HAPAKUKE
1 Ko te folafola ʼaeni neʼe tala age ki te polofeta ko Hapakuke* ʼi te meʼa ʼae neʼe ha age:
2 Sehova e, ʼe kaku anai koa ki ʼafea taku kalaga atu ke ke tokoni mai, kae ʼe mole ke logo mai?+
ʼE kaku anai koa ki ʼafea taku tagi atu ke ke tokoni mai, kae ʼe mole ke fai he meʼa moʼo pulihi* te agamalohi?+
3 He koʼe ʼe ke tuku ke au sio ki te aga heʼe faitotonu?
Pea he koʼe ʼe ke tali te hahaʼi ʼae ʼe natou gaohi koviʼi niʼihi?
Kotea te tupuʼaga ʼo te maumau mo te agamalohi?
Pea kotea te tupuʼaga ʼo te ʼu kē pea mo te ʼu fihi fuli ʼaia?
4 ʼE mole he tahi ʼe talagafua ki te lao,
Pea ʼe mole he temi ʼe fakahoko ai te faitotonu.
ʼE gaohi koviʼi e te kau agakovi ia te kau faitotonu.
Ko te tupuʼaga la ʼaia ʼo te halahala ʼo te ʼu faifakamau.+
5 “Kotou sioʼi te ʼu puleʼaga pea kotou tokagaʼi!
Ke kotou punamaʼuli,
He ʼe hoko mai anai he meʼa ʼi takotou kei maʼuʼuli.
ʼEi, ko he meʼa ʼe mole kotou tui anai ki ai tatau aipe pe ʼe fakamatala atu.+
ʼE natou feulufi ki ni fenua lalahi,
Ke natou toʼo maʼa natou te ʼu ʼapi ʼo te hahaʼi.+
7 ʼE natou fakamataku mo fakatuʼania.
ʼE natou fakahoko pe tanatou faitotonu pea mo tanatou pule.+
ʼE feleleʼi vave mai ʼanatou hosi ʼae neʼe teuteu ki te tau,
Pea natou ʼomai mai mamaʼo.
ʼE natou lele ohage ko te akuila ʼae ʼe ʼoho ki te manu ʼae ka ina kai.+
9 ʼE natou ʼomai fuli ke natou fakahoko te agamalohi.+
ʼE natou haʼele fakatahi fuli ohage ko te matagi ʼo te potu esite,+
Pea ʼe natou ʼave popula te hahaʼi kaugamalie ohage ko te ʼone ʼae ʼe mole malau.
ʼE natou kataʼi te ʼu kolo tau.+
ʼE natou fakatuʼuga he kele ke natou ʼohofi ai te ʼu kolo tau.
11 Pea ʼe hoko atu tanatou haʼele, ʼo natou olo ohage ko te matagi.
Kae ʼe natou lakahala anai,+
Koteʼuhi ʼe natou ui ʼe natou malolohi ʼuhi ko tonatou ʼatua.”*+
12 Sehova e, ʼe mole ke maʼuli koa la talu mai fualoa?+
Siʼoku ʼAtua, siʼoku Maʼoniʼoni, ʼe mole ke mate anai.*+
Sehova e, neʼe ke filifili natou moʼo fakahoko te fakamau.
13 ʼE ke maʼoniʼoni, pea ʼe mole lava sio ʼou mata ki te meʼa ʼae ʼe kovi
Pea ʼe mole ke lava tali te agakovi.+
He koʼe ʼe ke tali te hahaʼi kaka?+
Pea he koʼe ʼe ke nofo fakalogologo ʼi te puleʼi e te tagata agakovi he tahi ʼe faitotonu age ia ia?+
14 He koʼe ʼe ke fakagafua ke gaohi te hahaʼi ohage ko te ʼu ika ʼo te tai,
Ohage ko te ʼu manu ʼo te tai ʼae ʼe mole honatou pule?
15 ʼE ina* fusi ia natou fuli ʼaki he mātaʼu.
ʼE ina puke natou ʼi tona kupega,
ʼE ina tanaki fuli ia natou ki ai.
Ko te tupuʼaga la ʼaia ʼo te lahi ʼo tona fiafia.+
16 Koia, ʼe ina momoli ai ni sakilifisio ki tona kupega,
ʼEi, ʼe ina tutu ke kohu ni sakilifisio ki tona kupega,
Koteʼuhi ʼe ina maʼu mai ai he meʼa kai ʼe gako
Pea mo kano lelei.
17 ʼE hoko atu pe anai koa tana toʼo te ʼu ika ʼae ʼi tona kupega?*
ʼE hoko atu anai koa tana mole manavaʼofa ki te hahaʼi ʼo te ʼu puleʼaga, ʼo ina tamateʼi natou?+
ʼE au lamalama anai ke au iloʼi te meʼa ʼae ʼe ina loto ke au tala
Pea mo te meʼa ʼae ʼe au tali age anai moka ina fakatonutonuʼi au.
2 Neʼe tali mai leva e Sehova:
3 ʼE hoko anai te meʼa ʼaeni ʼe ha atu ʼi te temi ʼae kua fakatuʼutuʼu ki ai,
ʼE hoko fakavilivili mai anai, pea ʼe mole loi anai ia.
Ke ke haga atalitali* ki ai, tatau aipe pe ʼe tuai mai!*+
Koteʼuhi ʼe hoko moʼoni anai.
Pea ʼe mole tauhala anai.
4 Sio ki te tagata fiameʼalahi,
ʼE mole faitotonu ia.
Kae ʼe maʼuli anai te tagata faitotonu ʼuhi ko tana agatonu.*+
5 ʼEi, ʼe kaka te vino,
Koia ʼe mole fakahoko anai e te tagata fiameʼalahi tana fakatuʼutuʼu.
ʼE ʼuakai ohage pe ko te Faitoka*
Pea ʼe mole makona ʼi he temi, ohage pe ko te mate.
ʼE hoko atu tana fakatahiʼi te ʼu puleʼaga fuli,
Pea mo tanaki mai te hahaʼi fuli kia ia.+
6 ʼE mole vaʼi anai koa la e natou fuli ʼaia* te tagata ʼaia, mo fai ni matetea ʼo ʼuhiga mo ia?+
ʼE natou ui anai:
‘Malaʼia ia ia ʼae ʼe ina tanaki ni meʼa ʼe mole ʼaʼana
Pea mo ina fakalahi tuʼumaʼu pe ʼona maʼua!
ʼE kaku anai ki ʼafea tana fai te ʼu meʼa ʼaia?
7 ʼE mole tutuʼu fakapunamaʼuli ake anai koa la te hahaʼi ʼae ʼe ke tuʼu maʼua ki ai?
ʼE natou ʼaʼala ake anai, mo natou luluʼi malohi anai koe,
Pea ʼe natou ʼave anai ʼou koloa.+
8 ʼEi, ʼe ʼave anai ʼou koloa e natou fuli ʼae ka toe ʼi te hahaʼi,
Koteʼuhi neʼe lahi te ʼu puleʼaga ʼae neʼe ke kaihaʼa,+
Pea neʼe ke fai ni ligi toto,
Mo ke maumauʼi te fenua,
Mo te ʼu kolo pea mo te hahaʼi.+
9 Malaʼia ia ia ʼae ʼe agakaka ke tupu ai hana foaki he koloa ki tona famili,*
ʼO ina fakatuʼu ai tona nofoʼaga ʼi he faʼahi maʼoluga,
Ke hao ai mai te malaʼia!
10 Kua fakalainoaʼi tou famili* ʼuhi ko ʼau fakatuʼutuʼu kaka.
Neʼe ke agahala pe kia koe totonu ʼi tau pulihi ni hahaʼi kaugamalie.+
11 ʼE kalaga anai he foʼi maka mai te kaupa,
Pea ʼe tali age anai e he lalago mai te ʼato.
12 Malaʼia ia ia ʼae ʼe ina laga he kolo ʼaki te ligi toto,
Mo ia ʼae ʼe ina fakatuʼu he kolo ʼaki te heʼe faitotonu!
13 Koʼeni, ʼe kinakina ni hahaʼi ki he meʼa ka tutu,
Pea ʼe gaʼegagaʼe ni puleʼaga ki he meʼa noa.
ʼE mole koa la ko te meʼa ʼaia ʼe loto ki ai ia Sehova ʼo te ʼatu kautau?+
14 ʼE iloʼi anai e te hahaʼi ʼi te kele katoa ʼe maʼu e Sehova te kololia,
Ohage pe ko te ʼaofi e te vai ia te takele ʼo te tai.+
15 Malaʼia ia ia ʼae ʼe ina fakainu ʼona kaumeʼa ʼaki he kava
Neʼe fio ʼaki he toe ita lahi, ke natou konana ai
Pea ke sio ki tonatou telefua.
16 ʼE lahi anai tou lainoa kae ʼe mole ke maʼu anai te kololia.
Ke ke toe inu mo koe, pea ke ha ai tou ʼuhiga heʼe silikosisio.*
ʼE ke toe inu anai mo koe te ipu ʼae ʼi te nima mataʼu ʼo Sehova,+
Pea ʼe ʼuʼufi anai tou kololia e te ufiufi.
17 ʼE hoko pe anai kia koe te agamalohi ʼae neʼe ke fai ki Lipane,
ʼO feia mo te maumau ʼae neʼe matataku ai te ʼu manu.
ʼEi, ʼe hoko anai te ʼu meʼa ʼaia he neʼe ke fai ni ligi toto,
Pea neʼe ke maumauʼi te fenua,
Mo te ʼu kolo pea mo te hahaʼi.+
18 Kotea koa te ʼaoga ʼo he fakatata,
ʼI tona kua ʼosi togi e te tagata tufuga?
Pea kotea koa te ʼaoga ʼo he fakatata ukamea* ʼe ina akoʼi ni loi,
Tatau aipe pe ʼe falala ki ai te tagata tufuga?
ʼE ina faʼu ni ʼatua ʼe mole honatou maʼuhiga pea ʼe mole palalau.+
19 Malaʼia ia ia ʼae ʼe ina ui ki he koga ʼakau: “ ʼAla ake la!”
Peʼe ina ui ki he maka ʼe mole palalau: “Tuʼu ake la ʼo akoʼi matou!”
20 Kae ʼe nofo ia Sehova ʼi tona fale lotu taputapu.+
Ke fakalogologo te kele katoa ʼi ʼona muʼa!’ ”+
3 Ko te faikole ʼaeni ʼa te polofeta ko Hapakuke, ohage ko hana tagilaulau:*
2 Sehova e, neʼe au logo ki te meʼa ʼae ʼe fakamatala ʼo ʼuhiga mo koe.
Sehova e, ʼe lahi toku manavahe ʼuhi ko ʼau gaue!
Ke ke fakahoko ʼau gaue ʼaia lolotoga te ʼu taʼu!*
Pea ke iloʼi e te hahaʼi ʼau gaue ʼaia lolotoga te ʼu taʼu!*
ʼOfa pe ke ke manatuʼi ʼo fakaha tou manavaʼofa moka hoko te maveuveu.+
Neʼe ʼaofi te lagi e tana pule fakaʼaliʼaliki,+
Pea neʼe vikiʼi ia ia ʼi te kele katoa.
4 Neʼe gigila ohage ko te malama.+
Pea neʼe tapa te malama mai tona nima,
ʼAe neʼe fufu ai tona malohi.
6 Neʼe tuʼu ai leva, pea neʼe ina fakagalulu te kele.+
Neʼe sio ki te ʼu puleʼaga pea neʼe natou tekelili.+
Neʼe maumauʼi te ʼu moʼuga heʼe gata,
Pea neʼe falele te ʼu kiʼi moʼuga ʼae ʼe tuʼu talu mai fualoa.+
ʼE ʼaʼana te ʼu ala ʼo te temi muʼa.
7 Neʼe au sio ki te malaʼia ʼae neʼe hoko ʼi te ʼu fale la ʼo Kusani.
Neʼe gaugaue te ʼu fale la ʼo te fenua ʼo Matiane.+
8 Sehova e, ʼe to koa tou hauhau ki te ʼu vai tafe?
ʼE mole ke fiafia koa la ʼuhi ko te ʼu vai tafe?
Peʼe ke fakahagahaga koa tou ita ki te tai?+
9 Neʼe ke tohoʼi ake tau nahau, pea kua ke tokalelei ke ke fakaʼaogaʼi.
Kua tuku age he gaue ki te ʼu kauʼi ʼakau* ʼo mulimuli ki he fuakava.* (Sela)
Neʼe ke vaeluaʼi te kele ʼaki te ʼu vai tafe.
10 Neʼe mamahi te ʼu moʼuga ʼi tanatou sisio kia te koe.+
Neʼe mapeʼe ni ʼua lalahi.
Neʼe gugulu te tai mai te loloto.+
Neʼe malaga ake te ʼu vai.
11 Neʼe tuʼu pe te laʼa mo te mahina ʼi ʼonā nofoʼaga matalelei.+
Neʼe alu ʼau kauʼi nahau ohage ko te malama.+
Neʼe gigila tau tao ohage ko te tapa ʼo te hila.
12 Neʼe ke foli te kele mo hou ita lahi,
Neʼe ke malamalaki* te ʼu puleʼaga ʼi tou ita.
13 Neʼe ke alu ʼo haofaki tau hahaʼi, ʼei, ʼo haofaki tau fakanofo.*
Neʼe ke tataʼo te pule ʼo te ʼapi ʼo te tagata agakovi.
Pea neʼe maumauʼi katoa. (Sela)
14 Neʼe ke hukiʼi te ʼu ʼulu ʼo ʼana tagata tau ʼaki pe ʼana mahafu,*
ʼI tanatou feleleʼi mai ke natou fakamavetevete ia matou.*
Neʼe natou fakafiafia ʼi tonatou nonoʼaga ke natou matehi ia ia ʼae ʼe lotomamahi.
15 Neʼe ke fakalaka ʼi te tai mo ʼau hosi,
ʼEi, ʼi te tai ʼae neʼe hou.
Neʼe kamata popo ʼoku hui,+
Pea neʼe tete ʼoku vaʼe.
Kae ʼe au atalitali pe ʼaki he lotofalala ki te ʼaho ʼo te mamahi,+
Koteʼuhi ʼe hoko anai kia natou ʼae ʼe natou tauʼi matou.
17 Tatau aipe pe ʼe mole fisi te ʼu fuʼu fiku,
Pea ʼe mole fua te ʼu gaueʼaga vite,
Tatau aipe pe ʼe mole tanaki ni fuaʼi oliveto,
Pea ʼe mole ʼi ai ni fua ʼo te ʼu gaueʼaga,
ʼEi, tatau aipe pe ʼe mole ʼi ai he faga ovi ʼi te lotoʼa,
Pea mo he faga pipi ʼi te fale manu,
18 Kae ʼe au fiafia anai ia Sehova,
ʼE au fiafia pe anai ʼuhi ko te ʼAtua ʼae ʼe ina haofaki au.*+
19 Ko te Tuʼi ʼAliki ko Sehova ʼe ko toku malohi.+
ʼE ina fakaliliu anai ʼoku vaʼe ke hage ko te ʼu vaʼe ʼo te ʼu tia,
Pea ʼe ina taki anai au ʼi te ʼu koga meʼa maʼoluga.+
Ki te pule ʼo te kau faimaholo. Ke ta fakatahi mo ʼaku meʼa faimaholo kauʼi uka.
ʼE lagi fakaʼuhiga “Faʼufua Mo He Lotomafana.”
Peʼe “ke haofaki ia matou mai.”
Peʼe lagi “He ʼe ko tonatou malohi ʼe ko tonatou ʼatua.”
Peʼe lagi “ ʼe mole matou mamate anai.”
Peʼe “fakatonutonuʼi.”
ʼE fakaʼuhiga ki te kau Kaletea, ʼae ko ʼonatou fili.
Peʼe lagi “tana tohoʼi ake tana heleta?”
Peʼe “lauʼi papa.”
Peʼe “talitali fakamalotoloto.”
Peʼe “hage ʼe tuai mai.”
Peʼe lagi “tui,” peʼe “lotofalala.”
Vakaʼi Te ʼu Kupu.
Peʼe “fai anai koa la e natou fuli ʼaia he taʼaga lea ʼo ʼuhiga mo.”
Peʼe “puleʼaga.” Hep. “fale.”
Peʼe “puleʼaga.” Hep. “fale.”
Peʼe lagi “pea ke ke siʼia.”
Peʼe “fakatata ukamea neʼe haka.”
Peʼe “hiva mate.”
Peʼe lagi “ ʼi tomatou temi.”
Peʼe lagi “ ʼi tomatou temi.”
Vakaʼi Te ʼu Kupu.
Peʼe “neʼe haofaki te hahaʼi e.”
Peʼe lagi “kauʼi nahau.”
Peʼe lagi “Neʼe kua fai e te ʼu telepi he ʼu fuakava.”
Hep. “haha” (ohage ko te haha ʼo te fulumeto).
Vakaʼi Te ʼu Kupu.
Hep. “kauʼi ʼakau.”
Hep. “ia au.”
Hep. “neʼe tete toku fatu.”
Peʼe “ ʼAtua ʼo toku haofaki.”