SOFONI
1 Neʼe palalau leva ia Sehova kia Sofoni,* ʼi te temi pule ʼo te hau ʼo Suta ko Sosiasi,+ te foha ʼo Amone.+ Ko Sofoni neʼe ko te foha ʼo Kusi, te foha ʼo Ketalia, te foha ʼo Amalia, te foha ʼo Esekiasi.
2 ʼE ui e Sehova: “ ʼE au pulihi anai ia meʼa fuli ʼi te fuga kele.+
3 ʼE au pulihi anai te tagata mo te manu.
ʼE au pulihi anai te ʼu manulele mo te ʼu ika ʼo te tai,+
Pea mo te ʼu meʼa fakatupu higa,*+ ʼo feia mo te kau agakovi.
ʼEi, ʼe au toʼo anai te hahaʼi fuli ʼi te fuga kele,” ko te ui ʼaia ʼa Sehova.
4 “ ʼE au faoʼi anai toku nima ke au fakafeagai ki Suta,
Pea mo te hahaʼi fuli ʼo Selusalemi.
Pea ʼe au toʼo anai mai te koga meʼa ʼaeni te ʼu meʼa fuli ʼa Paale,+
Mo te ʼu higoa ʼo te kau pelepitelo ʼo te ʼu ʼatua matapule, ʼo feia mo te ʼu pelepitelo tauhi taula ʼatua.+
5 ʼE au toe toʼo anai mo te hahaʼi ʼae ʼe tulolo ia muʼa ʼo te foʼi kautau ʼo te ʼatu lagi ʼi te ʼu fuga fale,+
Pea mo natou ʼae ʼe tulolo ia muʼa ʼo Sehova mo fakapapau ʼe natou nonofo agatonu anai kia te ia+
Kae ʼe natou toe fakapapau foki ʼe natou nonofo agatonu anai kia Malekame.*+
6 ʼE au toe pulihi anai mo natou ʼae ʼe situʼa kia Sehova+
Pea ʼe mole natou kumi peʼe fakafehuʼi ia Sehova.”+
7 Kotou fakalogologo ia muʼa ʼo te Tuʼi ʼAliki ko Sehova, koteʼuhi kua ovi mai te ʼaho ʼo Sehova!+
Kua teuteuʼi e Sehova he sakilifisio, pea kua ina fakamaʼoniʼoniʼi* ʼana hahaʼi fakaafe.
8 “ ʼI te ʼaho ʼo te sakilifisio ʼa Sehova, ʼe au fakamauʼi anai te kau ʼaliki,
Mo te ʼu foha ʼo te hau,+ pea mo natou fuli ʼae ʼe natou teu ohage ko te ʼu matapule.
9 ʼI te ʼaho ʼaia, ʼe au fakamauʼi anai ia natou fuli ʼae ʼe hake ki he tuʼuʼaga ʼe maʼoluga,*
Mo natou ʼae ʼe natou fakahoko ni agamalohi mo ni agakaka ʼi te ʼapi ʼo tonatou pule.”
10 ʼE ui e Sehova: “ ʼI te ʼaho ʼaia
ʼE logo anai ki he kalaga mai te Matapa ʼo Te ʼu Ika,+
Mo he lauga mai te Kolo Foʼou,+
Pea mo he toe logoaʼa mai te ʼu kiʼi moʼuga.
11 Kotou lauga, hahaʼi ʼo Maketesi,*
He ʼe kua matehi te hahaʼi faikoloa fuli.
Kua pulihi ia natou fuli ʼae ʼe natou fua te siliva.
12 ʼI te temi ʼaia, ʼe au toʼo anai ni malama ʼo alu ʼo huke ia Selusalemi,
Pea ʼe au fakamauʼi anai te hahaʼi ʼae ʼe fakafifimalie, pea mo natou ui ʼi tonatou loto:
‘ ʼE mole fai anai e Sehova he meʼa ʼe lelei, pea ʼe mole ina fai anai he meʼa ʼe kovi.’+
13 ʼE ʼave anai ʼonatou koloa pea ʼe maumauʼi anai ʼonatou ʼapi.+
ʼE natou laga anai ni ʼapi, kae ʼe mole natou nofoʼi anai,
Pea ʼe natou to anai ni gaueʼaga vite, kae ʼe mole natou inu anai te vino.+
14 Kua ovi mai te ʼaho lahi ʼo Sehova!+
ʼEi, kua ovi mai pea ʼe fakavilivili mai!+
ʼE fakamataku te logoaʼa ʼo te ʼaho ʼo Sehova.+
ʼI te ʼaho ʼaia, ʼe kalaga te tagata tau.+
15 Ko te ʼaho ʼaia ʼe ko he ʼaho ʼo te hauhau,+
ʼE ko he ʼaho ʼo te mamahi mo te tuʼania,+
ʼE ko he ʼaho ʼo te afā mo te maumau,
ʼE ko he ʼaho fakapoʼuli gaogao,+
ʼEi, ʼe kauʼaoa mo fakapoʼuli gaogao,+
16 ʼE ko he ʼaho ʼe logo ai te pupuhi ʼo te fakatagi pupuhi pea mo fai te kalaga tau,+
Ke ʼohofi te ʼu kolo tau pea mo te ʼu tule maʼoluga.+
17 ʼE au fakamamahiʼi anai te hahaʼi,
Pea ʼe natou haʼele anai ohage ko ni kau kivi,+
Koteʼuhi neʼe natou agahala kia Sehova.+
ʼE mole maʼuhiga anai tonatou toto ohage pe ko te efu,
Pea ʼe mole maʼuhiga anai tonatou kakano* ohage pe ko he ʼu faifekau manu.+
18 ʼE mole feala anai ke haofaki natou e tanatou siliva peʼe ko tanatou aulo ʼi te ʼaho ʼo te hauhau ʼo Sehova.+
ʼE hage anai tona hauhau ko he afi ʼe ina tutu te kele katoa,+
He ʼe ina fakaʼauha anai te hahaʼi fuli ʼo te kele, ʼei, ʼe fakamataku anai tana fakaʼauha.”+
2 Pea ʼi muʼa ʼo te fakahoko ʼo te fakatotonu,
ʼI muʼa ʼo te fakalaka ʼo te ʼaho ohage ko he kiliʼi fulumeto ʼe viligia,
ʼI muʼa ʼo te to kia koutou ia te hauhau ʼo Sehova,+
ʼI muʼa ʼo te hoko mai kia koutou ia te ʼaho ʼo te hauhau ʼo Sehova,
3 Kotou kumi ia Sehova,+ kau agavaivai fuli ʼo te kele,
ʼAe ʼe fakalogo ki ʼana lao faitotonu.
Kotou kumi te faitotonu, pea mo kotou kumi te agavaivai.
ʼE mahino ia, ʼe* puipui anai koutou ʼi te ʼaho ʼo te hauhau ʼo Sehova.+
4 ʼE tuʼu lavaki anai te kolo ko Kasa,
Pea ʼe maumauʼi anai ia Asekaloni.+
5 “Malaʼia kia natou ʼae ʼe nonofo ʼi te matatai, ia te puleʼaga ʼo te kau Keleti!+
ʼE fakatuʼā koutou e Sehova.
ʼE au fakaʼauha anai ia koe, Kanaane, fenua ʼo te kau Filisitini,
ʼO mole ke toe maʼu anai hau hahaʼi.
6 ʼE liliu anai te matatai ko he ʼu koga meʼa lunaʼia,
ʼE maʼu ai ni vai keli maʼa te kau tauhi ovi pea mo ni lotoʼa maʼa te ʼu ovi.
7 ʼE liliu anai ko he potu fenua maʼa te toega ʼo te hahaʼi ʼo Suta.+
Pea ʼe fafaga ai anai natou.
ʼE natou takokoto anai ʼi te afiafi ʼi te ʼu ʼapi ʼo Asekaloni,
He ʼe tokaga anai ia Sehova tonatou ʼAtua kia natou,
Pea ʼe ina toe fakaliliu mai anai ia natou ʼae neʼe ʼave popula.”+
8 “Neʼe au logo ki te ʼu manukinuki ʼae neʼe fai e Moape+ pea mo te ʼu leakovi ʼa te kau Amone.+
Neʼe natou vaʼi taku hahaʼi mo fiatuʼu ʼo fakamatakuʼi natou ke natou faʼao tonatou fenua.”+
9 ʼE ui e Sehova ʼo te ʼatu kautau, te ʼAtua ʼo Iselaele: “Koia, ʼe au tala moʼoni atu,
ʼE liliu anai ia Moape ohage ko Sotoma,+
Pea mo te kau Amone ohage ko Komola,+
Ko he koga meʼa ʼe ʼaofi e te vao talatala, mo te masima pea ʼe ko he toafa ʼo talu ai.+
ʼE ʼave anai ʼonatou koloa e te toega ʼo taku hahaʼi,
Pea ʼe toʼo anai ʼanatou meʼa fuli e te toega ʼo toku puleʼaga.
10 ʼE hoko anai te meʼa ʼaia kia natou ʼuhi ko tanatou fiameʼalahi,+
Mo tanatou fiatuʼu mo vaʼi te hahaʼi ʼa Sehova ʼo te ʼatu kautau.
11 ʼE fakamataku anai te ʼu meʼa ʼae ka fai e Sehova kia natou,
Koteʼuhi ʼe ina maumauʼi anai te ʼu ʼatua fuli ʼo te kele,
Pea ʼe tulolo anai te hahaʼi ʼo te ʼu motu fuli ʼi ʼona muʼa,*+
ʼO natou tahi fai pe ʼi tona nofoʼaga.
12 Kau Etiopea, ʼe au toe matehi anai mo koutou ʼaki taku heleta.+
13 ʼE ina faoʼi anai tona nima ki te potu noleto pea ʼe ina fakaʼauha anai ia Asilia.
ʼE ina fakaliliu anai ia Ninive ʼo magemage+ ohage ko te toafa.
14 ʼE takokoto ai anai ni faga manu, ʼei, te ʼu faʼahiga manu kehekehe ʼo te vao.
ʼE momoe anai te ʼu pelikano pea mo te ʼu eliso ʼi ʼona ʼuluʼi pou, ʼi te poʼuli.
ʼE logo anai ki he hiva ʼi te matapa fakamalama.
ʼE ʼi ai anai ni maumau ʼi te huʼaga ʼo te kolo,
Koteʼuhi ʼe ha anai te ʼu lauʼi papa ʼae ʼe fai ʼaki te sete.
15 Koʼena la te kolo ʼae ʼe fiameʼalahi, mo heka ʼi te fimalie,
Pea mo ina ui: ‘ ʼE mole he tahi ʼe hage ko au.’
ʼI te temi nei, ʼe ko he meʼa fakalialia,
ʼE ko he nofoʼaga ʼo te ʼu manu ʼo te vao!
Ko natou fuli ʼae ʼe fakalaka ovi ki ai, ʼe natou veka anai mo hiki itaita ʼonatou foʼi tuke.”+
3 Malaʼia ki te kolo ʼae ʼe agatuʼu, mo heʼe maʼa pea mo ina fakamamahiʼi tana hahaʼi!+
2 Neʼe mole fia fakalogo,+ pea neʼe mole ina tali ke fakatonutonuʼi ia ia.+
Neʼe mole falala kia Sehova,+ pea neʼe mole fakaovi ki tona ʼAtua.+
3 ʼE hage ʼona ʼaliki ʼi te kolo ko ni laione ʼe gugulu.+
Pea ʼe hage ʼona tuʼi fakamau ko ni lupo ʼe natou kumi meʼa kai ʼi te poʼuli.
ʼE mole natou tuku pe la he hui ke natou gugu ʼi te ʼaho ake.
4 ʼE agapauʼu ʼana polofeta mo agakaka.+
5 Ko Sehova, ʼae ʼe nofo ai, ʼe faitotonu+ pea ʼe mole ina fai he meʼa ʼe kovi.
ʼI te uhu fuli, ʼe ina fakaha ʼana fakamau,+
Pea ʼe ina fai tuʼumaʼu te faʼahi ʼaia ohage pe ko te hopo ake ʼo te laʼa.
Kae ʼe mole ufiufi ia ia ʼae ʼe heʼe faitotonu.+
6 “Neʼe au fakaʼauha ni puleʼaga, pea neʼe holo ʼonatou tule.
Neʼe au maumauʼi ʼonatou ala, ʼo mole fakalaka ai he tahi.
Kua maumauʼi ʼonatou kolo, ʼe mole kei ʼi ai he tagata, ʼei, ʼe mole kei nofo ai he tahi.+
7 Neʼe au ui: ‘ ʼE mahalo ia, ʼe ke manavasiʼi anai kia te au pea ʼe ke tali anai tou fakatonutonuʼi,’+
Kae neʼe ʼasili age pe tanatou loto ʼae ke natou fai te meʼa ʼae ʼe kovi.+
8 ʼE ui e Sehova: ‘Koia, kotou haga talitali mai,*+
ʼO aʼu ki te ʼaho ʼae ka au tuʼu ake ai ʼo ʼave ʼonatou koloa,*
He ʼe au fakatotonu ke fakatahitahi te hahaʼi, ʼei, ke fakatahitahi te ʼu puleʼaga
Ke au fakato kia natou toku ita, ʼei, toku hauhau katoa.+
Pea ʼe hage anai toku hauhau ko he afi ʼe ina tutu te kele katoa.+
9 ʼI te temi ʼaia, ʼe au fetogi anai te lea ʼa te hahaʼi ʼaki he lea maʼa,
Ke natou vikiʼi fuli ai te huafa ʼo Sehova
Pea mo tauhi fakatahi kia te ia.’+
10 ʼE ʼomai anai mai te potu fenua ʼo te ʼu vai tafe ʼo Etiopea
Ia natou ʼae ʼe tagi mai kia te au, ia te taʼahine ʼo taku hahaʼi ʼae neʼe mavetevete. Pea ʼe natou ʼaumai anai hoku meʼa ʼofa.+
11 ʼE mole ke toe ufiufi anai ʼi te ʼaho ʼaia,
ʼUhi ko ʼau agatuʼu fuli ʼae kia te au,+
He ʼe au pulihi anai ʼi tou kolo ia natou ʼae ʼe fiatuʼu mo fiameʼalahi.
Pea ʼe mole ke toe fiameʼalahi anai ʼi toku moʼuga taputapu.+
12 ʼE au tuku anai ʼi tou kolo he hahaʼi agavaivai mo fiamalalo,+
Pea ʼe natou kumi nonoʼaga anai ʼi te huafa ʼo Sehova.
13 ʼE mole heʼe faitotonu anai+ ia te toega ʼo Iselaele.+
ʼE mole natou loi anai, pea ʼe mole natou kakaʼi anai te hahaʼi.
ʼE natou kakai mo takokoto anai, pea ʼe mole fakamatakuʼi anai natou e he tahi.”+
14 Taʼahine ʼo Sione, kalaga fakafiafia!
Hahaʼi ʼo Iselaele, kotou kalaga he ʼe kua kotou malo!+
Taʼahine ʼo Selusalemi, fakafiafia mo tou loto katoa!+
15 Neʼe to’o e Sehova te ʼu tautea ʼae neʼe tonu ke fakahoko kia koe.+
Neʼe ina kapu tou fili.+
ʼE nofo ia Sehova, te Hau ʼo Iselaele ʼi tou kolo.+
ʼE mole ke toe mataku anai naʼa hoko kia koe he malaʼia.+
16 ʼE ui anai ki Selusalemi ʼi te ʼaho ʼaia:
“Hahaʼi ʼo Sione, ʼaua naʼa kotou matataku.+
Pea ʼaua naʼa kotou lotovaivai.*
17 ʼE nofo ia Sehova tou ʼAtua ʼi tou kolo.+
ʼE ina haofaki anai koutou he ʼe mafimafi te ʼAtua.
ʼE fiafia lahi anai ʼo ʼuhiga mo koutou.+
ʼE fiafia* anai ʼuhi ko tona ʼofa kia koutou.
ʼEi, ʼe fiafia anai ʼo ʼuhiga mo koutou pea mo kalaga fakafiafia.
18 ʼE au fakatahiʼi anai ia natou ʼae neʼe lotomamahi he neʼe mole kei natou kau ki ʼou ʼaho lalahi.+
Neʼe ʼave mamaʼo natou, he neʼe fakalainoaʼi natou.+
19 Koʼeni, ʼe au fakafeagai anai ʼi te temi ʼaia kia natou fuli ʼae ʼe natou fakamamahiʼi koutou.+
ʼE au haofaki anai ia natou ʼae ʼe ketu,+
Pea ʼe au fakatahiʼi anai ia natou ʼae neʼe mavetevete.+
ʼE au fakaliliu anai ia natou ko he hahaʼi ʼe vikiʼi pea mo iloa
ʼI te fenua katoa ʼae neʼe natou ufiufi ai.
20 ʼE au taki anai koutou ki tokotou fenua ʼi te temi ʼaia,
ʼEi, ʼe au fakatahiʼi anai koutou ʼi te temi ʼaia.
ʼE au fakaliliu anai ia koutou ko he hahaʼi ʼe vikiʼi pea mo iloa+ ʼi te hahaʼi fuli ʼo te kele,
Moka ʼe au toe fakaliliu mai ʼakotou hahaʼi popula. Pea ʼe kotou sisio anai ki ai,” ko te ui ʼaia ʼa Sehova.+
Ko tona fakaʼuhiga “Neʼe Fufu (Taupau Fakalelei) e Sehova.”
Neʼe lagi ko he ʼu meʼa peʼe ko he ʼu gaue neʼe pipiki ki te tauhi taula ʼatua.
Vakaʼi Te ʼu Kupu.
Vakaʼi Te ʼu Kupu.
Peʼe “te huʼaga.” ʼE lagi fakaʼuhiga ki te tuʼuʼaga maʼoluga ʼae neʼe tuʼu ai te hekaʼaga fakahau.
ʼE mahino ia, ʼe ko he koga meʼa ʼi Selusalemi ʼe tuʼu ovi ki te Matapa ʼo Te ʼu Ika.
Hep. “gākau.”
Peʼe “ ʼE lagi.”
ʼE fakaʼuhiga ki ʼana hahaʼi.
Peʼe “ ʼi te fetapa.”
Peʼe “atolasio anai te hahaʼi ʼo te ʼu motu fuli kia te ia.”
Peʼe “tauteaʼi.”
Peʼe “kotou faʼa kataki ʼo talitali mai.”
Peʼe lagi “ ʼo fai he fakamoʼoni.”
Hep. “ ʼaua naʼa vaivai ʼou nima.”
Peʼe “nofo fakalogologo.”