MALAKIA

1 Koʼeni te logo ʼa te ʼAtua:

Koʼeni te folafola ʼae neʼe fakaha e Sehova ki Iselaele ʼaki ia Malakia:*

2 ʼE ui e Sehova: “Neʼe au ʼofa ia koutou.”+

Kae ʼe kotou ui mai koutou: “Neʼe ke fakaha feafeaʼi mai tou ʼofa?”

ʼE ui e Sehova: “Neʼe mole koa la tau tehina ia Esau mo Sakopo?+ Neʼe au ʼofa ia Sakopo, 3 kae neʼe au fehiʼa ia Esau,+ pea neʼe au maumauʼi ʼona moʼuga+ mo liʼaki tona tofiʼa ki te ʼu kuli vao ʼo te toafa.”+

4 “ ʼE ui e Etome: ‘Neʼe maumauʼi tomatou fenua, kae ʼe matou toe liliu mai anai ʼo laga te ʼu meʼa ʼae neʼe maumauʼi.’ Kae koʼeni te folafola ʼa Sehova ʼo te ʼatu kautau: ‘ ʼE natou toe laga anai te fenua, kae ʼe au toe maumauʼi anai. ʼE fakahigoaʼi anai ia natou ko “te fenua ʼo te agakovi” pea mo “te hahaʼi ʼae neʼe fakatuʼā e Sehova ʼo talu ai.”+ 5 ʼE kotou sisio mata anai ki ai, ʼo kotou ui: “Ke logologona te maʼoluga ʼo Sehova ʼi te fenua katoa ʼo Iselaele!” ’ ”

6 “ ‘ ʼE fakaʼapaʼapa he foha ki tana tamai,+ mo he kaugana ki tona pule. Koia kapau ko au ko he tamai,+ ʼe ʼifea te fakaʼapaʼapa ʼae ʼe tonu ke fai mai?+ Pea kapau ko au ko he pule, ʼe ʼifea te manavasiʼi* ʼae ʼe tuha mo au?’ ko te fehuʼi ʼaia ʼa Sehova ʼo te ʼatu kautau kia koutou, kau pelepitelo ʼae ʼe kotou meʼa noaʼi toku huafa!+

“ ‘Kae ʼe kotou ui: “Kotea ʼae neʼe matou meʼa noaʼi ai tou huafa?” ’

7 “ ‘ ʼI takotou momoli he meʼa kai heʼe maʼa ʼi toku ʼaletale.’

“ ‘Pea ʼe kotou ui: “Neʼe matou ʼulihi feafeaʼi ia koe?” ’

“ ‘ ʼI takotou ui ʼae: “ ʼE fakalialia te laupapa ʼo Sehova.”+ 8 Pea ka kotou momoli he sakilifisio ko he manu ʼe kivi, ʼe kotou ui koutou: “ ʼE mole ko he meʼa ia ʼe kovi.” Pea ka kotou momoli he manu ʼe ketu peʼe mahaki, ʼe kotou ui koutou: “ ʼE mole ko he meʼa ia ʼe kovi.” ’ ”+

ʼE ui e Sehova ʼo te ʼatu kautau: “Fakalelei siʼou loto, kae ʼahiʼahi momoli muʼa ki tou kovana. ʼE fiafia anai koa kia koe peʼe ke maʼu anai koa tona ʼofa?”

9 ʼE ui e Sehova ʼo te ʼatu kautau: “Fakalelei siʼokotou ʼu loto, ʼi te temi nei kotou kole ki te ʼAtua tona manavaʼofa. Ko ai ʼae ia koutou ʼe feala ke ina maʼu tona manavaʼofa ʼi te taʼi molaga ʼaia?”

10 ʼE ui e Sehova ʼo te ʼatu kautau: “Ko ai la ia koutou ʼe lotolelei ke ina pupunu te ʼu matapa?*+ He ʼe tatau pe la mo te tafu ʼo te afi ʼi toku ʼaletale, ʼe tonu ke totogi koutou.+ ʼE mole au fiafia kia koutou, pea ʼe mole au leleiʼia te ʼu molaga ʼae ʼe kotou momoli mai.”+

11 ʼE ui e Sehova ʼo te ʼatu kautau: “ ʼE iloa anai toku huafa ʼi te ʼu puleʼaga mai te hopoʼaga ʼo te laʼa ki tona toʼaga.*+ ʼE kohu anai te ʼu sakilifisio ʼi te ʼu potu fuli pe ʼe tutu ai, pea ʼe fai anai ni molaga moʼo fakaʼapaʼapa ki toku huafa, ʼei, he molaga ʼe lelei. ʼE fai anai te meʼa ʼaia, he ʼe iloa anai toku huafa ʼi te ʼu puleʼaga.”+

12 “Kae ʼe kotou ʼulihi toku huafa,*+ ʼi takotou ui ʼae: ‘ ʼE ʼuli te laupapa ʼo Sehova, pea ʼe fakalialia te meʼa kai ʼae ʼe maʼu ai.’+ 13 ʼE kotou toe ui foki: ‘ ʼI meʼa fakakinakina!’ Pea ʼe kotou manuki ki ai,” ko te ui ʼaia ʼa Sehova ʼo te ʼatu kautau. “ ʼE kotou ʼaumai ni manu neʼe kaihaʼa, peʼe ketu, peʼe mahahaki. Koʼena la te faʼahiga meʼa ʼae ʼe kotou momoli mai! ʼE feafeaʼi la haku lava tali ʼakotou molaga?”+ ko te ui ʼaia ʼa Sehova.

14 ʼE ui e Sehova ʼo te ʼatu kautau: “Malaʼia ki te tagata kaka ʼae ʼe ina maʼu ʼi tana faga manu he manu ʼe haohaoa, kae ʼe ina fai he fakapapau ʼo momoli kia Sehova he manu ʼe ʼi ai hona mele. Koteʼuhi ko au ko he Hau lahi,+ pea ʼe fakatupu manavasiʼi anai mo fakaʼapaʼapa toku huafa ʼi te ʼu puleʼaga.”+

2 “Kau pelepitelo, ʼi te temi nei ʼe au foaki atu he fakatotonu!+ 2 Kapau ʼe mole kotou fia fakalogo mo lotolelei ʼo fakakololiaʼi toku huafa, ʼe au fakahoko anai he malaʼia kia koutou.+ ʼE au fakaliliu anai ʼokotou tapuakina ko ni malaʼia.+ ʼEi, neʼe au fakaliliu ʼokotou tapuakina ko ni malaʼia, koteʼuhi neʼe mole kotou tokagaʼi te faʼahi ʼaia,” ko te ui ʼaia ʼa Sehova ʼo te ʼatu kautau.

3 “Koʼeni, ʼe au maumauʼi anai te pulapula ʼae neʼe kotou nunusi ʼuhi pe ko koutou.+ Pea ʼe au laku atu anai ni faifekau ki ʼokotou fofoga, ko te ʼu faifekau ʼaia ʼo te ʼu manu ʼae neʼe kotou sakilifisioʼi ʼi ʼokotou ʼaho lalahi. Pea ʼe ʼave anai ia koutou ki te lakuʼaga ʼo te ʼu faifekau manu.* 4 Pea ʼe kotou iloʼi ai anai neʼe au foaki atu te fakatotonu ʼaia ke hoko atu te fuakava ʼae neʼe au fai mo Levi,”+ ko te ui ʼaia ʼa Sehova ʼo te ʼatu kautau.

5 “Ko te fuakava ʼae neʼe au fai mo ia neʼe ko te fuakava ki te maʼuli mo te tokalelei. Pea neʼe au foaki age te ʼu tapuakina ʼaia, ʼo tupu ai tana manavasiʼi.* ʼEi, neʼe manavasiʼi kia te au, mo fakaʼapaʼapa lahi ai ki toku huafa. 6 Neʼe maʼu te lao* ʼo te moʼoni ʼi tona gutu,+ pea neʼe mole ina fai he palalau ʼe kovi. Neʼe haʼele mo au ʼi te tokalelei mo te faitotonu.+ Neʼe ina fakatafoki mai te tokolahi mai te hala. 7 ʼE moʼoni, ʼe ko te pelepitelo ʼae ʼe tonu ke ina akoʼi te ʼatamai malama ki te hahaʼi. Ko ia ʼae ʼe tonu ke fakafehuʼi ke iloʼi ai te lao,*+ he ʼe ko te tagata ʼave logo ʼa Sehova ʼo te ʼatu kautau.”

8 ʼE ui e Sehova ʼo te ʼatu kautau: “Kae neʼe kotou fakamamaʼo koutou mai te ʼu faʼahi ʼaia. Neʼe kotou fakatupu tukia ki te tokolahi ʼo ʼuhiga mo te lao.*+ Neʼe kotou maumauʼi ai te fuakava mo Levi.+ 9 ʼE au fakaliliu anai ia koutou ko ni hahaʼi ʼe fehiʼaʼinaʼi mo fakalainoaʼi ia muʼa ʼo te hahaʼi, koteʼuhi neʼe mole kotou mulimuli ki ʼaku fakatotonu. Neʼe kotou fakapalatahi ʼi takotou fakahoko te lao.”+

10 “ ʼE mole tou tamai tahi fuli koa la?+ ʼE mole koa la ko he ʼAtua pe ʼe tahi ʼae neʼe ina fakatupu tatou? Kae he koʼe koa ʼe tou fekakaʼaki+ ʼo ʼulihi ai te fuakava ʼo ʼatatou kui? 11 Neʼe kaka ia Suta, pea neʼe fai he meʼa fakalialia ʼi Iselaele mo Selusalemi. Neʼe ʼulihi e Suta te maʼoniʼoni* ʼo Sehova,+ ʼei, te maʼoniʼoni* ʼae ʼe Ina leleiʼia, pea neʼe ina ʼohoanaʼi te ʼofafine ʼo he ʼatua matapule.+ 12 ʼE toʼo kehe* anai e Sehova mai te ʼu fale la ʼo Sakopo he tagata pe ʼe ina fai te meʼa ʼaia, tatau aipe pe ʼe ina momoli he molaga kia Sehova ʼo te ʼatu kautau.”+

13 “Pea ʼe ʼi ai te tahi meʼa ʼe kotou fai ʼe tupu ai te ʼaofi ʼo te ʼaletale ʼo Sehova e ni loʼimata, mo ni tagilaulau. Koia ʼae ʼe mole kei ina tokagaʼi ai ʼakotou molaga mo tali he meʼa pe ʼe kotou momoli age.+ 14 Pea ʼe kotou fehuʼi: ‘Kotea tona tupuʼaga?’ Neʼe tukugakoviʼi koe e Sehova, he neʼe ke kakaʼi te fafine ʼo tou temi tupulaga, kae neʼe ko tou kaumeʼa, pea neʼe ko te fafine ʼaia ʼae neʼe ke fai mo ia te fuakava.*+ 15 Kae neʼe ʼi ai te foʼi tokotahi neʼe mole ina fai te faʼahi ʼaia, he neʼe ina maʼu he koga ʼo te laumalie ʼo te ʼAtua. Kotea ʼae neʼe manatu ki ai? Neʼe manatu ia ki te hakoga ʼo te ʼAtua. Koia, kotou tokakaga ki takotou faʼahiga manatu, pea ʼaua naʼa kotou kakaʼi te fafine ʼo tokotou temi tupulaga. 16 Koteʼuhi ʼe au fehiʼa ki te mavete,”+ ko te ui ʼaia ʼa Sehova te ʼAtua ʼo Iselaele. “Pea ʼe au toe fehiʼa ki ʼae ʼe agamalohi,” ko te ui ʼaia ʼa Sehova ʼo te ʼatu kautau. “Kotou tokakaga ki takotou faʼahiga manatu pea ʼaua naʼa kotou agakaka.+

17 “Neʼe kotou fakakinakinaʼi ia Sehova ʼaki ʼakotou palalau.+ Kae ʼe kotou ui: ‘Neʼe feafeaʼi tamatou fakakinakinaʼi ia ia?’ ʼI takotou ui ʼae: ‘Ko he tahi pe ʼe ina fai te meʼa ʼae ʼe kovi ʼe ko he tahi ia ʼe lelei kia mata ʼo Sehova, pea ʼe ina leleiʼia te taʼi tagata ʼaia,’+ peʼe kotou toe ui: ‘Kofea te ʼAtua ʼo te faitotonu?’ ”

3 ʼE ui e Sehova ʼo te ʼatu kautau: “Koʼeni ʼe au fekauʼi taku tagata ʼave logo, ʼe ina tofa* anai he ala maʼaku.+ Pea ʼe haʼu fakafokifa anai te ʼAliki moʼoni ʼae ʼe kotou kumi, ki tona fale lotu.+ Pea ʼe haʼu anai te tagata ʼave logo ʼo te fuakava, ia ia ʼae ʼe kotou fakatalitali fakafiafia ki ai. Koʼeni, ʼe haʼu moʼoni anai ia.

2 “Kae ko ai ʼae ka ina lavaʼi anai te ʼaho ʼae ka haʼu ai? Ko ai ʼae ka lava tuʼu anai moka ha? He ʼe hage anai ko te afi ʼae ʼe ina fakamaʼa te ukamea pea ʼe hage anai ko te sota+ ʼa te kau faifo. 3 ʼE heka anai ohage ko ia ʼae ʼe ina fakamaʼa te siliva,+ pea ʼe ina fakamaʼa anai te ʼu foha ʼo Levi. ʼEi, ʼe ina fakamaʼa anai ia natou ohage ko te aulo mo te siliva. Pea ʼe natou liliu moʼoni anai maʼa Sehova ko ni hahaʼi faitotonu ʼe natou momoli ʼanatou molaga. 4 Pea ʼe leleiʼia moʼoni anai e Sehova te molaga ʼa Suta mo Selusalemi, ohage ko te temi muʼa.”+

5 ʼE ui e Sehova ʼo te ʼatu kautau: “ ʼE au alu atu anai ʼo fakamauʼi ia koutou, pea mo fakahoko fakavilivili te fakatuʼā ki te kau faifakalauʼakau,+ mo te kau tono, mo natou ʼae ʼe natou fai ni fakapapau loi,+ mo natou ʼae ʼe natou kakaʼi te tagata gaue,+ mo te fafine vitua, mo te fanau hala mo tamai,+ pea mo natou ʼae ʼe mole natou fia tokoni ki* te matapule.+ Ko natou ʼaia neʼe mole natou manavasiʼi kia te au.”

6 “Ko au ia Sehova, ʼe mole au fetogi.+ Pea ko koutou ko te ʼu foha ʼo Sakopo, ʼe heʼeki kotou pupuli. 7 Neʼe kotou fakamamaʼo mai ʼaku lao pea neʼe mole kotou mulimuli ki ai, talu mai te temi ʼo ʼakotou kui.+ Kotou toe liliu mai kia te au, pea ʼe au toe liliu atu anai kia koutou,”+ ko te ui ʼaia ʼa Sehova ʼo te ʼatu kautau.

Kae ʼe kotou ui: “Kotea ʼae ʼe tonu ke matou fai ke matou toe liliu atu ai?”

8 “ ʼE kaihaʼa anai koa e he tagata te ʼAtua? Kae ʼe kotou kaihaʼa ia au.”

Pea ʼe kotou ui: “Neʼe matou kaihaʼa feafeaʼi ia koe?”

“ ʼI takotou mole foaki mai te vahe tahi ki te hogofulu pea mo ni molaga. 9 Malaʼia kia koutou,* he ʼe kotou kaihaʼa ia au, ʼei, ʼe kaihaʼa ia au e te puleʼaga katoa. 10 Kotou ʼaumai ki te fale tanakiʼaga meʼa te vahe tahi fuli ki te hogofulu,+ ke maʼu ai he meʼa kai ʼi toku fale.+ Pea fakalelei siʼokotou ʼu loto, kotou ʼahiʼahiʼi au ʼi te faʼahi ʼaia, ke kotou sisio pe ʼe mole au avahi atu anai te ʼu matapa ʼo te lagi+ pea mo huaʼi atu he tapuakina ke mole kotou toe masiva ʼi he meʼa,”+ ko te ui ʼaia ʼa Sehova ʼo te ʼatu kautau.

11 ʼE ui e Sehova ʼo te ʼatu kautau: “ ʼE au fakatonutonuʼi moʼoni anai ia ia ʼae ʼe ina kai* ʼakotou gaueʼaga, pea ʼe mole ina maumauʼi anai te ʼu fua ʼo tokotou fenua, pea ʼe fua anai ʼakotou gaueʼaga vite.”+

12 ʼE ui e Sehova ʼo te ʼatu kautau: “ ʼE tonu anai ke tala e te ʼu puleʼaga fuli ʼe kotou fiafia,+ he ʼe kotou liliu anai ko he fenua ʼe lelei.”

13 ʼE toe ui e Sehova: “ ʼE kotou fai ni palalau fefeka kia te au.”

Kae ʼe kotou ui: “Kotea ʼae ʼe matou lau kia koe?”+

14 “ ʼE kotou ui: ‘ ʼE mole he ʼuhiga ʼo te tauhi ki te ʼAtua.+ Kotea ʼae ʼe matou maʼu ʼi tamatou fakahoko ʼomatou maʼua kia Sehova ʼo te ʼatu kautau? ʼEi, kotea ʼae ʼe matou maʼu ʼi tamatou haʼele matamamahi ʼi ʼona muʼa? 15 ʼI te temi nei, ʼe matou ui ʼe fiafia ia natou ʼae ʼe fiameʼalahi. Pea ʼe maʼuli fimalie ia natou ʼae ʼe agakovi.+ ʼE natou agapauʼu ʼo ʼahiʼahiʼi te ʼAtua, kae ʼe mole hoko pe la he meʼa kia natou.’ ”

16 ʼI te temi ʼaia, neʼe faipalalau ia natou ʼae neʼe manavasiʼi kia Sehova, ʼo tahi palalau mo tona kaumeʼa. Pea neʼe tokaga ia Sehova ʼo fakalogo. Neʼe tohi ai he tohi fakamanatu ʼi ʼona muʼa+ maʼa natou ʼae ʼe manavasiʼi kia Sehova pea mo metitasio ki* tona huafa.+

17 ʼE ui e Sehova ʼo te ʼatu kautau: “ ʼE natou liliu anai ko taku hahaʼi+ ʼi te ʼaho ʼae ʼe au fakatupu anai ia natou ko he koloa makehe.*+ ʼE au manavaʼofa anai kia natou ohage ko te manavaʼofa ʼa he tagata ki tona foha ʼae ʼe tauhi ki ai.+ 18 Pea ʼe kotou toe sisio anai ki te kehekehe ʼo he tagata faitotonu mo he tagata agakovi,+ peʼe ko he tahi ʼe tauhi ki te ʼAtua mo he tahi ʼe mole tauhi ki ai.”

4 ʼE ui e Sehova ʼo te ʼatu kautau: “Koʼeni ʼe hoko mai anai te ʼaho, ʼe vela ohage ko he gutuʼumu.+ Pea ʼe liliu anai ia natou fuli ʼae ʼe fiameʼalahi mo natou fuli ʼae ʼe natou fai te meʼa ʼae ʼe kovi ohage ko he luna moamoa. ʼEi, ʼe hoko mai anai te ʼaho ʼae ka fakaʼauha ai ia natou, pea ʼe mole toe ʼi ai anai ni ʼonatou aka peʼe ko ni vaʼa. 2 Kae ʼe mu anai te laʼa ʼo te faitotonu kia koutou ʼae ʼe fakaʼapaʼapa ki toku huafa, ʼo kotou maʼu ai he malolo ʼi tona malama. Pea ʼe kotou hopohopo anai ohage ko ni ʼuhiʼi pipi sisino.”

3 ʼE ui e Sehova ʼo te ʼatu kautau: “ ʼE kotou molomoloki anai te kau agakovi, he ʼe natou hage anai ko he efu ʼi ʼokotou lalo vaʼe ʼi te ʼaho ʼae ka au fakahoko ai te meʼa ʼaia.

4 “Kotou manatuʼi te Lao ʼo taku kaugana ko Moisese, ia te ʼu lekula mo te ʼu lao ʼae neʼe au foaki ʼi Olepe ke fakalogo ki ai ia Iselaele katoa.+

5 “Koʼeni ʼe au fekauʼi atu te polofeta ko Elia,+ ia muʼa ʼo te hoko mai ʼo te ʼaho lahi mo fakamanavahe ʼo Sehova.+ 6 ʼE ina fakatafoki anai te ʼu loto ʼo te ʼu tamai ki ʼonatou foha+ pea mo te ʼu loto ʼo te ʼu foha ki ʼanatou tamai, naʼa au haʼu ʼo taʼi mo maumauʼi te kele.”

(Ko te fakaʼosi ʼo te fakaliliu ʼo Te ʼu Tohi Fakahepeleo Mo Fakaalamea, pea hoko atu ʼaki Te ʼu Tohi Fakakeleka Fakakilisitiano)