TE LUA TOHI KI TE KAU KOLONITO

1 Ko au Paulo, te apositolo ʼa Kilisito* Sesu ʼo mulimuli ki te finegalo ʼo te ʼAtua, pea mo Timoteo+ totatou tehina, ʼe ma momoli atu te tohi ʼaeni ki te kokelekasio ʼa te ʼAtua ʼae ʼi Kolonito, ʼo kau ai mo te kau maʼoniʼoni fuli ʼae ʼi Akaia:+

2 Ke foaki atu e te ʼAtua tatatou Tamai pea mo te ʼAliki ko Sesu Kilisito te ʼofa makehe pea mo te tokalelei.

3 Ke vikiʼi te ʼAtua mo Tamai ʼo totatou ʼAliki ko Sesu Kilisito,+ te Tamai ʼo te ʼu manavaʼofa+ pea mo te ʼAtua ʼae ʼe ina fakafimalieʼi te hahaʼi ʼi te ʼu aluʼaga kehekehe,+ 4 mo ina fakafimalieʼi* tatou ʼi ʼotatou ʼahiʼahi* fuli+ ke feala ai ke tou fakafimalieʼi ʼihi+ ʼi ʼonatou ʼahiʼahi* kehekehe ʼaki te fakafimalie ʼae ʼe tou maʼu mai te ʼAtua.+ 5 Ohage pe ko te lahi ʼo ʼotatou mamahi ʼuhi ko Kilisito,+ ʼe toe lahi feia aipe te fakafimalie ʼae ʼe tou maʼu mai ia Kilisito. 6 Kapau ʼe matou tau mo te ʼu ʼahiʼahi* pea ʼe fakafimalieʼi mo haofaki ai koutou. Kapau ʼe fakafimalieʼi matou pea ʼe fakafimalieʼi ai mo koutou. Pea ko te fakafimalie ʼaia ʼe tokoni atu ke kotou katakiʼi te ʼu mamahi ʼae ʼe tatau mo ʼae ʼe tau mo matou. 7 Pea ko tamatou falala ʼae ʼo ʼuhiga mo koutou ʼe malohi, ʼi tamatou iloʼi ʼae ʼe kotou toe tau mo te ʼu mamahi, kae ʼe kotou toe maʼu anai mo te fakafimalie.+

8 He ʼe matou loto ke kotou iloʼi, ʼu tehina, te mamahi ʼae neʼe hoko kia matou ʼi te potu fenua ʼo Asia.+ Neʼe faigataʼa ʼaupito te ʼu aluʼaga ʼaia kia matou, ʼo mole feala ai ke matou katakiʼi ʼaki pe tomatou malohi, pea neʼe mole matou iloʼi papau pe la pe neʼe feala ke matou maʼuʼuli.+ 9 ʼI tona fakahagatonu, neʼe matou logoʼi neʼe kua fakatuʼā matou ki te mate, ke mole matou falala ai kia matou totonu kae ki te ʼAtua+ ʼae ʼe ina fakatuʼuake te kau mate. 10 Neʼe ina haofaki matou mai te tuʼutamaki ʼo te mate pea ʼe ina toe haofaki anai matou, pea ʼe matou falala kia te ia ʼe ina haga haofaki anai matou.+ 11 Mo koutou foki ʼe feala ke kotou tokoni mai kia matou ʼaki ʼakotou kole mamahi.+ Pea kapau ʼe hufakiʼi matou e te tokolahi, ʼe fagono anai te ʼAtua pea mo tokoni mai anai, pea ʼe fakafetaʼi anai te tokolahi ʼo ʼuhiga mo te faʼahi ʼaia.+

12 Koʼeni te meʼa ʼae ʼe matou fiameʼameʼa ai, pea ʼe fakamoʼoni ki ai ʼomatou leʼo ʼo loto: Neʼe matou maʼuʼuli ʼi te malamanei, kae tafito ʼi te lotolotoiga ʼo koutou, ʼi te maʼoniʼoni pea mo te aga fakahagatonu, ʼo mole mulimuli ki te poto fakatagata,+ kae ki te ʼofa makehe ʼo te ʼAtua. 13 Pea ʼe matou tohi atu pe te meʼa ʼae ʼe kotou lava lau* mo mahino ki ai. Pea ʼe au fakaʼamu ke hoko atu takotou mahino katoa ki te ʼu meʼa ʼaia. 14 Kua mahino ʼihi ia koutou ʼe feala ke kotou fiameʼameʼa ʼo ʼuhiga mo matou, ohage pe ko tamatou toe fiameʼameʼa anai ʼo ʼuhiga mo koutou ʼi te ʼaho ʼo totatou ʼAliki ko Sesu.

15 ʼAki te falala ʼaia, neʼe au fakatotonu ai ke au ʼuluaki alu atu, ke feala ai hakotou toe fiafia,* 16 he neʼe au fakatotonu ke au ʼaʼahi koutou ʼi taku alu ki Masetonia, pea mo au toe liliu mai kia koutou mai Masetonia, ke feala ke kotou kaugā fagona mo au ʼi he kiʼi temi ʼi taku alu ki Sutea.+ 17 Koia ʼi taku fai te tonu ʼaia, neʼe mole au meʼa noaʼi te fakatuʼutuʼu ʼaia. Peʼe au fai pe koa ʼaku fakatuʼutuʼu ʼo mulimuli ki te ʼu holi ʼo te kakano ʼo au ui, “ ʼIo,” pea ʼosi ʼaia pea au ui “Kailoa”? 18 ʼE feala ke kotou falala ki te ʼAtua, ʼe moʼoni te meʼa ʼae ʼe matou ui atu. ʼE mole matou ui “ ʼio” pea ki muli age “kailoa.” 19 Koteʼuhi ko te ʼAlo ʼo te ʼAtua, ia Sesu Kilisito, ʼae neʼe matou fakamafola atu kia koutou, ia au, mo Siliva* pea mo Timoteo,+ neʼe mole liliu ia ʼo “ ʼio” pea ki muli age “kailoa,” kae neʼe “ ʼio” pe ia. 20 Logope la te lahi ʼo te ʼu fakapapau ʼa te ʼAtua, kae neʼe natou liliu ʼo “ ʼio” ʼaki ia Sesu.+ Koia ʼaki ia ia ʼe tou ui ai “Ameni” ki te ʼAtua,+ pea ʼe tou fakakololiaʼi ai ia Ia. 21 Ko te ʼAtua ʼae ʼe ina fakamoʼoni ko koutou mo matou ʼe ko he ʼu kaugana ʼa Kilisito pea neʼe ina fakanofo tatou.+ 22 Neʼe ina fakailoga tatou,+ pea mo ina foaki mai ki ʼotatou loto te fakamoʼoni ʼo te meʼa ʼae ka hoko, ʼae ko te laumalie maʼoniʼoni.+

23 Neʼe heʼeki au alu atu ki Kolonito koteʼuhi neʼe au loto ke kotou hao, pea ʼe au toʼo te ʼAtua ko he fakamoʼoni kia au,* malaʼia kia au mo kapau ʼe au loi. 24 ʼE mole matou puleʼi takotou tui,+ kae ʼe tou kaugā gaue ki tokotou fiafia, he ʼe kotou tutuʼu maʼu pe ʼuhi ko takotou tui.

2 Neʼe au fakatotonu leva ke mole au toe alu atu kia koutou ʼi te lotomamahi. 2 He ʼe kapau ʼe au fakalotomamahiʼi koutou, pea ko ai koa ʼae ka ina fakapelepeleʼi au? ʼE ko natou pe ʼae neʼe au fakalotomamahiʼi. 3 Koia neʼe au faitohi atu ai, ke mole au lotomamahi ʼuhi ko natou ʼae ʼe tonu ke au fiafia ai moka au alu atu, koteʼuhi ʼe au falala ko te ʼu meʼa ʼae ʼe au fiafia ai ʼe kotou toe fiafia fuli ai. 4 Neʼe au faitohi atu kia koutou ʼaki he lotomamahi mo he lototuʼania pea mo au tagi. Neʼe mole au faitohi atu ke kotou lotomamahi ai,+ kae ke kotou iloʼi toku ʼofa mamahi ʼae ia koutou.

5 Kapau neʼe fakatupu lotomamahi he tahi,+ neʼe mole ko au ʼae neʼe ina fakalotomamahiʼi, kae ko koutou fuli, pea ʼe au fakalelei atu ʼi taku palalau fakahagatonu atu. 6 Ko te fakatonutonu ʼae neʼe fai e te tokolahi ia koutou ki te tagata ʼaia kua feʼauga. 7 Koia ʼi te temi nei ʼe tonu ke kotou fakamolemole kia ia pea mo fakafimalieʼi ia ia,+ naʼa taʼomia ʼi te lahi fau ʼo tona lotomamahi.+ 8 ʼE au fakalotomalohiʼi koutou ke kotou fakamoʼoni tokotou ʼofa kia ia.+ 9 Ko te tahi tupuʼaga ʼaeni ʼo taku faitohi atu ai: moʼo vakaʼi pe ʼe kotou fakalogo kia meʼa fuli. 10 Kapau ʼe kotou fakamolemole ki he tahi, pea mo au foki ʼe au fakamolemole ki ai. ʼI tona fakahagatonu, ko te meʼa ʼae kua au fakamolemole mo kapau neʼe au fakamolemole he meʼa, neʼe au fai te meʼa ʼaia ʼuhi ko koutou ia muʼa ʼo Kilisito,* 11 ke ʼaua naʼa kakaʼi tatou e Satana,+ he ʼe tou iloʼi ʼana fakatuʼutuʼu.*+

12 ʼI taku tau atu ki Toloasi+ ʼo tala te logo lelei ʼo ʼuhiga mo Kilisito, neʼe au maʼu he faigamalie* ʼi te gaue ki te ʼAliki, 13 kae neʼe mole au fimalie koteʼuhi neʼe mole au felaveʼi mo toku tehina ko Tito.+ Koia neʼe au tauʼine ai ki te ʼu tehina pea mo au alu ki Masetonia.+

14 Kae ʼe tou fakafetaʼi ki te ʼAtua ʼae ʼe ina taki fakatahi tatou mo Kilisito ohage ko he kau solia ʼe liliu malo mai te tau, pea ʼe mafola te magoni ʼo te ʼatamai malama ʼo ʼuhiga mo ia ʼi te potu fuli. 15 Ki te ʼAtua ko tatou ko he ʼaele magoni ʼo te logo ʼo ʼuhiga mo Kilisito kia natou ʼae ʼe ʼi te ala ki te haofaki pea mo natou ʼae ʼe ʼi te ala ki te fakaʼauha. 16 Kia natou ʼae ʼe ʼi te ala ki te fakaʼauha ʼe ko he ʼaele* ʼo te mate ki te mate,+ pea kia natou ʼae ʼe ʼi te ala ki te haofaki ʼe ko he ʼaele magoni ʼo te maʼuli ki te maʼuli. Ko ai koa ʼae ʼe ina lavaʼi te gaue ʼaia? 17 Ko matou, he ʼe mole matou faikoloa* ʼaki te folafola ʼa te ʼAtua,+ ohage ko te tokolahi, kae ʼe matou palalau fakamalotoloto ohage ko he kau faifekau ʼa te ʼAtua, ʼei, ia muʼa ʼo te ʼAtua ʼo fakatahi mo Kilisito.

3 ʼE ʼaoga koa ke matou toe fakaha atu pe ko ai ia matou? Peʼe tonu koa ohage ko ʼihi, ke matou foaki atu he ʼu tohi ʼe vikiʼi ai matou? Peʼe tonu koa ke kotou foaki mai te ʼu tohi ʼaia? 2 ʼE ko koutou totonu ko tamatou tohi,+ ʼe tohi ʼi ʼomatou loto pea ʼe iloʼi mo lau e te hahaʼi fuli. 3 He ʼe iloga ko koutou ko he tohi mai ia Kilisito* neʼe matou tohi ʼi tomatou ʼuhiga tagata faifekau,+ neʼe mole tohi ʼaki te vaitohi kae ʼaki te laumalie ʼo te ʼAtua maʼuli, pea neʼe mole tohi ʼi he ʼu lauʼi maka+ kae ʼi te ʼu loto.+

4 ʼAki ia Kilisito ʼe matou tui papau ki te ʼu faʼahi ʼaia ʼuhi ko te ʼAtua. 5 ʼE mole matou ui leva ʼe matou lavaʼi te gaue ʼaia ʼuhi pe ko matou totonu, kae ʼe ko te ʼAtua ʼae ʼe tokoni mai ke matou fai te gaue ʼaia.+ 6 ʼE ko ia ʼae ʼe ina fakafealagia mai ke matou lavaʼi te gaue ʼa te ʼu tagata faifekau ʼo te fuakava foʼou,+ pea ʼe mole matou faifekau ki he lao neʼe tohi,+ kae ki te laumalie maʼoniʼoni. Koteʼuhi ko te lao ʼe ina tauteaʼi he tahi ki te mate,+ kae ko te laumalie ʼe ina foaki ki he tahi te maʼuli.+

7 Ko te Lao ʼae ʼe ina foaki te mate pea neʼe togi ʼi te ʼu lauʼi maka,+ neʼe ha ʼi te kololia ʼo mole feala ai ke sisio te ʼu foha ʼo Iselaele ki te fofoga ʼo Moisese ʼuhi ko tona gigila,+ ko he gigila ʼe tonu ke puli. 8 ʼE mole tonu koa la ke lahi age te kololia moka foaki mai te laumalie?+ 9 He ʼe kapau neʼe kololia te Lao ʼae neʼe ina foaki te tautea,+ pea ʼe feafeaʼi age la te lahi ʼo te kololia ʼo te faitotonu!+ 10 ʼE puli te kololia ʼo te Lao moka fakatatau ki te kololia ʼo te fuakava foʼou.+ 11 He ʼe kapau neʼe fakaha ʼi te kololia+ ia te Lao ʼae neʼe tonu ke pulihi, pea ʼe feafeaʼi age la te lahi ʼo te kololia ʼo te fuakava foʼou!+

12 ʼUhi ko tatatou ʼamanaki ʼaia,+ ʼe tou palalau fakahagatonu, 13 pea ʼe mole tou fai ohage ko Moisese ʼae neʼe ina ʼuʼufi tona fofoga ʼaki he kie+ ke mole sisio te ʼu foha ʼo Iselaele ki te ikuʼaga ʼo te Lao ʼae neʼe tonu ke pulihi. 14 Kae neʼe fakapoʼuli ʼanatou fakakaukau.+ ʼO kaku mai ki te temi nei, heʼeki toʼo te kie ʼaia pea ʼe mole feala ke natou mahino ki te fuakava ʼafeā,+ koteʼuhi ko te kie ʼaia ʼe hoki feala pe ke toʼo ʼaki ia Kilisito.+ 15 Koia ʼe kei ʼuʼufi pe ʼonatou loto ʼo kaku mai ki te temi nei, pea ʼe mole feala ke natou mahino ki te ʼu tohi ʼa Moisese.+ 16 Kae moka haga he tahi kia Sehova,* pea ʼe toʼo te kie ʼaia.+ 17 Kae ko Sehova* ʼe Laumalie,+ pea ko te potu ʼae ʼe maʼu ai te laumalie ʼo Sehova,* ʼe maʼu ai te ʼateaina.+ 18 Pea ko tatou fuli ʼae ʼe mole ʼuʼufi ʼotatou fofoga, ʼe tou fakaʼata te kololia ʼo Sehova* ohage ko he ʼu sioʼata. ʼE fetogi tatou ke tou hage ko te ʼAtua, ke ʼaʼasili ai tatatou fakaʼata ia tona kololia ohage pe ko te meʼa ʼae ʼe loto ki ai ia Sehova* ʼae ʼe Laumalie.*+

4 Koia ʼi tamatou maʼu te minisitelio ʼaia ʼuhi ko te manavaʼofa ʼae neʼe fakaha mai kia matou, ʼe mole matou tuku anai. 2 Kae neʼe matou fakafisi ki te ʼu meʼa fakaufiufi ʼae neʼe fai fakafufu, pea ʼe mole matou maʼuli kaka, peʼe matou ʼave keheʼi te folafola ʼa te ʼAtua.+ Kae ʼi tamatou fakaha te moʼoni, neʼe matou liliu ai ko he faʼifaʼitaki lelei maʼa te hahaʼi fuli* ia muʼa ʼo te ʼAtua.+ 3 Koia kapau ko te logo lelei ʼae ʼe matou tala ʼe ʼuʼufi ʼaki he kie, pea ʼe ʼuʼufi ia kia natou ʼae ʼi te ala ki te mate, 4 ia te kau heʼe tui ʼae neʼe fakapoʼuliʼi* ʼonatou ʼatamai+ e te ʼatua ʼo te malama* ʼaeni,+ ke mole natou sisio ki te gigila* ʼo te kololia ʼo te logo lelei ʼo ʼuhiga mo Kilisito,*+ ʼae ʼe ko te pāki ʼo te ʼAtua.+ 5 Ka matou faifakamafola, ʼe mole matou palalau ʼo ʼuhiga mo matou kae ʼe matou tala ʼe ko Sesu Kilisito ia te ʼAliki, pea ko matou ʼe ko ʼakotou tagata faifekau ʼuhi ko Sesu. 6 He ʼe ko te ʼAtua ʼae neʼe ina ui: “Ke mu te malama ʼi te fakapoʼuli,”+ pea ʼaki ia Kilisito* neʼe ina fakamalamaʼi ʼomatou loto+ ʼaki te kololia ʼo te ʼatamai malama ʼo ʼuhiga mo te ʼAtua.

7 Kae ʼe matou maʼu te koloa ʼaia+ ʼi he ʼu ipu kele,+ ke ha lelei ai ko te malohi makehe ʼae ʼe matou maʼu ʼe haʼu ia mai te ʼAtua, kae mole mai ia matou.+ 8 ʼE matou taʼomia ʼi te ʼu faʼahi kehekehe, kae ʼe feala pe ke matou gaugaue, ʼe mole matou iloʼi he meʼa ke matou fai, kae ʼe ʼi ai pe tomatou haoʼaga,*+ 9 ʼe fakatagaʼi matou, kae ʼe mole liʼakina matou,+ ʼe tokatokahi matou ki te kele, kae ʼe mole matou mamate.+ 10 ʼE matou katakiʼi tuʼumaʼu pe tomatou gaohi koviʼi ohage ko Sesu,+ ke ha ia matou* te maʼuli ʼo Sesu. 11 He ʼe ko matou ʼae ʼe maʼuʼuli ʼe matou tuʼutamakiʼia tuʼumaʼu+ ʼuhi ko Sesu, ke ha ia matou te maʼuli ʼo Sesu. 12 Koia ʼe matou tauʼi te mate, kae ko tona fua kia koutou ʼe ko te maʼuli.

13 Ohage ko tona tohi: “Neʼe au maʼuliʼi te tui, koia ʼae neʼe au palalau ai.”+ Mo matou foki ʼe matou fakaha ʼe matou maʼu te tui ʼaia. Koia ʼae ʼe matou palalau ai, 14 ʼi tamatou iloʼi ko Ia ʼae neʼe ina fakatuʼuake ia Sesu ʼe ina fakatuʼuake anai mo matou, ke matou fakatahi mo Sesu, pea ʼe ina fakatuʼu anai matou pea mo koutou ia muʼa ʼo Sesu.+ 15 Neʼe hoko te ʼu meʼa fuli ʼaia ʼuhi ko koutou, ke feala ki te tokolahi ke natou maʼu te ʼofa makehe ʼo te ʼAtua ʼuhi ko te kaugamalie ʼo te hahaʼi ʼae ʼe fakafetaʼi ki te ʼAtua, pea ʼe fakakololiaʼi ai ia ia.+

16 Koia ʼe mole tou tuku anai, tatau aipe pe ʼe hifo ʼotatou sinoʼi tagata, kae ʼe mahino ia ko ʼotatou loto pea mo ʼotatou ʼatamai ʼe fakafoʼou ʼi te ʼaho fuli. 17 Logope la te fakatemi pea mo te maʼamaʼa ʼo te mamahi,* kae ʼe ina fakatupu anai ia tatou he kololia ʼe fakatalakitupua* pea mo heʼe gata.+ 18 ʼE mole tou sisio fakamamaʼu ki te ʼu meʼa ʼae ʼe ha, kae ki te ʼu meʼa ʼae ʼe mole ha.+ He ʼe ko te ʼu meʼa ʼae ʼe ha ʼe fakatemi, kae ko te ʼu meʼa ʼae ʼe mole ha ʼe heʼe gata.

5 ʼE tou iloʼi ʼe pulihi* anai te fale la, totatou ʼapi ʼae ʼi te kele,+ pea ʼe foaki mai anai e te ʼAtua hotatou ʼapi ʼi selo neʼe mole laga e he ʼu tagata,+ pea ʼe tuʼu anai ia ʼo talu ai. 2 ʼI totatou ʼapi* ʼae ʼi te kele, ʼe tou lauga he ʼe tou fakaʼamu lahi ki totatou ʼapi* ʼae ʼi selo, ʼae ʼe ina ʼaofi anai tatou ohage ko he ʼu mutuʼi meʼa,+ 3 koia ka tou kofuʼi ʼe mole tou telefua anai. 4 Kae ko tatou ʼae ʼe ʼi te fale la ʼaia ʼe tou lauga mo mafasia, he ʼe mole tou loto ke tou toʼo te fale la ʼaia ohage ʼe tou huʼi he ʼu mutuʼi meʼa, kae ʼe tou loto ke tou maʼu te ʼapi ʼae ʼi selo,+ ke fetogi te sino ʼae ʼe mate ʼaki te maʼuli heʼe gata.+ 5 Ko ia ʼae neʼe ina teuteuʼi tatou ki te meʼa ʼaia ʼe ko te ʼAtua,+ ʼae neʼe ina foaki mai kia tatou te laumalie ohage ko he fakamoʼoni ʼo te meʼa ʼae ka hoko mai.+

6 ʼE tou lototoʼa tuʼumaʼu pea mo iloʼi ʼe tou mamaʼo mai te ʼAliki ʼi tatatou kei maʼuʼuli* ʼi ʼotatou sino,+ 7 he ʼe tou haʼele ʼaki te tui kae mole ʼaki te sio. 8 Kae ʼe tou lototoʼa pea ʼe tou leleiʼia age ke tou maʼuʼuli mo te ʼAliki ʼi tatatou maʼuʼuli ʼi te sino ʼaeni.+ 9 Koia pe ʼe tou nonofo mo ia peʼe tou mamaʼo mai ia ia, ʼe tou faiga ke ina leleiʼia tatou. 10 He ʼe tonu ke tou tutuʼu* fuli ia muʼa ʼo te fakamauʼaga ʼa Kilisito,* ke tou tahi maʼu te totogi ʼae ʼe mulimuli ki te ʼu meʼa ʼae neʼe tou fai ʼi te sino, pe ʼe lelei peʼe kovi.+

11 Koia ʼi tamatou mahino ʼae ʼe tonu ke matou manavasiʼi ki te ʼAliki, ʼe matou haga fakalotoʼi te hahaʼi ke natou fakalogo mai kia matou, kae ʼe iloʼi matou e* te ʼAtua. ʼE au fakaʼamu neʼe tokoni atu ʼokotou leʼo ʼo loto ke kotou iloʼi pe ko te faʼahiga hahaʼi feafeaʼi ia matou. 12 ʼE mole matou toe fia vikiʼi matou kae ʼe matou tuku atu he faigamalie ke kotou fiameʼameʼa ʼuhi ko matou, ke feala ai ke kotou tali kia natou ʼae ʼe fiameʼameʼa ʼi te ʼu meʼa ʼae ʼe ha ki tuʼa,+ kae mole ko te ʼu meʼa ʼae ʼi te loto. 13 He ʼe kapau neʼe matou vavale,+ neʼe matou vavale maʼa te ʼAtua, pea kapau ʼe matou aga fakapotopoto, ʼe matou aga fakapotopoto maʼa koutou. 14 He ʼe ko te ʼofa ʼae neʼe fakaha e Kilisito ʼe ina puleʼi katoa matou, koteʼuhi koʼeni tamatou mahino: Neʼe mate he tagata ʼe tahi maʼa te hahaʼi fuli+ he neʼe mamate te hahaʼi fuli. 15 Pea neʼe mate maʼa te hahaʼi fuli ke feala ai kia natou ʼae ʼe maʼuʼuli ke mole natou maʼuʼuli pe maʼa natou totonu,+ kae maʼa ia ʼae neʼe mate maʼa natou pea kua fakatuʼuake.

16 Koia ʼe mole kei matou iloʼi he tahi ʼaki te manatu fakatagata.+ Logope la neʼe matou iloʼi ia Kilisito ʼi tona ʼuhiga kakano, kae ʼi te temi nei ʼe mole kei matou iloʼi ia ia ʼi tona ʼuhiga ʼaia.+ 17 Koia kapau ʼe fakatahi he tahi mo Kilisito, pea ʼe ko he fakatupu foʼou.+ ʼE pulihi te ʼu meʼa ʼafeā, pea koʼeni, ʼe tupu mai te ʼu meʼa foʼou! 18 Kae ko meʼa fuli ʼe haʼu mai te ʼAtua, ʼae neʼe ina fakatokatoka matou mo ia ʼaki ia Kilisito+ pea mo ina foaki mai kia matou te minisitelio ʼo te fakatokatoka,+ 19 ko tona fakaʼuhiga, ko te ʼAtua neʼe ina fakatokatoka te hahaʼi mo ia ʼaki ia Kilisito,+ ʼo mole ina tokagaʼi ʼanatou hala,+ pea neʼe ina foaki mai kia matou te logo ʼo te fakatokatoka.+

20 Koia ko tatou ko te ʼu fakafofoga+ moʼo fetogi ʼo Kilisito.+ Pea ʼi tatatou fetogi ia Kilisito, ʼe tou kole mamahi: “Kotou fakatokatoka mo te ʼAtua.” ʼE hage ʼe kole mamahi ia e te ʼAtua ʼaki ia tatou. 21 Neʼe ina momoli ia ia ʼae neʼe mole agahala+ ko he sakilifisio maʼa ʼatatou agahala, ke feala ai ke tou liliu ʼo faitotonu ia muʼa ʼo te ʼAtua ʼaki ia ia.+

6 ʼI tamatou gaue fakatahi mo te ʼAtua,+ ʼe matou kole mamahi atu ke ʼaua naʼa kotou tali noa ia tona ʼofa makehe.+ 2 He neʼe ina ui: “ ʼI he temi faigamalie neʼe au logo atu, pea ʼi he ʼaho ʼo te haofaki neʼe au tokoni atu.”+ Koʼeni ʼe ko te temi faigamalie ʼaeni. Koʼeni, ʼe ko te ʼaho ʼaeni ʼo te haofaki.

3 ʼE mole matou fai he meʼa ʼe fakatupu higa ki he tahi, naʼa valoki ai tamatou minisitelio.+ 4 Kae ʼi te ʼu faʼahi fuli ʼe matou fakaha ko matou ko te ʼu tagata faifekau ʼa te ʼAtua:+ Neʼe matou katakiʼi te ʼu ʼahiʼahi kehekehe, mo te ʼu mamahi, mo te ʼu faigataʼaʼia pea mo te ʼu fihifihia.+ 5 Neʼe ta matou, neʼe pilisoniʼi matou,+ neʼe fakafeagai mai he hahaʼi kaugamalie agakovi, neʼe matou gaue kinakina, neʼe mole matou mamoe ʼi ʼihi po, neʼe matou pakupaku ʼi ʼihi temi.+ 6 ʼE matou maʼuli maʼa, ʼe alu tahi ʼomatou maʼuli mo te ʼatamai malama, ʼe matou kataki fualoa,+ ʼe matou agaʼofa,+ ʼe matou tuku te laumalie maʼoniʼoni ke ina takitaki ʼomatou maʼuli, ʼe mole matou ʼofa malualoi.+ 7 ʼE matou tala te moʼoni, ʼe matou falala ki te malohi ʼo te ʼAtua,+ ʼe matou maʼu te ʼu mahafu ʼo te faitotonu+ ʼi te nima mataʼu* pea mo te nima hema.* 8 ʼE fakakololiaʼi mo fakalainoaʼi matou, ʼe valokiʼi mo vikiʼi matou. ʼE fakaʼuhiga matou e te hahaʼi ohage ko he ʼu hahaʼi kaka kae ʼe matou tala ia te moʼoni, 9 ohage ko he ʼu hahaʼi ʼe mole iloʼi kae ʼe iloʼi matou e te ʼAtua, ohage ʼe matou meihiʼi mamate* kae ʼe matou maʼuʼuli,+ ohage ʼe tauteaʼi* matou kae ʼe mole matehi matou.+ 10 Ki te manatu ʼa te hahaʼi ʼe matou lotomamahi kae ʼe matou fakafiafia tuʼumaʼu, ʼe matou masisiva kae ʼe matou fakakoloa te tokolahi, ʼe mole hamatou meʼa kae ʼe matou maʼu ia meʼa fuli.+

11 ʼE matou palalau fakahagatonu atu, kau Kolonito, pea ʼe matou ʼoʼofa moʼoni ia koutou. 12 ʼE mole matou fakatuʼakoi tomatou ʼofa ʼae kia koutou,+ kae ʼe ko koutou ʼae ʼe kotou fakatuʼakoi tokotou ʼofa mamahi ʼae kia matou. 13 Koia kotou fai feia maʼa matou, ʼe au palalau atu kia koutou ohage ko haku ʼu fanau, ke lahi age tokotou ʼofa ʼae kia matou.+

14 ʼAua naʼa kotou fakatahi mo te kau heʼe tui.*+ He ʼe alu tahi feafeaʼi ia te faitotonu pea mo te maumauʼi ʼo te lao?+ Peʼe alu tahi feafeaʼi ia te malama mo te fakapoʼuli?+ 15 Pea tahi ʼae, ʼe felogoi feafeaʼi ia Kilisito* mo Peliale?*+ Peʼe felogoi feafeaʼi ia he tahi ʼe tui* mo he tahi ʼe heʼe tui?+ 16 Pea ʼe feala koa ke ʼi ai he ʼu taula ʼatua ʼi te fale lotu ʼo te ʼAtua?+ He ʼe ko tatou ko he fale lotu ʼo te ʼAtua maʼuli,+ ohage ko tona ui e te ʼAtua: “ ʼE au nofo anai ʼi te lotolotoiga ʼo natou,+ mo au haʼele anai ʼi te lotolotoiga ʼo natou, pea ʼe au liliu anai ko tonatou ʼAtua, pea ʼe natou liliu anai ko taku hahaʼi.”+ 17 “ ‘Koia kotou olo kehe ia natou, pea mo mavae kehe mai ai,’ ko te ui ʼaia ʼa Sehova,* ‘pea tuku takotou fāfā ki te meʼa ʼae ʼe heʼe maʼa.’ ”+ “ ‘Pea ʼe au tali anai koutou.’ ”+ 18 “ ‘ ʼE au liliu anai ko hakotou tamai+ pea ʼe kotou liliu anai ko ʼoku foha mo ʼofafine,’+ ko te ui ʼaia ʼa Sehova* te Mafimafi.”

7 Koia ʼi tatatou maʼu te ʼu fakapapau ʼaia,+ kau ʼofaina, tou fakamaʼa ia tatou mai te ʼu ʼuli fuli ʼo te sino pea mo te ʼatamai,+ ke katoa ai totatou maʼoniʼoni ʼi te manavasiʼi ki te ʼAtua.

2 Kotou tali matou ʼi ʼokotou loto.+ Neʼe mole matou agakovi ki he tahi, neʼe mole matou ʼulihi he tahi, pea neʼe mole matou kakaʼi he tahi ke matou maʼu mai ai he ʼu lelei.+ 3 ʼE mole au ui atu te faʼahi ʼaia moʼo tauteaʼi ʼo koutou. Neʼe kua au ʼosi ui atu ʼe matou ʼoʼofa mamahi ia koutou pea ʼe mole feala ke fetogi te aluʼaga ʼaia e te maʼuli peʼe ko te mate. 4 ʼE au palalau fakahagatonu atu kia koutou. ʼE au fiameʼameʼa ʼo ʼuhiga mo koutou. ʼE fimalie toku loto, pea ʼe lahi ʼaupito toku fiafia ʼi ʼomatou mamahi fuli.+

5 ʼI tamatou tau atu ki Masetonia,+ neʼe mole matou fimalie, kae neʼe hoko atu pe tamatou tali mamahi ʼi te ʼu faʼahi fuli: Neʼe fakafeagai mai te hahaʼi kia matou, pea neʼe matou tuʼania ʼo ʼuhiga mo te ʼu kokelekasio. 6 Kae ko te ʼAtua, ʼae ʼe ina fakafimalieʼi ia natou ʼae ʼe lotovaivai,+ neʼe ina fakafimalieʼi matou ʼaki te ʼi heni ʼa Tito, 7 ʼo mole gata ʼaki pe tana ʼi heni kae neʼe matou toe fimalie ʼaki te fakafimalie ʼae neʼe ina maʼu ʼuhi ko koutou. Neʼe ina fakamatala mai kia matou ia takotou fakaʼamu ʼae ke kotou sisio kia au, mo takotou lotomamahi, pea mo takotou tuʼania* ʼo ʼuhiga mo au, ʼo lahi ʼaupito ai toku fiafia.

8 Tatau aipe pe neʼe au fakalotomamahiʼi koutou ʼaki taku tohi,+ kae ʼe mole au fakahemala. Kapau neʼe au fakahemala (ʼi taku sio ʼae neʼe kotou lotomamahi ʼi te tohi ʼaia, kae neʼe fakatemi pe), 9 ʼi te temi nei kua au fiafia, mole ʼuhi ko takotou lotomamahi, kae ʼuhi neʼe kotou lotomamahi ʼo tupu ai takotou fakahemala. Koia neʼe kotou lotomamahi ʼo alu tahi mo te finegalo ʼo te ʼAtua, ke mole kotou mamahi ai ʼuhi ko matou. 10 Koteʼuhi ʼe fua lelei tuʼumaʼu kia tatou ia te lotomamahi ʼae ʼe alu tahi mo te finegalo ʼo te ʼAtua, ʼae ʼe ina taki te hahaʼi ke natou fakahemala mai ʼanatou agahala pea ke natou maʼu ai ia te haofaki.+ Kae ko te lotomamahi ʼo te malamanei ʼe ina taki ki te mate. 11 Koia kotou vakaʼi te ʼu fua ʼo ʼakotou faiga ʼae neʼe tupu mai tokotou lotomamahi ʼae ʼe alu tahi mo te finegalo ʼo te ʼAtua: Neʼe kotou fakalakatonuʼi ia koutou, neʼe kotou fehiʼa ki te meʼa ʼae ʼe kovi, neʼe kotou manavasiʼi ki te ʼAtua, neʼe kotou loto moʼoni ke kotou fakahemala, neʼe kotou faʼafai, neʼe kotou fakatokatoka te aluʼaga neʼe kovi.+ ʼI te ʼu faʼahi fuli neʼe kotou fakaha ai ʼe kotou maʼa* ʼi te fihifihia ʼaia. 12 Koia neʼe mole au faitohi atu ʼuhi ko ia ʼae neʼe ina fai te kovi+ peʼe ʼuhi ko ia ʼae neʼe ina tali te kovi, kae ke ha lelei takotou fia fakalogo kia matou ia muʼa ʼo te ʼAtua. 13 Ko te tupuʼaga ʼaia ʼo tamatou fimalie.

Pea neʼe mole gata ʼaki pe tamatou fimalie, kae neʼe matou toe fiafia lahi ʼuhi ko te fiafia ʼa Tito, he neʼe kotou fakafimalieʼi fuli tona loto. 14 Kapau neʼe au fiameʼameʼa kia ia ʼo ʼuhiga mo koutou, neʼe mole au ufiufi ai, kae ʼe moʼoni tamatou fiameʼameʼa ia muʼa ʼo Tito, ohage pe ko meʼa fuli ʼae neʼe matou tala atu kia koutou. 15 Koia ʼe lahi ai te ʼofa mamahi ʼo Tito kia koutou ʼi tana manatuʼi takotou fakalogo fuli,+ pea mo takotou fakatalitali ia ia ʼaki he fakaʼapaʼapa lahi. 16 ʼE au fiafia koteʼuhi ʼe au falala kia* koutou ia meʼa fuli.

8 Koia ʼu tehina, ʼe matou fia palalau atu ʼo ʼuhiga mo te ʼofa makehe ʼo te ʼAtua, ʼae neʼe foaki ki te ʼu kokelekasio ʼo Masetonia.+ 2 Lolotoga ia he ʼahiʼahi lahi ʼi te mamahi, neʼe natou fakaha ai he fiafia lahi mo he lotofoaki, logope la tonatou masisiva. 3 Neʼe natou foaki ʼo mulimuli ki ʼonatou fealagia,+ pea ʼi tona fakahagatonu neʼe natou foaki ʼo laka age ʼi ʼonatou fealagia.+ Ko au totonu ʼe au fakamoʼoni ki te faʼahi ʼaia. 4 Pea neʼe ko natou totonu pe ʼae neʼe natou haga kole mamahi mai te fealagia ʼae ke natou foaki, pea mo kau ki te gaue tokoni maʼa te kau maʼoniʼoni.+ 5 Pea neʼe natou fai ʼo laka age ʼi te meʼa ʼae neʼe matou ʼamanaki ki ai, ʼo natou gaue fakamalotoloto muʼa maʼa te ʼAliki pea maʼa matou ʼo mulimuli ki te finegalo ʼo te ʼAtua. 6 Ko te tupuʼaga ʼaia ʼo tamatou fakalotomalohiʼi ia Tito+ ke ina fakaʼosi te tanaki ʼo ʼakotou meʼa ʼofa, he neʼe ko ia ʼae neʼe ina kamata te gaue ʼaia ia koutou. 7 Pea ʼe kotou lelei tukupau ia meʼa fuli, ʼi te tui, mo takotou poto palalau, mo tokotou ʼatamai malama, mo takotou faʼafai ia meʼa fuli, pea ʼe kotou ʼoʼofa ohage ko tamatou ʼoʼofa kia koutou. Koia ke lahi takotou lotofoaki.+

8 ʼE au ui atu te faʼahi ʼaia, ʼe mole ko he fakatotonu, kae ke kotou tokagaʼi te fakamalotoloto ʼa ʼihi pea mo ʼahiʼahiʼi pe ʼe moʼoni tokotou ʼofa. 9 He ʼe kotou iloʼi te ʼofa makehe ʼo totatou ʼAliki ko Sesu Kilisito:* Logope la tona koloaʼia, neʼe liliu ʼo masiva maʼa koutou,+ ke kotou liliu ai ʼo koloaʼia ʼi tona masiva.

10 Pea koʼeni taku manatu:+ ʼE fua lelei te faʼahi ʼaia kia koutou, koteʼuhi kua hili ki ai te taʼu katoa, neʼe mole kotou kamata pe te tanaki ʼaia kae neʼe kotou toe fakaha ʼe kotou holi ke kotou fai. 11 Koia ʼi te temi nei, kotou fakaʼosi te gaue ʼae neʼe kotou kamata fai, ke katoa ai takotou lotolelei ki te gaue ʼaia ʼo mulimuli ki te ʼu meʼa ʼae ʼe kotou maʼu. 12 He ʼe kapau ʼe foaki e he tahi hana meʼa ʼofa ʼaki he lotolelei, ʼe tali e te ʼAtua tana meʼa ʼofa, he ʼe ina foaki ʼo mulimuli ki te meʼa ʼae ʼe ina maʼu,+ kae mole ki te meʼa ʼae ʼe mole ina maʼu. 13 He ʼe mole au loto ke faigafua ki ʼihi, kae faigataʼa maʼa koutou. 14 Kae ʼaki takotou mahu ke fakakatoa ai te meʼa ʼae ʼe ʼaoga kia natou, pea ʼaki tanatou mahu ke fakakatoa ai te meʼa ʼae ʼe ʼaoga kia koutou, ke vaevae fakatatau ai. 15 Ohage ko tona tohi: “Ko ia ʼae neʼe ina maʼu lahi neʼe mole lahi fau, pea ko ia ʼae neʼe ina maʼu veliveli neʼe mole veliveli fau.”+

16 ʼE matou fakafetaʼi ki te ʼAtua he ʼe lototokaga ia Tito kia koutou ohage pe ko matou,+ 17 koteʼuhi neʼe ina tali tamatou fakalotomalohi, pea ʼuhi ko tana faʼafai, neʼe ko ia totonu pe ʼae neʼe fia alu atu kia koutou. 18 Kae ʼe matou fekauʼi atu mo ia te tehina ʼae ʼe vikiʼi ʼi te ʼu kokelekasio fuli ʼuhi ko tana fakamafola te logo lelei. 19 Pea ʼe mole gata ai, kae neʼe toe hinoʼi ia ia e te ʼu kokelekasio ko homatou kaugā fagona ʼi tamatou tokaga ki te meʼa ʼofa ʼaia ki te kololia ʼo te ʼAliki pea ʼe ko he fakamoʼoni ʼo tamatou lotolelei ke matou tokoni ki ʼihi. 20 Koia ʼe matou fai feia ke mole valokiʼi matou e he tahi ʼo ʼuhiga mo te meʼa ʼofa lahi ʼaia ʼae ʼe matou tokakaga ki ai.+ 21 He ʼe matou ‘tokakaga kia meʼa fuli ʼaki he aga fakahagatonu, ʼo mole gata pe ia muʼa ʼo Sehova* kae ʼo toe feia pe ia muʼa ʼo te tagata.’+

22 Pea ʼe matou fekauʼi atu mo natou ia totatou tehina ʼae neʼe matou tau ʼahiʼahiʼi pea matou sisio ai neʼe faʼafai ʼi te ʼu aluʼaga kehekehe. Kae ʼi te temi nei kua ʼaʼasili age tana faʼafai ʼuhi ko tana falala lahi ʼae kia koutou. 23 Kapau ʼe fai atu he ʼu fehuʼi ʼo ʼuhiga mo Tito, pea kotou ui age ʼe kaugā fagona pea mo kaugā gaue mo au ke fua lelei kia koutou. Peʼe kapau ʼe fai atu he ʼu fehuʼi ʼo ʼuhiga mo ʼotatou tehina, pea kotou ui age ʼe ko he ʼu apositolo ʼo te ʼu kokelekasio pea ʼe natou gaue ki te kololia ʼo Kilisito. 24 Koia kotou fakaha ki te ʼu tehina ʼaia ʼe kotou ʼoʼofa ia natou,+ pea mo fakaha ki te ʼu kokelekasio pe koʼe ʼe matou fiameʼameʼa ia koutou.

9 Pea ʼo ʼuhiga leva mo te tokoni ʼaia ki te kau maʼoniʼoni,+ ʼe mole ʼaoga ke au faitohi atu, 2 he ʼe au iloʼi ʼe kotou lotolelei ke kotou tokoni. ʼE au fiameʼameʼa ʼo ʼuhiga mo koutou ki te kau Masetonia. Neʼe au ui age kia natou, ko koutou ʼae ʼi Akaia kua taʼu katoa takotou tokalelei ke kotou tokoni. Pea ko takotou faʼafai neʼe ina uga te tokolahi ia natou ke natou toe lotolelei. 3 Kae ʼe au fekauʼi atu te ʼu tehina ke ʼaua naʼa to noa tamatou fiameʼameʼa ia koutou ʼo ʼuhiga mo te faʼahi ʼaia pea ke kotou nonofo teuteu ohage ko taku fakaha age kia natou. 4 Koteʼuhi kapau ʼe au alu atu mo he kau Masetonia ʼo matou maʼu atu heʼeki kotou tokalelei, ʼe fakaufiufi anai kia matou ʼuhi ko tamatou falala ʼae kia koutou, pea ʼe toe fakaufiufi anai kia koutou. 5 Koia neʼe au manatu ai ʼe ʼaoga ke fakalotomalohiʼi te ʼu tehina ke natou olo fakatomuʼa atu pea ke natou tanaki ʼakotou meʼa ʼofa ʼae neʼe kotou fakapapauʼi. Ka matou tau atu la, kua tokalelei te meʼa ʼofa lahi ʼaia pea ʼe fakaha ai ʼe kotou foaki ʼaki he lotolelei kae mole ʼuhi he ʼe fakakinauʼi koutou.

6 Kae ki te faʼahi ʼaia, ko ia ʼae ʼe veliveli tana tūtū, ʼe veliveli anai te meʼa ʼae ka ina utu, pea ko ia ʼae ʼe lahi tana tūtū ʼe lahi anai te meʼa ʼae ka ina utu.+ 7 Ke tahi foaki ʼo mulimuli ki te meʼa ʼae kua ina fakatotonu ʼi tona loto, ʼo mole foaki ʼaki he lotofakahemala peʼe fakakinau,+ koteʼuhi ʼe ʼofa te ʼAtua ki ʼae ʼe ina foaki ʼaki he loto ʼe fiafia.+

8 Koia ʼe feala ki te ʼAtua ke ina fakatupu tona ʼofa makehe ʼo lahi kia koutou ke kotou feʼauga tuʼumaʼu ia meʼa fuli, pea ke kotou maʼu lahi ai te ʼu meʼa ʼae ʼe ʼaoga moʼo fai te ʼu gaue lelei fuli.+ 9 (Ohage ko tona tohi: “Neʼe mole ina lau te meʼa ʼae neʼe ina tufa, neʼe ina foaki ki te kau masisiva. ʼE tuʼu anai tana faitotonu ʼo talu ai.”+ 10 Pea ko Ia ʼae ʼe ina foaki lahi te pulapula ki te tagata nunusi pulapula pea mo te pane ke ina kai, ʼe ina foaki lahi anai te pulapula maʼa koutou ke kotou nunusi, pea mo ina fakatupu lahi anai te ʼu fua ʼo takotou faitotonu.) 11 ʼE tapuakiʼi koutou e te ʼAtua ia meʼa fuli ke feala ai ke kotou foaki ʼaki he lotolelei ʼi he ʼu aluʼaga kehekehe, ʼo tupu ai he fakafetaʼi ki te ʼAtua ʼaki ia matou. 12 Koteʼuhi ko te tokoni ʼaia ʼe mole ko te foaki pe ʼo te ʼu meʼa ʼae ʼe ʼaoga ki te kau maʼoniʼoni,+ kae ke toe lahi ai te fakafetaʼi ki te ʼAtua. 13 ʼAki te fakamoʼoni ʼae ʼe foaki e te gaue tokoni ʼaia, ʼe fakakololiaʼi e te hahaʼi ia te ʼAtua ʼuhi ko takotou talagafua ki te logo lelei ʼo ʼuhiga mo Kilisito,* ʼae ʼe kotou tala ia muʼa ʼo te hahaʼi, pea ʼuhi ko takotou foaki ʼaki he lotolelei ʼakotou meʼa ʼofa maʼa te kau maʼoniʼoni pea mo te hahaʼi fuli.+ 14 Pea ʼe natou faikole fakamalotoloto ki te ʼAtua maʼa koutou, pea mo natou ʼoʼofa kia koutou ʼuhi ko te ʼofa makehe ʼae ʼe fakaha atu e te ʼAtua kia koutou.

15 Ke tou fakafetaʼi ki te ʼAtua ʼo ʼuhiga mo tona meʼa ʼofa taulekaleka.

10 Pea ko au Paulo, ʼe au kole mamahi atu kia koutou ʼaki te agamalū pea mo te agaʼofa ʼo Kilisito.*+ ʼE au matavaivai moka au fakatahi mo koutou,+ kae ʼe au lototoʼa moka ʼe au faitohi atu.+ 2 ʼE au fakaʼamu ka au tau atu, kua fetogi ia natou ʼae ʼe natou ui ʼe matou haʼele ʼo mulimuli ki te kakano, ke mole au fakatonutonuʼi ai natou. 3 He ʼe logo la ʼe matou maʼuʼuli ʼi te kakano, kae ko tamatou tau ʼe mole mulimuli ia ki te kakano. 4 He ʼe ko te ʼu mahafu ʼo tamatou tau ʼe mole fakatagata ia,+ kae ʼe malohi ʼaki te ʼAtua+ moʼo holoʼi te ʼu meʼa ʼae ʼe malohi ohage ko he ʼu tule. 5 He ʼe matou holoʼi te ʼu manatu pea mo te ʼu aluʼaga fuli ʼae ʼe fakafeagai ki te ʼatamai malama ʼo ʼuhiga mo te ʼAtua.+ ʼE hage ʼe matou puke pea mo taki te ʼu manatu ʼa te hahaʼi ke fakalogo kia Kilisito. 6 Pea kua matou tokalelei moʼo tauteaʼi ia natou fuli ʼae ʼe talagataʼa,+ moka kua kotou fakaha ia te katoa ʼo takotou fakalogo.

7 ʼE kotou fakatokagaʼi te hahaʼi ʼo mulimuli ki te meʼa ʼae ʼe ha ki tuʼa. Kapau ʼe tui papau he tahi ʼe ko ia ko he kaugana ʼa Kilisito, ke ina toe fakakaukauʼi te faʼahi ʼaeni: Ohage pe ko ia ʼe ko te kaugana ʼa Kilisito, pea ʼe toe feia pe mo matou. 8 ʼE mole au ufiufi anai, mo kapau la ʼe lahi fau taku fiameʼameʼa ʼo ʼuhiga mo te pule ʼae neʼe foaki mai e te ʼAliki kia matou moʼo fakalotomalohiʼi ʼo koutou kae mole moʼo fakalotomamahiʼi ʼo koutou.+ 9 He ʼe mole au loto ke hage ʼe au faiga ke au fakamatakuʼi koutou ʼaki ʼaku tohi. 10 He ʼe ui e ʼihi: “Ko ʼana tohi ʼe maʼuhiga mo malohi, kae ka nofo ia mo tatou ʼe matavaivai pea ʼe vaʼiganoa ʼana palalau.” 11 Ke iloʼi e natou ʼae ʼe palalau feia ko te meʼa ʼae ʼe matou tohi atu ʼi tamatou pupuli ʼe matou fakahoko anai moka matou tau atu.+ 12 ʼE mole matou fia ui ʼe matou hage ko natou ʼae ʼe natou vikiʼi pe ia natou totonu. Pea ʼe mole matou vakaʼi ia matou totonu ʼo mulimuli ki te meʼa ʼae ʼe natou fai.+ ʼE natou vakaʼi pe ia natou totonu ʼo mulimuli ki te meʼa ʼae ʼe natou ui ʼe lelei, ʼo ha ai ʼe mole honatou ʼatamai.+

13 Kia matou ʼe matou fiameʼameʼa anai, kae ʼo mole laka age ʼi te meʼa ʼae neʼe tonu ke matou fai. ʼE matou fiameʼameʼa anai ʼi te meʼa ʼae neʼe matou lava fakahoko ʼi te gaue ʼae neʼe foaki mai e te ʼAtua kia matou. Pea mo koutou foki ʼe kotou kau ʼi te gaue ʼaia.+ 14 ʼI tamatou tau atu kia koutou, neʼe mole matou fai he meʼa neʼe mole hinoʼi mai e te ʼAtua kia matou, kae ko matou ʼae neʼe matou ʼuluaki tala atu te logo lelei ʼo ʼuhiga mo Kilisito kia koutou.+ 15 ʼE mole matou fiameʼameʼa ʼo ʼuhiga mo he ʼu potu neʼe mole matou faifakamafola ai peʼe ʼi te gaue ʼae neʼe fai e ʼihi. Kae ʼe matou ʼamanaki, ʼi te tuputupu ʼo takotou tui, ʼe toe tuputupu anai te gaue ʼae neʼe matou fai ʼi te potu ʼae neʼe matou faifakamafola ai. Pea ʼe feala ke lahi age ai tamatou gaue, 16 ke matou tala te logo lelei ki te ʼu fenua ʼae, ke ʼaua naʼa matou fiameʼameʼa ʼi te meʼa ʼae neʼe fai e ʼihi ʼi te ʼu kolo ʼae neʼe fekauʼi natou ki ai. 17 “Kae ko ia ʼae ʼe laupisi, ke laupisi ʼo ʼuhiga mo Sehova.”*+ 18 He ʼe mole ko ia ʼae ʼe ina vikiʼi ia ia totonu ʼae ʼe tali,+ kae ʼe ko ia ʼae ʼe vikiʼi e Sehova.*+

11 ʼE au fakaʼamu ke kotou katakiʼi haku kiʼi agavale. Pea ʼe mahino ia ʼe kotou katakiʼi au! 2 Koteʼuhi ʼe au maheka ʼo ʼuhiga mo koutou, kae ʼe ko he maheka ʼe alu tahi mo te finegalo ʼo te ʼAtua,* he neʼe au fakapapauʼi koutou ke kotou ʼohoana mo he tagata pe ʼe tahi, ia Kilisito,* ke au fakaha koutou kia te ia ohage ko he taʼahine taupoʼou.+ 3 Kae ohage pe ko te fakahalaʼi ʼo Eva e te gata ʼaki ʼana kaka,+ ʼe au mataku naʼa ʼulihi ʼokotou ʼatamai ʼo puli ai takotou agatonu pea mo takotou maʼa ʼae ʼe tuha mo Kilisito.+ 4 Koteʼuhi kapau ʼe haʼu he tagata ʼo fakamafola atu he tahi age Sesu ʼi ʼae neʼe matou fakamafola atu, peʼe kotou tali ke takitaki koutou e he tahi age malohi ʼi ʼae kua kotou tali, peʼe ko he tahi age logo lelei ʼi ʼae kua kotou tali,+ ʼe kotou katakiʼi ia te taʼi tagata ʼaia. 5 Koteʼuhi ʼi taku ia manatu, neʼe mole he faʼahi neʼe au malalo age ai ʼi ʼakotou apositolo lalahi.+ 6 Tatau aipe pe ʼe mole au poto lelei ʼi te palalau,+ kae ʼe au maʼu ia te ʼatamai malama. Pea neʼe matou fakaha fakalelei atu ia te ʼatamai malama ʼaia kia koutou, ʼi te ʼu aluʼaga fuli pe pea ʼi te ʼu meʼa fuli pe.

7 Neʼe au tala fakafiafia atu ia te logo lelei mai te ʼAtua, pea neʼe mole au kole atu he falā. Neʼe au agahala koa ʼi taku fakamalaloʼi ifo ia au totonu ke fakamaʼuhigaʼi ai koutou?+ 8 Neʼe au fakamasivaʼi* ʼihi atu kokelekasio ʼi taku tali ʼanatou meʼa ʼofa* ke feala ai haku tokoni atu.+ 9 Kae ʼi taku nofo ʼae mo koutou pea mo ʼaoga he meʼa kia au, neʼe mole au liliu ko he kavega ki he tahi, koteʼuhi ko te ʼu tehina ʼae neʼe ʼomai mai Masetonia neʼe natou foaki lahi mai te ʼu meʼa ʼae neʼe ʼaoga kia au.+ ʼEi, ʼi te ʼu aluʼaga fuli pe, neʼe au faiga ke ʼaua naʼa au liliu ko he kavega kia koutou, pea ʼe au haga fai feia pe anai.+ 10 ʼE au fakaha te moʼoni Fakakilisitiano, ʼo mole au tuku anai taku fiameʼameʼa ʼo ʼuhiga mo te faʼahi ʼaia+ ʼi te ʼu potu fenua ʼo Akaia. 11 Kotea tona tupuʼaga? ʼUhi koa he ʼe mole au ʼofa ia koutou? Kailoa ia, ʼe iloʼi e te ʼAtua ʼe au ʼofa ia koutou.

12 ʼE ʼi ai ʼihi ʼe natou fiameʼameʼa ʼo natou lau ʼe ko he kau apositolo ohage ko matou. Koia ko te meʼa ʼae ʼe au lolotoga fai, ʼe au hoko atu pe anai tona fai,+ ke ʼaua naʼa natou maʼu he tupuʼaga ke natou fiameʼameʼa ai. 13 Kae ko te ʼu tagata ʼaia ʼe ko he kau apositolo loi, ko he kau gaue kaka, ʼe natou fakaliliu ia natou totonu ko he kau apositolo ʼa Kilisito.+ 14 Pea ʼe mole fakapunamaʼuli te faʼahi ʼaia, koteʼuhi ʼe fakaliliu e Satana ia ia totonu ko he ʼaselo ʼe lelei.*+ 15 Koia ʼe mole fakapunamaʼuli ai mo kapau ʼe fakaliliu e ʼana tagata faifekau ia natou totonu ko he kau tagata faifekau ʼo te faitotonu. Kae ko te meʼa ʼae ka hoko anai kia natou ʼi te fakaʼosi, ʼe mulimuli pe anai ki ʼanatou gaue.+

16 ʼE au toe ui atu: Ke ʼaua naʼa manatu e he tahi ʼe au vale. Kae kapau ʼe ko takotou manatu ʼaia, pea kotou tali au ohage ko he tahi ʼe vale ke feala haku fiameʼameʼa veliveli foki mo au. 17 Ko te ʼu palalau ʼaeni ʼe au fai, ʼe ko he ʼu palalau ʼa he tahi ʼe vale, ʼe fiameʼameʼa pea mo falala fau kia ia totonu, kae ʼe mole ko he ʼu palalau ʼa he tahi ʼe mulimuli ki te faʼifaʼitaki ʼo te ʼAliki. 18 Mai tona aluʼaga ʼae ʼe fiameʼameʼa ia te tokolahi ʼo ʼuhiga mo te ʼu meʼa ʼo te malama ʼaeni, koia ʼe au toe fiameʼameʼa foki anai mo au. 19 Koteʼuhi ʼe kotou katakiʼi te hahaʼi vavale, ia koutou ʼae ʼe kotou ui ʼe kotou popoto. 20 ʼI tona fakahagatonu, ʼe kotou katakiʼi he tahi ʼe ina fakapopulaʼi koutou, mo he tahi ʼe ina faʼao ʼokotou koloa pea mo te ʼu meʼa ʼae ʼe kotou maʼu, mo he tahi ʼe ina fakatolaloʼi koutou, pea mo he tahi ʼe ina pāki koutou.

21 ʼE fakatupu ufiufi kia matou te ʼu palalau ʼaia, he ʼe hage neʼe matou vaivai.

Kae kapau ʼe lototoʼa ʼihi atu, ʼe au palalau vale, ʼe au toe lototoʼa foki mo au. 22 Ko natou koa ko he kau Hepeleo? Mo au foki la.+ Ko natou koa ko he kau Iselaele? Mo au foki la. Ko natou koa ko te hakoga ʼo Apalahamo? Mo au foki la.+ 23 Ko natou koa ko ni tagata faifekau ʼa Kilisito? ʼE au tali ohage ko he tagata vale, mo au foki la ʼi hona aluʼaga ʼe fakaofoofo age: Neʼe lahi age ʼaku gaue,+ neʼe tuʼa lahi age toku pilisoniʼi,+ mo toku ta, mo lahi age te ʼu aluʼaga ʼae neʼe au meihiʼi mate ai.+ 24 Neʼe tuʼa nima toku haha e te kau Sutea ʼo taki tuʼa 39 te foʼi ta,+ 25 neʼe tuʼa tolu toku ta ʼaki he ʼu kauʼi ʼakau,+ neʼe tuʼa tahi toku tuki makaʼi,+ neʼe tuʼa tolu te maumau ʼo te ʼu vaka ʼae neʼe au faifolau ai,+ neʼe au nofo ʼaho katoa mo po katoa ʼi te moana. 26 Neʼe tuʼa lahi taku fefolauʼaki, neʼe hoko kia au he ʼu tuʼutamaki ʼi te ʼu vai tafe, mai te hahaʼi kaihaʼa, mai taku hahaʼi totonu,+ mai te kau matapule,+ ʼi te ʼu kolo,+ ʼi te toafa, ʼi te tai, ʼi te lotolotoiga ʼo te ʼu tehina loi. 27 Neʼe au gaue kinakina mo mamahi, neʼe mole au mamoe ʼi ʼihi po,+ neʼe au fia kai mo fia inu,+ tuʼa lahi neʼe mole haku meʼa kai,+ neʼe au mokosia pea mo au masiva ʼi te meʼa laofi.*

28 ʼO hilifaki atu ki te ʼu faʼahi ʼaia, ʼe au tau ʼi te ʼaho fuli mo te tuʼania ʼo ʼuhiga mo te ʼu kokelekasio fuli.+ 29 Ka vaivai he tahi, ʼe au toe vaivai foki mo au. Pea ʼe au ita moka ʼe liʼaki e he tahi tana tui.

30 Kapau ʼe tonu ke au fiameʼameʼa, pea ʼe au fiameʼameʼa anai ʼo ʼuhiga mo te ʼu faʼahi ʼae ʼe ha ai toku vaivaiʼaga. 31 Ko te ʼAtua pea mo Tamai ʼo te ʼAliki ko Sesu, ia Ia ʼae ʼe tonu ke fakavikivikiʼi ʼo talu ai, ʼe ina iloʼi ʼe mole au loi. 32 ʼI te kolo ko Tamaso, ko te kovana ʼae neʼe fakalogo ki te hau ko Aletasi, neʼe ina fakatotonu ke leʼoleʼo ia te kolo ke puke au. 33 Kae neʼe fakahifo au ʼi he kato ʼi te matapa fakamalama ʼo te kaupa ʼo te kolo,+ ʼo au hao ai.

12 ʼE tonu ke au fiameʼameʼa. Logo la ʼe mole hona fua lelei, kae ʼe au palalau anai ʼo ʼuhiga mo te ʼu meʼa ʼae neʼe au sio mo logo ki ai+ pea neʼe fakaha mai e te ʼAliki.+ 2 Koia ʼe au iloʼi ia te tagata, ʼe ko te tisipulo ʼa Kilisito,* neʼe ʼave ki te tolu lagi* kua hili ki ai taʼu ʼe 14 (pea ʼe mole au iloʼi pe neʼe ʼave ʼaki tona sino peʼe kailoa, kae ʼe iloʼi e te ʼAtua). 3 ʼE au iloʼi ia te taʼi tagata ʼaia neʼe ʼave ki te palatiso (pea ʼe mole au iloʼi pe neʼe hoko ʼaki tona sino peʼe kailoa, kae ʼe iloʼi e te ʼAtua). 4 Pea ʼi tana ʼi te palatiso, neʼe logo ai ki he ʼu palalau ʼe mole feala ke fai pea ʼe mole gafua ke puʼaki e te tagata. 5 ʼE au fiameʼameʼa anai ʼo ʼuhiga mo te taʼi tagata ʼaia, kae ʼe mole au fiameʼameʼa anai ʼo ʼuhiga mo au totonu, gata pe ki ʼoku vaivaiʼaga. 6 Kapau ʼe au fiameʼameʼa, ʼe mole au hage anai ko he tagata vale he ʼe au fakaha anai ia te moʼoni. Kae ʼe mole au fiameʼameʼa anai, ke ʼaua naʼa vikiʼi au e he tahi ʼo laka age ʼuhi pe ko te ʼu meʼa ʼae ʼe au fai pea mo ui. 7 Kae ʼe mole tonu ke fakamaʼuhigaʼi au e he tahi ʼuhi ko te ʼu logo fakaofoofo ʼae neʼe fakaha mai.

Ke ʼaua naʼa au fiameʼalahi fau, neʼe ʼai te tala ki toku kakano,+ ko he ʼaselo ʼa Satana, ke ina ta tuʼumaʼu au ke mole au fiameʼalahi fau ai. 8 Tuʼa tolu neʼe au kolekole ki te ʼAliki ke ina toʼo te tala ʼaia. 9 Kae neʼe ina ui mai: “ ʼE feʼauga mo koe toku ʼofa makehe, ke liliu toku malohi ʼo katoa moka ke vaivai.”+ Koia ʼe au fiameʼameʼa anai ʼaki he fiafia lahi ʼo ʼuhiga mo ʼoku vaivaiʼaga, ke nofo te malohi ʼo Kilisito ia au.* 10 Koia ʼe au fiafia ai ʼi te ʼu vaivaiʼaga, ʼi te ʼu leakovi, ʼi te ʼu temi mamahi, ʼi te ʼu fakataga pea mo te ʼu faigataʼaʼia, ʼuhi ko Kilisito. Koteʼuhi ʼe hoki au malohi moka ʼe au vaivai.+

11 Kua au liliu ohage ko he tahi ʼe vale ʼuhi ko koutou, koteʼuhi neʼe mole kotou vikiʼi au. Kae neʼe mole he faʼahi neʼe au malalo age ai ʼi ʼakotou apositolo lalahi, logo la ko au ko he meʼa noa.+ 12 ʼE moʼoni, neʼe kotou sisio tonu ki te ʼu fakamoʼoni ʼo toku ʼuhiga apositolo, ʼaki taku faʼa kataki,+ mo te ʼu fakailoga, mo te ʼu meʼa fakaofoofo* pea mo te ʼu milakulo ʼae neʼe au fai.+ 13 Neʼe mole au liliu ko he kavega kia koutou.+ Pea neʼe ko te faʼahi pe ʼaia ʼae neʼe mole kotou tatau ai mo te tahi ʼu kokelekasio. Neʼe au faihala koa? Kapau koia, kotou fakamolemole mai.

14 ʼE ko te tuʼa tolu ʼaeni ʼo taku teuteu ke au alu atu, pea ʼe mole au liliu anai ko he kavega kia koutou. Koteʼuhi ʼe mole au kumi ʼokotou koloa+ kae ʼe ko koutou ʼae ʼe au kumi, he ʼe mole ʼa te ʼu fanau+ te tanaki ʼo he ʼu koloa maʼa ʼanatou matuʼā kae ko te ʼu matuʼā maʼa ʼanatou fanau. 15 Kia au, ʼe au fiafia lahi anai ʼi taku foaki atu te ʼu meʼa fuli ʼae ʼe au maʼu pea mo momoli toku maʼuli katoa maʼa koutou.*+ Kapau ʼe lahi toku ʼofa kia koutou, ʼe tonu koa ke veliveli age toku ʼofainaʼi? 16 Logo la te ʼu faʼahi ʼaia, neʼe mole au liliu ko he kavega kia koutou.+ Kae ʼe kotou ui ko au ko he tagata “kaka” pea neʼe au puke koutou “ ʼaki he puleʼaki kaka.” 17 Neʼe au fakaʼaogaʼi koa la he tahi ia natou ʼae neʼe au fekauʼi atu ke au maʼu ai he ʼu lelei mai ia koutou? 18 Neʼe au kole kia Tito ke alu atu kia koutou, pea neʼe au fekauʼi atu mo ia he tehina. Neʼe maʼu koa la e Tito he ʼu lelei mai ia koutou?+ Neʼe mole tatau koa la ʼamatou manatu? Neʼe mole tatau koa la ʼamatou gaue?

19 ʼI takotou lau te tohi ʼaeni, ʼe lagi kotou ui ʼe matou fakalakatonuʼi ia matou ʼi ʼokotou muʼa. Kailoa ia, kae ko matou ko he ʼu tisipulo ʼa Kilisito pea ʼe matou fakaha te moʼoni ia muʼa ʼo te ʼAtua. Kae ʼu ʼofaina, ʼe matou fai ia meʼa fuli moʼo fakalotomalohiʼi koutou. 20 Koteʼuhi moka au tau atu, ʼe au mataku naʼa mole kotou hage ko te meʼa ʼae ʼe au fakaʼamu ki ai, pea ʼe mole au hage ko te meʼa ʼae ʼe kotou fakaʼamu ki ai. Kae ʼe au mataku naʼa au maʼu ia koutou te kē, te maheka, te itaita, te fefihiʼaki, te fasituʼu, te faifatufatu, te fiameʼalahi pea mo te maveuveu. 21 Moka ʼe au toe alu atu anai, ʼe lagi fakamalaloʼi anai au e toku ʼAtua. ʼE lagi au lotomamahi anai ʼo ʼuhiga mo te tokolahi ʼo natou ʼae neʼe agahala ʼi te temi muʼa, kae neʼe mole natou fakahemala mai te ʼu aga heʼe maʼa, mo te ʼu felaveʼi fakasino heʼe ʼaoga* pea mo te ʼu aga fakalialia* ʼae neʼe natou fai.

13 ʼE ko te tuʼa tolu leva ʼaeni ʼo taku alu atu kia koutou. “ ʼE tonu ke fakatafito ia te ʼu palalau fuli ki te fakamoʼoni* ʼo he toko lua peʼe ko he toko tolu.”+ 2 Logo la taku puli ia koutou, kae ʼe hage pe kia au ko haku fakatahi tuʼa lua mo koutou, pea ʼe au fai fakatomuʼa te fakatokaga ʼaeni kia natou ʼae neʼe agahala ʼi te temi muʼa, ʼo feia kia koutou fuli: Kapau ʼe au toe alu atu, ʼe mole hao anai he tahi mai te fakatonutonu. 3 ʼE au fakamoʼoni atu ai anai ʼe palalau ia Kilisito* ʼaki ia au, pea ko Kilisito, ʼi ʼana felogoi mo koutou, ʼe mole vaivai ia kae ʼe malohi. 4 Koteʼuhi ʼe moʼoni, neʼe tutuki ki te pou ʼuhi ko tona ʼuhiga vaivai,* kae ʼe maʼuli ʼaki te malohi ʼo te ʼAtua.+ Pea ʼe moʼoni, ʼe matou toe vaivai mo matou ohage ko ia ʼi muʼa atu, kae ʼe matou maʼuʼuli fakatahi anai mo ia+ ʼaki te malohi ʼo te ʼAtua ʼae ʼe gaue ʼi ʼokotou maʼuli.+

5 Kotou haga vakavakaʼi pe ʼe kotou maʼuʼuli ʼo mulimuli ki te tui, pea kotou haga sivisivi ia koutou totonu.+ Pe ʼe mole kotou mahino koa ʼe fakatahi ia Sesu Kilisito mo koutou? Pe ʼe lagi mole kei leleiʼia koutou e te ʼAtua. 6 ʼE au fakaʼamu moʼoni ʼe kotou mahino anai ʼe kei leleiʼia matou e te ʼAtua.

7 ʼE matou kole ki te ʼAtua ke ʼaua naʼa kotou fai he meʼa ʼe kovi, ʼo mole tupu ke hage ʼe leleiʼia matou e te hahaʼi. Kae ʼe matou loto ke kotou fai te meʼa ʼae ʼe lelei, tatau aipe pe ʼe mole leleiʼia matou e te hahaʼi. 8 He ʼe mole feala ke matou fai he meʼa ʼe fakafeagai ki te moʼoni, kae ʼe ko he meʼa pe ia maʼa te moʼoni. 9 ʼE mahino ia ʼe matou fakafiafia moka ʼe kotou malolohi kae vaivai matou. Pea ʼe matou faikole ke kotou fakatonutonuʼi ʼakotou manatu. 10 Koia ʼe au tohi atu te ʼu meʼa ʼaia ʼi taku kei puli ia koutou, ke feia la moka ʼe au nofo anai mo koutou, ke ʼaua naʼa au fakaʼaogaʼi malohi te pule ʼae neʼe foaki mai e te ʼAliki+ moʼo fakalotomamahiʼi koutou kae moʼo fakalotomalohiʼi ʼo koutou.

11 Moʼo fakaʼosi, ʼu tehina, ke hoko atu takotou fakafiafia, mo takotou fakatonutonuʼi ʼo ʼakotou manatu, mo takotou tali ke fakafimalieʼi koutou,+ mo takotou manatu tahi,+ mo takotou maʼuʼuli ʼi te tokalelei.+ Pea ʼe nofo anai mo koutou te ʼAtua ʼo te ʼofa pea mo te tokalelei.+ 12 Kotou feʼalofaʼaki ʼaki he fekita.* 13 ʼE ʼoʼofa atu ia te kau maʼoniʼoni fuli.

14 Ke kotou maʼu fuli te ʼofa makehe ʼo te ʼAliki ko Sesu Kilisito pea mo te ʼofa ʼo te ʼAtua pea mo te ʼu lelei mai te laumalie maʼoniʼoni.