AKESEO
1 Neʼe palalau ia Sehova ki te polofeta ko Akeseo,*+ ʼi te lua taʼu ʼo te pule ʼa Taliusi, ʼi te ʼuluaki ʼaho ʼo te ono mahina. Pea neʼe fakaha leva e te polofeta te folafola ʼaeni ʼa te ʼAtua ki te kovana ʼo Suta ko Solopapele,+ te foha ʼo Salatiele pea mo te pelepitelo lahi ko Sosue, te foha ʼo Seosatake:
2 “Koʼeni te meʼa ʼae ʼe ui e Sehova ʼo te ʼatu kautau: ‘ ʼE ui e te hahaʼi: “ ʼE heʼeki hoko mai te temi ʼae ke laga* ai te fale* ʼo Sehova.” ’ ”+
3 Pea neʼe hoko atu pe te fakaha e te polofeta ko Akeseo+ te folafola ʼa Sehova, ʼo ina ui: 4 “ ʼE ko te temi koa ʼaeni ke kotou nonofo ai ʼi ʼokotou ʼapi matalelei, kae ʼe tuku maumau te fale ʼaeni?+ 5 Koʼeni leva te meʼa ʼae ʼe ui e Sehova ʼo te ʼatu kautau: ‘Kotou fakakaukauʼi fakalelei tokotou aluʼaga. 6 Neʼe lahi takotou to te pulapula, kae ʼe veliveli pe te meʼa ʼae ʼe kotou utu.+ ʼE kotou kakai, kae ʼe mole kotou makokona. ʼE kotou iinu, kae ʼe mole kotou malilie. ʼE kotou tui he ʼu kofu, kae ʼe mole kotou mafana. Pea ko ia ʼae ʼe gaue, ʼe ina ʼai tona totogi ki he taga ʼe pu.’ ”
7 “Koʼeni te meʼa ʼae ʼe ui e Sehova ʼo te ʼatu kautau: ‘Kotou fakakaukauʼi fakalelei tokotou aluʼaga.’
8 “ ʼE ui e Sehova: ‘Kotou hake ki te moʼuga, mo ʼaumai ai ni ʼakau+ pea ke kotou laga te fale,+ ke au fiafia ai pea ke fakakololiaʼi au.’+
9 “ ʼE ui e Sehova ʼo te ʼatu kautau: ‘Neʼe kotou fakaʼamu ke lahi te taʼukai, kae neʼe veliveli pe te meʼa ʼae neʼe kotou utu. Pea neʼe kotou ʼave kio koutou, kae neʼe au puhiʼi ʼo puli ai.+ Kotea tona tupuʼaga? He ʼe kotou feleleʼaki ʼo tahi tokaga ki tona ʼapi, kae ʼe tuku maumau pe toku fale.+ 10 Ko te tupuʼaga la ʼaia ʼo te taʼofi e te lagi tona hahau pea ʼe mole fua te kele. 11 Pea neʼe au fakato te taʼi laʼa ki te kele mo te ʼu moʼuga. Koia, ʼe hoge ai te fulumeto, mo te vino foʼou, mo te lolo pea mo te pulapula. ʼE kotou mamahi ai, ʼo feia mo takotou faga manu, pea ʼe mole he fua ʼo takotou gaue kinakina.’ ”
12 Neʼe fakalogo ia Solopapele,+ te foha ʼo Salatiele,+ mo te pelepitelo lahi ko Sosue, te foha ʼo Seosatake,+ ʼo feia mo te hahaʼi fuli ki te leʼo ʼo Sehova tonatou ʼAtua. ʼEi, neʼe natou fakalogo fuli ki te ʼu folafola ʼa te polofeta ko Akeseo, he neʼe fekauʼi ia ia e Sehova tonatou ʼAtua kia natou. Pea neʼe manavasiʼi leva te hahaʼi kia Sehova.
13 Pea neʼe ui leva e Akeseo, te tagata ʼave logo ʼa Sehova ki te hahaʼi, ʼo mulimuli pe ki te gaue ʼae neʼe tuku age e Sehova: “ ʼE ui e Sehova: ‘ ʼE au nofo mo koutou.’ ”+
14 Neʼe uga ai leva e Sehova* te ʼatamai+ ʼo te kovana ʼo Suta ko Solopapele,+ te foha ʼo Salatiele, mo te ʼatamai ʼo te pelepitelo lahi ko Sosue,+ te foha ʼo Seosatake pea mo te ʼatamai ʼo te hahaʼi fuli ke natou fakahoko te gaue. Neʼe natou toe laga ai te fale ʼo Sehova ʼo te ʼatu kautau, ia tonatou ʼAtua.+ 15 Neʼe ko te 24 ʼaho ʼaia ʼo te 6 mahina, ʼi te 2 taʼu ʼo te pule ʼa Taliusi.+
2 ʼI te 21 ʼaho ʼo te 7 mahina, neʼe fakaha e te polofeta ko Akeseo+ ia te folafola ʼaeni ʼa Sehova: 2 “Fakalelei siʼou loto, ke ke palalau ki te kovana ʼo Suta ko Solopapele,+ te foha ʼo Salatiele, mo te pelepitelo lahi ko Sosue,+ te foha ʼo Seosatake+ pea mo te hahaʼi fuli. Pea ke fehuʼi age kia natou: 3 ‘Ko ai ʼae ia koutou neʼe sio ki te kololia ʼo te fale* ʼaeni ʼi te temi muʼa?+ Pea kotea takotou manatu ki ai ʼi te temi nei? ʼE mole hage koa la ko he meʼa noa?’+
4 “ ʼE ui e Sehova: ‘Kae ʼi te lakaga nei Solopapele, ke ke lotomalohi, ʼo feia mo koe Sosue, te pelepitelo lahi foha ʼo Seosatake, ke ke lotomalohi.’
“ ʼE ui e Sehova: ‘Hahaʼi fuli ʼo te fenua, ke kotou lotomalohi+ pea ke kotou gaue.’
“Pea ʼe ui e Sehova ʼo te ʼatu kautau: ‘Koteʼuhi ʼe au nofo mo koutou.+ 5 Ke kotou manatuʼi te fakapapau ʼae neʼe au fai atu ʼi takotou mavae mai Esipito.+ Pea ʼe kei au takitaki pe koutou ʼaki toku laumalie.*+ ʼAua naʼa kotou matataku.’ ”+
6 “Koʼeni te meʼa ʼae ʼe ui e Sehova ʼo te ʼatu kautau: ‘ ʼE kei toe pe he kiʼi temi, pea ʼe au toe luluʼi anai te lagi, mo te kele, mo te tai pea mo te ʼu fenua.’+
7 “ ʼE ui e Sehova ʼo te ʼatu kautau: ‘ ʼEi, ʼe au luluʼi anai te ʼu puleʼaga fuli, pea ʼe hu anai te ʼu meʼa maʼuhiga ʼo te ʼu puleʼaga fuli ki te fale ʼaia.+ Pea ʼe fonu anai te fale ʼaia ko toku kololia.’+
8 “ ʼE ui e Sehova ʼo te ʼatu kautau: ‘ ʼE ʼaʼaku te siliva, ʼo feia mo te aulo.’
9 “ ʼE ui e Sehova ʼo te ʼatu kautau: ‘ ʼI te ka haʼu ʼe maʼu anai e te fale ʼaeni he kololia ʼe lahi age ʼi te kololia ʼae neʼe ina maʼu ʼi te temi muʼa.’+
“ ‘Pea ʼe au fakatuʼu anai ʼi te koga meʼa ʼaeni te tokalelei,’+ ko te ui ʼaia ʼa Sehova ʼo te ʼatu kautau.”
10 ʼI te 24 ʼaho ʼo te 9 mahina, ʼi te 2 taʼu ʼo te pule ʼa Taliusi, neʼe fakaha e Sehova ki te polofeta ko Akeseo+ tana folafola ʼaeni: 11 “Koʼeni te meʼa ʼae ʼe ui e Sehova ʼo te ʼatu kautau: ‘Fakalelei siʼou loto, ke ke fai ki te kau pelepitelo te fehuʼi ʼaeni ʼo ʼuhiga mo te lao:+ 12 “Kapau ʼe ʼai e he tagata he kanoʼi manu ʼe taputapu ki tona loto kofu, pea ʼe lave tona kofu ki he pane, peʼe ki he meʼa kai, peʼe ki he vino, peʼe ki he lolo peʼe ki he tahi age meʼa kai, ʼe liliu anai koa te meʼa ʼaia ʼo taputapu?” ’ ”
Neʼe tali e te kau pelepitelo: “Kailoa ia!”
13 Pea neʼe fehuʼi leva e Akeseo: “Kapau ʼe fāfā he tahi ki te ʼu meʼa ʼaia, kae ʼe heʼe maʼa koteʼuhi neʼe fāfā ki he sino mate,* ʼe heʼe maʼa anai koa te ʼu meʼa ʼaia?”+
Neʼe tali e te kau pelepitelo: “ ʼEi, ʼe heʼe maʼa anai.”
14 Pea neʼe ui e Akeseo: “ ‘ ʼE ko te aluʼaga ʼaia ʼo te hahaʼi ʼaeni, pea ʼe ko te aluʼaga ʼaia ʼo te puleʼaga ʼaeni ʼi ʼoku muʼa,’ ko te ui ʼaia ʼa Sehova, ‘pea ʼe toe feia mo ʼanatou gaue fuli. ʼE heʼe maʼa te ʼu sakilifisio ʼae ʼe natou momoli mai kia te au.’
15 “ ‘Kae ʼi te lakaga nei, fakalelei siʼokotou ʼu loto, ke kotou fakakaukauʼi fakalelei te faʼahi ʼaeni ʼo kamata atu ʼi te ʼaho nei: Kotea ʼae neʼe hoko ʼi muʼa ʼo te toe laga ʼo te fale lotu ʼo Sehova?+ 16 ʼI te temi ʼaia, neʼe alu he tahi ki he tuʼuga fulumeto pea neʼe fakaʼamu ke ina fafaʼo ni ʼana kato ʼe 20, kae neʼe ko ʼana kato pe ʼe 10. Pea neʼe alu he tahi ki te lomiʼaga vite ke ina ʼuʼutu ni ʼana foʼi hina ʼe 50, kae neʼe ko ʼana foʼi hina pe ʼe 20.+ 17 Neʼe au maumauʼi ʼakotou taʼukai, ʼei, ʼakotou gaue fuli, ʼaki he mahaki, mo he ʼu matagi vevela+ pea mo he ʼuamaka, kae neʼe mole toe liliu mai he tahi kia te au,’ ko te ui ʼaia ʼa Sehova.
18 “ ‘Fakalelei siʼokotou ʼu loto, ke kotou fakakaukauʼi fakalelei te faʼahi ʼaeni ʼo kamata atu ʼi te ʼaho nei. Ko te 24 ʼaho ʼaeni ʼo te 9 mahina, te ʼaho ʼae neʼe fakatuʼu ai te ʼu fakatafito ʼo te fale lotu ʼo Sehova.+ ʼEi, ke kotou fakakaukauʼi fakalelei te faʼahi ʼaeni: 19 ʼE mole kei ʼi ai he pulapula ʼi te fale tanakiʼaga fulumeto.+ Pea ʼe heʼeki fua te ʼu fuʼu vite, mo te ʼu fuʼu fiku, mo te ʼu fuʼu kelenate pea mo te ʼu fuʼu oliveto. Kae ʼo kamata atu ʼi te ʼaho nei, ʼe au tapuakiʼi anai ia koutou.’ ”+
20 Pea neʼe toe palalau ia Sehova ki te polofeta ko Akeseo ʼi te 24 ʼaho ʼo te mahina.+ Neʼe ina ui age ki ai: 21 “Ke ke ui ki te kovana ʼo Suta ko Solopapele: ‘ ʼE au luluʼi anai te lagi mo te kele.+ 22 ʼE au maumauʼi anai te hekaʼaga fakahau ʼo te ʼu puleʼaga pea ʼe au pulihi anai te malohi ʼo te ʼu puleʼaga.+ ʼE au maumauʼi anai te ʼu saliote tau pea mo matehi ia natou ʼae ʼe heheka ai. ʼE mamate anai te ʼu hosi fuli pea ʼe fematematehiʼaki pe anai ia natou ʼae ʼe heheka ai ʼaki ʼanatou heleta.’ ”+
23 “ ʼE ui e Sehova ʼo te ʼatu kautau: ‘ ʼI te ʼaho ʼaia, ʼe au toʼo anai ia koe, taku tagata faifekau ko Solopapele,+ te foha ʼo Salatiele,’+ ko te ui ʼaia ʼa Sehova, ‘pea ʼe au fakaʼaogaʼi anai ia koe ohage ko hoku mama fakailoga, he ʼe ko koe ʼae neʼe au filifili,’ ko te ui ʼaia ʼa Sehova ʼo te ʼatu kautau.”
Ko tona fakaʼuhiga “Neʼe Tupu Ake ʼi He ʼAho Lahi.”
Peʼe “toe laga.”
Peʼe “fale lotu.”
Hep. “Neʼe uga ai leva e Sehova te ʼatamai ʼo.”
Peʼe “fale lotu.”
Peʼe lagi “Pea neʼe nofo toku laumalie ʼi te lotolotoiga ʼo koutou.”
Hep. nèphèsh. Vakaʼi Te ʼu Kupu.