OSEO
1 Neʼe palalau leva ia Sehova kia Oseo,* te foha ʼo Peeli ʼi te ʼu temi pule ʼo Osiasi,+ mo Sotame,+ mo Akase,+ pea mo Esekiasi,+ te ʼu hau ʼo Suta.+ Neʼe toe palalau ki ai ʼi te temi pule ʼo Selopoamo,+ te foha ʼo Soasi,+ te hau ʼo Iselaele. 2 Neʼe fakaha leva e Sehova ʼana folafola ʼaki ia Oseo. Neʼe ui e Sehova kia Oseo: “Alu ʼo ʼohoana mo he fafine ʼe faiaga anai.* Pea ʼe ke maʼu anai hau ʼu fanau mai tana faiaga ʼaia,* he neʼe liʼaki e te hahaʼi ia Sehova ʼuhi ko tanatou faiaga.”+
3 Koia neʼe ʼohoana leva mo Komele, te ʼofafine ʼo Tipalaimi. Neʼe faitama leva tona ʼohoana, pea neʼe ina fanauʼi he tamasiʼi tagata.
4 Pea neʼe ui age e Sehova ki ai: “Ke ke fakahigoaʼi ia ia ko Siseleele,* he ʼe kua au vave fakamauʼi te hologa ʼo Seu+ ʼuhi ko te ʼu fakapo ʼae neʼe fai ʼi Siseleele.* Pea ʼe au fakagata anai te pule fakahau ʼi te puleʼaga* ʼo Iselaele.+ 5 ʼI te ʼaho ʼaia, ʼe au maumauʼi anai te nahau ʼo Iselaele ʼi te Potu Fenua Laulelei ʼo Siseleele.”
6 Neʼe toe faitama leva tona ʼohoana, pea neʼe ina fanauʼi he tamasiʼi fafine. Pea neʼe ui e te ʼAtua kia Oseo: “Ke ke fakahigoaʼi ia ia ko Lolusama,* he ʼe mole au toe manavaʼofa anai+ ki te puleʼaga* ʼo Iselaele. ʼEi, ʼe au kapu moʼoni anai natou.+ 7 Kae ʼe au manavaʼofa anai ki te puleʼaga* ʼo Suta.+ ʼEi, ko au ia Sehova tonatou ʼAtua,+ ʼae ʼe ina haofaki anai natou. ʼE mole au haofaki anai natou ʼaki he nahau, peʼe ko he heleta, peʼe ko he tau, peʼe ko he ʼu hosi, peʼe ko he ʼu tagata heka hosi.”+
8 Neʼe vaheʼi leva e tona ʼohoana ia Lolusama, pea neʼe toe faitama leva ʼo ina fanauʼi he tamasiʼi tagata. 9 Pea neʼe ui age e te ʼAtua: “Ke ke fakahigoaʼi ia ia ko Loami,* he ʼe mole ko koutou ko taku hahaʼi, pea ʼe mole ko au anai tokotou ʼAtua.
10 “Pea ʼe kaugamalie anai te hahaʼi* ʼo Iselaele ohage ko te ʼu fisiʼi ʼone ʼo te tai, pea ʼe mole feala hona fuafua mo hona lau.+ Pea ʼi te koga meʼa ʼae neʼe au ui age kia natou: ‘ ʼE mole ko koutou taku hahaʼi,’+ ʼe au ui age anai kia natou: ‘ ʼE ko koutou te ʼu foha ʼo te ʼAtua maʼuli.’+ 11 ʼEi, ʼe fakatahitahi anai te hahaʼi ʼo Suta pea mo te hahaʼi ʼo Iselaele ʼi te logo tahi.+ Pea ʼe natou filifili anai he pule ʼe tahi pea ʼe natou mavae anai ʼi te fenua, he ʼe ko te ʼaho ʼo Siseleele ʼe ko he ʼaho lahi anai.+
2 “Kotou ui ki ʼokotou tehina: ‘Siʼaku hahaʼi!’*+
Pea ki ʼokotou tokolua: ‘Fafine, ʼae neʼe manavaʼofa ki ai!’*+
2 Kotou tukugakoviʼi takotou faʼe, ʼei, kotou tukugakoviʼi ia ia,
He ʼe mole ko hoku ʼohoana,+ pea ʼe mole ko au tona ʼohoana.
Ke ina fakagata tana faiaga,*
Pea mo tana tono,
3 He ʼe au huʼi anai ʼona mutuʼi meʼa fuli,
Ke telefua ai ohage ko te ʼaho ʼae neʼe tupu ai.
Pea ʼe au fakaliliu anai ia ia ohage ko he toafa,
Pea mo he kele kaka.
Pea ʼe au tuku anai ia ia ke mate ʼi te fia inu.
4 Pea ʼe mole au manavaʼofa anai ki ʼana tama,
He neʼe ko te ʼu tama neʼe tutupu ia mai tana faiaga.*
5 ʼE moʼoni, neʼe faiaga* tanatou faʼe.+
Pea ko ia ʼae neʼe ina fakatupu natou, neʼe ina fai he meʼa fakaufiufi,+ he neʼe ina ui:
‘ ʼE au alu anai ki ʼaku tagata ʼae ʼe laukau ia au,+
Ia natou ʼae ʼe natou foaki mai taku pane, mo taku vai,
Mo ʼoku mutuʼi meʼa, mo taku lolo, pea mo taku meʼa inu.’
6 Koia ʼae ʼe au pupunu anai tona ala ʼaki he ʼa ʼakau talatala.
ʼEi, ʼe au laga anai he kaupa maka,
Ke ʼaua naʼa ina iloʼi tona ala.
7 ʼE ina tuli anai ʼana tagata ʼae ʼe laukau ia ia, kae ʼe mole feala anai hana maʼu natou.+
ʼEi, ʼe ina kumi anai natou, kae ʼe mole ina maʼu anai.
Pea ʼe ina ui anai: ‘ ʼE au toe liliu anai ki toku ʼuluaki ʼohoana,+
He neʼe lelei age toku maʼuli ʼi te temi ʼaia, ʼi te temi nei.’+
8 Neʼe mole ina iloʼi ko au ʼae neʼe ina foaki age tana fulumeto,+ mo tana vino foʼou, pea mo tana lolo.
Pea neʼe ko au ʼae neʼe ina foaki age tana siliva,
Pea mo tana aulo. Neʼe ina fakaʼaogaʼi te ʼu meʼa ʼaia ki tana tauhi kia Paale.+
9 ‘Koia ʼae, ʼe au toe liliu mai anai ʼo ʼave ʼaku fulumeto ʼi te temi taʼukai,
Pea mo taku vino foʼou ʼi te temi toli vite.+
Pea ʼe au toʼo anai mai ia ia ʼoku mutuʼi meʼa ʼae ʼe ʼuʼufi ʼaki tona telefua.
10 ʼI te temi nei, ʼe au fakaha anai ʼona koga tapu ki ʼana tagata ʼae ʼe laukau ia ia.
Pea ʼe mole haofaki anai ia ia e he tagata mai ʼoku nima.+
11 ʼE au pulihi anai tona fiafia katoa,
ʼEi, ʼe au fakagata anai tana fai te ʼu ʼaho lalahi,+ mo te ʼu tuʼu afiafi ʼo te mahina, mo te ʼu sapato, pea mo te ʼu fakatahi taputapu fuli.
12 ʼE au maumauʼi anai ʼana gaueʼaga vite mo ʼona fuʼu fiku, ʼae neʼe ina ui:
“ ʼE ko te totogi ʼaia neʼe foaki mai e ʼaku tagata ʼae ʼe laukau ia au.”
ʼE au fakaliliu anai te ʼu gaueʼaga ʼaia ko he vao matuʼa,
Pea ʼe kai anai e te ʼu manu ʼo te vao.
13 ʼE au fakamauʼi anai ia ia ʼuhi ko te ʼu ʼaho ʼae neʼe ina momoli ai ni sakilifisio ki te ʼu fakatata ʼo Paale,+
ʼEi, te temi ʼae neʼe faiteuteu ai ʼaki ni mama, pea mo ni meʼa matalelei. Pea neʼe ina toe tuli ai ʼana tagata ʼae ʼe laukau ia ia,
Kae neʼe ina galoʼi ia au,’+ ʼe ko te ui ʼaia ʼa Sehova.
14 ‘Koia ʼe au uga anai ia ia ke toe liliu mai:
ʼE au taki anai ia ia ʼi te toafa,
Pea ʼe au palalau lelei anai ki ai.
15 Hili ʼaia, ʼe au toe liufaki age anai ʼana gaueʼaga vite.+
Pea ʼe hage anai kia ia te Potu Fenua Laulelei ʼo Akole+ ko he ala ʼe ina taki ki te ʼamanaki.
ʼE ina tali mai anai ʼi ai ohage pe ko te temi ʼae neʼe kei finemui ai,
Pea mo te temi ʼae neʼe mavae ai mai Esipito.+
16 ʼEi, ʼi te ʼaho ʼaia,’ ʼe ui e Sehova,
‘ ʼE ke fakahigoaʼi anai au ko Tou ʼohoana, kae ʼe mole ke toe fakahigoaʼi anai au ko Tou pule.’*
17 ‘ ʼE mole au tuku anai ke ina fakaʼaogaʼi te ʼu higoa ʼo te ʼu fakatata ʼo Paale,+
Pea ʼe mole toe manatuʼi anai ʼonatou higoa.+
18 ʼI te ʼaho ʼaia, ʼe au fai anai he fuakava ke fua lelei ki taku hahaʼi. Pea ʼe au fai anai te fuakava ʼaia mo te ʼu manu ʼo te vao,+
Mo te ʼu manulele, pea mo te ʼu manu totolo ʼo te kele.+
ʼE au pulihi anai ʼi te fenua te nahau, mo te heleta pea mo te tau.+
Pea ʼe au faiga anai ke maʼuli fimalie taku hahaʼi.+
19 ʼE au fakapapau ʼohoana anai mo koe ʼo talu ai,
ʼEi, ʼe au fakapapau ʼohoana anai mo koe ʼo mulimuli ki te faitotonu,
Mo te ʼofa agatonu pea mo te manavaʼofa.+
20 ʼE au fakapapau ʼohoana anai mo koe ʼo mulimuli ki te agatonu,
Pea ʼe ke iloʼi moʼoni anai ia au ʼaeni ko Sehova.’+
21 ‘ ʼI te ʼaho ʼaia ʼe au tali anai,’ ʼe ko te ui ʼaia ʼa Sehova,
‘ ʼEi, ʼe au tali anai ki te lagi,
Pea ʼe tali anai te lagi ki te kele.+
22 ʼE tali anai te kele ki te fulumeto, mo te vino foʼou, pea mo te lolo.
23 ʼE au nunusi anai ʼi te kele taku hahaʼi ohage ko he pulapula,+
Pea ʼe au manavaʼofa anai kia ia ʼae neʼe mole manavaʼofa he tahi ki ai.*
Pea ʼe au ui anai kia natou ʼae neʼe mole ko taku hahaʼi:* “Ko koutou ko taku hahaʼi.”+
Pea ʼe natou tali anai:
“Ko koe ko tomatou ʼAtua.” ’ ”+
3 Pea neʼe ui mai e Sehova: “Toe ʼofa ki te fafine ʼae ʼe ʼofa ki ai he tahi tagata pea ʼe tono mo ia.+ Ke ke ʼofa ki ai ohage pe ko te ʼofa ʼa Sehova ki te hahaʼi ʼo Iselaele,+ kae ʼe natou tauhi ki he tahi ʼu ʼatua,+ pea mo leleiʼia te ʼu foʼi keke vite.”*
2 Koia neʼe au totogi ai ia ia kia foʼi piesi siliva ʼe 15, pea mo he homele* olose ʼe tahi vaelua. 3 Pea neʼe au ui age ki ai: “ ʼE ke nofo anai mo au lolotoga ni tuʼuga ʼaho. ʼE mole tonu anai ke ke faiaga,* pea ʼe mole tonu anai ke ke momoe mo he tahi age tagata. Pea ʼe mole au toe momoe anai mo koe.”
4 ʼE mole maʼu anai e te hahaʼi ʼo Iselaele honatou hau,+ peʼe ko honatou ʼaliki, peʼe ko hanatou sakilifisio, peʼe ko honatou pou maka taputapu, peʼe ko hanatou efote,*+ peʼe ko hanatou ʼu fakatata.*+ Pea ʼe hoko anai te aluʼaga ʼaia ʼi he temi loaloaga. 5 Pea ʼe toe liliu mai anai te hahaʼi ʼo Iselaele, pea ʼe natou kumi anai ia Sehova tonatou ʼAtua,+ pea mo Tavite tonatou hau.+ ʼEi, ʼe natou ʼomai anai kia Sehova ʼi te ʼu ʼaho fakamuli ke natou maʼu ai ʼona lelei, koteʼuhi ʼe natou manavasiʼi kia te ia.+
4 Hahaʼi ʼo Iselaele, kotou fakalogo ki te folafola ʼa Sehova,
He ʼe fakamauʼi e Sehova te hahaʼi ʼo te fenua.+
ʼE hoko te aluʼaga ʼaia, he ʼe mole he moʼoni ʼi te fenua, peʼe ko he ʼofa agatonu, peʼe ko te ʼatamai malama ʼo te ʼAtua.+
2 Kua mafola te ʼu fakapapau loi, mo te ʼu loi,+ mo te ʼu faifakapo,+
Mo te ʼu kaihaʼa, pea mo te tono.+
ʼEi, ʼe hoko tuʼumaʼu pe te ʼu faifakapo.+
3 Koia ʼe lotomamahi ai anai te fenua,+
Pea ʼe lotovaivai anai te hahaʼi fuli ʼo te fenua.
ʼE mamate ai anai mo te ʼu manu ʼo te vao, mo te ʼu manulele,
ʼO feia pe mo te ʼu ika ʼo te tai.
4 “Kae, ʼaua naʼa fakatonutonuʼi e he tahi te hahaʼi, peʼe fakafifihi kia natou,+
He ʼe hage pe tau hahaʼi ko ni hahaʼi ʼe fakafifihi ki he pelepitelo.+
5 Koia ʼae ʼe ke tukia anai, kae kei ʼaho,
Pea ʼe tukia anai te polofeta mo koe, ohage pe ʼe kolua tukia ʼi te poʼuli.
Pea ʼe au pulihi anai tau faʼe.
6 Pea ʼe tonu anai ke pulihi taku hahaʼi, he ʼe mole natou maʼu te ʼatamai malama.
Neʼe ke liʼaki te ʼatamai malama,+
Koia ʼe au toe liʼaki anai ia koe, ke mole ke toe gaue fakapelepitelo kia au.
Neʼe ke galoʼi te lao* ʼo tou ʼAtua,+
Koia ʼe au toe galoʼi anai mo ʼou foha.
7 Neʼe kaugamalie leva te kau pelepitelo, pea neʼe toe lahi age tanatou agahala mai kia te au.+
Koia, ʼe au fetogi anai tonatou kololia ʼaki te lainoa.*
8 ʼE natou sisino* moka agahala taku hahaʼi,
ʼE natou loto ke hoko atu pe te agahala ʼa taku hahaʼi.
9 ʼE tatau pe anai ia te gaohi ʼo te hahaʼi pea mo te pelepitelo:
ʼE au fakamauʼi anai natou ʼuhi ko tanatou aga,
Pea ʼe au fakatuʼā anai natou ʼo mulimuli pe ki ʼanatou gaue.+
10 ʼE natou kakai anai, kae ʼe mole natou makokona anai.+
ʼE natou momoe anai mo ni fafine ʼe tokolahi,* kae ʼe mole lahi anai te ʼu fanau ʼae ka natou maʼu,+
Koteʼuhi neʼe mole natou fakaʼapaʼapa pe la kia Sehova.
11 Ko te faiaga,* mo te fakaʼaogaʼi ʼo te vino, pea mo te vino foʼou,
ʼE puli ai te fia fai ʼo te meʼa ʼae ʼe totonu.+
12 ʼE kumi tokoni taku hahaʼi ki ʼana fakatata ʼakau,*
Pea ʼe ina fai te meʼa ʼae ʼe fakaha age e tona toko ʼae ʼe fakaʼaogaʼi ki te faifakakikite fakatemonio.*
ʼE fakaheʼi natou ʼuhi ko tanatou holi ki te faiaga,*
Pea ʼe mole natou fia fakalogo ki tonatou ʼAtua ʼi tanatou faiaga.*
13 ʼE natou momoli ni sakilifisio ʼi te tumutumu ʼo te ʼu moʼuga.+
Pea ʼe natou tutu ke kohu ʼanatou sakilifisio ʼi te ʼu kiʼi moʼuga,
Mo te ʼu lalo fuʼu sene, mo te ʼu lalo fuʼu sitilase,* pea mo te ʼu lalo fuʼu ʼakau lalahi fuli,+
He ʼe natou malumalu lelei ai.
Koia ʼae ʼe faiaga ai ʼokotou ʼofafine,*
Pea mo tono ai te ʼu ʼohoana ʼo ʼokotou foha.
14 ʼE mole au fakamauʼi anai ʼokotou ʼofafine ʼuhi ko tanatou faiaga,*
Peʼe ko te ʼu ʼohoana ʼo ʼokotou foha ʼuhi ko tanatou tono.
He ʼe olo te ʼu tagata mo te ʼu fafine paomutu,
Pea ʼe natou momoli ni sakilifisio mo te ʼu fafine paomutu ʼo te fale lotu.
ʼE mamate anai te hahaʼi ʼae ʼe mole ʼatamai.+
ʼAua naʼa kotou ʼomai ki Kilekale,+ peʼe ki Pete-aveni,+
Pea ʼaua naʼa kotou ui: ‘ ʼE au fakapapau atu ia muʼa ʼo Sehova, te ʼAtua maʼuli!’+
16 ʼE kua logogataʼa ia Iselaele ohage pe ko te logogataʼa ʼa he pipi fafine.+
Koia ʼe tokaga anai koa ia Sehova kia natou ʼi te temi nei? ʼE hage anai koa ko he tagata tauhi ovi ʼe tokaga ki he ovi kei mui ʼi he ʼu koga meʼa lunaʼia?*
17 ʼE maʼuhiga kia Efalaimi te ʼu fakatata.+
Kotou tukunoaʼi ia ia!
ʼE leleiʼia e ʼonatou pule* te ufiufi.+
19 ʼE ʼave anai ia ia* e te matagi,
Pea ʼe natou ufiufi anai ʼi ʼanatou sakilifisio.”
5 “ ʼU pelepitelo, kotou fakalogo mai ki te meʼa ʼaeni!+
Hahaʼi ʼo Iselaele, kotou tokakaga!
Hahaʼi ʼo te fale hau, kotou fagono mai!
ʼE fakamauʼi anai koutou.
Kua kotou liliu ko he hele ʼi Misipa,
Pea mo Tapole.+
3 ʼE au iloʼi ia Efalaimi,
Pea ʼe mole ʼūgia ia Iselaele kia te au.
4 ʼE mole feala ke natou toe liliu mai ki tonatou ʼAtua, ʼuhi ko ʼanatou aga,
He ʼe natou holi pe ki te faiaga.*+
Pea ʼe mole natou tokagaʼi ia Sehova.
5 ʼE ha lelei te fiameʼalahi ʼa Iselaele pea ʼe fua kovi pe kia ia totonu.+
Neʼe tukia ia Iselaele mo Efalaimi ʼuhi pe ko ʼanā lakahala,
Pea kua tukia ia Suta fakatahi mo naua.+
6 Neʼe natou olo ʼo kumi ia Sehova mo ʼanatou faga ovi pea mo ʼanatou faga pipi,
Kae neʼe mole natou maʼu.
Neʼe kua fakamamaʼo ia mai ia natou.+
Koia ʼe pulihi anai natou ʼi he mahina pe ʼe tahi, ʼo feia mo ʼonatou kele.*
8 Kotou pupuhi te fakatagi pupuhi+ ʼi Kipease, pea mo Lama!+
Kotou fai he kalaga tau ʼi Pete-aveni!+ Pesamino, ʼe matou muliʼi ia koe!
9 Efalaimi, ʼe matataku anai te hahaʼi ʼi tanatou sisio kia koe ʼi te ʼaho ʼo te tautea.+
Neʼe au fakaha ki te ʼu telepi ʼo Iselaele te meʼa ʼae ka hoko moʼoni anai.
10 ʼE hage te ʼu ʼaliki ʼo Suta ko ni hahaʼi ʼe natou hiki te tuʼakoi ʼo he moʼi kele.+
ʼE to anai toku hauhau kia natou ohage ko he vai.
11 ʼE fakamamahiʼi ia Efalaimi, pea ʼe tonu pe tona fakalainoaʼi,
He neʼe ina fakatotonu ke ina muliʼi tona fili.+
12 Koia neʼe au tauʼi ia Efalaimi ohage ko te kai e he kiʼi manu he ʼu papa ʼo kaina ai,
Pea neʼe au maumauʼi ia Suta ohage ko he koga ʼakau kua popo.
13 Neʼe sio leva ia Efalaimi ki tona mahaki, pea mo Suta ki tona mataʼi papala.
Neʼe alu ai ia Efalaimi ki Asilia,+ pea neʼe ina fekauʼi he ʼu tagata ʼave logo ke olo ki he hau lahi.
Kae neʼe mole feala ki te hau ʼaia ke ina fakamalolo koutou.
Pea neʼe mole feala ke ina faitoʼo tokotou mataʼi papala.
14 ʼE au hage anai kia Efalaimi ko he laione kei mui,
Pea mo he laione malohi ki te hahaʼi ʼo Suta.
ʼEi, ʼe au hae anai natou pea ʼe au alu leva.+
ʼE au ʼave anai ia natou, pea ʼe mole feala anai ke haofaki natou e he tahi.+
15 ʼE au mavae anai, pea mo toe liliu ki toku nofoʼaga, ʼo aʼu ki tanatou tali te ʼu fua kovi ʼo ʼanatou agahala.
ʼE natou kumi anai au, moka natou mamahi.”+
6 “Kotou ʼomai, pea ke tou toe liliu kia Sehova,
Neʼe ina hae tatou ohage ko he laione,+ kae ʼe ina fakamalolo anai tatou.
Neʼe ina ta tatou, kae ʼe ina haʼi anai ʼotatou lavea.
2 Hili ʼaho ʼe lua, ʼe ina toe foaki mai anai te malohi.
ʼE ina toe fakatuʼu ake anai tatou ʼi te tolu ʼaho,
Pea ʼe tou maʼuʼuli anai ʼuhi ko tona ʼofa.
3 ʼE tou iloʼi anai ia Sehova, ʼei, ʼe tou kumi fakamalotoloto anai ke tou iloʼi ia ia.
ʼE haʼu moʼoni anai ohage ko te mafoa ʼo te ʼaho.
ʼE haʼu anai kia tatou ohage ko he toe ʼua lahi,
ʼEi, ohage ko he ʼua ʼi te temi mātala ʼo te ʼu fisiʼi ʼakau, ʼae ʼe fakavai ai te kele.”
4 “Efalaimi, kotea ʼae ka au fai anai kia koe?
Suta, kotea ʼae ka au fai anai kia koe?
He ʼe hage tokolua ʼofa agatonu ko te kakapu ʼi te uhu,
ʼEi, ohage ko te hahau ʼae ʼe puli vave.
5 Koia ʼae ʼe au fakaʼaogaʼi anai te ʼu polofeta moʼo tamateʼi ʼo koulua.+
ʼE au matehi anai koulua ʼaki te ʼu folafola ʼae ʼe au ui atu.+
Pea ʼe gigila anai te ʼu fakamau ʼae ka fai kia koulua ohage ko te malama.+
6 ʼE au leleiʼia te ʼofa agatonu,* kae mole ko te ʼu sakilifisio,
ʼEi, te iloʼi ʼo te ʼAtua, kae mole ko te momoli ʼo he ʼu holokoseta.*+
7 Kae kua maumauʼi e taku hahaʼi ia te fuakava, ohage pe ko ni tagata agahala.+
Neʼe natou kakaʼi ai au.
9 ʼE hage te kau pelepitelo ko ni tagata kaihaʼa, ʼe natou fenonoʼi ke natou ʼohofi he tagata.
ʼE natou faifakapo ʼi te ala ʼae ʼe ovi ki Sekemi.+
ʼE fakaufiufi tanatou aga.
10 Neʼe au sio ki he meʼa fakalialia ʼi te hahaʼi ʼo Iselaele.
11 Pea tahi ʼae meʼa, Suta, kua fakatuʼutuʼu te temi ʼo tou taʼukai,
Moka au ʼaumai ia natou ʼae neʼe ʼave popula.”+
7 “Ka au faiga ke au fakamalolo ia Iselaele,
ʼE ha te agahala ʼa Efalaimi,+
ʼO toe feia pe mo te agakovi ʼa Samalia.+
Koteʼuhi ʼe natou agakaka.+
ʼE natou ulufi te ʼu ʼapi ʼo kaihaʼa, pea ʼe natou olo ʼo kaihaʼa ʼi tuʼa atu ʼo te kolo.+
2 Kae ʼe mole hake pe la ʼi ʼonatou loto, ʼe au manatuʼi anai ʼanatou agakovi fuli.+
ʼI te temi nei, kua iloʼi ʼanatou agakovi.
ʼEi, ʼe mole ʼūgia hanatou agakovi kia au.
3 ʼE natou fakafiafiaʼi te hau ʼaki ʼanatou agakovi,
Pea mo te kau ʼaliki ʼaki ʼanatou kaka.
4 ʼE natou tono fuli.
ʼE natou vela ohage ko te gutuʼumu ʼae neʼe tutu e he tagata taʼo pane.
Pea ʼe mole kei ʼaoga ke hokohokoʼi te afi, lolotoga te natu ʼo te falaoa pea mo tona tuku ʼae ke tupu.
5 ʼI te ʼaho fakafiafia ʼo totatou hau, neʼe mahahaki te kau ʼaliki:
Neʼe natou inu fakavalevale te vino ʼo kovi ʼosi ai tonatou itaita.+
Neʼe fakatahi lelei te hau mo te kau vava.
6 ʼE natou fakaovi ki ai mo he loto ʼe vela ohage ko he gutuʼumu kakaha.*
ʼE moe te tagata taʼo pane ʼi te po katoa.
ʼI te uhu, ʼe mu te gutuʼumu ohage ko he afi kakaha.
7 ʼE natou vela fuli ohage ko he gutuʼumu,
Pea ʼe natou matehi ʼonatou takitaki.*
8 ʼE fakatahi ia Efalaimi ki te ʼu puleʼaga.+
ʼE hage ia Efalaimi ko he foʼi keke takafuafua neʼe mole fuli ʼi tona taʼo.
9 Neʼe toʼo tona malohi e te kau matapule,+ kae neʼe mole ina iloʼi.
Pea neʼe hina ai tona ʼulu, kae neʼe mole ina tokagaʼi.
10 ʼE ha lelei te fiameʼalahi ʼa Iselaele pea ʼe fua kovi pe kia ia totonu.+
Kae neʼe mole natou toe liliu mai kia Sehova tonatou ʼAtua.+
Logope la te ʼu faʼahi fuli ʼaia, kae neʼe mole natou kumi ia ia.
11 ʼE hage ia Efalaimi ko he lupe vale, ʼe mole mahino ki he meʼa.+
Neʼe natou kole tokoni ki Esipito+ pea mo Asilia.+
12 ʼE natou to anai ki taku hele, ʼi he potu pe ʼe natou olo ki ai.
ʼE natou fetoki anai ohage ko te ʼu manulele.
ʼE au akonakiʼi anai natou ohage pe ko taku fakaha age kia natou.*+
13 Malaʼia kia natou, koteʼuhi neʼe natou feholaki ia au!
Ke maumauʼi natou, koteʼuhi neʼe natou lakahala mai kia te au!
Neʼe kua au lotolelei ke au totogi natou, kae neʼe natou fakamatala ni loi ʼo ʼuhiga mo au.+
14 Neʼe mole natou pauʼi mai mo tonatou loto katoa, ʼo kole tokoni mai,+
Kae neʼe natou fetagihi ʼi ʼonatou palepale.
Neʼe natou hifi ʼonatou sino ʼi tanatou fia maʼu ʼae he fulumeto pea mo he vino foʼou.
Neʼe natou fakafeagai mai kia te au.
15 Neʼe au akoʼi natou, pea mo fakalotomalohiʼi natou.
Kae ʼe natou fakafeagai mai pe kia te au, pea mo fakatuʼutuʼu te meʼa ʼae ʼe kovi.
16 Neʼe natou fetogi tanatou aga, kae neʼe mole natou faiga ki he meʼa ʼe maʼoluga age.*
Neʼe mole natou tuha mo te falala ohage ko he nahau neʼe mole faoʼi lelei.+
ʼE matehi anai ʼonatou ʼaliki ʼaki te heleta, ʼuhi ko ʼanatou palalau fiatuʼu.
Koia ʼae ʼe vaʼi ai anai natou e te hahaʼi, ʼi Esipito.”+
8 “Pupuhi te fakatagi pupuhi!+
ʼE haʼu te fili ohage ko he akuila ʼo tauʼi te hahaʼi ʼa* Sehova,+
Koteʼuhi neʼe natou maumauʼi taku fuakava,+ pea mo talagataʼa ki taku lao.+
2 ʼE natou tagi mai: ‘Siʼomatou ʼAtua, ʼe matou iloʼi ia koe, ia matou ʼaeni ko Iselaele!’+
3 Neʼe siʼaki e Iselaele te meʼa ʼae ʼe lelei.+
Ke tuli ia ia e te fili!
4 Neʼe natou fakanofo ni hau kae neʼe mole au loto ki ai.
Neʼe natou fakanofo ni ʼaliki kae neʼe mole au tali ia natou.
Neʼe natou faʼu ni fakatata ʼaki tanatou siliva pea mo tanatou aulo.+
Koia ʼae ʼe matehi ai anai natou.+
5 Samalia, kua au liʼaki tau fakatata ʼuhiʼi pipi!+
ʼE to anai toku hauhau kia natou.+
ʼE kaku anai ki ʼafea tanatou mole lava fakamaʼa ia natou totonu mai te agahala ʼaia?
6 Neʼe faʼu e Iselaele te fakatata ʼuhiʼi pipi ʼaia.
Neʼe faʼu e he tagata tufuga te fakatata ʼaia, kae ʼe mole ko ia te ʼAtua.
ʼE laliki anai te fakatata ʼuhiʼi pipi ʼo Samalia.
ʼE mole he kauʼi fulumeto, ʼe maʼu ai hona ʼu fua kua matutuʼa.+
Ko te meʼa ʼae ʼe homo ake, ʼe mole maʼu ai he meʼa kai.
Kae kapau ʼe ʼi ai hona ʼu fua, ʼe kai anai e te kau matapule.+
8 ʼE folo anai ia Iselaele.+
ʼE natou nonofo leva anai ʼi te lotolotoiga ʼo te ʼu puleʼaga,+
Ohage ko he ipu ʼe mole fia fai ki ai he tahi.
9 Neʼe natou olo ki Asilia,+ ohage ko he asino vao ʼe fealuʼaki tokotahi.
Kua totogi e Efalaimi ni hahaʼi faiaga.+
10 ʼE ʼomai ia natou ʼae neʼe natou totogi, mai te ʼu puleʼaga,
Pea ʼe au fakatahiʼi anai natou.
ʼE natou mamahi anai+ ʼuhi ko te kavega ʼae ka tuku age e te hau pea mo te kau ʼaliki kia natou.
11 Neʼe lahi te ʼu ʼaletale ʼae neʼe laga e Efalaimi, pea neʼe agahala ai.+
ʼEi, neʼe agahala ai ʼuhi ko ʼona ʼaletale.+
13 ʼE natou momoli mai ni sakilifisio, pea ʼe natou kai te kanoʼi manu.
Kae ʼe mole leleiʼia e Sehova.+
ʼI te temi nei, ʼe ina manatuʼi ʼanatou hala, pea mo fakatuʼā natou ʼuhi ko ʼanatou agahala.+
Neʼe natou toe kole tokoni* ki Esipito.+
14 Neʼe galoʼi e Iselaele tona Tupuʼaga,+ pea neʼe ina laga ni fale lotu.+
Neʼe lahi te ʼu kolo tau ʼae neʼe laga e Suta.+
Kae ʼe au tutu anai te ʼu kolo tau ʼaia,
Pea ʼe vela anai te ʼu tule fuli ʼo te ʼu kolo ʼaia.”+
9 “Iselaele, ʼaua naʼa ke fakafiafia!+
ʼAua naʼa ke fiafia ohage ko te hahaʼi.
Neʼe ke fakamamaʼo mai tou ʼAtua, ʼuhi ko te faiaga.*+
ʼE ke leleiʼia te totogi ʼae ʼe ke maʼu ʼi tau faiaga ʼi te ʼu hahaʼaga fulumeto fuli.+
2 Kae ʼe mole maʼu feʼauga anai hau meʼa kai ʼi te fulumeto ʼae ka haha, pea mo hau meʼa inu ʼi te lomiʼaga vite.
Pea ʼe ʼosi anai tau vino foʼou.+
3 ʼE mole haga nonofo anai te hahaʼi ʼo Iselaele ʼi te fenua ʼo Sehova.+
Kae ʼe toe liliu anai ia Efalaimi ki Esipito.
Pea ʼe ina kai anai ʼi Asilia te meʼa ʼae ʼe heʼe maʼa.+
4 ʼE mole natou toe liligi anai te vino ohage ko he molaga kia Sehova.+
ʼE mole ina leleiʼia anai ʼanatou sakilifisio.+
ʼE hage anai te ʼu sakilifisio ʼaia ko te pane ʼae ʼe kai e te hahaʼi moka mate he tahi.
Pea ʼe heʼe maʼa anai ia natou fuli ʼae ka natou kai.
ʼE ko te pane pe ia maʼa natou.
Pea ʼe mole momoli anai te pane ʼaia ʼi te fale ʼo Sehova.
5 Kotea ʼae ka kotou fai ʼi te ʼaho ʼae ʼe kotou fakatahitahi ai,*
ʼI te ʼaho lahi ʼae ʼe fai maʼa Sehova?
6 Koia kotou fagono mai! ʼE tonu anai ke natou feholaki ʼuhi ko tonatou fakaʼauha.+
ʼE fakatahiʼi anai natou e te hahaʼi ʼo Esipito,+ pea ʼe tanu anai natou ʼi Memifisi.+
ʼE ʼaofi anai e te vao talatala ʼanatou meʼa maʼuhiga ʼae neʼe fai ʼaki te siliva.
Pea ʼe homo ake anai ni ʼakau talatala ʼi ʼonatou fale la.
7 ʼE hoko mai anai te ʼu ʼaho ʼae ka fakamauʼi ai natou.+
ʼEi, te ʼu ʼaho ʼae ʼe hoko anai kia natou te tautea ʼae ʼe tuha mo natou.
Pea ʼe iloʼi anai e Iselaele te faʼahi ʼaia.
ʼE agavale anai tanatou polofeta, pea ʼe ʼulu vale anai te tagata ʼae ʼe ina ui ʼe haʼu ʼana palalau mai te ʼAtua.
ʼE lahi tou fehiʼaʼinaʼi, ʼuhi ko te lahi ʼo tau agahala.”
8 Neʼe nofo te tagata leʼo+ ʼo Efalaimi mo toku ʼAtua.+
Kae ʼi te temi nei, kua hage te ʼu aga fuli ʼo ʼana polofeta+ ko ni hele ʼa te tagata puke manulele.
ʼE maʼu te fehiʼa ʼi te fale ʼo tona ʼAtua.
9 Kua kovi ʼosi tanatou aga fakalialia, ohage ko te temi ʼo Kipease.+
ʼE manatuʼi anai e te ʼAtua ʼanatou hala, pea ʼe ina fakatuʼā anai natou ʼuhi ko ʼanatou agahala.+
10 “ ʼI taku maʼu ia Iselaele, neʼe hage ko he ʼu fuaʼi vite ʼe maʼu ʼi te toafa.+
ʼI taku sio ki ʼakotou kui, neʼe natou hage ko te ʼu ʼuluaki fua ʼo he fuʼu fiku.
Kae neʼe natou tauhi leva kia Paale ʼo Peole.+
Neʼe natou foaki ʼonatou maʼuli ki te ʼatua ʼae ʼe fakatupu ufiufi,+
Pea neʼe natou liliu ʼo fakalialia, ohage pe ko te meʼa ʼae ʼe natou leleiʼia.
11 ʼE puli te kololia ʼo Efalaimi ohage ko he manulele ʼe alu mamaʼo.
ʼE mole toe ʼi ai anai he tahi ʼe faitama, pea mo toe fanau.+
12 Tatau aipe pe ʼe natou pusiaki ni fanau,
ʼE au ʼave anai te ʼu fanau ʼaia, ʼo aʼu ki te mole kei ʼi ai he tahi.+
ʼEi, malaʼia kia natou moka au lituʼa anai kia natou!+
13 Neʼe tuʼu ia Efalaimi ʼi he koga meʼa lunaʼia, pea neʼe hage kia au ko Tile.+
Kae ʼi te temi nei, ʼe tonu ke ʼaumai e Efalaimi ʼona foha ke tamateʼi.”
14 Sehova e, foaki age kia natou te meʼa ʼae ʼe tuha mo natou:
Ke ʼi ai he ʼu fatuto pea mo he ʼu fafine ʼe mole feala hanatou fafaga ʼanatou kiʼi toe meamea.
15 “Neʼe au fehiʼa kia natou ʼi Kilekale+ ʼuhi ko tanatou fai ʼi ai te agakovi.
ʼE au kapu anai natou ʼi toku ʼapi ʼuhi ko ʼanatou aga ʼae ʼe kovi.+
ʼE mole au toe ʼofa anai ia natou.+
ʼE uigataʼa ʼonatou ʼaliki fuli.
16 ʼE taʼaga anai ia Efalaimi ohage ko he fuʼu ʼakau.+
ʼE moamoa anai ʼona aka pea ʼe mole fua anai.
Kae kapau ʼe fananau ʼonatou ʼohoana, ʼe au matehi anai ʼanatou fanau ʼae ʼe natou ʼoʼofa mamahi ai.”
17 ʼE liʼaki anai natou e toku ʼAtua,
Koteʼuhi neʼe mole natou fakalogo kia te ia.+
Pea ʼe natou hage anai ko ni hahaʼi ʼe feholaʼaki ʼi te ʼu puleʼaga.+
10 “Kua liliu ia Iselaele ko he fuʼu vite vao* ʼe fua.+
Ka lahi ʼona fua, pea ʼe toe lahi age ʼona ʼaletale.+
Ka lelei te ʼu fua ʼo tona kele, pea ʼe toe matalelei age ʼona pou maka taputapu.*+
ʼE laliki anai e he tahi ʼonatou ʼaletale pea mo maumauʼi ʼonatou pou maka taputapu.
3 Pea ʼe natou ui anai: ‘ ʼE mole homatou hau,+ he neʼe mole matou manavasiʼi kia Sehova.
Pea kotea ʼae ʼe feala ke fai e he hau maʼa matou?’
4 ʼE vaʼiganoa ʼanatou palalau, pea ʼe natou fai ni fakapapau loi+ mo ni fuakava.
Koia ʼae ʼe mafola ai te heʼe faitotonu ohage ko he vao talatala ʼi he kele neʼe fuli.+
5 ʼE tuʼania anai te hahaʼi ʼo Samalia ʼo ʼuhiga mo te fakatata ʼuhiʼi pipi ʼae ʼi Pete-aveni.+
ʼE ʼave anai te fakatata ʼaia ke mamaʼo mai ia natou.
Koia ʼe mamahi anai te hahaʼi,
ʼO feia mo te kau pelepitelo ʼo te ʼu ʼatua matapule. Neʼe fiafia te kau pelepitelo ʼaia ʼo ʼuhiga mo te fakatata ʼaia pea mo tona kololia.
6 ʼE ʼave anai te fakatata ʼaia ki Asilia ko he meʼa ʼofa maʼa he hau lahi.+
ʼE fakalainoaʼi anai ia Efalaimi,
Pea ʼe ufiufi anai ia Iselaele ʼuhi ko te tokoni ʼae neʼe mulimuli ki ai.+
7 ʼE pulihi anai ia Samalia pea mo tona hau,+
Ohage ko he kiʼi vaʼa neʼe fasiʼi pea tafea ʼi te fuga vai.
8 ʼE maumauʼi anai+ te ʼu faʼahi maʼoluga ʼo Pete-aveni,+ ʼae neʼe tupu ai te agahala ʼa Iselaele.+
ʼE homo ake anai te vao talatala ʼi ʼonatou ʼaletale.+
ʼE ui anai e te hahaʼi ki te ʼu moʼuga: ‘Kotou ʼuʼufi ia matou!’
Pea ki te ʼu kiʼi moʼuga: ‘Kotou holo ifo kia matou!’+
9 Iselaele, ʼe ke agahala talu mai te temi ʼo Kipease!+
Neʼe natou uigataʼa ʼi ai.
Pea neʼe mole matehi fuli te ʼu foha heʼe faitotonu, ʼi te tau ʼae ʼi Kipease.
10 ʼE au akonakiʼi anai ia natou moka ʼe au loto ki ai.
ʼE fakatahitahi anai te hahaʼi ke natou fakafeagai kia natou,
Moka natou haʼisia ʼi ʼanatou agahala ʼe lua.
11 Neʼe hage ia Efalaimi ko he pipi fafine kei mui, neʼe akoʼi lelei pea neʼe ina leleiʼia te malamalaki ʼo te ʼu fulumeto.
Koia ʼae neʼe mole au hili ai he meʼa ki tona kia matalelei.
Kae ʼe au uga leva anai he tahi ke heka ʼi Efalaimi.+
ʼE toho anai e Suta te saliote. Pea ʼe fakaʼaogaʼi anai e Sakopo te meʼa fuli kele.
12 Kotou nunusi maʼa koutou ʼi te faitotonu, pea kotou utu te ʼofa agatonu.
Kotou fuli maʼa koutou he kele lelei,+
He ʼe kei maʼu te temi ke kotou kumi ai ia Sehova,+
ʼO kaku ki tana haʼu ʼo akoʼi atu te faitotonu.+
13 Kae neʼe ko te agakovi ʼae neʼe kotou to ʼi takotou fuli kele,
Pea neʼe kotou utu te heʼe faitotonu,+
Pea neʼe kotou kai pe te ʼu fua ʼo takotou agakaka.
Koteʼuhi neʼe kotou falala pe kia koutou totonu,
Pea mo ʼakotou tagata tau ʼae ʼe kaugamalie.
14 ʼE tauʼi anai takotou hahaʼi,
Pea ʼe maumauʼi anai ʼokotou kolo tau fuli.+
Pea ʼe hage anai ko te maumauʼi e Salemane ia Alepele.
ʼI te temi tau ʼaia, neʼe fakamataku te matehi ʼo te ʼu faʼe ia tafa ʼo ʼanatou fanau.
15 Petele, koʼena te meʼa ʼae ka fai kia koe,+ ʼuhi ko te lahi ʼo tau agakovi.
ʼEi, ʼe matehi anai te hau ʼo Iselaele, ʼi te mafoata.”+
11 “Neʼe au ʼofa ia Iselaele ʼi tana kei tamasiʼi,+
Pea neʼe au pauʼi toku foha ke mavae mai Esipito.+
2 Neʼe natou* pauʼi te kau Iselaele,
Kae neʼe ʼasili age te fakamamaʼo ʼa te kau Iselaele mai ia natou.+
Neʼe natou momoli ni sakilifisio ki te ʼu fakatata ʼo Paale,+
Pea mo ni sakilifisio ki te ʼu fakatata ʼae neʼe togi.+
3 Logo la neʼe ko au ʼae neʼe au akoʼi ia Efalaimi ke haʼele,+ pea neʼe au fua ia natou,+
Kae neʼe mole natou iloʼi neʼe ko au ʼae neʼe au fakamalolo ia natou.
4 Neʼe au haga taki natou ʼaki te ʼu maea ʼa te ʼu tagata,* ʼei, ʼaki te ʼu maea ʼo te ʼofa.+
Neʼe au hage kia natou ko he tahi ʼe ina toʼo kehe mai ʼonatou kia he ʼakau ʼamo,
Pea ʼaki he agamalū, neʼe au foaki age kia natou takitokotahi hanatou meʼa kai.
5 ʼE mole natou toe liliu anai ki Esipito, kae ʼe hau anai ia Asilia kia natou,+
He neʼe mole natou toe fia liliu mai kia te au.+
6 ʼE haʼu anai he heleta takaminomino ʼo maumauʼi ʼonatou kolo,+
Pea mo te ʼu ʼakau fakamaʼu ʼo te ʼu matapa ʼo ʼonatou kolo. Pea ʼe pulihi ai anai natou ʼuhi ko ʼanatou fakatuʼutuʼu kovi.+
7 Kua fakatotonu e taku hahaʼi ke natou heʼe agatonu kia te au.+
Neʼe natou* pauʼi ia natou ke natou toe liliu ki te maʼoluga,* kae neʼe mole tuʼu ake he tahi.
8 Efalaimi, ʼe feafeaʼi anai haku siʼaki ia koe?+
Iselaele, ʼe feafeaʼi anai haku tuku koe ki ʼou fili?
ʼE feafeaʼi anai haku fai kia koe te meʼa ʼae neʼe au fai kia Atema?
ʼE feafeaʼi anai haku fai kia koe te meʼa ʼae neʼe au fai kia Sepoimi?+
Kua fetogi taku manatu,
He ʼe kua au lotomanavaʼofa.+
9 ʼE mole to anai toku hauhau kia koe.
ʼE mole au toe maumauʼi anai ia Efalaimi,+
Koteʼuhi ko au ko te ʼAtua, kae mole ko he tagata,
Ko au te Maʼoniʼoni ʼi te lotolotoiga ʼo koe.
Pea ʼe mole au alu atu anai kia koe mo toku ita lahi.
10 ʼE natou mulimuli anai ia Sehova, pea ʼe gugulu anai ia ia ohage ko he laione.+
Ka gugulu anai, ʼe matataku mo agavaivai anai ʼona foha, pea ʼe ʼomai anai mai te potu uesite.+
11 Ka natou mavae mai Esipito, ʼe natou tete anai ohage ko he manulele,
Ka natou mavae mai Asilia, ʼe natou hage anai ko he lupe.+
ʼE au fakanofo anai natou ʼi honatou ʼu ʼapi,” ko te ui ʼaia ʼa Sehova.+
12 “Neʼe loiʼi pe au e Efalaimi,
Pea neʼe au sio pe ki te kaka ʼa Iselaele.+
12 “ ʼE falala ia Efalaimi ki te meʼa ʼae ʼe vaʼiganoa.*
ʼE ina tuli te matagi ʼo te potu esite, ʼi te ʼaho katoa.
ʼE lahi ʼana loi pea mo ʼana agamalohi.
ʼE natou fai he fuakava mo Asilia,+ pea ʼe natou ʼave he lolo ki Esipito.+
2 ʼE fakamauʼi e Sehova ia Suta.+
ʼE ina fakatuʼā anai ia Sakopo ʼuhi ko tana aga,
Pea ʼe ina liufaki age anai te meʼa ʼae ʼe tuha mo ia ʼo mulimuli pe ki ʼana gaue.+
3 Neʼe ina puke te mulivaʼe ʼo tona tehina, ʼi te fatu ʼo tana faʼe,+
Pea neʼe fagatua mo te ʼAtua ʼi tona malohi katoa.+
4 Neʼe fualoa tana fagatua mo he ʼaselo, pea neʼe malo ai.
Neʼe tagi pea neʼe ina fai leva ni kole mamahi kia ia.”+
Neʼe maʼu ia ia e te ʼAtua ʼi Petele, pea neʼe palalau ai mo matou.*+
5 Ko Sehova ʼe ko te ʼAtua ʼo te ʼatu kautau,+
ʼE tonu ke manatuʼi e te hahaʼi ko tona huafa ʼe ko Sehova.+
6 “Koia ke ke toe liliu mai ki tou ʼAtua,+
Mo ke haga fakaha te ʼofa agatonu pea mo te faitotonu,+
Pea mo ke falala tuʼumaʼu ki tou ʼAtua.
7 Kae ʼe puke e te tagata faikoloa ʼi tona nima he ʼu meʼa fua ʼe kaka.
ʼE ina leleiʼia te agakaka.+
Pea ʼe mole maʼu anai he meʼa ʼe kovi peʼe ko haku hala, ʼi ʼaku gaue fuli.’
9 Kae ko au ʼe ko Sehova tou ʼAtua talu mai te temi ʼae neʼe ke nofo ai ʼi Esipito.+
ʼE au toe fakanofo anai koe ʼi he ʼu fale la,
Ohage pe ko tona fai ʼi he ʼaho lahi lolotoga ni ʼaho neʼe kua fakatuʼutuʼu ki ai.
10 Neʼe au palalau ki te kau polofeta,+
Neʼe au fakafealagia ke natou sisio ki ni meʼa neʼe ha. Neʼe lahi ʼaupito te ʼu meʼa ʼaia neʼe ha.
Pea neʼe au fakaha he ʼu lea fakatata ʼaki te kau polofeta.
11 Neʼe maʼu te kaka*+ pea mo ni loi ʼi Kileate.
Neʼe natou sakilifisioʼi ni vitulo ʼi Kilekale.+
Pea ʼe hage ʼonatou ʼaletale ko ni tuʼuga maka ʼi he kele neʼe fuli.+
12 Neʼe hola ia Sakopo ki Alame.*+
Neʼe gaue ai ia Iselaele+ maʼa he tagata, ke maʼu ai hona ʼohoana,+
ʼEi, neʼe ina taupau ni ovi, ke maʼu ai hona ʼohoana.+
13 Neʼe fakamavae e Sehova ia Iselaele mai Esipito, ʼaki he polofeta.+
Pea neʼe ina taupau ia ia, ʼaki he polofeta.+
14 Neʼe kovi ʼosi te fakamamahiʼi ʼo te ʼAtua e Efalaimi.+
ʼE lakahala tuʼumaʼu pe ʼuhi ko ʼana faifakapo.
ʼE liufaki age anai e tona ʼAliki te meʼa ʼae ʼe tuha mo ia ʼuhi ko tona fakalainoaʼi.”+
13 “Neʼe matataku te hahaʼi moka palalau ia Efalaimi.
Pea neʼe malohi ʼaupito ʼi Iselaele.+
Kae neʼe lakahala leva ʼuhi ko tana tauhi kia Paale,+ ʼo mate ai.
2 ʼE kei hoko atu pe tanatou agahala ia ʼaho nei,
Pea ʼe natou fai ni fakatata ʼaki ʼanatou siliva.+
ʼE natou faiva ʼi te faʼu ʼo ni taula ʼatua. Pea ko te gaue ʼaia ʼa he kau tufuga.
ʼE natou ui age kia natou: ‘ ʼE tonu ki te ʼu tagata ʼae ʼe natou momoli ni sakilifisio ke natou ʼuma ki te ʼu ʼuhiʼi pipi.’+
3 Koia ʼae ʼe natou hage anai ko te kakapu ʼi te uhu,
ʼEi, ohage ko te hahau ʼae ʼe puli vave,
Mo te kiliʼi fulumeto ʼae ʼi te hahaʼaga fulumeto ʼe viligia ʼi te afā,
Pea mo te kohu ʼae ʼe alu ake ʼi he ava ʼo he ʼato.
4 Kae ko au ʼe ko Sehova tou ʼAtua talu mai te temi ʼae neʼe ke nofo ai ʼi Esipito.+
Neʼe mole ke iloʼi he tahi age ʼAtua ohage ko au,
Pea ʼe mole he tahi age fakamaʼuli.+
5 Neʼe au iloʼi ia koe ʼi te toafa,+ ʼi he fenua kele kaka.
6 Neʼe natou makokona he neʼe lahi tanatou meʼa kai,+
ʼEi, neʼe natou makokona, pea neʼe natou fiameʼalahi leva.
Pea neʼe natou galoʼi ai ia au.+
7 ʼE au hage anai kia natou ko he laione kei mui,+
ʼEi, ko he leopa ʼe ina lama natou ʼi te ala.
8 ʼE au ʼohofi anai natou ohage ko he uluso fafine kua puli ʼona ʼuhi,
Pea ʼe au hae anai ʼonatou fatafata.
ʼE au kai anai natou ʼi ai ohage ko he laione.
Pea ʼe hae liki anai natou e he manu ʼo te vao.
9 Iselaele, ʼe ina matehi anai koe,
Koteʼuhi neʼe ke fakafeagai mai kia au ʼaeni neʼe feala ke ina haofaki koe.
10 Neʼe ke ui mai: ‘Foaki mai he hau pea mo ni ʼaliki.’+
Koia ʼe ʼifea tou hau, ke ina haofaki koe ʼi ʼou kolo fuli?+
Pea kofea ʼou pule?*
12 Kua tohi te hala ʼa Efalaimi,
Pea kua taupau tana agahala.
13 ʼE mamahi anai ohage ko he fafine ʼe fanau.
Kae ʼe mole ko he tamasiʼi ʼe poto.
Ka hoko mai tona temi fanauʼi, ʼe mole haʼu ia ki tuʼa.
14 ʼE au totogi anai natou mai te malohi ʼo te Faitoka,*
ʼE au toe fakamaʼuli ake anai natou mai te mate.+
Mate, ʼe ʼifea tou kafokona?+
Faitoka, ʼe ʼifea tau pule ki te mate?+
ʼE mole au fakaha anai toku manavaʼofa.
15 Tatau aipe pe ʼe maʼuli lelei ʼi te ʼulu kaho,
ʼE haʼu anai he matagi mai te potu esite, ia te matagi ʼa Sehova.
ʼE haʼu te matagi ʼaia mai te toafa, ʼo fakamaha tona matapuna vai pea mo tona vai keli.
ʼE kaihaʼa anai te ʼu meʼa maʼuhiga fuli ʼae ʼe maʼu ʼi tona fale tanakiʼaga koloa.+
16 ʼE agahala anai ia Samalia,+ koteʼuhi neʼe agatuʼu ki tona ʼAtua.+
ʼE matehi anai natou ʼaki te heleta.+
ʼE fakamataku anai te matehi ʼo ʼanatou fanau,
Pea ʼe fahiʼi anai te ʼu fatu ʼo ʼanatou fafine faitatama.”
14 “Iselaele, toe liliu mai kia Sehova tou ʼAtua,+
Koteʼuhi neʼe ke tukia ʼi tau agahala.
2 Kotou toe liliu mai kia Sehova pea kotou ui:
‘Fakalelei siʼou loto, ke ke fakamolemole ʼamatou hala+ pea ke tali te meʼa lelei ʼae ʼe matou foaki atu.
ʼE matou fai atu anai ni fakavikiviki, te fua ʼo ʼomatou laugutu+ ohage pe ko te momoli atu ʼo ni vitulo kei mui.
3 ʼE mole haofaki anai tatou e Asilia.+
ʼE mole tou heheka anai ʼi ni hosi.+
Pea ʼe mole tou toe ui anai ki te ʼu meʼa ʼae neʼe tou faʼu: “Siʼomatou ʼAtua!”
He ʼe ko koe ʼae ʼe manavaʼofa ki te tamasiʼi ʼae ʼe hala mo tamai.’+
4 ʼE au fakamalolo anai natou, pea ʼe mole natou toe heʼe agatonu anai.+
5 ʼE au hage anai ki Iselaele ko te hahau.
ʼE mātala anai ohage ko te lilio,
Pea ʼe tauaka anai ohage ko te ʼu fuʼu ʼakau ʼo Lipane.
6 ʼE alu ake anai ʼona vaʼa.
ʼE hage anai tona matalelei ko te fuʼu oliveto.
Pea ʼe hage anai tona magoni ko te Lipane.
7 ʼE natou toe fakamalumalu ai anai.
ʼE natou to anai ni fulumeto, pea ʼe natou fisi anai ohage ko he fuʼu vite.+
Pea ʼe logologona* anai ohage ko te vino ʼo Lipane.
8 ʼE ui anai e Efalaimi: ‘Kotea ʼae kei au fai mo te ʼu fakatata?’+
ʼE au tali anai pea ʼe au tokaga anai ki ai.+
ʼE au hage anai ko he fuʼu senelie malohi.
Pea ko au ʼae ka ina foaki age ʼona fua.”
9 Ko ai ʼae ʼe poto? Ke mahino ki te ʼu meʼa ʼaia!
Ko ai ʼae ʼe ʼatamai? Ke ina iloʼi te ʼu meʼa ʼaia!
ʼE faitotonu te ʼu ala ʼo Sehova.+
Pea ʼe haʼele ai anai te kau faitotonu,
Kae ʼe tukia ai anai te hahaʼi talagataʼa.
Ko te fakanounou ʼaia ʼo te higoa ʼo Hosaia, ko tona fakaʼuhiga “Neʼe Haofaki e Sehova.”
Peʼe “ina fai anai he aga heʼe ʼaoga,” peʼe “momoe anai mo ni tagata ʼe tokolahi.”
Peʼe “tana fai te aga heʼe ʼaoga ʼaia,” peʼe “tana momoe ʼaia mo ni tagata ʼe tokolahi.”
Ko tona fakaʼuhiga “ ʼE Nunusi Anai e Te ʼAtua.”
Ko he kolo hau neʼe nonofo ai te ʼu hau ʼo Iselaele, ia te puleʼaga ʼo te potu Noleto, logo la ko Samalia neʼe ko tonatou kolo muʼa.
Hep. “fale.”
Ko tona fakaʼuhiga “Neʼe Mole Manavaʼofa Ki Ai.”
Hep. “fale.”
Hep. “fale.”
Ko tona fakaʼuhiga “ ʼE Mole Ko Taku Hahaʼi.”
Hep. “te ʼu foha.”
ʼI te Fakahepeleo ami. Vakaʼi te nota ia Ose 1:9.
ʼI te Fakahepeleo rouama. Vakaʼi te nota ia Ose 1:6.
Peʼe “fai he aga heʼe ʼaoga,” peʼe “momoe mo ni tagata ʼe tokolahi.”
Peʼe “fai he aga heʼe ʼaoga,” peʼe “momoe mo ni tagata ʼe tokolahi.”
Vakaʼi te ʼu nota ia Ose 1:2.
Peʼe “Tou Paale.”
Ko tona fakaʼuhiga “ ʼE Nunusi Anai e Te ʼAtua.”
Vakaʼi te nota ia Ose 1:6.
Vakaʼi te nota ia Ose 1:9.
ʼE fakaʼuhiga ki te ʼu keke ʼae ʼe fakaʼaogaʼi ki te tauhi hala.
Ko lite ʼe 220. Vakaʼi Te ʼu Fakamahino 2.14.
Peʼe “fai he aga heʼe ʼaoga,” peʼe “momoe mo ni tagata ʼe tokolahi.”
Vakaʼi Te ʼu Kupu.
Hep. “telafimi.” ʼE fakaʼuhiga ki te ʼu taula ʼatua ʼo te ʼu loto fale.
Peʼe “akonaki.”
Peʼe lagi “neʼe natou fetogi toku kololia ʼaki te ufiufi.”
Ko tona fakaʼuhiga, ʼe natou sisino ʼuhi ko te ʼu sakilifisio ʼae ʼe tonu ke natou momoli ki te ʼu agahala.
Peʼe “ ʼE natou fai anai he aga heʼe ʼaoga ʼe fakalialia,” peʼe “ ʼE natou faiaga anai.”
Peʼe “fai ʼo he aga heʼe ʼaoga,” peʼe “momoe mo ni hahaʼi tokolahi.”
Hep. “ki tona fuʼu ʼakau.”
Hep. “tona toko.”
Peʼe “te fai ʼo he aga heʼe ʼaoga,” peʼe “momoe mo ni hahaʼi tokolahi.”
Vakaʼi te ʼu nota ia Ose 1:2.
Ko he fuʼu ʼakau ʼe magoni ʼona matalaʼi ʼakau.
Peʼe “fai ai e ʼokotou ʼofafine he aga heʼe ʼaoga,” peʼe “momoe ai ʼokotou ʼofafine mo ni tagata ʼe tokolahi.”
Peʼe “fai he aga heʼe ʼaoga,” peʼe “momoe mo ni tagata ʼe tokolahi.”
Peʼe “fai he aga heʼe ʼaoga,” peʼe “momoe mo ni hahaʼi tokolahi.”
Hep. “koga meʼa ʼe lahi ʼaupito.”
Peʼe “te piele ʼae neʼe fai ʼaki te fulumeto.”
Peʼe “ ʼE natou fai he aga heʼe ʼaoga ʼe fakalialia,” peʼe “ ʼE natou faiaga.”
Hep. “ ʼanatou meʼa tali tau.”
ʼE fakaʼuhiga kia Efalaimi.
Peʼe “aposita.”
Peʼe “fakatonutonuʼi ia natou fuli.”
Peʼe “fai he aga heʼe ʼaoga,” peʼe “faiaga.”
Peʼe “fai ʼo he aga heʼe ʼaoga,” peʼe “ke natou momoe mo ni hahaʼi tokolahi.”
Hep. “foha matapule.”
Peʼe “gaueʼaga.”
Hep. “fofoga.”
Peʼe “manavaʼofa.”
Vakaʼi Te ʼu Kupu.
Peʼe lagi “ ʼE hage ʼonatou loto ko he gutuʼumu kakaha ʼi tanatou fakaovi mo ʼanatou fakatuʼutuʼu kovi.”
Hep. “tuʼi fakamau.”
Hep. “tanatou hahaʼi.”
ʼE fakaʼuhiga ki he faʼahiga tauhi ʼe lelei age.
Peʼe “fale lotu ʼo.”
Peʼe “ni akonaki.”
Peʼe lagi “toe liliu.”
Peʼe “fai ʼo he aga heʼe ʼaoga,” peʼe “momoe mo ni hahaʼi tokolahi.”
Peʼe “ ʼi tokotou ʼaho lahi ʼae kua fakatuʼutuʼu ki ai.”
Peʼe lagi “ ʼe mafola pea.”
Vakaʼi Te ʼu Kupu.
Peʼe “Kua malualoi ʼonatou loto.”
ʼE fakaʼuhiga ki te kau polofeta pea mo ʼihi hahaʼi neʼe fekauʼi ke olo ʼo akoʼi ia Iselaele.
Peʼe “te ʼu maea ʼo te agalelei.” ʼE mahino ia, ʼe ko ni maea neʼe fakaʼaogaʼi e te ʼu matuʼā moʼo ako haʼele ʼanatou fanau.
ʼE fakaʼuhiga ki te kau polofeta pea mo ʼihi hahaʼi neʼe fekauʼi ke olo ʼo akoʼi ia Iselaele.
ʼE fakaʼuhiga ki he faʼahiga tauhi ʼe lelei age.
Peʼe “haʼele pe ia Suta mo.”
Hep. “ ʼE kai e Efalaimi te matagi.”
ʼE mahino ia, ʼe fakaʼuhiga ki te hologa ʼo Sakopo.
Peʼe “he ʼu meʼa fakamanamana.”
Peʼe “Silia.”
Hep. “ ʼau tuʼi fakamau.”
Vakaʼi Te ʼu Kupu.
Hep. “fakamanatu.”