MIKEA
1 Koʼeni te folafola ʼa Sehova ʼae neʼe fakaha kia Mikea*+ te tagata mai Moleseti, ʼi te ʼu temi pule ʼo Sotame,+ mo Akase+ pea mo Esekiasi,+ te ʼu hau ʼo Suta.+ Neʼe sio ki te meʼa neʼe ha age ki ai. Pea neʼe fakaha age ki ai te folafola ʼaeni ʼo ʼuhiga mo Samalia pea mo Selusalemi:
2 “ ʼU hahaʼi fuli, ke kotou fakalogo mai!
Ke fakalogo mai te kele mo meʼa fuli ʼe maʼu ai
Pea ke fakamauʼi koutou e te Tuʼi ʼAliki ko Sehova,+
ʼEi, ke fakamauʼi koutou e Sehova mai tona fale lotu taputapu.
3 Koʼeni ʼe mavae ia Sehova mai tona nofoʼaga.
Pea ʼe hifo anai ʼo haʼele ʼi te ʼu koga meʼa maʼoluga ʼo te kele.
4 ʼE holo anai te ʼu moʼuga ʼi ʼona lalo vaʼe,+
Pea ʼe makafaʼafaʼa anai te ʼu potu fenua laulelei,
Ohage pe ko he foʼi sela moka ovi ki te afi,
Ohage pe ko te hali ʼo he vai ʼi he mahifo.
5 ʼE hoko te ʼu meʼa fuli ʼaia ʼuhi ko te agatuʼu ʼa Sakopo,
ʼE haʼu koa maifea te agatuʼu ʼa Sakopo?
ʼE mole haʼu koa la mai Samalia?+
Pea ʼe haʼu koa maifea ia te ʼu faʼahi maʼoluga ʼae ʼi Suta?+
ʼE mole haʼu koa la mai Selusalemi?
6 ʼE au fakaliliu anai ia Samalia ko he tuʼuga maka ʼi te vao,
Ko he koga meʼa ke to ai ni fuʼu vite.
ʼEi, ʼe au huaʼi anai ʼona maka ki te potu fenua laulelei,
Pea ʼe au keli anai ʼona fakatafito ke ha mai ki tuʼa.
7 ʼE laliki anai ʼona fakatata fuli,+
Pea ʼe tutu anai te ʼu meʼa ʼofa fuli ʼae neʼe ina maʼu mai tana faiaga.+
ʼE au maumauʼi anai ʼona taula ʼatua fuli.
Neʼe ina tanaki te ʼu meʼa fuli ʼaia ʼaki te totogi ʼo tana faiaga,
Pea ʼe totogi ʼaki anai he tahi age ʼu fafine faiaga.”
ʼE hage anai taku tagi ko te tagi ʼa he kuli vao,
ʼE hage anai taku tagi ko te tagi ʼa he otulusi.
Pea kua kaku te tautea ki te matapa ʼo taku hahaʼi, ʼei, kua kaku ki Selusalemi.+
10 “ ʼAua naʼa kotou fakaha te faʼahi ʼaia ʼi Kiete.
Pea ʼaua naʼa kotou fetagihi.
Kotou teka makafulifuli ʼi te efu, hahaʼi ʼo Pete-leafala.*
11 Hahaʼi* ʼo Safili, kotou olo telefua mo ufiufi.
Neʼe mole mavae te hahaʼi* ʼo Tesanani.
ʼE tagilaulau anai te hahaʼi ʼo Pete-etesele, pea ʼe mole natou tokoni atu anai.
12 Neʼe talitali te hahaʼi* ʼo Malote ki he meʼa ʼe lelei,
Kae neʼe ko he meʼa ʼe kovi ʼae neʼe ʼaumai e Sehova ki te matapa ʼo Selusalemi.
13 Hahaʼi* ʼo Lakisi, kotou haʼi te saliote ki te ʼu hosi!+
14 Koia ʼae ʼe ke foaki anai ni meʼa ʼofa ki Moleseti-kate moka mavae.
Neʼe kakaʼi e te hahaʼi ʼo Akesipe+ te ʼu hau ʼo Iselaele.
15 Hahaʼi* ʼo Malesea,+ ʼe tonu foki ke au toe ʼaumai ia ia ʼae ka ina ʼohofi koutou!*+
ʼE kaku anai te kololia ʼo Iselaele ki Atulami.+
16 Kotou kosi mo tele ʼokotou ʼulu ʼuhi ko ʼakotou fanau ʼofaina.
Ke kotou ʼulu tula ohage ko te akuila,
He neʼe ʼave popula ʼakotou fanau.”+
2 “Malaʼia kia natou ʼae ʼe natou fakatuʼutuʼu te meʼa ʼae ʼe kovi,
Mo fakakaukauʼi ni gaue kovi ʼi ʼonatou palepale!
Pea ʼe natou fai leva te ʼu meʼa ʼaia ʼi te ʼaho ake,
Koteʼuhi ʼe natou lava fakahoko.+
2 ʼE natou manumanū ki te ʼu gaueʼaga pea mo te ʼu ʼapi ʼo niʼihi,+
Pea ʼe natou faʼao maʼa natou.
ʼE natou kakaʼi he tagata ke natou maʼu tona ʼapi,+
Pea mo tona tofiʼa.
3 Koia, koʼeni te meʼa ʼae ʼe ui e Sehova:
‘ ʼE au fakakaukauʼi he malaʼia ki te hahaʼi* ʼaeni,+ pea ʼe mole kotou hao anai.+
ʼE mole kotou toe haʼele fiameʼameʼa anai,+ he ʼe ko te temi malaʼia ʼae ka hoko.+
4 ʼI te ʼaho ʼaia, ʼe fai anai he tagilaulau ʼo ʼuhiga mo koutou,
Pea ʼe kovi anai tanatou tagilaulau kia koutou.+
ʼE natou ui anai: “Kua puli ʼatatou meʼa fuli!+
Neʼe ina tuku ki ʼihi te vahe ʼo tatatou hahaʼi. ʼEi, neʼe ina foaki ia ki ʼihi!+
Neʼe ina foaki ʼatatou gaueʼaga ki te kau heʼe agatonu.”
5 Koia, ʼe mole ke maʼu anai he tahi ʼi te hahaʼi ʼa Sehova
Ke ina fuafua te fenua ʼaki he maea pea ke ina vaevae.
6 ʼE natou ui: “Tuku takotou faifakakikite!
ʼE mole tonu ke fakaha te ʼu meʼa ʼaia.
ʼE mole fakalainoaʼi anai tatou!”
7 Hahaʼi ʼa Sakopo, ʼe mole fai koa la te ʼu palalau ʼaeni io koutou:
“ ʼE mole kei faʼa kataki koa la te laumalie ʼo Sehova?
ʼE ko ia moʼoni koa ʼae neʼe ina fai te ʼu gaue ʼaia?”
ʼE mole fua lelei koa la ʼaku folafola kia natou ʼae ʼe haʼele ʼi te faitotonu?
8 Kae neʼe mole faʼa fualoa ki ai, neʼe fakafeagai mai taku hahaʼi ohage ko hoku fili.
ʼE kotou toʼo te ʼu meʼa fakamatalelei ʼo* te ʼu teu, ʼo natou ʼae ʼe feoloʼaki fiameʼameʼa, ohage pe neʼe natou liliu mai te tau.
Pea neʼe kotou fai te faʼahi ʼaia ia muʼa ʼo te hahaʼi fuli.
9 Kua kotou kapu te ʼu fafine ʼo taku hahaʼi ʼi ʼonatou ʼapi matalelei.
ʼE kotou toʼo ʼaku tapuakina taulekaleka ʼi ʼanatou fanau ʼo talu ai.
10 Kotou tutuʼu ake pea mo kotou mavae, he ʼe mole ko he koga meʼa malolo ʼaeni.
ʼE hoko anai he fakaʼauha ʼuhi ko te heʼe maʼa,+ ʼei, he fakaʼauha ʼe fakatupu mamahi ʼaupito.+
11 Kapau ʼe tuli e he tagata te matagi mo te kaka, pea mo ina ui te loi ʼaeni:
“ ʼE au palalau atu anai ʼo ʼuhiga mo te vino pea mo te ʼu faʼahiga kava,”
ʼE mahino ia, ʼe ko te polofeta pe ʼaia ʼe tuha mo te hahaʼi ʼaia!+
12 Sakopo, ʼe mahino papau ia, ʼe au fakatahiʼi anai ʼau hahaʼi fuli.
ʼE au fakatahiʼi anai te toega ʼo te kau Iselaele.+
ʼE au fakatahiʼi anai natou ke natou logo tahi, ohage ko he faga ovi ʼi he lotoʼa,
ʼEi, ohage ko he faga manu ʼi he koga meʼa lunaʼia.+
Pea ʼe hahaʼi mo logoaʼa anai te koga meʼa.’+
13 Ko ia ʼae ʼe ina fai he ava ʼi he kaupa ʼe haʼele anai ʼi muʼa.
ʼE natou fai anai he ava ʼi he kaupa, ʼo fakalaka ai pea mo feulufi ai ki tuʼa.+
ʼE haʼele anai tonatou hau ʼi muʼa,
Pea ʼe takitaki natou e Sehova.”+
3 Neʼe au ui: “Fakalelei siʼokotou ʼu loto, kau pule ʼo Sakopo, kae kotou fakalogo mai,
ʼO feia mo koutou, kau takitaki ʼo te hahaʼi ʼo Iselaele!+
ʼE mole tonu koa la ke kotou iloʼi te meʼa ʼae ʼe faitotonu?
2 ʼE kotou fehihiʼa ki te meʼa ʼae ʼe lelei,+ kae ʼe kotou ʼoʼofa ki te meʼa ʼae ʼe kovi.+
ʼE kotou fohi te kili ʼo taku hahaʼi, pea mo toʼo te kakano ʼae ʼe ʼi ʼonatou hui.+
3 ʼE kotou toe kai foki mo te kakano ʼo taku hahaʼi.+
Pea ʼe kotou toʼo tonatou kili,
Mo fasifasiʼi ʼonatou hui, mo laliki,+
Ohage ko te meʼa ʼae ʼe fakamoho ʼi he kulo, ʼei, ohage ko he kanoʼi manu ʼi he kulo.
4 ʼE hoko mai anai he temi ʼe natou kole tokoni ai kia Sehova,
Kae ʼe mole ina tali anai kia natou.
5 ʼE fakaheʼi e te kau polofeta taku hahaʼi.+
ʼE hoki natou tala pe te tokalelei+ moka foaki age he meʼa ke natou kai.*+
Kae ʼe natou laga tau leva* kia ia ʼae ʼe mole ina foaki age hanatou meʼa kai. Koʼeni te meʼa ʼae ʼe ui age e Sehova kia natou:
6 ‘ ʼE kotou nonofo anai ʼi te fakapoʼuli,+ pea ʼe mole kotou sisio anai ki he meʼa ʼe ha.+
ʼE fakapoʼuli gaogao anai, pea ʼe mole kotou toe faifakakikite anai.
ʼE to anai te laʼa ki te kau polofeta,
Pea ʼe liliu anai te ʼaho ʼo poʼuli kia natou.+
7 ʼE lahi anai te ufiufi ʼa te ʼu tagata ʼae ʼe natou iloʼi te ʼu meʼa ʼae neʼe ha.+
ʼE lotomamahi anai ia natou ʼae ʼe faifakakikite.
ʼE natou ʼuʼufi fuli anai ʼonatou gutu,*
He ʼe mole tali age anai te ʼAtua kia natou.’ ”
8 Kae ko au, kua au malohi ʼaupito ʼuhi ko te laumalie ʼo Sehova.
Pea ʼe lahi taku faitotonu pea mo toku lototoʼa,
Ke au fakaha kia Sakopo tana agatuʼu, pea mo Iselaele tana agahala.
9 Koia, fakalelei siʼokotou ʼu loto, kau pule ʼo te hahaʼi ʼa Sakopo, kotou fakalogo mai,
ʼO feia mo koutou, kau takitaki ʼo te hahaʼi ʼo Iselaele.+
ʼE kotou fehihiʼa ki te faitotonu pea ʼe kotou ʼave keheʼi te ʼu meʼa fuli ʼae ʼe moʼoni.+
10 ʼE kotou laga ia Sione ʼaki te faifakapo pea mo Selusalemi ʼaki te heʼe faitotonu.+
11 ʼE faifakamau ʼonatou pule ke foaki fakakaka age hanatou meʼa ʼofa.+
ʼE akoʼi e ʼanatou pelepitelo te hahaʼi ke foaki age honatou totogi,+
Pea ʼe faifakakikite ʼanatou polofeta ke foaki age hanatou falā.+
Kae ʼe natou falala* pe kia Sehova, ʼo natou ui:
“ ʼE mole nofo koa la ia Sehova mo tatou?+
ʼE mole hoko anai he malaʼia kia tatou.”+
12 Koia ʼuhi ko koutou,
ʼE fuli anai ia Sione ohage ko he gaueʼaga,
ʼE maumauʼi anai ia Selusalemi,+
Pea ʼe hage anai te moʼuga ʼo te Fale* ko te tumutumu ʼo he kiʼi moʼuga ʼe ʼakauʼia.+
4 ʼI te ʼu ʼaho fakamuli,
ʼE tuʼu malohi anai te moʼuga ʼo te fale ʼo Sehova+
ʼI ʼoluga ʼo te tumutumu ʼo te ʼu moʼuga.
ʼE maʼoluga age anai ʼi te ʼu kiʼi moʼuga,
Pea ʼe ʼomai anai ki ai ni hahaʼi kaugamalie.+
2 ʼE olo anai ki ai ni puleʼaga kaugamalie ʼo natou ui:
“Kotou ʼomai ke tou hake ki te moʼuga ʼo Sehova,
Ki te fale ʼo te ʼAtua ʼo Sakopo.+
ʼE ina akoʼi mai anai ʼona ala,
Pea ʼe tou haʼele anai ʼi ʼona ala foufou.”
ʼE haʼu anai te lao* mai Sione,
Pea mo te folafola ʼa Sehova mai Selusalemi.
3 ʼE ina fakahoko anai te faitotonu ki he hahaʼi kaugamalie.+
Pea ʼe ina fakatonutonuʼi anai ni puleʼaga malolohi ʼe tuʼu mamaʼo.
ʼE natou fai anai ni huo fuli kele ʼaki ʼanatou heleta,
Pea mo ni hele tuʼusi ʼakau ʼaki ʼanatou tao.+
ʼE mole toe laga tau anai he puleʼaga ki he tahi puleʼaga,
Pea ʼe mole natou toe ako anai te tau.+
4 ʼE natou tahi nonofo anai ʼi tona lalo fuʼu vite mo tona lalo fuʼu fiku.+
Pea ʼe mole fakamatakuʼi anai natou e he tahi.+
ʼE ko Sehova ʼo te ʼatu kautau, ʼae neʼe ina fakaha tonu atu.
5 ʼE tahi haʼele anai te hahaʼi ʼi te huafa ʼo tona ʼatua.
Kae ko tatou ʼe tou haʼele anai ʼi te huafa ʼo totatou ʼAtua ko Sehova,+ ʼo talu ai.
6 ʼE ui e Sehova: “ ʼI te ʼaho ʼaia,
ʼE au fakatahiʼi anai ia natou* ʼae neʼe ketu.
Pea ʼe au fakatahitahi anai ia natou ʼae neʼe mavetevete,+
ʼO feia mo natou ʼae neʼe au gaohi koviʼi.
7 ʼE au haofaki anai te toe ʼo taku hahaʼi ʼae neʼe ketu.+
ʼE au fakaliliu anai ia natou ʼae neʼe ʼave mamaʼo ko he puleʼaga malohi.+
Pea ko au Sehova ʼe au pule anai kia natou mai te Moʼuga ʼo Sione,
ʼI te temi nei ʼo talu ai.
8 Kae ko koe, tule ʼo te faga manu,
Ia te potu maʼoluga ʼo te taʼahine ʼo Sione,+
ʼE ke toe maʼu anai te pule ʼae neʼe ke maʼu ʼi muʼa atu. ʼEi, ʼe ke toe maʼu anai+
Te pule fakahau ʼa te taʼahine ʼo Selusalemi.+
9 Koia, he koʼe koa ʼe ke kalaga leʼo lahi?
ʼE mole ʼi ai koa la hou hau,
Peʼe kua mate koa tau tagata faitokoni,
Ke ke mamahi feia ai ohage ko he fafine ʼe fanau?+
10 Taʼahine ʼo Sione, ke ke mamahi mo tagi,
Ohage ko he fafine ʼe fanau,
He ʼe ke mavae anai ʼi te kolo ʼo alu ʼo nofo ʼi te tuʼa kolo.
ʼE ke alu anai ki Papiloni,+
Pea ʼe haofaki anai koe mai ai.+
ʼE fakaʼateainaʼi* anai koe e Sehova mai te ʼu nima ʼo ʼou fili.+
11 ʼE fakatahitahi anai ni puleʼaga kaugamalie ke natou fakafeagai kia koe.
ʼE natou ui anai: ‘Ke fakalainoaʼi ia ia,
Pea ke tou sio mata ki te meʼa ʼae ka hoko ki Sione.’
12 Kae ʼe mole natou iloʼi te ʼu manatu ʼa Sehova,
Pea ʼe mole natou mahino ki tona finegalo.*
ʼE ina fakatahiʼi anai natou ʼi te hahaʼaga fulumeto ohage ko he fuhiga fulumeto neʼe hoki tuʼusi age pe.
13 Taʼahine ʼo Sione, ke ke tuʼu ake ʼo malamalaki ohage ko te malamalaki ʼo te fulumeto,+
He ʼe au fakaliliu anai ʼou tala ko he ukamea,
Pea mo ʼou vaʼe* ko he kapa.
Koia, ʼe ke maumauʼi anai ni hahaʼi kaugamalie.+
ʼE ke momoli anai kia Sehova ʼanatou meʼa ʼae neʼe natou maʼu fakakaka,
Pea mo ʼonatou koloa ki te ʼAliki moʼoni ʼo te kele katoa.”+
ʼE natou taʼi te kauʼahe ʼo te tuʼi fakamau ʼo Iselaele ʼaki he moʼi ʼakau.+
2 Pea ko koe, Petelehemi Efalata,+
ʼE mole ke kau ʼi te toko lauʼi afe ʼo Suta he ʼe ke veliveli fau.
Kae ʼe haʼu anai mai ia koe ia ia ʼae ka pule maʼaku ʼi Iselaele.+
Pea ʼe maʼuli ia talu mai te ʼu temi ʼafeā, ʼei, talu mai fualoa.
3 Koia ʼe ina siʼaki anai ia natou
ʼO kaku ki te temi ʼae ka fanau ai ia ia ʼae ʼe tonu ke fanau.
Pea ʼe toe liliu mai anai te toega ʼo ʼona tehina ki te hahaʼi ʼo Iselaele.
4 ʼE tuʼu ake anai ʼo taki* te faga manu ʼaki te malohi ʼo Sehova,+
Pea mo te huafa maʼoluga ʼo Sehova tona ʼAtua.
5 Pea ʼe ina fakatuʼu anai te tokalelei.+
Kapau ʼe ʼohofi e Asilia totatou fenua pea mo malamalaki ʼotatou tule malohi,+
ʼE tou fekauʼi anai ni tagata tauhi ovi ʼe toko fitu ke natou tauʼi ia ia, ʼei, ni pule ʼo te hahaʼi ʼe toko valu.
ʼE ina haofaki anai tatou
Moka haʼu ia Asilia ʼo ʼohofi pea mo malamalaki totatou fenua.
7 ʼE ʼi ai anai te toega ʼo te hologa ʼo Sakopo ʼi te lotolotoiga ʼo he hahaʼi kaugamalie.
Pea ʼe natou hage anai ko he hahau ʼe haʼu mai ia Sehova,
Ko ni ʼua lalahi ʼe to ki te vao ʼakau.
ʼE mole natou tuku tanatou falala ki te tagata,
Peʼe natou fakaʼamu ʼe natou maʼu anai he meʼa mai te ʼu foha ʼo te tagata.
8 ʼE ʼi ai anai te toega ʼo te hologa ʼo Sakopo ʼi te lotolotoiga ʼo te ʼu puleʼaga,
ʼEi, ʼi te lotolotoiga ʼo he hahaʼi kaugamalie.
ʼE natou hage anai ko he laione ʼi te lotolotoiga ʼo te ʼu manu ʼo te vao matuʼa,
Ohage ko he laione kei mui ʼi te lotolotoiga ʼo te faga ovi,
ʼE fakalaka, ʼe ina ʼohofi, pea ʼe ina hae natou.
Kae ʼe mole he tahi ʼe ina haofaki natou.
9 ʼE ke malo anai ʼi ʼou fili,
Pea ʼe tamateʼi anai ʼou fili fuli.”
10 ʼE ui e Sehova: “ ʼE au pulihi anai
ʼI te ʼaho ʼaia ʼau hosi ʼi tou fenua, pea ʼe au maumauʼi anai ʼau saliote tau.
11 ʼE au maumauʼi anai te ʼu kolo ʼo tou fenua
Pea ʼe au holoʼi anai ʼou tule malohi fuli.
12 ʼE au fakagata anai tau gaohi meʼa fakatemonio,
Pea ʼe mole toe ʼi ai anai he tahi ʼe gaohi meʼa fakamanamana io koe.+
13 ʼE au maumauʼi anai te ʼu fakatata pea mo te ʼu pou maka taputapu ʼae io koe,
Pea ʼe mole ke toe tulolo anai ia muʼa ʼo te ʼu meʼa ʼae neʼe ke faʼu.+
15 ʼI te kovi ʼo toku hauhau, ʼe au lagavaka anai
Ki te ʼu puleʼaga ʼae neʼe mole fakalogo.”
6 Fakalelei siʼokotou loto, kae kotou fakalogo ki te meʼa ʼae ʼe ui e Sehova.
Ke ke tuʼu ake, pea ke ke palalau* ia muʼa ʼo te ʼu moʼuga,
Pea ke logo te ʼu kiʼi moʼuga ki tou leʼo.+
2 ʼU moʼuga, ia koutou ko te ʼu fakatafito malohi ʼo te kele,+
Kotou fakalogo ki te fakamau ʼae ʼe fai e Sehova,
He ʼe fakamauʼi e Sehova tana hahaʼi.
ʼE fakafeagai ki Iselaele ʼo ina ui:+
3 “Siʼaku hahaʼi, kotea ʼae neʼe au fai kia koutou?
Kotea ʼae neʼe au fai ke kotou gaʼegagaʼe ai?+
Kotou fakaha mai kia te au.
4 Neʼe au fakamavae koutou mai Esipito.+
Neʼe au toe totogi koutou mai te fenua ʼae neʼe fakapopulaʼi ai koutou.+
Neʼe au fekau ke olo atu ia Moisese, mo Alone, pea mo Miliamu.+
5 Siʼaku hahaʼi, fakalelei siʼokotou loto, kotou manatuʼi te fakatuʼutuʼu ʼa te hau ʼo Moape ko Palaka,+
Pea mo te tali ʼae neʼe fai age e Palaame, te foha ʼo Peoli.+
Kotou manatuʼi te meʼa ʼae neʼe hoko mai Sitime+ ki Kilekale,+
Ke kotou iloʼi ai te ʼu gaue faitotonu ʼa Sehova.”
6 Kotea he meʼa ke au ʼave kia muʼa ʼo Sehova?
Kotea he meʼa ke au ʼave moka au tulolo ki te ʼAtua ʼae ʼi te lagi?
7 ʼE fiafia anai koa ia Sehova ʼi ni ovi tagata ʼe lauʼi afe,
Pea mo he lolo ʼe lahi ʼaupito?+
ʼE au foaki anai koa toku ʼuluaki foha ʼuhi ko taku agatuʼu?
ʼEi, ʼe au foaki anai koa taku tamasiʼi* ʼuhi ko taku agahala?+
8 Tagata, neʼe fakaha atu e Sehova te meʼa ʼae ʼe lelei.
Pea kotea ʼae ʼe ina kole* atu ke ke fai?
9 ʼE pauʼi e Sehova te hahaʼi ʼo te kolo.
Ko natou ʼae ʼe aga fakapotopoto ʼe natou manavasiʼi anai ki tona* huafa.
Kotou tokagaʼi te tautea* pea mo ia ʼae neʼe ina fakahoko.+
10 ʼE kei maʼu koa ʼi te ʼapi ʼo te tagata agakovi te ʼu koloa ʼae neʼe ina maʼu ʼaki te agakovi,
Pea mo te efa* ʼae ʼe hala tona fua* ʼe fehiʼa ki ai te ʼAtua?
11 ʼE au aga fakahagatonu koa mo kapau ʼe au fakaʼaogaʼi he ʼu meʼa fua ʼe mole totonu,
Pea mo he ʼu foʼi maka ʼe ko he ʼu meʼa fua ʼe hala?+
13 “Koia ʼe au taʼi anai koe ke ke lavea+
Pea mo fakaʼauha ia koe ʼuhi ko ʼau agahala.
14 ʼE ke kai anai, kae ʼe mole ke makona anai.
ʼE ke logoʼi pe anai te fia kai.+
Ko te meʼa ʼae ka ke tuku keheʼi, ʼe mole feala anai hau taupau,
Pea ko te meʼa ʼae ʼe feala tau ʼave, ʼe au tuku anai ki ʼou fili.*
15 ʼE ke nunusi anai te pulapula, kae ʼe mole ke utu anai.
ʼE ke malamalaki anai te ʼu fuaʼi oliveto, kae ʼe mole ke fakaʼaogaʼi anai te lolo.
Pea ʼe ke malamalaki anai te ʼu fuaʼi vite,* kae ʼe mole ke inu anai te vino.+
16 ʼE kotou mulimuli ki te ʼu agaʼi fenua ʼo Omeli pea mo faʼifaʼitakiʼi te ʼu aga fuli ʼa Akapo mo tona famili,+
Pea ʼe kotou mulimuli ki ʼanatou tokoni.
Koia ʼae ʼe au tauteaʼi anai koutou. ʼE punamaʼuli anai te hahaʼi ʼuhi ko te ʼu meʼa ʼae ka au fai kia koutou.
ʼE manukiʼi* anai te hahaʼi ʼo te kolo.+
Pea ʼe fehiʼaʼinaʼi anai koutou.”+
7 Malaʼia kia au! ʼE au hage ko he tahi
ʼE mole ina maʼu he fuhiga vite ke ina kai,
Mo he ʼuluaki fua ʼo he fuʼu fiku ʼe loto ki ai,
Hili te temi toli ʼo te ʼu fuaʼi ʼakau ʼi te temi vela,*
Pea mo te temi toli ʼo te vite.
2 Kua puli te tagata agatonu ʼi te kele.
ʼE mole he tagata ʼe ina fai te meʼa ʼae ʼe totonu.+
ʼE natou fenonoʼi fuli ʼo lamalama ke natou fai he ligi toto.+
ʼE natou hage ko ni tagata kapu manu ʼe natou fakatuʼu ni hele ki ʼonatou tehina.
3 ʼE faiva ʼonatou nima ʼi te fai ʼo te meʼa ʼae ʼe kovi.+
ʼE fakamaʼua e te pule he meʼa,
ʼE kole e te tuʼi fakamau he totogi,+
ʼE fakaha e te tagata maʼuhiga te meʼa ʼae ʼe loto ki ai,+
Pea ʼe natou kau* fakatahi.
4 Ko ia ʼae ʼe lelei tukupau ia natou ʼe hage ko ni talaʼi ʼakau,
Pea ko ia ʼae ʼe faitotonu ia natou ʼe kovi age ia ʼi he ʼa ʼakau talatala.
ʼE hoko mai anai te ʼaho ʼae neʼe palalau ki ai ʼau tagata leʼo, ʼei, te ʼaho ʼae ʼe ke huʼi maʼua ai.+
Pea ʼe natou matataku anai.+
5 ʼAua naʼa kotou falala ki hokotou kaugā fagona,
Pea ʼaua naʼa kotou falala ki hokotou kaumeʼa lelei.+
Ke ke tokaga ki te ʼu palalau ʼae ʼe ke fai ki te fafine ʼae ʼe takoto ʼi ʼou tafa.
6 ʼE fehiʼa te foha ki tana tamai,
ʼE fakafeagai te taʼahine ki tana faʼe,+
Mo te fafine ki te faʼe ʼo tona ʼohoana.+
Ko te ʼu fili ʼo te tagata ʼe ko te hahaʼi pe ʼo tona loto fale.+
7 Kae ko au, ʼe au nofo ʼo lamalama ia Sehova.+
ʼE au kataki anai ʼo atalitali ki te ʼAtua ʼae ʼe ina haofaki au.+
ʼE logo mai anai toku ʼAtua.+
8 Siʼoku fili, ʼaua naʼa ke fakafiafia ʼuhi ko au!
Tatau aipe pe ʼe kua au toka, kae ʼe au toe tuʼu ake anai.
Tatau aipe pe ʼe au nofo ʼi te fakapoʼuli, ʼe ko Sehova anai toku malama.
9 ʼE au katakiʼi anai te hauhau ʼo Sehova,
He neʼe au agahala kia te ia.+
ʼE au katakiʼi anai ʼo kaku ki te temi ʼae ʼe lagolago mai ai kia au pea mo ina fakalakatonuʼi au.
ʼE ina taki ai au ki te malama.
Pea ʼe au sio anai ki tona faitotonu.
10 ʼE toe sio foki anai mo toku fili ki ai,
Pea ʼe ufiufi anai, ia ia ʼae neʼe ina ui mai:
“ ʼE ʼifea koa ia Sehova tou ʼAtua?”+
ʼE au sioʼi anai ia ia.
Pea ʼe malamalaki anai ia ia ohage ko te pela ʼae ʼi te ʼu ala.
11 ʼE ko te ʼaho ʼaia ʼae ʼe tonu ai anai ke ke laga ʼou kaupa maka.
ʼI te ʼaho ʼaia, ʼe hiki anai ʼou tuʼakoi ke mamaʼo atu.
12 ʼI te ʼaho ʼaia, ʼe ʼomai anai te hahaʼi kia koe
Mai Asilia pea mo te ʼu kolo ʼo Esipito,
Mai Esipito ʼo aʼu ki te Vai Tafe,*
Mai te tai ki te tahi age tai pea mai te moʼuga ki te tahi age moʼuga.+
13 ʼE maumauʼi anai te fenua ʼuhi ko ʼana hahaʼi,
ʼEi, ʼuhi ko te meʼa ʼae neʼe natou fai.
14 Ke ke toʼo tou toko pea mo ke taki tau hahaʼi, te faga ovi ʼo tou tofiʼa,+
ʼAe neʼe maʼuli tokotahi ʼi te vao matuʼa, ʼi te lotomalie ʼo he gaueʼaga.
Ke natou kakai ʼi Pasani pea mo Kileate+ ohage ko te temi muʼa.
15 “ ʼE au fakaha atu anai ni meʼa fakaofoofo,+
Ohage ko te ʼu meʼa ʼae neʼe ke sio ki ai ʼi te ʼu ʼaho ʼae neʼe ke mavae ai mai Esipito.
16 Logope la te malohi ʼaupito ʼo te ʼu puleʼaga, kae ʼe natou sisio anai mo ufiufi.+
ʼE natou mapunuʼi anai ʼonatou gutu ʼaki ʼonatou nima.
Pea ʼe natou taliga tuli anai.
17 ʼE natou ʼemo anai te efu ohage ko te ʼu gata.+
ʼE natou mavae anai mai ʼonatou tule malohi ʼo tekelili, ohage ko te ʼu manu totolo ʼo te kele.
ʼE natou matataku anai ʼo ʼomai ki te ʼAtua, ia Sehova,
ʼEi, ʼe natou matataku anai ia koe.”+
18 Ko ai koa te ʼAtua ʼae ʼe hage ko koe?
Ko ai koa te ʼAtua ʼae ʼe ina fakamolemole te hala pea mo ina galoʼi te agahala+ ʼo te toega ʼo tana hahaʼi?+
ʼE mole nofo ita anai ʼo talu ai,
He ʼe fiafia ʼi te ʼofa agatonu.+
19 ʼE toe manavaʼofa anai kia tatou.+ ʼE malo anai ʼi* ʼatatou hala.
ʼE ke siʼaki anai ʼanatou agahala fuli ki te loto tai.+
20 ʼE ke agatonu anai kia Sakopo,
ʼE ke ʼofa agatonu anai kia Apalahamo,
Ohage ko tau fakapapau ki ʼamatou kui talu mai te temi muʼa.+
Ko te fakanounou ʼo te higoa ko Mikaele (ko tona fakaʼuhiga “Ko Ai ʼAe ʼe Hage Ko Te ʼAtua?”) peʼe ko Mikaia (ko tona fakaʼuhiga “Ko Ai ʼAe ʼe Hage Ko Sehova?”).
Hep. “fale.”
Peʼe “ ʼi te ʼapi ʼo Leafala.”
Hep. “fafine.”
Hep. “fafine.”
Hep. “fafine.”
Hep. “fafine.”
ʼE lagi ko te taʼahine ʼo Sione.
Hep. “fafine.”
Peʼe “ka ina toʼo ʼokotou koloa.”
Hep. “famili.”
Peʼe “pea mo.”
Peʼe lagi “te tokalelei pea mo ʼuʼusi.”
Hep. “fakamaʼoniʼoniʼi leva te tau.”
Peʼe “kava.”
Peʼe “lau ʼe natou falala.”
Peʼe “fale lotu.”
Peʼe “akonaki.”
Hep. “ia ia.”
Hep. “toe totogi.”
Peʼe “tana fakatuʼutuʼu,” peʼe “tana tokoni.”
Hep. “paninia.”
Peʼe “tauhi.”
Vakaʼi Te ʼu Kupu.
Peʼe “ke ke palalau moʼo haofaki koe.”
Vakaʼi Te ʼu Kupu.
Hep. “Te fua ʼo toku fatu.”
Peʼe “fakamaʼua.”
Peʼe “ke agalelei mo agatonu tou ʼofa.” Hep. “ ʼofa ki te ʼofa agatonu.”
Hep. “tou.”
Hep. “ ʼakau.”
Vakaʼi Te ʼu Fakamahino 2.14.
Peʼe “ ʼe mole katoa.”
ʼE fakaʼuhiga ki te hahaʼi ʼae ʼo te kolo.
Hep. “ki te heleta.”
Peʼe “ ʼe ke fai anai he vino foʼou.”
Hep. “vekaʼi.”
ʼE fakaʼuhiga tafito ki he ʼu fuaʼi fiku pea lagi mo he ʼu fuaʼi palema.
Hep. “fonofono.”
ʼE fakaʼuhiga ki te Efalate.
Peʼe “ina malamalaki anai.”