TE TOHI KI TE KAU LOMA

1 Ko au Paulo, te tagata kaugana* ʼa Kilisito* Sesu, ʼe au faitohi atu kia koutou. Neʼe filifili au ke au apositolo pea neʼe tuku keheʼi au maʼa te logo lelei ʼa te ʼAtua.+ 2 Ko te logo lelei ʼaia neʼe ina fakapapauʼi talu mai te temi muʼa ʼaki ʼana polofeta, ʼi te ʼu Tohi Taputapu. 3 ʼE ko te logo lelei ʼo ʼuhiga mo tona ʼAlo, ʼae neʼe tupu tagata mai te hakoga ʼo Tavite,+ 4 kae ʼaki te malohi ʼo te laumalie maʼoniʼoni, neʼe ha ko ia te ʼAlo ʼo te ʼAtua+ ʼi tona fakatuʼuake mai te kau mate.+ Ko te ʼAlo ʼaia ʼe ko Sesu Kilisito totatou ʼAliki. 5 Neʼe fakaha mai e te ʼAtua te ʼofa makehe ʼaki ia ia pea neʼe foaki mai e Sesu te gaue fakaapositolo,+ ke feala ai ki te hahaʼi ʼo te ʼu puleʼaga fuli ke natou fakalogo pea mo tui kia te ia+ pea mo fakakololiaʼi tona huafa. 6 Neʼe toe pauʼi foki mo koutou mai te ʼu puleʼaga ʼaia ke kotou liliu ko he ʼu tisipulo ʼa Sesu Kilisito. 7 ʼE au faitohi atu kia koutou fuli ʼae ʼe ʼofainaʼi e te ʼAtua ʼi Loma, pea kua filifili koutou ke kotou maʼoniʼoni:

Ke foaki atu e te ʼAtua tatatou Tamai pea mo te ʼAliki ko Sesu Kilisito ia te ʼofa makehe pea mo te tokalelei.

8 ʼUluaki, ʼe au fakafetaʼi ki toku ʼAtua ʼaki ia Sesu Kilisito ʼo ʼuhiga mo koutou fuli, koteʼuhi ʼe palalauʼi e te hahaʼi takotou tui ʼi te malamanei katoa. 9 ʼE au tauhi ki te ʼAtua ʼaki toku loto katoa,* ʼo au fakaha te logo lelei ʼo ʼuhiga mo tona ʼAlo. ʼE iloʼi papau e te ʼAtua ʼe au manatuʼi tuʼumaʼu koutou ʼi ʼaku faikole,+ 10 ʼo au kole ke feala haku maʼu he faigamalie ke au alu atu, mo kapau ʼe ko te finegalo ʼaia ʼo te ʼAtua. 11 Koteʼuhi ʼe au fakaʼamu ke au sio kia koutou, ke feala haku vaevae mo koutou he ʼu meʼa ʼofa fakalaumalie ke kotou malolohi ai, 12 pea ke feala ʼaki takotou tui pea mo taku tui ke tou fefakalotomalohiʼaki.+

13 Kae ʼu tehina, ʼe au loto ke kotou iloʼi, neʼe tuʼa lahi taku fakatuʼutuʼu ke au alu atu, ke feala ke au maʼu he ʼu fua mai ia koutou ʼo toe feia foki mo te hahaʼi ʼo ʼihi atu puleʼaga, kae neʼe taʼofi au ʼo kaku mai ki te temi nei. 14 ʼE au tuʼu maʼua ki te kau Keleka mo te kau matapule,* ʼo feia ki te kau popoto mo te kau vavale. 15 Koia ʼe au loto moʼoni ke au tala atu foki kia koutou ʼi Loma ia te logo lelei.+ 16 Koteʼuhi ʼe mole au ufiufi ʼi te tala ʼo te logo lelei.+ ʼI tona fakahagatonu, ʼe ko te malohi ia ʼo te ʼAtua moʼo haofaki te hahaʼi fuli ʼae ʼe tui,+ ʼuluaki te Sutea+ pea mo te Keleka leva.+ 17 ʼE ha ai te faitotonu ʼa te ʼAtua kia natou ʼae ʼe tui,+ pea ʼe fakamalohiʼi ai tanatou tui, ohage ko tona tohi: “Kae ʼe maʼuli anai te tagata faitotonu ʼuhi ko tana tui.”+

18 Koteʼuhi mai te lagi ʼe fakaha e te ʼAtua tona hauhau+ ki te hahaʼi fuli ʼae ʼe natou fai te ʼu aga ʼae ʼe kovi mo heʼe faitotonu. ʼE natou fufu ai te moʼoni,+ 19 kae neʼe fakaha lelei age e te ʼAtua te ʼu fakamoʼoni ke natou iloʼi ia ia.+ 20 Logo la ko te ʼAtua ʼe fakapulipuli, kae ʼe ha lelei ʼona kalitate talu mai te fakatupu ʼo te malamanei, he ʼe feala ke tou mahino ki ai ʼi te ʼu meʼa ʼae neʼe ina fai,+ ʼo feia mo tona mafimafi heʼe gata+ pea mo tona ʼUhiga ʼAtua.+ Koia ʼe mole hanatou takuʼaki ke mole natou tui ai ki te ʼAtua. 21 Koteʼuhi logo la neʼe natou iloʼi ko ia ia te ʼAtua kae neʼe mole natou fakakololiaʼi ia ia pea mo fakafetaʼi kia te ia. Kua vaʼiganoa ʼanatou fakakaukau pea kua fakapoʼuli ʼonatou loto ʼae ʼe vale.+ 22 Logo la ʼe natou lau ʼe natou popoto, kae kua natou liliu ʼo vavale, 23 pea neʼe natou fetogi te kololia ʼo te ʼAtua tuputupua ʼaki ni fakatata ʼo te tagata ʼae ʼe pala, mo te ʼu manulele, mo te ʼu manu vaʼe fa pea mo te ʼu manu totolo.+

24 Koia neʼe tuku ai e te ʼAtua ke natou mulimuli ki ʼonatou holi heʼe maʼa, ke fakalainoaʼi ai ʼonatou sino. 25 Neʼe natou fetogi te moʼoni ʼo ʼuhiga mo te ʼAtua ʼaki te loi pea neʼe natou atolasio pea mo foaki he tauhi taputapu ki te ʼu meʼa ʼae neʼe fakatupu kae mole ki te Tupuʼaga, ʼae ʼe tuha mo te fakavikiviki ʼo talu ai. Ameni. 26 Ko te tupuʼaga la ʼaia ʼo te tuku e te ʼAtua ke natou mulimuli ki ʼonatou holi fakalialia ʼo ʼuhiga mo te ʼu felaveʼi fakasino,+ koteʼuhi neʼe fai e te hahaʼi fafine te ʼu aga neʼe mole alu tahi mo te aga ʼae neʼe fakatuʼutuʼu ki ai te ʼAtua ʼo ʼuhiga mo te fafine.+ 27 ʼE toe feia foki mo te hahaʼi tagata, neʼe mole kei natou fia fai he ʼu felaveʼi fakasino mo te hahaʼi fafine, kae kua natou feholikoviʼaki pe ia natou, tagata mo tagata,+ ʼo natou fai te ʼu meʼa fakalialia pea neʼe natou maʼu ai te ʼu fua kovi ʼo tanatou aga.+

28 Neʼe natou manatu ʼe mole ʼaoga kia natou ke natou iloʼi lelei te ʼAtua, koia neʼe tuku e te ʼAtua ke natou maʼu ni manatu ʼe hala, ke natou fai te ʼu meʼa ʼae ʼe mole tuha.+ 29 Pea neʼe natou fonu ʼi te ʼu aga heʼe faitotonu,+ mo te agahala, mo te manumanū,+ mo te agakovi. ʼE natou maheka,+ mo faifakapo,+ mo kē, mo aga fakakaka,+ mo lotokovi,+ pea mo faifatufatu. 30 ʼE natou fasituʼu,+ mo fehiʼa ki te ʼAtua, mo pauʼu, mo fialahi, mo laupisiʼi pe ia natou totonu, mo fakatupu kovi, pea mo talagataʼa ki ʼanatou matuʼā.+ 31 ʼE mole honatou ʼatamai,+ ʼe mole natou fakahoko ʼanatou fakapapau, ʼe mole natou ʼoʼofa ki ʼonatou famili pea ʼe mole natou manavaʼofa. 32 ʼE iloʼi lelei pe e natou ʼaia te fakamau faitotonu ʼaeni ʼa te ʼAtua: Ko natou ʼae ʼe natou fai te ʼu meʼa ʼaia ʼe natou tuha mo te mate.+ Kae logo la te faʼahi ʼaia, ʼe hoko atu pe tanatou fai te ʼu meʼa ʼaia, pea ʼe natou toe tali foki mo natou ʼae ʼe natou fai feia.

2 Koia, tagata, tatau aipe pe ko ai ia koe, kae ʼe mole hau takuʼaki+ mo kapau ʼe ke fakamauʼi he tahi. Koteʼuhi ka ke fakamauʼi he tahi, ʼe ke fakatuʼā ia koe totonu, he ʼe ko koe ʼae ʼe ke fakamauʼi ʼe ke toe fai pe te ʼu meʼa ʼaia.+ 2 Pea ʼe tou iloʼi ʼe fakamauʼi e te ʼAtua ia natou ʼae ʼe natou fai te ʼu meʼa ʼaia, ʼo mulimuli ki te moʼoni.

3 Kae, tagata, ʼe ke manatu koa ʼe ke hao anai mai te fakamau ʼa te ʼAtua, moka ʼe ke fakamauʼi ia natou ʼae ʼe natou fai te ʼu meʼa ʼaia kae ʼe ke toe fai pe la? 4 Peʼe ke meʼa noaʼi koa te agaʼofa lahi+ ʼo te ʼAtua mo tana kataki fualoa,+ he ʼe mole ke iloʼi ʼe faigaʼi e te ʼAtua, ʼi tona agaʼofa, ke ina taki koe ki te fakahemala?+ 5 Kae ʼuhi ko tau logogataʼa pea mo tau mole fia fakahemala, ʼe hoko anai kia koe te hauhau ʼo te ʼAtua. Pea ʼe ina fakaha anai tona hauhau ʼi te ʼaho ʼae ka ina fakahoko ai tana fakamau faitotonu.+ 6 ʼE ina liufaki anai ki te tagata takitokotahi, ʼo mulimuli ki ʼana gaue:+ 7 ʼE ina foaki anai te maʼuli heʼe gata kia natou ʼae ʼe natou kumi te kololia mo te fakaʼapaʼapa pea mo te maʼuli tuputupua,+ ʼaki tanatou faʼa kataki ʼi te fai ʼo te ʼu gaue ʼae ʼe lelei. 8 Kae kia natou ʼae ʼe fakatupu kē pea mo talagataʼa ki te moʼoni pea mo mulimuli ki te heʼe faitotonu, ʼe to anai te ita mo te hauhau ʼo te ʼAtua kia natou.+ 9 ʼE tau anai mo te hahaʼi* fuli ʼae ʼe natou fai te ʼu gaue ʼae ʼe kovi ia te mamahi mo te tuʼania, ʼuluaki pe te Sutea pea mo te Keleka leva. 10 Kae ko natou fuli ʼae ʼe natou fai te ʼu gaue ʼae ʼe lelei, ʼe natou maʼu anai te kololia mo te fakaʼapaʼapa pea mo te tokalelei, ʼuluaki pe te Sutea+ pea mo te Keleka leva.+ 11 Koteʼuhi ʼe mole fakapalatahi ia te ʼAtua.+

12 Ko natou fuli ʼae neʼe agahala kae neʼe mole natou maʼu te lao, ʼe natou mamate anai mo natou, logo la ʼe mole fakamauʼi anai natou e he lao.+ Pea ko natou fuli ʼae neʼe agahala kae neʼe natou maʼu te lao, ʼe fakamauʼi anai natou ʼo mulimuli ki te lao.+ 13 Koteʼuhi ʼe mole ko natou ʼae ʼe fagono ki te lao ʼae ʼe faitotonu ia muʼa ʼo te ʼAtua, kae ʼe ko natou ʼae ʼe natou maʼuliʼi ia te lao.+ 14 Koteʼuhi ka fai e te hahaʼi ʼae ʼe mole Sutea te ʼu meʼa ʼae ʼe tuʼu ʼi te lao, kae mole natou maʼu te lao,+ ʼe ha ʼi te hahaʼi ʼaia ʼe ʼi ai te lao ʼi ʼonatou loto. 15 ʼE fakaha e natou ʼaia kua tohi te lao ʼi ʼonatou loto. ʼE fakatokaga age e ʼonatou leʼo ʼo loto pe ʼe lelei peʼe kovi ʼanatou aga, pea ʼe tukugakoviʼi peʼe fakalakatonuʼi natou e ʼanatou manatu. 16 ʼE hoko anai te faʼahi ʼaia ʼi te ʼaho ʼae ka fakamauʼi ai e te ʼAtua ʼaki ia Kilisito* Sesu te ʼu meʼa ʼae neʼe fai fakafufu e te hahaʼi.+ Pea ʼe hoko anai ʼo mulimuli ki te logo lelei ʼae ʼe au tala.

17 ʼE ke ui ko koe ʼe ko he Sutea,+ mo ke falala ki te lao, mo ke fiameʼameʼa ʼo ʼuhiga mo ʼau felogoi mo te ʼAtua. 18 ʼE ke iloʼi tona finegalo pea mo ke tali te ʼu meʼa ʼae ʼe lelei tukupau he neʼe akoʼi* koe ʼi te Lao.+ 19 ʼE ke tui papau ko koe ʼe ko he takitaki ki te kau kivi, pea mo he malama kia natou ʼae ʼi te fakapoʼuli. 20 ʼE ke manatu ʼe feala ke ke fakatonutonuʼi ia natou ʼae ʼe vavale, mo ke akoʼi te kihiʼi tamaliki. Pea ʼe ke mahino ki te ʼu faʼahi tafito ʼo te ʼatamai malama pea mo te moʼoni ʼae ʼe tuʼu ʼi te Lao. 21 Kapau koia, ʼe ke akoʼi ʼihi kae ʼe mole ke akoʼi ia koe totonu?+ Pea ia koe ʼae ʼe ke faifakamafola ʼo ui: “ ʼAua naʼa ke kaihaʼa,”+ kae ʼe ke kaihaʼa koe? 22 Ia koe ʼae ʼe ke ui: “ ʼAua naʼa ke tono,”+ kae ʼe ke tono koe? Ia koe ʼae ʼe ke fakalialia ki te ʼu taula ʼatua, kae ʼe ke kaihaʼa koe te ʼu fale lotu? 23 Ia koe ʼae ʼe ke fiameʼameʼa ʼuhi ko te lao, kae ʼe ke fakalainoaʼi koe te ʼAtua ʼi tau talagataʼa ki te Lao? 24 Koteʼuhi ʼe hage pe ko tona tohi: “ ʼE laukovi te hahaʼi ʼae ʼe mole Sutea ki te huafa ʼo te ʼAtua ʼuhi ko koutou.”+

25 Pea ʼe ʼi ai pe te ʼaoga ʼo te silikosisio*+ kia koe mo kapau ʼe ke maʼuliʼi te lao,+ kae ʼe mole hona ʼaoga kia koe mo kapau ʼe ke talagataʼa ki te lao. 26 Koia kapau ʼe mulimuli he tahi neʼe mole silikosisio+ ki te ʼu fakamaʼua faitotonu ʼae ʼe tuʼu ʼi te Lao, ʼe mole lau anai koa la e te ʼAtua ʼe hage ko he tahi kua silikosisio?+ 27 Pea ko ia ʼae ʼe mole silikosisio ʼe ina fakamauʼi anai koe ʼi tana mulimuli ki te Lao, he ʼe logo la kua ke silikosisio pea mo maʼu te lao ʼae neʼe tohi, kae ʼe ke talagataʼa ki te lao. 28 Koteʼuhi ʼe mole fakatafito te ʼuhiga Sutea ki te meʼa ʼae ʼe ha ki tuʼa,+ pea ko te silikosisio moʼoni, ʼe mole ko ia ʼae ʼe iloga ʼi te kakano.+ 29 Kae ʼe fakatafito ia te ʼuhiga Sutea ki te meʼa ʼae ʼi loto,+ pea ko te silikosisio moʼoni ʼe ko ia ʼae ʼo te loto+ ʼaki te laumalie maʼoniʼoni kae mole ʼaki te lao.+ ʼE vikiʼi te tagata ʼaia e te ʼAtua kae mole ko te hahaʼi.+

3 Koia ʼe ʼi ai koa he lelei ʼe maʼu e te kau Sutea? Peʼe ʼi ai koa he lelei ʼo te silikosisio?* 2 ʼE lahi te ʼu lelei. ʼUluaki, neʼe foaki kia natou te ʼu folafola taputapu ʼa te ʼAtua.+ 3 Pea ʼe feafeaʼi mo kapau neʼe mole tui ʼihi Sutea? Ko tona fakaʼuhiga koa ʼe mole kei feala ki te tagata ke falala ki te ʼAtua? 4 Kailoa ia! Kae ke iloʼi ʼe moʼoni te ʼAtua,+ tatau aipe pe ʼe gutuloi te tagata fuli,+ ohage ko tona tohi: “Ke feala hau fakamoʼoni ʼe ke faitotonu ʼaki ʼau palalau mo ke malo moka fakamauʼi koe.”+ 5 Kae kapau ʼe fakaha e tatatou aga heʼe faitotonu ia te faitotonu ʼa te ʼAtua, kotea anai ka tou ui? ʼE heʼe faitotonu koa te ʼAtua moka ina fakaha tona hauhau? (ʼE ko te manatu ʼaia ʼa te tagata.) 6 Kailoa ia, koteʼuhi ʼe fakamauʼi feafeaʼi anai e te ʼAtua ia te malamanei?+

7 Kae kapau ʼi taku loi ʼe ha lelei age ai te moʼoni ʼo te ʼAtua moʼo fakakololiaʼi ia ia, he koʼe ʼe toe fakamauʼi foki mo au ohage ko he tagata agahala? 8 Pea he koʼe koa ʼe mole tou ui: “Tou fai te ʼu meʼa ʼae ʼe kovi ke feala ke hoko mai te ʼu meʼa ʼae ʼe lelei”? ʼE loi ʼihi ʼo natou ui ʼe matou fai te ʼu palalau ʼaia. ʼE fakamauʼi anai ia natou ʼaia ʼaki te faitotonu.+

9 ʼE tou lelei age koa la tatou ʼi ʼihi atu? Kailoa ia! Koteʼuhi ki muʼa atu, neʼe tou ui ʼe puleʼi e te agahala ia te kau Sutea mo te kau Keleka fuli,+ 10 ohage ko tona tohi: “ ʼE mole he tagata ʼe faitotonu, ʼe mole pe la he foʼi tokotahi,+ 11 ʼe mole he tahi pe la ʼe fakasiosio poto, pea ʼe mole he tahi pe la ʼe ina kumi ia te ʼAtua. 12 Kua maliu kehe ia te tagata fuli pe, pea ʼe mole kei honatou ʼaoga. ʼE mole he tahi ʼe agaʼofa, ʼe mole he tokotahi pe la.”+ 13 “Ko ʼonatou gutu* ʼe hage ko he ʼu fale maka ʼe tuku ava. Neʼe natou kakaʼi te hahaʼi ʼaki ʼanatou palalau.”+ “ ʼE maʼu te kafokona ʼo te ʼu gata ʼi ʼonatou laugutu.”+ 14 “ ʼE fonu ʼonatou gutu ko te faitutuku pea mo te palalau kona.”+ 15 “ ʼE fakavilivili ʼonatou vaʼe moʼo liligi te toto.”+ 16 “ ʼE maʼu ʼi ʼonatou ala te maumau mo te malaʼia, 17 pea ʼe mole natou iloʼi te ala ʼo te tokalelei.”+ 18 “ ʼE mole natou manavasiʼi ki te ʼAtua.”+

19 ʼE tou iloʼi ko te ʼu meʼa fuli ʼae ʼe tuʼu ʼi te Lao, ʼe fakahagahaga kia natou ʼae ʼe fakalogo ki te Lao, ke nonofo fakalogologo ai te hahaʼi fuli, pea ke tuha te malamanei katoa mo te fakatuʼā ʼa te ʼAtua.+ 20 Koia ʼe mole he tahi* ʼe faitotonu anai ia muʼa ʼo te ʼAtua ʼaki te ʼu gaue ʼo te lao,+ koteʼuhi ʼe tupu mai te lao ia te iloʼi ʼo te agahala.+

21 Kae ʼi te temi nei, kua ha ia te faitotonu ʼa te ʼAtua ʼi te mole mulimuli ki te lao,+ ohage ko tona fakamoʼoni ki ai e te Lao pea mo te kau Polofeta,+ 22 ʼei, kua ha te faitotonu ʼa te ʼAtua ʼaki te tui kia Sesu Kilisito,* kia natou fuli ʼae ʼe tui he ʼe mole honatou kehekehe.+ 23 Koteʼuhi ʼe agahala te hahaʼi fuli pe, pea ʼe mole natou kaku ki te kololia ʼo te ʼAtua.+ 24 ʼE natou faitotonu ia muʼa ʼo te ʼAtua ʼuhi ko te totogi* ʼae neʼe foaki e Kilisito Sesu moʼo haofaki ʼo natou.+ ʼE ko te meʼa ʼofa ʼaia+ neʼe foaki e te ʼAtua ʼuhi ko tona ʼofa makehe.+ 25 Neʼe foaki e te ʼAtua ia ia ohage ko he molaga,+ ke fakatokatoka ai te hahaʼi mo te ʼAtua ʼaki tanatou tui ki tona taʼataʼa.+ Neʼe fakaha ai e te ʼAtua tana faitotonu koteʼuhi, ʼi tana kataki fualoa, neʼe ina fakamolemole te ʼu agahala ʼae neʼe fai e te hahaʼi ʼi te temi muʼa. 26 ʼE ina toe fakaha foki tana faitotonu+ ʼi te temi ʼaeni, ʼi tana tala ʼae ʼe faitotonu ia te tagata ʼae ʼe tui kia Sesu.+

27 Koia ʼe ʼi ai koa he tupuʼaga ke tou fiameʼameʼa ai? Kailoa ia. ʼE ko te lao fea ʼae ʼe tonu ke tou fiameʼameʼa ai? ʼE ko te lao koa ʼae ʼe ina fakamaʼuhigaʼi ia te ʼu gaue?+ Kailoa ia, kae ʼe ko te lao ʼo te tui. 28 Koteʼuhi ʼe tou tala ʼe faitotonu he tagata ia muʼa ʼo te ʼAtua ʼuhi ko tana tui kae ʼe mole ʼuhi ko te ʼu gaue ʼo te lao.+ 29 Pea ʼe ko te ʼAtua pe koa ia ʼo te kau Sutea?+ ʼE mole ko te ʼAtua pe foki la ʼo te hahaʼi ʼo te ʼu puleʼaga?+ ʼEi, ʼe ko te ʼAtua foki ʼo te hahaʼi ʼo te ʼu puleʼaga.+ 30 ʼE ko te ʼAtua ʼe tahi,+ koia ko te hahaʼi ʼae kua silikosisio, ʼe natou faitotonu anai ʼi ʼona muʼa+ ʼuhi ko tanatou tui, pea ko te hahaʼi ʼae ʼe mole silikosisio+ ʼe natou faitotonu anai ʼaki tanatou tui. 31 Koia ʼe tou molehi koa te lao ʼaki tatatou tui? Kailoa ia, kae ʼe tou lagolago ki te lao.+

4 Koia kotea ʼae ka tou ui? Kotea ʼae neʼe maʼu e Apalahamo, tatatou kui ʼae ʼe tou hihifo mai ai? 2 Ohage la, ka na pau la neʼe faitotonu ia Apalahamo ia muʼa ʼo te ʼAtua ʼuhi ko ʼana gaue, neʼe feala ia ke fiameʼameʼa ai, kae neʼe mole alu tahi ia mo te manatu ʼa te ʼAtua. 3 Kotea ʼae ʼe ui ʼi te vaega ʼo te ʼu Tohi Taputapu? ʼE ui ai: “Neʼe tui ia Apalahamo kia Sehova,* koia neʼe faitotonu ai ia muʼa ʼo te ʼAtua.”+ 4 Ko te totogi ʼo te tagata ʼae ʼe gaue ʼe mole foaki age ia ʼuhi ko he ʼofa makehe kae ʼe ko he meʼa ʼe tonu ke foaki age ki ai.* 5 ʼI te tahi age faʼahi, ko te tagata ʼae ʼe mole gaue kae ʼe tui kia Ia ʼae ʼe ina tala ʼe faitotonu he tahi ʼe mole fakaʼapaʼapa ki te ʼAtua, kua faitotonu ia ia muʼa ʼo te ʼAtua ʼuhi ko tana tui.+ 6 Neʼe toe talanoa foki ia Tavite ʼo ʼuhiga mo te fiafia ʼa te tagata ʼae ʼe faitotonu ia muʼa ʼo te ʼAtua, logo la neʼe mole mulimuli katoa ʼana gaue ki te lao. Neʼe ina ui: 7 “Manuʼia ia natou ʼae kua fakamolemole ʼanatou aga ʼae ʼe kovi pea kua molehi* ʼanatou agahala. 8 Manuʼia te tagata ʼae ʼe mole toe manatuʼi anai e Sehova* tana agahala.”+

9 Koia ʼe gata pe koa te fiafia ʼaia mo te hahaʼi ʼae kua silikosisio,* peʼe toe kau ai koa mo te hahaʼi ʼae ʼe mole silikosisio?+ Koteʼuhi ʼe tou ui: “Neʼe faitotonu ia Apalahamo ia muʼa ʼo te ʼAtua ʼuhi ko tana tui.”+ 10 Pea ko ʼanafea ʼae neʼe faitotonu ai ia muʼa ʼo te ʼAtua? ʼI te temi koa ʼae neʼe kua silikosisio ai peʼe ʼi te temi ʼae neʼe heʼeki silikosisio ai? Neʼe ko te temi ʼae neʼe heʼeki silikosisio ai. 11 Neʼe ui age e te ʼAtua ki ai ke silikosisio. Neʼe ko te fakailoga*+ ʼaia ʼo tana faitotonu ʼuhi ko tana tui ʼi te temi ʼae neʼe heʼeki silikosisio ai. Neʼe liliu ai ko te tamai ʼa natou fuli ʼae ʼe tui+ kae ʼe mole silikosisio, pea ʼe natou faitotonu ia muʼa ʼo te ʼAtua. 12 Koia ʼe mole ko te tamai ʼa natou pe ʼae ʼe mulimuli ki te fakatotonu ʼo te silikosisio, kae ʼe ko te tamai foki ʼa natou ʼae ʼe natou faʼifaʼitakiʼi ia te tui ʼae neʼe maʼu e tatatou tamai ko Apalahamo+ ʼi tana heʼeki silikosisio.

13 Neʼe fai kia Apalahamo peʼe ko tona hakoga te fakapapau ʼae ʼe ina maʼu anai he malamanei ohage ko he tofiʼa. Kae neʼe mole fai te fakapapau ʼaia he neʼe mulimuli ki te lao,+ kae ʼuhi ko tana faitotonu ia muʼa ʼo te ʼAtua ʼuhi ko tana tui.+ 14 Koteʼuhi kapau ko natou ʼae ʼe mulimuli ki te lao ʼe ko natou ʼae ʼe maʼu tofiʼa, ʼe mole kei he ʼaoga ʼo te tui pea kua vaʼiganoa ia te fakapapau. 15 ʼI tona fakahagatonu, ʼe fakatupu e te Lao te hauhau ʼo te ʼAtua,+ kae kapau ʼe mole he lao pea ʼe mole he talagataʼa.+

16 Koia ʼuhi ko te tui, ʼe tou maʼu te fakapapau, pea ko te fakaha ʼaia ʼo te ʼofa makehe ʼo te ʼAtua.+ Neʼe toe fai foki ia te fakapapau ʼaia ki tona hakoga,+ ʼo mole gata pe kia natou ʼae ʼe mulimuli ki te Lao kae ʼe toe kau ki ai mo natou ʼae ʼe natou faʼifaʼitakiʼi ia te tui ʼa Apalahamo, te tamai ʼa tatou fuli.+ 17 (ʼE hage ko tona tohi: “ ʼE au fakanofo koe ko te tamai ʼa te ʼatu puleʼaga.”)+ Neʼe tui ia Apalahamo ki te ʼAtua, ʼae ʼe ina toe fakamaʼuli ake te kau mate pea mo palalau ki te ʼu meʼa heʼeki hoko ohage kua ʼosi hoko ia. Neʼe fai ai e te ʼAtua kia ia te fakapapau ʼaia. 18 ʼUhi ko tana ʼamanaki, logo la neʼe mole he tupuʼaga ʼo te ʼamanaki ʼaia, kae neʼe tui ia ʼe liliu anai ko te tamai ʼa te ʼatu puleʼaga ʼo mulimuli ki te meʼa ʼaeni neʼe ui age ki ai: “ ʼE feia anai te lahi ʼo tou hakoga.”+ 19 Pea logo la neʼe mole vaivai tana tui, kae neʼe hage kia ia neʼe mole kei feala ke maʼu hana fanau (he neʼe teitei taʼu 100)+ pea neʼe toe paʼa foki mo Sala.+ 20 Kae ʼuhi ko te fakapapau ʼa te ʼAtua, neʼe tui ia pea neʼe mole lotolotolua, kae neʼe liliu ʼo malohi ʼuhi ko tana tui, ʼo ina fakakololiaʼi ai te ʼAtua 21 pea neʼe tui papau ko te meʼa ʼae neʼe fakapapauʼi age e te ʼAtua, ʼe toe feala foki ke Ina fakahoko.+ 22 Koia “neʼe faitotonu ai ia muʼa ʼo te ʼAtua ʼuhi ko tana tui.”+

23 Kae ko te ʼu palalau ʼaeni “neʼe faitotonu ai ia muʼa ʼo te ʼAtua ʼuhi ko tana tui” neʼe mole tohi pe ia maʼa ia,+ 24 kae neʼe toe tohi foki maʼa tatou. Pea mo tatou foki, ʼe tou faitotonu anai ia muʼa ʼo te ʼAtua ʼuhi ko tatatou tui kia Ia ʼae neʼe ina fakatuʼuake ia Sesu totatou ʼAliki mai te kau mate.+ 25 Neʼe fakagafua e te ʼAtua ke matehi ia Sesu ʼuhi ko ʼatatou agahala+ pea neʼe ina fakatuʼuake ia ia ke feala hatatou faitotonu ia muʼa ʼo te ʼAtua.+

5 Koia ʼi te temi nei, ʼi tatatou kua faitotonu ia muʼa ʼo te ʼAtua ʼuhi ko tatatou tui,+ ke tou tokalelei* mo te ʼAtua ʼaki totatou ʼAliki ko Sesu Kilisito.*+ 2 ʼAki tatatou tui kia te ia, kua toe feala foki ke tou maʼu te ʼofa makehe ʼaia ʼae kua foaki mai ʼi te temi nei.+ Koia ke tou fiafia,* ʼuhi ko tatatou ʼamanaki ʼae ʼe foaki mai anai e te ʼAtua te kololia. 3 ʼO mole gata ai, tou fiafia* moka tou tau mo ni ʼahiʼahi,+ he ʼe tou iloʼi ka ʼahiʼahiʼi tatou ʼe tou ako ai te faʼa kataki,+ 4 pea ka tou faʼa kataki ʼe leleiʼia tatou e te ʼAtua,+ pea ka leleiʼia tatou e te ʼAtua ʼe tou maʼu ai te ʼamanaki.+ 5 ʼE feala ke tou falala moʼoni ki te ʼamanaki ʼaia ʼe tou maʼu,+ koteʼuhi kua fonu ʼotatou loto ʼi te ʼofa ʼo te ʼAtua ʼaki te laumalie maʼoniʼoni ʼae neʼe ina foaki mai.+

6 ʼE moʼoni, ʼi tatatou kei vaivai,+ neʼe mate ia Kilisito maʼa te hahaʼi ʼae neʼe mole fakaʼapaʼapa ki te ʼAtua ʼi te temi ʼae neʼe kua fakatuʼutuʼu ki ai. 7 ʼE tahitahiga anai te fia mate ʼa he tahi maʼa he tagata ʼe faitotonu. Kae ʼe lagi fia mate anai he tahi maʼa he tagata ʼe agalelei. 8 Kae ʼe fakaha mai e te ʼAtua ia tona ʼofa, ʼaki te mate ʼa Kilisito maʼa tatou ʼi tatatou kei agahala.+ 9 Koia ʼe tou tui papau ai ʼe haofaki anai tatou mai te hauhau ʼo te ʼAtua+ ʼuhi ʼae kua tou faitotonu ʼi ʼona muʼa ʼaki te taʼataʼa ʼo Kilisito.+ 10 Koteʼuhi kapau la, ʼi te temi ʼae neʼe ko tatou ko te ʼu fili ʼo te ʼAtua, kae kua tou fakatokatoka leva mo ia ʼaki te mate ʼo tona ʼAlo,+ pea ʼe toe feala foki ke tou tui papau ʼe haofaki anai tatou he ʼe kua maʼuli ia, pea kua tou fakatokatoka mo te ʼAtua ʼi te temi nei. 11 ʼE mole gata ai, kae ʼe tou toe fiafia foki ʼi te ʼAtua ʼaki totatou ʼAliki ko Sesu Kilisito, ia ia ʼae neʼe ina fakatokatoka ia tatou mo te ʼAtua ʼi te temi nei.+

12 Koia ʼaki te tagata pe ʼe tahi neʼe hu ai te agahala ki te malamanei, pea ʼaki te agahala ia te mate,+ ʼo mafola ai te mate ki te tagata fuli pe he neʼe natou agahala fuli.+ 13 Koteʼuhi neʼe kua maʼu ia te agahala ʼi te malamanei ʼi muʼa ʼo te foaki ʼo te Lao, kae kapau ʼe mole ʼi ai he lao, ʼe mole feala ke tukugakoviʼi he tahi takua neʼe ina fai he agahala.+ 14 Kae neʼe pule ia te mate ohage ko he hau mai ia Atama ʼo kaku kia Moisese, ʼo feia pe foki kia natou ʼae neʼe mole agahala ohage ko Atama. Neʼe hoko ia Atama kia ia ʼae neʼe tonu ke haʼu.+

15 Kae ʼe mole tatau ia te meʼa ʼofa pea mo te agahala. ʼAki te agahala ʼa te tagata pe ʼe tahi neʼe mamate ai te tokolahi. Kae ʼe lahi maumau te ʼu lelei ʼe maʼu e te tokolahi ʼuhi ko te ʼofa makehe ʼo te ʼAtua pea mo te meʼa ʼofa ʼae neʼe ina foaki noa ʼaki te ʼofa makehe ʼo te tagata pe ʼe tahi,+ ʼae ko Sesu Kilisito.+ 16 ʼE mole tatau foki ia te meʼa ʼofa pea mo te ʼu meʼa ʼae neʼe hoko ʼuhi ko te agahala ʼa te tagata pe ʼaia ʼe tahi.+ Koteʼuhi neʼe iku te agahala pe ʼe tahi ki te tautea ʼo te hahaʼi,+ kae ʼi te ʼosi fai e te hahaʼi tokolahi ni agahala, neʼe foaki e te ʼAtua te meʼa ʼofa ʼae neʼe iku ki tanatou faitotonu ʼi ʼona muʼa.+ 17 ʼAki te agahala ʼa te tagata pe ʼe tahi kua pule te mate ohage ko he hau.+ Koia, ʼe toe feala foki ke tou tui papau ʼaki te tagata pe ʼe tahi, ia Sesu Kilisito,+ ʼe maʼuʼuli pea mo pule anai ni hahaʼi ohage ko ni hau,+ koteʼuhi ʼe natou maʼu ia te ʼofa makehe ʼo te ʼAtua pea mo te meʼa ʼofa ʼae ʼe iku ki tanatou faitotonu ʼi ʼona muʼa.+

18 Koia ʼaki pe te agahala ʼe tahi kua tauteaʼi te faʼahiga hahaʼi kehekehe,+ ʼo toe feia aipe, ʼaki pe te gaue faitotonu ʼe tahi kua faitotonu ai te faʼahiga hahaʼi kehekehe+ ia muʼa ʼo te ʼAtua ʼo natou maʼu ai te maʼuli.+ 19 Koteʼuhi ʼaki te talagataʼa ʼa te tagata pe ʼe tahi kua agahala ai te hahaʼi tokolahi,+ ʼo toe feia aipe, ʼaki te fakalogo ʼa te tagata pe ʼe tahi ʼe faitotonu anai te hahaʼi tokolahi ia muʼa ʼo te ʼAtua.+ 20 Pea neʼe fakatuʼu te Lao ke tuputupu ai te agahala.+ Kae ʼi te tuputupu ʼo te agahala neʼe toe tuputupu ai foki te ʼofa makehe ʼo te ʼAtua. 21 Kotea tona ikuʼaga? Ohage ko te pule ʼa te agahala pea mo te mate ohage ko ni hau,+ ʼo toe feia aipe mo te ʼofa makehe, ʼe pule ohage ko he hau ʼaki te faitotonu ʼo iku ai ki te maʼuli heʼe gata, ʼaki ia Sesu Kilisito totatou ʼAliki.+

6 Kotea ʼae ka tou ui? ʼE tonu koa ke hoko atu tatatou fai ia te agahala ke tuputupu ai ia te ʼofa makehe? 2 Kailoa ia! Mai tona aluʼaga ʼae kua tou mamate ʼo ʼuhiga mo te agahala,+ ʼe lava feafeaʼi anai hatatou haga maʼuʼuli ʼi te agahala?+ 3 Peʼe mole kotou iloʼi ko tatou fuli ʼae neʼe papitema ia Kilisito* Sesu+ neʼe toe papitemaʼi foki mo tatou ʼi tona mate?+ 4 Koia neʼe tanu tatou fakatahi mo ia ʼaki tatatou papitema ʼi tona mate.+ Pea ʼe feala ai, ohage pe ko te fakatuʼuake ʼa Kilisito ʼaki te malohi* ʼo te Tamai, ke tou toe haʼele foki mo tatou ʼi he maʼuli ʼe foʼou.+ 5 Koteʼuhi kapau ʼe tou mamate ohage ko ia,+ ʼe mahino papau ia ʼe fakatuʼuake anai tatou ohage ko ia, pea ʼe tou fakatahi anai mo ia ʼi te ʼu aluʼaga ʼaia.+ 6 Koteʼuhi ʼe tou iloʼi neʼe tutuki fakatahi mo ia totatou ʼuluagaaga ʼafeā ki te pou,+ ke mole kei puleʼi tatou e totatou sino agahala,+ ʼo mole kei tou popula ai ki te agahala.+ 7 Koteʼuhi ko ia ʼae kua mate kua ʼateaina ia mai* tana agahala.

8 Pea tahi ʼae faʼahi, kapau kua tou mamate fakatahi mo Kilisito pea ʼe tou tui ʼe tou toe maʼuʼuli fakatahi anai mo ia. 9 Koteʼuhi ʼe tou iloʼi ko Kilisito ʼae kua fakatuʼuake,+ ʼe mole toe mate anai ia.+ Pea ʼe mole toe pule te mate kia te ia. 10 Koteʼuhi neʼe mate tuʼa tahi ʼo talu ai ke molehi ai te agahala,+ kae kua maʼuli ke feala hana fakahoko ia te finegalo ʼo te ʼAtua. 11 ʼE toe feia pe mo koutou, kotou manatuʼi kua kotou mamate ʼo ʼuhiga mo te agahala, kae ʼe kotou maʼuʼuli ke feala hakotou fakahoko ia te finegalo ʼo te ʼAtua ʼaki ia Kilisito Sesu.+

12 Koia ʼaua naʼa kotou tuku ke hoko atu te pule ʼa te agahala ohage ko he hau ki ʼokotou sino ʼae ka mate,+ ʼo kotou fakalogo ai ki ʼonatou holi. 13 Pea kotou fakagata takotou tuku ʼokotou sino* ki te agahala ohage ko ni meʼa gaue ʼo te heʼe faitotonu. Kae ke kotou tuku ia koutou totonu ki te ʼAtua ohage ko he hahaʼi kua fakamaʼuli mai te kau mate, pea kotou toe tuku foki mo ʼokotou sino* ki te ʼAtua ohage ko ni meʼa gaue ʼo te faitotonu.+ 14 Koteʼuhi ʼe mole tonu ke pule ia te agahala kia koutou, he ʼe mole kotou fakalogo ki te lao+ kae kua kotou maʼu ia te ʼofa makehe ʼo te ʼAtua.+

15 Koia kotea ʼae ka tou ui? ʼE tou fai anai koa he agahala he ʼe mole tou fakalogo ki te lao kae kua tou maʼu ia te ʼofa makehe ʼo te ʼAtua?+ Kailoa ia! 16 ʼE kotou iloʼi kapau ʼe kotou fakalogo tuʼumaʼu ki he tahi, ʼe kotou kaugana ki ai.+ Pea kapau ʼe kotou popula ki te agahala+ ʼe kotou mamate anai.+ Kae kapau ʼe kotou kaugana ki te ʼAtua pea mo fakalogo kia te ia, ʼe kotou faitotonu anai. 17 Kae ʼe au fakafetaʼi ki te ʼAtua, he ʼe logo la neʼe kotou popula ki te agahala ʼi te temi muʼa, kae kua kotou fakalogo leva mo he lotolelei ki te faʼahiga akonaki ʼae neʼe tuku atu kia koutou. 18 ʼEi, mai tona aluʼaga ʼae neʼe fakaʼateainaʼi koutou mai te agahala,+ kua kotou liliu ʼo kaugana ki te faitotonu.+ 19 ʼE au fakaʼaogaʼi he ʼu kupu ʼe mahino ki ai te hahaʼi ʼuhi ko te vaivai ʼo tokotou kakano. Koteʼuhi ohage pe ko takotou tuku ʼokotou sino* ke popula ki he ʼu aga ʼe heʼe maʼa pea mo he ʼu aga ʼe kovi ke kotou fai ai he ʼu meʼa ʼe kovi, ʼo toe feia aipe, ʼi te temi nei kotou tuku ʼokotou sino* ke kaugana ki te faitotonu ke iku ai ki te maʼoniʼoni.+ 20 Koteʼuhi ʼi te temi ʼae neʼe kotou popula ai ki te agahala, neʼe mole fakamaʼua atu ke kotou fai te meʼa ʼae ʼe faitotonu.

21 Pea ʼi te temi ʼaia, neʼe kotea koa te fua ʼo te ʼu aga ʼae neʼe kotou fai? Neʼe ko he ʼu meʼa ʼe kotou ufiufi ai ʼi te temi nei. Koteʼuhi ʼe iku te ʼu meʼa ʼaia ki te mate.+ 22 Kae ʼi te kua fakaʼateainaʼi koutou mai te agahala pea mo kotou kaugana ki te ʼAtua, ʼe kotou maʼu ai te fua ʼae ko te maʼoniʼoni,+ pea ʼe iku ai ki te maʼuli heʼe gata.+ 23 Koteʼuhi ko te totogi ʼo te agahala ʼe ko te mate,+ kae ko te meʼa ʼofa ʼae ʼe foaki e te ʼAtua ʼe ko te maʼuli heʼe gata+ ʼaki ia Kilisito Sesu totatou ʼAliki.+

7 ʼU tehina, (ʼe au palalau ki he hahaʼi kua natou iloʼi ia te lao) pe ʼe mole kotou iloʼi koa ʼe pule te Lao ki he tagata ʼi te temi ʼae ʼe kei maʼuli ai? 2 Ohage la, ʼo mulimuli ki te Lao, ʼe haʼi he fafine ki tona ʼohoana ʼi te temi ʼae ʼe kei maʼuli ai. Kae kapau ʼe mate tona ʼohoana, kua ʼateaina ia mai te lao ʼo tona ʼohoana.+ 3 Koia kapau ʼe ʼohoana ia te fafine ʼaia mo he tahi age tagata kae ʼe kei maʼuli pe ia tona ʼohoana, ʼe tono ia.+ Kae kapau ʼe mate tona ʼohoana, kua ʼateaina ia mai tana lao, pea ʼe mole tono ia mo kapau ʼe ʼohoana mo he tahi age tagata.+

4 ʼE toe feia foki mo koutou, ʼoku tehina, neʼe kotou haʼisia ki te Lao, kae ʼaki te sakilifisio ʼo Kilisito,* kua kotou ʼateaina mai ai,+ ke feala hakotou fakalogo kia ia ʼae neʼe fakatuʼuake mai te kau mate.+ ʼE feala ai leva ke tou maʼu he fua ʼe tuha mo te ʼAtua.+ 5 Koteʼuhi ʼi te temi ʼae neʼe tou maʼuʼuli ai ʼo mulimuli ki te kakano, neʼe gaue ʼi ʼotatou sino* te ʼu holi kovi ʼae neʼe fakaha e te Lao, ʼo tou maʼu ai te fua ʼae ʼe iku ki te mate.+ 6 Kae ʼi te temi nei, kua fakaʼateainaʼi tatou mai te Lao+ he ʼe mole kei ina taʼofi tatou. ʼE feala ai ke tou kaugana ki te ʼAtua ʼi hona aluʼaga foʼou, ʼaki te laumalie+ kae mole ʼaki te Lao ohage ko te temi muʼa.+

7 Kotea ʼae ka tou ui? ʼE kovi koa te Lao? Kailoa ia! Neʼe mole feala ke au iloʼi ia te agahala mo ka na pau la neʼe mole ʼi ai te Lao.+ Ohage la, neʼe mole feala ke au iloʼi ʼe kovi ia te lotomanumanū mo ka na pau la neʼe mole ui ʼi te Lao: “ ʼE mole tonu ke ke manumanū.”+ 8 Kae ʼuhi ko te fakatotonu ʼaia, neʼe feala ai ki te agahala ke ina fakatuputupu ia au te ʼu faʼahiga manumanū kehekehe, koteʼuhi ʼi te temi ʼae neʼe heʼeki ʼi ai te lao neʼe mate te agahala.+ 9 ʼI tona fakahagatonu, ʼi te temi ʼae neʼe heʼeki ʼi ai te Lao, neʼe au maʼuli. Kae ʼi te temi ʼae neʼe foaki ai te Lao, neʼe toe maʼuli ia te agahala, kae neʼe au mate au.+ 10 Koia neʼe mahino kia au ko te Lao ʼae neʼe tonu ke ina taki ki te maʼuli,+ neʼe ina taki ia ki te mate. 11 ʼUhi ko te Lao, neʼe fakahalaʼi mo matehi au e te agahala. 12 Koia ko te Lao ʼe maʼoniʼoni pea ko te ʼu fakatotonu ʼa te ʼAtua ʼe maʼoniʼoni, mo faitotonu pea mo lelei.+

13 Koia ko te meʼa koa ʼae ʼe lelei ʼae neʼe ina taki ai au ki te mate? Kailoa ia, kae neʼe ko te agahala. ʼE lelei te Lao kae neʼe ina fakaha ʼe ko te agahala ʼae neʼe ina taki au ki te mate.+ Koia neʼe fakaha e te Lao ʼe kovi ʼaupito ia te agahala.+ 14 Koteʼuhi ʼe tou iloʼi ʼe haʼu te Lao mai te ʼAtua, kae ʼe au kakano pea neʼe fakatau au ke au popula ki te agahala.+ 15 Pea ʼe mole au mahino ki te meʼa ʼae ʼe au fai. Koteʼuhi ʼe mole au fai te meʼa ʼae ʼe au loto ki ai, kae ʼe au fai te meʼa ʼae ʼe au fehiʼa ki ai. 16 Kae kapau ʼe au fai te meʼa ʼae ʼe mole au loto ki ai, ʼe au fakamoʼoni ai ko te Lao ʼe lelei. 17 Koia ʼe mole ko au ʼae ʼe ina fai te faʼahi ʼaia, kae ʼe ko te agahala ʼae ʼe nofo ia au.+ 18 Koteʼuhi ʼe au iloʼi ʼe mole he meʼa ʼe lelei ʼe nofo ia au, ʼi toku kakano, he ʼe au fia fai te meʼa ʼae ʼe lelei kae ʼe mole feala ke au fai te faʼahi ʼaia.+ 19 Pea ʼe mole au fai te lelei ʼae ʼe au loto ki ai, kae ʼe au fai te kovi ʼae ʼe mole au loto ki ai. 20 Pea kapau ʼe au fai te meʼa ʼae ʼe mole au loto ki ai, ʼe mole ko au ʼae ʼe ina fai te faʼahi ʼaia, kae ʼe ko te agahala ʼae ʼe nofo ia au.

21 Koia ʼi toku faʼahi ʼe au maʼu ia te lao ʼaeni: Moka ʼe au fia fai te meʼa ʼae ʼe lelei, ʼe ko te meʼa ʼae ʼe kovi ʼe nofo ia au.+ 22 ʼE au leleiʼia moʼoni ia te lao ʼa te ʼAtua ʼi toku loto,+ 23 kae ʼe au sio ʼi toku sino* ki he tahi age lao ʼe fakafeagai ki te lao ʼo toku ʼatamai.+ Ko te lao ʼaia ʼe ko te agahala ʼae ʼi toku sino* pea ʼe ina puleʼi au.+ 24 Ko au ko he tagata fakaʼofaʼofa! Ko ai ʼae ka ina haofaki au mai te sino ʼaeni ʼe ina taki au ki te mate? 25 ʼE au fakafetaʼi ki te ʼAtua ʼaki ia Sesu Kilisito totatou ʼAliki! Koia ʼi toku ʼatamai ʼe au kaugana ki te lao ʼa te ʼAtua, kae ʼi toku kakano ki te lao ʼo te agahala.+

8 Koia ʼe mole tautea ia natou ʼae ʼe fakatahi mo Kilisito* Sesu. 2 Koteʼuhi ko te lao ʼo te laumalie ʼo te ʼAtua ʼae ʼe ina foaki te maʼuli ʼaki ia Kilisito Sesu, ʼe ina fakaʼateainaʼi koe+ mai te lao ʼo te agahala pea mo te mate. 3 Ko te meʼa ʼae neʼe mole feala ke fai e te Lao+ ʼuhi ko te vaivai+ ʼo te kakano, neʼe fai ia e te ʼAtua, ʼaki tana fekauʼi mai tona ʼAlo+ ʼae neʼe liliu ko he tagata,*+ ke pulihi ai ia te agahala. Pea neʼe ina tauteaʼi ai ia te agahala ʼae ʼe ʼi te kakano, 4 ke feala ke tou fakahoko ia te ʼu fakamaʼua faitotonu ʼo te Lao+ he ʼe mole tou haʼele ʼo mulimuli ki te kakano, kae ʼo mulimuli ki te laumalie ʼo te ʼAtua.+ 5 Koteʼuhi ko natou ʼae ʼe maʼuʼuli ʼo mulimuli ki te kakano ʼe natou manatu ki te ʼu holi ʼo te kakano,+ kae ko natou ʼae ʼe maʼuʼuli ʼo mulimuli ki te laumalie ʼo te ʼAtua, ʼe natou manatu ki te ʼu meʼa ʼo te laumalie ʼo te ʼAtua.+ 6 Koteʼuhi ko te manatu ki te kakano ʼe iku ia ki te mate,+ kae ko te manatu ki te laumalie ʼo te ʼAtua ʼe iku ia ki te maʼuli pea mo te tokalelei.+ 7 Koteʼuhi ko natou ʼae ʼe manatu ki te kakano ʼe ko he ʼu fili ia ʼo te ʼAtua,+ he ʼe mole fakalogo te kakano ki te lao ʼa te ʼAtua, pea ʼe mole feala ia. 8 Koia ko natou ʼae ʼe mulimuli ki te kakano ʼe mole feala ia ke leleiʼia natou e te ʼAtua.

9 Kae kapau ʼe nofo moʼoni te laumalie ʼo te ʼAtua ia koutou, pea ʼe mole kotou mulimuli ki te kakano,+ kae ki te laumalie. Kae kapau ʼe mole maʼu e he tahi ia te faʼahiga manatu* ʼa Kilisito, ʼe mole fakalogo ia kia Kilisito. 10 Kae kapau ʼe kotou fakatahi mo Kilisito,+ ko te sino ʼe mate ʼuhi ko te agahala, kae ʼe foaki e te laumalie ia te maʼuli ʼuhi ʼe kotou faitotonu ia muʼa ʼo te ʼAtua. 11 Pea kapau ʼe nofo ia koutou ia te laumalie ʼo ia ʼae neʼe ina fakatuʼuake ia Sesu,+ pea ʼe ina toe fakamaʼuli anai foki mo ʼokotou sino ʼae ka mate,+ ʼaki tona laumalie ʼae ʼe nofo ia koutou.

12 Koia ʼu tehina, ʼe ʼi ai te meʼa ʼe maʼua ke tou fai, kae ʼe mole maʼua ke tou fakalogo ki te ʼu holi ʼo te kakano.+ 13 Koteʼuhi kapau ʼe kotou maʼuʼuli ʼo mulimuli ki te kakano, ʼe kotou mamate moʼoni anai. Kae kapau ʼe kotou tamateʼi te ʼu gaue ʼo te kakano+ ʼaki te tokoni ʼa te laumalie ʼo te ʼAtua, ʼe kotou maʼuʼuli anai.+ 14 Koteʼuhi ko natou fuli ʼae ʼe takitaki e te laumalie ʼo te ʼAtua ʼe ko te ʼu foha ia ʼo te ʼAtua.+ 15 Neʼe mole foaki atu he laumalie ke kotou liliu ai ʼo kaugana pea mo kotou toe matataku. Kae neʼe foaki atu he laumalie ke kotou liliu ai ko he ʼu foha neʼe vaheʼi, pea ʼaki te laumalie ʼaia, ʼe tou kalaga ai: “Apa,* Tamai!”+ 16 ʼE fakamoʼoni lelei mai kia tatou* e te laumalie ʼo te ʼAtua+ ko tatou ʼe ko he ʼu fanau ʼa te ʼAtua.+ 17 Pea kapau ko tatou ko ʼana fanau, ʼe tou toe maʼu tofiʼa foki, ʼe ko he tofiʼa mai te ʼAtua kae tou kaugā maʼu tofiʼa+ mo Kilisito. Kapau ʼe tou mamahi fakatahi mo ia,+ pea ʼe toe fakakololiaʼi fakatahi anai ia tatou mo ia.+

18 Koteʼuhi kia au, ko te ʼu mamahi ʼo te temi ʼaeni ʼe ko he ʼu meʼa noa ia moka ʼe au fakatatau ki te kololia ʼae ka ha ia tatou.+ 19 Koteʼuhi ʼe fakaatalitali te fakatupu mo he fakaʼamu lahi ki te fakaha ʼo te ʼu foha ʼo te ʼAtua.+ 20 Koteʼuhi neʼe tuku te fakatupu ki te vaʼiganoa,+ kae neʼe mole loto ia ki ai. ʼE ko te ʼAtua ʼae neʼe ina tuku ki te vaʼiganoa pea mo ina toe foaki mo te ʼamanaki 21 ʼae ʼe toe fakaʼateaina anai mo te fakatupu+ mai te popula ki te agahala mo te mate, pea mo natou maʼu te ʼateaina fakakololia ʼo te ʼu fanau ʼa te ʼAtua. 22 Koteʼuhi ʼe tou iloʼi ʼe haga lauga pea mo mamahi fakatahi ia te fakatupu katoa, ʼo kaku mai ki te temi nei. 23 Kae mole gata ai, ʼe tou toe maʼu foki te ʼu ʼuluaki fua, ko tona fakaʼuhiga, ia te laumalie maʼoniʼoni. Pea ʼe tou toe lauga ʼi ʼotatou loto+ ʼi tatatou fakaatalitali mo he fakaʼamu lahi ke tou liliu ko he ʼu foha neʼe vaheʼi,+ ke fakaʼateainaʼi tatou mai ʼotatou sino ʼaki te totogi.* 24 Koteʼuhi neʼe haofaki tatou ʼi tatatou ʼamanaki ʼaia. Kae ko te ʼamanaki ʼae ʼe kita sio ki ai ʼe mole ko he ʼamanaki ia, koteʼuhi ka sio he tagata ki he meʼa, ʼe kei ʼamanaki koa ki ai? 25 Kae kapau ʼe tou ʼamanaki+ ki he meʼa ʼe mole tou sisio ki ai,+ ʼe tou haga fakaatalitali anai ki ai mo he fakaʼamu lahi pea mo he faʼa kataki.+

26 ʼE toe feia aipe, ʼe tokoni mai te laumalie maʼoniʼoni moka tou vaivai.+ Koteʼuhi ka tonu ke tou faikole, ʼe mole tou iloʼi te ʼu meʼa ʼae ʼe tonu ke tou faikole ki ai, kae ka tou lauga ʼi ʼotatou loto pea ko te laumalie ʼae ʼe ina hufakiʼi tatou. 27 Pea ko ia ʼae ʼe ina vakavakaʼi ia te ʼu loto,+ ʼe ina iloʼi te fakaʼuhiga ʼo te meʼa ʼae ʼe kole e te laumalie, koteʼuhi ʼe hufakiʼi e te laumalie ia te kau maʼoniʼoni ʼo mulimuli ki te finegalo ʼo te ʼAtua.

28 ʼE tou iloʼi ʼe fakatuʼutuʼu lelei e te ʼAtua ʼana gaue fuli ke fua lelei kia natou ʼae ʼe ʼoʼofa kia te ia, ia natou ʼae neʼe pauʼi ʼo mulimuli ki tona finegalo.+ 29 Koteʼuhi neʼe ina toe fakatuʼutuʼu fakatomuʼa foki ia natou ʼae neʼe ina ʼuluaki tokagaʼi ke natou faʼifaʼitakiʼi ia tona ʼAlo,+ ke liliu ai tona ʼAlo ko te ʼuluaki tupu+ ʼi te ʼu tehina ʼe tokolahi.+ 30 Pea ko natou ʼae neʼe ina fakatuʼutuʼu fakatomuʼa,+ neʼe ina toe pauʼi foki ia natou ʼaia.+ Pea ko natou ʼae neʼe ina pauʼi, neʼe natou faitotonu ʼi ʼona muʼa.+ Pea ko natou ʼae neʼe faitotonu ʼi ʼona muʼa, neʼe ina toe fakakololiaʼi foki ia natou ʼaia.+

31 Kotea ʼae ka tou ui ʼo ʼuhiga mo te ʼu meʼa ʼaia? Kapau ʼe kau ia te ʼAtua mo tatou, ko ai ʼae ka malo ia tatou?+ 32 Neʼe mole ina fakahao tona ʼAlo totonu kae neʼe ina tuku ia ke mate maʼa tatou fuli.+ Koia ʼe mole toe lotolelei anai koa te ʼAtua ke ina foaki mai kia tatou te ʼu meʼa fuli ʼae? 33 Ko ai koa ʼae ʼe feala ke ina tukugakoviʼi ia natou ʼae neʼe filifili e te ʼAtua?+ ʼE mole he tahi, koteʼuhi ʼe ko te ʼAtua ʼae ʼe ina tala ʼe natou faitotonu.+ 34 Ko ai koa ʼae ʼe feala ke ina tauteaʼi ia natou ʼaia? ʼE mole he tahi, koteʼuhi neʼe mate ia Kilisito Sesu, neʼe fakatuʼuake, pea ʼe nofo ʼi te toʼomataʼu ʼo te ʼAtua+ pea ʼe ina hufakiʼi tuʼumaʼu ia tatou.+

35 Kotea ʼae ka ina fakamavae tatou mai te ʼofa ʼo Kilisito?+ Ko te mamahi koa, peʼe ko te tuʼania, peʼe ko te fakataga, peʼe ko te fia kai, peʼe ko te masiva ʼi te meʼa laofi, peʼe ko te tuʼutamakiʼia, peʼe ko te heleta?+ 36 Ohage pe ko tona tohi: “ ʼE matou tauʼi te mate ʼi te ʼaho fuli, he ʼe matou tauhi kia te koe, pea kua matou hage ko he ʼu ovi ʼe ʼave ke matehi.”+ 37 Kae ʼaki te tokoni ʼo ia ʼae ʼe ʼofa kia tatou, ʼe tou malo katoa ʼi te ʼu meʼa ʼaia.+ 38 Koteʼuhi ʼe au tui papau ʼe mole ko te mate, peʼe ko te maʼuli, peʼe ko te ʼu ʼaselo, peʼe ko te ʼu puleʼaga, peʼe ko te ʼu meʼa ʼo te temi ʼaeni, peʼe ko te ʼu meʼa ka hoko mai, peʼe ko te ʼu malohi,+ 39 peʼe ko te maʼoluga, peʼe ko te loloto, peʼe ko he tahi age meʼa neʼe fakatupu ʼe feala anai ke ina fakamavae tatou mai te ʼofa ʼo te ʼAtua, ʼae ia Kilisito Sesu totatou ʼAliki.

9 ʼE au fakaha ia te moʼoni ʼi toku ʼuhiga tisipulo ʼa Kilisito,* ʼe mole au loi. ʼE fakamoʼoni toku leʼo ʼo loto ʼae ʼe takitaki e te laumalie maʼoniʼoni ki te faʼahi ʼaeni: 2 ʼe au lotomamahi ʼaupito pea mo lotohoha tuʼumaʼu. 3 ʼE au lotolelei ke au fakamamaʼo mai ia Kilisito ohage ko he tagata malaʼia, mo kapau ʼe feala ke au tokoni ki ʼoku tehina, te hahaʼi ʼo toku lanu, 4 te kau Iselaele. Neʼe ko he ʼu foha neʼe vaheʼi,+ pea neʼe foaki age kia natou te kololia, mo te ʼu fuakava,+ mo te Lao,+ mo te tauhi taputapu+ pea neʼe fai kia natou te ʼu fakapapau.+ 5 Pea ʼe natou toe hihifo mai te ʼu kui ʼae neʼe hifo mai ai ia Kilisito.+ Ke fakavikiviki ʼo talu ai ki te ʼAtua, ʼae ʼe maʼoluga ia meʼa fuli. Ameni.

6 Kae ʼe mole tou ui leva neʼe to noa te folafola ʼa te ʼAtua. Koteʼuhi ʼe mole ko natou fuli ʼae ʼe hihifo mai ia Iselaele ʼae ʼe ko he kau Iselaele moʼoni.+ 7 Pea logo la ko natou ko te hakoga ʼo Apalahamo kae ʼe mole ko ʼana fanau fuli.+ Ohage ko tona tohi: “Ko natou ʼae ka fakahigoaʼi ko tou hakoga ʼe natou hifo anai mai ia Isaake.”+ 8 Ko tona fakaʼuhiga, ko te ʼu fanau ʼae neʼe hihifo mai ia Apalahamo, ʼe mole ko te ʼu fanau moʼoni ʼa te ʼAtua.+ Kae ko te ʼu fanau ʼo te fakapapau+ ʼe kau ki te hakoga ʼo Apalahamo. 9 Pea neʼe fenei ia te fakapapau: “ ʼI te taʼu ka haʼu, ʼi te temi pe ʼaeni, ʼe au toe liliu mai anai, pea ʼe maʼu anai e Sala hana tamasiʼi tagata.”+ 10 Kae neʼe mole gata ai, he neʼe toe faitama ia Lepeka kia Isaake, tatatou kui, ʼo ina fuafatuʼi ai te mahagā.+ 11 Koteʼuhi ʼi te temi ʼae neʼe heʼeki nā tutupu ake ai pea neʼe heʼeki nā fai he meʼa ʼe lelei peʼe kovi, neʼe kua ʼosi fakatuʼutuʼu e te ʼAtua ia ia ʼae ka ina filifili. ʼE fakamoʼoni ai e te ʼAtua ʼe ina filifili ia ia ʼae ʼe loto ki ai kae ʼe mole mulimuli ki te ʼu gaue ʼae ʼe fai e te tagata. 12 Koia neʼe ui ai kia Lepeka: “Ko ʼae ʼe lahi ʼe kaugana anai ki ʼae ʼe veliveli.”+ 13 Pea ohage pe ko tona tohi: “Neʼe au ʼofa ia Sakopo, kae neʼe au fehiʼa ia Esau.”+

14 Kotea ʼae ka tou ui? ʼE heʼe faitotonu koa ia te ʼAtua? Kailoa ia!+ 15 Koteʼuhi neʼe ina ui kia Moisese: “ ʼE au ʼofa anai kia ia ʼae ʼe au loto ke au ʼofa ki ai, pea ʼe au manavaʼofa anai kia ia ʼae ʼe au loto ke au manavaʼofa ki ai.”+ 16 Koia ʼe fakalogo te filifili ʼa te ʼAtua ki tona manavaʼofa kae mole ki te meʼa ʼae ʼe loto ki ai he tahi peʼe ki ʼana faiga.*+ 17 Koteʼuhi ʼi te ʼu Tohi Taputapu neʼe ui e te ʼAtua kia Falaone: “Neʼe au tuku ke ke maʼuli ʼuhi ko te faʼahi ʼaeni: ke au fakaʼaogaʼi koe ke fakaha toku mafimafi pea ke tala toku huafa ʼi te kele katoa.”+ 18 Koia ʼe manavaʼofa ia ki ʼae ʼe loto ki ai, kae ʼe ina tuku ʼihi ke natou uigataʼa.+

19 Pea ʼe ke ui mai anai: “He koʼe ʼe valokiʼi tatou e te ʼAtua? Ko ai ʼae ʼe feala ke fakafeagai ki tona finegalo?” 20 Kae tagata, ko ai koa ia koe ke ke fakafifihi ki te ʼAtua?+ ʼE ui anai koa e te ipu kele ki ʼae neʼe ina faʼu ia ia: “He koʼe neʼe ke faʼu feiaʼi au?”+ 21 ʼE mole pule koa la te tagata faʼu ipu kele ki te moʼi kele?+ ʼE mole feala koa la ke ina faʼu ʼaki te moʼi kele ʼaia te ipu ki he gaue maʼuhiga mo te tahi ipu ki he gaue ʼe mole maʼuhiga? 22 Pea kapau neʼe fia fakaha e te ʼAtua tona hauhau mo tona malohi, kae neʼe ina katakiʼi fualoa te ʼu ipu ʼo te hauhau ʼae ʼe tuha mo te fakaʼauha, kotea ʼae ka tou ui? 23 Pea neʼe ina fai te faʼahi ʼaia moʼo fakaha te lahi ʼo tona kololia ki te ʼu ipu ʼo te manavaʼofa,+ ʼae kua ina teuteuʼi fakatomuʼa ke natou maʼu ia te kololia. 24 Ko tatou ia te ʼu ipu ʼaia, ʼae neʼe ina pauʼi mai te lotolotoiga ʼo te kau Sutea pea mo te hahaʼi ʼae ʼe mole Sutea.+ Kapau neʼe ko tona loto ʼaia, pea kotea ʼae ka tou ui? 25 ʼE hage ko tona toe ui ʼi te tohi ʼa Oseo: “Ko natou ʼae neʼe mole ko taku hahaʼi,+ ʼe au fakahigoaʼi anai natou ko ‘taku hahaʼi,’ pea ko te fafine ʼae neʼe mole au ʼofa ki ai, ʼe au fakahigoaʼi anai ko ‘ ʼofaina.’+ 26 Pea ʼi te koga meʼa ʼae neʼe au ui age kia natou: ‘ ʼE mole ko koutou taku hahaʼi,’ ʼe au fakahigoaʼi anai natou ʼi ai ‘ko te ʼu foha ʼo te ʼAtua maʼuli.’ ”+

27 Pea tahi ʼae meʼa, neʼe kalaga ia Esaia ʼo ʼuhiga mo Iselaele: “Logo la te kaugamalie ʼo te ʼu foha ʼo Iselaele ohage ko te ʼu fisiʼi ʼone ʼo te tai, kae ʼe ko he tokosiʼi pe anai ka haofaki.+ 28 Koteʼuhi ʼe fakamauʼi anai e Sehova* ia te kele, ʼo ina fai ʼo kaku ki tona fakaʼosi pea mo fakanounou.”*+ 29 Pea ohage pe ko tona fakakikite e Esaia: “Ka na pau la neʼe mole tuku mai e Sehova* ʼo te ʼatu kautau ia he hakoga kia tatou, ka na ʼaua la kua matou hage nei ko te hahaʼi ʼo Sotoma pea mo te hahaʼi ʼo Komola.”+

30 Kotea ʼae ka tou ui? Logo la neʼe mole faigaʼi e te hahaʼi ʼo te ʼu puleʼaga ke natou faitotonu,+ kae kua natou faitotonu ia muʼa ʼo te ʼAtua ʼuhi ko tanatou tui.+ 31 Kae ko Iselaele neʼe mole natou fakahoko ia te lao, logo la tanatou faigaʼi ke natou faitotonu ʼo mulimuli ki te lao ʼaia. 32 Kotea tona tupuʼaga? Koteʼuhi neʼe natou faigaʼi ke natou faitotonu, mole ʼaki te tui, kae ʼaki ni gaue. Neʼe natou tukia ai ʼi “te maka fakatupu tukia,”+ 33 ohage ko tona tohi: “ ʼE au fakatuʼu ʼi Sione he maka+ fakatupu tukia pea mo he ʼutu ke natou tukia ai, kae ko ʼae ʼe tui ki ai, ʼe mole lotomamahi anai.”+

10 ʼU tehina, ko te faʼahi ʼaeni ʼe au fakaʼamu ki ai ʼi toku loto pea mo au kolekole ki te ʼAtua ʼo ʼuhiga mo te kau Iselaele: ke haofaki natou.+ 2 Koteʼuhi ʼe au fakamoʼoni ʼe natou faʼafai ʼi tanatou tauhi ki te ʼAtua,+ kae ʼe mole alu tahi ia mo te ʼatamai malama totonu. 3 ʼI tanatou mole iloʼi te faitotonu ʼa te ʼAtua+ pea mo natou faigaʼi ke fakatuʼu tanatou faitotonu,+ neʼe mole natou fakalogo ai ki te faitotonu ʼa te ʼAtua.+ 4 Ko Kilisito* ʼe ko te fakaʼosiʼaga ʼo te Lao.+ Koia ko ʼae ʼe tui kia te ia, ʼe liliu anai ʼo faitotonu ia muʼa ʼo te ʼAtua.+

5 Koteʼuhi neʼe tohi e Moisese ʼo ʼuhiga mo te faitotonu ʼa he tahi ʼaki te Lao: “Ko te tagata ʼae ʼe ina fai te ʼu meʼa ʼaia ʼe maʼuli anai.”+ 6 Kae ʼe toe ui foki ʼi te ʼu Tohi Taputapu ʼo ʼuhiga mo ia ʼae kua liliu ʼo faitotonu ʼuhi ko tana tui: “ ʼAua naʼa ke ui ʼi tou loto:+ ‘Ko ai anai ka hake ki selo?’+ ko tona fakaʼuhiga moʼo fakahifo mai ia Kilisito, 7 peʼe, ‘Ko ai anai ka hifo ki te vanu?’+ ko tona fakaʼuhiga moʼo fakahake ake ia Kilisito mai te kau mate.” 8 Kae kotea ʼae ʼe ui ʼi te ʼu Tohi Taputapu? ʼE ui ai: “ ʼE ovi atu te folafola kia koe, ʼi tou gutu pea mo tou loto.”+ ʼE ko “te folafola” ʼaia ʼo te tui, ʼae ʼe tou fakamafola. 9 Koteʼuhi kapau, ʼaki tou gutu, ʼe ke tala ia muʼa ʼo te hahaʼi ʼe ko Sesu te ʼAliki+ pea mo ke tui ʼi tou loto neʼe fakatuʼuake ia ia e te ʼAtua mai te kau mate, ʼe haofaki anai koe. 10 Koia ʼe faitotonu he tahi ia muʼa ʼo te ʼAtua mo kapau ʼe tui ʼi tona loto, kae ʼe haofaki anai ia mo kapau ʼe ina tala ʼaki tona gutu te logo ʼaia ia muʼa ʼo te hahaʼi.+

11 Koteʼuhi ʼe ui ʼi te vaega ʼo te ʼu Tohi Taputapu: “Ko ʼae ʼe tui kia te ia, ʼe mole lotomamahi anai.”+ 12 He ʼe mole he kehekehe ʼo te kau Sutea pea mo te kau Keleka.+ ʼE pule ia ki te hahaʼi fuli pea ʼe lotofoaki kia natou ʼae ʼe fetapa kia te ia. 13 Koteʼuhi “ ʼe haofaki anai ia natou fuli ʼae ʼe fetapa ki te huafa ʼo Sehova.”*+ 14 Kae ʼe feafeaʼi anai hanatou fetapa kia te ia mo kapau ʼe mole natou tui kia te ia? Pea ʼe feafeaʼi anai hanatou tui kia ia ʼae ʼe mole natou iloʼi? Pea ʼe feafeaʼi anai hanatou iloʼi ia ia mo kapau ʼe mole he tahi ʼe faifakamafola? 15 Pea ʼe feafeaʼi anai hanatou faifakamafola mo kapau neʼe mole fekauʼi natou?+ Ohage ko tona tohi: “ ʼI matalelei leva te ʼu vaʼe ʼo natou ʼae ʼe natou tala te logo lelei ʼo he ʼu meʼa ʼe lelei!”+

16 Kae neʼe mole natou fakalogo fuli ki te logo lelei. He neʼe ui e Esaia: “Sehova,* ko ai koa ʼae neʼe tui ki te logo ʼae neʼe matou tala?”+ 17 Koia ʼe tupu te tui mai te meʼa ʼae neʼe kita logo ki ai.+ Pea kapau neʼe kita logo ki ai ko tona fakaʼuhiga neʼe palalau he tahi ʼo ʼuhiga mo Kilisito. 18 Kae ʼe au fakalavelave atu: Neʼe mole koa la natou logo ki ai? ʼEi, “ ʼi te kele katoa kua fakaha tanatou fakamoʼoni, pea neʼe kaku tanatou logo ki te ʼu potu taupotu ʼo te kele.”+ 19 Kae ʼe au fakalavelave atu: Neʼe mole iloʼi lelei koa la e Iselaele?+ ʼUluaki, neʼe fakaha e Moisese te ʼu folafola ʼaeni ʼa te ʼAtua: “ ʼE au fakatupu anai tokotou maheka ʼaki he hahaʼi ʼe mole ko he puleʼaga. ʼE au fakatupu anai tokotou ita lahi ʼaki he puleʼaga ʼe vale.”+ 20 Pea neʼe lototoʼa ia Esaia ʼo ina fakaha te ʼu folafola ʼaeni ʼa te ʼAtua: “Neʼe maʼu au e natou ʼae neʼe mole natou kumi au.+ Neʼe iloʼi au e natou ʼae neʼe mole natou fakafehuʼi au.”+ 21 Kae neʼe ina ui ʼo ʼuhiga mo Iselaele: “ ʼI te ʼaho katoa, ʼe au faoʼi ʼoku nima ki he hahaʼi talagataʼa pea mo uigataʼa.”+

11 Pea ʼe au fakalavelave atu: Neʼe liʼaki koa e te ʼAtua tana hahaʼi?+ Kailoa ia! Koteʼuhi ko au foki ko te tagata Iselaele, mai te hakoga ʼo Apalahamo, mai te telepi ʼo Pesamino. 2 Koia neʼe mole liʼaki e te ʼAtua tana hahaʼi ʼae neʼe ina ʼuluaki tokagaʼi.+ ʼE mole kotou iloʼi koa la te meʼa ʼae ʼe ui ʼi te vaega ʼo te ʼu Tohi Taputapu ʼo ʼuhiga mo te polofeta ko Elia, ʼi tana faikole ki te ʼAtua ʼo meo ʼo ʼuhiga mo te kau Iselaele? 3 Neʼe ina ui: “Sehova,* neʼe natou matehi ʼau polofeta, mo natou tokatokahi ʼou ʼaletale. Ko au tokotahi pe ʼae ʼe kei toe, pea ʼe natou faigaʼi ke natou matehi au.”+ 4 Kae kotea ʼae neʼe tali age e te ʼAtua ki ai? “ ʼE kei toe ʼaku tagata ʼe toko 7000 neʼe mole natou tuʼutuli ia muʼa ʼo Paale.”+ 5 ʼE toe feia aipe ʼi te temi nei, ʼe ʼi ai te hahaʼi+ neʼe filifili e te ʼAtua ʼuhi ko tona ʼofa makehe. 6 Koia neʼe ina filifili natou ʼuhi ko tona ʼofa makehe+ kae mole ʼuhi ko ʼanatou gaue.+ He ʼe ka na pau la neʼe filifili natou ʼuhi ko ʼanatou gaue, pea ko te ʼofa makehe ʼe mole kei ʼofa makehe ia.

7 Kotea ʼae ka tou ui? Ko te meʼa ʼae neʼe kumi fakamalotoloto e te kau Iselaele neʼe mole maʼu e natou fuli, kae neʼe maʼu ia e natou ʼae neʼe filifili.+ Ko natou ʼae, neʼe mole natou fia fakalogo,+ 8 ohage ko tona tohi: “Neʼe tuku e te ʼAtua ke natou maʼumoea ʼi te faʼahi fakalaumalie,+ neʼe ina foaki kia natou he ʼu mata ʼe mole sisio pea mo he ʼu taliga ʼe mole logo, ʼo kaku mai ki te ʼaho nei.”+ 9 Pea neʼe toe ui e Tavite: “Ke hage tonatou laupapa ko he hele, mo he kupega, mo he meʼa fakatupu tukia pea ke tauteaʼi natou. 10 Ke nenefu ʼonatou mata ke ʼaua naʼa sisio, pea ke piko tuʼumaʼu ʼonatou tuʼa.”+

11 Koia ʼe au fakalavelave atu: Neʼe natou tukia koa pea mo fetokaʼi? Kailoa ia. Kae ʼuhi ko tanatou agahala, ʼe haofaki ai te hahaʼi ʼae ʼe mole Sutea, ke tupu ai hanatou maheheka.+ 12 Kapau ʼi tanatou agahala, neʼe tapuakina ai ia te malamanei, pea kapau ʼi tanatou tokosiʼi age neʼe tapuakina ai ia te hahaʼi ʼae ʼe mole Sutea,+ pea ʼe mahino ia ʼe lahi age anai te ʼu tapuakina moka natou katoa fuli.

13 ʼI te temi leva ʼaeni, ʼe au palalau atu kia koutou, hahaʼi ʼae ʼe mole Sutea. Mai tona aluʼaga ʼae ko au ko te apositolo neʼe fekauʼi ki te ʼu puleʼaga kehekehe,+ koia ʼe au fakakololiaʼi ai* taku minisitelio,+ 14 ke au vakaʼi pe ʼe feala, ʼi hona faʼahiga aluʼaga pe, haku fakatupu te maheka ʼo taku hahaʼi* pea mo haofaki niʼihi ia natou. 15 Koteʼuhi kapau ʼi tonatou liʼakina+ neʼe feala ai ke fakatokatoka te malamanei mo te ʼAtua, ʼe feafeaʼi age la moka toe tali natou? ʼE ko te maʼuli maʼa natou ʼae neʼe mamate. 16 Pea tahi, kapau ʼe maʼoniʼoni ia te moʼi pane ʼae ʼe momoli ohage ko he molaga ʼo ni ʼuluaki fua, pea ʼe toe maʼoniʼoni foki mo te foʼi pane katoa. Pea kapau ʼe maʼoniʼoni ia te aka, ʼe toe maʼoniʼoni foki mo te ʼu vaʼa.

17 Kae kapau neʼe tuʼusi ʼihi vaʼa ʼo te fuʼu oliveto ʼae neʼe to pea neʼe haʼi koe ki ai, logo la ko koe ko he vaʼa ʼo te fuʼu oliveto ʼo te vao, pea mo ke maʼu te ʼu lelei mai tona aka, 18 ʼaua naʼa ke fiameʼalahi ki te ʼu vaʼa. Kapau ʼe ke fiameʼalahi kia natou,+ ke ke manatuʼi ʼe mole ko koe ʼae ʼe maʼuli ai te aka, kae ko te aka ʼae ʼe ke maʼuli ai. 19 Kae ʼe ke ui anai: “Neʼe tuʼusi la ni vaʼa ke haʼi au ki ai.”+ 20 ʼE ke moʼoni! Neʼe tuʼusi te ʼu vaʼa ʼaia ʼuhi ko tanatou mole tui,+ kae ko koe ʼe ke tuʼu ʼuhi ko tau tui.+ ʼAua naʼa ke fialahi kae ke ke manavasiʼi. 21 He ʼe kapau neʼe mole fakahao e te ʼAtua te ʼu vaʼa ʼo te fuʼu oliveto ʼae neʼe to, pea ʼe mole ina fakahao anai mo koe. 22 Koia ke ke tokagaʼi ia te agaʼofa+ pea mo te agafefeka ʼa te ʼAtua. Neʼe agafefeka kia natou ʼae neʼe higa+ kae neʼe agaʼofa ia kia koe, mo kapau foki ʼe kei ke tuha mo tona agaʼofa. He ʼe kapau ʼe mole koia, pea ʼe toe tuʼusi anai mo koe. 23 Pea mo natou foki, kapau ʼe natou fakaha te tui, ʼe haʼi anai natou ki te fuʼu oliveto,+ he ʼe feala ki te ʼAtua ke ina toe haʼi natou ki ai. 24 Koteʼuhi kapau neʼe tuʼusi koe mai te fuʼu oliveto ʼo te vao pea mo haʼi koe ki te fuʼu oliveto ʼae neʼe to, logo la ʼe mole ko tona faʼahiga fai ʼaia, pea ʼe feafeaʼi age la ki te ʼu vaʼa totonu ʼo te fuʼu oliveto ʼae neʼe to?

25 Koteʼuhi ʼe au loto, ʼu tehina, ke kotou iloʼi te meʼa fakalilo tapu* ʼaeni,+ ke ʼaua naʼa kotou fia popoto: Neʼe lotofefeka ʼihi kau Iselaele ʼo kaku ki te kua katoa ʼo te hahaʼi ʼae ʼe mole Sutea, 26 pea ʼe feala ai ke haofaki ia Iselaele katoa.+ Ohage ko tona tohi: “ ʼE haʼu anai mai Sione te fakamaʼuli+ pea ʼe ina fakamamaʼo anai mai ia Sakopo te ʼu aga ʼae ʼe kovi. 27 Pea ʼe au fai anai he fuakava mo natou,+ moka au fakamolemole ʼanatou agahala.”+ 28 ʼE moʼoni, ʼo ʼuhiga mo te logo lelei, kua natou liliu ko he ʼu fili ʼo te ʼAtua ke fua lelei ai kia koutou. Kae ʼo ʼuhiga mo te filifili ʼa te ʼAtua, kua ʼofainaʼi natou ʼuhi ko ʼanatou kui.+ 29 Koteʼuhi ʼe mole fakahemala anai ia te ʼAtua ʼo ʼuhiga mo te ʼu meʼa ʼofa ʼae neʼe ina foaki pea mo natou ʼae neʼe ina pauʼi. 30 Neʼe kotou talagataʼa ki te ʼAtua ʼi te temi muʼa+ kae kua ina fakaha atu ʼi te temi nei tona manavaʼofa+ ʼuhi ko te talagataʼa ʼa te kau Sutea.+ 31 ʼE toe feia foki, neʼe talagataʼa ia natou ʼaia pea neʼe iku ai ki te manavaʼofa ʼo te ʼAtua kia koutou. Pea ʼe toe feala foki ke fakaha kia natou ʼaia ʼi te temi nei ia te manavaʼofa. 32 Koteʼuhi neʼe fakagafua e te ʼAtua kia natou fuli ke natou popula ki te talagataʼa+ ke feala hana fakaha kia natou fuli ia tona manavaʼofa.+

33 ʼI lahi leva ʼo te ʼu tapuakina, mo te poto pea mo te ʼatamai malama ʼo te ʼAtua! ʼE mole feala ki he tahi ke mahino ki ʼana fakamau pea mo ʼona ala fuli. 34 Koteʼuhi “ko ai ʼae ʼe feala ke ina iloʼi ia te manatu ʼa Sehova,* peʼe ko ai ʼae neʼe faitokoni age kia te ia?”+ 35 Peʼe “ko ai ʼae neʼe ina ʼuluaki foaki he meʼa ki te ʼAtua, ke toe liufaki age?”+ 36 Koteʼuhi ʼe haʼu ia meʼa fuli mai ia te ia, pea ʼe tokaga kia meʼa fuli pea ʼe maʼuli ia meʼa fuli ʼuhi ko tona finegalo. Ke fakakololiaʼi ia te ʼAtua ʼo talu ai. Ameni.

12 Koia ʼe au kole mamahi atu, ʼu tehina, ʼaki te manavaʼofa ʼo te ʼAtua, ke kotou momoli ʼokotou sino+ ohage ko he sakilifisio maʼuli, mo maʼoniʼoni+ pea mo lelei ki te ʼAtua. ʼE kotou foaki ai anai he tauhi taputapu ʼaki ʼokotou fealagia fakakaukau.+ 2 Pea tuku takotou faʼifaʼitakiʼi ia te ʼu aga ʼo te malama* ʼaeni, kae ke kotou fetogi ia koutou ʼo kotou fakafoʼou takotou faʼahiga manatu,+ ke feala ai ke kotou vakavakaʼi pea mo iloʼi e koutou totonu+ ia te finegalo ʼo te ʼAtua, ʼae ʼe lelei, mo tuha pea mo haohaoa.

3 Neʼe fakaha mai kia au e te ʼAtua ia tona ʼofa makehe, koia ʼe au ui kia koutou fuli ke ʼaua naʼa kotou manatu ʼe kotou maʼuhiga,+ kae ke kotou maʼu he manatu ʼe fakapotopoto ʼo ʼuhiga mo koutou totonu, ʼo tahi mulimuli ki te tui ʼae neʼe foaki* atu e te ʼAtua.+ 4 Koteʼuhi ohage ko he sino ʼe tahi ʼe ina maʼu he ʼu koga sino ʼe lahi,+ kae ʼe mole tatau te gaue ʼae ʼe fai e te ʼu koga sino ʼaia, 5 ʼo toe feia pe mo tatou, logo la totatou kaugamalie, kae ko tatou ko te sino pe ʼe tahi ʼo fakatahi mo Kilisito,* pea ko tatou ko he ʼu koga sino ʼe pipiki tahi.+ 6 Koia ʼe tou maʼu he ʼu fealagia kehekehe ʼo mulimuli ki te ʼofa makehe ʼae neʼe foaki mai e te ʼAtua.+ Kapau ko te faifakakikite, pea tou faifakakikite ʼo mulimuli ki te tui ʼae neʼe foaki mai. 7 Kapau ko he minisitelio, tou fakahoko te minisitelio ʼaia, peʼe ko he tahi ʼe faiako, ke faiako.+ 8 Ko ʼae ʼe ina fakalotomalohiʼi ʼihi,* ke hoko atu tana fakalotomalohiʼi ʼihi.*+ Ko ʼae ʼe ina foaki he meʼa, ke ina foaki ke lahi.+ Ko ʼae ʼe ina takitaki te kokelekasio, ke ina fai fakalelei.*+ Pea ko ʼae ʼe ina fakaha te manavaʼofa, ke ina fai ʼaki he lotofiafia.+

9 ʼAua naʼa malualoi tokotou ʼofa.+ Kotou fakalialia ki te meʼa ʼae ʼe kovi,+ kae ke kotou pipiki ki te meʼa ʼae ʼe lelei. 10 Kotou feʼofaʼaki moʼoni ohage ko he fale tau tehina. Kotou lotolelei ʼo fakamaʼuhigaʼi ʼihi.+ 11 Kotou faʼa gaue* kae ʼaua naʼa kotou pipiko.*+ Kotou faʼafai ʼuhi ko te laumalie ʼo te ʼAtua.+ Kotou kaugana kia Sehova.*+ 12 Kotou fakafiafia ʼuhi ko takotou ʼamanaki. Kotou katakiʼi te ʼu mamahi.+ Kotou kataki ʼi te faikole.+ 13 Kotou vaevae mo te kau maʼoniʼoni ʼo mulimuli ki te ʼu meʼa ʼae ʼe ʼaoga kia natou.+ Kotou fakaha tuʼumaʼu te tali kaiga.+ 14 Kotou haga tapuakiʼi ia natou ʼae ʼe natou fakatagaʼi koutou,+ pea ʼaua naʼa kotou faitutuku.+ 15 Kotou fakafiafia mo natou ʼae ʼe fakafiafia, kotou fetagihi mo natou ʼae ʼe fetagihi. 16 Ke tatau takotou manatu ʼo ʼuhiga mo ʼihi mo takotou manatu ʼo ʼuhiga mo koutou totonu. ʼAua naʼa kotou manatu ki te ʼu meʼa ʼae ʼe maʼoluga,* kae ke kotou tuku ke taki koutou e te ʼu meʼa ʼae ʼe malalo.+ ʼAua naʼa kotou manatu ʼe kotou popoto.+

17 ʼAua naʼa kotou liufaki ki he tahi te kovi ʼaki te kovi.+ Kotou tokagaʼi te meʼa ʼae ʼe ui e te hahaʼi fuli ʼe lelei. 18 Kapau ʼe feala, pea mo fakalogo kia koutou, kotou maʼuʼuli ʼi te tokalelei mo te hahaʼi fuli pe.+ 19 Kau ʼofaina, ʼaua naʼa kotou lagavaka kae kotou tuku ke fakaha e te ʼAtua ia tona hauhau,+ he neʼe tohi: “ ‘ ʼAʼaku te lagavaka, ʼe au liufaki anai,’ ko te ui ʼaia ʼa Sehova.”*+ 20 Kae “kapau ʼe fia kai tou fili, foaki age hana meʼa kai. Kapau ʼe fia inu, foaki age hana meʼa inu. Koteʼuhi ʼi tau fai feia, ʼe ke tanaki anai ki tona fuga ʼulu ni mamala kakaha.”*+ 21 ʼAua naʼa ke tuku ke malo te kovi ia koe, kae ke ke haga malo ʼi te kovi ʼaki te lelei.+

13 Ke fakalogo te hahaʼi* fuli pe ki te ʼu pule maʼoluga,+ koteʼuhi ʼe mole he pule mo ka na pau la neʼe mole fakagafua e te ʼAtua.+ Neʼe fakatuʼu e te ʼAtua ia te ʼu pule maʼoluga ki ʼonatou tuʼulaga kehekehe.+ 2 Koia ko ʼae ʼe fakafeagai ki te ʼu pule ʼaia ʼe fakafeagai ia ki te fakatuʼutuʼu ʼa te ʼAtua. Pea ko natou ʼae ʼe fakafeagai ki ai ʼe tauteaʼi anai natou. 3 Koia ko natou ʼae ʼe natou fai he aga ʼe kovi ʼe tonu ke matataku ki te ʼu pule ʼaia, kae mole ko natou ʼae ʼe natou fai he aga ʼe lelei.+ Kapau ʼe mole ke fia mataku ki te ʼu pule, haga fai te meʼa ʼae ʼe lelei+ pea ʼe natou fakavikiviki anai kia koe. 4 Koteʼuhi ʼe ko te tagata faifekau ʼaia ʼa te ʼAtua ki te lelei ʼo tou maʼuli. Kae ke ke mataku mo kapau ʼe ke fai he meʼa ʼe kovi, koteʼuhi ʼe ʼi ai te tupuʼaga ʼo tana toʼo ia te heleta. ʼE ko te tagata faifekau ʼa te ʼAtua moʼo tauteaʼi ia natou ʼae ʼe natou fai te meʼa ʼae ʼe kovi.

5 Koia ʼe maʼua ai ke kotou fakalogo, mole ʼuhi pe ko te tautea ʼaia, kae ʼuhi foki ko ʼokotou leʼo ʼo loto.+ 6 Ko te tupuʼaga la ʼaia ʼo takotou totogi foki mo te ʼu tukuhau, koteʼuhi ko te ʼu pule ʼaia ʼe ko he ʼu tagata faifekau ʼa te ʼAtua moʼo tokoni ki te hahaʼi, pea ʼe natou fai tuʼumaʼu ia te gaue ʼaia. 7 Koia kotou foaki ki te hahaʼi fuli te ʼu meʼa ʼae ʼe tonu ke kotou foaki age kia natou: Ki ʼae ʼe ina fakamaʼua atu te tukuhau, kotou foaki age te tukuhau,+ ki ʼae ʼe ina fakamaʼua atu te totogi, kotou foaki age te totogi, ki ʼae ʼe ina loto ke fakaʼapaʼapaʼi, kotou fakaʼapaʼapa ki ai,+ pea ki ʼae ʼe ina loto ke fakamaʼuhigaʼi, kotou fakamaʼuhigaʼi ia ia.+

8 ʼAua naʼa kotou tuʼu maʼua ki he tahi, kae ʼe ko te maʼua pe ʼe tahi ʼe kotou maʼu, ke kotou feʼofaʼaki.+ Koteʼuhi ko ʼae ʼe ʼofa ki tona tatau, ʼe ina fakahoko ia te lao.+ 9 Pea ko te ʼu lao ʼaeni: “ ʼE mole tonu ke ke tono,+ ʼe mole tonu ke ke faifakapo,+ ʼe mole tonu ke ke kaihaʼa,+ ʼe mole tonu ke ke manumanū”+ pea mo te ʼu fakatotonu fuli ʼae, ʼe fakanounou ʼi te folafola ʼaeni: “ ʼE tonu ke ke ʼofa ki tou tatau ohage pe ko koe totonu.”+ 10 Ko ʼae ʼe ʼofa ʼe mole ina fai he meʼa ʼe kovi ki tona tatau,+ koia ʼe ina fakahoko ia te lao.+

11 Pea kotou fai te ʼu faʼahi ʼaia koteʼuhi ʼe kotou iloʼi te temi ʼae ʼe tou maʼuʼuli ai: ʼE kua hoko mai te hola ʼae ke kotou ʼaʼala ake ai,+ he ʼe ʼi te temi ʼaeni kua ovi mai totatou haofaki ʼi te temi ʼae neʼe tou liliu ai ko he ʼu tisipulo. 12 Kua vave pe te ʼosi ʼo te poʼuli, kua ovi mai te ʼaho. Koia tou liʼaki te ʼu gaue ʼo te fakapoʼuli+ pea tou kofuʼi te teu tau ʼo te malama.+ 13 Ke tou aga fakapoipoi+ ohage ko te aga ʼa te hahaʼi moka ʼaho. ʼE mole tonu ke tou kau ki te ʼu fakafiafia fakavalevale pea mo te inu kava fakavalevale, mo te ʼu felaveʼi fakasino heʼe ʼaoga pea mo te ʼu aga fakalialia,*+ mo te kē pea mo te maheka.+ 14 Kae kotou faʼifaʼitakiʼi* ia te ʼAliki ko Sesu Kilisito,*+ pea ʼaua naʼa kotou fai he ʼu fakatuʼutuʼu ʼo ʼuhiga mo te ʼu holi ʼo te kakano.+

14 Kotou tali lelei te tagata ʼae ʼe mole malohi tana tui,+ kae ʼaua naʼa kotou fatufatuʼi ia natou ʼae ʼe mole manatu tahi mo koutou. 2 ʼE ʼi ai te tagata ʼe fakagafua age e tana tui ke kai kia meʼa fuli, kae ko te tagata ʼae ʼe vaivai tana tui ʼe kai lauʼakau pe ia. 3 Ko ʼae ʼe kai ke ʼaua naʼa ina meʼa noaʼi ia ia ʼae ʼe mole kai, pea ko ʼae ʼe mole kai ke ʼaua naʼa ina fakamauʼi ia ia ʼae ʼe kai,+ koteʼuhi ʼe tali lelei ia ia e te ʼAtua. 4 Ko ai koa ia koe ke ke fakamauʼi te tagata faifekau ʼa he tahi age?+ ʼE ʼa tona pule te vakaʼi pe ʼe tuʼu peʼe toka.+ Koia ʼe tuʼu anai koteʼuhi ʼe tokoni age ia Sehova.*

5 ʼE manatu he tagata ʼe maʼuhiga age he ʼaho ʼi he tahi ʼaho.+ Pea ʼe manatu he tahi age tagata ʼe tatau fuli pe te ʼu ʼaho.+ Ke tahi tui papau te tagata fuli ʼe lelei tana manatu. 6 Ko ʼae ʼe ina fakamaʼuhigaʼi he ʼaho, ʼe ina fai ia maʼa Sehova.* ʼO toe feia aipe mo ia ʼae ʼe kai, ʼe kai ia maʼa Sehova,* koteʼuhi ʼe fakafetaʼi ia ki te ʼAtua.+ Pea ko ʼae ʼe mole kai ʼe mole kai ia maʼa Sehova,* kae ʼe fakafetaʼi ia ki te ʼAtua.+ 7 ʼE moʼoni, ʼe mole he tahi ia tatou ʼe maʼuli maʼa ia totonu pe,+ pea ʼe mole he tahi ʼe mate maʼa ia totonu pe. 8 Koteʼuhi kapau ʼe tou maʼuʼuli, ʼe tou maʼuʼuli maʼa Sehova,*+ pea kapau ʼe tou mamate, ʼe tou mamate maʼa Sehova.* Koia tatau aipe pe ʼe tou maʼuʼuli peʼe tou mamate, kae neʼe tou foaki ʼotatou maʼuli kia Sehova.*+ 9 Neʼe mate ia Kilisito* pea neʼe toe maʼuli ake ke pule ai ki te kau mate pea mo te kau maʼuʼuli.+

10 Kae he koʼe koa ʼe ke fakamauʼi tou tehina?+ Pea he koʼe koa ʼe ke meʼa noaʼi tou tehina? Koteʼuhi ʼe tou tutuʼu fuli anai ia muʼa ʼo te fakamauʼaga ʼa te ʼAtua.+ 11 He ʼe tohi: “ ‘ ʼE au tala moʼoni atu,’+ ko te ui ʼaia ʼa Sehova,* ‘ ʼe tuʼutuli anai te hahaʼi fuli ʼi ʼoku muʼa, pea ʼe natou fakamoʼoni anai ko au ko te ʼAtua.’ ”+ 12 Koia ʼe fakamauʼi anai e te ʼAtua ia tatou takitokotahi ʼo mulimuli ki ʼatatou aga.+

13 Koia tou tuku tatatou fefakamauʼiʼaki,+ kae kotou fakatotonu ke ʼaua naʼa kotou fakatupu tukia peʼe fakatupu higa ki hokotou tehina.+ 14 ʼI toku ʼuhiga tisipulo ʼa te ʼAliki ko Sesu, ʼe au iloʼi pea mo au tui papau ʼe mole he meʼa ʼe ʼuli.+ Kae ʼe ʼuli pe he meʼa ki te tagata mo kapau ʼe manatu ia ʼe ʼuli. 15 Koteʼuhi kapau ʼe lotomamahi tou tehina ʼuhi ko te meʼa kai, ʼe mole kei ke mulimuli ki te ʼofa.+ Neʼe mate ia Kilisito maʼa tou tehina, koia ʼaua naʼa ke maumauʼi* tana tui ʼuhi ko tau meʼa kai.+ 16 ʼAua naʼa kotou tuku ke laukoviʼi te lelei ʼae ʼe kotou fai. 17 Koteʼuhi ko te hu ʼa he tagata ki te Puleʼaga ʼo te ʼAtua, ʼe mole fakalogo ia ki te kai mo te inu,+ kae ʼe fakalogo ia ki tana maʼu ia te faitotonu, mo te tokalelei pea mo te fiafia ʼae ʼe tupu mai te laumalie maʼoniʼoni. 18 Koteʼuhi ko ʼae ʼe kaugana feia kia Kilisito ʼe leleiʼia e te ʼAtua pea mo te tagata.

19 Koia tou haga kumi te ʼu meʼa ʼae ʼe ʼaoga ki te tokalelei+ pea mo ʼae ʼe tou fefakalotomalohiʼaki ai.+ 20 Tuku tau maumauʼi te gaue ʼa te ʼAtua ʼuhi ko he meʼa kai.+ ʼE moʼoni, ko meʼa fuli ʼe maʼa, kae ʼe kovi te kai ʼo he meʼa moka ʼe tukia ai he tahi.+ 21 ʼE lelei age ke mole ke kai he kanoʼi manu peʼe ke inu he moʼi vino peʼe ke fai he faʼahiga meʼa ʼe feala ke tukia ai tou tehina.+ 22 Ko te tui ʼae ʼe ke maʼu ʼa koe pe ia mo te ʼAtua. Ke fiafia te tagata ʼae ʼe mole ina fakamauʼi ia ia totonu ʼuhi ko te meʼa ʼae ʼe ina fakatotonu ke ina fai. 23 Kae kapau ʼe lotolotolua kua tautea ia mo kapau ʼe kai, koteʼuhi neʼe kai kae neʼe mole tui papau ʼe lelei. Koia ko meʼa fuli ʼae ʼe mole fai ʼaki te tui ʼe ko he agahala ia.

15 Kae ko tatou ʼaeni ʼe malolohi, ʼe tonu ke tou ʼamo te ʼu vaivaiʼaga ʼo natou ʼae ʼe mole malolohi,+ kae ʼaua naʼa tou fai te meʼa ʼae ʼe tou loto ki ai.+ 2 Tou tahi fai ki tona tatau te meʼa ʼae ʼe ina leleiʼia ke fua lelei kia ia, pea ke fakalotomalohiʼi ai ia ia.+ 3 Maʼia mo Kilisito,* neʼe mole ina kumi te ʼu meʼa ʼae neʼe lelei kia te ia,+ ohage ko tona tohi: “Ko te ʼu laukovi ʼae ʼe fai atu kia te koe ʼe fai mai kia au.”+ 4 Koteʼuhi ko te ʼu meʼa fuli ʼae neʼe tohi ʼi te temi muʼa neʼe tohi ia moʼo akoʼi ʼo tatou.+ ʼE tou maʼu ai he ʼamanaki koteʼuhi ʼe tokoni mai te ʼu Tohi Taputapu ke tou faʼa kataki pea mo foaki mai he fakafimalie.+ 5 ʼOfa pe ke fakagafua atu e te ʼAtua, ʼae ʼe ina foaki te faʼa kataki mo te fimalie, ke kotou maʼu he manatu ʼe tatau mo te manatu ʼa Kilisito Sesu, 6 ke feala ai hakotou fakakololiaʼi ʼi te logo tahi+ pea mo he leʼo* ʼe tahi ia te ʼAtua mo Tamai ʼo totatou ʼAliki ko Sesu Kilisito.

7 Koia kotou fetalileleiʼaki,+ ohage ko te tali lelei ʼo koutou e Kilisito,+ ke fakakololiaʼi ai te ʼAtua. 8 Koteʼuhi ʼe au tala atu kia koutou, neʼe liliu ia Kilisito ko te tagata faifekau ʼa natou ʼae kua silikosisio.*+ Neʼe ina fakaha ai ʼe tala tuʼumaʼu pe e te ʼAtua te moʼoni pea ʼe moʼoni te ʼu fakapapau ʼae neʼe Ina fai ki ʼanatou kui,+ 9 ke fakakololiaʼi ai e te ʼu puleʼaga kehekehe ia te ʼAtua ʼuhi ko tona manavaʼofa.+ Ohage ko tona tohi: “Koia ʼe au fakavikiviki anai kia te koe ʼi te ʼu puleʼaga, pea ʼe au hiva anai ni fakavikiviki ki tou huafa.”+ 10 Pea neʼe toe ui: “ ʼU puleʼaga, kotou fakafiafia fakatahi mo tana hahaʼi.”+ 11 Pea neʼe toe ui: “Kotou vikiʼi ia Sehova,* ʼatu puleʼaga fuli pea ke fakavikiviki kia te ia te hahaʼi fuli.”+ 12 Pea ʼi te tahi age vaega, neʼe ui e Esaia: “ ʼE haʼu anai he tahi mai te aka ʼo Sese+ pea ʼe pule anai ki te hahaʼi.+ ʼE falala anai te ʼu puleʼaga kia ia.”+ 13 ʼOfa pe ki te ʼAtua ʼae ʼe ina foaki te ʼamanaki, ke ina foaki atu te fiafia mo te tokalelei katoa ʼuhi ko takotou falala kia te ia, ke malohi age ai takotou ʼamanaki ʼaki te malohi ʼo te laumalie maʼoniʼoni.+

14 ʼOku tehina, ʼe au tui papau ʼe kotou lotolelei ʼo fai ni meʼa lelei,* ʼe kotou fonu ʼi te ʼatamai malama katoa, pea ʼe kotou toe popoto foki ʼi te fetokoniʼaki.* 15 Kae neʼe au faitohi fakahagatonu atu ʼo ʼuhiga mo ʼihi faʼahi, ke au toe fai atu he fakamanatu. Pea ʼe au fai te faʼahi ʼaia ʼuhi ko te ʼofa makehe ʼae neʼe fakaha mai e te ʼAtua, 16 ke au liliu ko he tagata faifekau ʼa Kilisito Sesu maʼa te ʼu puleʼaga kehekehe.+ ʼE au fakahoko ia te gaue taputapu ʼo te logo lelei mai te ʼAtua,+ ke liliu te ʼu puleʼaga ʼaia ko he molaga ʼe tali e te ʼAtua pea ʼe fakamaʼoniʼoniʼi e te laumalie maʼoniʼoni.

17 Koia ʼe au maʼu ai ni tupuʼaga ke au fakafiafia ia Kilisito Sesu ʼo ʼuhiga mo te gaue ʼa te ʼAtua. 18 Koteʼuhi ʼe mole au faiga anai ke au palalau ki he tahi age meʼa, gata pe ki te faʼahi ʼae neʼe fakahoko e Kilisito ʼaki ia au, ke liliu ai te ʼu puleʼaga ʼo fakalogo. Neʼe ina fakahoko te faʼahi ʼaia ʼaki ʼaku palalau pea mo ʼaku gaue, 19 ʼaki te ʼu milakulo pea mo te ʼu meʼa fakaofoofo*+ ʼae neʼe au fakahoko pea mo te malohi ʼo te laumalie ʼo te ʼAtua, ʼo au fakamafola katoa ai te logo lelei ʼo ʼuhiga mo Kilisito ʼi Selusalemi ʼo kaku ki Ilikume mo ʼona tafaʼaki.+ 20 Pea neʼe ko taku fakatuʼutuʼu ke ʼaua naʼa au tala te logo lelei ʼi te ʼu faʼahi ʼae neʼe kua fakaha ai ia te huafa ʼo Kilisito, ke ʼaua naʼa au hoko atu te gaue ʼae neʼe kua kamata e he tahi age.* 21 Ohage pe ko tona tohi: “Ko natou ʼae neʼe mole fai age kia natou he fagonogono ʼo ʼuhiga mo ia, ʼe natou sisio anai, pea ko natou ʼae neʼe mole logo ʼe natou mahino anai.”+

22 Ko te tupuʼaga la ʼaia ʼo toku taʼofi tuʼa lahi ke mole au alu atu. 23 Kae ʼi te temi nei kua au faifakamafola ʼi te ʼu faʼahi fuli ʼo te ʼu koga fenua ʼaeni, pea talu mai fualoa* mo taku fia alu atu. 24 Koia ʼe au fakaʼamu ʼe au sio anai kia koutou ʼi taku alu ʼae ki Sepania pea mo au fiafia ʼi taku nofo mo koutou. Pea hili ia, ʼe au fakaʼamu ke kotou kaugā olo mo au ʼi he kiʼi temi. 25 Kae ʼi te temi nei, ʼe au teuteu ke au alu ki Selusalemi ʼo tauhi te kau maʼoniʼoni.+ 26 Koteʼuhi ko natou ʼae ʼe nonofo ʼi Masetonia pea mo Akaia neʼe natou fiafia ʼi te foaki ʼo he meʼa ʼofa maʼa natou ʼe masisiva ʼi te kau maʼoniʼoni ʼae ʼi Selusalemi.+ 27 ʼE moʼoni, neʼe natou fiafia ʼi te fai ʼo te faʼahi ʼaia, pea neʼe ko honatou maʼua. Koteʼuhi kapau neʼe maʼu e te ʼu puleʼaga te ʼu lelei fakalaumalie mai te kau maʼoniʼoni, pea ʼe tonu ke natou tokoni kia natou ʼaki ʼonatou koloa fakamalama.+ 28 Koia ʼi taku ʼosi fai te faʼahi ʼaia pea mo au fakatoʼo age te meʼa ʼofa* ʼaia kia natou, ʼe au fakalaka anai io koutou ʼo alu ki Sepania. 29 Pea tahi, ʼe au iloʼi moka au alu atu, ʼe au alu atu anai mo he ʼu tapuakina lahi mai ia Kilisito.

30 ʼE au fakalotomalohiʼi koutou, ʼu tehina, ʼi te huafa ʼo totatou ʼAliki ko Sesu Kilisito pea ʼi te ʼofa ʼae ʼe tupu mai te laumalie ʼo te ʼAtua, ke tou fakatahi ʼi te faikole ʼo hufakiʼi au.+ 31 Kotou faikole ke haofaki au+ mai te hahaʼi ʼae ʼe mole tui kia Sesu ʼi Sutea pea ke tali lelei e te kau maʼoniʼoni ʼae ʼi Selusalemi te meʼa ʼofa ʼae ʼe au alu mo ia.+ 32 Koia kapau ʼe ko te finegalo ʼaia ʼo te ʼAtua, ʼe feala anai ke au alu atu mo he fiafia pea ke fakalotomalohiʼi ai tatou fuli. 33 ʼOfa pe ke nofo mo koutou fuli ia te ʼAtua ʼae ʼe ina foaki te tokalelei.+ Ameni.

16 ʼE au fekauʼi atu totatou tuagaʼane ko Fipe, ʼae ʼe kau ki te kokelekasio ʼae ʼi Senikelea.+ 2 Kotou fakatalitali ia ia ohage ko he kaugā gaue ʼi te ʼAliki ʼi hona aluʼaga ʼe tuha mo te kau maʼoniʼoni pea ke kotou foaki age te tokoni ʼae ʼe ʼaoga ki ai,+ he neʼe ina puipui te ʼu tehina ʼe tokolahi, ʼo kau ai mo au.

3 ʼOfa age kia Pilisika mo Akila,+ ʼoku kaugā gaue ia Kilisito* Sesu. 4 Neʼe nā tali ke tuʼutamakiʼia ʼonā maʼuli ke haofaki ai toku maʼuli,*+ pea ko au mo te ʼu kokelekasio fuli ʼi te ʼu puleʼaga kehekehe ʼe matou fakafetaʼi kia naua. 5 ʼOfa age ki te kokelekasio ʼae ʼe fakatahitahi ʼi tonā ʼapi.+ ʼOfa age ki toku tehina ʼofaina ko Epaineto, ʼae neʼe kau ʼi te ʼu ʼuluaki tisipulo ʼa Kilisito ʼi Asia. 6 ʼOfa age kia Malia, ʼae neʼe gaue kinakina maʼa koutou. 7 ʼOfa age kia Atoloniko mo Suniasi, ʼoku kaiga+ ʼae neʼe matou pilisoni fakatahi. ʼE ko he ʼu tagata ʼe iloʼi lelei e te kau apositolo pea kua fualoa age tanā fakatahi mo Kilisito ia au.

8 ʼOfa age kia Apiliato, toku tehina ʼofaina ʼi te ʼAliki. 9 ʼOfa age kia Ulipano, totatou kaugā gaue ia Kilisito, pea ki toku tehina ʼofaina ko Setakisi. 10 ʼOfa age kia Apelesi, ia ia ʼae ʼe leleiʼia e Kilisito. ʼOfa age kia natou ʼo te loto fale ʼo Alisitopule. 11 ʼOfa age kia Helotiano, toku kaiga. ʼOfa age kia natou ʼo te loto fale ʼo Nalesise ʼae ʼe natou mulimuli ki te ʼAliki. 12 ʼOfa age kia Tilifena mo Tilifosa, ko te ʼu fafine ʼe nā gaue kinakina ʼi te ʼAliki. ʼOfa age kia Pelesise, totatou tuagaʼane ʼofaina, koteʼuhi neʼe gaue kinakina ʼi te ʼAliki. 13 ʼOfa age kia Lufuso, ia ia ʼae neʼe filifili ʼi te ʼAliki, pea ki tana faʼe ʼae ʼe hage pe ko haku faʼe. 14 ʼOfa age kia Asikito, mo Felekone, mo Helemesi, mo Patolopasi, mo Elemasi pea mo te ʼu tehina ʼae ʼe nonofo mo natou. 15 ʼOfa age kia Filoloko pea mo Sulia, kia Neleo pea mo tona tokolua, kia Olepa pea mo te kau maʼoniʼoni fuli ʼae ʼe nonofo mo natou. 16 Kotou feʼalofaʼaki ʼaki he fekita.* ʼE ʼofa atu te ʼu kokelekasio fuli ʼa Kilisito.

17 ʼE au fakalotomalohiʼi koutou, ʼu tehina, ke kotou tokakaga kia natou ʼae ʼe fakatupu maveuveu pea mo fakatupu tukia, koteʼuhi ko te ʼu faʼahi ʼaia ʼe kehe ia mo te ʼu meʼa ʼae neʼe akoʼi atu. Kotou fakamamaʼo mai ia natou ʼaia.+ 18 Koteʼuhi ko te ʼu faʼahiga tagata ʼaia ʼe mole natou kaugana ki totatou ʼAliki ko Kilisito, kae ki te ʼu holi ʼo tonatou kakano,* pea ʼaki ni palalau fakaoloolo pea mo ni laupisi, ʼe natou fakahalaʼi te ʼu loto ʼo natou ʼae ʼe mole manatu ki he meʼa ʼe kovi. 19 Kua iloʼi e te hahaʼi fuli takotou fakalogo, koia ʼe au fiafia ai ʼo ʼuhiga mo koutou. Kae ʼe au loto ke kotou popoto ʼo ʼuhiga mo te meʼa ʼae ʼe lelei kae ke ʼaua naʼa kotou malama ki te meʼa ʼae ʼe kovi.+ 20 Pea ko te ʼAtua ʼae ʼe ina foaki te tokalelei, kua ovi mai pe tana haga ʼae ʼo moloki ia Satana+ ʼi ʼokotou lalo vaʼe. Ke nofo mo koutou te ʼofa makehe ʼo totatou ʼAliki ko Sesu.

21 ʼE ʼofa atu ia Timoteo, toku kaugā gaue, ʼo feia pe mo Lusiusi, mo Sasone pea mo Sosipatele, ʼoku kaiga.+

22 Ko au ia Teletiusi, ʼae neʼe au fai ia te tohi ʼaeni, ʼe au ʼofa atu ʼi te ʼAliki.

23 ʼE ʼofa atu ia Kaiusi,+ ʼae neʼe ina fakatalitali au pea mo te kokelekasio katoa. Pea ʼe toe ʼofa atu mo Elaseto, ia ia ʼae ʼe tokaga ki te paʼaga ʼo te kolo,* pea mo tona tehina ko Kaletasi. 24* ——

25 ʼE feala ki te ʼAtua ke ina fakamalohiʼi koutou ʼaki te logo lelei ʼae ʼe au tala pea mo te faifakamafola ʼo ʼuhiga mo Sesu Kilisito. Kua fakaha te logo lelei ʼaia ʼaki te meʼa fakalilo tapu*+ ʼae neʼe fufu talu mai fualoa. 26 ʼEi, kua fakaha mai ʼi te temi nei ʼaki te ʼu tohi ʼa te kau polofeta. Pea neʼe fakatotonu mai e te ʼAtua ʼae ʼe maʼuli ʼo heʼe gata, ke tala ki te ʼu puleʼaga fuli ke natou tui mo fakalogo kia te ia. 27 Koia ke fakakololiaʼi ʼo talu ai ia te ʼAtua, ʼae ʼe poto tokotahi,+ ʼaki ia Sesu Kilisito. Ameni.