TE TOHI KI TE KAU EFESO

1 Ko au Paulo, he apositolo ʼa Kilisito* Sesu ʼo mulimuli ki te finegalo ʼo te ʼAtua. ʼE au faitohi atu kia koutou te kau maʼoniʼoni ʼo Efeso+ ʼae ʼe kotou agatonu ʼi tokotou ʼuhiga tisipulo ʼa Kilisito Sesu:

2 Ke foaki atu e te ʼAtua tatatou Tamai pea mo te ʼAliki ko Sesu Kilisito ia te ʼofa makehe pea mo te tokalelei.

3 Ke fakavikiviki ki te ʼAtua pea mo Tamai ʼo totatou ʼAliki ko Sesu Kilisito, koteʼuhi neʼe ina tapuakiʼi tatou ʼaki te ʼu lelei fakalaumalie fuli ʼi selo ʼi tatatou fakatahi mo Kilisito,+ 4 pea ʼi muʼa ʼo te kamataʼaga ʼo te malamanei,* neʼe ina filifili tatou ke tou fakatahi mo ia,* ke tou fakaha te ʼofa, pea ke tou maʼoniʼoni mo heʼe mele+ ʼi ʼona muʼa. 5 Koteʼuhi neʼe ina fakatuʼutuʼu fakatomuʼa+ ke ina vaheʼi tatou ko ʼona foha+ ʼaki ia Sesu Kilisito, ʼo mulimuli ki te meʼa ʼae ʼe ina leleiʼia pea mo tona finegalo,+ 6 ke vikiʼi ai te lahi ʼo tona ʼofa makehe+ ʼae neʼe lotolelei ke ina fakaha mai kia tatou ʼaki tona ʼAlo ʼofaina.+ 7 ʼAki ia ia ʼaia, kua fakaʼateainaʼi tatou ʼaki te totogi.* Kua fakamolemole ʼatatou agahala+ ʼaki tona taʼataʼa,+ ʼo mulimuli ki te lahi ʼo te ʼofa makehe ʼo te ʼAtua.

8 Neʼe ina fakaha lahi mai kia tatou tona ʼofa makehe ʼaia, ʼi tana foaki mai te poto pea mo te mahino katoa* 9 pea mo ina fakamahino mai pe kotea te meʼa fakalilo tapu*+ ʼo tona finegalo. Pea ko te meʼa fakalilo tapu ʼaia, ʼe mulimuli ki te meʼa ʼae ʼe ina leleiʼia pea mo tona finegalo, 10 ʼo ʼuhiga mo he fakatuʼutuʼu gaue neʼe ina fai pea ʼe hoko anai ʼi te kua katoa ʼo te temi ʼae kua fakatuʼutuʼu ki ai, ke fakatahiʼi ia meʼa fuli ia Kilisito, te ʼu meʼa ʼae ʼi selo pea mo te ʼu meʼa ʼae ʼi te kele.+ ʼEi, ʼe fakatahiʼi anai ia meʼa fuli ia Kilisito. 11 ʼE matou fakatahi mo ia pea neʼe hinoʼi matou ke matou maʼu tofiʼa,+ he ʼe kua fakatuʼutuʼu fakatomuʼa e te ʼAtua ia te faʼahi ʼaia ʼo mulimuli ki tona finegalo. Pea ʼe ina fai ia meʼa fuli ʼo mulimuli ki te meʼa ʼae ʼe loto ki ai, 12 ke feala ai ke fakavikiviki pea mo fakakololiaʼi ia ia ʼaki ia matou ʼae neʼe ʼuluaki tui kia Kilisito. 13 Kae neʼe kotou toe tui foki mo koutou kia te ia ʼi takotou ʼosi logo ki te folafola ʼo te moʼoni, ia te logo lelei ʼo ʼuhiga mo tokotou haofaki. Pea ʼi takotou kua tui, neʼe fakailoga koutou+ e te ʼAtua ʼaki ia tona laumalie maʼoniʼoni ʼae neʼe ina fakapapauʼi mai. Neʼe ina fakaʼaogaʼi ia Kilisito moʼo fai te faʼahi ʼaia. 14 Ko te laumalie maʼoniʼoni ʼe ko he fakamoʼoni ʼo te tofiʼa ʼae ka tou maʼu,+ ke fakaʼateaina ai te hahaʼi ʼa te ʼAtua+ ʼaki te totogi,*+ ke vikiʼi pea mo fakakololiaʼi ai te ʼAtua.

15 Koia mo au la, talu mai taku logo ki takotou kua tui ki te ʼAliki ko Sesu pea mo te ʼofa ʼae ʼe kotou fakaha ki te kau maʼoniʼoni fuli, 16 ʼe mole gata taku fakafetaʼi ʼo ʼuhiga mo koutou. ʼE hoko atu pe taku hufakiʼi koutou 17 ke foaki atu e te Tamai ʼo te kololia, te ʼAtua ʼo totatou ʼAliki ko Sesu Kilisito, te malohi ke kotou popoto pea mo mahino ki te ʼu meʼa ʼae ʼe ina fakaha pea ke kotou maʼu ai te ʼatamai malama totonu ʼo ʼuhiga mo ia.+ 18 Neʼe ina fakamalamaʼi ʼokotou mata* ke kotou iloʼi pe kotea te ʼamanaki ʼae neʼe pauʼi koutou ki ai, mo te lahi ʼo te ʼu koloa fakalaumalie ʼae ʼe ina taʼofi ohage ko he tofiʼa maʼa te kau maʼoniʼoni,+ 19 pea mo te toe malohi lahi ʼae neʼe ina fakaha mai kia tatou, ʼae ʼe tui.+ Neʼe ha te toe malohi lahi ʼaia 20 ʼi tana fakatuʼuake ia Kilisito mai te kau mate pea mo fakaheka ia ia ʼi tona toʼomataʼu+ ʼi selo, 21 ʼo maʼoluga age ʼi te ʼu puleʼaga, mo te ʼu pule, mo te ʼu malohi, mo te ʼu takitaki pea mo te ʼu higoa fuli pe,+ ʼae ʼi te malama* ʼaeni pea mo ʼae ka hoko mai. 22 Neʼe ina toe tuku foki ia meʼa fuli ki te ʼu lalo vaʼe ʼo Kilisito+ pea mo ina fakanofo ke pule kia meʼa fuli ʼi te kokelekasio,+ 23 ʼae ʼe ko tona sino,+ pea ʼe fonu ʼi te ʼu kalitate ʼo ia ʼae ʼe ina fakakatoa ia meʼa fuli pe ʼi te ʼu aluʼaga kehekehe.

2 Tahi ʼae meʼa, neʼe fakamaʼuli koutou e te ʼAtua, logo la neʼe kotou mamate ʼuhi ko ʼakotou hala pea mo ʼakotou agahala,+ 2 ʼae neʼe kotou fai ʼi te temi muʼa ʼo mulimuli ki te faʼahiga maʼuli* ʼo te malama ʼaeni,+ ʼo mulimuli ki te pule ʼo te ʼaele.+ Ko te ʼaele ʼaia peʼe ko te faʼahiga manatu ʼaia+ ʼe gaue ʼi te temi nei ʼi te ʼu foha ʼo te talagataʼa. 3 ʼEi, ko tatou fuli ʼi te temi muʼa, neʼe hage tatatou aga ko te hahaʼi ʼaia, he neʼe tou mulimuli ki te ʼu holi ʼo totatou kakano,+ ʼo tou fai te ʼu meʼa ʼae ʼe holi ki ai te kakano pea mo ʼatatou manatu.+ Pea talu mai tatatou tutupu, neʼe tuha mo tatou te hauhau ʼo te ʼAtua+ ohage ko natou ʼae. 4 Kae ko te ʼAtua ʼe fonu ʼi te manavaʼofa,+ pea ʼuhi ko tona ʼofa lahi kia tatou+ 5 neʼe ina fakamaʼuli tatou fakatahi mo Kilisito,* logo la neʼe tou mamate ʼuhi ko ʼatatou agahala+ (neʼe haofaki koutou ʼuhi ko te ʼofa makehe). 6 Tahi ʼae meʼa, ʼi totatou ʼuhiga tisipulo ʼa Kilisito Sesu, neʼe ina fakatuʼuake fakatahi tatou pea mo fakaheka fakatahi tatou ʼi selo,+ 7 ke ina fakaha ai ʼi te ʼu tuʼu ʼo te ʼu faʼahiga meʼa* ʼae ka hoko mai te lahi ʼaupito ʼo tona ʼofa makehe, ʼaki tana fakaha mai ia tona agalelei* kia tatou ʼae ko te ʼu tisipulo ʼa Kilisito Sesu.

8 ʼUhi ko te ʼofa makehe ʼaia, neʼe haofaki koutou ʼaki takotou tui,+ pea ʼe mole hoko te faʼahi ʼaia ʼuhi ko koutou, kae ʼe ko te meʼa ʼofa ia mai te ʼAtua. 9 ʼE mole ko te fua ʼaia ʼo ʼakotou gaue,+ kailoa, ke ʼaua naʼa maʼu e he tahi he ʼu tupuʼaga ke fiameʼameʼa ai. 10 ʼE ko tatou te fua ʼo te gaue ʼa te ʼAtua pea, ʼuhi ko tatou ko te ʼu tisipulo ʼa Kilisito Sesu,+ neʼe fakatupu tatou+ ke tou fai te ʼu gaue ʼae ʼe lelei. Pea neʼe fakatuʼutuʼu fakatomuʼa e te ʼAtua te ʼu gaue ʼaia ke tou fai.

11 Koia ko koutou ʼae ʼe mole Sutea, kotou manatuʼi ko natou ʼae neʼe silikosisioʼi* e te tagata neʼe natou fakahigoaʼi koutou ʼi te temi muʼa ko te ʼu hahaʼi heʼe silikosisio. 12 ʼI te temi ʼaia, neʼe mole kotou iloʼi ia Kilisito, neʼe kotou mamaʼo mai te hahaʼi ʼo Iselaele pea neʼe mole kotou kau ki te ʼu fuakava ʼo te fakapapau.+ ʼI te malamanei neʼe mole hakotou ʼamanaki pea neʼe mole kotou iloʼi ia te ʼAtua.+ 13 Kae ʼi te temi leva ʼaeni, ʼi tokotou ʼuhiga tisipulo ʼa Kilisito Sesu, ko koutou ʼae neʼe mamaʼo mai te ʼAtua ʼi te temi muʼa, kua kotou fakaovi kia te Ia ʼaki te taʼataʼa ʼo Kilisito. 14 Koteʼuhi ʼe ko Kilisito ʼae neʼe ina foaki mai te tokalelei,+ ia ia ʼae neʼe ina fai he kutuga ʼe tahi ʼaki te ʼu kutuga ʼe lua+ pea neʼe ina holoʼi te kaupa ʼae neʼe ina vaheʼi natou.+ 15 ʼI tana sakilifisioʼi tona sino, neʼe ina pulihi te ʼu lao pea mo te ʼu fakatotonu ʼo te Lao ʼa Moisese, ʼae neʼe tupu ai te fefehiʼaʼaki ʼo te ʼu kutuga ʼaia ʼe lua. Pea neʼe feala ai leva, ʼaki te ʼu kutuga ʼaia ʼe lua, ʼae ko ʼana tisipulo, ke ina fai he kutuga foʼou ʼe tahi*+ pea mo fakatuʼu te tokalelei. 16 Pea ʼaki te pou fakamamahi,*+ neʼe feala ai ke ina fakatokatoka te ʼu kutuga ʼaia ʼe lua mo te ʼAtua, ke liliu te ʼu kutuga ʼaia ko he sino ʼe tahi, koteʼuhi neʼe ina pulihi te fehiʼa+ ʼaki ia ia totonu. 17 Pea neʼe haʼu ʼo tala te logo lelei ʼo te tokalelei kia koutou ʼae neʼe mamaʼo mai te ʼAtua, pea mo te tokalelei kia natou ʼae neʼe ovi kia te Ia, 18 koteʼuhi ʼaki tana sakilifisio, kua feala kia tatou, te ʼu kutuga ʼe lua, ke tou fakaovi faʼifaʼitaliha ki te Tamai ʼaki te laumalie maʼoniʼoni ʼae kua tou maʼu fuli.

19 Koia ʼe mole ko koutou ko ni hahaʼi kehe peʼe ko ni matapule,+ kae ʼe kotou fenua tahi+ mo te kau maʼoniʼoni pea mo kotou kau ki te famili ʼo te ʼAtua,+ 20 pea neʼe fakatuʼu koutou ki te fakatafito ʼo te kau apositolo mo te kau polofeta,+ pea ko Kilisito Sesu totonu te maka agele ʼo te fakatafito.+ 21 ʼO fakatahi mo ia, ko te fale katoa, ʼae ʼe pipiki fakatahi ʼona koga fuli,+ ʼe lagalaga ake ke liliu ko he fale lotu taputapu maʼa Sehova.*+ 22 Koia ʼo fakatahi mo ia, ʼe lagalaga ia koutou fuli pea mo natou ʼae ke kotou liliu ko he koga meʼa ʼe nofo ai te ʼAtua ʼaki tona laumalie.+

3 Koia ko au Paulo, ʼae ʼe pilisoni+ ʼuhi ko Kilisito* Sesu pea mo taku tokoni atu kia koutou ʼae ʼe mole Sutea . . . 2 ʼE mahino ia neʼe kotou logo neʼe foaki mai kia au te maʼua ʼae ke au tokoni atu,+ ke kotou maʼu ia te ʼofa makehe ʼo te ʼAtua, 3 pea neʼe fakaha mai kia au te meʼa fakalilo tapu,* ohage pe ko taku faitohi fakanounou atu ki muʼa atu. 4 Koia moka kotou lau te faʼahi ʼaeni, ʼe kotou iloʼi ai kua au mahino ki te meʼa fakalilo tapu+ ʼo ʼuhiga mo Kilisito. 5 Neʼe mole fakaha age e te ʼAtua te meʼa fakalilo tapu ʼaia ki te ʼu foha ʼo te ʼu tagata ʼo te ʼu taʼiake ki muʼa atu, ohage ko tana kua fakaha ʼi te temi nei ki ʼana apositolo maʼoniʼoni pea mo ʼana polofeta ʼaki tona laumalie.+ 6 Pea koʼeni ia te meʼa fakalilo ʼaia: Ko natou ʼae ʼe fakatahi mo Kilisito Sesu kae ʼe mole ko he kau Sutea, ʼe natou maʼu anai ia te tofiʼa ʼae ʼe maʼu e Kilisito pea mo natou kau ki te sino.+ ʼE natou maʼu anai te ʼu meʼa ʼae neʼe fakapapauʼi mai e te ʼAtua kia matou ʼuhi ko te logo lelei. 7 Kua au liliu ko he tagata faifekau ʼo te meʼa fakalilo tapu ʼaia ʼuhi ko te lahi ʼo te ʼofa makehe ʼo te ʼAtua. Pea neʼe ina foaki mai te meʼa ʼofa ʼaia ʼo mulimuli ki tona malohi.+

8 Neʼe fakaha mai kia au, ʼae ʼe veliveli ʼosi ʼi te kau maʼoniʼoni,+ ia te ʼofa makehe ʼaia,+ ke au tala ki te ʼu puleʼaga kehekehe te logo lelei ʼo ʼuhiga mo te ʼu tapuakina mai ia Kilisito, ʼae ʼe mole feala hona fakafuafua 9 pea ke au fakamahino ki te hahaʼi fuli pe kotea ʼae ʼe fai e te ʼAtua, ʼae neʼe ina fakatupu ia meʼa fuli, moʼo fakahoko ia te meʼa fakalilo tapu+ ʼae neʼe ina fufu talu mai fualoa. 10 Neʼe hoko te aluʼaga ʼaia ke fakaha ai, ʼaki te kokelekasio,+ te ʼu agaaga kehekehe ʼo te poto ʼo te ʼAtua ki te ʼu puleʼaga mo te ʼu takitaki ʼae ʼi selo.+ 11 ʼE mulimuli te faʼahi ʼaia ki te fakatuʼutuʼu heʼe gata ʼae neʼe ina fai ʼo ʼuhiga mo Kilisito+ Sesu, totatou ʼAliki, 12 pea ʼaki tatatou tui kia ia ʼaia, kua feala ke tou palalau faʼifaʼitaliha* pea mo fakaovi faʼifaʼitaliha ki te ʼAtua+ mo he lotofalala. 13 Koia ʼe au kole atu ke ʼaua naʼa kotou lotovaivai ʼuhi ko te ʼu mamahi ʼae neʼe au tau mo ia ʼi taku tokoni atu, he ʼe fakamaʼuhigaʼi ai koutou.+

14 Koia ʼe au tuʼutuli ifo ai ia muʼa ʼo te Tamai, 15 ʼae ʼe maʼu mai ia te ia e te ʼu famili fuli ʼi selo pea mo te kele ʼonatou higoa. 16 ʼE au faikole ke ina fakafealagia atu, ʼo mulimuli ki te lahi ʼo tona kololia, ke malohi ʼokotou loto pea mo ʼokotou ʼatamai,+ ʼaki te malohi ʼo tona laumalie. 17 Pea ʼe au faikole ke nofo ia Kilisito, ʼo feia mo te ʼofa, ʼi ʼokotou loto he ʼe kotou tui kia te ia.+ Ke kotou tauaka+ pea mo tutuʼu malohi ʼi te fakatafito,+ 18 ke feala hakotou mahino katoa, ʼo fakatahi mo te kau maʼoniʼoni fuli, ki te laulahi, mo te loa, mo te maʼoluga pea mo te loloto, 19 pea ke kotou iloʼi te ʼofa ʼo Kilisito,+ ʼae ʼe fakalaka ʼi te ʼatamai malama, ke kotou fonu ai ʼi te ʼu kalitate ʼae ʼe foaki katoa e te ʼAtua.

20 Pea ʼe feala ki te ʼAtua ke ina fakahoko ʼo lahi maumau age ʼi te ʼu meʼa ʼae ʼe tou kole peʼe tou manatu ki ai,+ ʼo mulimuli ki tona malohi ʼae ʼe gaue ia tatou.+ 21 Koia ke fakakololiaʼi ia ia ʼaki te kokelekasio pea mo Kilisito Sesu ʼi te ʼu taʼiake fuli ʼo talu ai. Ameni.

4 Koia ko au ʼae ʼe pilisoni+ ʼi toku ʼuhiga tisipulo ʼa te ʼAliki, ʼe au kole mamahi atu ke kotou haʼele ʼi hona aluʼaga ʼe tuha+ mo tokotou pauʼi. 2 Kotou agavaivai*+ pea mo agamalū tuʼumaʼu, mo kataki fualoa,+ ʼo kotou fekatakiʼaki ʼi te ʼofa,+ 3 mo kotou maʼuʼuli ʼi te tokalelei, ʼo kotou faiga moʼoni ke kotou taupau takotou logo tahi ʼae ʼe kotou maʼu mai te laumalie maʼoniʼoni.+ 4 ʼE ko te sino ʼe tahi,+ mo te laumalie ʼe tahi,+ ohage pe ko te pauʼi ʼo koutou ki te ʼamanaki ʼe tahi,+ 5 mo te ʼAliki ʼe tahi,+ mo te tui ʼe tahi, mo te faʼahiga papitema ʼe tahi. 6 Pea ʼe ko te ʼAtua mo Tamai ʼe tahi ʼa te hahaʼi fuli, pea ʼe ina puleʼi te hahaʼi fuli. ʼE natou fakaha fuli te ʼatamai malama ʼo ʼuhiga mo ia, pea ʼe gaue tona malohi ia natou fuli.

7 Kua fakaha mai e te ʼAtua tona ʼofa makehe kia tatou takitokotahi, pea neʼe ko Kilisito* ʼae neʼe ina foaki mai kia tatou takitokotahi te meʼa ʼofa ʼaia.+ 8 Koteʼuhi ʼe ui ʼi te folafola ʼa te ʼAtua: “ ʼI tana hake ki ʼoluga, neʼe ina ʼave he kau popula, pea neʼe ina foaki he ʼu tagata ohage ko ni meʼa ʼofa.”+ 9 Kotea te fakaʼuhiga ʼo te ui ʼae neʼe “hake ki ʼoluga”? Ko tona fakaʼuhiga, neʼe hifo ifo muʼa ia ki te kele. 10 Pea ko ia ʼae neʼe hifo ifo, ʼe ko ia pe ʼae neʼe hake+ ʼo maʼoluga age ʼi te ʼatu lagi,+ ke ina fakahoko ia meʼa fuli pe.

11 Neʼe ina foaki ʼihi ko he kau apositolo,+ mo ʼihi ko he kau polofeta,+ mo ʼihi ko he kau faifakamafola ʼo te logo lelei,+ mo ʼihi ko he ʼu tagata tauhi ovi pea mo faiako,+ 12 ke natou fakatonutonuʼi* te kau maʼoniʼoni, mo fakahoko te gaue fakaminisitelio, pea mo lagalaga te sino ʼo Kilisito.*+ 13 ʼE natou fai anai te faʼahi ʼaia ʼo kaku ki tatatou logo tahi fuli ʼi te tui pea mo maʼu te ʼatamai malama totonu ʼo ʼuhiga mo te ʼAlo ʼo te ʼAtua, ke tou liliu ko he ʼu tagata kua fotufotuʼa,+ kua katoa totatou ʼuhiga fotufotuʼa ohage ko Kilisito. 14 Koia tou tuku tatatou hage ko te kihiʼi tamaliki, koteʼuhi ko ʼae ʼe mulimuli ki te ʼu akonaki loi ʼa te hahaʼi kaka ʼe hage anai ko he vaka ʼe fetaʼaki e te ʼu peau mo te matagi.+ 15 Kae tou fakaha te moʼoni pea ʼaki te ʼofa, tou tuputupu ia meʼa fuli ʼo mulimuli kia ia ʼae ʼe ko te ʼulu ʼo te sino,* ia Kilisito.+ 16 ʼUhi ko ia, ʼe pipiki fakatahi te ʼu koga fuli ʼo te sino+ pea mo natou fetokoniʼaki moʼo foaki te meʼa ʼae ʼe ʼaoga ki te sino. Ka gaue lelei te ʼu koga sino takitahi, ʼe tokoni ai ki te tuputupu ʼo te sino katoa ke malohi ʼi te ʼofa.+

17 Koia koʼeni te meʼa ʼae ʼe au ui pea mo fakamoʼoni ia muʼa ʼo te ʼAliki: ʼE mole kei tonu ke kotou maʼuʼuli ohage ko te hahaʼi ʼo te malama,+ ʼae ʼe vaʼiganoa ʼonatou ʼatamai.+ 18 ʼE fakapoʼuli ʼanatou fakakaukau, mo natou mamaʼo mai te maʼuli ʼae ʼe haʼu mai te ʼAtua, ʼuhi ko tanatou mole fia iloʼi ia te ʼAtua pea mo tanatou mole kei logoʼi he meʼa ʼi ʼonatou loto. 19 ʼE mole kei natou ufiufi, ʼo natou fakahoko te ʼu aga fakalialia*+ pea mo fai fakavalevale te ʼu aga heʼe maʼa fuli.

20 Kae neʼe kotou ako ʼe mole feia ia Kilisito, 21 mo kapau neʼe kotou logo kia ia pea neʼe akoʼi koutou ʼo mulimuli ki te moʼoni ʼae neʼe akoʼi e Sesu. 22 Neʼe kua kotou ako ʼe tonu ke kotou liʼaki ia te ʼuluagaaga ʼafeā+ ʼae ʼe alu tahi mo ʼakotou aga ʼafeā pea ʼe ʼaʼasili kovi ʼuhi ko ʼokotou holi kaka.+ 23 Kae ʼe tonu ke hoko atu takotou fakafoʼou ia takotou faʼahiga manatu,*+ 24 pea ʼe tonu ke kotou kofuʼi ia te ʼuluagaaga foʼou+ ʼae neʼe fakatupu ʼo mulimuli ki te finegalo ʼo te ʼAtua pea ʼe fakatafito ki te faitotonu mo te agatonu moʼoni.

25 Koia ʼi te temi nei, ʼi takotou kua liʼaki ia te kaka, kotou tahi fakaha ia te moʼoni ki ʼokotou tatau,+ koteʼuhi ko tatou ko he ʼu koga sino ʼe pipiki tahi.+ 26 Kotou iita kae ʼaua naʼa kotou agahala.+ ʼAua naʼa kotou iita+ ʼo kaku ki te to ʼo te laʼa. 27 Pea ʼaua naʼa kotou tuku he faigamalie ki te Tevolo ke ina fakaneke koutou ke kotou fai he meʼa ʼe kovi.+ 28 Ko ʼae neʼe kaihaʼa ke ʼaua naʼa toe kaihaʼa, kae ke gaue kinakina ʼo ina fai he gaue ʼe lelei+ ke ina maʼu ai he meʼa moʼo foaki ki ʼae ʼe nofo ʼi te faigataʼaʼia.+ 29 ʼAua naʼa haʼu mai ʼokotou gutu he palalau ʼe kovi,*+ kae ko he palalau pe ʼe ina fakalotomalohiʼi ʼihi moka ʼe ʼaoga, ke fua lelei ai kia natou ʼae ʼe logo.+ 30 Pea tahi ʼae, ʼaua naʼa kotou fakalotomamahiʼi ia te laumalie maʼoniʼoni ʼo te ʼAtua.+ Neʼe fakailoga koutou ʼaki te laumalie maʼoniʼoni ʼaia+ ki te ʼaho ʼae ka fakaʼateainaʼi ai koutou ʼaki te totogi.*+

31 Kotou fakamamaʼo mai ia koutou ia te lotokovi fuli pe,+ mo te ita, mo te hauhau, mo te kalaga, mo te laukovi,+ ʼo toe feia aipe mo te ʼu agakovi fuli.+ 32 Kae ke kotou feagaleleiʼaki, mo fonu ʼi te manavaʼofa,+ ʼo kotou fefakamolemoleʼaki ʼaki he lotolelei ohage ko te fakamolemole ʼa te ʼAtua kia koutou ʼaki ia Kilisito.+

5 Koia ohage ko ni fanau ʼofaina, kotou faʼifaʼitakiʼi ia te ʼAtua,+ 2 pea ke hoko atu takotou maʼuʼuli ʼi te ʼofa,+ ohage pe foki ko te ʼofa ʼa Kilisito* kia tatou*+ pea mo ina foaki ia ia totonu maʼa tatou* ko he molaga mo he sakilifisio ʼe magoni ki te ʼAtua.+

3 Ke ʼaua naʼa kotou palalau ʼo ʼuhiga mo te ʼu felaveʼi fakasino heʼe ʼaoga,* mo te ʼu aga heʼe maʼa fuli pe, pea mo te ʼu holi fakavale+ koteʼuhi ʼe mole tuha mo te kau maʼoniʼoni.+ 4 Pea ʼe mole tuha mo koutou ke kotou fai he ʼu aga fakaufiufi, mo he ʼu palalau vale pea mo he ʼu fakahuahua heʼe ʼaoga,+ kae ke kotou fai he ʼu fakafetaʼi ki te ʼAtua.+ 5 Koteʼuhi ʼe kotou iloʼi pea mo mahino ki te faʼahi ʼaeni: Ko he tahi ʼe ina fai he ʼu felaveʼi fakasino heʼe ʼaoga,*+ peʼe aga heʼe maʼa peʼe ina maʼu he ʼu holi fakavale,+ ʼae ko he tahi ʼe tauhi taula ʼatua, ʼe mole ina maʼu anai te Puleʼaga ʼo Kilisito pea mo te ʼAtua.+

6 Ke ʼaua naʼa kakaʼi koutou e he tahi ʼaki he ʼu palalau vaʼiganoa, he ʼe hoko mai la te hauhau ʼo te ʼAtua ki te ʼu foha ʼo te talagataʼa ʼuhi ko te ʼu aga ʼaia. 7 Koia ʼaua naʼa kotou fakatahi mo natou, 8 koteʼuhi ʼi te temi muʼa neʼe kotou ʼi te fakapoʼuli, kae ʼi te temi nei kua kotou ʼi te malama+ he ʼe kotou fakatahi mo te ʼAliki.+ Kotou haga maʼuʼuli ohage ko he ʼu fanau ʼo te malama, 9 koteʼuhi ʼe ha te ʼu fua ʼo te malama ʼi te ʼu agalelei fuli, mo te faitotonu pea mo te moʼoni.+ 10 Kotou haga vakavakaʼi pe kotea ʼae ʼe lelei+ ki te ʼAliki. 11 Pea tuku takotou kau ki te ʼu gaue ʼo te fakapoʼuli ʼae ʼe mole hona ʼaoga,+ kae ke kotou fakaha tonatou ʼuhiga moʼoni. 12 Koteʼuhi ko te ʼu meʼa ʼae ʼe fai fakafufu e te hahaʼi, ʼe fakaufiufi te talanoa ki ai. 13 Pea ʼe fakaha e te malama te ʼuhiga moʼoni ʼo te ʼu meʼa ʼae ʼe mole lelei, koteʼuhi ko te ʼu meʼa fuli ʼae ʼe fakaha ʼe liliu ʼo malama. 14 Koia ʼe ui ʼi te ʼu Tohi Taputapu: “ ʼAla ake, ia koe ʼae ʼe moe, mo ke tuʼu ake mai te kau mate+ pea ʼe fakamalamaʼi anai koe e Kilisito.”+

15 Koia kotou tokakaga fakalelei ki takotou aga,* ke mole kotou hage ko ni hahaʼi vavale kae ke kotou hage ko ni hahaʼi popoto, 16 ʼo kotou fakaʼaogaʼi lelei tokotou temi*+ koteʼuhi ʼe tou maʼuʼuli nei ʼi te ʼu ʼaho ʼe kovi. 17 Koia ʼuhi ko te aluʼaga ʼaia, ke tuku takotou vavale kae ke kotou mahino pe kotea te finegalo ʼo Sehova.*+ 18 Pea ʼaua naʼa kotou konahihia ʼi te vino+ he ʼe iku ki te aga heʼe ʼaoga,* kae ke kotou fonu ʼi te laumalie maʼoniʼoni. 19 Kotou fefakalotomalohiʼaki* ʼaki ni pesalemo, mo ni fakavikiviki ki te ʼAtua pea mo ni katiko, ʼo kotou hiva+ pea mo fakavikiviki kia Sehova* ʼaki ʼokotou loto katoa,+ 20 ʼo kotou fakafetaʼi tuʼumaʼu+ ki totatou ʼAtua pea mo Tamai ʼo ʼuhiga mo meʼa fuli pe, ʼi te huafa ʼo totatou ʼAliki ko Sesu Kilisito.+

21 Ke kotou fefakalogoʼaki+ ʼuhi ko takotou fakaʼapaʼapa kia Kilisito. 22 Ke fakalogo te ʼu fafine ʼohoana ki ʼonatou ʼohoana+ ohage ko tanatou fakalogo ki te ʼAliki, 23 koteʼuhi ko te tagata ʼohoana ʼe ko te pule ʼo tona ʼohoana+ ohage ko Kilisito ʼe ko te pule ʼo te kokelekasio,+ ʼae ʼe ko tona sino neʼe ina haofaki. 24 Ohage pe ko te fakalogo ʼa te kokelekasio kia Kilisito, ʼo toe feia aipe, ʼe tonu ki te ʼu fafine ʼohoana ke natou fakalogo ki ʼonatou ʼohoana ia meʼa fuli pe. 25 ʼU tagata ʼohoana, kotou haga ʼoʼofa ki ʼokotou ʼohoana+ ohage pe foki ko te ʼofa ʼa Kilisito ki te kokelekasio pea neʼe ina foaki ia tona maʼuli maʼa te kokelekasio,+ 26 ke ina fakamaʼoniʼoniʼi ia te kokelekasio, mo fakamaʼa ʼaki te folafola ʼa te ʼAtua, ohage ko hana fufulu ʼaki te vai.+ 27 Neʼe ina fai te faʼahi ʼaia ke ha kia te ia te taulekaleka ʼo te kokelekasio, ʼe mole ʼuli, ʼe mole hona mele peʼe ko he tahi age meʼa feia,+ kae ʼe maʼoniʼoni mo haohaoa.+

28 ʼE toe feia pe, ʼe tonu ki te ʼu tagata ʼohoana ke natou ʼoʼofa ki ʼonatou ʼohoana ohage ko tanatou ʼoʼofa ki ʼonatou sino totonu. Ko te tagata ʼae ʼe ʼofa ki tona ʼohoana ʼe ʼofa ia kia ia totonu, 29 koteʼuhi ʼe mole fehiʼa he tagata ki tona sino,* kae ʼe ina fafaga pea mo fakapelepeleʼi, ohage ko tona fai e Kilisito ki te kokelekasio, 30 he ʼe ko tatou ko te ʼu koga sino ʼo tona sino.+ 31 “Koia ʼe mavae anai te tagata mai tana tamai mo tana faʼe pea ʼe pipiki anai ki* tona ʼohoana, ʼo nā liliu ai ko he kakano ʼe tahi.”+ 32 ʼE maʼuhiga te meʼa fakalilo tapu*+ ʼaia. Pea ʼe fakaʼuhiga kia Kilisito pea mo te kokelekasio.+ 33 Kae ʼe tonu ke tahi ʼofa te tagata ʼohoana ki tona ʼohoana+ ohage ko tana ʼofa kia ia totonu. ʼI te tahi age faʼahi, ʼe tonu ki te fafine ʼohoana ke fakaʼapaʼapa lahi ki tona ʼohoana.+

6 ʼU fanau, kotou fakalogo ki ʼakotou matuʼā+ ʼo mulimuli ki te finegalo ʼo te ʼAliki, he ʼe ko te faʼahi ʼaia ʼe faitotonu. 2 “Fakaʼapaʼapa ki tau tamai pea mo tau faʼe,”+ ko te ʼuluaki fakatotonu ʼaia neʼe foaki fakatahi mo te fakapapau ʼaeni: 3 “Ke fua lelei ai kia koe pea ke ke maʼuli fualoa ai ʼi te kele.” 4 ʼU tamai, ʼaua naʼa kotou fakatupu ita ki ʼakotou fanau,+ kae ke kotou haga taupau natou ʼo akonakiʼi+ pea mo akoʼi* natou ʼo mulimuli ki te ʼu fakatokaga ʼa Sehova.*+

5 ʼU kaugana, kotou fakalogo ki ʼokotou pule fakatagata,+ ʼaki he fakaʼapaʼapa lahi mo he loto ʼe lelei, ohage ko takotou fakalogo kia Kilisito.* 6 ʼAua naʼa kotou fakalogo pe moka sioʼi koutou, ke leleiʼia koutou e te hahaʼi.+ Kae ke kotou fakalogo ohage ko he ʼu kaugana ʼa Kilisito ʼo kotou fai te finegalo ʼo te ʼAtua ʼaki he loto* katoa.+ 7 Kotou kaugana ʼaki he loto ʼe lelei, ohage ko he ʼu kaugana ʼa Sehova,*+ kae mole ʼa te tagata, 8 he ʼe kotou iloʼi, ko natou ʼae ʼe kaugana pea mo natou ʼae ʼe ʼateaina, ʼe liufaki age anai e Sehova* ia meʼa lelei fuli ʼae ʼe natou fai.+ 9 Koia ʼu pule, kotou fai feia ki ʼakotou kaugana, kae ʼaua naʼa kotou fakamatakuʼi natou, he ʼe kotou iloʼi ʼe ʼi selo ia Ia ʼae ʼe pule kia koutou mo natou,+ pea ʼe mole fakapalatahi.

10 Koia ke foaki atu e te ʼAliki te malohi+ ʼaki tona mafimafi. 11 Kotou kofuʼi te teu tau katoa+ ʼae ʼe foaki mai e te ʼAtua, ke feala ai hakotou tutuʼu malohi ʼo fakafeagai ki te ʼu kaka* ʼa te Tevolo. 12 Koteʼuhi ʼe mole tou tau+ ʼo fakafeagai ki te toto pea mo te kakano, kae ki te ʼu puleʼaga, mo te ʼu takitaki, mo te ʼu pule ʼo te malama fakapoʼuli ʼaeni, pea mo te ʼu laumalie agakovi+ ʼae ʼi selo. 13 Koia ʼe tonu ai ke kotou kofuʼi te teu tau katoa ʼae ʼe foaki mai e te ʼAtua,+ ke feala ai hakotou faʼa kataki ʼi te ʼaho ʼae ʼe kovi, pea ke kotou tutuʼu malohi moka kotou ʼosi fakahoko ia meʼa fuli.

14 Koia kotou tutuʼu malohi, ʼo ʼai ki ʼokotou koga loto ia te moʼoni ohage ko he kiliʼi pipi,+ pea mo kofuʼi te kofu ukamea ʼo te faitotonu,+ 15 pea ke kotou tui ki ʼokotou vaʼe te ʼu sulie ʼo te logo lelei ʼo te tokalelei, ʼae kua kotou teuteu ke kotou tala.+ 16 ʼO hilifaki ki te ʼu meʼa fuli ʼaia, kotou toʼo te meʼa tali tau lahi ʼo te tui+ ke feala ai hakotou tamateʼi te ʼu kauʼi nahau ulo fuli ʼa te Agakovi.*+ 17 Pea ke kotou tali te puloga tau ʼo te haofaki,+ pea mo te heleta ʼo te laumalie, ʼae ʼe ko te folafola ʼa te ʼAtua,+ 18 kae ʼaki te ʼu faʼahiga faikole+ pea mo te ʼu kole mamahi kehekehe kotou faikole ʼi te ʼu aluʼaga fuli ʼaki te laumalie.+ Koia kotou nonofo ʼalaʼala, ʼo kotou kole mamahi tuʼumaʼu maʼa te kau maʼoniʼoni fuli. 19 Kotou toe faikole foki maʼaku, ke au maʼu te poto palalau, ke feala haku palalau ʼaki he lototoʼa moʼo fakaha te meʼa fakalilo tapu* ʼo te logo lelei.+ 20 Koteʼuhi ko au ko he tagata fakafofoga ʼo te ʼAtua+ ʼe ina tala te logo lelei pea mo pilisoni. Pea kotou toe faikole ke au palalau ʼaki he lototoʼa ki te faʼahi ʼaia he ʼe ko toku maʼua.

21 Koia ke kotou iloʼi toku aluʼaga, ʼe fakaha atu anai e Tisike,+ ko he tehina ʼofaina mo faifekau agatonu ʼi te ʼAliki, ia meʼa fuli ʼo ʼuhiga mo au pea mo taku gaue.+ 22 ʼE au fekauʼi atu ia ia ʼuhi ko te fakatuʼutuʼu ʼaeni, ke ina fakaha atu tomatou aluʼaga pea ke ina fakafimalieʼi ʼokotou loto.

23 Ke foaki e te ʼAtua te Tamai pea mo te ʼAliki ko Sesu Kilisito, ki te ʼu tehina te tokalelei, mo te ʼofa pea mo te tui. 24 Pea ke nofo te ʼofa makehe ʼo te ʼAtua mo natou fuli ʼae ʼe ʼoʼofa ki totatou ʼAliki ko Sesu Kilisito ʼo heʼe gata.