʼomatou hau, mo tamatou kau ʼaliki, mo ʼamatou kui pea mo te hahaʼi fuli ʼo tomatou fenua. 7 Sehova e, ʼe ke faitotonu pe koe, kae ʼe matou ufiufi ʼi te ʼaho nei. ʼEi, ʼe ufiufi te hahaʼi tagata ʼo Suta, mo te hahaʼi ʼo Selusalemi pea mo Iselaele katoa. Ko natou ʼaia neʼe ke fakamavetevete ʼi ni fenua ʼe tuʼu ovi mai peʼe tuʼu mamaʼo, he neʼe mole natou nonofo agatonu kia te koe.+

8 “Sehova e, ʼe matou ufiufi, ʼo feia mo ʼomatou hau, mo tamatou kau ʼaliki pea mo ʼamatou kui, he neʼe matou agahala kia te koe. 9 Kae, Sehova e siʼomatou ʼAtua, ʼe ke manavaʼofa pea mo lotofakamolemole,+ logo la neʼe matou agatuʼu kia te koe.+ 10 Neʼe mole matou fakalogo kia te koe, Sehova e siʼomatou ʼAtua. Neʼe mole matou mulimuli ki te ʼu lao ʼae neʼe ke foaki mai ʼaki ʼau tagata faifekau, ia te kau polofeta.+ 11 Neʼe maumauʼi e Iselaele katoa tau Lao pea mo maliu kehe mai ia koe he neʼe matou talagataʼa kia te koe. Koia neʼe ke fakahoko kia matou te ʼu malaʼia ʼae ʼe tuʼu ʼi te Lao ʼa Moisese, tau tagata faifekau.+ Neʼe ke fai te faʼahi ʼaia he neʼe matou agahala kia te koe. 12 Neʼe ke fakahoko te ʼu folafola ʼae neʼe ke fakaha ʼo ʼuhiga mo matou+ pea mo te ʼu pule ʼae neʼe natou takitaki matou.* ʼEi, neʼe ke fakahoko kia matou he malaʼia lahi. Pea neʼe heʼeki hoko he malaʼia feia ʼi te kele katoa ohage ko te malaʼia ʼae neʼe hoko ʼi Selusalemi.+ 13 Neʼe hoko te malaʼia lahi ʼaia kia matou, ohage ko tona tohi ʼi te Lao ʼa Moisese.+ Kae, Sehova e siʼomatou ʼAtua, neʼe mole matou kole mamahi atu tou manavaʼofa.* ʼEi, neʼe mole matou tafoki mai ʼi ʼamatou agahala+ pea neʼe mole matou faiga ke matou mahino ki* te moʼoni.*

14 “Koia Sehova e, neʼe ke nofo tokaga. Pea neʼe ke fakahoko leva te malaʼia kia matou koteʼuhi ʼe faitotonu ʼau gaue fuli, Sehova e siʼomatou ʼAtua. Kae neʼe mole matou fakalogo kia te koe.+

15 “Sehova e siʼomatou ʼAtua, neʼe ke fakamavae tau hahaʼi mai te fenua ʼo Esipito ʼaki tou nima mafimafi.+ Pea neʼe iloa ai tou huafa ʼo kaku mai ki te ʼaho nei.+ Kae neʼe matou agahala pea mo fai ni aga ʼe kovi. 16 Sehova e, neʼe ke faitotonu tuʼumaʼu.+ Koia, fakalelei siʼou loto, ke gata la tou hauhau ʼae kua to ki tou kolo ko Selusalemi, ia tou moʼuga taputapu. Kua fehiʼaʼinaʼi ia Selusalemi pea mo tau hahaʼi e natou fuli ʼae ʼe nonofo ʼi ʼomatou tafaʼaki, ʼuhi ko ʼamatou agahala pea mo te ʼu lakahala ʼo ʼamatou kui.+ 17 Kae ʼi te lakaga nei, siʼomatou ʼAtua, ke ke fagono ki taku faikole pea mo ʼaku kole mamahi. Sehova e, ke ke tokagaʼi tou sagatualio+ ʼae kua maumau,+ ke fakakololiaʼi ai tou huafa. 18 Siʼoku ʼAtua, ke ke fagono mai. Fakalelei siʼou loto, kae ke ke sio mai ki tomatou fakaʼofaʼofa pea mo te kolo ʼae kua toʼo ki ai tou huafa. ʼE mole matou faikole mamahi atu ʼuhi ko ʼamatou gaue faitotonu, kae ʼuhi ko tou manavaʼofa lahi.+ 19 Sehova e, fagono mai. Sehova e, fakamolemole mai.+ Sehova e, ke ke tokagaʼi matou pea mo tokoni mai! Siʼoku ʼAtua, manatuʼi tou huafa, koia ʼaua naʼa ke fakatuatuai, he ʼe kua fakahigoa tau hahaʼi pea mo tou kolo ki tou huafa.”+

20 Neʼe hoko atu pe taku palalau, mo taku faikole, mo taku vetevete taku agahala pea mo fakaha te ʼu agahala ʼo taku hahaʼi ko Iselaele. Pea neʼe au kole ai kia Sehova, toku ʼAtua ia tona manavaʼofa ʼo ʼuhiga mo tona moʼuga taputapu.+ 21 ʼEi, neʼe au lolotoga faikole pea neʼe fakaovi mai kia au ia Kapeliele.+ Neʼe ko te tagata ʼaia neʼe au sio ki ai ʼi muʼa atu ʼi te ʼu meʼa ʼae neʼe ha.+ Neʼe haʼu ʼi te temi ʼae neʼe fai ai te molaga ʼo te afiafi kae neʼe kua au gaʼegaʼe ʼaupito. 22 Pea neʼe ina foaki mai ni fakamahino, ʼo ina ui:

“Taniela, neʼe au haʼu ke au foaki atu te fakasiosio poto pea mo tokoni atu ke ke mahino ki te ʼu meʼa ʼae ka hoko. 23 ʼI te temi ʼae neʼe ke kamata faikole ai, neʼe fakaha mai te logo. Pea neʼe au haʼu ʼo fakaha atu, he ʼe ko koe ko he tagata ʼe maʼuhiga ʼaupito.*+ Koia ke ke tokaga lelei ki te logo ʼaeni pea mo faiga ke ke mahino ki te ʼu meʼa ʼae ʼe ke sio ki ai.

24 “Kua fakatuʼutuʼu ni vahaʼa* ʼe 70 ki tau hahaʼi pea mo tou kolo tapu.+ Neʼe fakatuʼutuʼu te temi ʼaia ke fakagata ai te talagataʼa, mo molehi te agahala,+ mo fakamolemole* te lakahala,+ mo fakatuʼu te faitotonu ʼo talu ai,+ mo fakamoʼoni te ʼu meʼa ʼae neʼe ha pea mo te lea fakapolofeta,*+ pea mo fakatapuʼi* te Potu Taputapu ʼAupito. 25 Koia ʼe tonu ke ke iloʼi pea mo mahino ki te ʼu meʼa ʼaeni: ka ʼosi fai te fakatotonu ʼae ke toe laga mo fakatuʼu ia Selusalemi,+ ʼe fakalaka anai ni vahaʼa ʼe 7 pea mo vahaʼa ʼe 62.+ Pea ʼe ha leva anai te Mesia,*+ ia te Takitaki.+ ʼE toe laga mo fakatuʼu anai ia Selusalemi mo hona malaʼe lahi pea ʼe keli anai he tafega vai ʼi te takafoli. Kae ʼe hoko anai te faʼahi ʼaia ʼi he temi mamahi.

26 “Pea ʼe matehi anai te Mesia+ moka ʼosi te ʼu vahaʼa ʼaia ʼe 62, pea ʼe mole he meʼa maʼa ia.+

“Pea ʼe haʼu anai he takitaki mo tana foʼi kautau* ʼo natou maumauʼi te kolo pea mo te koga meʼa taputapu.+ ʼE maumauʼi anai ohage neʼe maumauʼi e he lomaki. Pea ʼe hoko atu anai te tau ʼo kaku ki te fakaʼosi. Neʼe kua fakatuʼutuʼu e te ʼAtua ke hoko ni maumau.+

27 “Pea ʼe ina taupau anai te fuakava maʼa te tokolahi ʼi he vahaʼa katoa. Kae ʼe ina fakagata anai ʼi te vaelua ʼo te vahaʼa ʼaia te fai ʼo te ʼu sakilifisio pea mo te ʼu molaga.+

“Pea ʼe haʼu anai ia ia ʼae ka ina fakahoko te maumau ʼi te pakakau ʼo te ʼu meʼa fakalialia.+ Pea ʼe hoko anai kia ia ʼae kua maumauʼi ia te ʼu meʼa ʼae kua ʼosi fakatuʼutuʼu ki ai. ʼEi, ʼe hoko anai ʼo kaku ki tona pulihi katoa.”

10 ʼI te tolu taʼu ʼo te pule ʼa Siliusi,+ te Hau ʼo Pelesia, neʼe fakaha ai te logo kia Taniela, ʼae neʼe toe higoa ko Peletesasa.+ Neʼe moʼoni te logo ʼaia pea neʼe talanoa ai ki he tau lahi. Neʼe fakamahino age kia Taniela te ʼu meʼa ʼae neʼe sio ki ai pea neʼe mahino ai ki te logo ʼaia.

2 ʼI te temi ʼaia, ko au ia Taniela, neʼe kua vahaʼa tolu taku nofo ʼi te mamahi.+ 3 Neʼe mole au kai ai ki he meʼa kai lelei. ʼEi, neʼe mole au kai he kanoʼi manu peʼe inu he moʼi vino lolotoga vahaʼa ʼe tolu. Pea neʼe mole au vali lolo toku sino ʼi te ʼu vahaʼa ʼaia. 4 Pea neʼe au tuʼu leva ʼi te kauvai ʼo te vai tafe lahi ko Tikeli* ʼi te ʼaho 24 ʼo te ʼuluaki mahina.+ 5 Neʼe au hiki ake ʼoku mata pea neʼe au sio ai ki he tagata neʼe teu lino,*+ pea neʼe haʼi tona koga loto ʼaki he kiliʼi pipi neʼe fai ʼaki te aulo ʼo Ufasi. 6 Neʼe hage tona sino ko te kisolite,*+ pea neʼe gigila tona fofoga ohage ko te hila. Neʼe hage ʼona mata ko he ʼu taume ʼe ulo, pea neʼe hage ʼona nima mo ʼona vaʼe ko te kapa gigila.+ Pea neʼe hage tona leʼo ko te logoaʼa ʼa he hahaʼi kaugamalie. 7 Neʼe ko au tokotahi pe ʼae neʼe sio ki te ʼu meʼa ʼaia neʼe ha. Neʼe mole sisio ki ai te ʼu tagata ʼae neʼe fakatahi mo au.+ Kae neʼe natou matataku ʼaupito pea neʼe natou feholaki leva ʼo fenonoʼi.

8 Koia neʼe au nofo tokotahi ai. Pea neʼe au logoʼi toku vaivai ʼi taku sio ki te ʼu meʼa fakaofoofo ʼaia, pea neʼe lau tetea ai toku fofoga.+ 9 Pea neʼe au logo ki tona leʼo. Kae neʼe au mate moe leva ʼo haga toku fofoga ki te kele, ʼi taku logo ki tana palalau.+ 10 Pea neʼe fāfā mai he tahi kia au+ ʼo fafagu au ke au malaga ake ʼo tuʼutuli. 11 Pea neʼe ina ui mai:

“Taniela, tagata maʼuhiga ʼaupito,*+ ke ke tokaga ki te ʼu palalau ʼae ka au fai atu. Pea ke ke tuʼu ake ʼi te temi nei koteʼuhi kua fekauʼi mai au kia koe.”

Neʼe au tuʼu ake leva ʼi tana ʼosi palalau mai, pea neʼe au mataku.

12 Neʼe ina ui mai leva: “Taniela, ʼaua naʼa ke mataku.+ Neʼe logo te ʼAtua ki ʼau faikole talu mai te ʼuluaki ʼaho ʼae neʼe ke faiga fakamalotoloto ai ke ke mahino ki te ʼu meʼa ʼaia, pea mo tau fakamalalo ifo ʼi ʼona muʼa. Ko te tupuʼaga la ʼaia ʼo taku haʼu kia koe.+ 13 Kae neʼe fakafeagai mai te tama ʼaliki+ ʼo te puleʼaga Pelesia lolotoga ʼaho ʼe 21. Pea neʼe haʼu leva ia Mikaele*+ ʼo tokoni mai. ʼE kau ia ʼi te kau tama ʼaliki maʼuhiga. Pea neʼe au nofo ai ia tafa ʼo te ʼu hau ʼo Pelesia. 14 ʼE au haʼu leva ʼo fakamahino atu te meʼa ʼae ka hoko ki tau hahaʼi ʼi te ʼu ʼaho fakamuli,+ koteʼuhi ʼe hoki hoko anai te ʼu meʼa ʼaia neʼe ha ki ʼamuli.”+

15 ʼI tana fai mai te ʼu palalau ʼaia, neʼe au punou pea mo nofo fakalogologo. 16 Neʼe fāfā leva he tahi neʼe hage ko he tagata ki ʼoku laugutu.+ Neʼe feala ai leva ke au palalau, pea neʼe au ui kia ia ʼae neʼe tuʼu ʼi ʼoku muʼa: “Siʼoku ʼaliki, ʼe au tete he ʼe au mataku ʼi te ʼu meʼa ʼae neʼe ha mai, pea ʼe mole kei ʼi ai hoku malohi.+ 17 Siʼoku ʼaliki, ʼe lava feafeaʼi kia au ʼaeni ko tau tagata faifekau ke palalau atu kia koe?+ ʼE mole kei ʼi ai hoku malohi pea ʼe mole kei tau taku manava.”+

18 Neʼe toe fāfā mai ia ia ʼae neʼe hage ko he tagata pea neʼe ina fakalotomalohiʼi au.+ 19 Pea neʼe ina ui mai: “Tagata maʼuhiga ʼaupito,*+ ʼaua naʼa ke mataku!+ Ke ke nofo ʼi te fimalie. Ke ke lotomalohi, ʼei, ke ke lotomalohi.” Pea neʼe au toe maʼu ai hoku malohi ʼi tana lolotoga palalau mai. Koia neʼe au ui age ki ai: “Siʼoku ʼaliki, palalau mai he ʼe kua ke fakalotomalohiʼi au.”+

20 Pea neʼe ina ui mai leva: “ ʼE ke iloʼi koa pe koʼe neʼe au haʼu kia koe? ʼE au toe alu anai ʼo tauʼi te tama ʼaliki ʼo Pelesia.+ Pea ʼe haʼu anai te tama ʼaliki ʼo Keleka moka au mavae. 21 Kae ʼe au fakaha atu anai te ʼu meʼa ʼae ʼe tuʼu ʼi te tohi ʼo te moʼoni. ʼE mole lagolago mai he tahi kia au ʼi te ʼu aluʼaga ʼaia, gata pe kia Mikaele,+ takotou tama ʼaliki.+

11 “Neʼe au tokoni pea mo fakalotomalohiʼi ia* Mikaele* ʼi te ʼuluaki taʼu ʼo te pule ʼa Taliusi,+ te tagata Metia. 2 ʼE moʼoni te meʼa ʼaeni ʼe au fakaha atu:

“Koʼeni, ʼe pule anai he tahi ʼu hau ʼe toko tolu ʼi Pelesia, pea ʼe tanaki anai e te fa hau he ʼu koloa ʼo lahi age ʼi te ʼu hau fuli ʼae. Pea ka liliu ʼo malohi ʼuhi ko ʼona koloa, ʼe ina uga anai te hahaʼi fuli ke natou* tauʼi te puleʼaga ʼo Keleka.+

3 “Pea ʼe puleʼi anai e he hau malohi ia he puleʼaga lahi,+ pea ʼe ina fai anai te meʼa ʼae ʼe loto ki ai. 4 Kae ʼi te temi ʼae ka pule ai, ʼe maumauʼi anai tona puleʼaga pea mo vaevae ki te ʼu potu taupotu ʼe fa ʼo te kele.*+ ʼE mole maʼu anai e tona hakoga ia tona puleʼaga, koteʼuhi ʼe taʼaki anai ia pea ʼe foaki anai ki ʼihi. Kae ʼe mole natou maʼu anai te malohi ʼae neʼe ina maʼu.

5 “Pea ʼe liliu anai te hau ʼo te potu saute ʼo malohi. ʼE kau te hau ʼaia ʼi tana kau ʼaliki. Kae ʼe malohi age anai he tahi ia ia pea ʼe lahi anai tana pule, ʼei, ʼe lahi age anai tana pule ia ia.

6 “Hili ki ai ni taʼu, ʼe nā fai anai he fuakava. Pea ʼe haʼu anai te ʼofafine ʼo te hau ʼo te potu saute ki te hau ʼo te potu noleto ke ina fakamoʼoni te fuakava ʼaia. Kae ʼe mole toe maʼu anai e te taʼahine ʼaia tona malohi. Pea ʼe mole toe maʼu anai e te hau tona malohi. ʼE puleʼi anai e ʼihi ia te taʼahine ʼaia, mo natou ʼae neʼe ʼomai mo ia, ʼo feia mo tana tamai pea mo ia ʼae neʼe tokoni ki ai ke malohi ʼi te temi ʼaia. 7 Pea ʼe fetogi anai te hau ʼaia* e he tahi ʼe kaiga totonu mo te taʼahine ʼaia. Pea ʼe alu anai ʼo tauʼi te foʼi kautau pea mo te kolo tau ʼo te hau ʼo te potu noleto. ʼE ina ʼohofi anai ia natou pea ʼe malo anai. 8 Pea ʼe ina ʼave anai ki Esipito ʼonatou ʼatua, mo ʼanatou fakatata ukamea,* mo ʼanatou meʼa maʼuhiga ʼae neʼe fai ʼaki te siliva mo te aulo. Pea ʼe ina toe ʼave popula anai niʼihi. ʼE mole alu anai ʼo ʼohofi te hau ʼo te potu noleto, lolotoga ni taʼu. 9 ʼE haʼu anai te hau ʼaia ʼo tauʼi te hau ʼo te potu saute, pea ʼe toe liliu anai ki tona fenua.

10 “Kae ʼe teuteu anai ʼona foha ki te tau. ʼE natou fakatahiʼi anai he kautau ʼe kaugamalie, ʼei, he toe kautau lahi. ʼE alu anai he tahi ʼi ʼona foha ʼaia* ʼo ʼohofi te fenua katoa. ʼE hage anai tona maumauʼi ko te ʼu maumau moka hoko he lomaki. Kae ʼe toe liliu anai ki tona kolo tau. Pea ʼi tana toe liliu ʼaia, ʼe ina hoko atu pe anai te tau ʼo kaku ki tana tau atu ki tona kolo.

11 “Pea ʼe ita anai te hau ʼo te potu saute ʼo alu ʼo tauʼi ia ia, ia te hau ʼo te potu noleto. Kae ʼe ina* fakatahiʼi anai he hahaʼi kaugamalie, pea ʼe puleʼi anai natou e te hau ʼaia.* 12 ʼEi, ʼe ina ʼave anai te hahaʼi kaugamalie ʼaia. ʼE fiameʼalahi anai te hau* pea ʼe ina pulihi anai he toko lauʼi hogofulu afe. Kae ʼe mole ina toe fai anai he meʼa ʼaki te malohi ʼaia kua ina maʼu.

13 “Pea ʼe toe liliu anai te hau ʼo te potu noleto ʼo fakatahiʼi he hahaʼi ʼe kaugamalie age ʼi te ʼuluaki hahaʼi ʼae neʼe ina fakatahiʼi. Pea hili ki ai ni taʼu, ʼe toe alu anai mo hana foʼi kautau lahi kua natou maʼu katoa ia meʼa fuli. 14 Pea ʼi te temi ʼaia, ʼe hahaʼi anai ia natou ʼae ka fakafeagai ki te hau ʼo te potu saute.

“Pea ʼe fakaneke anai e ʼihi ia te ʼu tagata agamalohi* ʼo tau hahaʼi ke natou fakahoko te ʼu meʼa ʼae neʼe ha. Kae ʼe mole natou lavaʼi anai.

15 “Pea ʼe haʼu anai te hau ʼo te potu noleto ʼo fakatuʼuga he kele ke kaku ki te kaupa ʼo te kolo. Pea ʼe ina tauʼi anai mo maʼu te kolo tau ʼaia. ʼE mole lava tauʼi anai ia ia e te ʼu foʼi kautau ʼo te potu saute, ʼo feia mo ʼanatou solia faiva. ʼEi, ʼe mole natou maʼu anai he malohi feʼauga moʼo tauʼi ʼo natou. 16 Ko ia ʼae ka haʼu ʼo tauʼi te hau ʼo te potu saute, ʼe ina fai anai te meʼa pe ʼae ʼe loto ki ai. Pea ʼe mole lava tauʼi anai ia ia e he tahi. ʼE tuʼu anai ʼi te Fenua Taulekaleka+ pea ʼe ina maʼu anai te malohi ke ina pulihi ia meʼa fuli. 17 ʼE fakatuʼutuʼu anai ke haʼu mo te malohi katoa ʼo tona puleʼaga. ʼE ina fai anai he fuakava mo te hau ʼaia. Pea ʼe iku lelei anai ʼana fakatuʼutuʼu. Pea ʼe fakagafua anai ki ai ke ina fakamamahiʼi te taʼahine. ʼE mole lava tauʼi anai ia ia e te taʼahine ʼaia pea ʼe mole agatonu anai ki te hau.* 18 ʼE tokagaʼi anai e te hau ia te ʼu fenua ʼae ʼi te matatai, pea ʼe lahi anai te ʼu fenua ʼae ka ina maʼu. Kae ʼe fakagata anai e he kamutoa tona fakalainoaʼi ʼaia e te hau. Pea ʼe fakalainoaʼi anai ia ia e te kamutoa ʼaia. 19 Hili ki ai, ʼe toe liliu anai* ki te ʼu kolo tau ʼo tona fenua. ʼE tukia mo toka anai, pea ʼe puli anai.

20 “Pea ʼe fetogi anai ia ia e he tahi. ʼE ko ia ʼaia ka ina fekauʼi he tagata ʼe ina fakamaʼua te tukuhau* ke fakalaka ʼi te puleʼaga taulekaleka. ʼE mate anai hili he ʼu kiʼi ʼaho kae ʼe mole mate anai ʼuhi ko he agamalohi peʼe ko he tau.

21 “Pea ʼe fetogi anai ia ia e he tagata ʼe fehiʼaʼinaʼi. Pea ʼe mole fakaʼapaʼapaʼi anai ohage ko he hau. ʼE haʼu anai ʼi he temi ʼe maʼuli fimalie ai te hahaʼi,* pea ʼe ina fai anai ni puleʼaki kaka moʼo faʼao te pule fakahau. 22 Pea ʼe malo anai ʼi te ʼu foʼi kautau ʼae ʼe hage ko ni vai tafe. Pea ʼe matematehi anai ia natou ʼo feia mo te Takitaki+ ʼo te fuakava.+ 23 Pea ʼe fai anai e ʼihi he fuakava mo ia, koia ʼe agakaka anai pea ʼe hiki tuʼulaga anai. Pea ʼe liliu anai ʼo malohi ʼuhi ko he puleʼaga ʼe mole hahaʼi. 24 Pea ʼe alu anai ki te ʼu koga meʼa koloaʼia ʼo te potu fenua, ʼi he temi ʼe maʼuli fimalie ai te hahaʼi.* ʼE ina fai ai anai te meʼa ʼae neʼe mole fai e ʼana kui. ʼE ina tufa anai ki tana hahaʼi te ʼu koloa ʼae neʼe kaihaʼa pea mo te tahi age ʼu meʼa maʼuhiga. ʼE ina fai anai ni fakatuʼutuʼu kovi ke ʼohofi ai te ʼu kolo tau, kae ʼe mole fualoa anai tana fai te faʼahi ʼaia.

25 “Pea ʼe lototoʼa anai te hau pea ʼe ina fakatahiʼi anai ʼana solia. Pea ʼe alu anai mo tana foʼi kautau lahi ʼaia ʼo tauʼi te hau ʼo te potu saute. Pea ʼe teuteu anai ki te tau te hau ʼo te potu saute mo he foʼi kautau lahi mo malohi. Pea ʼe mole ina* lava tauʼi anai ia ia he ʼe fonofono anai ʼihi ke natou fakafeagai kia ia. 26 Pea ʼe fakahifo anai ia ia e natou ʼae ʼe natou kai ʼana meʼa kai kano lelei.

“Pea ʼe mole malo anai tana foʼi kautau,* pea ʼe matehi anai te tokolahi.

27 “Pea ʼe holi anai te ʼu hau ʼaia ʼe lua ki te meʼa ʼae ʼe kovi. ʼE nā heheka fakatahi anai ʼi he laupapa ʼo nā feloiʼaki. Kae ʼe mole lava anai ʼanā fakatuʼutuʼu, koteʼuhi ʼe hoki hoko anai te fakaʼosi ʼi te temi ʼae kua fakatuʼutuʼu ki ai.+

28 “Pea ʼe toe liliu anai* ki tona fenua mo ʼona tuʼuga koloa. Pea ʼe fehiʼa anai ki te fuakava taputapu. ʼEi, ʼe iku lelei anai ʼana fakatuʼutuʼu, pea ʼe toe liliu anai ki tona fenua.

29 “ ʼE toe haʼu anai ʼo tauʼi te potu saute ʼi te temi ʼae kua ʼosi fakatuʼutuʼu ki ai. Kae ʼe mole hage anai ko te ʼuluaki faiʼaga, 30 koteʼuhi ʼe ʼomai anai te kau solia ʼi te ʼu vaka ʼo Kitimi+ ʼo tauʼi ia ia. Pea ʼe fakalainoaʼi anai ia ia.

“ ʼE toe liliu mai anai ʼo valoki* te fuakava taputapu,+ pea ʼe iku lelei anai ʼana fakatuʼutuʼu. ʼEi, ʼe toe liliu mai anai pea ʼe ina tokagaʼi anai ia natou ʼae ʼe fakafisi ki te fuakava taputapu. 31 ʼE ina fakatotonu anai ke ʼomai ni foʼi kautau. ʼE moamoagaʼi anai te sagatualio+ mo te kolo tau, pea ʼe mole toe fai anai te sakilifisio ʼae ʼe tonu ke momoli tuʼumaʼu.*+

“Pea ʼe fakatuʼu anai te meʼa fakalialia ʼae ʼe ina fakatupu te maumau.+

32 “Pea ʼe ina fakaoloolo anai ia* natou ʼae ʼe natou fai ni aga ʼe kovi pea mo fakafisi ki te fuakava. Pea ʼe natou agatuʼu anai ʼuhi ko te ʼu palalau ʼaia. Kae ʼe malo pe anai te hahaʼi ʼae ʼe natou iloʼi tonatou ʼAtua, pea ʼe iku lelei anai ʼanatou fakatuʼutuʼu. 33 Pea ʼe maʼu anai he kau fakasiosio poto+ ʼi te hahaʼi. ʼE natou tokoni anai ki te tokolahi ke natou maʼu te ʼatamai malama. Pea ʼe fakamamahiʼi anai natou* ʼi ni kiʼi ʼaho. ʼEi, ʼe matehi anai natou ʼaki te heleta, peʼe tutu anai natou, peʼe ʼave popula anai, peʼe kaihaʼa anai ʼonatou koloa. 34 Kae ʼe natou maʼu pe anai he kiʼi tokoni moka fakamamahiʼi natou.* ʼE fakaoloolo anai natou e he tokolahi* moʼo fakaha tanatou lagolago age. 35 Pea ʼe fakamamahiʼi* anai ʼihi ia natou ʼae ʼe natou maʼu te fakasiosio poto. ʼE fai anai te faʼahi ʼaia ke ʼahiʼahiʼi mo fakamaʼa ai te hahaʼi ʼuhi ko natou,+ ʼo kaku ki te temi fakaʼosi. ʼEi, ʼe hoki hoko anai ʼi te temi ʼae kua ʼosi fakatuʼutuʼu ki ai.

36 “ ʼE fai anai e te hau te meʼa ʼae ka ina leleiʼia. ʼE fiameʼalahi anai pea ʼe ina hikihiki anai ia ia ke maʼoluga age ʼi te ʼu ʼatua fuli. Pea ʼe ina fai anai ni palalau fakalialia ke laukovi ai ki te ʼAtua ʼo te ʼu ʼatua.+ ʼE ina lavaʼi anai ia meʼa fuli ʼo kaku ki te hoko mai ʼo te temi ʼae ka tauteaʼi ai ia ia e te ʼAtua. ʼEi, ʼe tonu ke hoko te ʼu meʼa ʼae kua ʼosi fakatuʼutuʼu ki ai. 37 ʼE mole fakaʼapaʼapa anai ki te ʼAtua ʼo ʼana kui pea mo te tahi age ʼu ʼatua. Pea ʼe mole fakaʼapaʼapa anai ki te meʼa ʼae ʼe loto ki ai te ʼu fafine. Kae ʼe ina hikihiki anai ia ia ke maʼoluga age ia natou fuli. 38 Kae ʼe ina fakakololiaʼi anai te ʼatua ʼo te ʼu kolo tau. ʼEi, ko he ʼatua neʼe mole iloʼi e ʼana kui. Pea ʼe ina momoli anai kia ia te aulo, mo te siliva, mo te ʼu maka maʼuhiga pea mo niʼihi age meʼa maʼuhiga. 39 ʼE ina tauʼi anai* ni kolo tau ʼe malolohi, ʼaki* he ʼatua matapule. Pea ʼe ina fakakololiaʼi anai natou ʼae ʼe fakaʼapaʼapa kia ia.* ʼE ina fakanofo anai natou ke natou pule ki he kaugamalie. Pea ʼe ina vaevae anai ni kele kae totogi.

40 “ ʼI te temi fakaʼosi, ʼe haʼu anai te hau ʼo te potu saute pea ʼe nā fetauʼaki anai. Pea ʼe ʼohofi anai ia ia e te hau ʼo te potu noleto. ʼE alu anai mo ni saliote tau, mo ni tagata heka hosi pea mo ni tuʼuga vaka tau. Pea ʼe hu anai ki te ʼu fenua, pea ʼe hage anai tana maumauʼi te ʼu fenua ʼaia ko te ʼu maumau moka hoko he lomaki. 41 Pea ʼe toe hu anai ki te Fenua Taulekaleka,+ pea ʼe lahi anai te ʼu fenua ka ina maʼu. Kae koʼeni te ʼu fenua ʼae ʼe mole ina maʼu anai: ko Etome, mo Moape, pea mo te faʼahi tafito ʼo te kau Amone. 42 Pea ʼe hoko atu pe anai tana tauʼi te ʼu fenua. Pea ʼe mole hao anai ia Esipito. 43 ʼEi, ʼe pule anai ki te ʼu koloa ʼae ʼe fufu, te aulo pea mo te siliva, pea mo te ʼu meʼa maʼuhiga fuli ʼo Esipito. ʼE mulimuli anai te kau Lipi mo te kau Etiopea ia ia.

44 “Kae ʼe hoha anai ʼuhi ko te ʼu logo mai te potu esite* pea mo te potu noleto. Pea ʼe alu anai mo hona ita lahi ʼo pulihi katoa pea mo tamateʼi he hahaʼi kaugamalie. 45 Pea ʼe ina fakatuʼu anai ʼona fale la fakahau ʼi te vaha ʼo te tai lahi pea mo te moʼuga taputapu ʼo te Fenua Taulekaleka.+ Pea ʼe fakaʼauha anai, kae ʼe mole tokoni anai he tahi ki ai.

12 “ ʼI te temi ʼaia, ʼe tuʼu ake anai ia Mikaele,*+ te tama ʼaliki lahi+ ʼae ʼe lolotoga tokoni ki tau hahaʼi.* Pea ʼe ko he temi mamahi anai neʼe heʼeki hoko talu mai te tuʼu ʼo he puleʼaga ʼo kaku ki te temi ʼaia. ʼE hao anai tau hahaʼi ʼi te temi ʼaia,+ ia natou fuli ʼae ʼe tuʼu ʼonatou higoa ʼi te tohi.+ 2 Pea ʼe ʼaʼala ake anai he tokolahi ia natou ʼae kua mamate.* ʼE maʼuli anai ʼihi ʼo heʼe gata kae maʼuli ufiufi anai ʼihi ʼo talu ai.

3 “ ʼE gigila anai te kau fakasiosio poto ohage ko te malamagia ʼo te lagi. Pea ʼe gigila anai ia natou ʼae ʼe tokoni ki te tokolahi ke natou faitotonu. ʼE natou gigila anai ohage ko te ʼu fetuʼu, ʼo talu ai.

4 “Kae ko koe, Taniela, taupau te ʼu folafola ʼaia pea ʼaua naʼa fakaha. Pea ke ke fakamaʼu te tohi ʼo aʼu ki te temi fakaʼosi.+ ʼE feoloʼaki anai te tokolahi ʼi he mo he,* pea ʼe mahu anai te ʼatamai malama moʼoni.”+

5 Pea ko au, Taniela, neʼe au sio ki he tahi foʼi toko lua neʼe tutuʼu ʼi ai, ko te tahi ʼi te kauvai ʼaeni pea ko te tahi ʼi te kauvai ʼae.+ 6 Pea neʼe fehuʼi e te tahi ia naua ki te tagata teu lino,+ ʼae neʼe tuʼu ʼi te fuga vai tafe: “Ko temi ʼe fia ʼe hoko ai anai te ʼu aluʼaga fakaofoofo fuli ʼaia?” 7 Neʼe au logo leva ki te palalau ʼa te tagata teu lino ʼae neʼe tuʼu ʼi te fuga vai tafe. Neʼe ina hiki ake ʼona nima ki te lagi, pea neʼe ina fakapapau ʼi te huafa ʼo Ia ʼae ʼe maʼuli ʼo talu ai:+ “ ʼE hoko anai ʼi he temi, mo he ʼu temi pea mo he vaeluaʼi temi.* Pea ka ʼosi maumauʼi pe te malohi ʼo te hahaʼi maʼoniʼoni,+ pea gata ai leva te ʼu meʼa fuli ʼaia.”

8 Pea neʼe au logo ki ai, kae neʼe mole au mahino.+ Koia neʼe au fehuʼi age ai: “Siʼoku ʼaliki, ʼe fakaʼosi feafeaʼi anai te ʼu meʼa fuli ʼaia?”

9 Pea neʼe ina ui mai: “Alu, Taniela, he ʼe tonu ke taupau te ʼu folafola ʼaia pea ke ʼaua naʼa fakaha. Pea ʼe tonu ke fakamaʼu te tohi ʼo aʼu ki te temi fakaʼosi.+ 10 ʼE fakamaʼa anai e te tokolahi ia natou totonu, pea ʼe ʼahiʼahiʼi anai natou.+ ʼE agakovi pe anai te kau agakovi, pea ʼe mole mahino anai he agakovi. Kae ʼe mahino anai te kau fakasiosio poto.+

11 “ ʼE ʼi ai anai ʼaho ʼe 1 290, mai te temi ʼae ʼe mole toe fai ai te sakilifisio ʼae ʼe tonu ke momoli tuʼumaʼu,*+ pea mo fakatuʼu ai te meʼa fakalialia ʼae ʼe ina fakatupu te maumau.+

12 “Fiafia ia ia ʼae ʼe haga talitali mo aʼu ki te fakaʼosi ʼo te ʼu ʼaho ʼe 1 335!

13 “Kae ko koe, ke ke tuʼu malohi ʼo aʼu ki te fakaʼosi. ʼE ke malolo anai, pea ʼe ke tuʼu ake anai ke ke maʼu tou fakapale* ʼi te fakaʼosi ʼo te ʼu ʼaho.”+