TE EVASELIO ʼA SOANE

1 ʼI te kamataʼaga, neʼe ʼi ai te Folafola,+ pea neʼe nofo te Folafola mo te ʼAtua,+ pea ko te Folafola neʼe ko he ʼatua.*+ 2 ʼI te kamataʼaga, neʼe nofo ia mo te ʼAtua. 3 Neʼe fakatupu ia meʼa fuli ʼaki ia ia,+ pea neʼe mole fakatupu he meʼa mo ka na pau la neʼe mole fakatupu ʼaki ia ia.

Neʼe fakatupu 4 te maʼuli ʼaki ia ia, pea ko te maʼuli neʼe ko te malama ʼo te tagata.+ 5 Pea ʼe mu te malama ʼi te fakapoʼuli,+ kae ʼe mole malohi age te fakapoʼuli ʼi te malama.

6 Neʼe haʼu leva he tagata, neʼe fekauʼi mai ko he fakafofoga ʼo te ʼAtua pea neʼe higoa ko Soane.+ 7 Neʼe haʼu ia ko he tagata fakamoʼoni, ke fakamoʼoni ʼo ʼuhiga mo te malama,+ ke tui te hahaʼi kehekehe ʼaki ia ia. 8 Neʼe mole ko ia te malama,+ kae neʼe fekauʼi mai ke fakamoʼoni ʼo ʼuhiga mo te malama ʼaia.

9 Neʼe ʼamanaki haʼu ki te malamanei ia te malama moʼoni, ia ia ʼae ʼe ina fakamalamaʼi te hahaʼi kehekehe.+ 10 Neʼe ʼi te malamanei,+ pea neʼe fakatupu te malamanei ʼaki ia ia,+ kae neʼe mole iloʼi ia ia e te malamanei. 11 Neʼe haʼu ki tona fenua totonu, kae neʼe mole tali ia e tana hahaʼi. 12 Kae neʼe ina fakafealagia kia natou fuli ʼae neʼe natou tali ia ia, ke natou liliu ko he ʼu fanau ʼa te ʼAtua,+ koteʼuhi neʼe natou tui ki tona huafa.+ 13 Pea neʼe natou tutupu ake mai te ʼAtua, kae mole mai te toto peʼe mai te kakano peʼe mai te finegalo ʼo te tagata.+

14 Koia neʼe liliu te Folafola ʼo kakano+ pea neʼe nofo mo matou. Neʼe matou mamata ki tona kololia, te faʼahiga kololia ʼae ʼe maʼu e te foha ʼulu tokotahi+ mai tana tamai. Pea neʼe fonu ia ʼi te ʼofa makehe mo te moʼoni. 15 (Neʼe fakamoʼoni ia Soane ʼo ʼuhiga mo ia, ʼi tana kalaga: “Neʼe ko ia ʼae neʼe au talanoa ki ai, ʼo ui: ‘Ko ia ʼae ʼe muli mai kua muʼamuʼa ia ia au, koteʼuhi neʼe kua maʼuli ia kae neʼe heʼeki au tupu.’ ”)+ 16 Pea neʼe tou maʼu fuli mai ia te ia te ʼofa makehe ʼo lahi ʼaupito, he neʼe fonu ʼi te ʼofa makehe. 17 Neʼe foaki te Lao ʼaki ia Moisese,+ kae neʼe tou maʼu te ʼofa makehe+ mo te moʼoni ʼaki ia Sesu Kilisito.*+ 18 Neʼe heʼeki ʼi ai he tagata kua sio ki te ʼAtua.+ Kae ko te ʼatua ʼulu tokotahi+ ʼae ʼe nofo ia tafa ʼo te Tamai*+ neʼe ina fakamahino mai pe ko ai te ʼAtua ʼaia.+

19 Neʼe fekauʼi e te kau Sutea he kau pelepitelo mo he kau Levite mai Selusalemi ke olo ʼo fehuʼi kia Soane: “Ko ai ia koe?”+ Koʼeni tana fakamoʼoni. 20 Neʼe ina tali fakahagatonu age: “ ʼE mole ko au ia Kilisito.” 21 Pea neʼe natou toe fehuʼi age: “ ʼE ko koe koa ko Elia?”+ Neʼe ina tali: “Kailoa ia.” “ ʼE ko koe koa te Polofeta?”+ Neʼe ina toe tali: “Kailoa ia.” 22 Neʼe natou fehuʼi leva ki ai: “Ko ai ia koe? Fakaha mai ke feala hamatou tali kia natou ʼae neʼe natou fekauʼi mai matou. Kotea ʼae ʼe ke ui ʼo ʼuhiga mo koe?” 23 Neʼe ina ui: “Ko au ʼae ʼe kalaga ʼi te toafa: ‘Kotou fakatokatoka te ala ʼo Sehova,’*+ ohage ko tona ui e te polofeta ko Esaia.”+ 24 Neʼe ko te kau Faliseo* ʼae neʼe natou fekauʼi mai te kau pelepitelo mo te kau Levite ʼaia. 25 Koia neʼe natou fehuʼi ki ai: “Pea he koʼe ʼe ke faipapitema mo kapau ʼe mole ko koe ia Kilisito peʼe ko Elia peʼe ko te Polofeta?” 26 Neʼe tali e Soane kia natou: “ ʼE au faipapitema ʼaki te vai. ʼE nofo ia koutou he tahi ʼe mole kotou iloʼi, 27 ʼae ʼe muli mai ia au, pea ʼe mole tuha mo au ke au veteki te ʼu haʼi ʼo ʼona sulie.”+ 28 Neʼe hoko te ʼu faʼahi ʼaia ʼi Petania ʼi te tahi kauvai ʼo te Solotane, ʼae neʼe faipapitema ai ia Soane.+

29 ʼI te ʼaho ake, neʼe sio ki te alu age ʼa Sesu kia ia, pea neʼe ina ui: “Koʼeni te Akeno+ ʼa te ʼAtua, ʼae ʼe ina toʼo te agahala+ ʼo te malamanei!+ 30 ʼE ko ia ʼae neʼe au talanoa ki ai, ʼo ui: ‘ ʼE muli mai ia au he tagata kua muʼamuʼa ia au, koteʼuhi neʼe kua maʼuli ia kae neʼe heʼeki au tupu.’+ 31 Maʼiape la mo au neʼe mole au iloʼi ia ia, kae neʼe au faipapitema ʼaki te vai ke feala ke fakaha ia ia ki Iselaele.”+ 32 Neʼe toe fai leva e Soane te fakamoʼoni ʼaeni: “Neʼe au sio ki te laumalie ’e hifo ifo mai te lagi ohage ko he lupe pea neʼe nofo ia te ia.+ 33 Maʼiape la mo au neʼe mole au iloʼi ia ia, kae ko Ia ʼae neʼe ina fekauʼi mai au ke au faipapitema ʼaki te vai, neʼe ina ui mai: ‘Ko ia ʼae ka ke sio ʼe hifo ifo ki ai te laumalie maʼoniʼoni pea mo nofo ai,+ ʼe ko ia ʼae ʼe faipapitema ʼaki te laumalie maʼoniʼoni.’+ 34 Pea neʼe au sio ki ai, mo au fakamoʼoni ʼe ko ia ʼaeni ko te ʼAlo ʼo te ʼAtua.”+

35 ʼI te ʼaho ake, neʼe toe nonofo ai ia Soane mo ʼana tisipulo ʼe toko lua, 36 pea ʼi tana sio ki te fakalaka ʼa Sesu, neʼe ina ui: “Koʼeni te Akeno+ ʼa te ʼAtua!” 37 ʼI te logo ʼa te ʼu tisipulo ʼe toko lua ki tana palalau ʼaia, neʼe nā mulimuli ai ia Sesu. 38 Neʼe maliu leva ia Sesu, pea ʼi tana sio ki tanā mulimuli ia te ia, neʼe ina ui age: “Kotea ʼae ʼe kolua kumi?” Neʼe nā ui: “Lapi (ko tona fakaʼuhiga, “Faiako”), kofea ʼae ʼe ke nofo ai?” 39 Neʼe ina ui age: “Kolua ʼomai pea ʼe kolua sisio anai.” Neʼe olo ai pea neʼe nā sisio ki te faʼahi ʼae neʼe nofo ai, ʼo nā nonofo ai mo ia ʼi te ʼaho ʼaia. Neʼe ko te vaʼevaʼe hola fa afiafi.* 40 Ko Atelea,+ te tehina ʼo Simone Petelo, neʼe kau ia naua ʼae neʼe logo ki te ʼu palalau ʼae neʼe fai e Soane pea mo nā mulimuli ia Sesu. 41 Neʼe ʼuluaki felaveʼi mo tona tehina ko Simone pea neʼe ina ui age: “Kua ma maʼu ia te Mesia”+ (ko tona fakaʼuhiga, “Kilisito”), 42 pea neʼe ina taki ia ia kia Sesu. ʼI te sio ʼa Sesu kia ia, neʼe ina ui: “Ko koe ko Simone,+ te foha ʼo Soane. ʼE fakahigoaʼi anai koe ko Sefasi” (ko tona fakaliliu ko “Petelo”).+

43 ʼI te ʼaho ake, neʼe fia mavae ia Sesu ʼo alu ki Kalilea. Neʼe felaveʼi leva mo Filipo+ pea neʼe ina ui age: “Muli mai ia te au.” 44 Ko Filipo neʼe ko he tagata mai Petesaita, te kolo ʼo Atelea mo Petelo. 45 Neʼe felaveʼi ia Filipo mo Natanaele+ ʼo ina ui age: “Kua matou maʼu ia ia ʼae neʼe palalau ki ai te Lao ʼa Moisese, pea mo te kau Polofeta: ko Sesu, te foha ʼo Sosefo,+ mai Nasaleti.” 46 Kae neʼe ui age e Natanaele: “ ʼE feala koa ke haʼu mai Nasaleti he meʼa ʼe lelei?” Neʼe tali age e Filipo: “Haʼu ʼo sio.” 47 Neʼe sio ia Sesu ki te alu age ʼa Natanaele, pea neʼe ina ui ʼo ʼuhiga mo ia: “Koʼeni te tagata Iselaele totonu, ʼe mole he kaka ia ia.”+ 48 Neʼe fehuʼi age e Natanaele: “He koʼe ʼe ke iloʼi au?” Neʼe tali e Sesu: “ ʼI muʼa ʼo tou pauʼi e Filipo, neʼe kua au sio kia koe ʼi tau heka ʼi te lalo fuʼu fiku.” 49 Neʼe ui e Natanaele: “Lapi, ko koe ko te ʼAlo ʼo te ʼAtua, ko koe te Hau ʼo Iselaele.”+ 50 Neʼe ui age e Sesu: “ ʼE ke tui koa he neʼe au ui atu neʼe au sio kia koe ʼi te lalo fuʼu fiku? ʼE ke sio anai ki he ʼu meʼa ʼe lalahi age ʼi te ʼu meʼa ʼaeni.” 51 Pea neʼe ina toe ui: “ ʼE au tala moʼoni atu kia koutou, ʼe kotou sisio anai ki te ava ʼo te lagi pea mo te hake mo te hifo ʼa te kau ʼaselo ʼa te ʼAtua ki te Foha ʼo te tagata.”*+

2 Pea ʼi te tolu ʼaho, neʼe fai te kaitahi ʼo he faiʼohoana ʼi Kana ʼi Kalilea, pea neʼe ʼi ai te faʼe ʼa Sesu. 2 Neʼe toe fakaafe foki ia Sesu pea mo ʼana tisipulo ki te kaitahi ʼo te faiʼohoana.

3 ʼI te mole kei ʼi ai he vino, neʼe ui e te faʼe ʼa Sesu kia te ia: “ ʼE mole kei ʼi ai hanatou vino.” 4 Kae neʼe ui e Sesu: “Fafine, kotea totā pikipikiga ʼi te faʼahi ʼaeni?* Heʼeki hoko mai toku hola.” 5 Neʼe ui e tana faʼe ki te kau faifekau: “Kotou fai ia meʼa fuli ʼe ina ui atu.” 6 Pea neʼe tuʼu ai te ʼu ʼaiʼaga vai maka ʼe ono neʼe fakamaʼua e te ʼu lekula ʼa te kau Sutea ʼo ʼuhiga mo te fakamaʼa.+ Neʼe ko lite ʼe 44 ʼape peʼe 66* ʼi te ʼaiʼaga vai ʼe tahi. 7 Neʼe ui age e Sesu: “Kotou fakafonu vai te ʼu ʼaiʼaga vai.” Pea neʼe natou fakafonu gutugutu ai. 8 Neʼe ina ui leva kia natou: “Kotou ohu ʼo ʼave ki te pule ʼo te kaitahi.” Neʼe natou ʼave ai kia ia. 9 ʼI te ʼahiʼahi e te pule ʼo te kaitahi ia te vai ʼae neʼe kua liliu ko te vino, neʼe mole ina iloʼi pe neʼe haʼu maifea (kae neʼe iloʼi ia e te kau faifekau ʼae neʼe natou ohu te vai). Pea neʼe pauʼi ai e te pule ʼo te kaitahi ia te tagata ʼohoana, 10 ʼo ina ui age: “Ko te tagata fuli pe ʼe ina foaki muʼa te vino ʼae ʼe lelei, pea ka kua konahihia te hahaʼi, ʼe ina foaki leva te vino ʼae ʼe mole lelei. Kae neʼe ke taupau koe te vino ʼae ʼe lelei ʼo kaku mai ki te temi ʼaeni.” 11 Neʼe fai e Sesu te faʼahi ʼaia ʼi Kana ʼi Kalilea, neʼe ko te kamataʼaga ʼaia ʼo ʼana milakulo. Neʼe ina fakaha ai tona kololia,+ pea neʼe tui ʼana tisipulo kia te ia.

12 Hili ia, neʼe hifo leva ia mo tana faʼe, mo ʼona tehina+ pea mo ʼana tisipulo ki Kapenaume,+ kae neʼe mole natou nonofo fualoa ai.

13 Neʼe ovi mai te Pasikate+ ʼa te kau Sutea, pea neʼe hake ia Sesu ki Selusalemi. 14 Neʼe ina maʼu atu ʼi te fale lotu ia natou ʼae neʼe natou fakatau ni pipi, mo ni ovi pea mo ni lupe.+ Pea neʼe toe heheka ai mo te hahaʼi fetogi paʼaga. 15 ʼI tana ʼosi fai he huipi ʼaki te ʼu maea, neʼe ina kapu ʼi te fale lotu ia natou fuli mo ʼanatou ovi mo ʼanatou pipi, mo ina huaʼi te ʼu piesi ʼa te hahaʼi fetogi paʼaga pea mo tokatokahi ʼanatou laupapa.+ 16 Pea neʼe ina ui kia natou ʼae neʼe fakatau lupe: “Kotou toʼo kehe te ʼu meʼa ʼaeni ʼi heni! Tuku takotou fakaliliu ia te ʼapi ʼo taku Tamai ko he fale fakatauʼaga koloa!”+ 17 Neʼe manatuʼi ai e ʼana tisipulo neʼe tohi: “Ko taku faʼafai ki tou ʼapi ʼe hage anai ko he afi kakaha.”+

18 Pea neʼe ui e te kau Sutea kia te ia: “Fakaha mai he fakailoga+ ʼe fakamoʼoni ai neʼe fakagafua atu ke ke fai te ʼu meʼa ʼaia.” 19 Neʼe ui age e Sesu: “Kotou holoʼi te fale lotu ʼaeni, pea ʼe au toe laga anai ia ʼaho ʼe tolu.”+ 20 Neʼe ui age e te kau Sutea: “Neʼe laga te fale lotu ʼaeni ia taʼu ʼe 46, kae ʼe ke toe laga anai koe ia ʼaho ʼe tolu?” 21 Neʼe talanoa ia ʼo ʼuhiga mo te fale lotu ʼae ko tona sino.+ 22 Kae ʼi te temi ʼae neʼe fakatuʼuake ai mai te kau mate, neʼe manatuʼi e ʼana tisipulo neʼe ina tau fai te ʼu palalau ʼaia,+ pea neʼe natou tui ai ki te ʼu Tohi Taputapu mo te ʼu folafola ʼa Sesu.

23 ʼI tana ʼi Selusalemi lolotoga te ʼaho lahi ʼo te Pasikate, neʼe tui te hahaʼi tokolahi ki tona huafa ʼi tanatou sisio ki te ʼu milakulo ʼae neʼe ina fakahoko. 24 Kae neʼe mole falala ia Sesu kia natou, koteʼuhi neʼe ina iloʼi ia natou fuli, 25 pea neʼe mole ʼaoga ke fakamahino age te ʼuhiga ʼo te tagata, he neʼe ina iloʼi pe ʼonatou loto.+

3 Neʼe ʼi ai te tagata ʼi te kau Faliseo neʼe higoa ko Nikotemo+ pea neʼe ko he pule ʼo te kau Sutea. 2 Neʼe haʼu kia Sesu ʼi te poʼuli+ ʼo ina ui: “Lapi,+ ʼe matou iloʼi ko koe ko he faiako ʼe haʼu mai te ʼAtua, koteʼuhi ʼe mole feala ke fakahoko e he tahi ia te ʼu milakulo+ ʼae ʼe ke fakahoko mo ka na pau la ʼe mole ina maʼu te ʼofa ʼo te ʼAtua.”+ 3 Neʼe ui age e Sesu: “ ʼE au tala moʼoni atu kia koe, kapau ʼe mole toe tupu* he tahi,+ ʼe mole feala ke sio ki te Puleʼaga ʼo te ʼAtua.”+ 4 Neʼe ui e Nikotemo kia te ia: “ ʼE lava feafeaʼi ki he tagata ke toe tupu moka kua matuʼa? ʼE mahino ia ʼe mole feala ke toe hu ki te fatu ʼo tana faʼe ʼo toe tupu mai.” 5 Neʼe tali age e Sesu: “ ʼE au tala moʼoni atu kia koe, kapau ʼe mole tupu he tahi mai te vai+ pea mo te laumalie maʼoniʼoni,+ ʼe mole feala ia ke hu ki te Puleʼaga ʼo te ʼAtua. 6 Ko natou ʼae ʼe tutupu mai te kakano ʼe kakano ia, pea ko natou ʼae ʼe tutupu mai te laumalie ʼe ko te ʼu foha ʼo te ʼAtua. 7 Tuku tau punamaʼuli ʼi taku ui atu: ʼE tonu ke kotou toe tutupu. 8 ʼE agi te matagi ki te potu ʼae ʼe fia agi ki ai, pea ʼe ke logo ki tana logoaʼa, kae ʼe mole ke iloʼi pe ʼe agi maifea pea alu kifea. ʼE toe feia aipe mo ʼae ʼe tupu mai te laumalie.”+

9 Neʼe ui age e Nikotemo: “ ʼE lava hoko feafeaʼi te ʼu faʼahi ʼaia?” 10 Neʼe tali e Sesu: “Ko koe ko te tagata faiako ʼo Iselaele, kae ʼe mole ke iloʼi koe te ʼu faʼahi ʼaia? 11 ʼE au tala moʼoni atu kia koe, ko te meʼa ʼae ʼe matou iloʼi ʼe matou palalau ki ai, pea ko te meʼa ʼae neʼe matou sisio ki ai ʼe matou fakamoʼoni ki ai, kae ʼe mole kotou tali te fakamoʼoni ʼae ʼe matou foaki. 12 Kapau ʼe au palalau atu ki he ʼu meʼa fakakelekele kae ʼe mole kotou tui ki ai, ʼe feafeaʼi age la mo kapau ʼe au palalau atu ki te ʼu meʼa ʼae ʼi selo? 13 Tahi ʼae, heʼeki ʼi ai he tagata kua hake ki selo+ kae gata pe kia ia ʼae neʼe hifo mai selo,+ te Foha ʼo te tagata. 14 Ohage pe ko te lagaʼi ake e Moisese te gata ʼi te toafa,+ ʼo toe feia pe, ʼe tonu ke lagaʼi ake ia te Foha ʼo te tagata,+ 15 ke feala kia ia ʼae ʼe tui kia te ia, ke ina maʼu te maʼuli heʼe gata.+

16 “Neʼe ʼofa mamahi te ʼAtua ki te malamanei ʼo ina foaki ai tona ʼAlo ʼulu tokotahi,+ pea ko ʼae ʼe tui kia te ia ʼe mole mate anai kae ʼe ina maʼu anai te maʼuli heʼe gata.+ 17 Koteʼuhi neʼe mole fekauʼi e te ʼAtua tona ʼAlo ki te malamanei ke ina fakamauʼi te malamanei, kae ke haofaki te malamanei ʼaki ia ia.+ 18 Ko ʼae ʼe tui kia te ia ʼe mole fakamauʼi anai.+ Kae ko ʼae ʼe mole tui, kua ʼosi fakamauʼi ia, koteʼuhi neʼe mole tui ki te huafa ʼo te ʼAlo ʼulu tokotahi ʼo te ʼAtua.+ 19 Pea koʼeni te fakatafito ʼo te fakamau: Neʼe haʼu te malama ki te malamanei,+ kae neʼe ʼoʼofa te hahaʼi ki te fakapoʼuli kae mole ki te malama, he neʼe kovi ʼanatou gaue. 20 Koteʼuhi ko ʼae ʼe ina fai he ʼu aga ʼe kovi ʼe fehiʼa ia ki te malama pea ʼe mole haʼu ki te malama, ke ʼaua naʼa iloʼi ʼana gaue. 21 Kae ko ʼae ʼe ina fai te meʼa ʼae ʼe lelei, ʼe haʼu ia ki te malama,+ ke ha ai neʼe mulimuli ʼana gaue ki te finegalo ʼo te ʼAtua.”

22 Hili ia, neʼe olo ia Sesu mo ʼana tisipulo ki te ʼu kolo liliki ʼo Sutea. Neʼe nofo ai mo natou ʼi he kiʼi temi pea mo faipapitema ai.+ 23 Kae neʼe toe faipapitema foki mo Soane ʼi Enoni ʼo ovi ki Salimi, koteʼuhi neʼe loloto ai te vai,+ pea neʼe haga ʼomai pe te hahaʼi ke papitemaʼi natou.+ 24 ʼI te temi ʼaia, neʼe heʼeki pilisoniʼi ia Soane.+

25 Pea neʼe fihi te kau tisipulo ʼa Soane mo he tagata Sutea ʼo ʼuhiga mo te fakamaʼa. 26 Neʼe natou olo ai kia Soane pea mo natou ui: “Sio mai Lapi, ko te tagata ʼae neʼe nofo mo koe ʼi te tahi kauvai ʼo te Solotane, ʼae neʼe ke fakamoʼoni ki ai,+ koʼeni ʼe lolotoga faipapitema ia, pea ʼe olo fuli te hahaʼi kia te ia.” 27 Neʼe tali e Soane: “ ʼE maʼu pe e te tagata te meʼa ʼae neʼe foaki age ki ai mai selo. 28 ʼE kotou fakamoʼoni neʼe au ui: ‘ ʼE mole ko au ia Kilisito,*+ kae neʼe fekauʼi mai au ke au muʼamuʼa ia te ia.’+ 29 Ko ʼae ʼe ina maʼu te fafine ʼohoana ʼe ko te tagata ʼohoana.+ Kae ko te kaumeʼa ʼo te tagata ʼohoana, ʼi tana tuʼu pea mo logo ki ai, ʼe fiafia lahi ai ʼuhi ko te leʼo ʼo te tagata ʼohoana. Koia, kua katoa toku fiafia. 30 Ko ia ʼaia ʼe tonu ke haga tuputupu, kae ko au, ʼe tonu ke au siʼisiʼi ifo.”

31 Ko ia ʼae ʼe haʼu mai ʼoluga,+ ʼe maʼoluga ake ia ʼi te tagata fuli. Ko ia ʼae ʼe haʼu mai te kele, ʼe palalau ia ki te ʼu meʼa ʼo te kele he ʼe haʼu ia mai te kele. Ko ia ʼae ʼe haʼu mai selo ʼe maʼoluga ake ia ʼi te tagata fuli.+ 32 ʼE fakamoʼoni ki te ʼu meʼa neʼe sio mo logo ki ai,+ kae ʼe mole tali e he tahi tana fakamoʼoni.+ 33 Ko ʼae ʼe ina tali tana fakamoʼoni, ʼe tui ʼe moʼoni te ʼAtua.+ 34 Koteʼuhi ko ʼae neʼe fekauʼi mai e te ʼAtua, ʼe ina tala te ʼu folafola ʼa te ʼAtua,+ he ʼe Ina foaki lahi tona laumalie maʼoniʼoni. 35 ʼE ʼofa te Tamai ki te ʼAlo+ pea ʼe ina foaki ia meʼa fuli ki ʼona nima.+ 36 Ko ʼae ʼe tui ki te ʼAlo ʼe ina maʼu ia te maʼuli heʼe gata.+ Ko ʼae ʼe talagataʼa ki te ʼAlo ʼe mole ina maʼu anai te maʼuli,+ kae ʼe to anai ki ai te hauhau ʼo te ʼAtua.+

4 ʼI te iloʼi e te ʼAliki kua logo ia te kau Faliseo neʼe ina fai* ni tisipulo pea mo faipapitema+ ʼo lahi age ia Soane, 2 (logo la neʼe mole ko Sesu ʼae neʼe faipapitema kae ko ʼana tisipulo) 3 neʼe mavae ai mai Sutea ʼo toe alu ki Kalilea. 4 Kae neʼe tonu ke fakalaka ʼi Samalia. 5 Neʼe tau atu ki te kolo ʼo Samalia ʼe higoa ko Sikale, ʼe ovi ki te gaueʼaga ʼae neʼe foaki e Sakopo ki tona foha ko Sosefo.+ 6 Neʼe tuʼu ai te vai keli ʼo Sakopo.+ Neʼe gaʼegaʼe ia Sesu ʼi tana faifagona ʼaia, pea neʼe heka leva ia tafa ʼo te vai keli.* Neʼe ko te vaʼevaʼe fetapa* ʼaia.

7 Neʼe haʼu he fafine Samalitana ʼo ohu vai. Neʼe ui e Sesu ki ai: “Foaki mai he moʼi vai ke au inu.” 8 (Neʼe kua olo ʼana tisipulo ki te kolo ʼo totogi mai hanatou meʼa kai.) 9 Pea neʼe ui age e te fafine Samalitana: “Ko koe ko te Sutea, pea he koʼe ʼe ke kole mai he moʼi vai kia au ʼaeni ko te fafine Samalitana?” (ʼE mole felogoi te kau Sutea mo te kau Samalitana.)+ 10 Neʼe tali e Sesu: “Ka na pau la neʼe ke iloʼi te meʼa ʼofa ʼae ʼe foaki noa e te ʼAtua+ pea mo ia ʼae ʼe ina ui atu: ‘Foaki mai he moʼi vai ke au inu,’ pea ko koe ʼae ka ke kole ki ai, pea ʼe ina foaki atu anai te vai maʼuli.”+ 11 Neʼe ina ui age: “ ʼAliki, ʼe mole pe la hau pakete moʼo ohu vai, pea ʼe loloto te vai keli. Koia, ʼe ke maʼu maifea te vai maʼuli ʼaia? 12 ʼE mole ke lahi age leva koe ʼi tamatou kui ko Sakopo ʼae neʼe ina foaki mai te vai keli ʼaeni pea neʼe inu ki ai, ʼo toe feia mo ʼona foha pea mo tana faga manu.” 13 Neʼe tali age e Sesu: “Ko he tahi ʼe inu ki te vai ʼaeni ʼe toe fia inu anai ia. 14 Kae ko ʼae ʼe inu ki te vai ʼae ka au foaki age, ʼe mole toe fia inu anai,+ kae ʼe liliu anai te vai ʼae ʼe au foaki age ko he matapuna vai ia ia ke ina foaki te maʼuli heʼe gata.”+ 15 Neʼe ui age e te fafine: “ ʼAliki, foaki mai te vai ʼaia, ke ʼaua naʼa au toe fia inu pea mo tatuʼu mai ki heni ʼo ohu vai.”

16 Neʼe ina ui ki ai: “Alu ʼo pauʼi mai tou ʼohoana.” 17 Neʼe tali e te fafine: “ ʼE mole ʼi ai hoku ʼohoana.” Neʼe ui age e Sesu: “ ʼE tonu tau ui ʼae ʼe mole ʼi ai hou ʼohoana. 18 Neʼe ko ʼou ʼohoana ʼe toko nima, pea ko te tagata ʼae ʼe maʼuli nei mo koe ʼe mole ko tou ʼohoana. Koia neʼe ke fakaha mai te moʼoni.” 19 Neʼe ui e te fafine: “ ʼAliki, ʼe au sio ko koe ko he polofeta.+ 20 Neʼe atolasio ʼamatou kui ʼi te moʼuga ʼaeni, kae ʼe kotou ui koutou ʼe tuʼu ʼi Selusalemi ia te koga meʼa ʼae ʼe tonu ke atolasio ai te hahaʼi.”+ 21 Neʼe ui e Sesu: “Fafine, tui mai koe, ʼe hoko mai te temi ʼae ʼe mole kotou toe atolasio anai ki te Tamai ʼi te moʼuga ʼaeni peʼe ʼi Selusalemi. 22 ʼE mole kotou iloʼi koutou ia ia ʼae ʼe kotou atolasio ki ai.+ Kae kia matou, ʼe matou iloʼi ia ia ʼae ʼe matou atolasio ki ai, koteʼuhi ʼe haʼu te haofaki mai te kau Sutea.+ 23 Kae ʼe hoko mai te hola, pea ʼe ko te temi nei, ʼae ka atolasio te kau atolasio moʼoni ki te Tamai ʼaki te laumalie mo te moʼoni, koteʼuhi ʼe kumi e te Tamai te faʼahiga hahaʼi ʼaia ke natou atolasio kia te ia.+ 24 Ko te ʼAtua ʼe Laumalie,+ pea ko natou ʼae ʼe atolasio kia te ia ʼe tonu ke natou atolasio ʼaki te laumalie mo te moʼoni.”+ 25 Neʼe ui e te fafine: “ ʼE au iloʼi ʼe haʼu ia te Mesia, ʼae ʼe higoa ko Kilisito.* Pea ka haʼu, ʼe ina fakaha fakahagatonu mai anai kia matou ia meʼa fuli.” 26 Neʼe ui e Sesu: “Ko au ʼaeni ʼe palalau atu.”+

27 Neʼe tau mai leva ʼana tisipulo pea neʼe natou punamaʼuli ʼi tana palalau mo he fafine. Kae neʼe mole ui e he tahi: “ ʼE ʼi ai koa he meʼa ʼe ke loto ki ai?” peʼe “He koʼe koa ʼe ke palalau mo ia?” 28 Koia, neʼe tuku ai e te fafine tana ʼaiʼaga vai kae alu ki te kolo pea ina ui ki te hahaʼi: 29 “Kotou ʼomai ʼo sisio ki he tagata neʼe ina fakaha mai te ʼu meʼa fuli ʼae neʼe au fai. ʼE mole ko Kilisito ʼape?” 30 Neʼe natou mavae ai mai te kolo ʼo olo kia te ia.

31 Lolotoga te temi ʼaia, neʼe uga ia ia e te kau tisipulo: “Lapi,+ kai.” 32 Kae neʼe ina ui age: “Kua ʼi ai taku meʼa kai, pea ʼe mole kotou iloʼi pe kotea.” 33 Koia, neʼe feuiʼaki e te kau tisipulo: “Neʼe ʼaumai koa e he tahi hana meʼa kai?” 34 Neʼe ui age e Sesu: “Ko taku meʼa kai ʼe ko te fai ʼo te finegalo ʼo ia ʼae neʼe ina fekauʼi mai au+ pea mo fakaʼosi tana gaue.+ 35 ʼE mole kotou ui koa la ʼe kei toe mahina ʼe fa ʼi muʼa ʼo te hoko mai ʼo te taʼukai? ʼE au tala atu: Kotou hiki ake ʼokotou mata mo sisio ki te ʼu gaueʼaga, kua matutuʼa* pea kua ʼaoga ke tanaki.+ Kua 36 maʼu e te tagata tanaki taʼukai tona totogi pea ʼe ina tanaki he ʼu fua ki te maʼuli heʼe gata, ke fiafia fakatahi ai ia ia ʼae ʼe ina to pea mo ia ʼae ʼe ina utu.+ 37 Koteʼuhi ʼe moʼoni te ui ʼae: ʼE to e he tahi ia te pulapula kae ʼe utu e he tahi age. 38 Neʼe au fekauʼi koutou ke kotou utu te ʼu meʼa ʼae neʼe mole kotou gaue kinakina ki ai. Ko ʼihi atu neʼe gaue kinakina, pea ʼe kotou maʼu te ʼu lelei ʼo tanatou gaue kinakina.”

39 Tokolahi te kau Samalitana mai te kolo ʼaia neʼe natou tui kia te ia ʼuhi ko te fakamoʼoni ʼae neʼe fai e te fafine, ʼi tana ui: “Neʼe ina fakaha mai te ʼu meʼa fuli ʼae neʼe au fai.”+ 40 Koia, ʼi te olo age ʼa te kau Samalitana, neʼe natou kole age ke nofo mo natou. Pea neʼe nofo ai ia ʼaho ʼe lua. 41 Neʼe toe hahaʼi age leva ia natou ʼae neʼe tui ʼuhi ko ʼana palalau. 42 Pea neʼe natou ui ki te fafine: “ ʼE mole matou tui ʼuhi pe ko te ʼu meʼa ʼae neʼe ke ui mai. Kae koteʼuhi kua matou logo tonu kia te ia, pea ʼe matou iloʼi ko te tagata ʼaeni ʼe ko ia moʼoni te fakamaʼuli ʼo te malamanei.”+

43 Hili te ʼu ʼaho ʼaia ʼe lua, neʼe mavae leva ʼo alu ki Kalilea. 44 Kae neʼe fakamoʼoni e Sesu totonu, ʼe mole fakaʼapaʼapaʼi ia he polofeta ʼi tona fenua totonu.+ 45 Koia, ʼi tana tau atu ki Kalilea, neʼe fakatalitali lelei ia ia e te kau Kalilea, koteʼuhi neʼe natou sisio ki te ʼu meʼa fuli ʼae neʼe ina fai ʼi Selusalemi ʼi te ʼaho lahi.+ Neʼe natou toe kau foki mo natou ki te ʼaho lahi ʼaia.+

46 Neʼe toe alu leva ki Kana ʼi Kalilea, ʼae neʼe ina fakaliliu ai te vai ko he vino.+ Pea ʼi Kapenaume, neʼe ʼi ai te tagata faifekau ʼa te hau neʼe mahaki tona foha. 47 ʼI te logo ʼa te tagata ʼaia neʼe mavae ia Sesu mai Sutea ʼo alu ki Kalilea, neʼe alu ʼo kole kia te ia ke hifo age ki Kapenaume ʼo fakamalolo tona foha he neʼe kua meihiʼi mate. 48 Kae neʼe ui e Sesu: “Kapau ʼe mole kotou sisio ki he ʼu milakulo pea mo he ʼu meʼa fakaofoofo, ʼe mole kotou tui anai.”+ 49 Neʼe ui e te tagata faifekau ʼa te hau: “ ʼAliki, ta olo naʼa mate taku tamasiʼi.” 50 Neʼe tali e Sesu ki ai: “Alu la, kua malolo tou foha.”+ Neʼe tui te tagata ki te ʼu palalau ʼa Sesu, pea neʼe alu ai. 51 Kae ʼi tana lolotoga hifo ʼaia, neʼe fakafetaulaki age kia ia ʼana kaugana ʼo natou tala age kua malolo tona foha. 52 Pea neʼe ina fakalavelave age kia natou pe neʼe ko te hola fia ʼae neʼe hoki lelei ai. Neʼe natou tali age: “Neʼe puli tona fiva ʼanafi, ʼi te vaʼevaʼe hola tahi hili hoʼata.”* 53 Neʼe iloʼi ai e te tamai neʼe ko te hola totonu pe ʼaia neʼe ui ai e Sesu: “Kua malolo tou foha.”+ Neʼe tui ai te tagata mo tona loto fale katoa. 54 Neʼe ko te lua milakulo ʼaia+ neʼe fakahoko e Sesu ʼi tana haʼu mai Sutea ki Kalilea.

5 Hili ia, neʼe fai te ʼaho lahi+ ʼo te kau Sutea pea neʼe hake ia Sesu ki Selusalemi. 2 Pea ʼi Selusalemi, ʼi te Matapa ʼo Te ʼu Ovi,+ ʼe ʼi ai te maʼanuʼaga ʼe higoa ʼi te Fakahepeleo ko Peteseta, mo ʼona ʼatu pou ʼe nima. 3 Neʼe takokoto ai te hahaʼi tokolahi neʼe mahahaki, mo kivi, mo ketu pea mo maʼimoa.* 4* —— 5 Kae neʼe ʼi ai te tagata neʼe mahaki talu mai taʼu ʼe 38. 6 ʼI te sio ʼa Sesu ki te takoto ʼa te tagata ʼaia pea mo iloʼi neʼe kua fualoa tana mahaki, neʼe ina ui ki ai: “ ʼE ke loto ke ke malolo?”+ 7 Neʼe tali age e te tagata mahaki: “ ʼAliki, ʼe mole he tahi ke ina tuku au ki te maʼanuʼaga moka loka te vai. Pea ʼi taku alu ki ai, ʼe fakalaka he tahi age ʼo hifo ki ai.” 8 Neʼe ui e Sesu ki ai: “Tuʼu ake, toʼo tou palepale pea ke haʼele.”+ 9 Neʼe malolo atu aipe te tagata, pea neʼe ina toʼo tona palepale mo kamata haʼele.

Neʼe ko te ʼaho ʼaia ʼo te Sapato. 10 Koia, neʼe ui e te kau Sutea ki te tagata ʼae neʼe fakamalolo: “ ʼE ko te Sapato ʼaeni, pea ʼe mole gafua ke ke ʼamo tou palepale.”+ 11 Kae neʼe ina tali age: “Ko ia ʼae neʼe ina fakamalolo au, ʼae neʼe ina ui mai: ‘Toʼo tou palepale pea ke haʼele.’ ” 12 Neʼe natou fehuʼi age: “Ko ai te tagata ʼae neʼe ina ui atu: ‘Toʼo tou palepale pea ke haʼele’?” 13 Kae neʼe mole iloʼi e te tagata ʼae neʼe fakamalolo pe neʼe ko ai, koteʼuhi neʼe fakahaohao atu ia Sesu ʼi te hahaʼi kaugamalie ʼae neʼe ʼi ai.

14 Hili ia, neʼe maʼu atu e Sesu ia ia ʼi te fale lotu pea neʼe ina ui age: “Koʼeni kua ke malolo. ʼAua naʼa ke toe agahala, naʼa hoko kia koe he meʼa ʼe kovi age.” 15 Neʼe alu ai te tagata ʼo fakaha ki te kau Sutea neʼe ko Sesu ʼae neʼe ina fakamalolo ia ia. 16 Ko te tupuʼaga la ʼaia ʼo te fakafeagai ʼa te kau Sutea kia Sesu, koteʼuhi neʼe ina fai ia te ʼu meʼa ʼaia lolotoga te Sapato. 17 Kae neʼe ina ui age: “ ʼE kei gaue pe taku Tamai ʼo kaku mai ki te temi nei, ʼo feia pe mo au ʼe kei au haga gaue.”+ 18 Koia neʼe ʼaʼasili age te kumi e te kau Sutea ke natou matehi ia ia, he neʼe mole gata ʼaki pe tana maumauʼi ia te Sapato kae neʼe ina toe fakahigoaʼi ia te ʼAtua ko tana Tamai,+ ʼo ina fakatatau ia ia ki te ʼAtua.+

19 Pea neʼe ui e Sesu kia natou: “ ʼE au tala moʼoni atu kia koutou, ʼe mole feala ki te ʼAlo ke ina fai he meʼa ʼi tona loto faʼitaliha, kae gata pe ki te meʼa ʼae ʼe fai e te Tamai pea mo sio ki ai.+ Koteʼuhi ko te ʼu meʼa fuli ʼae ʼe Ina fai, ʼe toe fai feia foki e te ʼAlo te ʼu meʼa ʼaia. 20 He ʼe ʼofa te Tamai ki te ʼAlo+ pea ʼe ina fakaha age te ʼu meʼa fuli ʼe ina fai, pea ʼe ina toe fakaha anai kia ia he ʼu gaue ʼe lalahi age ʼi te ʼu gaue ʼaeni, ke kotou punamaʼuli ai.+ 21 Koteʼuhi ohage pe ko te fakatuʼuake e te Tamai te kau mate pea mo foaki kia natou te maʼuli,+ ʼe toe feia pe mo te ʼAlo, ʼe ina foaki te maʼuli ki ʼae ʼe ina fia foaki ki ai.+ 22 He ʼe mole fakamauʼi e te Tamai he tahi, kae neʼe ina tuku te fakamau katoa ki te ʼAlo,+ 23 ke fakaʼapaʼapa ai te hahaʼi fuli ki te ʼAlo, ohage ko tanatou fakaʼapaʼapa ki te Tamai. Ko ʼae ʼe mole fakaʼapaʼapa ki te ʼAlo, ʼe mole fakaʼapaʼapa ia ki te Tamai ʼae neʼe ina fekauʼi mai ia ia.+ 24 ʼE au tala moʼoni atu kia koutou, ko ʼae ʼe fagono ki ʼaku folafola pea mo tui kia Ia ʼae neʼe ina fekauʼi mai au, ʼe ina maʼu te maʼuli heʼe gata,+ pea ʼe mole fakamauʼi kae kua fakalaka mai te mate ki te maʼuli.+

25 “ ʼE au tala moʼoni atu kia koutou, ʼe hoko mai te hola, pea ʼe ko te temi nei, ʼae ka logo te kau mate ki te leʼo ʼo te ʼAlo ʼo te ʼAtua, pea ko natou ʼae neʼe fakalogo ki ai, ʼe natou maʼuʼuli anai. 26 Koteʼuhi ohage ko te maʼu e te Tamai te maʼuli ia te ia,*+ ʼo toe feia pe, neʼe ina tuku ki te ʼAlo ke ina maʼu te maʼuli ia te ia.+ 27 Pea neʼe ina foaki age te pule ke faifakamau,+ koteʼuhi ʼe ko ia te Foha ʼo te tagata.+ 28 ʼAua naʼa kotou punamaʼuli ki te faʼahi ʼaeni, he ʼe hoko mai te hola ʼae ka logo ai ia natou fuli ʼi te ʼu fale maka fakamanatu* ki tona leʼo,+ 29 pea natou hu mai ki tuʼa, ia natou ʼae neʼe natou fai te ʼu meʼa ʼae ʼe lelei ki te fakatuʼuake ki te maʼuli, pea ko natou ʼae neʼe natou fai te ʼu meʼa ʼae ʼe kovi ki te fakatuʼuake ki te fakamau.+ 30 ʼE mole feala ke au fai he meʼa ʼi toku loto faʼitaliha. ʼE au faifakamau ʼo mulimuli ki te meʼa ʼae ʼe au logo ki ai, pea ʼe faitotonu taku faifakamau+ koteʼuhi ʼe mole au kumi toku finegalo, kae ko te finegalo ʼo ia ʼae neʼe ina fekauʼi mai au.+

31 “Kapau ko au tokotahi pe ʼae ʼe fakamoʼoni ʼo ʼuhiga mo au, pea ʼe mole moʼoni taku fakamoʼoni.+ 32 Kae ʼe ʼi ai te tahi ʼe fakamoʼoni kia au, pea ʼe au iloʼi ʼe moʼoni tana fakamoʼoni ʼo ʼuhiga mo au.+ 33 Neʼe kotou fekauʼi ni tagata kia Soane, pea neʼe ina fakaha te moʼoni.+ 34 Ki toku ia faʼahi, ʼe mole au tali he fakamoʼoni mai te tagata, kae ʼe au ui te ʼu meʼa ʼaeni ke haofaki ai koutou. 35 Ko te tagata ʼaia neʼe hage ko he malama neʼe tutu mo ulo, pea neʼe kotou loto ke kotou fakafiafia lahi ʼi he kiʼi temi ʼi tona malama.+ 36 Kae ʼe au maʼu he fakamoʼoni ʼe lahi age ʼi te fakamoʼoni ʼa Soane, koteʼuhi ʼe au fai te ʼu gaue ʼae neʼe tuku mai e taku Tamai, pea ʼe ko te fakamoʼoni ʼaia neʼe fekauʼi mai au e te Tamai.+ 37 Pea ko te Tamai ʼae neʼe ina fekauʼi mai au neʼe fakamoʼoni ʼo ʼuhiga mo au.+ Neʼe heʼeki kotou logo ki tona leʼo mo sisio ki ʼona fofoga,+ 38 pea ʼe mole maʼu tana folafola ʼi ʼokotou loto, koteʼuhi ʼe mole kotou tui kia ia ʼae neʼe ina fekauʼi mai.

39 “ ʼE kotou vakavakaʼi te ʼu Tohi Taputapu+ he ʼe kotou manatu ʼe kotou maʼu ai anai te maʼuli heʼe gata. Pea ʼe fakamoʼoni te ʼu tohi ʼaia ʼo ʼuhiga mo au.+ 40 Kae ʼe mole kotou fia ʼomai kia te au+ ke kotou maʼu ai te maʼuli. 41 ʼE mole au tali te kololia mai te tagata, 42 kae ʼe au iloʼi lelei pe ʼe mole kotou maʼu te ʼofa ki te ʼAtua ʼi ʼokotou loto. 43 Neʼe au haʼu ʼi te huafa ʼo taku Tamai, kae ʼe mole kotou tali au. Kapau neʼe haʼu he tahi kehe ʼi tona higoa totonu, ʼe kotou tali anai ia ia. 44 ʼE kotou fefakakololiaʼaki pe ia koutou kae ʼe mole kotou kumi te kololia ʼae ʼe haʼu mai te ʼAtua pe ʼe tahi. Koia ʼe lava feafeaʼi hakotou tui?+ 45 ʼAua naʼa kotou manatu ʼe au tukugakoviʼi anai koutou ia muʼa ʼo te Tamai. ʼE ʼi ai te tahi ʼe ina tukugakoviʼi koutou, ʼe ko Moisese,+ ʼae neʼe kotou tuku ki ai takotou falala. 46 Koia, kapau ʼe kotou tui kia Moisese, pea ʼe kotou tui mai anai kia au, koteʼuhi neʼe faitohi ʼo ʼuhiga mo au.+ 47 Kae kapau ʼe mole kotou tui ki ʼana tohi, ʼe feafeaʼi anai hakotou tui ki ʼaku folafola?”

6 Hili ia, neʼe fakalaka ia Sesu ʼi te Tai ʼo Kalilea ʼae ʼe toe fakahigoa ko Tipeliate.+ 2 Pea neʼe haga mulimuli ia te ia te hahaʼi tokolahi,+ koteʼuhi neʼe natou sisio ki te ʼu milakulo ʼae neʼe ina fakahoko ʼi tana fakamalolo te kau mahaki.+ 3 Neʼe hake leva ia Sesu ki te moʼuga pea mo heka ai mo ʼana tisipulo. 4 Neʼe kua ovi mai te Pasikate,+ ia te ʼaho lahi ʼo te kau Sutea. 5 ʼI te hiki ake e Sesu ʼona mata pea mo sio ki te hahaʼi tokolahi ʼae neʼe ʼomai kia te ia, neʼe ina ui kia Filipo: “ ʼE tou totogi anai maifea he ʼu pane ke kai e te hahaʼi ʼaeni?”+ 6 Kae neʼe palalau feia moʼo ʼahiʼahiʼi ia Filipo, koteʼuhi neʼe kua ina iloʼi te meʼa ʼae ka ina fai. 7 Neʼe tali age e Filipo: “ ʼE mole feʼauga he ʼu tenalio* ʼe 200 moʼo totogi ʼaki he ʼu pane ke feala ai hanatou maʼu takitahi he kiʼi moʼi pane.” 8 Ko te tahi ʼo ʼana tisipulo, ko Atelea, te tehina ʼo Simone Petelo, neʼe ina ui kia te ia: 9 “ ʼE ʼi heni te kiʼi tama mo ʼana foʼi pane olose* ʼe nima mo kiʼi ika ʼe lua. Kae kotea tona ʼuhiga ki te hahaʼi tokolahi ʼaeni?”+

10 Neʼe ui e Sesu: “Kotou fakanofo te hahaʼi ki lalo.” Neʼe lunaʼia te koga meʼa ʼaia, koia neʼe nonofo ifo ai te hahaʼi ki lalo, pea neʼe lau ko te teitei toko 5000 tagata.+ 11 Neʼe toʼo e Sesu te ʼu foʼi pane pea ʼi tana ʼosi fai he fakafetaʼi neʼe ina tufatufa kia natou ʼae neʼe nonofo ai. Neʼe ina toe fai feia mo te ʼu kiʼi ika, pea neʼe feʼauga ai maʼa natou fuli. 12 Kae ʼi tanatou kua makokona, neʼe ina ui ki ʼana tisipulo: “Kotou tanaki te ʼu toega kai ke ʼaua naʼa alu noa.” 13 Neʼe natou tanaki ai te ʼu toega kai pea mo fakafofonu kato ʼe 12. Neʼe ko te ʼu toega kai ʼaia ʼa natou ʼae neʼe makokona ʼi te ʼu foʼi pane olose ʼe nima.

14 ʼI te sisio ʼa te hahaʼi ki te milakulo ʼae neʼe ina fakahoko, neʼe natou ui: “ ʼE ko ia moʼoni te Polofeta ʼae neʼe tonu ke haʼu ki te malamanei.”+ 15 ʼI te iloʼi e Sesu ʼe natou ʼomai anai ʼo toʼo ia ia ke natou fakanofo ko he hau, neʼe toe alu ia+ ki te moʼuga, ʼo nofo tokotahi ai.+

16 ʼI te malu ʼo te afiafi, neʼe hihifo ʼana tisipulo ki te matatai,+ 17 pea neʼe natou heheka ki te vaka ʼo fakalaka ʼi te tai ʼo olo ki Kapenaume. Neʼe kua poʼuli pea neʼe heʼeki alu age ia Sesu kia natou.+ 18 Pea neʼe hou ia te tai koteʼuhi neʼe lalahi ia te matagi.+ 19 Kae hili tanatou tauʼaʼalo ia teitei kilometa ʼe nima peʼe ono,* neʼe natou sisio ki te haʼele ʼa Sesu ʼi te fuga tai ʼo fakaovi age ki te vaka, pea neʼe natou matataku ai. 20 Kae neʼe ina ui kia natou: “ ʼE ko au, ʼaua naʼa kotou matataku!”+ 21 Neʼe natou loto leva ke heka ki te vaka, pea mole faʼa fualoa pea tau atu te vaka ki te fenua ʼae neʼe natou fia olo ki ai.+

22 ʼI te ʼaho ake, ko te hahaʼi tokolahi ʼae neʼe nonofo ʼi te tahi kauvai, neʼe natou tokagaʼi neʼe mole kei ʼi ai he vaka. Neʼe kua puli ia te kiʼi vaka ʼae neʼe tau ai. Neʼe mole heka ai ia Sesu kae neʼe olo ʼateaina pe ʼana tisipulo. 23 Neʼe tau age leva ni vaka mai Tipeliate ʼo ovi ki te koga meʼa ʼae neʼe natou kai ai te ʼu foʼi pane, ʼi te ʼosi fai e te ʼAliki he fakafetaʼi. 24 Koia, ʼi te tokagaʼi e te hahaʼi tokolahi kua pupuli ia Sesu mo ʼana tisipulo, neʼe natou heheka ai ki ʼonatou vaka pea mo olo ki Kapenaume ʼo kumi ai ia Sesu.

25 ʼI tanatou maʼu atu ia ia ki te tahi kauvai, neʼe natou ui age: “Lapi,+ neʼe ke haʼu ʼanafea ki heni?” 26 Neʼe tali age e Sesu: “ ʼE au tala moʼoni atu kia koutou, ʼe mole kotou kumi au ʼuhi ko te ʼu milakulo ʼae neʼe kotou sisio ki ai, kae ʼuhi ko takotou kai ki te ʼu foʼi pane pea mo makokona ai.+ 27 ʼAua naʼa kotou gaue ki te meʼa kai ʼae ʼe pala, kae ki te meʼa kai ʼae ʼe tologa pea mo ina taki ki te maʼuli heʼe gata,+ ʼae ʼe foaki atu anai e te Foha ʼo te tagata. Koteʼuhi neʼe fakamoʼoni e te Tamai, te ʼAtua, ʼe ina leleiʼia ia ia.”+

28 Neʼe natou fehuʼi kia te ia: “Kotea ʼae ʼe tonu ke matou fai moʼo fakahoko te ʼu gaue ʼa te ʼAtua?” 29 Neʼe tali age e Sesu: “Koʼeni te gaue ʼa te ʼAtua, ke  kotou tui kia ia ʼae neʼe ina fekauʼi mai.”+ 30 Pea neʼe natou ui: “Kotea he milakulo ʼe ke fakahoko anai,+ ke matou sisio ki ai pea mo tui atu kia koe? Kotea ʼae ka ke fakahoko? 31 Neʼe kai e ʼamatou kui te mane ʼi te toafa,+ ohage ko tona tohi: ‘Neʼe ina foaki kia natou te pane mai te lagi ke natou kai.’ ”+ 32 Neʼe ui age leva e Sesu: “ ʼE au tala moʼoni atu, neʼe mole foaki e Moisese kia koutou te pane mai te lagi, kae ʼe ko taku Tamai ʼae ʼe ina foaki atu te pane moʼoni mai te lagi. 33 Koteʼuhi ko te pane ʼa te ʼAtua, ʼe ko ia ʼae ʼe hifo mai selo ʼo foaki te maʼuli ki te malamanei.” 34 Neʼe natou ui age leva: “ ʼAliki, foaki tuʼumaʼu mai te pane ʼaia kia matou.”

35 Neʼe ui e Sesu kia natou: “Ko au ia te pane ʼo te maʼuli. Ko ʼae ʼe haʼu kia te au ʼe mole toe fia kai anai, pea ko ʼae ʼe tui kia te au ʼe mole toe fia inu anai.+ 36 Kae ohage pe ko taku ui atu, ʼe mole kotou tui logope la ʼe kotou sisio kia te au.+ 37 Ko natou fuli ʼae ʼe foaki mai e te Tamai ʼe natou ʼomai anai kia te au, pea ʼe mole au kapu anai ia ia ʼae ʼe haʼu kia te au.+ 38 Koteʼuhi neʼe mole au hifo mai selo+ ʼo fai toku finegalo, kae ko te finegalo ʼo ia ʼae neʼe ina fekauʼi mai au.+ 39 Koʼeni te finegalo ʼo ia ʼae neʼe ina fekauʼi mai au, ke mole puli he tahi ia natou fuli ʼae neʼe ina foaki mai, kae ke au fakatuʼuake+ natou ʼi te ʼaho fakamuli. 40 He ʼe koʼeni te finegalo ʼo taku Tamai, ke maʼu te maʼuli heʼe gata e ia ʼae ʼe fakamoʼoni ki te ʼAlo pea mo tui kia te ia,+ pea ʼe au fakatuʼuake anai+ ia ia ʼi te ʼaho fakamuli.”

41 Pea neʼe muhumuhu ia te kau Sutea ʼo ʼuhiga mo ia he neʼe ina ui: “Ko au te pane ʼae neʼe hifo mai selo.”+ 42 Neʼe natou ui: “ ʼE mole ko Sesu koa ʼaena, te foha ʼo Sosefo? ʼE mole tou iloʼi koa la ia tana tamai mo tana faʼe?+ Kae he koʼe ʼe ina ui leva ia: ‘Neʼe au hifo mai selo’?” 43 Neʼe tali age e Sesu: “Tuku takotou muhumuhu. 44 ʼE mole he tahi ʼe feala ke haʼu kia te au mo ka na pau la neʼe mole taki mai ia ia e taku Tamai,+ ʼae neʼe ina fekauʼi mai au, pea ʼe au fakatuʼuake anai ia ia ʼi te ʼaho fakamuli.+ 45 ʼE tohi ʼi te ʼu tohi ʼa te kau Polofeta: ‘ ʼE akoʼi fuli anai natou e Sehova.’*+ Ko ʼae neʼe fagono ki te Tamai pea mo ina tali tana akonaki, ʼe haʼu ia kia te au. 46 Heʼeki sio he tagata ki te Tamai,+ gata pe kia ia ʼae neʼe haʼu mai te ʼAtua, ko ia ʼaia kua sio ki te Tamai.+ 47 ʼE au tala moʼoni atu kia koutou, ko ʼae ʼe tui, ʼe ina maʼu ia te maʼuli heʼe gata.+

48 “Ko au ia te pane ʼo te maʼuli.+ 49 Neʼe kai e ʼakotou kui te mane ʼi te toafa kae neʼe natou mamate.+ 50 Koʼeni te pane ʼae ʼe hifo mai selo, pea ko ʼae ʼe kai ki ai ʼe mole mate anai. 51 Ko au te pane maʼuli ʼae neʼe hifo mai selo. Kapau ʼe kai e he tahi te pane ʼaia, ʼe maʼuli anai ʼo heʼe gata. Pea ko te pane ʼae ʼe au foaki anai ke maʼuli ai te malamanei, ʼe ko toku kakano.”+

52 Pea neʼe fefihiʼaki te kau Sutea: “ ʼE lava feafeaʼi ki te tagata ʼaeni ke ina foaki mai tona kakano ke tou kai?” 53 Koia neʼe ui e Sesu kia natou: “ ʼE au tala moʼoni atu kia koutou, kapau ʼe mole kotou kai te kakano ʼo te Foha ʼo te tagata pea mo inu tona taʼataʼa, ʼe mole ia koutou te maʼuli.+ 54 Ko ʼae ʼe ina kai toku kakano pea mo inu toku taʼataʼa ʼe ina maʼu te maʼuli heʼe gata, pea ʼe au fakatuʼuake anai+ ia ia ʼi te ʼaho fakamuli. 55 Koteʼuhi ko toku kakano ʼe ko te meʼa kai moʼoni pea ko toku taʼataʼa ʼe ko te meʼa inu moʼoni. 56 Ko ʼae ʼe ina kai toku kakano pea mo inu toku taʼataʼa ʼe fakatahi mo au, pea ʼe au fakatahi mo ia.+ 57 Ohage pe ko te fekauʼi mai au e te Tamai ʼae ʼe maʼuli pea ʼe au maʼuli ʼuhi ko te Tamai, ʼo toe feia aipe, ko ʼae ʼe ina kai toku kakano ʼe maʼuli anai ʼuhi ko au.+ 58 Koʼeni te pane ʼae neʼe hifo mai selo. ʼE mole tatau mo te pane ʼae neʼe kai e ʼakotou kui pea natou mamate. Ko ʼae ʼe kai ki te pane ʼaeni ʼe maʼuli anai ʼo heʼe gata.”+ 59 Neʼe ina fai te ʼu palalau ʼaia ʼi tana faiakonaki ʼi he sinakoka* ʼi Kapenaume.

60 ʼI te logo ʼo ʼana tisipulo ki tana palalau ʼaia, neʼe ui e te tokolahi: “Kotea koa te taʼi palalau ʼaia? Ko ai ʼae ʼe kei fia fakalogo ki ai?” 61 Kae neʼe iloʼi e Sesu neʼe muhumuhu ʼana tisipulo ʼo ʼuhiga mo te faʼahi ʼaia, koia neʼe ina ui age: “ ʼE kotou tukia koa ʼuhi ko ʼaku palalau? 62 Pea ʼe feafeaʼi age leva mo kapau ʼe kotou sisio ki te hake ʼo te Foha ʼo te tagata ki te potu ʼae neʼe nofo ai ʼi muʼa atu?+ 63 ʼE ko te laumalie ʼae ʼe ina foaki te maʼuli+ kae ʼe mole he ʼaoga ʼo te kakano. Ko te ʼu palalau ʼae neʼe au fai atu ʼe haʼu mai te laumalie maʼoniʼoni pea ʼe maʼuli.+ 64 Kae ʼe ʼi ai ʼihi ia koutou ʼe mole natou tui.” Neʼe kua iloʼi e Sesu talu mai te kamataʼaga ia natou ʼae ʼe mole tui pea mo ia ʼae ka ina lavakiʼi ia ia.+ 65 Neʼe ina hoko atu: “Ko te tupuʼaga la ʼaia ʼo taku ui atu, ʼe mole feala ke haʼu he tahi kia te au mo ka na pau la neʼe mole fakagafua age e te Tamai.”+

66 Koia, ʼuhi ko te faʼahi ʼaia, tokolahi ʼi ʼana tisipulo neʼe natou toe liliu ki te ʼu meʼa ʼae ʼi muli+ pea neʼe mole kei natou mulimuli ia te ia. 67 Neʼe ui leva e Sesu ki te toko Hogofulu-ma-lua: “ ʼE kotou fia olo koa mo koutou?” 68 Neʼe tali e Simone Petelo kia te ia: “ ʼAliki, ke matou olo la kia ai?+ ʼE ke maʼu te ʼu folafola ʼo te maʼuli heʼe gata.+ 69 ʼE matou tui pea ʼe matou iloʼi ʼe ko koe te Maʼoniʼoni ʼa Te ʼAtua.”+ 70 Neʼe ui e Sesu kia natou: “Neʼe mole koa la au filifili koutou, te toko hogofulu-ma-lua?+ Kae ʼe ʼi ai he tahi ia koutou ʼe ko te tagata fasituʼu.”*+ 71 Neʼe palalau ia ʼo ʼuhiga mo Sutasi te foha ʼo Simone Isekaliote, koteʼuhi ʼe ko ia ʼae ka ina lavakiʼi ia ia, logo la tana kau ki te toko Hogofulu-ma-lua.+

7 Hili ia, neʼe hoko atu e Sesu tana gaue ʼi Kalilea. Neʼe mole fia alu ia ki Sutea he neʼe faigaʼi e te kau Sutea ke natou matehi.+ 2 Kae neʼe kua ovi mai te ʼAho Lahi Fakasutea ʼo Te ʼu Tapenakulo.*+ 3 Pea neʼe ui age e ʼona tehina:+ “Mavae ʼi heni ʼo alu ki Sutea, ke feala ki ʼau tisipulo ke natou toe sisio mo natou ki te ʼu gaue ʼae ʼe ke fai. 4 Koteʼuhi ʼe mole fai e he tahi he meʼa fakafufu moka ʼe ina loto ke iloʼi ia ia e te hahaʼi. Kapau ʼe ke fai te ʼu meʼa ʼaeni, fakaha ia koe ki te hahaʼi fuli.” 5 Neʼe mole tui ʼona tehina kia te ia.+ 6 Neʼe ui age e Sesu: “Heʼeki hoko mai toku temi,+ kae ʼe feala ke kotou olo ki te ʼaho lahi ʼi he temi pe. 7 ʼE mole he tupuʼaga ke fehiʼa te malamanei kia koutou, kae ʼe fehiʼa ia kia au, koteʼuhi ʼe au fakamoʼoni ʼe kovi ʼana gaue.+ 8 Kotou olo ki te ʼaho lahi. ʼE mole au alu ki te ʼaho lahi ʼaia, koteʼuhi heʼeki hoko mai toku temi.”+ 9 ʼI tana ʼosi fai te ʼu palalau ʼaia kia natou, neʼe nofo ai ʼi Kalilea.

10 Kae ʼi te kua olo ʼo ʼona tehina ki te ʼaho lahi, neʼe toe alu leva mo ia, neʼe mole alu fakahaha, kae fakafufu. 11 Neʼe kumi leva ia ia e te kau Sutea ʼi te ʼaho lahi, ʼo natou ui: “ ʼE ʼifea te tagata ʼaia?” 12 Neʼe fefanafanaʼaki te hahaʼi tokolahi ʼo ʼuhiga mo ia. Neʼe ui e ʼihi: “ ʼE ko he tagata lelei.” Kae neʼe ui e ʼihi age: “Kailoa ia. ʼE ina fakaheʼi te hahaʼi.”+ 13 ʼE mahino ia, neʼe mole he tahi neʼe palalau fakahaha ʼo ʼuhiga mo ia he neʼe natou matataku ʼi te kau Sutea.+

14 ʼI te kua ʼaho fa ʼo te fai ʼo te ʼaho lahi, neʼe alu ia Sesu ki te fale lotu ʼo faiakonaki ai. 15 Pea neʼe punamaʼuli ia te kau Sutea, ʼo natou ui: “ ʼE iloʼi feafeaʼi e te tagata ʼaeni te ʼu Tohi Taputapu*+ kae neʼe mole kau ki he ʼu ako fakalotu?”*+ 16 Neʼe ui e Sesu kia natou: “Ko te ʼu meʼa ʼae ʼe au akoʼi ki te hahaʼi ʼe mole ʼaʼaku ia, kae ʼe ʼa ia ʼae neʼe ina fekauʼi mai au.+ 17 Kapau ʼe fia fai e he tahi te finegalo ʼo te ʼAtua, ʼe ina iloʼi anai pe ʼe haʼu mai te ʼAtua te ʼu meʼa ʼae ʼe au akoʼi ki te hahaʼi,+ peʼe au fakaha pe au ʼaku manatu. 18 Ko ʼae ʼe ina fakaha ʼana manatu ʼe ina kumi ia tona kololia. Kae ko ʼae ʼe ina kumi te kololia ʼo ia ʼae neʼe ina fekauʼi mai,+ ko ia ʼaia ʼe moʼoni pea ʼe mole maʼu ia ia he aga ʼe heʼe faitotonu. 19 Neʼe mole foaki atu koa la e Moisese ia te Lao?+ Kae ʼe mole he tahi ia koutou ʼe fakalogo ki te Lao. He koʼe ʼe kotou faiga ke kotou matehi au?”+ 20 Neʼe ui e te hahaʼi tokolahi: “ ʼE nofo ia koe he temonio. Ko ai ʼae ʼe faiga ke ina matehi koe?” 21 Neʼe tali e Sesu kia natou: “Neʼe ko te gaue pe ʼe tahi neʼe au fai, pea ʼe kotou punamaʼuli fuli ai. 22 Koia, kotou fakakaukauʼi ia te faʼahi ʼaeni: Neʼe foaki atu e Moisese ia te silikosisio,+ logo la neʼe mole haʼu mai ia Moisese kae mai te ʼu kui,+ pea ʼe kotou silikosisioʼi he tagata ʼi te sapato. 23 Koia, kapau ʼe silikosisioʼi he tagata ʼi te sapato ke mole maumauʼi ai te Lao ʼa Moisese, ʼe kotou iita kovi koa he neʼe au fakamalolo he tagata ʼi te sapato?+ 24 Tuku takotou fakamauʼi ʼo mulimuli ki te meʼa ʼae ʼe ha, kae kotou fakamauʼi ʼaki he fakamau ʼe faitotonu.”+

25 Neʼe ui leva e ni hahaʼi ʼo Selusalemi: “ ʼE mole ko te tagata koa la ʼaeni ʼae ʼe natou faigaʼi ke natou matehi?+ 26 Pea koʼeni ʼe palalau ia muʼa ʼo te hahaʼi kae ʼe mole natou leaʼi. Pe kua mahino koa ia te kau pule ʼe ko ia ia Kilisito?* 27 Kae ʼe tou iloʼi pe ʼe haʼu maifea te tagata ʼaia,+ kae ka haʼu ia Kilisito ʼe mole iloʼi anai e he tahi pe ʼe haʼu maifea.” 28 Pea neʼe kalaga ia Sesu ʼi tana faiakonaki ʼi te fale lotu: “ ʼE kotou iloʼi au pea ʼe kotou iloʼi pe ʼe au haʼu maifea. Neʼe mole au haʼu ʼi toku loto faʼitaliha,+ kae ko Ia ʼae neʼe ina fekauʼi mai au ʼe maʼuli moʼoni, pea ʼe mole kotou iloʼi ia ia.+ 29 ʼE au iloʼi ia ia,+ koteʼuhi ʼe au fakafofoga ia ia, pea ʼe ko Ia ʼae neʼe ina fekauʼi mai au.” 30 Neʼe natou faigaʼi leva ke natou puke ia ia,+ kae neʼe mole lavaʼi e he tahi, koteʼuhi neʼe heʼeki hoko mai tona hola.+ 31 Kae tokolahi te hahaʼi neʼe natou tui kia te ia,+ pea natou ui: “Ka haʼu ia Kilisito, ʼe ina fai anai koa he ʼu milakulo ʼo lahi age ʼi te ʼu milakulo ʼae neʼe fai e te tagata ʼaeni?”

32 Neʼe logo te kau Faliseo ki te fefanafanaʼaki ʼa te hahaʼi tokolahi ʼo ʼuhiga mo te ʼu faʼahi ʼaia, pea neʼe fekauʼi e te ʼu pelepitelo pule mo te kau Faliseo te ʼu tagata leʼo ke natou puke ia ia. 33 Pea neʼe ui e Sesu: “ ʼE au nofo anai mo koutou ʼi he kiʼi temi nounou ʼi muʼa ʼo taku alu kia Ia ʼae neʼe ina fekauʼi mai au.+ 34 ʼE kotou kumi anai au, kae ʼe mole kotou maʼu anai au, pea ko te potu ʼae ʼe au alu anai ki ai ʼe mole feala ke kotou ʼomai ki ai.”+ 35 Neʼe feuiʼaki e te kau Sutea: “Ko te potu fea ʼae ʼe ʼamanaki alu ki ai te tagata ʼaeni ke mole feala ai hatatou maʼu? ʼE ʼamanaki alu koa ki te kau Sutea ʼae ʼe mavetevete ʼi te kau Keleka pea mo akoʼi te kau Keleka? 36 Pea kotea te fakaʼuhiga ʼo tana ui: ‘ ʼE kotou kumi anai au, kae ʼe mole kotou maʼu anai au, pea ko te potu ʼae ʼe au alu anai ki ai ʼe mole feala ke kotou ʼomai ki ai’?”

37 ʼI te ʼaho fakaʼosi, te temi maʼuhiga ʼo te ʼaho lahi,+ neʼe tuʼu ake ia Sesu ʼo kalaga: “Kapau ʼe fia inu he tahi, ke haʼu kia te au pea ke inu.+ 38 Ko ʼae ʼe tui kia te au, ohage ko tona ui ʼi te folafola: ‘ ʼE tafe anai mai ia ia te vai maʼuli.’ ”+ 39 Kae neʼe palalau ia ʼo ʼuhiga mo te laumalie maʼoniʼoni, ʼae ka ʼamanaki maʼu e natou ʼae ʼe tui kia te ia. Koteʼuhi neʼe heʼeki foaki te laumalie+ he neʼe heʼeki maʼu e Sesu ia te kololia.+ 40 Ko ʼihi ʼi te hahaʼi tokolahi ʼae neʼe logo ki tana palalau ʼaia, neʼe natou ui: “ ʼE ko ia moʼoni te Polofeta.”+ 41 Neʼe ui e ʼihi: “ ʼE ko ia ia Kilisito.”+ Kae neʼe ui e ʼihi age: “ ʼE feala koa ke haʼu ia Kilisito mai Kalilea?+ 42 ʼE mole ui koa la ʼi te folafola ʼe haʼu ia Kilisito mai te hakoga ʼo Tavite+ pea mo te kolo ko Petelehemi,+ ʼae neʼe tupu ai ia Tavite?”+ 43 Neʼe hoko ai te fihi ʼi te hahaʼi ʼuhi ko ia. 44 Ko ʼihi neʼe natou fia puke ia ia, kae neʼe mole lavaʼi e he tahi.

45 ʼI te toe liliu ʼa te ʼu tagata leʼo, neʼe fehuʼi age e te ʼu pelepitelo pule mo te kau Faliseo: “He koʼe neʼe mole kotou ʼaumai ia ia?” 46 Neʼe tali age e te ʼu tagata leʼo: “Neʼe heʼeki he tagata kua palalau feia.”+ 47 Neʼe ui e te kau Faliseo: “Kua toe fakaheʼi koa ia mo koutou? 48 ʼE mole he tahi ʼi te kau pule peʼe ko te kau Faliseo ʼe tui kia te ia.+ 49 Kae ko te hahaʼi ʼaena, ʼae ʼe mole natou iloʼi te Lao, ʼe ko te kau malaʼia.” 50 Ko Nikotemo, ʼae neʼe alu kia Sesu ʼi muʼa atu pea neʼe kau ʼi te kau Faliseo, neʼe ina ui age: 51 “ ʼE mole ui koa la ʼi tatatou Lao, ʼe tonu muʼa ke tou fakalogo ki he tagata ke tou iloʼi pe kotea ʼae neʼe ina fai, pea hoki tou fakamauʼi leva?”+ 52 Neʼe natou tali age: “Pe ʼe ke Kalilea koa mo koe? Kumi pea ʼe ke iloʼi ai ʼe mole he polofeta ʼe haʼu anai mai Kalilea.”*

8 12 Neʼe toe palalau leva ia Sesu ki te hahaʼi, ʼo ina ui: “Ko au te malama ʼo te malamanei.+ Ko ʼae ʼe mulimuli mai ia te au, ʼe mole haʼele anai ʼi te fakapoʼuli, kae ʼe ina maʼu anai te malama+ ʼo te maʼuli.” 13 Neʼe ui e te kau Faliseo kia te ia: “ ʼE ke fakamoʼoni kia koe totonu, koia ko tau fakamoʼoni ʼe mole moʼoni.” 14 Neʼe ui e Sesu kia natou: “Tatau aipe pe ʼe au fakamoʼoni kia au totonu, kae ko taku fakamoʼoni ʼe moʼoni koteʼuhi ʼe au iloʼi pe ʼe au haʼu maifea pea mo alu kifea.+ Kae ʼe mole kotou iloʼi koutou pe ʼe au haʼu maifea pea mo alu kifea. 15 ʼE kotou faifakamau ʼo mulimuli ki te ʼu lekula fakatagata.*+ ʼE mole au fakamauʼi au he tahi. 16 Kae tatau aipe pe ʼe au faifakamau, kae ko taku fakamau ʼe moʼoni koteʼuhi ʼe mole au tokotahi, kae ʼe fakatahi mo au ia te Tamai ʼae neʼe ina fekauʼi mai au.+ 17 Pea ʼe toe tohi foki ʼi takotou Lao: ‘Ko he fakamoʼoni ʼa he toko lua, ʼe moʼoni.’+ 18 ʼE au fakamoʼoni kia au totonu, pea ʼe toe fakamoʼoni foki kia au ia te Tamai ʼae neʼe ina fekauʼi mai au.”+ 19 Neʼe natou fehuʼi leva kia te ia: “ ʼE ʼifea tau Tamai?” Neʼe tali e Sesu: “ ʼE mole kotou iloʼi ia au mo taku Tamai.+ Ka na neʼe kotou iloʼi la ia au, neʼe kotou toe iloʼi foki mo taku Tamai.”+ 20 Neʼe ina fai te ʼu palalau ʼaia ʼi te faʼahi ʼae neʼe tuʼu ai te tanakiʼaga koloa,+ ʼi tana faiakonaki ʼi te fale lotu. Kae neʼe mole puke ia ia e he tahi, koteʼuhi neʼe heʼeki hoko mai tona hola.+

21 Pea neʼe ina toe ui kia natou: “ ʼE au alu, pea ʼe kotou kumi anai au, kae ʼe kotou mamate anai ʼi takotou agahala.+ Ko te potu ʼae ʼe au alu anai ki ai ʼe mole feala ke kotou ʼomai ki ai.”+ 22 Neʼe ui leva e te kau Sutea: “ ʼE fakamate anai koa ia? Koteʼuhi ʼe ina ui: ‘Ko te potu ʼae ʼe au alu anai ki ai ʼe mole feala ke kotou ʼomai ki ai.’ ” 23 Neʼe ina toe ui kia natou: “ ʼE kotou ʼomai mai te ʼu potu ʼo lalo nei. ʼE au haʼu au mai te ʼu potu ʼo ʼoluga.+ ʼE kotou ʼomai mai te malamanei, ʼe mole au haʼu au mai te malamanei. 24 Ko te tupuʼaga la ʼaia ʼo taku ui atu kia koutou: ʼE kotou mamate anai ʼi ʼakotou agahala. Koteʼuhi kapau ʼe mole kotou tui ʼe ko au ia ia ʼae neʼe tonu ke haʼu, pea ʼe kotou mamate anai ʼi ʼakotou agahala.” 25 Neʼe natou fehuʼi leva kia te ia: “Ko ai ia koe?” Neʼe ui e Sesu kia natou: “Kotea te ʼuhiga ʼo taku palalau atu kia koutou? 26 ʼE lahi te ʼu faʼahi ʼe tonu ke au palalau ki ai ʼo ʼuhiga mo koutou pea ke au fakamauʼi. Ko Ia ʼae neʼe ina fekauʼi mai au ʼe moʼoni, pea ko te ʼu meʼa ʼae neʼe ina fakaha mai ʼe au fakaha ki te malamanei.”+ 27 Neʼe mole natou mahino neʼe palalau age kia natou ʼo ʼuhiga mo te Tamai. 28 Neʼe ui leva e Sesu: “ ʼI takotou ʼosi lagaʼi ake ia te Foha ʼo te tagata,+ ʼe hoki kotou iloʼi ai anai ʼe ko au ia ia+ ʼae neʼe tonu ke haʼu pea ʼe mole au fai he meʼa ʼi toku loto faʼitaliha.+ Kae ohage pe ko te akoʼi au e te Tamai, ʼe au fakaha te ʼu meʼa ʼaia. 29 Pea ko Ia ʼae neʼe ina fekauʼi mai au ʼe fakatahi mo au. Neʼe mole ina liʼaki au koteʼuhi ʼe au fai tuʼumaʼu pe te ʼu meʼa ʼae ʼe ina leleiʼia.”+ 30 ʼI tana fai te ʼu palalau ʼaia, tokolahi neʼe natou tui kia te ia.

31 Pea neʼe ui e Sesu ki te kau Sutea ʼae neʼe tui kia te ia: “Kapau ʼe kotou nonofo ʼi taku folafola, ko koutou ko ʼaku tisipulo moʼoni. 32 ʼE kotou iloʼi anai te moʼoni,+ pea ʼe fakaʼateaina anai koutou e te moʼoni.”+ 33 Neʼe natou tali kia te ia: “Ko matou ko te hakoga ʼo Apalahamo pea neʼe mole matou kaugana ʼi he temi ki he tahi. He koʼe ʼe ke ui: ‘ ʼE kotou ʼateaina anai’?” 34 Neʼe tali e Sesu kia natou: “ ʼE au tala moʼoni atu kia koutou, ko he tahi ʼe hoko atu tana agahala ʼe kaugana ia ki te agahala.+ 35 Pea tahi, ko te tagata kaugana ʼe mole nofo ia ʼi te loto fale ʼo talu ai, kae ko te foha ʼe nofo ia ʼo talu ai. 36 Koia kapau ʼe fakaʼateaina koutou e te ʼAlo, ʼe kotou ʼateaina moʼoni anai. 37 ʼE au iloʼi ko koutou ko te hakoga ʼo Apalahamo. Kae ʼe kotou faigaʼi ke kotou matehi au, koteʼuhi ʼe mole tuputupu taku folafola ia koutou. 38 ʼE au palalau ki te ʼu meʼa ʼae neʼe au sio ki ai ʼi taku nofo ʼae mo taku Tamai,+ kae ʼe kotou fai koutou te ʼu meʼa ʼae neʼe kotou logo ki ai mai takotou tamai.” 39 Neʼe natou ui kia te ia: “Ko tamatou tamai ko Apalahamo.” Neʼe ui e Sesu kia natou: “Ka na pau la ko koutou ko te ʼu fanau ʼa Apalahamo,+ neʼe kotou fai te ʼu gaue ʼa Apalahamo. 40 Kae ʼe kotou faigaʼi ke kotou matehi au, ia au ʼae neʼe ina fakaha atu te moʼoni ʼae neʼe au logo ki ai mai te ʼAtua.+ Neʼe mole fai e Apalahamo ia te faʼahi ʼaia. 41 ʼE kotou fai te ʼu gaue ʼo takotou tamai.” Neʼe natou ui kia te ia: “ ʼE mole ko matou ko ni fanau taka, kae ko tamatou Tamai pe ʼe tahi, ko te ʼAtua.”

42 Neʼe ui e Sesu kia natou: “Ka na pau la neʼe ko te ʼAtua takotou Tamai, neʼe kotou ʼoʼofa ia au,+ he neʼe au haʼu mai te ʼAtua pea ʼe au ʼi heni. Neʼe mole au haʼu ʼi toku loto faʼitaliha, kae neʼe ko Ia ʼae neʼe ina fekauʼi mai au.+ 43 He koʼe ʼe mole kotou mahino ki ʼaku palalau? Koteʼuhi ʼe mole feala ke kotou fagono ki ʼaku folafola. 44 ʼE kotou ʼomai mai takotou tamai te Tevolo, pea ʼe kotou fia fakahoko te ʼu holi ʼo takotou tamai.+ Ko ia ʼaia neʼe faifakapo ʼi te kamataʼaga,+ pea neʼe mole haga nofo ia ʼi te moʼoni, koteʼuhi ʼe mole nofo te moʼoni ia ia. Ka ina tala te loi, ʼe palalau ia ʼo mulimuli ki tona ʼuhiga, koteʼuhi ʼe gutuloi pea ʼe ko te tamai ʼo te loi.+ 45 Kae, ʼuhi ʼae ʼe au tala atu te moʼoni, ʼe mole kotou tui mai kia te au. 46 Ko ai ia koutou ʼe feala ke ina fakamoʼoni neʼe au agahala? Kapau ʼe au tala te moʼoni, pea he koʼe ʼe mole kotou tui mai kia te au? 47 Ko ʼae ʼe haʼu mai te ʼAtua, ʼe fagono ki te ʼu folafola ʼa te ʼAtua.+ Ko te tupuʼaga ʼaia ʼo takotou mole fagono, he ʼe mole kotou ʼomai mai te ʼAtua.”+

48 Neʼe ui e te kau Sutea kia te ia: “Neʼe mole tonu koa la tamatou ui: ‘Ko koe ko he Samalitana+ pea ʼe nofo ia koe he temonio’?”+ 49 Neʼe ui e Sesu: “ ʼE mole nofo ia au he temonio kae ʼe au fakamaʼuhigaʼi taku Tamai, pea ʼe kotou fakalainoaʼi au. 50 Kae ʼe mole au faiga ke fakakololiaʼi au.+ ʼE ʼi ai he Tahi ʼe ina kumi pea mo faifakamau. 51 ʼE au tala moʼoni atu kia koutou, kapau ʼe mulimuli he tahi ki taku folafola, ʼe mole mate anai ia ʼi he temi.”+ 52 Neʼe ui e te kau Sutea kia te ia: “Kua matou iloʼi leva ʼe nofo ia koe he temonio. Kua mate ia Apalahamo, ʼo toe feia mo te kau polofeta, kae ʼe ke ui koe: ‘Kapau ʼe mulimuli he tahi ki taku folafola, ʼe mole mate anai ia ʼi he temi.’ 53 ʼE ke lahi age koa la koe ʼi tamatou tamai ko Apalahamo, ʼae kua mate? Kua toe mamate foki mo te kau polofeta. Koia, ui mai pe ko ai ia koe.” 54 Neʼe tali e Sesu: “Kapau ʼe au fakakololiaʼi au, pea ʼe mole he ʼuhiga ʼo toku kololia. Kae ʼe fakakololiaʼi au e taku Tamai,+ ia ia ʼae ʼe kotou ui ʼe ko tokotou ʼAtua. 55 ʼE mole kotou iloʼi koutou ia ia,+ kae ʼe au iloʼi au ia ia.+ Pea kapau neʼe au ui ʼe mole au iloʼi ia ia, ʼe au gutuloi ohage pe ko koutou. Kae ʼe au iloʼi ia ia pea ʼe au mulimuli ki tana folafola. 56 Ko Apalahamo takotou tamai neʼe fakafiafia lahi ʼi tana ʼamanaki ʼae ke sio ki te ʼu meʼa ʼae ka au fai, pea neʼe sio ki ai pea neʼe fakafiafia.”+ 57 Pea neʼe ui e te kau Sutea kia te ia: “Heʼeki ke taʼu 50 kae kua ke sio koe kia Apalahamo?” 58 Neʼe ui e Sesu kia natou: “ ʼE au tala moʼoni atu kia koutou, ʼi muʼa ʼo te tupu ʼo Apalahamo, neʼe kua au maʼuli au.”+ 59 Neʼe natou toʼo ai he ʼu maka ke natou taumakaʼi ia ia, kae neʼe nono ia Sesu pea neʼe mavae mai te fale lotu.

9 ʼI tana fakalaka, neʼe sio ki te tagata neʼe kivi talu mai tana tupu. 2 Pea neʼe fehuʼi e ʼana tisipulo kia te ia: “Lapi,+ ko ai ʼae neʼe agahala, ko te tagata koa ʼaeni peʼe ko ʼana matuʼā, ke tupu kivi ai?” 3 Neʼe tali e Sesu: “Neʼe mole agahala te tagata ʼaeni peʼe ko ʼana matuʼā. Kae neʼe tupu feia la ke ha ai te ʼu gaue ʼa te ʼAtua.+ 4 ʼE tonu ke tou fakahoko ʼi te kei ʼaho te ʼu gaue ʼa Ia ʼae neʼe ina fekauʼi mai au.+ ʼE hoko mai anai te poʼuli ʼae ʼe mole feala ke gaue ai he tahi. 5 ʼI taku kei nofo ʼi te malamanei, ko au te malama ʼo te malamanei.”+ 6 ʼI tana ʼosi fai te ʼu palalau ʼaia, neʼe ʼaʼanu ki te kele pea ʼaki tona savai neʼe ina natu he moʼi pela, ʼo ina vali leva ki te ʼu mata ʼo te tagata.+ 7 Pea neʼe ina ui ki ai: “Alu ʼo fufulu ʼou mata ʼi te maʼanuʼaga ʼo Siloame” (ko tona fakaliliu “ ʼE Mapuna Ake”). Neʼe alu ai ʼo fufulu ʼona mata, pea neʼe toe liliu mai kua sio.+

8 Ko te ʼu vahaʼa fale pea mo natou ʼae neʼe sisio ki muʼa atu ki tana kolekole ki te hahaʼi, neʼe natou ui: “ ʼE mole ko te tagata koa la ʼaeni neʼe heka ʼo kolekole ki te hahaʼi?” 9 Neʼe ui e ʼihi: “ ʼEi, ʼe ko ia.” Pea neʼe ui e ʼihi atu: “Kailoa ia, kae ʼe hoko ki ai.” Kae neʼe ui e te tagata: “ ʼE ko au ia ia.” 10 Koia, neʼe natou fehuʼi ki ai: “Kotea ʼae neʼe hoko ʼo ke lava sio ai?”* 11 Neʼe ina tali age: “Ko te tagata ʼe higoa ko Sesu neʼe ina natu he moʼi pela ʼo ina vali ki ʼoku mata pea neʼe ina ui mai: ‘Alu ki Siloame ʼo fufulu ai ʼou mata.’+ Neʼe au alu ai ʼo fufulu ʼoku mata pea neʼe au sio.” 12 Pea neʼe natou ui ki ai: “ ʼE ʼifea te tagata ʼaia?” Neʼe ina tali age: “ ʼE mole au iloʼi.”

13 Neʼe natou taki ia te tagata ʼae neʼe kivi ki te kau Faliseo. 14 Pea neʼe ko te ʼaho ʼo te Sapato+ ʼae neʼe natu ai e Sesu te moʼi pela pea mo fakamalolo ai te tagata.+ 15 ʼI te lakaga ʼaia, neʼe toe fehuʼi e te kau Faliseo ki te tagata ʼaia pe kotea ʼae neʼe hoko ʼo tupu ai tana sio. Neʼe ina tali kia natou: “Neʼe ina vali te moʼi pela ki ʼoku mata, pea neʼe au fufulu leva ʼoku mata ʼo au sio ai.” 16 Neʼe ui leva e ʼihi ʼo te kau Faliseo: “ ʼE mole haʼu te tagata ʼaia mai te ʼAtua, koteʼuhi ʼe mole mulimuli ia ki te Sapato.”+ Neʼe ui e ʼihi atu: “ ʼE lava feafeaʼi ki he tagata agahala ke ina fakahoko he ʼu taʼi milakulo feia?”+ Pea neʼe hoko te fihi ia natou.+ 17 Pea neʼe natou toe fakalavelave ki te tagata ʼae neʼe kivi: “Kotea la tau manatu ʼo ʼuhiga mo ia, koteʼuhi ʼe ko koe ʼae neʼe ina fakamalolo?” Neʼe tali e te tagata: “ ʼE ko he polofeta ia.”

18 Kae neʼe mole tui te kau Sutea neʼe kivi ia te tagata ʼaia pea kua sio leva. Pea neʼe natou pauʼi ai te ʼu matuʼā ʼa te tagata ʼaia kua sio. 19 Pea neʼe natou fehuʼi kia naua: “ ʼE ko takolua tama koa la ʼaeni ʼe kolua ui neʼe tupu kivi? He koʼe kua sio leva ia?” 20 Neʼe tali e ʼana matuʼā: “ ʼE ma iloʼi ʼe ko tamā tama ʼaeni pea neʼe tupu kivi. 21 Kae ʼe mole ma iloʼi pe koʼe leva kua sio, pea ko ai foki neʼe ina fakamalolo. Kotou fehuʼi age ki ai, he ʼe kua lahi pea ko ia pe ʼe tonu ke palalau.” 22 Neʼe palalau feia ʼana matuʼā koteʼuhi neʼe nā matataku ʼi te kau Sutea,+ he neʼe kua tonu tahi ia te kau Sutea ke fakamavae mai te sinakoka ia he tahi ʼe fakamoʼoni ko Sesu ia Kilisito.*+ 23 Ko te tupuʼaga la ʼaia ʼo te ui e ʼana matuʼā: “Kua lahi, kotou fehuʼi age ki ai.”

24 Pea neʼe natou toe pauʼi te tagata ʼae neʼe kivi pea natou ui ki ai: “Fakakololia ki te ʼAtua. ʼE matou iloʼi ko te tagata ʼaia ʼe ko he tagata agahala.” 25 Neʼe ina tali: “Kapau ko he tagata agahala, ʼe mole au iloʼi au. Ko te meʼa pe ʼe tahi ʼe au iloʼi, neʼe au kivi pea kua au sio.” 26 Pea neʼe natou fehuʼi ki ai: “Kotea ʼae neʼe ina fai kia koe? Neʼe feafeaʼi tana fakamalolo koe?” 27 Neʼe ina tali kia natou: “Neʼe kua au ʼosi fakaha atu, kae neʼe mole kotou fakalogo. He koʼe ʼe kotou toe fia logo ki ai? ʼE kotou fia liliu koa mo koutou ko ʼana tisipulo?” 28 Neʼe natou leakoviʼi ai ia ia: “Ko koe ko he tisipulo ʼa te tagata ʼaia, kae ko matou ko te ʼu tisipulo ʼa Moisese. 29 ʼE matou iloʼi neʼe palalau ia te ʼAtua kia Moisese, kae ʼo ʼuhiga mo te tagata ʼaia, ʼe mole matou iloʼi pe ʼe haʼu maifea.” 30 Neʼe tali e te tagata kia natou: “ ʼE fakapunamaʼuli foki takotou mole iloʼi pe ʼe haʼu maifea, kae neʼe ina fakamalolo au. 31 ʼE tou iloʼi ʼe mole fagono te ʼAtua ki te kau agahala,+ kae ʼe fagono te ʼAtua ki ʼae ʼe manavasiʼi kia te ia pea mo ina fai tona finegalo.+ 32 Talu mai te temi muʼa, neʼe heʼeki tou logo neʼe fakamalolo e he tahi he tagata neʼe tupu kivi. 33 Kapau neʼe mole haʼu te tagata ʼaia mai te ʼAtua, ʼe mole feala ia ke ina fai he meʼa.”+ 34 Neʼe natou ui ki ai: “Neʼe ke tupu ʼi te agahala, pea ʼe ke akoʼi matou?” Neʼe natou fakamavae ai ia ia.+

35 Neʼe logo ia Sesu neʼe natou fakamavae ia ia, pea ʼi tana maʼu atu, neʼe ina ui ki ai: “ ʼE ke tui koa ki te Foha ʼo te tagata?” 36 Neʼe tali age e te tagata: “Ko ai ia ia, ke feala haku tui kia te ia?” 37 Neʼe ui e Sesu ki ai: “Kua ke sio ki ai pea ʼe ko ia ʼaeni ʼe palalau atu.” 38 Neʼe ina ui age: “ ʼE au tui kia te ia, ʼAliki.” Pea neʼe hu kia te ia. 39 Neʼe ui leva e Sesu: “Neʼe au haʼu ki te malamanei ki te fakamau ʼaeni, ke sisio ia natou ʼae ʼe mole sisio,+ pea ke liliu ʼo kivi ia natou ʼae ʼe sisio.”+ 40 Ko te kau Faliseo ʼae neʼe ʼi ai, neʼe natou logo ki tana palalau ʼaia. Neʼe natou fehuʼi kia te ia: “ ʼE matou toe kivi koa mo matou?” 41 Neʼe tali e Sesu kia natou: “Kapau neʼe kotou kivi, ʼe mole ʼi ai hakotou agahala. Kae ʼi takotou ui ‘ ʼE matou sisio,’ ʼe mole fakamolemole anai takotou agahala.”+

10 “ ʼE au tala moʼoni atu kia koutou, ko ʼae ʼe mole hu ki te lotoʼa ovi ʼi te matapa kae kake age ia ʼi he tahi faʼahi, ʼe ko he tagata kaihaʼa pea mo faʼao koloa.+ 2 Kae ko ʼae ʼe hu ʼi te matapa, ʼe ko ia te tagata tauhi ovi.+ 3 ʼE avahi ki ai e te tagata leʼo matapa,+ pea ʼe fakalogo te ʼu ovi ki tona leʼo.+ ʼE ina pauʼi ʼana ovi ʼaki ʼonatou higoa pea ʼe ina taki natou ki tuʼa. 4 ʼI tana ʼave ki tuʼa ʼana ovi fuli, ʼe alu ia ʼi muʼa, pea ʼe mulimuli te ʼu ovi ia ia, koteʼuhi ʼe natou iloʼi tona leʼo. 5 ʼE mole natou mulimuli anai ʼi he tahi kehe kae ʼe natou feholaki anai mai ia ia, koteʼuhi ʼe mole natou iloʼi te leʼo ʼo te hahaʼi kehe.” 6 Neʼe fai e Sesu te lea fakatata ʼaia kia natou, kae neʼe mole natou mahino ki te ʼu meʼa ʼae neʼe ina ui age.

7 Pea neʼe toe ui e Sesu: “ ʼE au tala moʼoni atu kia koutou, ʼe ko au te matapa ʼae ʼe fakalaka ai te ʼu ovi.+ 8 Ko natou fuli ʼae neʼe ʼomai pea mo lau ko natou te tagata tauhi ovi moʼoni, ʼe ko he ʼu hahaʼi kaihaʼa mo faʼao koloa. Kae neʼe mole fakalogo te ʼu ovi kia natou. 9 Ko au te matapa. Ko ʼae ʼe fakalaka ia au ʼe haofaki anai ia, pea ʼe ulu mai anai pea mo hu anai ki tuʼa pea ʼe ina maʼu anai hana meʼa kai.+ 10 ʼE haʼu pe te tagata kaihaʼa ke ina kaihaʼa mo matehi pea mo maumauʼi.+ Neʼe au haʼu ke natou maʼu te maʼuli pea ke tologa tonatou maʼuli. 11 Ko au ko te tagata tauhi ovi lelei,+ pea ʼe foaki e te tagata tauhi ovi lelei tona maʼuli* maʼa te ʼu ovi.+ 12 Ko te tagata gaue totogi, ʼae ʼe mole ko te tagata tauhi ovi pea ʼe mole ʼaʼana te ʼu ovi, ʼe sio ki te haʼu ʼa te lupo pea ina liʼaki te ʼu ovi kae hola (ʼe ʼohofi e te lupo pea ina fakamavetevete te ʼu ovi), 13 koteʼuhi ʼe ko he tagata gaue totogi pea ʼe mole ʼofa ia ki te ʼu ovi. 14 Ko au ko te tagata tauhi ovi lelei. ʼE au iloʼi ʼaku ovi pea ʼe iloʼi au e ʼaku ovi,+ 15 ohage pe ko te iloʼi au e te Tamai pea mo au iloʼi te Tamai,+ pea ʼe au foaki toku maʼuli* maʼa te ʼu ovi.+

16 “Pea ʼe ʼi ai ʼaku ʼihi atu ovi, ʼe mole natou kau ki te lotoʼa ʼaeni.+ ʼE toe tonu foki mo natou ʼaia ke au taki mai, pea ʼe natou fakalogo anai ki toku leʼo. ʼE natou liliu anai ko he faga ovi ʼe tahi, pea ʼe ʼi ai anai he tagata tauhi ovi ʼe tahi.+ 17 Ko te tupuʼaga ʼaeni ʼo te ʼofa ʼo te Tamai ia au,+ koteʼuhi ʼe au foaki toku maʼuli*+ ke feala haku toe maʼu. 18 ʼE mole toʼo e he tagata toku maʼuli, kae ʼe au foaki ʼi toku loto faʼitaliha. ʼE au maʼu te pule ke au foaki toku maʼuli, pea mo te pule ke au toe maʼu.+ Neʼe foaki mai e taku Tamai te fakatotonu ʼaia.”

19 Neʼe toe hoko te fihi ʼi te kau Sutea+ ʼuhi ko tana palalau ʼaia. 20 Tokolahi ia natou neʼe natou ui: “ ʼE nofo ia mo he temonio pea kua ʼulu vale. He koʼe ʼe kotou fagono ki ai?” 21 Neʼe ui e ʼihi: “ ʼE mole ko he ʼu palalau ʼaeni ʼe fai e he tagata kua ulu sino ai he temonio. ʼE feala koa ki he temonio ke ina fakamalolo* te hahaʼi kivi?”

22 ʼI te temi ʼaia, neʼe fai te ʼAho Lahi ʼo Te Fakatapu ʼi Selusalemi. Neʼe ko te temi momoko, 23 pea neʼe haʼele ia Sesu ʼi te fale lotu ʼi te lalo ʼatu pou ʼo Salomone.+ 24 Pea neʼe ʼa takai e te kau Sutea ia Sesu ʼo natou ui kia te ia: “ ʼE ke fakaha mai anai ʼafea te moʼoni ʼo ʼuhiga mo koe? Kapau ko koe ia Kilisito,* fakaha fakahagatonu mai.” 25 Neʼe tali e Sesu kia natou: “Neʼe kua ʼosi au fakaha atu, kae ʼe mole kotou tui. Ko te ʼu gaue ʼae ʼe au fai ʼi te huafa ʼo taku Tamai ʼe fakamoʼoni ʼo ʼuhiga mo au.+ 26 Kae ʼe mole kotou tui, koteʼuhi ʼe mole kotou kau ki ʼaku ovi.+ 27 ʼE fakalogo ʼaku ovi ki toku leʼo, pea ʼe au iloʼi natou, pea ʼe natou mulimuli ia te au.+ 28 ʼE au foaki kia natou te maʼuli heʼe gata,+ pea ʼe mole natou mamate anai ʼi he temi, pea ʼe mole faʼao anai natou e he tahi mai toku nima.+ 29 ʼE maʼuhiga ʼaupito ia natou ʼae neʼe foaki mai e taku Tamai, pea ʼe mole feala ke faʼao ia natou e he tahi mai te nima ʼo te Tamai.+ 30 Ko au mo te Tamai ʼe ma tahi.”*+

31 Pea neʼe toe toʼo e te kau Sutea he ʼu maka ke natou taumakaʼi ia ia. 32 Neʼe ui e Sesu kia natou: “Neʼe au fakaha atu te ʼatu gaue lelei mai te Tamai. Pea ʼe kotou taumakaʼi au ʼuhi ko te gaue fea?” 33 Neʼe ui e te kau Sutea kia te ia: “ ʼE mole matou taumakaʼi koe ʼuhi ko he gaue lelei, kae ʼuhi ko tau pauʼu.+ Koteʼuhi, logo la ko koe ko he tagata, kae ʼe ke ui ko koe ko he ʼatua.” 34 Neʼe ui e Sesu kia natou: “ ʼE mole tohi koa la ʼi takotou Lao,* ‘neʼe au ui: “Ko koutou ko ni ʼatua” ’?*+ 35 Neʼe ina fakahigoaʼi ‘ ʼatua’+ ia natou ʼae neʼe fakafeagai ki ai te folafola ʼa te ʼAtua (pea ʼe mole feala ke molehi te vaega ʼo te ʼu Tohi Taputapu). 36 Kapau koia, he koʼe ʼe kotou ui mai kia au ʼae neʼe fakamaʼoniʼoniʼi e te Tamai pea mo fekauʼi mai ki te malamanei, ‘ ʼE ke pauʼu,’ he neʼe au ui: ‘Ko au te ʼAlo ʼo te ʼAtua’?+ 37 Kapau ʼe mole au fai te ʼu gaue ʼo taku Tamai, ʼaua naʼa kotou tui mai kia au. 38 Kae kapau ʼe au fai te ʼu gaue ʼaia, tatau aipe pe ʼe mole kotou tui mai kia au, kae kotou tui ki te ʼu gaue,+ ke feala hakotou iloʼi pea mo haga tui ʼe fakatahi te Tamai mo au pea ʼe au fakatahi mo te Tamai.”+ 39 Neʼe natou faigaʼi leva ke natou puke ia ia, kae neʼe fakamamaʼo mai ia natou.

40 Pea neʼe mavae ʼo alu ki te tahi kauvai ʼo te Solotane ki te faʼahi ʼae neʼe faipapitema ai ia Soane ʼi muʼa atu,+ ʼo nofo ai. 41 Pea neʼe tokolahi te hahaʼi neʼe ʼomai kia te ia, pea neʼe natou feuiʼaki: “Neʼe mole fakahoko e Soane he milakulo, kae neʼe moʼoni te ʼu meʼa fuli ʼae neʼe ui e Soane ʼo ʼuhiga mo te tagata ʼaeni.”+ 42 Pea tokolahi ʼi ai neʼe natou tui kia te ia.

11 Neʼe ʼi ai te tagata neʼe higoa ko Lasalo pea neʼe mahaki. Neʼe maʼuli ʼi Petania, te kolo ʼo Malia mo tona tehina ko Maleta.+ 2 Neʼe ko Malia ʼae neʼe ina tākai lolo magoni te ʼu vaʼe ʼo te ʼAliki pea mo holoholoʼi ʼaki tona lauʼulu.+ Neʼe ko tona tokolua ia Lasalo, ʼae neʼe mahaki. 3 Neʼe fekauʼi e te tau tehina ia he tahi ke alu ʼo fakaha kia Sesu te logo ʼaeni: “ ʼAliki, ko ia ʼae ʼe ke ʼofa ai kua mahaki.” 4 Kae ʼi te logo ʼa Sesu ki te faʼahi ʼaia, neʼe ina ui: “Ko te mahaki ʼaeni ʼe mole iku anai ki te mate, kae ke fakakololiaʼi ai te ʼAtua,+ pea ke fakakololiaʼi te ʼAlo ʼo te ʼAtua.”

5 Neʼe ʼofa ia Sesu ia Maleta pea mo tona tehina pea mo Lasalo. 6 Kae ʼi tana logo ʼae kua mahaki ia Lasalo, neʼe hoko atu tana nofo ia ʼaho ʼe lua ʼi te koga meʼa ʼae neʼe ʼi ai. 7 Pea hili ia, neʼe ina ui ki te kau tisipulo: “Tou toe olo ki Sutea.” 8 Neʼe ui e te kau tisipulo kia te ia: “Lapi,+ heʼeki faʼa fualoa neʼe faigaʼi e te kau Sutea ke natou taumakaʼi koe,+ kae ʼe ke toe fia alu pe koe ki ai?” 9 Neʼe tali e Sesu: “ ʼE mahino ia, ko hola ʼe 12 ʼi te ʼaho.+ Kapau ʼe haʼele he tahi ʼi te ʼaho, ʼe mole tukia ʼi he meʼa, koteʼuhi ʼe sio ki te malama ʼo te malamanei. 10 Kae kapau ʼe haʼele he tahi ʼi te poʼuli, ʼe tukia koteʼuhi ʼe mole ia ia te malama.”

11 Hili tana fai te ʼu palalau ʼaia, neʼe ina ui: “ ʼE moe ia totatou kaumeʼa ko Lasalo,+ kae ʼe au alu ʼo fafagu ia ia.” 12 Pea neʼe ui e te kau tisipulo kia te ia: “ ʼAliki, kapau ʼe moe, ʼe lelei anai ia.” 13 Kae neʼe palalau ia Sesu ʼo ʼuhiga mo tona mate. Kae neʼe natou manatu neʼe ina ui ʼe moe ia Lasalo mo malolo. 14 Koia, neʼe ui fakahagatonu e Sesu kia natou: “Kua mate ia Lasalo,+ 15 pea ʼe au fiafia ʼo ʼuhiga mo koutou ʼi taku mole ʼi ai, ke feala ai hakotou tui. Kae tou olo ki ai.” 16 Ko Tomasi, ʼae neʼe toe higoa ko Mahagā, neʼe ina ui ki te tahi ʼu tisipulo: “Tou olo mo tatou, ke tou mamate mo ia.”+

17 ʼI te tau atu ʼa Sesu, neʼe kua ʼaho fa ia te tuku ʼo te sino ʼo Lasalo ʼi te fale maka.* 18 Neʼe tuʼu ovi ia Petania ki Selusalemi ia teitei kilometa ʼe tolu.* 19 Pea tokolahi te kau Sutea neʼe ʼomai ʼo fakafimalieʼi ia Maleta mo Malia ʼo ʼuhiga mo tonā tokolua. 20 ʼI te logo ʼa Maleta ʼe haʼu ia Sesu, neʼe alu ʼo fakafelaveʼi kia te ia. Kae neʼe nofo ia Malia+ ʼi fale. 21 Neʼe ui leva e Maleta kia Sesu: “ ʼAliki, ka na neʼe ke ʼi heni la, neʼe mole mate toku tokolua. 22 Kae ʼe kei au tui pe, ko he meʼa ʼe ke kole ki te ʼAtua, ʼe ina foaki atu anai.” 23 Neʼe ui e Sesu ki ai: “ ʼE toe maʼuli ake anai tou tokolua.” 24 Neʼe ui e Maleta kia te ia: “ ʼE au iloʼi ʼe toe maʼuli ake anai ʼi te temi ʼo te fakatuʼuake+ ʼi te ʼaho fakamuli.” 25 Neʼe ui e Sesu ki ai: “Ko au te fakatuʼuake pea mo te maʼuli.+ Ko ʼae ʼe tui kia te au, tatau aipe pe ʼe mate, ʼe toe maʼuli anai. 26 Pea ko ʼae ʼe maʼuli pea mo tui kia te au, ʼe mole mate anai ʼi he temi.+ ʼE ke tui koa ki ai?” 27 Neʼe ina tali age: “ ʼEi, ʼAliki, ʼe au tui ko koe ia Kilisito,* te ʼAlo ʼo te ʼAtua, ia ia ʼae ʼe haʼu ki te malamanei.” 28 ʼI te ʼosi palalau ʼa Maleta, neʼe alu leva ʼo pauʼi tona tehina ko Malia. Neʼe fanafana ki ai: “Kua tau mai te ʼAliki+ pea ʼe ina pauʼi koe.” 29 ʼI te logo ki ai ʼa Malia, neʼe tuʼu fakavilivili ake ʼo alu kia te ia.

30 Neʼe heʼeki hu ia Sesu ki te kolo kae neʼe kei nofo ʼi te faʼahi ʼae neʼe felaveʼi ai mo Maleta. 31 Ko te kau Sutea ʼae neʼe nonofo mo Malia ʼi te loto fale ʼo fakafimalieʼi ia ia, neʼe natou sisio ki tana tuʼu fakavilivili ake ʼo alu. Neʼe natou muliʼi ia ia, he neʼe natou manatu ʼe alu ki te fale maka*+ ʼo tagi ai. 32 ʼI te tau atu ʼa Malia ki te faʼahi ʼae neʼe ʼi ai ia Sesu pea mo sio kia te ia, neʼe tuʼutuli ifo ki ʼona vaʼe ʼo ui: “ ʼAliki, ka na neʼe ke ʼi heni la, neʼe mole mate toku tokolua.” 33 ʼI te sio ʼa Sesu ki te tagi ʼa Malia mo te fetagihi ʼa te kau Sutea ʼae neʼe ʼomai mo ia, neʼe lotomamahi ʼaupito mo lotohoha. 34 Neʼe ina ui: “Neʼe kotou tuku ia ia ʼifea?” Neʼe natou tali kia te ia: “ ʼAliki, haʼu ʼo sio.” 35 Neʼe tagi leva ia Sesu.+ 36 Neʼe ui ai e te kau Sutea: “ ʼE iloga tona ʼofa ia ia!” 37 Kae neʼe ui e ʼihi: “Ko te tagata ʼaeni neʼe ina fakamalolo te tagata kivi.+ Neʼe mole feala koa la ia ke ina faigaʼi ke ʼaua naʼa mate ia Lasalo?”

38 Neʼe toe manava lahi ia Sesu, pea neʼe alu leva ki te fale maka.* Neʼe ko te ʼana pea neʼe pupunu ʼaki te foʼi maka. 39 Neʼe ui e Sesu: “Kotou toʼo kehe te foʼi maka.” Ko Maleta, te tokolua ʼo ia ʼae kua mate, neʼe ina ui age: “ ʼAliki, kua lagi mamanu, koteʼuhi kua hili ʼaho ʼe fa.” 40 Neʼe ui e Sesu ki ai: “Neʼe mole au ui atu koa la, kapau ʼe ke tui, pea ʼe ke sio anai ki te kololia ʼo te ʼAtua?”+ 41 Koia, neʼe natou toʼo kehe ai te foʼi maka. Neʼe hiki ake e Sesu ʼona mata ki te lagi+ ʼo ina ui: “Tamai, ʼe au fakafetaʼi atu he neʼe ke fagono mai ki taku faikole. 42 ʼE moʼoni, ʼe au iloʼi ʼe ke fagono tuʼumaʼu mai kia te au. Kae neʼe au palalau ʼuhi ko te hahaʼi tokolahi ʼae ʼe tutuʼu ʼi heni, ke feala hanatou tui neʼe ke fekauʼi mai au.”+ 43 ʼI tana ʼosi fai te ʼu palalau ʼaia, neʼe kalaga: “Lasalo, haʼu ki tuʼa!”+ 44 Pea neʼe hu mai ki tuʼa te tagata ʼae neʼe kua mate. Neʼe haʼihaʼi ʼona vaʼe mo ʼona nima ʼaki he ʼu moʼi kie, pea neʼe pulouʼi tona fofoga ʼaki te kie. Neʼe ui e Sesu kia natou: “Kotou vevete ia ia pea kotou tuku age ke alu.”

45 Koia, tokolahi ʼi te kau Sutea ʼae neʼe ʼomai kia Malia pea neʼe sisio ki te meʼa ʼae neʼe ina fai neʼe natou tui kia te ia.+ 46 Kae ko ʼihi ia natou neʼe olo ki te kau Faliseo ʼo fakamatala age te meʼa ʼae neʼe fai e Sesu. 47 Neʼe fakatahiʼi e te kau pelepitelo pule mo te kau Faliseo ia te Sanetualio* pea neʼe natou ui: “Kotea ʼae ka tou fai? Koteʼuhi ʼe lahi te ʼu milakulo ʼe fakahoko e te tagata ʼaeni.+ 48 Kapau ʼe tou tuku ia ia ke hoko atu feia, ʼe natou tui fuli anai kia te ia, pea ʼe ʼomai anai te kau Loma ʼo puleʼi totatou fale lotu pea mo totatou puleʼaga.” 49 Kae ko te tahi ia natou, ko Kaifa,+ neʼe ko te pelepitelo lahi ʼi te taʼu ʼaia, neʼe ina ui kia natou: “ ʼE mole kotou iloʼi he meʼa, 50 pea ʼe mole kotou mahino ʼe lelei age kia koutou ke mate he tagata ʼe tahi maʼa te hahaʼi ʼi te pulihi ʼo te puleʼaga katoa.” 51 Neʼe mole haʼu te ʼu palalau ʼaia mai ia ia totonu, kae ʼuhi ʼae neʼe ko ia te pelepitelo lahi ʼi te taʼu ʼaia, neʼe ina fakakikite ai neʼe tonu ke mate ia Sesu maʼa te puleʼaga, 52 pea ʼe mole gata pe maʼa te puleʼaga, kae ke toe fakatahi foki ʼi te logo tahi ia te ʼu fanau ʼa te ʼAtua ʼae kua mavetevete. 53 Talu mai te ʼaho ʼaia, neʼe natou fonofono ke natou matehi ia ia.

54 Koia, neʼe mole kei fealuʼaki fakahaha ia Sesu ʼi te kau Sutea. Kae neʼe mavae mai ai ʼo alu ki te koga fenua ʼe tuʼu ovi ki te toafa, ki te kolo neʼe higoa ko Efalaimi.+ Neʼe nofo ai mo te kau tisipulo. 55 Pea neʼe kua ovi mai te Pasikate+ ʼa te kau Sutea. Ko te hahaʼi tokolahi mai te fenua katoa neʼe natou hake ki Selusalemi ʼi muʼa ʼo te Pasikate, ke fakamaʼa natou ʼo mulimuli ki te Lao. 56 Neʼe natou kumi ia Sesu, pea neʼe natou feuiʼaki ʼi tanatou ʼi te fale lotu: “Kotea takotou manatu? ʼE haʼu anai koa ki te ʼaho lahi?” 57 Kae neʼe fai e te kau pelepitelo pule mo te kau Faliseo te fakatotonu ʼae, kapau ʼe iloʼi e he tahi pe ʼe ʼifea ia Sesu, pea ʼe tonu ke ina fakaha age, ke feala hanatou puke ia ia.

12 Ia ʼaho ʼe ono ʼi muʼa ʼo te Pasikate, neʼe tau ia Sesu ki Petania. Neʼe maʼuli ai ia Lasalo,+ ʼae neʼe fakatuʼuake e Sesu mai te kau mate. 2 Neʼe natou fai te kaitahi maʼa ia, pea neʼe tauhi natou e Maleta.+ Pea neʼe kau ia Lasalo ia natou ʼae neʼe kakai fakatahi mo ia. 3 Neʼe toʼo leva e Malia ia te hina lolo magoni* totogi kovi heʼeki hui, ʼo ina tākai ʼaki te ʼu vaʼe ʼo Sesu pea mo ina holoholoʼi ʼaki tona lauʼulu. Neʼe tau te magoni ʼo te moʼi lolo ʼi te loto fale katoa.+ 4 Kae neʼe ui e Sutasi Isekaliote,+ te tahi ʼo ʼana tisipulo, ʼae ka ina ʼamanaki lavakiʼi ia ia: 5 “He koʼe neʼe mole fakatau te moʼi lolo magoni ʼaia kia tenalio* ʼe 300 pea mo foaki ia te falā maʼa te kau masiva?” 6 Kae neʼe mole palalau feia he neʼe ina manatuʼi te kau masiva, kae ʼuhi neʼe ko he tagata kaihaʼa. Neʼe nofo ia mo te kesi falā, pea neʼe ko tana agamahani ia te kaihaʼa ʼo te falā ʼae neʼe ʼi ai. 7 Pea neʼe ui e Sesu: “Haganoa ki te fafine ʼaeni, ke ina fai te faʼahi ʼaia moʼo teuteuʼi fakatomuʼa toku ʼavaifo.+ 8 Koteʼuhi ʼe nonofo tuʼumaʼu pe te kau masiva mo koutou,+ kae ʼe mole au fakatahi tuʼumaʼu anai mo koutou.”+

9 Neʼe iloʼi leva e te tokolahi ʼi te kau Sutea tana nofo ʼi Petania. Pea neʼe natou ʼomai mole ʼuhi pe ko Sesu kae ʼuhi foki ko Lasalo, ʼae neʼe ina fakatuʼuake mai te kau mate.+ 10 Neʼe fonofono leva ia te kau pelepitelo pule ke natou toe matehi mo Lasalo, 11 koteʼuhi tokolahi te kau Sutea neʼe olo age ki Petania pea natou tui kia Sesu ʼuhi ko ia.+

12 ʼI te ʼaho ake, ko te hahaʼi tokolahi ʼae neʼe ʼomai ki te ʼaho lahi, neʼe natou logo ʼe haʼu ia Sesu ki Selusalemi. 13 Neʼe natou toʼo leva te ʼu vaʼa palema pea natou olo ʼo fakafelaveʼi kia te ia. Neʼe natou kalaga: “ ʼAtua, ʼe matou kole atu ke ke haofaki ia ia! Ke tapuakiʼi ia ia ʼae ʼe haʼu ʼi te huafa ʼo Sehova,*+ te Hau ʼo Iselaele!”+ 14 Neʼe maʼu e Sesu he asino mui pea neʼe heka ki ai,+ ohage pe ko tona tohi: 15 “ ʼAua naʼa ke mataku, taʼahine ʼo Sione.* Koʼeni, ʼe haʼu tou hau pea ʼe heka ʼi he asino mui.”+ 16 ʼI te kamata, neʼe mole mahino ʼana tisipulo ki te ʼu faʼahi ʼaia. Kae ʼi te ʼosi fakakololiaʼi ʼo Sesu,+ neʼe natou manatuʼi neʼe kua tohi te ʼu faʼahi ʼaia ʼo ʼuhiga mo ia pea neʼe hoko te ʼu faʼahi ʼaia kia te ia.+

17 Ko te hahaʼi ʼae neʼe sisio ki te pauʼi e Sesu ia Lasalo ke haʼu ki tuʼa mai te fale maka*+ pea mo ina fakatuʼuake ia ia mai te kau mate, neʼe natou haga fakamoʼoni ki ai.+ 18 Ko te tupuʼaga la ʼaia ʼo te ʼomai ʼa te hahaʼi ʼo fakafelaveʼi kia te ia, koteʼuhi neʼe natou logo ki tana fakahoko te milakulo ʼaia. 19 Neʼe feuiʼaki ai e te kau Faliseo: “Sio mai, ʼe mole tou lava fai he meʼa. Kua mulimuli te malamanei katoa ia te ia.”+

20 Pea neʼe ʼi ai ʼihi Keleka neʼe kau ia natou ʼae neʼe ʼomai ʼo atolasio ʼi te ʼaho lahi. 21 Neʼe natou fakaovi age kia Filipo,+ ko te tagata neʼe haʼu mai Petesaita ʼo Kalilea, pea natou kole ki ai: “ ʼAliki, ʼe matou fia felaveʼi mo Sesu.” 22 Neʼe haʼu ia Filipo ʼo fakaha age kia Atelea. Pea neʼe ʼomai leva ia Atelea mo Filipo ʼo fakaha age kia Sesu.

23 Kae neʼe ui e Sesu kia naua: “Kua hoko mai ia te hola ʼae ke fakakololiaʼi ai te Foha ʼo te tagata.+ 24 ʼE au tala moʼoni atu kia koulua, kapau ʼe mole to te tegaʼi fulumeto ki te kele pea mo mate, ʼe ko he tegaʼi fulumeto pe ia ʼe tahi. Kae kapau ʼe mate,+ pea ʼe fua anai ia ʼo lahi. 25 Ko ʼae ʼe ʼofa ki tona maʼuli,* ʼe ina pulihi anai, kae ko ʼae ʼe fehiʼa ki tona maʼuli*+ ʼi te malama ʼaeni ʼe ina haofaki anai ki te heʼe gata.+ 26 Kapau ʼe fia kaugana he tahi kia te au, ke mulimuli mai ia te au, pea ko te faʼahi ʼae ʼe au ʼi ai, ʼe toe ʼi ai foki anai mo taku kaugana.+ Kapau ʼe fia kaugana he tahi kia te au, pea ʼe fakamaʼuhigaʼi anai ia ia e te Tamai. 27 ʼE au lotohoha ʼi te temi nei,+ pea kotea ʼae ke au ui? Tamai, haofaki au mai te hola ʼaeni.+ Kae ʼe ko te hola ʼaeni ʼae neʼe tupu ai taku haʼu. 28 Tamai, fakakololiaʼi tou huafa.” Pea neʼe logo ki te leʼo+ mai te lagi ʼe ina ui: “Neʼe au fakakololiaʼi pea ʼe au toe fakakololiaʼi anai.”+

29 Neʼe logo ki ai te hahaʼi ʼae neʼe ʼi ai, pea neʼe natou ui neʼe ʼuʼulu te mana. Neʼe ui e ʼihi age: “Neʼe palalau age he ʼaselo kia ia.” 30 Neʼe ui e Sesu: “Neʼe mole logo te leʼo ʼaia ʼuhi ko au, kae ʼuhi ko koutou. 31 ʼI te temi nei, ʼe fakamauʼi te malama ʼaeni pea ʼe li anai ki tuʼa ia te pule ʼo te malama ʼaeni.+ 32 Pea ka lagaʼi ake au,+ ʼe au taki mai anai kia te au te faʼahiga hahaʼi kehekehe.” 33 Neʼe ina fai te ʼu palalau ʼaia moʼo fakaha pe ʼe feafeaʼi anai tona mate.+ 34 Pea neʼe ui e te hahaʼi tokolahi kia te ia: “Neʼe matou logo mai te Lao* ʼe nofo ʼo talu ai ia Kilisito.*+ Kae he koʼe ʼe ke ui ʼe tonu ke lagaʼi ake te Foha ʼo te tagata?+ Ko ai koa ia te Foha ʼo te tagata ʼaia?” 35 Neʼe tali e Sesu kia natou: “ ʼE nofo anai te malama mo koutou ʼi he kiʼi temi nounou. Kotou haʼele ʼi takotou kei maʼu te malama, ke ʼaua naʼa puleʼi koutou e te fakapoʼuli. Pea ko ʼae ʼe haʼele ʼi te fakapoʼuli, ʼe mole ina iloʼi pe ʼe alu kifea.+ 36 ʼI takotou kei maʼu te malama, kotou tui ki te malama, ke kotou liliu ai ko te ʼu foha ʼo te malama.”+

Neʼe fai e Sesu te ʼu palalau ʼaia, pea neʼe alu leva ʼo nono. 37 Logo la neʼe ina fakahoko te ʼatu milakulo ʼi ʼonatou muʼa, kae neʼe mole natou tui kia te ia, 38 ke hoko ai te folafola ʼa te polofeta ko Esaia, ʼi tana ui: “Sehova,* ko ai koa ʼae neʼe tui ki te logo ʼae neʼe matou tala?+ Pea neʼe fakaha koa kia ai te malohi* ʼo Sehova?”*+ 39 Neʼe toe fakaha e Esaia te tupuʼaga ʼo tanatou mole lava tui, ʼi tana ui: 40 “Neʼe ina fakakiviʼi ʼonatou mata pea mo fakafefeka ʼonatou loto, ke mole natou sisio mo mahino pea mo natou toe liliu mai ke au fakamalolo natou.”+ 41 Neʼe fai e Esaia te ʼu palalau ʼaia he neʼe sio ki tona kololia pea neʼe palalau ʼo ʼuhiga mo ia.+ 42 Kae, maʼia mo te kau pule, tokolahi neʼe natou tui kia te ia,+ kae ʼuhi ko te kau Faliseo, neʼe mole natou fakaha tanatou tui naʼa fakamavae natou mai te sinakoka.+ 43 Koteʼuhi neʼe lahi age tonatou ʼoʼofa ki te kololia ʼo te tagata ʼi te kololia ʼo te ʼAtua.+

44 Kae neʼe kalaga ia Sesu: “Ko ʼae ʼe tui kia te au, ʼe mole tui pe kia te au kae ʼe toe tui foki kia ia ʼae neʼe ina fekauʼi mai au.+ 45 Pea ko ʼae ʼe sio kia te au, ʼe toe sio foki kia Ia ʼae neʼe ina fekauʼi mai au.+ 46 Neʼe au haʼu ki te malamanei ohage ko he malama,+ ke ʼaua naʼa nofo ʼi te fakapoʼuli ia ia ʼae ʼe tui kia te au.+ 47 Kae kapau ʼe logo he tahi ki ʼaku folafola pea ʼe mole mulimuli ki ai, ʼe mole au fakamauʼi ia ia. Koteʼuhi neʼe mole au haʼu ke au fakamauʼi te malamanei, kae ke au haofaki te malamanei.+ 48 Ko ʼae ʼe mole fakaʼapaʼapa kia te au pea mole ina tali ʼaku folafola, ʼe fakamauʼi anai ia ia ʼi te ʼaho fakamuli ʼo fakatafito ki te folafola ʼae neʼe au tala. 49 Koteʼuhi neʼe mole au palalau ʼi toku loto faʼitaliha, kae ko te Tamai ʼae neʼe ina fekauʼi mai au, neʼe ina foaki mai he fakatotonu ʼo ʼuhiga mo te ʼu palalau ʼae ʼe tonu ke au fai pea mo tona faʼahiga fakaha.+ 50 Pea ʼe au iloʼi ko tana fakatotonu ʼe taki ki te maʼuli heʼe gata.+ Koia ko te meʼa ʼae ʼe au palalau ki ai, ʼe au palalau ki ai ohage pe ko tona fakaha mai e te Tamai.”+

13 ʼI muʼa ʼo te ʼaho lahi ʼo te Pasikate, neʼe iloʼi e Sesu kua hoko mai te hola+ ʼae ke mavae ai ʼi te malamanei ʼo alu ki te Tamai.+ Pea ʼi tana ʼofa ki ʼana tisipulo ʼae neʼe ʼi te malamanei, neʼe haga ʼofa kia natou ʼo kaku ki te fakaʼosi.+ 2 Neʼe natou lolotoga kakai, pea neʼe kua ʼai e te Tevolo ki te loto ʼo Sutasi Isekaliote,+ te foha ʼo Simone, ia te manatu ʼae ke ina lavakiʼi ia ia.+ 3 Pea ko Sesu, ʼi tana iloʼi ʼae kua tuku age e te Tamai ki ʼona nima ia meʼa fuli pe, pea neʼe haʼu ia mai te ʼAtua pea ʼe alu ia ki te ʼAtua,+ 4 neʼe tuʼu ake mai te laupapa pea ina huʼi ʼona kofu tuʼa. Neʼe ina toʼo te tauveli ʼo hulu.+ 5 Hili ia, neʼe ina huaʼi he moʼi vai ki he pesini pea ina fufulu leva te ʼu vaʼe ʼo te kau tisipulo pea ina holoholoʼi ʼaki te tauveli ʼae neʼe ina hulu. 6 Neʼe haʼu leva kia Simone Petelo. Neʼe ina ui kia te ia: “ ʼAliki, ʼe ke fia fufulu koe ʼoku vaʼe?” 7 Neʼe ui e Sesu ki ai: “Ko te meʼa ʼae ʼe au lolotoga fai, ʼe mole ke mahino ki ai ʼi te temi nei, kae ʼe ke mahino anai ki ai ki ʼamuli.” 8 Neʼe ui e Petelo kia te ia: “Kailoa, ʼe mole ke fufulu anai ʼoku vaʼe.” Neʼe ui e Sesu ki ai: “Kapau ʼe mole au fufulu ʼou vaʼe,+ pea ʼe mole ke kau mo au.” 9 Neʼe ui e Simone Petelo kia te ia: “ ʼAliki, ke mole gata ʼaki pe ʼoku vaʼe, kae toe fufulu mo ʼoku nima pea mo toku ʼulu.” 10 Neʼe ui e Sesu ki ai: “Ko ʼae kua maʼanu, ʼe kua maʼa katoa ia, koia ʼe ʼaoga pe ia ke fufulu ʼona vaʼe. Pea ʼe kotou maʼa, kae ʼe mole ko koutou fuli.” 11 Koteʼuhi neʼe ina iloʼi te tagata ʼae ka ina lavakiʼi ia ia.+ Ko te tupuʼaga la ʼaia ʼo tana ui: “ ʼE mole kotou maʼa fuli.”

12 ʼI tana ʼosi fufulu ʼonatou vaʼe pea mo tui ʼona kofu tuʼa, neʼe toe heka ia ʼi te laupapa pea neʼe ina ui kia natou: “ ʼE kotou mahino koa ki te meʼa ʼae neʼe au fai kia koutou? 13 ʼE kotou ui ko au ko he tagata faiako pea mo kotou fakahigoaʼi au ‘ ʼAliki,’ pea ʼe kotou moʼoni.+ 14 Koia, kapau ko au, ʼae ko te ʼAliki pea mo te tagata faiako, neʼe au fufulu ʼokotou vaʼe,+ pea ʼe tonu foki mo koutou ke kotou fefufuluʼaki ʼokotou vaʼe.+ 15 Koteʼuhi neʼe au tuku atu te faʼifaʼitaki, ohage pe ko taku fai kia koutou, ke kotou toe fai feia mo koutou.+ 16 ʼE au tala moʼoni atu, ʼe mole lahi age he tagata kaugana ʼi tona pule, pea ko ia ʼae neʼe fekauʼi mai ʼe mole lahi age ia ʼi ʼae neʼe ina fekauʼi mai ia ia. 17 Kapau ʼe kotou iloʼi te ʼu faʼahi ʼaia, ʼe kotou fiafia mo kapau ʼe kotou fai.+ 18 ʼE mole au talanoa ʼo ʼuhiga mo koutou fuli, pea ʼe au iloʼi ia natou ʼae neʼe au filifili. Kae ʼe tonu ke hoko te folafola ʼaeni:+ ‘Ko ʼae neʼe kai mo au ki taku pane, neʼe ina hiki ake tona mulivaʼe ʼo fakafeagai mai kia te au.’+ 19 ʼE au tala atu ʼi te temi nei ʼi muʼa ʼo tana hoko, ke kotou tui ko au ia ia moka hoko mai.+ 20 ʼE au tala moʼoni atu kia koutou, ko ʼae ʼe ina tali he tahi ʼe au fekauʼi, ʼe ina toe tali foki mo au.+ Pea ko ʼae ʼe ina tali au ʼe ina toe tali foki mo Ia ʼae neʼe ina fekauʼi mai au.”+

21 ʼI te ʼosi fai e Sesu te ʼu palalau ʼaia, neʼe lotohoha ʼaupito, pea neʼe ina ui: “ ʼE au tala moʼoni atu, ʼe lavakiʼi anai au e he tahi ia koutou.”+ 22 Neʼe fesioʼaki te kau tisipulo, ʼo natou feʼekeʼaki pe ko ai ʼae neʼe talanoa ki ai.+ 23 Neʼe heka te tahi ʼi te ʼu tisipulo ia tafa* ʼo Sesu, ia ia ʼae neʼe ʼofa ai ia Sesu.+ 24 Pea neʼe kamo ia Simone Petelo kia ia, ʼo ina ui age: “Fakaha mai pe ʼe talanoa ʼo ʼuhiga mo ai.” 25 Neʼe falele te tisipulo ʼaia ki te fatafata ʼo Sesu pea ina fehuʼi kia te ia: “ ʼAliki, ko ai ia ia ʼaia?”+ 26 Neʼe tali e Sesu: “ ʼE ko ia ʼae ka au foaki anai ki ai te moʼi pane ʼae ʼe au pekeʼi ki te pa.”+ Pea ʼi tana ʼosi pekeʼi te moʼi pane, neʼe ina toʼo ʼo ina foaki kia Sutasi, te foha ʼo Simone Isekaliote. 27 ʼI te ʼosi toʼo e Sutasi ia te moʼi pane, neʼe ulu leva ia Satana ia ia.+ Pea neʼe ui e Sesu ki ai: “Ko te meʼa ʼae ʼe ke fai, fai fakavilivili.” 28 Kae neʼe mole iloʼi e he tahi ia natou ʼae neʼe ʼi te laupapa ia te tupuʼaga ʼo tana fai te ʼu palalau ʼaia ki ai. 29 Mai tona aluʼaga ʼae neʼe nofo ia Sutasi mo te kesi falā,+ neʼe manatu ai e ʼihi neʼe ui age e Sesu ke alu ʼo totogi te ʼu meʼa ʼae ʼe ʼaoga maʼa natou ki te ʼaho lahi, peʼe ke ina foaki he meʼa ki te kau masiva. 30 Pea ʼi tana ʼosi toʼo te moʼi pane, neʼe mavae atu aipe. Neʼe kua poʼuli.+

31 Pea ʼi tana kua ʼosi mavae atu, neʼe ui e Sesu: “ ʼI te temi nei, kua fakakololiaʼi ia te Foha ʼo te tagata,+ pea kua fakakololiaʼi ia te ʼAtua ʼaki ia ia. 32 ʼE fakakololiaʼi anai ia ia e te ʼAtua,+ pea ʼe ina fakakololiaʼi atu aipe anai ia ia. 33 Siʼaku ʼu fanau, ʼe au nofo mo koutou ʼi he kiʼi temi nounou. ʼE kotou kumi anai au. Pea ohage pe ko taku ui ki te kau Sutea, ʼe au toe ui atu kia koutou ʼi te temi nei: ‘Ko te potu ʼae ʼe au alu anai ki ai ʼe mole feala ke kotou ʼomai ki ai.’+ 34 ʼE au foaki atu kia koutou he fakatotonu foʼou, ke kotou feʼofaʼaki. Ohage pe ko taku ʼofa ʼae kia koutou,+ ke kotou toe feʼofaʼaki mo koutou.+ 35 ʼAki te faʼahi ʼaia, ʼe iloʼi anai e te hahaʼi fuli ko koutou ko ʼaku tisipulo, mo kapau ʼe kotou feʼofaʼaki.”+

36 Neʼe ui e Simone Petelo kia te ia: “ ʼAliki, ʼe ke alu kifea?” Neʼe tali e Sesu: “Ko te potu ʼae ʼe au alu ki ai, ʼe mole feala ʼi te temi nei ke ke mulimuli mai ia te au, kae ʼe ke mulimuli mai anai ki ʼamuli.”+ 37 Neʼe ui e Petelo kia te ia: “ ʼAliki, he koʼe ʼe mole feala ʼi te temi nei ke au mulimuli ia te koe? ʼE au foaki anai toku maʼuli* maʼa koe.”+ 38 Neʼe ui e Sesu: “ ʼE ke foaki anai koa tou maʼuli* maʼaku? ʼE au tala moʼoni atu kia koe, ʼi muʼa ʼo te ʼuʼua ʼa te moa, kua ke fakafisi tuʼa tolu kia au.”+

14 “Ke ʼaua naʼa hoha ʼokotou loto.+ Kotou tui ki te ʼAtua+ pea kotou toe tui mai kia te au. 2 ʼI te ʼapi ʼo taku Tamai, ʼe lahi ai te ʼu nofoʼaga. Ka na ʼaua la, neʼe mole au fakaha atu. Kae ʼe au alu ʼo teuteuʼi he nofoʼaga maʼa koutou.+ 3 Koia, moka au alu ʼo teuteuʼi he nofoʼaga maʼa koutou, ʼe au toe liliu mai anai pea mo fakatalitali koutou ʼi toku ʼapi, ke feala ke kotou nonofo mo koutou ʼi te faʼahi ʼae ʼe au nofo ai.+ 4 Pea ko te faʼahi ʼae ʼe au alu ki ai, ʼe kotou iloʼi ia tona ala.”

5 Neʼe ui e Tomasi+ kia te ia: “ ʼAliki, ʼe mole matou iloʼi pe ʼe ke alu kifea. ʼE lava feafeaʼi hamatou iloʼi ia te ala?”

6 Neʼe tali age e Sesu: “Ko au te ala,+ te moʼoni+ mo te maʼuli.+ ʼE mole he tahi ʼe haʼu ki te Tamai kae ʼe mole fakalaka ia te au.+ 7 Ka na neʼe kotou iloʼi la ia au, neʼe kotou toe iloʼi mo taku Tamai. ʼO kamata atu ʼi te temi nei, ʼe kotou iloʼi ia ia pea neʼe kua kotou sisio kia te ia.”+

8 Neʼe ui age e Filipo: “ ʼAliki, fakaha mai kia matou ia te Tamai pea ʼe matou feʼauga ai.”

9 Neʼe tali age e Sesu: “Filipo, talu mai fualoa mo taku fakatahi mo koutou, heʼeki pe la ke iloʼi au? Ko ʼae kua sio kia te au, kua toe sio ia ki te Tamai.+ He koʼe ʼe ke ui mai: ‘Fakaha mai kia matou ia te Tamai’? 10 ʼE mole ke tui koa la ʼe au fakatahi mo te Tamai pea ʼe fakatahi ia te Tamai pea mo au?+ Ko te ’u faʼahi ʼae ʼe au palalau atu ki ai, ʼe mole ko ʼaku manatu,+ kae ko te Tamai ʼae ʼe fakatahi mo au ʼae ʼe ina fai ʼana gaue. 11 Kotou tui mai kia te au ʼi taku ui ʼae ʼe au fakatahi mo te Tamai pea ʼe fakatahi ia te Tamai mo au. Kapau ʼe mole kotou tui ki ai, kotou tui pe la ʼuhi ko te ʼu gaue.+ 12 ʼE au tala moʼoni atu kia koutou, ko ʼae ʼe tui kia te au, ʼe ina fakahoko anai te ’u gaue ʼae ʼe au fai. Pea ʼe ina fakahoko anai he ’u gaue ʼe lalahi age ʼi ʼaeni,+ koteʼuhi ʼe au alu ki te Tamai.+ 13 Pea ko te ’u meʼa fuli ʼae ka kotou kole ʼi toku huafa, ʼe au fakahoko anai, ke feala ke fakakololiaʼi te Tamai ʼaki te ʼAlo.+ 14 Kapau ʼe kotou kole he meʼa ʼi toku huafa, ʼe au fakahoko anai.

15 “Kapau ʼe kotou ʼoʼofa ia te au, ʼe kotou mulimuli anai ki ʼaku fakatotonu.+ 16 Pea ʼe au kole anai ki te Tamai pea ʼe ina foaki atu anai he tahi age tokoni,* ke nofo mo koutou ʼo talu ai,+ 17 ia te laumalie ʼo te moʼoni+ ʼae ʼe mole feala ke maʼu e te malamanei, koteʼuhi ʼe mole natou sisio pea mo mahino ki ai.+ ʼE kotou iloʼi te laumalie ʼaia, koteʼuhi ʼe nofo mo koutou pea ʼe ia koutou. 18 ʼE mole au liʼaki anai ia koutou.* ʼE au toe haʼu anai kia koutou.+ 19 ʼE kei toe te kiʼi temi siʼi pea ʼe mole toe sio anai te malamanei kia te au, kae ʼe kotou sisio anai kia te au,+ koteʼuhi ʼe au maʼuli pea ʼe kotou maʼuʼuli anai. 20 ʼI te ʼaho ʼaia, ʼe kotou iloʼi ai anai ʼe au fakatahi mo taku Tamai, pea ʼe kotou fakatahi mo au, pea ʼe au fakatahi mo koutou.+ 21 Ko ʼae ʼe ina tali ʼaku fakatotonu pea mo mulimuli ki ai, ʼe ko ia ʼaia ʼe ʼofa ia te au. Pea ko ʼae ʼe ʼofa ia te au, ʼe ʼofainaʼi anai e taku Tamai, pea ʼe au ʼofa anai ki ai pea ʼe au fakaha lelei anai ia au kia ia.”

22 Neʼe ui e Sutasi,+ ʼe kehe ia mo Sutasi Isekaliote: “ ʼAliki, kotea te tupuʼaga ʼo tau fia fakaha lelei mai ia koe kia matou kae mole ki te malamanei?”

23 Neʼe tali age e Sesu: “Kapau ʼe ʼofa he tahi ia te au, ʼe mulimuli anai ki taku folafola+ pea ʼe ʼofa anai taku Tamai ia ia, pea ʼe ma olo anai kia ia pea ʼe ma fakatahi anai mo ia.+ 24 Ko ʼae ʼe mole ʼofa ia te au, ʼe mole mulimuli ia ki ʼaku folafola. Pea ko te folafola ʼae ʼe kotou logo ki ai, ʼe mole ʼaʼaku kae ʼe ʼa te Tamai ʼae neʼe ina fekauʼi mai au.+

25 “ ʼE au tala atu te ’u meʼa ʼaia ʼi taku lolotoga nofo mo koutou. 26 Kae ko te tokoni, ia te laumalie maʼoniʼoni, ʼae ka foaki atu e te Tamai ʼi toku huafa, ʼe ina akoʼi atu anai kia koutou ia meʼa fuli pea ʼe ina fakamanatuʼi atu anai ia meʼa fuli neʼe au tala atu.+ 27 ʼE au tuku atu te tokalelei, ʼe au foaki atu toku tokalelei.+ ʼE mole au foaki atu ohage ko tona foaki e te malamanei. Ke ʼaua naʼa hoha ʼokotou loto pea mo kotou matataku. 28 Neʼe kotou logo ki te faʼahi ʼaeni neʼe au ui atu: ‘ ʼE au alu pea ʼe au toe liliu mai anai kia koutou.’ Kapau ʼe kotou ʼoʼofa ia te au, ʼe kotou fakafiafia anai he ʼe au alu ki te Tamai, koteʼuhi ʼe lahi age te Tamai ia te au.+ 29 Koʼeni neʼe au tala atu ʼi muʼa ʼo tana hoko mai, ke feala hakotou tui moka hoko mai anai.+ 30 ʼE mole au toe palalau fualoa anai mo koutou, koteʼuhi ʼe haʼu ia te pule ʼo te malamanei,+ pea ʼe mole feala ke ina puleʼi au.+ 31 Kae ke iloʼi e te malamanei ʼe au ʼofa ʼi te Tamai, ʼe au fai pe ia te meʼa ʼae neʼe fakatotonu mai e te Tamai ke au fai.+ Kotou tutuʼu la kae tou mavae ʼi heni.

15 “Ko au ia te fuʼu vite moʼoni pea ʼe ko taku Tamai ia te tagata gaue vite. 2 Ko te ʼu vaʼa fuli ʼae ia au pea ʼe mole fua, ʼe ina tuʼusi ia. Pea ko te ’u vaʼa fuli ʼae ʼe fua, ʼe ina fakamaʼa ia ke feala hana fua ʼo lahi age.+ 3 Kua kotou maʼa ʼuhi ko te folafola ʼae neʼe au fakaha atu.+ 4 Kotou fakatahi mo au pea ʼe au fakatahi anai mo koutou. Ohage pe ko te vaʼa ʼae ʼe mole feala ke fua mo kapau ʼe mole pipiki ki te fuʼu vite, ʼe toe feia mo koutou mo kapau ʼe mole kotou fakatahi mo au.+ 5 Ko au ia te fuʼu vite pea ko koutou te ʼu vaʼa. Ko ʼae ʼe fakatahi mo au pea mo au fakatahi mo ia, ko ia ʼaia ʼe fua ʼo lahi,+ koteʼuhi kapau ʼe kotou to kehe mai ia te au, ʼe mole kotou lava fai he meʼa. 6 Kapau ʼe mole fakatahi he tahi mo au, ʼe liʼaki anai ohage ko he vaʼa pea ʼe moamoa anai. ʼE tae te ’u vaʼa ʼaia ʼo laku ki te afi pea ʼe vela ai. 7 Kapau ʼe kotou fakatahi mo au pea mo nofo ʼaku folafola mo koutou, kotou kole ia meʼa fuli ʼe kotou loto ki ai pea ʼe foaki atu anai kia koutou.+ 8 ʼE fakakololiaʼi taku Tamai mo kapau ʼe kotou haga fua ʼo lahi pea mo fakamoʼoni ko koutou ko ʼaku tisipulo.+ 9 Ohage ko te Tamai neʼe ʼofa ia te au,+ koia neʼe au ʼofa ia koutou, kotou haga nonofo ʼi toku ʼofa. 10 Kapau ʼe kotou mulimuli ki ʼaku fakatotonu pea ʼe kotou nonofo anai ʼi toku ʼofa, ohage ko au neʼe au mulimuli ki te ’u fakatotonu ʼa te Tamai pea mo au nofo ʼi tona ʼofa.

11 “Neʼe au fakaha atu te ’u meʼa ʼaia ke feala ke nofo toku fiafia mo koutou pea ke katoa mo tokotou fiafia.+ 12 Koʼeni taku fakatotonu, ke kotou feʼofaʼaki ohage pe ko taku ʼofa ʼae ia koutou.+ 13 ʼE mole he tahi ʼe lahi age tona ʼofa ʼi te ʼofa ʼa he tahi ʼe ina foaki tona maʼuli* ʼo ʼuhiga mo ʼona kaumeʼa.+ 14 Ko koutou ko ʼoku kaumeʼa mo kapau ʼe kotou fai ia te meʼa ʼae ʼe au fakatotonu atu.+ 15 ʼE mole kei au fakahigoaʼi koutou ko he ʼu kaugana, koteʼuhi ʼe mole iloʼi e he kaugana ia te meʼa ʼae ʼe fai e tona pule. Kae ʼe au fakahigoaʼi koutou ko ʼoku kaumeʼa koteʼuhi neʼe au fakaha atu ia meʼa fuli neʼe au logo ki ai mai taku Tamai. 16 Neʼe mole kotou filifili au kae neʼe au filifili koutou, pea neʼe au fakanofo koutou ke kotou olo ʼo kotou haga fua, pea ke tologa te fua ʼaia, ke feala ke foaki atu e te Tamai ia meʼa fuli ʼe kotou kole age ʼi toku huafa.+

17 “ ʼE au fakatotonu atu te ʼu meʼa ʼaia ke kotou feʼofaʼaki.+ 18 Kapau ʼe fehiʼa ia te malama ʼaeni ia koutou, ʼe kotou iloʼi neʼe fehiʼa ia te au ʼi muʼa ʼo tana fehiʼa ia koutou.+ 19 Ka na pau la neʼe kotou kau ki te malama ʼaeni, ʼe natou leleiʼia anai koutou. Kae ʼe fehiʼa ia te malama ʼaeni ia koutou+ koteʼuhi ʼe mole kotou kau ia natou+ pea neʼe au filifili koutou mai ai. 20 Kotou manatuʼi ia te folafola ʼaeni neʼe au fakaha atu kia koutou: ʼE mole lahi age he kaugana ʼi tona pule. Kapau neʼe natou fakatagaʼi au, ʼe natou toe fakatagaʼi anai mo koutou.+ Kapau neʼe natou mulimuli ki taku folafola, ʼe natou toe mulimuli anai ki takotou folafola. 21 Kae ʼe natou fai anai ia te ʼu meʼa fuli ʼaia kia koutou ʼuhi ko toku huafa, koteʼuhi ʼe mole natou iloʼi ia Ia ʼae neʼe ina fekauʼi mai au.+ 22 Ka na pau la neʼe mole au haʼu pea mo au palalau age kia natou, neʼe mole natou agahala.+ Kae ʼi te temi nei, ʼe mole hanatou takuʼaki ki tanatou agahala.+ 23 Ko ʼae ʼe fehiʼa kia te au, ʼe toe fehiʼa ia ki taku Tamai.+ 24 Ka na pau la neʼe mole au fai ʼi te lotolotoiga ʼo natou ia he ’u gaue neʼe heʼeki fai e he tahi age, neʼe mole natou agahala.+ Kae ʼi te lakaga nei, kua natou sisio kia au pea mo natou fehihiʼa ia au pea mo taku Tamai. 25 Kae neʼe hoko ia te faʼahi ʼaia ke fakahoko ia te folafola ʼaeni neʼe tohi ʼi tanatou Lao:* ‘Neʼe mole he tupuʼaga ʼo tanatou fehihiʼa ia te au.’+ 26 Ka au foaki atu anai mai taku Tamai ia te tokoni, ia te laumalie ʼo te moʼoni,+ ʼae ʼe haʼu mai te Tamai, ʼe fakamoʼoni anai ʼo ʼuhiga mo au.+ 27 Pea mo koutou foki, ʼe tonu anai ke kotou fakamoʼoni ʼo ʼuhiga mo au,+ koteʼuhi neʼe kotou fakatahi mo au talu mai te kamataʼaga.

16 “Neʼe au tala atu te ʼu faʼahi ʼaia ke ʼaua naʼa kotou tukia. 2 ʼE fakamavae anai koutou mai te sinakoka.+ ʼE hoko mai te hola, ko ʼae ka ina matehi koutou,+ ʼe manatu anai ia ʼe ina fai he tauhi taputapu ki te ʼAtua. 3 Kae ʼe natou fai anai ia te ʼu faʼahi ʼaia koteʼuhi ʼe mole natou iloʼi ia te Tamai pea mo au.+ 4 Kae neʼe au fakaha atu te ʼu faʼahi ʼaia, ke feala moka hoko mai tonatou temi, ke kotou manatuʼi neʼe au fakaha atu te ʼu meʼa ʼaia.+

“Neʼe mole au fakaha atu te ʼu faʼahi ʼaia ʼi te kamata koteʼuhi neʼe au nofo mo koutou. 5 ʼI te lakaga nei, ʼe au alu kia Ia ʼae neʼe ina fekauʼi mai au.+ Kae ʼe mole he tahi ia koutou ʼe ina fehuʼi mai: ‘ ʼE ke alu kifea?ʼ 6 Kae kua kotou lotomamahi ʼaupito he neʼe au fakaha atu te ʼu faʼahi ʼaia.+ 7 Kae ʼe au fakaha atu ia te moʼoni, ʼe au mavae ke fua lelei kia koutou. Koteʼuhi kapau ʼe mole au mavae, ʼe mole haʼu anai ia te tokoni+ kia koutou, kae kapau ʼe au mavae, ʼe au fekauʼi mai anai ia ia kia koutou. 8 Pea ka haʼu anai, ʼe ina foaki anai he ʼu fakamoʼoni ki te malama ʼaeni ʼo ʼuhiga mo te agahala, mo te faitotonu pea mo te fakamau: 9 ʼuluaki, ʼo ʼuhiga mo te agahala,+ koteʼuhi ʼe mole natou tui kia te au,+ 10 pea ʼo ʼuhiga mo te faitotonu, koteʼuhi ʼe au alu ki te Tamai pea ʼe mole kotou toe sisio anai kia te au, 11 ʼo ʼuhiga leva mo te fakamau, koteʼuhi kua fakamauʼi ia te pule ʼo te malama ʼaeni.+

12 “ ʼE kei lahi te ʼu faʼahi ʼe tonu ke au tala atu, kae ʼe mole feala ke kotou mahino ki ai ʼi te temi nei. 13 Kae ka haʼu ia ia,* te laumalie ʼo te moʼoni,+ ʼe ina taki anai koutou ke kotou mahino katoa ki te moʼoni, koteʼuhi ʼe mole palalau anai ʼi tona loto faʼitaliha, kae ʼe ina fakaha anai ia meʼa fuli ʼe logo ki ai mai te ʼAtua, pea ʼe ina tala atu anai ia meʼa fuli ka hoko mai.+ 14 ʼE ina fakakololiaʼi anai au,+ koteʼuhi ʼe ina tala atu anai te meʼa ʼae neʼe logo ki ai mai ia te au.+ 15 Ko meʼa fuli ʼe maʼu e te Tamai, ʼe ʼaʼaku.+ Ko te tupuʼaga la ʼaia ʼo taku ui atu, ʼe ina maʼu anai te ʼu meʼa ʼae ʼaʼaku pea ʼe ina tala atu anai. 16 ʼE kei toe he kiʼi temi siʼi pea ʼe mole kotou toe sisio anai kia te au,+ pea tahi, ʼe kei toe he kiʼi temi siʼi pea ʼe kotou sisio anai kia te au.”

17 Neʼe feuiʼaki leva e ʼihi ʼo tana kau tisipulo: “Kotea te fakaʼuhiga ʼo te ʼu meʼa ʼaeni neʼe ina ui mai, ‘ ʼE kei toe he kiʼi temi siʼi pea ʼe mole kotou toe sisio anai kia te au, pea tahi, ʼe kei toe he kiʼi temi siʼi pea ʼe kotou sisio anai kia te auʼ pea ‘koteʼuhi ʼe au alu ki te Tamaiʼ?” 18 Koia neʼe natou ui: “Kotea te fakaʼuhiga ʼo tana ui, ‘he kiʼi temi siʼiʼ? ʼE mole tou mahino pe kotea ʼae ʼe palalau ki ai.” 19 Neʼe iloʼi e Sesu neʼe natou fia fakafehuʼi ia ia, koia neʼe ina ui kia natou: “ ʼE kotou feuiʼaki koa pe koʼe neʼe au ui atu: ‘ ʼE kei toe he kiʼi temi siʼi pea ʼe mole kotou toe sisio anai kia te au, pea tahi, ʼe kei toe he kiʼi temi siʼi pea ʼe kotou sisio anai kia te auʼ? 20 ʼE au tala moʼoni atu, ʼe kotou fetagihi mo lauga anai, kae ʼe fakafiafia anai ia te malama ʼaeni. ʼE kotou lotomamahi anai, kae ʼe liliu anai tokotou lotomamahi ko hokotou fiafia.+ 21 Ko he fafine, moka fanau, ʼe ina logoʼi tona lotomamahi koteʼuhi kua hoko mai tona temi fanau. Kae ka ina fanauʼi tana tamasiʼi, ʼe mole kei ina manatuʼi tona mamahi ʼuhi ko tona fiafia ʼi te kua tupu mai ʼo tana tamasiʼi ki te malama ʼaeni. 22 ʼE toe feia mo koutou, ʼe kotou logoʼi ʼi te temi nei ia te lotomamahi, kae ʼe au toe sio anai kia koutou, pea ʼe kotou lotofiafia anai,+ pea ʼe mole toʼo anai e he tahi ia tokotou fiafia. 23 Pea ʼi te ʼaho ʼaia, ʼe mole kotou toe faifehuʼi mai anai. Koia ʼe au tala moʼoni atu kia koutou, kapau ʼe kotou kole he meʼa ki te Tamai+ ʼi toku huafa, ʼe ina foaki atu anai.+ 24 Pea ʼo kaku mai ki te temi nei, neʼe heʼeki kotou kole he meʼa ʼi toku huafa. Kotou kole pea ʼe foaki atu anai, ke feala ke katoa tokotou fiafia.

25 “Neʼe au fakaha atu te ʼu faʼahi ʼaia ʼaki ni lea fakatata. ʼE hoko mai te hola ʼae ʼe mole au toe palalau atu anai ʼaki ni lea fakatata, kae ʼe au palalau fakahagatonu atu anai ʼo ʼuhiga mo te Tamai. 26 ʼI te ʼaho ʼaia, ʼe kotou fai anai ni kole ki te Tamai ʼi toku huafa, kae ʼe mole fakaʼuhiga leva, ʼe au faikole anai maʼa koutou. 27 Koteʼuhi ʼe ʼofa te Tamai ia koutou, he neʼe kotou ʼoʼofa kia te au+ pea neʼe kotou tui ko au ia te fakafofoga ʼo te ʼAtua.+ 28 Neʼe au haʼu ki te malama ʼaeni ko te fakafofoga ʼo te Tamai. ʼI te lakaga nei, ʼe au mavae ʼi te malama ʼaeni ʼo alu ki te Tamai.”+

29 Neʼe ui e te kau tisipulo: “ ʼAliki, kua ke palalau fakahagatonu pea ʼe mole ke fakaʼaogaʼi ni lea fakatata. 30 ʼI te lakaga nei, ʼe matou iloʼi ʼe ke iloʼi ia meʼa fuli pea ʼe mole ʼaoga ke fakafehuʼi koe e he tahi. Koia ʼe matou tui neʼe ke haʼu mai te ʼAtua.” 31 Neʼe tali age e Sesu: “Kua kotou tui koa la ʼi te temi nei? 32 ʼE hoko mai te hola pea kua hoko mai ia, ʼe kotou tahi mavete anai ki tona loto fale pea ʼe kotou tuku tokotahi anai au.+ Kae ʼe mole au tokotahi koteʼuhi ʼe nofo ia te Tamai pea mo au.+ 33 Neʼe au fakaha atu ia te ʼu faʼahi ʼaia, ke feala ke kotou maʼu ia te tokalelei ʼaki ia au.+ ʼI te malama ʼaeni, ʼe kotou tau anai mo ni mamahi, kae kotou kataki. Kua au malo ʼi te malama ʼaeni.”+

17 ʼI tana ʼosi fai te ʼu palalau ʼaia, neʼe hiki ake e Sesu ʼona mata ki te lagi ʼo ui: “Tamai, kua hoko mai te hola. Fakakololiaʼi tou ʼalo, ke feala ki tou ʼalo ke ina fakakololiaʼi koe,+ 2 koteʼuhi neʼe ke foaki age kia te ia te pule ki te kakano* fuape,+ ke feala hana foaki ia te maʼuli heʼe gata+ kia natou fuli ʼae neʼe ke foaki age kia te ia.+ 3 Koʼeni te fakaʼuhiga ʼo te maʼuli heʼe gata,+ ke natou ako ke natou iloʼi ia koe, te ʼAtua moʼoni pe ʼe tahi+ pea mo ia ʼae neʼe ke fekauʼi mai, ia Sesu Kilisito.*+ 4 Neʼe au fakakololiaʼi koe ʼi te kele,+ ʼo au fakaʼosi ia te gaue ʼae neʼe ke foaki mai ke au fai.+ 5 Pea ʼi te temi nei, Tamai, fakakololiaʼi au ʼi ʼou tafa ʼaki ia te kololia ʼae neʼe au maʼu ʼi ʼou tafa ʼi muʼa ʼo te fakatupu ʼo te malama ʼaeni.+

6 “Neʼe au fakaha ia tou huafa ki te hahaʼi ʼae neʼe ke foaki mai ʼi te malama ʼaeni.+ Neʼe ko tau hahaʼi, pea neʼe ke foaki mai, pea neʼe natou mulimuli* ki tau folafola. 7 ʼI te temi nei, kua natou iloʼi ko te ʼu meʼa fuli ʼae neʼe ke foaki mai ʼe haʼu mai ia te koe. 8 Koteʼuhi ʼi te temi ʼae neʼe au foaki ai kia natou te ʼu folafola ʼae neʼe ke foaki mai,+ neʼe natou tali pea neʼe natou iloʼi papau neʼe au haʼu ohage ko tou fakafofoga,+ pea neʼe natou tui neʼe ke fekauʼi mai au.+ 9 ʼE au faikole ʼo ʼuhiga mo natou. ʼE mole au faikole ʼo ʼuhiga mo te malama ʼaeni, kae ʼo ʼuhiga mo natou ʼae neʼe ke foaki mai, koteʼuhi ʼe ko tau hahaʼi. 10 Pea ko meʼa fuli ʼe au maʼu ʼe ʼa koe pea ko meʼa fuli ʼa koe ʼe ʼaʼaku,+ pea neʼe fakakololiaʼi au ʼi te lotolotoiga ʼo natou.

11 “ ʼE mole kei au nofo ʼi te malama ʼaeni kae ko natou ʼe nonofo ʼi te malama ʼaeni,+ pea ʼe au alu atu kia te koe. Tamai maʼoniʼoni, tokaga kia natou+ ʼuhi ko tou huafa ʼae neʼe ke foaki mai, ke feala hanatou liliu ʼo tahi* ohage ko taua ʼe ta tahi.*+ 12 ʼI taku kei nofo mo natou, neʼe au tokaga kia natou+ ʼuhi ko tou huafa ʼae neʼe ke foaki mai. Pea neʼe au puipui natou pea neʼe mole fakaʼauha he tahi,+ gata pe ki te foha ʼo te fakaʼauha,+ ke feala ke hoko ia te folafola.+ 13 Kae ʼi te temi nei, ʼe au alu atu kia te koe pea ʼe au tala ia te ʼu faʼahi ʼaia ki te malama ʼaeni, ke feala ke nofo toku fiafia ia natou pea ke katoa.+ 14 Neʼe au foaki age tau folafola kia natou kae neʼe fehiʼa ia te malama ʼaeni ia natou, koteʼuhi ʼe mole natou kau ʼi te malama ʼaeni,+ ohage ko au ʼe mole au kau ʼi te malama ʼaeni.

15 “ ʼE mole au kole atu ke ke toʼo kehe natou ʼi te malama ʼaeni, kae ke ke tokaga kia natou ʼuhi ko te Agakovi.*+ 16 ʼE mole natou kau ʼi te malama ʼaeni,+ ohage ko au ʼe mole au kau ʼi te malama ʼaeni.+ 17 Fakamaʼoniʼoniʼi* natou ʼaki te moʼoni,+ ko tau folafola ʼe ko te moʼoni.+ 18 Ohage ko tau fekauʼi mai au ki te malama ʼaeni, mo au foki neʼe au fekauʼi natou ki te malama ʼaeni.+ 19 Pea ʼe au fakamaʼoniʼoniʼi au maʼa natou, ke feala ke fakamaʼoniʼoniʼi mo natou ʼaki te moʼoni.

20 “ ʼE mole au faikole pe maʼa natou ʼaeni, kae ʼo ʼuhiga mo natou foki ʼae ka tui anai kia te au ʼuhi ko tanatou faiakonaki, 21 ke feala hanatou liliu fuli ʼo tahi,*+ ohage ko koe Tamai, ʼe ke fakatahi mo au pea ʼe au fakatahi mo koe,+ pea ke feala mo natou ke natou fakatahi mo taua, ke tui ia te malama ʼaeni neʼe ke fekauʼi mai au. 22 Neʼe au foaki age kia natou ia te kololia ʼae neʼe ke foaki mai, ke feala hanatou liliu ʼo tahi, ohage ko taua ʼe ta tahi.+ 23 ʼE au fakatahi mo natou pea ʼe ke fakatahi mo au, ke feala hanatou logo tahi moʼoni, ke iloʼi e te malama ʼaeni neʼe ke fekauʼi mai au pea neʼe ke ʼofa ia natou ohage pe ko tau ʼofa ia te au. 24 Tamai, ʼe au loto ke fakatahi mo au ia natou ʼae neʼe ke foaki mai ʼi te faʼahi ʼae ʼe au nofo ai,+ ke feala hanatou sisio ki toku kololia ʼae neʼe ke foaki mai, koteʼuhi neʼe ke ʼofa ia te au ʼi muʼa ʼo te kamataʼaga ʼo te malamanei.*+ 25 Tamai faitotonu, ʼe mole iloʼi e te malama ʼaeni pe ko ai ia koe,+ kae ʼe au iloʼi koe,+ pea kua iloʼi e natou ʼaeni neʼe ke fekauʼi mai au. 26 Neʼe au fakaha age tou huafa pea ʼe au haga fakaha anai,+ ke feala ke nofo ia natou te ʼofa ʼae neʼe ke fakaha mai pea ke au fakatahi mo natou.”+

18 ʼI tana ʼosi fai te ʼu palalau ʼaia, neʼe alu ia Sesu mo ʼana tisipulo ki te ʼoloto ʼae neʼe tuʼu ʼi te tahi faʼahi ʼo te Vai Tafe* ʼo Kitelone ʼae kua mamaha.+ 2 Ko Sutasi, ʼae neʼe ina lavakiʼi ia ia, neʼe ina iloʼi foki ia te koga meʼa ʼaia, he neʼe tautau fakatahi ai ia Sesu mo ʼana tisipulo. 3 Pea neʼe taki ki ai e Sutasi ia te kutuga solia pea mo te ʼu tagata leʼo ʼa te kau pelepitelo pule mo te kau Faliseo. Neʼe natou ʼomai mo he ʼu taume, mo he ʼu malama pea mo he ʼu mahafu.+ 4 ʼI te iloʼi e Sesu ia te ʼu meʼa fuli ʼae ka hoko kia te ia, neʼe haʼu kia natou ʼo ina fehuʼi age: “Ko ai ʼae ʼe kotou kumi?” 5 Neʼe natou tali age: “Ko Sesu, te tagata Nasaleti.”+ Neʼe ina ui kia natou: “ ʼE ko au ia ia.” Neʼe tuʼu foki mo natou ia Sutasi, ʼae neʼe ina lavakiʼi ia ia.+

6 Kae ʼi te ui ʼa Sesu kia natou “ ʼE ko au ia ia,” neʼe natou holomuli mo fetokaʼi ki te kele.+ 7 Neʼe ina toe fehuʼi kia natou: “Ko ai ʼae ʼe kotou kumi?” Neʼe natou tali: “Ko Sesu, te tagata Nasaleti.” 8 Neʼe ui e Sesu: “Kua au ui atu ʼe ko au ia ia. Kapau ʼe ko au ʼae ʼe kotou kumi, kotou tuku te ʼu tagata ʼaeni ke olo.” 9 Neʼe ina ui te meʼa ʼaia, ke fakahoko te ʼu palalau ʼaeni neʼe ina fai: “Neʼe mole puli he tahi ia natou ʼae neʼe ke foaki mai.”+

10 Pea ko Simone Petelo ʼae neʼe ʼi ai tana heleta, neʼe ina tohoʼi ake ʼo taʼi te tagata kaugana ʼa te pelepitelo lahi, ʼo motu ai tona taliga mataʼu.+ Neʼe higoa te tagata kaugana ʼaia ko Malekusi. 11 Kae neʼe ui e Sesu kia Petelo: “Toe ʼai te heleta ki tona ʼaiʼaga.+ ʼE mole tonu koa la ke au inu te ipu ʼae neʼe foaki mai kia au e te Tamai?”+

12 Ko te kau solia, mo te kamutoa pea mo te ʼu tagata leʼo ʼo te fale lotu ʼa te kau Sutea neʼe natou puke ia Sesu pea natou haʼi. 13 Neʼe natou taki muʼa ia ia kia Anasi, te tamai ʼo te ʼohoana ʼo Kaifa,+ ʼae neʼe ko te pelepitelo lahi ʼi te taʼu ʼaia.+ 14 Pea neʼe ko Kaifa ʼae neʼe ina ui ki te kau Sutea, ʼe lelei age kia natou ke mate he tagata ʼe tahi maʼa te hahaʼi.+

15 Ko Simone Petelo pea mo te tahi tisipulo, neʼe nā muliʼi ia Sesu.+ Neʼe iloʼi lelei e te pelepitelo lahi ia te tisipulo ʼaia, koia neʼe hu ai mo Sesu ki te malaʼe ʼo te ʼapi ʼo te pelepitelo lahi. 16 Kae neʼe tuʼu ia Petelo ʼi tuʼa ʼi te matapa.* Ko te tisipulo ʼae neʼe iloʼi lelei e te pelepitelo lahi, neʼe haʼu ʼo palalau ki te taʼahine leʼo matapa pea neʼe ina fakahu ia Petelo ki loto. 17 Neʼe ui e te taʼahine faifekau kia Petelo: “ ʼE mole koa la ke kau mo koe ʼi te ʼu tisipulo ʼa te tagata ʼaia?” Neʼe ina tali: “Kailoa ia.”+ 18 Neʼe tutuʼu te hahaʼi faifekau pea mo te ʼu tagata leʼo ʼo te fale lotu ia tafa ʼo te afi ʼae neʼe natou tafu, koteʼuhi neʼe momoko pea neʼe natou fakamafana ai. Neʼe tuʼu ia Petelo mo natou ʼo fakamafana ai.

19 Pea neʼe fakafehuʼi e te pelepitelo pule ia Sesu ʼo ʼuhiga mo ʼana tisipulo pea mo tana faiakonaki. 20 Neʼe tali e Sesu ki ai: “Neʼe au palalau fakahaha ki te hahaʼi fuli. Neʼe au faiakonaki tuʼumaʼu ʼi te ʼu sinakoka pea mo te fale lotu,+ ʼae ʼe fakatahitahi ai te kau Sutea fuli, pea neʼe mole au tala fakafufu he meʼa. 21 He koʼe ʼe ke fakafehuʼi au? Fakafehuʼi ia natou ʼae neʼe logo ki te ʼu meʼa ʼae neʼe au fakaha age kia natou. ʼE natou iloʼi ia te ʼu meʼa ʼae neʼe au ui.” 22 ʼI tana ʼosi fai te ʼu palalau ʼaia, ko te tahi ʼi te ʼu tagata leʼo ʼo te fale lotu ʼae neʼe tuʼu ovi age, neʼe ina pāki ia Sesu+ pea neʼe ina ui: “ ʼE ko tau taʼi palalau koa ʼaia ki te pelepitelo pule?” 23 Neʼe ui e Sesu ki ai: “Kapau neʼe au palalau kovi, pea fakaha mai tona kovi. Kae kapau neʼe moʼoni ʼaku palalau, he koʼe ʼe ke pāki au?” 24 Pea neʼe fekau e Anasi ke ʼave haʼihaʼi ia ia kia Kaifa te pelepitelo lahi.+

25 Neʼe tuʼu ia Simone Petelo ʼo fakamafana ʼi ai. Neʼe natou ui ki ai: “ ʼE mole koa la ke kau mo koe ʼi ʼana tisipulo?” Neʼe fakafisi ia ki ai ʼo ina ui: “Kailoa ia.”+ 26 Neʼe kau ʼi te hahaʼi faifekau ʼa te pelepitelo lahi te tahi neʼe kaiga mo te tagata ʼae neʼe tuʼusi e Petelo tona taliga.+ Neʼe ina ui: “Neʼe mole koa la au sio kia koe ʼi te ʼoloto mo ia?” 27 Kae neʼe toe fakafisi ki ai ia Petelo, pea neʼe ʼuʼua atu aipe ia te moa.+

28 ʼI te kei hegihegi, neʼe natou taki leva ia Sesu mai te ʼapi ʼo Kaifa ʼo ʼave ki te nofoʼaga ʼo te kovana.+ Kae neʼe mole natou hu ki te nofoʼaga ʼo te kovana, ke ʼaua naʼa natou heʼe maʼa+ pea ke feala hanatou kai te Pasikate. 29 Koia, neʼe haʼu ia Pilato ki tuʼa ʼo ina fehuʼi kia natou: “Kotea te tukugakovi ʼae ʼe kotou fai ʼo ʼuhiga mo te tagata ʼaeni?” 30 Neʼe natou tali ki ai: “Ka na neʼe mole fai la e te tagata ʼaeni he meʼa ʼe kovi, neʼe mole matou ʼaumai kia koe.” 31 Neʼe ui leva e Pilato kia natou: “Kotou toʼo ia ia pea kotou fakamauʼi ʼo mulimuli ki takotou lao.”+ Neʼe tali e te kau Sutea ki ai: “ ʼE mole gafua ke matou matehi he tahi.”+ 32 Neʼe tupu ke fakahoko ai te folafola ʼae neʼe fai e Sesu moʼo fakaha pe ʼe feafeaʼi anai tona mate.+

33 Neʼe toe hu ia Pilato ki te nofoʼaga ʼo te kovana ʼo ina pauʼi age ia Sesu. Neʼe ina fehuʼi kia te ia: “ ʼE ko koe koa te Hau ʼo te kau Sutea?”+ 34 Neʼe ui e Sesu: “ ʼE ke fai koa te fehuʼi ʼaia he ʼe ko tau manatu ʼaia, pe neʼe palalau atu niʼihi kia koe ʼo ʼuhiga mo au?” 35 Neʼe tali e Pilato: “ ʼE ko au koa ko he Sutea? ʼE ko tau hahaʼi totonu pea mo te kau pelepitelo pule ʼae neʼe natou ʼaumai koe kia au. Kotea ʼae neʼe ke fai?” 36 Neʼe tali e Sesu:+ “ ʼE mole kau toku Puleʼaga ʼi te malama ʼaeni.+ Ka na pau la neʼe kau toku Puleʼaga ʼi te malama ʼaeni, neʼe tau taku hahaʼi ke mole ʼave au ki te kau Sutea.+ Kae ʼe mole kau toku Puleʼaga ʼi te malama ʼaeni.” 37 Neʼe ui leva e Pilato kia te ia: “Pea ta ko koe ko te hau?” Neʼe tali e Sesu: “ ʼE ko koe totonu ʼae ʼe ke ui ko au ko te hau.+ Neʼe au tupu ʼuhi ko te faʼahi ʼaeni, pea neʼe au haʼu ki te malama ʼaeni ʼuhi ko te faʼahi ʼaeni, ke au fakamoʼoni ʼo ʼuhiga mo te moʼoni.+ Ko ʼae ʼe kau ki te moʼoni ʼe fakalogo ia ki toku leʼo.” 38 Neʼe ui e Pilato kia te ia: “Kotea ia te moʼoni?”

ʼI tana ʼosi fai te palalau ʼaia, neʼe toe hu ia ki tuʼa ki te kau Sutea ʼo ina ui kia natou: “ ʼE mole au maʼu he hala ia ia.+ 39 Pea tahi, ʼo mulimuli ki takotou agaʼi fenua, ʼe au fakaʼateainaʼi anai he tagata ʼi te Pasikate.+ Koia, ʼe kotou loto koa ke au fakaʼateainaʼi te Hau ʼo te kau Sutea?” 40 Neʼe natou toe kalaga: “Kailoa, mole ko te tagata ʼaia, kae ko Palapasi!” Pea ko Palapasi neʼe ko te tagata kaihaʼa.+

19 Neʼe fakatotonu leva e Pilato ke toʼo ia Sesu pea ke huipiʼi.+ 2 Pea neʼe fai e te kau solia ia he pale talatala ʼo natou ʼai ki tona ʼulu pea neʼe natou fakatui kia te ia he kofu huʼa lotuma.+ 3 Neʼe natou ʼomai kia te ia ʼo natou ui: “Fakaʼapaʼapa atu,* Hau ʼo te kau Sutea!” Pea neʼe natou fepaʼaki.+ 4 Neʼe toe haʼu ia Pilato ki tuʼa, ʼo ina ui ki te hahaʼi: “ ʼE au ʼaumai ia ia ki tuʼa ke kotou iloʼi ai ʼe mole au maʼu hana hala.”+ 5 Pea neʼe haʼu ia Sesu ki tuʼa, mo te pale talatala pea mo te kofu huʼa lotuma. Neʼe ui leva e Pilato kia natou: “Koʼeni ia te tagata!” 6 Kae ʼi te sisio ʼa te kau pelepitelo pule mo te ʼu tagata leʼo ʼo te fale lotu kia te ia, neʼe natou kalaga: “Ke tutuki ki he pou! Ke tutuki ki he pou!”+ Neʼe ui e Pilato kia natou: “Kotou toʼo e koutou totonu ia ia pea mo kotou matehi, koteʼuhi ʼe mole au maʼu hana hala.”+ 7 Neʼe ui age e te kau Sutea: “ ʼE ʼi ai tamatou lao, pea ʼo mulimuli ki te lao ʼaia ʼe tonu ia ke mate,+ koteʼuhi neʼe ina ui ko ia te ʼalo ʼo te ʼAtua.”+

8 ʼI te logo ʼa Pilato ki ʼanatou palalau, neʼe toe ʼaʼasili mataku ai, 9 pea neʼe toe hu ki te nofoʼaga ʼo te kovana ʼo ina fehuʼi kia Sesu: “ ʼE ke haʼu koa maifea?” Kae neʼe mole tali age e Sesu.+ 10 Koia, neʼe ui e Pilato kia te ia: “ ʼE mole ke fia tali mai koe? ʼE mole koa la ke iloʼi ʼe au maʼu te pule ke au fakaʼateainaʼi koe, pea au maʼu te pule ke au matehi koe?” 11 Neʼe tali e Sesu ki ai: “ ʼE mole ke maʼu he pule kia au mo ka na pau la neʼe mole foaki atu e te ʼAtua. Koia, ʼe lahi age te agahala ʼa te tagata ʼae neʼe ina ʼaumai au kia koe.”

12 Tupu ko te faʼahi ʼaia, neʼe haga faiga pe e Pilato ke ina maʼu he puleʼaki ke fakaʼateainaʼi ia ia, kae neʼe kalaga ia te kau Sutea: “Kapau ʼe ke fakaʼateainaʼi ia te tagata ʼaena, ʼe mole ke kaumeʼa mo Sesale.* Ko he tahi pe ʼe ina ui ko ia ko he hau, ʼe fakafeagai kia Sesale.”+ 13 Pea ʼi te ʼosi logo ʼa Pilato ki te ʼu palalau ʼaia, neʼe ina ʼave ia Sesu ki tuʼa, pea neʼe heka ʼi te fakamauʼaga ʼi te faʼahi ʼae neʼe fola maka, ʼae ʼe fakahigoa ʼi te Fakahepeleo ko Kapata. 14 Neʼe ko te ʼaho ʼaia ʼo te Tokonaki+ ʼo te Pasikate pea neʼe ko te vaʼevaʼe fetapa.* Pea neʼe ina ui ki te kau Sutea: “Koʼeni tokotou hau!” 15 Kae neʼe natou kalaga: “Ke matehi ia ia! Ke matehi ia ia! Ke tutuki ki he pou!” Neʼe ui e Pilato kia natou: “ ʼE tonu koa ke au matehi tokotou hau?” Neʼe tali e te kau pelepitelo pule: “ ʼE mole homatou tahi age hau ia Sesale.” 16 Neʼe ina tuku age leva ia ia kia natou ke natou tutuki ki te pou.+

Neʼe ʼave leva ia Sesu e te kau solia. 17 Neʼe ina ʼamo tona pou fakamamahi* pea neʼe alu ki te Koga Meʼa ʼo Te ʼUlu Poko,+ ʼae ʼe fakahigoa ʼi te Fakahepeleo ko Kolokota.+ 18 Neʼe natou tutuki ai ia ia ki te pou+ mo te tahi ʼu tagata ʼe toko lua, ʼo nā tautafa, pea mo Sesu ʼi lotomalie.+ 19 Neʼe toe tutuki foki e Pilato ki te pou fakamamahi* ia te lauʼi papa, neʼe ina tohi ai: “Ko Sesu, te tagata Nasaleti, te Hau ʼo te kau Sutea.”+ 20 Tokolahi te kau Sutea neʼe natou lau te ʼu kupu ʼaia, koteʼuhi ko te koga meʼa ʼae neʼe tutuki ai ia Sesu ki te pou neʼe ovi age ki te kolo. Pea neʼe tohi ʼi te Fakahepeleo, mo te Fakalatina pea mo te Fakakeleka. 21 Kae neʼe ui e te kau pelepitelo pule ʼo te kau Sutea kia Pilato: “Tuku tau tohi, ‘Te Hau ʼo te kau Sutea’ kae ke ke tohi te meʼa ʼaeni neʼe ina ui: ‘Ko au te Hau ʼo te kau Sutea.’ ” 22 Neʼe ui e Pilato: “Ko te meʼa ʼae kua au tohi, kua ʼosi tohi.”

23 ʼI te kua tutuki e te kau solia ia Sesu ki te pou, neʼe natou toʼo ʼona kofu tuʼa pea natou vae fa, ʼo takitahi te tagata solia mo tona vahe. Neʼe natou toe toʼo foki mo tona kofu loto. Kae ko te kofu loto neʼe tuitahi, mai ʼoluga ki lalo. 24 Koia, neʼe natou feuiʼaki: “ ʼAua naʼa tou hae, kae ke tou toho ke tou iloʼi pe ko ai ʼae ka ina maʼu.”+ Neʼe hoko ai te folafola ʼaeni: “Neʼe natou vaevae ʼoku mutuʼi meʼa, pea natou toho ke natou iloʼi pe ko ai ʼae ka ina maʼu toku kofu.”+ Koʼena te meʼa ʼae neʼe fai e te kau solia.

25 Kae neʼe tutuʼu ovi ki te pou fakamamahi* ʼo Sesu ia tana faʼe pea mo te tehina ʼo tana faʼe,+ mo Malia te ʼohoana ʼo Kolopasi pea mo Malia Maketalena.*+ 26 Koia, ʼi te sio ʼa Sesu ki tana faʼe pea mo te tuʼu ovi ki ai ʼa te tisipulo ʼae neʼe ʼofa ai,+ neʼe ina ui ki tana faʼe: “Fafine, koʼena tau tama!” 27 Pea neʼe ina ui ki te tisipulo: “Koʼena tau faʼe!” Pea talu mai te temi ʼaia, neʼe ʼave e te tisipulo ia ia ki tona ʼapi.

28 Hili ia, ʼi te kua iloʼi e Sesu kua hoko ia meʼa fuli, pea ke fakahoko ia te folafola, neʼe ina ui: “ ʼE au fia inu.”+ 29 Neʼe hili ʼi ai te ipu lahi neʼe fonu vino. Koia, neʼe natou tuiʼi ki te kauʼi isope* te kana* neʼe palapalaʼi ʼaki te vino pea natou fakaovi age ki tona gutu.+ 30 ʼI tana kua ʼahiʼahi ia te vino, neʼe ui e Sesu: “ ʼE kua hoko ia!”+ pea neʼe maleʼe ifo tona ʼulu, pea neʼe mate leva.+

31 Neʼe ko te ʼaho ʼaia ʼo te Tokonaki.+ Pea ke mole tautau te ʼu sino ʼi te ʼu pou fakamamahi*+ ʼi te Sapato (koteʼuhi ko te Sapato ʼaia neʼe ko te Sapato lahi),+ neʼe kole ai e te kau Sutea kia Pilato ke fasifasiʼi te ʼu vaʼe ʼo natou ʼae ʼi te ʼu pou pea ke toʼo te ʼu sino. 32 Koia, neʼe ʼomai te kau solia ʼo fasifasiʼi te ʼu vaʼe ʼo te ʼuluaki tagata pea mo te ʼu vaʼe ʼo te tahi tagata ʼae neʼe ʼi te pou ʼi te ʼu tafa ʼo Sesu. 33 Kae ʼi tanatou fakaovi age kia Sesu, neʼe natou sisio neʼe kua mate ia, koia neʼe mole natou fasifasiʼi ai ʼona vaʼe. 34 Kae neʼe hukiʼi tona faʼahi vakavaka e te tahi ʼi te kau solia ʼaki tana tao,+ pea ʼi te moʼi temi pe ʼaia, neʼe hali mai ai te toto mo te vai. 35 Pea ko ia ʼae neʼe sio ki te faʼahi ʼaia neʼe fakamoʼoni ki ai, pea ʼe moʼoni tana fakamoʼoni. ʼE ina iloʼi ko te meʼa ʼae ʼe ina ui ʼe moʼoni, ke feala ke kotou toe tui mo koutou.+ 36 Neʼe hoko te ʼu faʼahi ʼaia, ke fakahoko ai te folafola ʼaeni: “ ʼE mole fasi anai hona hui ʼe tahi.”+ 37 Pea ko te tahi folafola ʼe ui ai: “ ʼE natou sioʼi anai ia ia ʼae neʼe natou hukiʼi.”+

38 Hili te ʼu faʼahi ʼaia, ko Sosefo mai Alimatea, ʼae neʼe ko he tisipulo fakafufu ʼa Sesu koteʼuhi neʼe mataku ʼi te kau Sutea,+ neʼe ina kole kia Pilato pe ʼe feala ke ina toʼo te sino ʼo Sesu. Pea neʼe fakagafua age e Pilato. Koia neʼe haʼu ai ʼo toʼo te sino.+ 39 Neʼe toe haʼu mo Nikotemo,+ te tagata ʼae neʼe alu ʼi muʼa atu kia te ia ʼi te poʼuli. Neʼe ina ʼaumai ia te mila* mo te aloese ʼae neʼe fio pea neʼe ko kilo ʼe teitei 30.+ 40 Neʼe nā toʼo leva te sino ʼo Sesu pea nā kofukofu ʼaki te ʼu kie lino* pea mo te ʼu ʼakau fakamagoni,+ ʼo mulimuli ki te agaʼi fenua ʼa te kau Sutea ʼo ʼuhiga mo te ʼavaifo. 41 Pea ʼi te koga meʼa ʼae neʼe matehi ai ia ia, neʼe ʼi ai te ʼoloto, pea ʼi te ʼoloto ʼaia neʼe ʼi ai te fale maka* foʼou,+ neʼe heʼeki tuku ki ai he sino. 42 Neʼe nā tuku ai te sino ʼo Sesu koteʼuhi neʼe ko te ʼaho ʼaia ʼo te Tokonaki+ ʼa te kau Sutea pea neʼe tuʼu ovi age te fale maka.

20 ʼI te ʼuluaki ʼaho ʼo te vahaʼa, neʼe alu ia Malia Maketalena* ki te fale maka* kae kei hegihegi.+ Neʼe sio kua toʼo kehe ia te foʼi maka ʼo te fale maka.*+ 2 Koia, neʼe lele ai kia Simone Petelo pea mo te tahi age tisipulo, ʼae neʼe ʼofa ai ia Sesu,+ ʼo ina ui kia naua: “Neʼe natou toʼo ia te ʼAliki mai te fale maka+ pea ʼe mole matou iloʼi pe neʼe natou ʼave kifea.”

3 Neʼe olo leva ia Petelo pea mo te tahi age tisipulo ki te fale maka. 4 Neʼe nā feleleʼi toko lua, kae neʼe gaholo age te tahi tisipulo ia Petelo pea neʼe muʼa ia ki te fale maka. 5 Neʼe punou ifo pea neʼe sio ki te ʼu moʼi kie lino neʼe hili ʼi ai,+ kae neʼe mole hu ia ki loto. 6 Neʼe tau age leva ia Simone Petelo, ʼae neʼe muli age ia ia, pea neʼe hu ki te fale maka. Pea neʼe sio ki te ʼu moʼi kie lino ʼae neʼe hili ʼi ai. 7 Ko te kie ʼae neʼe hili ʼi te ʼulu ʼo Sesu neʼe mole tuku fakatahi mo te tahi ʼu moʼi kie kae neʼe fetuʼi ia ʼo tuku kehe. 8 Pea ko te tahi tisipulo ʼae neʼe muʼa age ki te fale maka neʼe toe hu mo ia ki loto, pea neʼe sio pea neʼe tui ai leva. 9 Koteʼuhi neʼe heʼeki nā mahino ki te folafola ʼae ʼe ui ʼe tonu ke fakatuʼuake ia ia mai te kau mate.+ 10 Koia neʼe toe liliu te ʼu tisipulo ki ʼonā ʼapi.

11 Kae neʼe tuʼu pe ʼi tuʼa ia Malia, ʼo ovi ki te fale maka pea neʼe tagi. Pea ʼi tana tagi ʼaia, neʼe punou ifo ʼo fakasiosio ki te loto fale maka. 12 Pea neʼe sio ki te ʼu ʼaselo ʼe toko lua+ neʼe nā teu hina, pea neʼe heheka ʼi te faʼahi ʼae neʼe tuku ai te sino ʼo Sesu, ko te tahi ʼi te ʼulu pea mo te tahi ʼi te ʼu vaʼe. 13 Pea neʼe nā ui ki ai: “Fafine, he koʼe ʼe ke tagi?” Neʼe ina tali age kia naua: “Neʼe natou toʼo ia toku ʼAliki, pea ʼe mole au iloʼi pe neʼe natou ʼave kifea.” 14 ʼI tana ʼosi fai te ʼu palalau ʼaia, neʼe maliu atu pea neʼe sio ai ki te tuʼu ʼa Sesu, kae neʼe mole mahino ia neʼe ko Sesu.+ 15 Neʼe ui e Sesu ki ai: “Fafine, he koʼe ʼe ke tagi? Ko ai ʼae ʼe ke kumi?” Neʼe manatu ia ko te tagata faiʼoloto, koia, neʼe ina ui ki ai: “ ʼAliki, kapau neʼe ke ʼave ia ia, fakaha mai pe neʼe ke tuku kifea, pea ʼe au toʼo mai anai.” 16 Neʼe ui e Sesu ki ai: “Malia!” ʼI tana maliu age, neʼe ina ui kia te ia ʼi te Fakahepeleo: “Laponi!” (ko tona fakaʼuhiga “Faiako!”) 17 Neʼe ui e Sesu ki ai: “Tuku tau tapiki mai kia te au, koteʼuhi ʼe heʼeki au hake ki te Tamai. Kae alu ki ʼoku tehina+ ʼo ui kia natou: ‘ ʼE au hake ki taku Tamai+ pea ko takotou Tamai, pea ki toku ʼAtua+ pea ko tokotou ʼAtua.’ ” 18 Neʼe haʼu ia Malia Maketalena ʼo ina fakaha age te logo ʼaeni ki te kau tisipulo: “Neʼe au sio ki te ʼAliki!” Pea neʼe ina fakamatala kia natou te ʼu palalau ʼae neʼe fai age e Sesu ki ai.+

19 ʼI te kua afiafi ʼo te ʼaho ʼaia, ko te ʼuluaki ʼaho ʼo te vahaʼa, neʼe fakatahitahi te kau tisipulo. Neʼe fakamaʼumaʼu te ʼu matapa he neʼe natou matataku ʼi te kau Sutea. Pea neʼe haʼu leva ia Sesu ʼo tuʼu ʼi te lotomalie ʼo natou pea neʼe ina ui: “Ke ia koutou te tokalelei.”+ 20 ʼI tana ʼosi fai te palalau ʼaia, neʼe ina fakaha age kia natou ʼona nima pea mo tona faʼahi vakavaka.+ Neʼe fiafia ai te kau tisipulo ʼi tanatou sisio ki te ʼAliki.+ 21 Neʼe toe ui e Sesu kia natou: “Ke ia koutou te tokalelei.+ Ohage pe ko te fekauʼi mai au e te Tamai,+ ʼe au toe fekauʼi foki mo koutou.”+ 22 ʼI tana ʼosi fai te ʼu palalau ʼaia, neʼe ina pupuhi kia natou pea neʼe ina ui: “Ke kotou tali ia te laumalie maʼoniʼoni.+ 23 Kapau ʼe kotou fakamolemole te ʼu agahala ʼa he tahi, kua fakamolemole ia. Pea kapau ʼe mole kotou fakamolemole te ʼu agahala ʼa he tahi, ʼe mole fakamolemole anai ia.”

24 Kae ko Tomasi,+ te tahi ʼo te toko Hogofulu-ma-lua, ʼae neʼe toe higoa ko Mahagā, neʼe mole fakatahi ia mo natou ʼi te haʼu ʼaia ʼa Sesu. 25 Koia, neʼe ui e te tahi age ʼu tisipulo ki ai: “Neʼe matou sisio ki te ʼAliki!” Kae neʼe ina ui kia natou: “Kapau ʼe mole au sio ki te fakailoga ʼo te ʼu faʼo ʼi ʼona nima pea mo ʼai toku kauʼi tuhi ki te fakailoga ʼo te ʼu faʼo, mo toku nima ki tona faʼahi vakavaka,+ ʼe mole au tui anai ki ai.”

26 Hili ʼaho ʼe valu, neʼe toe fakatahitahi ʼana tisipulo ʼi te ʼapi, pea neʼe nofo ia Tomasi mo natou. Neʼe haʼu leva ia Sesu, logo la te fakamaʼumaʼu ʼo te ʼu matapa, ʼo tuʼu ʼi te lotomalie ʼo natou pea neʼe ina ui: “Ke ia koutou te tokalelei.”+ 27 Pea neʼe ina ui leva kia Tomasi: “ ʼAi tou kauʼi tuhi ki heni, pea sio ki ʼoku nima, pea ke ʼai tou nima ki toku faʼahi vakavaka, pea tuku tau lotolotolua,* kae ke ke tui.” 28 Neʼe ui e Tomasi kia te ia: “Toku ʼAliki mo toku ʼAtua!” 29 Neʼe ui e Sesu ki ai: “ ʼE ke tui koa he ʼe kua ke sio kia au? Fiafia ia natou ʼae ʼe tui kae neʼe heʼeki sisio.”

30 ʼE mahino ia, neʼe lahi te ʼu milakulo neʼe toe fakahoko foki e Sesu ia muʼa ʼo te kau tisipulo, pea ʼe mole tuʼu ʼi te takaiga tohi ʼaeni.+ 31 Kae neʼe tohi te ʼu faʼahi ʼaia, ke feala ke kotou tui ʼe ko Sesu ia Kilisito,* te ʼAlo ʼo te ʼAtua, pea ʼi takotou tui ʼaia, ke kotou maʼu te maʼuli ʼaki tona huafa.+

21 Hili te faʼahi ʼaia, neʼe toe ha ia Sesu ki te kau tisipulo ʼi te matatai ʼo Tipeliate. Neʼe hoko fenei tana ha ʼae kia natou. 2 Neʼe fakatahi ai ia Simone Petelo, mo Tomasi (ʼae neʼe toe higoa ko Mahagā),+ mo Natanaele+ mai Kana ʼi Kalilea, mo te ʼu foha ʼo Sepeteo,+ pea mo ʼana tahi tisipulo ʼe toko lua. 3 Neʼe ui e Simone Petelo kia natou: “ ʼE au alu ʼo gelu.” Neʼe natou ui ki ai: “ ʼE matou olo mo koe.” Neʼe natou olo ʼo heheka ki te vaka, kae ʼi te po katoa ʼaia neʼe mole natou maʼu he meʼa.+

4 ʼI te mafoa ake ʼo te ʼaho, neʼe tuʼu ia Sesu ʼi te matatai, kae neʼe mole mahino te kau tisipulo neʼe ko Sesu.+ 5 Pea neʼe fakalavelave age e Sesu kia natou: “ ʼU fanau, ʼe ʼi ai koa hakotou meʼa kai?”* Neʼe natou tali: “Kailoa!” 6 Neʼe ina ui kia natou: “Kotou ʼaʼau te kupega ʼi te faʼahi mataʼu ʼo te vaka pea ʼe kotou maʼu anai ni ika.” Neʼe natou ʼaʼau leva te kupega, pea neʼe mole feala hanatou toho ake koteʼuhi neʼe lahi te ʼu ika.+ 7 Ko te tisipulo ʼae neʼe ʼofa ai ia Sesu+ neʼe ina ui kia Petelo: “ ʼE ko te ʼAliki!” ʼI te logo ʼa Simone Petelo ko te ʼAliki, neʼe ina tui tona kofu tuʼa, koteʼuhi neʼe telefua,* pea neʼe fakato ki te tai. 8 Kae neʼe tau age te tahi ʼu tisipulo ʼi te kiʼi vaka, ʼo natou toho ia te kupega ʼae neʼe fonu ika, he neʼe mole natou faʼa mamaʼo mai te matatai, ia meta ʼe teitei 90.*

9 ʼI tanatou hake ake ki ʼuta, neʼe natou sisio ki he afi kua mamala kakaha neʼe tunu ai te ʼu ika, pea mo he ʼu foʼi pane. 10 Neʼe ui e Sesu kia natou: “Kotou ʼaumai ni ika ʼi te ʼu ika ʼaena neʼe hoki kotou maʼu mai.” 11 Koia neʼe alu ai ia Simone Petelo ki te vaka ʼo toho ake ki te matatai ia te kupega kua fonu ko te ʼu ika lalahi ʼe 153. Pea logo la te lahi ʼaupito ʼo te ʼu ika, kae neʼe mole mahae ia te kupega. 12 Neʼe ui e Sesu kia natou: “Kotou ʼomai ʼo kakai.” Neʼe mole he tahi ʼi te ʼu tisipulo neʼe lototoʼa ke ina fehuʼi age kia te ia: “Ko ai ia koe?” koteʼuhi neʼe natou iloʼi neʼe ko te ʼAliki. 13 Neʼe haʼu ia Sesu ʼo toʼo te ʼu foʼi pane pea ina foaki age kia natou, ʼo toe feia mo te ʼu ika. 14 Neʼe ko te tuʼa tolu ʼaia+ ʼo te ha ʼa Sesu ki te kau tisipulo ʼi tona ʼosi fakatuʼuake mai te kau mate.

15 ʼI tanatou ʼosi kakai, neʼe fehuʼi leva e Sesu kia Simone Petelo: “Simone, foha ʼo Soane, ʼe ke ʼofa koa ia au ʼo lahi age ʼi te ʼu meʼa ʼaeni?” Neʼe ina tali kia te ia: “ ʼEi ʼAliki, ʼe ke iloʼi ʼe au ʼofa ia koe.” Neʼe ina ui ki ai: “Fafaga ʼaku akeno.”+ 16 Pea neʼe ina toe fehuʼi ki ai, ko tona tuʼa lua ʼaia: “Simone, foha ʼo Soane, ʼe ke ʼofa koa ia au?” Neʼe ina tali: “ ʼEi ʼAliki, ʼe ke iloʼi ʼe au ʼofa ia koe.” Neʼe ina ui: “Tauhi ʼaku kiʼi ovi.”+ 17 Neʼe ina fehuʼi ki ai, ko tona tuʼa tolu ʼaia: “Simone, foha ʼo Soane, ʼe ke ʼofa koa ia au?” Neʼe lotomamahi ia Petelo ʼi tana fehuʼi tuʼa tolu age: “ ʼE ke ʼofa koa ia au?” Koia, neʼe ina tali kia te ia: “ ʼAliki, ʼe ke iloʼi lelei ia meʼa fuli, pea ʼe ke iloʼi ʼe au ʼofa ia koe.” Neʼe ui e Sesu ki ai: “Fafaga ʼaku kiʼi ovi.+ 18 ʼE au tala moʼoni atu kia koe, ʼi tau kei tupulaga, neʼe ke teuteu tokotahi pea mo ke alu ki he faʼahi pe neʼe ke loto ki ai. Kae ka ke matuʼa, ʼe ke faoʼi anai ʼou nima pea ʼe teuteuʼi anai koe e he tahi age ʼo ina ʼave koe ki he faʼahi ʼe mole ke loto ki ai.” 19 Neʼe ina fai te ʼu palalau ʼaia moʼo fakaha te faʼahiga mate ʼa Petelo ʼae ka fakakololiaʼi ai te ʼAtua. ʼI tana ʼosi fai te ʼu palalau ʼaia, neʼe ina ui ki ai: “Haga mulimuli mai ia te au.”+

20 Neʼe maliu ia Petelo pea neʼe sio ki te mulimuli age ʼa te tisipulo ʼae neʼe ʼofa ai ia Sesu,+ ia ia ʼae ʼi tanatou kakai neʼe falele ki tona fatafata ʼo fehuʼi kia te ia: “ ʼAliki, ko ai ʼae ʼe ina lavakiʼi koe?” 21 ʼI te sio ʼa Petelo ki ai, neʼe ina ui kia Sesu: “ ʼAliki, ʼe feafeaʼi ki te tagata ʼaeni?” 22 Neʼe ui e Sesu ki ai: “Kapau ʼe au loto ke nofo ʼo kaku ki taku haʼu, kotea tona ʼuhiga kia koe? Kae kia koe, haga mulimuli mai ia te au.” 23 Koia, neʼe mafola ʼi te ʼu tehina te manatu ʼae ʼe mole mate anai te tisipulo ʼaia. Neʼe mole ui age e Sesu ʼe mole mate anai, kae neʼe ina ui: “Kapau ʼe au loto ke nofo ʼo kaku ki taku haʼu, kotea tona ʼuhiga kia koe?”

24 ʼE ko te tisipulo ʼaia+ ʼae ʼe fakamoʼoni ʼo ʼuhiga mo te ʼu faʼahi ʼaeni pea neʼe ina tohi te ʼu faʼahi ʼaeni, pea ʼe tou iloʼi ko tana fakamoʼoni ʼe moʼoni.

25 Kae ʼe lahi te tahi age ʼu meʼa neʼe fai e Sesu, pea ka na pau la neʼe tohi te ʼu meʼa fuli ʼaia, ʼe au mahalo ʼe mole hao anai ʼi te malamanei te ʼu takaiga tohi.+