TE TOHI KI TE KAU KALATE

1 Ko au Paulo, he apositolo neʼe mole fakanofo e he tagata kae ko Sesu Kilisito*+ pea mo te ʼAtua te Tamai,+ ʼae neʼe ina fakatuʼuake ia Kilisito mai te kau mate. 2 Ko au mo te ʼu tehina fuli ʼae ʼe fakatahi mo au, ʼe matou faitohi ki te ʼu kokelekasio ʼo Kalate:

3 Ke foaki atu e te ʼAtua tatatou Tamai pea mo te ʼAliki ko Sesu Kilisito ia te ʼofa makehe pea mo te tokalelei. 4 Neʼe foaki e Kilisito ia ia totonu moʼo molehi ʼatatou agahala,+ ke feala hana haofaki tatou mai te malama* agakovi ʼaeni+ ʼo mulimuli ki te finegalo ʼo totatou ʼAtua pea mo Tamai.+ 5 Ke fakakololiaʼi te ʼAtua ʼo talu ai. Ameni.

6 ʼE au punamaʼuli ʼi takotou maliu kehe* fakavilivili mai ia Ia ʼae neʼe ina pauʼi koutou ʼaki te ʼofa makehe ʼo Kilisito, ʼo kotou tali te tahi age faʼahiga logo lelei.+ 7 ʼE mole ʼi ai he tahi age logo lelei. Kae ʼe ʼi ai ʼihi ʼe natou fakatupu maveuveu ia koutou+ pea mo natou faiga ke natou fulihi hala ia te logo lelei ʼo ʼuhiga mo Kilisito. 8 Kae ke malaʼia ia ia ʼae ʼe ina tala atu he logo lelei ʼe kehe age mo te logo lelei ʼae neʼe matou tala atu, tatau aipe pe ʼe ko he tahi ia matou peʼe ko he ʼaselo mai te lagi. 9 Ohage ko tamatou ui ʼi muʼa atu, ʼe au toe ui atu: Ke malaʼia ia ia ʼae ʼe ina tala atu he logo lelei ʼe kehe age mo ʼae neʼe kotou tali.

10 ʼE au faigaʼi nei koa ke au fakalotoʼi ni tagata peʼe ko te ʼAtua? Peʼe au faigaʼi koa ke leleiʼia au e te tagata? Ka na pau la neʼe kei leleiʼia au e te tagata, neʼe mole au liliu ko he kaugana ʼa Kilisito. 11 Koteʼuhi ʼu tehina, ʼe au loto ke kotou iloʼi ko te logo lelei ʼae neʼe au tala atu ʼe mole haʼu ia mai te tagata.+ 12 Koteʼuhi neʼe mole au tali te logo lelei ʼaia mai he tagata, pea neʼe mole akoʼi mai e he tagata, kae neʼe fakaha mai e Sesu Kilisito.

13 ʼE mahino ia, neʼe kotou logo ki te palalauʼi ʼo taku aga ʼi taku kau ʼi te temi muʼa ʼi te Lotu Sutea,+ ia te kovi ʼo taku fakatagaʼi pea mo taku maumauʼi ia te kokelekasio ʼa te ʼAtua.+ 14 Pea neʼe laka age taku lakalaka ki muʼa ʼi te Lotu Sutea ʼi te tokolahi ʼo taku hahaʼi ʼae neʼe matou taʼu tahi. Pea neʼe lahi age taku faʼafai ʼo ʼuhiga mo te ʼu talatisio ʼo ʼaku kui.+ 15 Kae neʼe fakagafua e te ʼAtua ke fanauʼi au e taku faʼe pea neʼe ina pauʼi au ʼaki tona ʼofa makehe.+ Neʼe ina leleiʼia 16 ke ina fakaʼaogaʼi au moʼo tala te logo lelei ki te hahaʼi ʼo te tahi atu ʼu puleʼaga ke natou iloʼi ai tona ʼAlo.+ ʼI tana filifili au ke au fai te faʼahi ʼaia, neʼe mole au kumi tokoni atu aipe ki he tahi.* 17 Pea neʼe mole au hake ki Selusalemi kia natou ʼae neʼe ʼuluaki apositolo ia au, kae neʼe au alu ki Alapi, pea neʼe au toe liliu leva ki Tamaso.+

18 Hili ki ai taʼu ʼe tolu, neʼe au hake leva ki Selusalemi+ ʼo ʼaʼahi ia Sefasi,*+ pea neʼe au nofo mo ia lolotoga ʼaho ʼe 15. 19 Kae neʼe mole au sio ki he tahi ʼo te kau apositolo, gata pe kia Sakopo+ te tehina ʼo te ʼAliki. 20 Pea ʼe au ui atu ia muʼa ʼo te ʼAtua, ko te ʼu meʼa ʼae ʼe au tohi atu ʼe mole ko ni loi.

21 Hili ia neʼe au alu ki te ʼu potu fenua ʼo Silia pea mo Silisia.+ 22 Kae neʼe heʼeki sisio te ʼu tisipulo ʼa Kilisito ʼo te ʼu kokelekasio ʼi Sutea kia au. 23 Neʼe gata pe tanatou logo ki te ʼu palalau ʼaeni: “Ko te tagata ʼae neʼe ina fakatagaʼi tatou ʼi te temi muʼa,+ kua ina tala ʼi te temi nei ia te logo lelei ʼo ʼuhiga mo te lotu ʼae neʼe ina faigaʼi ke ina pulihi.”+ 24 Koia neʼe natou fakakololiaʼi ai te ʼAtua ʼuhi ko au.

2 Hili ki ai taʼu ʼe 14, neʼe au toe hake leva ki Selusalemi mo Palenapa,+ pea neʼe au toe ʼave foki ia Tito.+ 2 Neʼe au hake ʼuhi ko te meʼa ʼae neʼe ha mai kia au, pea neʼe au fakaha age ki te ʼu tehina te logo lelei ʼae ʼe au fakamafola ʼi te ʼu puleʼaga kehekehe. Kae neʼe au fai te faʼahi ʼaia ia muʼa pe ʼo te ʼu tehina ʼae ʼe fakaʼapaʼapaʼi lahi, ke au iloʼi papau ai neʼe mole vaʼiganoa taku minisitelio. 3 Kae maʼiape la mo Tito,+ ʼae neʼe fakatahi mo au, neʼe mole fakamaʼua age ke silikosisio,*+ logo la neʼe ko he Keleka. 4 Kae neʼe hoko te fihifihia ʼuhi ko te ʼu tehina kaka ʼae neʼe feulufi fakafufu ki te kokelekasio,+ moʼo vakavakaʼi ia te ʼateaina+ ʼae ʼe tou maʼu ʼi totatou ʼuhiga tisipulo ʼa Kilisito* Sesu, pea ke natou fakapopulaʼi tatou.+ 5 Kae neʼe mole matou fakalogo kia natou,+ kailoa, maʼia ʼi he kiʼi lakaga,* ke feala ai hakotou haga taupau maʼu te moʼoni ʼo te logo lelei.

6 Kae ʼo ʼuhiga mo te ʼu tehina ʼae ʼe hage ʼe fakaʼapaʼapaʼi lahi,+ (ʼe mole hona ʼuhiga kia au tonatou aluʼaga ʼi muʼa atu, he ʼe mole tokagaʼi e te ʼAtua te meʼa ʼae ʼe ha ki tuʼa ʼi te tagata) neʼe mole natou fakaha mai he meʼa foʼou kia au. 7 Kae neʼe natou sisio neʼe tuku mai kia au te fakamafola ʼo te logo lelei ki te kau heʼe silikosisio,+ ohage pe ko tona tuku age kia Petelo te fakamafola ʼo te logo lelei ki te kau silikosisio 8 (he ʼe ko ia ʼae neʼe ina foaki kia Petelo te malohi ke ina fakahoko te gaue fakaapositolo ki te kau silikosisio, neʼe ina toe foaki mai kia au te malohi ke au fakahoko te gaue ʼaia ki te hahaʼi ʼo te ʼu puleʼaga kehekehe).+ 9 Pea neʼe natou tokagaʼi neʼe foaki mai kia au te ʼofa makehe.+ Koia ko Sakopo,+ mo Sefasi* pea mo Soane, te ʼu tehina ʼae ʼe natou hage ko te ʼu pou tafito ʼo te kokelekasio, neʼe natou faoʼi mai kia au mo Palenapa+ ʼonatou nima mataʼu, moʼo fakaha tanatou tali ʼae ke ma olo ki te hahaʼi ʼae ʼe mole Sutea kae olo natou ki te kau silikosisio. 10 Neʼe natou kole mai pe ke ma manatuʼi te kau masisiva, pea ʼe ko te faʼahi ʼaia neʼe au toe faiga fakamalotoloto ke au fai.+

11 Kae ʼi te temi ʼae neʼe haʼu ai ia Sefasi*+ ki Atiokia,+ neʼe au fakafeagai* fakahagatonu kia ia, he neʼe mole lelei te meʼa ʼae neʼe ina fai.* 12 Koteʼuhi ʼi muʼa ʼo te tau mai ʼa ʼihi tagata neʼe fekauʼi mai e Sakopo,+ neʼe kai mahani ia mo te hahaʼi ʼe mole Sutea.+ Kae ʼi te tau mai ʼa te ʼu tagata ʼaia, neʼe mole kei ina fai ia te faʼahi ʼaia pea neʼe mole kei fakatahi mo natou, he neʼe mataku ia ʼi te kau silikosisio.+ 13 Neʼe toe malualoi foki mo te tahi age kau Sutea, ohage pe ko ia, pea maʼiape la mo Palenapa neʼe mulimuli ki tanatou malualoi ʼaia. 14 Kae ʼi taku sio ʼae ki tanatou mole mulimuli fakalelei ki te moʼoni ʼo te logo lelei,+ neʼe au ui kia Sefasi* ia muʼa ʼo natou fuli: “Kapau ko koe, logo la ʼe ke Sutea kae ʼe ke maʼuli ohage ko te hahaʼi matapule kae mole ohage ko te kau Sutea, pea he koʼe ʼe ke fakamaʼua ki te hahaʼi matapule ke natou maʼuʼuli ʼo mulimuli ki te ʼu talatisio Fakasutea?”+

15 Ko tatou ʼae neʼe tutupu Sutea pea ʼe mole tou kau ʼi te hahaʼi agahala ʼo te ʼu puleʼaga, 16 ʼe tou iloʼi, ʼe mole faitotonu he tagata ia muʼa ʼo te ʼAtua ʼaki tana fai te ʼu gaue ʼo te lao, kae ʼaki pe tana tui+ kia Sesu Kilisito.+ Koia neʼe tou tui kia Kilisito Sesu, ke feala ai hatatou faitotonu ia muʼa ʼo te ʼAtua ʼuhi ko tatatou tui kia Kilisito kae mole ʼuhi ko te ʼu gaue ʼo te lao, he ʼe mole he tahi* ʼe faitotonu anai ia muʼa ʼo te ʼAtua ʼaki te ʼu gaue ʼo te lao.+ 17 Pea kapau ʼe ui ʼe tou agahala he ʼe tou faiga ke tou faitotonu ia muʼa ʼo te ʼAtua ʼaki ia Kilisito, ko tona fakaʼuhiga koa ʼe fakaneke tatou e Kilisito ke tou agahala? Kailoa ia. 18 Kapau ʼe au toe fakatuʼu te ʼu meʼa ʼae neʼe au maumauʼi ʼi muʼa atu, ʼe au fakaha ai ʼe au talagataʼa ki te Lao. 19 Kua au mate ʼo ʼuhiga mo te Lao* ʼuhi ko te Lao.+ Kae ʼuhi ko te faʼahi ʼaia, kua au maʼuli maʼa te ʼAtua. 20 Kua tutuki au ki te pou fakatahi mo Kilisito.+ ʼE mole ko au ʼae ʼe kei maʼuli,+ kae ʼe ko Kilisito ʼae ʼe maʼuli ʼo fakatahi mo au. Koia ʼe au maʼuli ʼi te temi nei ʼo mulimuli ki taku tui ki te ʼAlo ʼo te ʼAtua,+ ʼae neʼe ʼofa ia au pea neʼe ina foaki ia ia totonu maʼaku.+ 21 ʼE mole au meʼa noaʼi* ia te ʼofa makehe ʼo te ʼAtua,+ he ʼe kapau ʼe faitotonu anai he tahi ʼaki te lao, pea ʼe mahino ia neʼe mole he ʼuhiga ʼo te mate ʼa Kilisito.+

3 Kau Kalate vavale, ko ai koa ʼae neʼe ina kakaʼi koutou,+ logo la neʼe fakamatalatala lelei atu te tutuki ʼae ʼo Sesu Kilisito* ki te pou?+ 2 ʼE ko te faʼahi ʼaeni ʼe au fia fakalavelave atu pe:* Neʼe foaki atu koa te laumalie maʼoniʼoni ʼuhi ko te ʼu gaue ʼo te lao ʼae neʼe kotou fai peʼe ʼuhi ko takotou tui ki te ʼu meʼa ʼae neʼe kotou logo ki ai?+ 3 He koʼe kua kotou vavale feia? ʼI te kamata neʼe kotou mulimuli ki te laumalie,* pea ʼi te fakaʼosi kua kotou mulimuli ki te kakano?*+ 4 Neʼe vaʼiganoa koa takotou katakiʼi te ʼu mamahi? Neʼe mole feala ia ke vaʼiganoa! 5 Ko ia ʼae ʼe ina foaki atu te laumalie pea mo fakahoko ia koutou he ʼu milakulo,+ ʼe ina fai koa te ʼu faʼahi ʼaia ʼuhi ko te ʼu gaue ʼo te lao ʼae neʼe kotou fai peʼe ʼuhi ko takotou tui ki te ʼu meʼa ʼae neʼe kotou logo ki ai? 6 Ohage pe ko Apalahamo “neʼe tui kia Sehova,* koia neʼe faitotonu ai ia muʼa ʼo te ʼAtua.”+

7 ʼE mahino papau ia ʼe kotou iloʼi ko te ʼu foha ʼo Apalahamo ʼe ko natou ʼae ʼe natou maʼu te tui.+ 8 ʼI te temi muʼa, neʼe fakaha ʼi te ʼu Tohi Taputapu ʼe faitotonu anai te hahaʼi ʼo te ʼu puleʼaga kehekehe ia muʼa ʼo te ʼAtua ʼuhi ko tanatou tui. Koia neʼe ina tala fakatomuʼa ai te logo lelei ʼaeni kia Apalahamo: “ ʼAki ia koe, ʼe tapuakina anai te ʼu puleʼaga fuli.”+ 9 Koia ko natou ʼae ʼe natou maʼu te tui ʼe tapuakiʼi natou ohage ko Apalahamo, ʼae neʼe tui.+

10 Ko natou fuli ʼae ʼe falala ki te ʼu gaue ʼo te lao ʼe natou nonofo ʼi te malaʼia, he ʼe tohi: “Malaʼia kia ia ʼae ʼe mole ina haga fai te ʼu meʼa fuli ʼae ʼe tohi ʼi te takaiga tohi ʼo te Lao.”+ 11 Tahi ʼae faʼahi, ʼe ha lelei mai ʼe mole feala ke faitotonu he tahi ia muʼa ʼo te ʼAtua ʼaki te lao,+ koteʼuhi “ ʼe maʼuli anai te tagata faitotonu ʼuhi ko tana tui.”+ 12 Kae ʼe mole fakatafito te Lao ki te tui. Koteʼuhi ʼe tohi ai: “Ko ʼae ʼe ina fai te ʼu meʼa ʼae ʼi te Lao ʼe maʼuli anai.”+ 13 Neʼe totogi tatou e Kilisito,+ ʼo ina fakaʼateainaʼi tatou+ mai te malaʼia ʼo te Lao ʼi tana tali te malaʼia moʼo fetogi ʼo tatou, he ʼe tohi: “Malaʼia te tagata ʼae ʼe tautau ʼi he pou.”+ 14 Neʼe hoko te aluʼaga ʼaia ke mafola ai te tapuakina ʼo Apalahamo ki te ʼu puleʼaga kehekehe ʼaki ia Kilisito Sesu,+ pea ke feala hatatou maʼu te laumalie ʼae neʼe fakapapauʼi mai+ koteʼuhi ʼe tou tui.

15 ʼU tehina, ʼe au palalau atu ʼaki te faʼifaʼitaki ʼaeni: Kapau kua ʼosi fakamoʼoni ia he fuakava, tatau aipe pe neʼe fai e he tagata, ʼe mole molehi anai e he tahi peʼe ina hilifaki he tahi age ʼu meʼa ki ai. 16 Pea neʼe fai te ʼu fakapapau kia Apalahamo pea mo tona hakoga.+ ʼE mole ui “pea mo ʼou hakoga” ohage ʼe natou kaugamalie. Kae ʼe ui “pea mo tou hakoga,” ʼo fakaʼuhiga ai ki he tokotahi, ʼae ko Kilisito.+ 17 Pea ʼe au toe ui: Ko te Lao, ʼae neʼe fakatuʼu ia taʼu ʼe 430 ki muli age,+ ʼe mole ina molehi te fuakava ʼae neʼe fai e te ʼAtua ki muʼa atu, pea ʼe mole ina holoʼi te fakapapau. 18 Koteʼuhi kapau ʼe fakatafito te tofiʼa ki te lao, pea ʼe mole kei fakatafito ia ki te fakapapau. Kae neʼe ʼofa te ʼAtua ʼo ina foaki te tofiʼa kia Apalahamo ʼaki he fakapapau.+

19 Pea he koʼe koa neʼe fakatuʼu te Lao? Neʼe foaki mai ki ʼamuli te Lao moʼo fakaha te ʼu talagataʼa+ ʼo kaku ki te haʼu ʼo te hakoga+ ʼae neʼe fai ki ai te fakapapau. Neʼe foaki e te ʼu ʼaselo ki te hahaʼi ia te Lao ʼaia+ ʼaki he tagata fakafelogoi.+ 20 Kae ʼe mole ʼaoga he tagata fakafelogoi mo kapau ʼe ko he tokotahi ʼae ʼe ina fai he fakapapau. Pea ʼe toe feia mo te ʼAtua, ʼe ko ia tokotahi pe ʼae neʼe ina fai te fakapapau ʼaia. 21 ʼE fakafeagai koa te Lao ki te ʼu fakapapau ʼa te ʼAtua? Kailoa ia! Koteʼuhi kapau neʼe foaki ki te hahaʼi he lao ʼe feala ke natou maʼu ai te maʼuli, ʼe mahino ia ʼe natou faitotonu anai ia muʼa ʼo te ʼAtua ʼaki te lao. 22 Kae neʼe fakaha e te ʼu Tohi Taputapu, ʼe tuku ia te hahaʼi fuli ke puleʼi e te agahala, ke feala kia natou ʼae ʼe tui kia Sesu Kilisito ke natou maʼu te fakapapau ʼa te ʼAtua.

23 Kae ʼi muʼa ʼo tatatou tui kia Kilisito, neʼe leʼoleʼo pea mo puleʼi tatou e te lao, pea neʼe tou fakatalitali ki te tui ʼae neʼe tonu ke fakaha.+ 24 Koia neʼe liliu te Lao ko he tahi ʼe ina leʼoleʼo tatou,* ʼo ina taki tatou kia Kilisito,+ ke feala hatatou faitotonu ia muʼa ʼo te ʼAtua ʼaki te tui.+ 25 Kae ʼi tatatou kua tui leva ʼi te temi nei kia Kilisito,+ ʼe mole kei he tahi ʼe ina leʼoleʼo tatou.*+

26 ʼI tona fakahagatonu, ko koutou fuli ʼe ko te ʼu foha ʼo te ʼAtua+ ʼaki takotou tui kia Kilisito Sesu.+ 27 Koteʼuhi ko koutou fuli ʼae neʼe papitema ia Kilisito ʼe kotou faʼifaʼitakiʼi* ia Kilisito.+ 28 ʼE mole ʼi ai he Sutea peʼe ko he Keleka,+ ʼe mole ʼi ai he tagata kaugana peʼe ko he tagata ʼe ʼateaina,+ ʼe mole ʼi ai he tagata peʼe ko he fafine,+ koteʼuhi ʼe kotou logo tahi fuli ʼi tokotou ʼuhiga tisipulo ʼa Kilisito Sesu.+ 29 Pea kapau ʼe kotou kaugana kia Kilisito, ʼe ko koutou moʼoni te hakoga ʼo Apalahamo+ pea ʼe feala ke kotou maʼu te tofiʼa+ ʼae neʼe fakapapauʼi kia Apalahamo.+

4 Pea ʼe au ui, ʼi te kei veliveli ʼo ia ʼae ka maʼu tofiʼa, logo la ʼe ko ia te ʼaliki ʼo meʼa fuli, ʼe mole kehekehe ia mo he tagata kaugana. 2 Kae ʼe fakalogo ia ki te ʼu tagata leʼo pea mo te ʼu tagata tauhi ʼapi ʼo kaku ki te ʼaho ʼae kua fakatuʼutuʼu ki ai e tana tamai. 3 ʼO toe feia aipe mo tatou, ʼi tatatou kei liliki, neʼe tou mulimuli ki te ʼu aga mo te ʼu manatu ʼo te malama ʼaeni.+ 4 Kae ʼi te kua katoa leva ʼo te temi ʼae neʼe fakatuʼutuʼu ki ai, neʼe fekauʼi mai e te ʼAtua tona ʼAlo, ʼae neʼe tupu ʼi he fafine+ pea neʼe fakalogo ki te lao,+ 5 ke ina foaki te totogi moʼo fakaʼateainaʼi ia natou ʼae ʼe maʼuʼuli ʼo mulimuli ki te lao,+ pea ʼe tou liliu ai anai ko he ʼu foha ʼe vaheʼi e te ʼAtua.+

6 Pea ʼuhi ko koutou ʼe ko te ʼu foha ʼo te ʼAtua, neʼe ina foaki mai ki ʼotatou loto te laumalie maʼoniʼoni ʼae ʼe maʼu e tona ʼAlo,+ ʼo tou kalaga: “Apa,* Tamai!”+ 7 Koia ʼe mole kei ke kaugana, kae ko koe ʼe ko he foha ʼo te ʼAtua. Pea kapau ko koe ʼe ko he foha ʼo te ʼAtua, ʼe ina toe foaki atu anai mo te tofiʼa.+

8 Kae ʼi te temi ʼae neʼe heʼeki kotou iloʼi ai te ʼAtua, neʼe kotou kaugana ki ni ʼatua loi. 9 Kae ʼi te temi nei kua kotou iloʼi ia te ʼAtua, peʼe ʼi tona fakahagatonu, kua iloʼi koutou e te ʼAtua. Koia kotea te tupuʼaga ʼo takotou toe liliu ki te ʼu meʼa vaʼiganoa+ pea mo fehiʼaʼinaʼi ʼo te malama ʼaeni, pea mo kotou toe fia kaugana ki te ʼu meʼa ʼaia?+ 10 ʼE kotou mulimuli fakalelei ki te ʼu ʼaho, mo te ʼu mahina,+ mo te ʼu temi* pea mo te ʼu taʼu. 11 ʼE au tuʼania ʼo ʼuhiga mo koutou, naʼa alu noa ʼaku faiga ʼae ke au tokoni atu kia koutou.

12 Neʼe au toe hage pe la ko koutou ʼi te temi muʼa. Koia ʼu tehina, ʼe au kole atu ke kotou hage ko au ʼi te temi nei.+ Neʼe mole kotou fai mai he meʼa ʼe kovi. 13 Kae ʼe kotou iloʼi neʼe au ʼuluaki maʼu te faigamalie ʼae ke au tala atu te logo lelei kia koutou ʼuhi ko toku mahaki. 14 Pea logo la neʼe liliu toku mahaki ʼaia ko he ʼahiʼahi kia koutou, kae neʼe mole kotou fehihiʼa pea mo fakalialia kia* au. Kae neʼe kotou tali au ohage ko he ʼaselo ʼa te ʼAtua, ohage ko Kilisito* Sesu. 15 ʼE ʼifea koa ia te fiafia ʼaia neʼe kotou maʼu? Koteʼuhi ʼe au tui papau, ʼi te temi ʼaia, ka na pau la neʼe feala, neʼe kotou kapeʼi ʼokotou foʼi mata ʼo foaki mai kia au.+ 16 Pe kua au liliu koa ko hokotou fili he ʼe au fakaha atu ia te moʼoni? 17 ʼE faigaʼi fakamalotoloto e ʼihi ke natou fakalotoʼi koutou, kae ʼe mole natou fai ʼaki he fakatuʼutuʼu ʼe lelei. ʼE natou loto ke kotou fakamamaʼo mai ia au, ke kotou fia mulimuli ia natou. 18 Kae ʼe lelei foki mo kapau ʼe haga faiga fakamalotoloto ia he tahi ke ina fakalotoʼi koutou, ʼaki he ʼu fakatuʼutuʼu ʼe lelei, kae mole gata pe moka ʼe au nofo mo koutou. 19 Siʼaku ʼu fanau,+ ʼe au toe mamahi ʼo ʼuhiga mo koutou ohage ko te mamahi fanau ʼa he fafine, ʼo kaku ki takotou fakaʼata ia te ʼuluagaaga ʼo Kilisito. 20 ʼE au fakaʼamu age la ke au nofo mo koutou ʼi te lakaga nei pea ke kehe age taku faʼahiga palalau atu, he ʼe mole au mahino ki takotou aga.

21 Kotou fakaha mai, ia koutou ʼae ʼe fia maʼuʼuli ʼo mulimuli ki te lao, pe ʼe mole kotou iloʼi koa pe kotea ʼae ʼe ui ʼi te Lao? 22 Ohage la, neʼe tohi neʼe maʼu e Apalahamo ʼona foha ʼe toko lua, ko te tahi ʼaki te fafine faifekau+ pea ko te tahi ʼaki te fafine ʼateaina.+ 23 Neʼe tupu te tama ʼa te fafine faifekau ohage ko te fanau fuli,+ kae neʼe tupu te tama ʼa te fafine ʼateaina ʼuhi ko he fakapapau.+ 24 ʼE ʼi ai te fakaʼuhiga fakata ʼo te hisitolia ʼaia. Koteʼuhi ʼe fakata e te ʼu fafine ʼaia te ʼu fuakava ʼe lua. Ko te tahi ʼi te ʼu fuakava ʼaia neʼe fai ʼi te Moʼuga ʼo Sinai,+ ʼo tupu ai te ʼu fanau neʼe liliu ko he ʼu kaugana, pea ʼe fakata e Akale ia te fuakava ʼaia. 25 ʼE fakata e Akale te moʼuga ʼo Sinai,+ ʼae ʼe tuʼu ʼi Alapi pea mo te kolo ko Selusalemi ʼi te temi nei, he ʼe kaugana ia Selusalemi fakatahi mo ʼana fanau. 26 Kae ko te Selusalemi ʼae ʼi ʼoluga ʼe ʼateaina ia, pea ʼe ko ia tatatou faʼe.

27 Koteʼuhi neʼe tohi: “Ke ke fiafia, ia koe fafine paʼa, ʼae ʼe mole ke fanaunau. Kalaga fakafiafia ia koe fafine ʼae ʼe mole ke iloʼi te ʼu mamahi fanau. Koteʼuhi ʼe kaugamalie age te ʼu fanau ʼa te fafine ʼae ʼe liʼakina ʼi te ʼu fanau ʼa te fafine ʼae ʼe ʼi ai tona ʼohoana.”+ 28 Pea ʼu tehina, ʼe ko koutou te ʼu fanau ʼo te fakapapau ohage pe ko Isaake.+ 29 Pea ohage ko te temi muʼa, ko ia ʼae neʼe tupu ohage ko te fanau fuli neʼe ina fakatagaʼi ia ia ʼae neʼe tupu ʼaki te laumalie maʼoniʼoni,+ ʼe toe tatau foki ʼi te temi nei.+ 30 Kae kotea ʼae ʼe ui ʼi te ʼu Tohi Taputapu? “Kapu te fafine faifekau mo tana tama, koteʼuhi ʼe mole maʼu tofiʼa fakatahi anai te tama ʼa te fafine faifekau mo te tama ʼa te fafine ʼateaina.”+ 31 Koia ʼu tehina, ʼe mole ko tatou te ʼu fanau ʼa te fafine faifekau, kae ʼa te fafine ʼateaina.

5 Neʼe fakaʼateainaʼi tatou e Kilisito* ke tou maʼu te ʼateaina ʼaia. Koia kotou taupau maʼu tokotou ʼateaina+ pea ʼaua naʼa kotou tuku ke toe fakapopulaʼi koutou.+

2 Ko au Paulo, ʼe au tala atu, kapau ʼe kotou silikosisio,* pea ʼe mole anai he ʼaoga ʼo Kilisito kia koutou.+ 3 Pea ʼe au toe fakamanatuʼi ki te tagata fuli ʼe fia silikosisio, ʼe maʼua anai ia ke fakalogo ki te Lao katoa.+ 4 Pea ko koutou ʼae ʼe faiga ke kotou faitotonu ia muʼa ʼo te ʼAtua ʼaki te lao,+ ʼe kotou fakamamaʼo ai mai ia Kilisito, pea ʼe mole kei kotou maʼu tona ʼofa makehe. 5 Kae kia tatou, ʼe tou fakaʼamu ke tou faitotonu ia muʼa ʼo te ʼAtua ʼaki pe te laumalie maʼoniʼoni pea mo te tui. 6 Koteʼuhi kia natou ʼae ʼe fakatahi mo Kilisito Sesu, ʼe mole he ʼuhiga ʼo te silikosisio peʼe ko te heʼe silikosisio.+ Kae ʼe ko te tui ʼae ʼe maʼuhiga pea ko te ʼu gaue ʼo te tui ʼe tupu mai te ʼofa.

7 Neʼe lelei takotou haʼele ʼi te ala ʼo te moʼoni.*+ Ko ai ʼae neʼe ina taʼofi koutou ke ʼaua naʼa hoko atu takotou fakalogo ki te moʼoni? 8 Ko Ia ʼae neʼe ina filifili koutou neʼe mole ina fakalotoʼi koutou ke kotou fai te faʼahi ʼaia. 9 ʼE fakatupu e he kiʼi meʼa fakatupu ia te falena katoa ʼae neʼe natu ʼaki.+ 10 Pea ʼe au tui papau ko koutou ʼae ʼe fakatahi mo te ʼAliki+ ʼe kotou manatu tahi anai mo au, kae ko he tahi pe ʼe fakatupu maveuveu ia koutou,+ ʼe ina maʼu anai te fakatuʼā ʼae ʼe tuha mo ia. 11 Kae kia au, ʼu tehina, kapau ʼe kei au fakamafola te silikosisio, he koʼe ʼe kei fakatagaʼi au? Kapau ʼe kei au fakamafola te silikosisio, pea ko te pou fakamamahi*+ ʼe mole kei fakatupu tukia. 12 ʼO ʼuhiga mo natou ʼae ʼe natou ui atu ke kotou silikosisio, ʼe au loto ke kovi age tanatou fakamamahiʼi ʼonatou sino.*

13 ʼU tehina, neʼe pauʼi koutou ki te ʼateaina. ʼAua naʼa kotou fakaʼaogaʼi te ʼateaina ʼaia ohage ko he takuʼaki moʼo fakahoko te ʼu holi ʼo te kakano,+ kae ʼaki te ʼofa kotou fetauhiʼaki ohage ko he ʼu kaugana.+ 14 Koteʼuhi kua fakanounou ia te Lao katoa ʼaki te fakatotonu ʼaeni ʼe tahi: “ ʼE tonu ke ke ʼofa ki tou tatau ohage pe ko koe totonu.”+ 15 Kae kapau ʼe hoko atu takotou feʼusiʼusiʼaki pea mo takotou fekaiʼaki,+ kotou tokakaga naʼa kotou fetamateʼiʼaki.+

16 Kae ʼe au tala atu: Kotou haga haʼele ʼaki te laumalie maʼoniʼoni+ pea ʼe mole kotou fakahoko anai he holi ʼo te kakano.+ 17 Koteʼuhi ʼe fakafeagai te ʼu holi ʼo te kakano ki te laumalie, pea ʼe fakafeagai te laumalie ki te kakano. Koia ʼe nā fefakafeagaiʼaki, ʼo mole kotou fai ai te ʼu meʼa ʼae ʼe kotou loto ki ai.+ 18 Pea tahi, kapau ʼe taki koutou e te laumalie pea ʼe mole kotou mulimuli ki te lao.

19 Pea kua ha lelei te ʼu gaue ʼo te kakano, ʼae ʼe ko te ʼu felaveʼi fakasino heʼe ʼaoga,*+ mo te ʼu aga heʼe maʼa, mo te ʼu aga fakalialia,*+ 20 mo te tauhi taula ʼatua, mo te faifakalauʼakau,+ mo te fehiʼa, mo te kē, mo te maheka, mo te itaita, mo te fefihiʼaki, mo te ʼu maveuveu, mo te ʼu magaʼi lotu, 21 mo te manumanū, mo te inu kava fakavalevale,+ mo te ʼu fakafiafia fakavalevale pea mo te tahi ʼu aga ʼe tatau.+ ʼE au fakatokaga atu kia koutou ʼo ʼuhiga mo te ʼu aga ʼaia ohage pe ko taku kua fakatokaga atu, ko natou ʼae ʼe natou fai te taʼi ʼu aga ʼaia ʼe mole natou maʼu anai te Puleʼaga ʼo te ʼAtua.+

22 ʼI te tahi age faʼahi, ko te fua ʼo te laumalie ʼe ko te ʼofa, mo te fiafia, mo te tokalelei, mo te kataki fualoa, mo te agaʼofa, mo te agalelei,+ mo te tui, 23 mo te agamalū pea mo te lotololomi.+ ʼE mole he lao ʼe fakafeagai ki te ʼu faʼahi ʼaia. 24 Pea ko natou ʼae ʼe kaugana kia Kilisito Sesu kua natou lolomi* te ʼu holi malohi mo kovi ʼo te kakano.+

25 Kapau kua tou tuku ke takitaki ʼotatou maʼuli e te laumalie, pea tou haga haʼele ai ʼaki te laumalie.+ 26 ʼAua naʼa tou liliu ʼo fiameʼalahi,+ ʼo tou fefakataupiepieʼaki+ pea mo femahekaʼaki.

6 ʼU tehina, kapau ʼe faihala he tagata ʼo hehe ai kae heʼeki ina iloʼi, ko koutou ʼae ʼe kotou maʼu te ʼu fealagia fakalaumalie, kotou faiga ke kotou fakatonutonuʼi te tagata ʼaia ʼaki he agamalū.+ Kae ke ke tokaga kia koe,+ naʼa toe fakahalaʼi foki mo koe.+ 2 Kotou haga feʼamoʼaki ʼakotou kavega,+ pea ʼe kotou fakahoko ai anai te lao ʼa Kilisito.*+ 3 Koteʼuhi kapau ʼe manatu he tahi ʼe maʼuhiga kae ʼe ko he meʼa noa ia,+ ʼe ina kakaʼi pe ia ia totonu. 4 Kae ke tahi vakavakaʼi e te tagata ʼana gaue ʼa ia totonu,+ pea ʼe ina maʼu ai anai he tupuʼaga ke fiafia ʼo ʼuhiga mo ia totonu pe. ʼE mole tonu ke ina fakatatau ʼana gaue mo te ʼu gaue ʼa he tahi age.+ 5 Koteʼuhi ʼe tahi ʼamo pe anai e te tagata tana ʼamoga.*+

6 Tahi ʼae meʼa, ko ʼae neʼe akoʼi* age ki ai te folafola, ke ina vaevae te ʼu lelei fuli mo ia ʼae neʼe ina akoʼi* ia ia.+

7 ʼAua naʼa kotou faihala: ʼE mole feala ke manukiʼi ia te ʼAtua. Koteʼuhi ʼe utu pe anai e te tagata te meʼa ʼae neʼe ina to.+ 8 ʼEi, ko ʼae ʼe ina to ʼo manatu ki te kakano, ʼe ina utu anai mai tona kakano ia te mate, kae ko ʼae ʼe ina to ʼo manatu ki te laumalie ʼo te ʼAtua ʼe ina utu anai mai te laumalie ia te maʼuli heʼe gata.+ 9 Koia ʼaua naʼa tou tuku te fai ʼo te meʼa ʼae ʼe lelei, he ʼe tou utu anai ʼi tona temi totonu, mo kapau ʼe mole tou fiu.*+ 10 Pea ʼi te kei maʼu ʼo te temi faigamalie, tou fai te meʼa ʼae ʼe lelei ki te hahaʼi fuli, kae tafito ki ʼotatou kaiga ʼae ʼi te tui.

11 Kotou sisio ʼe ko au totonu ʼae neʼe faitohi atu ʼaki he ʼu mataʼi tohi lalahi.

12 Ko natou fuli ʼae ʼe natou loto ke leleiʼia natou e te hahaʼi, ʼe ko natou ʼaia ʼe natou fakakinauʼi koutou ke kotou silikosisio.* ʼE natou fai te faʼahi ʼaia he ʼe mole natou loto ke fakatagaʼi natou ʼuhi ko Kilisito.* 13 Koteʼuhi maʼiape la mo natou ʼae ʼe silikosisio, ʼe mole natou mulimuli ki te Lao,+ kae ʼe natou loto ke kotou silikosisio ke feala hanatou fiameʼameʼa ʼo ʼuhiga mo te meʼa ʼae neʼe fai ki ʼokotou sino. 14 Kae kia au, ke ʼaua naʼa au fiameʼameʼa, gata pe ʼo ʼuhiga mo totatou ʼAliki ko Sesu Kilisito+ ʼae neʼe mate ʼi te pou fakamamahi.* ʼI taku manatu, neʼe tauteaʼi te malamanei ki te mate ʼaki ia ia,* kae ʼi te manatu ʼa te malamanei, ʼe ko au ʼae neʼe tauteaʼi ki te mate ʼaki ia ia. 15 Koteʼuhi ʼe mole he ʼuhiga ʼo te silikosisio pea mo te heʼe silikosisio,+ kae ʼe ko te liliu ko he fakatupu foʼou ʼae ʼe maʼuhiga.+ 16 Ke nofo te tokalelei mo te manavaʼofa ia natou fuli ʼae ʼe mulimuli ki te manatu ʼaia,* ʼei, ia te Iselaele ʼa te ʼAtua.+

17 Ke ʼaua naʼa fakakinakinaʼi au e he tahi ʼo kamata atu ʼi te ʼaho nei, koteʼuhi ʼe au maʼu ʼi toku sino te ʼu fakailoga ʼa he tagata kaugana ʼa Sesu.+

18 ʼU tehina, ke tapuakiʼi te faʼahiga manatu ʼae ʼe kotou maʼu ʼaki te ʼofa makehe ʼo totatou ʼAliki ko Sesu Kilisito. Ameni.