TE TOHI KI TE KAU FILIPE

1 Ko au Paulo pea mo Timoteo, te ʼu tagata faifekau ʼa Kilisito* Sesu. ʼE au faitohi ki te kau maʼoniʼoni fuli ʼae ʼi Filipe ko te ʼu tisipulo ʼa Kilisito Sesu,+ ʼo feia ki te kau taupau pea mo te kau faifekau fakaminisitelio.+

2 Ke foaki atu e te ʼAtua tatatou Tamai pea mo te ʼAliki ko Sesu Kilisito ia te ʼofa makehe pea mo te tokalelei.

3 ʼE au fakafetaʼi tuʼumaʼu ki toku ʼAtua moka au manatuʼi koutou 4 ʼi ʼaku kole mamahi fuli. ʼE au momoli ʼaku kole mamahi fuli ʼo ʼuhiga mo koutou ʼaki he fiafia,+ 5 ʼuhi ko takotou tokoni ki te fakamafola ʼo te logo lelei talu mai te ʼuluaki ʼaho ʼo kaku mai ki te temi nei. 6 He ʼe au iloʼi papau te faʼahi ʼaeni: Ko te ʼAtua ʼae neʼe ina kamata he gaue lelei ia koutou ʼe ina fakaʼosi anai+ ʼi te ʼaho ʼo Kilisito Sesu.+ 7 ʼE tonu taku manatu ʼaia ʼo ʼuhiga mo koutou fuli, koteʼuhi ʼe au ʼofa mamahi ia koutou, he ʼe tou maʼu tatau ia te ʼofa makehe ʼo te ʼAtua. ʼE hoko te faʼahi ʼaia ʼi takotou tokoni mai ʼi taku pilisoni+ mo tatatou haofaki ia te logo lelei pea mo tatatou faiga ke fakamoʼoni ki ai ia te lao.+

8 Koteʼuhi ʼe iloʼi e te ʼAtua ʼe au fakaʼamu ke au sio kia koutou fuli he ʼe au ʼofa mamahi ia koutou ohage ko Kilisito Sesu. 9 Pea koʼeni te meʼa ʼae ʼe au haga kole, ke haga tuputupu tokotou ʼofa+ ʼaki te ʼatamai malama totonu+ pea mo te fakasiosio tonu katoa.+ 10 ʼE au toe kole ke kotou iloʼi papau te ʼu meʼa ʼae ʼe maʼuhiga ʼaupito,+ ke kotou maʼa pea ke ʼaua naʼa kotou fakatupu tukia ki ʼihi+ ʼo aʼu ki te ʼaho ʼo Kilisito. 11 Pea ke kotou maʼu lahi te fua ʼo te faitotonu ʼuhi ko Sesu Kilisito,+ ke fakakololiaʼi pea mo vikiʼi ai te ʼAtua.

12 Pea ʼe au loto ke kotou iloʼi, ʼu tehina, ʼuhi ko toku aluʼaga neʼe feala ai ke au lagolago ki te fakamafola ʼo te logo lelei. 13 Koia kua iloʼi e te hahaʼi mo te Foʼi Solia ʼo Te Hau Loma, ʼe au pilisoni+ ʼuhi ko taku tui kia Kilisito.+ 14 Pea kua lotomalohi ai te tokolahi ʼo te ʼu tehina ʼae ʼe gaue ki te ʼAliki ʼuhi ko toku pilisoniʼi, ʼo natou tala ai te folafola ʼa te ʼAtua ʼaki he lototoʼa, ʼo mole natou matataku.

15 ʼE moʼoni, ko ʼihi ʼe natou fakamafola ia Kilisito ʼaki he lotomaheka pea mo he manatu fakataupiepie, kae ko ʼihi ʼe natou fai ʼaki he lotolelei. 16 Ko natou ʼaia ʼe natou fakamafola ia Kilisito ʼaki te ʼofa, he ʼe natou iloʼi neʼe hinoʼi au ke au haofaki te logo lelei.+ 17 Kae ko natou ʼae, ʼe natou fai ʼaki he lotofakafifihi, ʼo mole natou fai ʼaki he lotolelei, he ʼe natou fia fakalotomamahiʼi au ʼi taku pilisoni. 18 Kotea tona fua? ʼE fakamafola ia Kilisito tatau aipe pe ʼe fai ʼaki he lotolelei peʼe kailoa, kae ʼe au fiafia ai. Koia ʼe hoko atu pe taku fakafiafia, 19 koteʼuhi ʼe au iloʼi ʼe haofaki anai au ʼuhi ko ʼakotou kole mamahi+ pea mo te tokoni ʼa te laumalie maʼoniʼoni ʼae ʼe foaki mai e Sesu Kilisito.+ 20 ʼE au tui papau pea mo ʼamanaki ʼe mole au ufiufi anai ki he meʼa. Koteʼuhi ʼe mole au mataku ʼi te palalau, pea ʼe au vikiʼi ia Kilisito ʼi te temi nei ohage pe ko taku fai talu mai te temi muʼa. Pe ʼe au maʼuli peʼe au mate ʼe au vikiʼi aipe anai ia ia.+

21 Kia au, kapau ʼe au maʼuli, ʼe au maʼuli maʼa Kilisito+ pea kapau ʼe au mate, ʼe ko he meʼa lelei kia au.+ 22 Pea kapau ʼe tonu ke hoko atu toku maʼuli ʼi te kakano, ko te fua ʼaia ʼo taku gaue, kae ko te meʼa ʼae ka au filifili, ʼe mole au fakaha. 23 ʼI te ʼu meʼa ʼaia ʼe lua ʼe mole au iloʼi pe kotea ʼae ka au filifili, kae ʼe au loto ke au ʼateaina pea mo fakatahi mo Kilisito,+ he ʼe au iloʼi papau, ʼe lelei ʼaupito age ia.+ 24 Kae ʼe ʼaoga age ia taku nofo ʼi te kakano ʼuhi ko koutou. 25 Pea ʼuhi ʼae ʼe au tui ki te faʼahi ʼaia, ʼe au iloʼi ʼe au nofo anai pea mo haga maʼuli mo koutou fuli ke kotou tuputupu ʼi takotou gaue ki te ʼAtua pea ke kotou fiafia ʼi takotou tui, 26 ke lahi ai takotou fiafia ia Kilisito Sesu ʼuhi ko au pea mo taku toe liliu atu kia koutou.

27 Ke tuha takotou aga mo te logo lelei ʼo ʼuhiga mo Kilisito.+ Koia tatau aipe pe ʼe au alu atu ʼo fakasiosio koutou peʼe kailoa, kae ʼe au logo anai ʼe kotou tutuʼu malohi mo he manatu ʼe tahi pea mo he loto* ʼe tahi,+ pea mo gaue kinakina fakatahi moʼo taupau takotou tui ki te logo lelei, 28 pea ʼe mole kotou matataku ʼi ʼokotou fili. ʼE ko he fakamoʼoni ʼaia ʼe fakaʼauha anai+ natou, kae ʼe haofaki anai koutou,+ pea ko te faʼahi ʼaia ʼe haʼu ia mai te ʼAtua. 29 ʼUhi ko Kilisito neʼe kotou maʼu te fealagia ʼae ke mole gata ʼaki pe takotou tui kia ia, kae ke kotou toe mamahi maʼa ia.+ 30 ʼE kotou tau pe mo te ʼu ʼahiʼahi ʼae neʼe au tau mo ia ohage pe ko takotou sisio ki ai,+ pea ʼe kotou logo ʼe kei hoko atu pe.

2 Koia ka kotou fakalotomalohiʼi pea mo fakafimalieʼi ʼihi ʼi te ʼofa he ʼe kotou fakatahi mo Kilisito,* mo kotou tokakaga pea mo ʼoʼofa mamahi mo manavaʼofa kia natou, 2 kotou fakakatoa toku fiafia ʼo kotou maʼu he manatu ʼe tahi, mo feʼofaʼaki, ʼo kotou logo tahi pea mo fakakaukau tahi.+ 3 ʼAua naʼa kotou fai he meʼa ʼaki he manatu fakataupiepie+ peʼe ʼaki he fiaha,+ kae ʼaki he agavaivai* kotou fakaʼuhiga te hahaʼi fuli ʼe maʼoluga age ia koutou.+ 4 Pea ʼaua naʼa kotou kumi pe te ʼu meʼa ʼae ʼe lelei kia koutou totonu,+ kae ke kotou toe kumi foki mo te ʼu meʼa ʼae ʼe lelei ki ʼihi.+

5 Kotou taupau te faʼahiga manatu ʼae neʼe toe maʼu e Kilisito Sesu,+ 6 ʼae neʼe hage ko te ʼAtua,+ kae neʼe mole manatu pe la ke faiga ke tatau mo te ʼAtua.+ 7 Kailoa ia, kae neʼe ina tuku ia meʼa fuli ʼae neʼe ina maʼu pea neʼe liliu ai ohage ko he kaugana.+ Neʼe liliu ai ko he tagata.*+ 8 Pea tahi ʼae, ʼi tana tupu tagata,* neʼe ina fakamalaloʼi ia ia totonu pea neʼe liliu ai ʼo fakalogo ʼo kaku ki tona mate,+ ʼei, ʼi he pou fakamamahi.*+ 9 ʼUhi ko te faʼahi ʼaia, neʼe hikihiki ia ia e te ʼAtua ki he tuʼulaga maʼoluga+ pea mo lotolelei ke ina foaki age kia ia he higoa ʼe maʼuhiga age ʼi te ʼu higoa fuli ʼae,+ 10 ke feala ai, ʼi te huafa ʼo Sesu, ke tuʼutuli ai ia natou fuli ʼae ʼi te lagi, mo natou fuli ʼae ʼi te kele pea mo natou fuli ʼae ʼi te lalo kele+ 11 pea ke natou fakamoʼoni fuli ko Sesu Kilisito ʼe ko te ʼAliki+ ki te kololia ʼo te ʼAtua te Tamai.

12 Siʼoku ʼu tehina ʼofaina, neʼe kotou fakalogo tuʼumaʼu ʼi taku nofo mo koutou, pea ʼi te temi nei ʼae ʼe mole kei au nofo ai mo koutou kua ʼaʼasili age takotou fakalogo. Koia ke kotou tahi gaue ʼaki he fakaʼapaʼapa lahi ke kotou maʼu ai te haofaki. 13 Koteʼuhi ko te ʼAtua ʼi tona lotolelei ʼe ina fakamalohiʼi koutou, ʼo ina foaki atu kia koutou te fakaʼamu pea mo te malohi moʼo fakahoko ia meʼa fuli ʼae ʼe ina leleiʼia. 14 Kotou haga fai ia meʼa fuli ʼo mole kotou muhumuhu+ pea mo fihi,+ 15 ke kotou liliu ai ʼo heʼe mele pea mo maʼa, ko he ʼu fanau ʼa te ʼAtua+ ʼe haohaoa ʼi te lotolotoiga ʼo he taʼiake ʼe aga fakapikopiko pea mo agakovi.+ Pea ʼe kotou mu ai ohage ko he ʼu malama ʼi te malamanei,+ 16 ʼo kotou taʼofi maʼu te folafola ʼo te maʼuli.+ Koia ʼe feala anai ke au maʼu he tupuʼaga ke au fiafia ai ʼi te ʼaho ʼo Kilisito, he ʼe au iloʼi ʼe mole vaʼiganoa taku lele pea mo taku gaue kinakina. 17 Koia tatau aipe pe ʼe liligi au ohage ko he molaga vino* neʼe huaʼi+ ki te sakilifisio+ pea mo te gaue taputapu ʼae ʼe kotou fai ʼuhi ko takotou tui, kae ʼe au fiafia pea mo fakafiafia mo koutou fuli. 18 ʼO toe feia pe, ke kotou toe fiafia foki pea mo kotou fakafiafia mo au.

19 Pea ʼe au fakaʼamu, kapau ʼe ko te finegalo ʼo te ʼAliki ko Sesu, ke au fekauʼi vave atu ia Timoteo kia koutou,+ ke au lotomalohi ai moka au maʼu he ʼu logo ʼo ʼuhiga mo koutou. 20 He ʼe mole au maʼu he tahi ʼe hage ko Timoteo ʼae ʼe tokaga moʼoni anai kia koutou. 21 He ʼe ko natou fuli ʼae, ʼe natou kumi te ʼu meʼa ʼae ʼe lelei kia natou, kae mole ko te ʼu meʼa ʼae ʼe lelei kia Sesu Kilisito. 22 Kae ʼe kotou iloʼi te fakamoʼoni ʼaeni neʼe ina foaki ʼo ʼuhiga mo ia: Ohage ko he tamasiʼi+ mo tana tamai, neʼe kaugā gaue mo au ʼaki he faʼafai ki te tuputupu ʼo te fakamafola ʼo te logo lelei. 23 Koia ʼe au fakaʼamu ke au fekauʼi atu ia ia moka hoki au sio pe ʼe feafeaʼi toku aluʼaga. 24 Pea ʼe au tui papau, kapau ʼe ko te finegalo ʼo te ʼAliki, ʼe au toe alu vave atu anai mo au.+

25 Kae ʼi te temi nei ʼe au manatu ʼe ʼaoga ke au fakaliliu atu toku tehina ko Epafolotito. Neʼe kaugā gaue mo au pea neʼe ko he tagata solia ʼa Kilisito. Neʼe kotou fekauʼi mai ia ia ohage ko he kaugana ke tokoni mai ʼo ʼuhiga mo te ʼu meʼa ʼae ʼe ʼaoga kia au.+ 26 ʼE fakaʼamu lahi ke sio kia koutou fuli pea ʼe lotovaivai koteʼuhi neʼe kotou logo neʼe mahaki. 27 ʼE moʼoni, neʼe mahaki ʼo meihiʼi mate. Kae neʼe ʼofa te ʼAtua kia ia, pea neʼe mole ʼofa pe kia ia kae neʼe toe ʼofa mai kia au, ke mole au lotomamahi ʼo laka age ʼi toku lotomamahi ʼaeni. 28 Koia ʼe au fekauʼi vave atu ia ia, ke kotou toe fakafiafia ai moka kotou sisio kia ia pea ke siʼisiʼi ai mo toku lotohoha. 29 Koia kotou tali ia ia ohage ko takotou tali mahani te ʼu tisipulo ʼa te ʼAliki ʼaki he fiafia lahi, pea ke kotou haga fakaʼapaʼapaʼi te taʼi ʼu tagata ʼaia.+ 30 Koteʼuhi neʼe meihiʼi pe ke mate ʼuhi ko te gaue ʼa Kilisito,* pea neʼe tuʼutamakiʼia tona maʼuli* moʼo foaki mai te tokoni ʼae neʼe mole feala ke kotou foaki mai.+

3 Koia ʼoku tehina, kotou haga fiafia ʼi te gaue ki te ʼAliki.+ ʼE mole au fiu ʼi te toe tohi atu ʼo te ʼu meʼa ʼae kua ʼosi au tohi atu, he ʼe ko he puipui kia koutou.

2 Kotou tokakaga kia natou ʼae ʼe heʼe maʼa.* Kotou tokakaga kia natou ʼae ʼe natou fakatupu kovi ki ʼihi. Kotou tokakaga kia natou ʼae ʼe natou hifi te kakano.+ 3 Koteʼuhi ʼe tou maʼu tatou te silikosisio* moʼoni,+ he ʼe tou fai te tauhi taputapu ʼaki te laumalie ʼo te ʼAtua pea mo fiameʼameʼa ia Kilisito* Sesu+ pea ʼe mole tou fakatafito tatatou falala ki te ʼu meʼa fakatagata,* 4 logo la ʼe au maʼu he ʼu tupuʼaga ke au falala ki te ʼu meʼa fakatagata ʼo laka age ʼi ʼihi.

Kapau ʼe ʼi ai he tahi ʼe manatu ʼe ina maʼu he ʼu tupuʼaga ke falala ai ki te ʼu meʼa fakatagata, ʼe au laka age au: 5 Neʼe au silikosisio ʼi te valu ʼaho,+ ʼe au kau ʼi te puleʼaga ʼo Iselaele, mai te telepi ʼo Pesamino, neʼe au tupu Hepeleo pea neʼe Hepeleo ʼaku matuʼā,+ neʼe ko au ko he Faliseo*+ neʼe mulimuli ki te Lao, 6 neʼe au fakatagaʼi te kokelekasio ʼaki he faʼafai,+ pea neʼe au heʼe mele he neʼe au mulimuli ki te meʼa ʼae ʼe ui ʼi te Lao ʼe faitotonu. 7 Kae ko te ʼu meʼa ʼae neʼe maʼuhiga kia au, kua au meʼa noaʼi* ʼuhi ko Kilisito.+ 8 Pea tahi ʼae, ʼe au toe fakaʼuhiga ia meʼa fuli ʼe ko he ʼu meʼa noa ʼuhi ko te maʼuhiga ʼaupito ʼo te ʼatamai malama ʼo ʼuhiga mo Kilisito Sesu toku ʼAliki. Neʼe au liʼaki ia meʼa fuli ʼuhi ko ia pea ʼe au fakaʼuhiga te ʼu meʼa ʼaia ohage ko he ʼu ʼotaʼota, ke feala ai ke au maʼu ia Kilisito 9 pea mo au fakatahi mo ia. ʼE au liliu ai ʼo faitotonu ʼuhi ko taku tui+ kia Kilisito,+ kae mole ʼuhi ko taku mulimuli ki te lao. Ko te faitotonu ʼaia ʼe haʼu mai te ʼAtua ʼuhi ko te tui.+ 10 ʼE au loto ke au iloʼi ia ia pea mo te malohi ʼae neʼe ina fakatuʼuake ia ia mai te kau mate.+ ʼE au fia mamahi+ pea mo mate ohage ko ia,+ 11 moʼo vakaʼi pe ʼe feala ke au kau ʼi te ʼuluaki fakatuʼuake ʼo te kau mate.+

12 ʼE heʼeki au maʼu te fakapale pea ʼe heʼeki au haohaoa, kae ʼe au haga faiga ke au maʼu te fakapale,+ koteʼuhi ʼe au iloʼi neʼe filifili* au e Kilisito Sesu ki te faʼahi ʼaia.+ 13 ʼU tehina, ʼe mole au manatu kua au maʼu te fakapale, kae ʼe au iloʼi papau te faʼahi ʼaeni: ʼE au galoʼi te ʼu meʼa ʼae ʼi muli,+ kae ʼe au haga ki te ʼu meʼa ʼae ʼi muʼa,+ 14 pea ʼe au haga lele ʼaki te fakatuʼutuʼu ʼae ke au maʼu te fakapale+ ʼae ʼe ko te pauʼi mai+ te ʼAtua ʼaki ia Kilisito Sesu. 15 Koia ko natou ʼae ʼe fotufotuʼa ʼi te faʼahi fakalaumalie+ ia tatou ʼe tonu ke natou maʼu te manatu ʼaia, kae kapau ʼe mole kotou manatu feia ʼe tokoni atu anai te ʼAtua ke kotou manatu feia. 16 Pea tatau aipe pe neʼe tou tuputupu, kae ʼe tonu ke tou haga haʼele ohage pe ko te mahani.

17 Kotou faʼifaʼitakiʼi au,+ ʼu tehina, pea kotou tokagaʼi ia natou ʼae ʼe maʼuʼuli ʼo mulimuli ki te faʼifaʼitaki ʼae neʼe matou tuku atu. 18 He ʼe tokolahi ia natou neʼe au palalau liuliuga ʼo ʼuhiga mo natou ʼi te temi muʼa, kae ʼi te temi nei ʼe au tagi moka au palalau ʼo ʼuhiga mo natou, koteʼuhi ʼe natou maʼuʼuli ohage ko he ʼu fili ʼo te pou fakamamahi* ʼo Kilisito. 19 Ko tonatou ikuʼaga ʼe ko te fakaʼauha, pea ko tonatou ʼatua ʼe ko tonatou fatu, pea ko tonatou kololia ʼe ko tonatou ufiufi, pea ʼe natou manatu pe ki te ʼu meʼa ʼo te kele.+ 20 Kae ko totatou fenua+ ʼe tuʼu ʼi selo,+ pea ʼe tou fakaatalitali mo he fakaʼamu lahi ki he fakamaʼuli mai te lagi, ia te ʼAliki ko Sesu Kilisito,+ 21 ʼae ka ina fetogi ʼotatou sino vaivai ke hage ko* te kololia ʼo tona sino+ ʼaki tona malohi ʼae ʼe feala ke ina fakaʼaogaʼi ke fakalogo ia meʼa fuli kia ia.+

4 Koia ʼoku tehina ʼae ʼe au ʼofa ai, ʼe au fakaʼamu ke au sio kia koutou. Ko koutou toku fiafiaʼaga mo toku pale.+ Kotou tutuʼu malohi+ ʼi te ʼAliki, ʼoku tehina ʼofaina, ohage ko taku fakaha atu.

2 ʼE au fakalotomalohiʼi ia Evoti pea mo Sinitise ke nā manatu tahi ʼi te ʼAliki.+ 3 ʼEi, ʼe au toe kole atu, ohage ko he kaugā gaue moʼoni, ke ke haga tokoni ki te ʼu fafine ʼaia. Neʼe nā gaue kinakina fakatahi mo au ʼo fakamafola te logo lelei, ʼo kau ai mo Kelemete pea mo te toe ʼo ʼoku kaugā gaue. Pea ʼe tuʼu ʼonatou higoa ʼi te tohi ʼo te maʼuli.*+

4 Kotou fakafiafia tuʼumaʼu ʼi te ʼAliki. ʼE au toe ui atu: Kotou fakafiafia!+ 5 Ke iloʼi e te tagata fuli takotou aga fakapotopoto.+ Ke ʼaua naʼa galo kia koutou kua ovi mai te ʼAliki. 6 ʼAua naʼa kotou tuʼania ki he meʼa,+ kae ʼi te temi fuli ʼaki te faikole mo te kole mamahi pea mo te fakafetaʼi, kotou fakaha ki te ʼAtua ʼakotou kole,+ 7 pea ko te tokalelei+ ʼo te ʼAtua ʼae ʼe maʼoluga age ia meʼa fuli ʼae ʼe mahino ki ai te tagata, ʼe ina taupau anai ʼokotou loto+ pea mo ʼokotou fealagia fakakaukau* ʼaki ia Kilisito* Sesu.

8 Koia ʼu tehina, kotou haga vakaʼi* te ʼu meʼa ʼaeni:+ te ʼu meʼa fuli ʼae ʼe moʼoni, mo te ʼu meʼa fuli ʼae ʼe maʼuhiga, mo te ʼu meʼa fuli ʼae ʼe faitotonu, mo te ʼu meʼa fuli ʼae ʼe maʼa, mo te ʼu meʼa fuli ʼae ʼe tuha mo te ʼofa, mo te ʼu meʼa fuli ʼae ʼe tuha ke fakaʼapaʼapaʼi, mo te ʼu meʼa fuli ʼae ʼe lelei, pea mo te ʼu meʼa fuli ʼae ʼe tuha ke vikiʼi. 9 Kotou maʼuliʼi te ʼu meʼa ʼae neʼe kotou ako, mo tali, mo logo pea mo sio ki ai ia au,+ pea ʼe nofo anai te ʼAtua ʼo te tokalelei mo koutou.

10 ʼE au fakafiafia lahi ʼi te ʼAliki, he ʼe kotou toe fakaha ʼe kotou manatuʼi au.+ Neʼe kotou manatuʼi tuʼumaʼu pe au, kae neʼe mole kotou maʼu he faigamalie ke kotou fakaha mai. 11 ʼE mole au palalau feia he ʼe ʼaoga mai he meʼa kia au, koteʼuhi neʼe au ako te maʼuli fakafeʼauga ʼi he ʼu aluʼaga pe ʼe au maʼuli ai.+ 12 ʼE au iloʼi pe ʼe feafeaʼi te maʼuli ʼi te masiva+ pea ʼe au iloʼi pe ʼe feafeaʼi te maʼuli ʼi te mahu. Ia meʼa fuli pea ʼi te ʼu aluʼaga fuli neʼe au ako te meʼa ʼae ʼe mole iloʼi e te tokolahi: Neʼe au ako ke au fiafia tatau aipe pe ʼe au makona peʼe au pakupaku, tatau aipe pe ʼe au maʼuli ʼi te mahu peʼe kailoa. 13 ʼE au maʼu te malohi kia meʼa fuli ʼuhi ko ia ʼae ʼe ina foaki mai te malohi.+

14 Kae neʼe kotou fai he meʼa ʼe lelei ʼi takotou tokoni mai kia au ʼi ʼoku mamahi. 15 Pea ko koutou kau Filipe, ʼe kotou iloʼi lelei te faʼahi ʼaeni: ʼI te hili ʼo takotou kamata ako te logo lelei, pea ʼi taku mavae ʼae mai Masetonia, neʼe mole tokoni mai he kokelekasio kia au peʼe natou tali taku tokoni, gata pe kia koutou.+ 16 He ʼe ʼi taku nofo ʼi Tesalonika, neʼe kotou momoli mai te ʼu meʼa ʼae neʼe ʼaoga kia au ʼo mole tuʼa tahi pe kae tuʼa lua. 17 ʼE mole au kumi meʼa ʼofa, kae ʼe au kumi te fua ʼae ʼe ina fakatuputupu anai ʼokotou koloa.* 18 Kua au maʼu te ʼu meʼa fuli ʼe ʼaoga kia au, ʼo laka age. ʼE mole au hala mo he meʼa, talu te haʼu ʼa Epafolotito+ mo te ʼu meʼa ʼae neʼe kotou momoli mai,+ ʼe ko he sakilifisio ʼe magoni ʼe tali leleiʼi e te ʼAtua. 19 Pea ʼaki ia Kilisito Sesu, ʼe foaki atu anai e toku ʼAtua ia meʼa fuli ʼae ʼe ʼaoga kia koutou+ ʼo mulimuli ki te lahi ʼo ʼona koloa. 20 Ke fakakololiaʼi totatou ʼAtua mo Tamai ʼo talu ai. Ameni.

21 Kotou ʼoʼofa age ki te kau maʼoniʼoni fuli ʼae ʼe ko he ʼu tisipulo ʼa Kilisito Sesu. Pea ʼe ʼoʼofa atu te ʼu tehina ʼae ʼe nonofo mo au. 22 ʼE toe ʼoʼofa atu mo te kau maʼoniʼoni fuli, kae tafito ia natou ʼae ʼo te loto fale ʼo Sesale.*+

23 Ke tapuakiʼi te faʼahiga manatu ʼae ʼe kotou fakaha ʼaki te ʼofa makehe ʼo te ʼAliki ko Sesu Kilisito.