TE TOHI KI TE KAU KOLOSE

1 Ko au Paulo, he apositolo ʼa Kilisito* Sesu ʼaki te finegalo ʼo te ʼAtua, pea mo totatou tehina ko Timoteo,+ 2 ʼe ma momoli te tohi ʼaeni ki te kau maʼoniʼoni pea mo te ʼu tehina agatonu ʼae ko te ʼu tisipulo ʼa Kilisito ʼi te kolo ko Kolose.

Ke foaki atu e te ʼAtua tatatou Tamai ia te ʼofa makehe pea mo te tokalelei.

3 ʼE matou fakafetaʼi tuʼumaʼu ki te ʼAtua, te Tamai ʼo totatou ʼAliki ko Sesu Kilisito, moka matou faikole maʼa koutou, 4 ʼuhi ko tamatou logo ʼae ki takotou tui kia Kilisito Sesu pea mo takotou ʼoʼofa ʼae ki te kau maʼoniʼoni fuli 5 koteʼuhi ʼe kotou maʼu te ʼamanaki ʼae ʼe taʼofi maʼa koutou ʼi selo.+ Neʼe kotou iloʼi te ʼamanaki ʼaia, ʼi takotou logo ki te moʼoni ʼae ko te logo lelei 6 ʼae neʼe kaku atu kia koutou. ʼE fua lelei pea mo tuputupu ʼi te malamanei katoa te fakamafola ʼo te logo lelei,+ ohage pe ko tona fua lelei ia koutou talu mai te ʼaho ʼae neʼe kotou logo pea mo iloʼi ai te ʼofa makehe moʼoni ʼo te ʼAtua. 7 Neʼe kotou iloʼi te faʼahi ʼaia ʼaki ia Epafalasi,+ totatou tehina ʼofaina pea mo agatonu, ʼae ʼe kaugana kia Kilisito ʼo ina fakafofoga matou. 8 Neʼe ina toe fakaha mai kia matou tokotou ʼofa ʼi te faʼahi fakalaumalie.*

9 Ko te tupuʼaga ʼaia, talu mai te ʼaho ʼae neʼe matou logo ai ki te palalauʼi ʼo tokotou ʼofa pea mo takotou tui, neʼe matou faikole tuʼumaʼu ai maʼa koutou+ pea mo kole ke kotou maʼu te ʼatamai malama totonu+ ʼo tona finegalo, ʼaki te poto katoa pea mo te mahino fakalaumalie.+ 10 ʼE matou faikole ke kotou fai te ʼu meʼa ʼae ʼe tuha mo natou ʼae ʼe atolasio kia Sehova,* moʼo fakafiafiaʼi tona loto ʼi te ʼu gaue lelei fuli ʼae ʼe kotou fai, pea mo kotou tuputupu ʼi te ʼatamai malama totonu ʼae ʼo ʼuhiga mo te ʼAtua.+ 11 Pea ke fakamalohiʼi koutou ʼaki te mafimafi ʼo te ʼAtua,+ ke feala ai ke kotou ʼutakiʼi ia meʼa fuli pea mo kotou kataki fualoa ʼi te fiafia. 12 Kotou fakafetaʼi ki te Tamai, ʼae neʼe ina fakafealagia ke kotou maʼu fakatahi te tofiʼa ʼa te kau maʼoniʼoni+ ʼae neʼe fakamalamaʼi.

13 Neʼe ina haofaki tatou mai te pule ʼo te fakapoʼuli+ pea ina ʼave tatou ki te puleʼaga ʼo tona ʼAlo ʼofaina, 14 ʼae neʼe ina fakaʼateainaʼi tatou ʼaki te totogi,* ʼo fakamolemole ai ʼatatou agahala.+ 15 ʼE ko ia te pāki ʼo te ʼAtua fakapulipuli,+ te ʼuluaki tupu ʼo meʼa fuli ʼae neʼe fakatupu.+ 16 Koteʼuhi ʼaki ia ia neʼe fakatupu ia meʼa fuli ʼae, te ʼu meʼa ʼae ʼi te lagi pea mo te ʼu meʼa ʼae ʼi te kele, mo te ʼu meʼa ʼae ʼe ha pea mo te ʼu meʼa ʼae ʼe fakapulipuli,+ ʼo toe feia aipe mo te ʼu hekaʼaga fakahau, peʼe ko te ʼu tuʼulaga fakaʼaliki, peʼe ko te ʼu puleʼaga, peʼe ko te ʼu takitaki. Neʼe fakatupu ia meʼa fuli ʼaia, ʼaki ia ia+ pea maʼa ia. 17 Tahi ʼae, neʼe muʼa ia meʼa fuli ʼaia,+ pea ʼaki ia ia neʼe fakatupu ia meʼa fuli ʼaia, 18 pea ʼe ko ia te ʼulu ʼo te sino, ʼae ko te kokelekasio.+ ʼE ko ia te kamataʼaga, te ʼuluaki tupu kua fakatuʼuake mai te kau mate,+ pea neʼe liliu ai ko te ʼuluaki ia meʼa fuli. 19 Koteʼuhi neʼe lotolelei te ʼAtua ke katoa ʼi tona ʼAlo ia meʼa fuli,+ 20 pea ʼaki ia ia ke fakatokatoka ia meʼa fuli mo ia totonu,+ te ʼu meʼa ʼae ʼi te kele pea mo te ʼu meʼa ʼae ʼi te lagi. ʼE feala te fakatokatoka ʼaia ʼuhi ko te taʼataʼa+ ʼae neʼe ina liligi ʼi te pou fakamamahi.*

21 Neʼe kotou mamaʼo mai te ʼAtua pea neʼe ko koutou ko ʼona fili ʼi te temi muʼa koteʼuhi neʼe kotou manatu ki te ʼu gaue ʼae neʼe kovi. 22 Kae ʼi te temi nei, kua ina fakatokatoka koutou mo ia totonu, ʼaki te sinoʼi tagata ʼo ia ʼae neʼe mate, ke feala ai hakotou ha ʼi ʼona muʼa ʼe kotou maʼoniʼoni, mo heʼe mele, pea ʼe mole he tupuʼaga ʼo tokotou tukugakoviʼi.+ 23 Kehe pe ke kotou haga tui,+ mo tutuʼu malohi+ ʼi te fakatafito,+ pea ke ʼaua naʼa fakamamaʼo koutou mai te ʼamanaki ʼo te logo lelei, ʼae neʼe kotou logo ki ai pea neʼe fakamafola ki te hahaʼi fuli ʼae ʼi te lalo lagi.+ Ko au Paulo, neʼe au liliu ko he tagata fakamafola ʼo te logo lelei ʼaia.+

24 ʼE au fakafiafia ʼi te temi nei logo la ʼe au mamahi maʼa koutou.+ ʼE au logoʼi ʼe tonu ke hoko atu taku mamahi ohage ko he tahi ʼe kau ki te sino ʼo Kilisito. Ko te mamahi ʼaia ʼe fua lelei anai ki tona sino,+ ʼae ko te kokelekasio.+ 25 Neʼe au liliu ai ko he tagata faifekau ʼa te kokelekasio ʼaia ʼo mulimuli ki te maʼua tauhi ʼapi+ ʼae neʼe foaki mai e te ʼAtua ʼo ʼuhiga mo koutou, ʼae ko te fakamafola fakamalotoloto ʼo te folafola ʼa te ʼAtua, 26 ʼae ʼe kau ai te meʼa fakalilo tapu*+ ʼae neʼe fufu talu mai te ʼu tuʼu ʼo te ʼu faʼahiga meʼa*+ ʼafeā pea mo te ʼu taʼiake ʼafeā. Kae ʼi te temi nei kua fakaha ki tana kau maʼoniʼoni,+ 27 ʼae neʼe lotolelei ia te ʼAtua ke ina fakaha age kia natou ia te kololia ʼo te meʼa fakalilo tapu ʼaia ia muʼa ʼo te ʼu puleʼaga kehekehe.+ Pea ko te meʼa fakalilo tapu ʼaia ʼe ko Kilisito ʼae ʼe fakatahi mo koutou, ko tona fakaʼuhiga ʼe kotou ʼamanaki ke fakakololiaʼi koutou pea mo ia.+ 28 Pea ʼe ko ia ʼae ʼe tou tala ʼi tatatou fakatokaga te tagata fuli pea mo akoʼi natou ʼaki te poto moʼoni, ke tou fakaha te tagata fuli ki te ʼAtua ohage ko he ʼu tisipulo ʼa Kilisito kua katoa.+ 29 Ko te tupuʼaga la ʼaia ʼo taku gaue kinakina pea mo faiga malohi ʼaki te tokoni ʼo tona malohi ʼae ʼe gaue ia au.+

2 ʼE au loto ke kotou iloʼi taku faiga malohi ʼae ke au tokoni atu kia koutou, mo natou ʼae ʼi Laotise+ pea mo natou fuli ʼae neʼe heʼeki sisio mata kia au.* 2 ʼE feala ai ke fakafimalieʼi ʼonatou loto+ pea ke natou fakatahi lelei ʼi te ʼofa.+ Koia ʼe natou koloaʼia anai, ko tona fakaʼuhiga ʼe natou mahino lelei anai pea mo natou maʼu anai te ʼatamai malama totonu ʼo ʼuhiga mo te meʼa fakalilo tapu* ʼa te ʼAtua, ʼae ko Kilisito.*+ 3 Pea ʼe fufu lelei ia te ia te ʼu koloa fuli ʼo te poto pea mo te ʼatamai malama.+ 4 ʼE au fai atu te ʼu palalau ʼaia ke ʼaua naʼa kakaʼi koutou e he tahi ʼaki ni fakakaukau kaka. 5 Tatau aipe pe ʼe au puli, kae ʼe au manatuʼi koutou, pea ʼe au fakafiafia ʼi taku sio ki takotou tokalelei+ pea mo takotou tui malohi ʼae kia Kilisito.+

6 Koia ohage pe ko takotou tali ia Kilisito Sesu te ʼAliki, kotou haga haʼele fakatahi mo ia, 7 mo tauaka mo laga ʼi te fakatafito ʼae ko Kilisito+ pea mo tutuʼu malohi ʼi te tui,+ ohage pe ko tona akoʼi atu, pea mo fakafetaʼi tuʼumaʼu ki te ʼAtua.+

8 Kotou tokakaga ke ʼaua naʼa fakapopulaʼi koutou e he tahi ʼaki te filosofia pea mo he ʼu manatu kaka mo vaʼiganoa.+ Ko te ʼu meʼa ʼaia ʼe fakatafito ki te talatisio ʼa te tagata, mo te ʼu manatu ʼa te malamanei, kae ʼe mole fakatafito ia ki te ʼu akonaki ʼa Kilisito. 9 Koteʼuhi ʼe katoa ia te ia te ʼuhiga ʼo te ʼAtua pea ʼe ha lelei.*+ 10 Koia ʼe kotou maʼu ia meʼa fuli ʼaki ia ia ʼae ʼe pule ki te ʼu puleʼaga pea mo te ʼu pule fuli.+ 11 ʼAki ia ia, neʼe mole silikosisioʼi* koutou e te tagata, kae neʼe silikosisioʼi koutou ʼi takotou liʼaki te ʼu gaue ʼo te kakano.+ Pea ʼe tonu ke feia te silikosisioʼi ʼo te ʼu kaugana ʼa Kilisito.+ 12 Koteʼuhi neʼe papitemaʼi koutou ohage ko tona papitemaʼi,+ pea ʼi takotou fakatahi mo ia neʼe fakatuʼuake koutou+ ʼuhi ko takotou tui ki te gaue ʼae neʼe fakahoko ʼaki te mafimafi ʼo te ʼAtua, ʼae neʼe ina fakatuʼuake ia ia mai te kau mate.+

13 Tahi ʼae, logo la neʼe kotou mamate ʼuhi ko ʼakotou agahala pea mo takotou heʼe silikosisio, kae neʼe fakamaʼuli koutou e te ʼAtua ke kotou fakatahi mo Kilisito.+ Neʼe lotolelei ke ina fakamolemole fuli ʼatatou agahala.+ 14 Pea neʼe ina molehi te Lao+ ʼae neʼe fakafeagai kia tatou+ pea neʼe lahi ai te ʼu lekula.+ Neʼe ina pulihi ʼi tana tutuki ki te pou fakamamahi.*+ 15 ʼAki te pou fakamamahi,* neʼe malo ai ʼi te ʼu puleʼaga pea mo te ʼu pule, pea neʼe ina taki natou ohage ko he kau popula pea mo ina fakalainoaʼi natou ia muʼa ʼo te hahaʼi, ʼo fakaha ai tana malo lahi ia natou.+

16 Pea ke ʼaua naʼa fakamauʼi koutou e he tahi ʼo ʼuhiga mo te kai pea mo te inu,+ peʼe ʼo ʼuhiga mo he ʼaho lahi, peʼe ko te fakamanatu ʼo te tuʼu afiafi ʼo te mahina,+ peʼe ko he sapato.+ 17 Ko te ʼu meʼa ʼaia ʼe ko he ʼata ʼo te ʼu meʼa ʼae ka hoko mai,+ kae ko te moʼoni ʼo te ʼu meʼa ʼaia ʼe ko Kilisito.+ 18 Ko ʼihi ʼe natou agavaivai loi, pea mo tauhi ki te kau ʼaselo.* Koia ʼaua naʼa kotou fakagafua ki he faʼahiga hahaʼi feia ke natou toʼo tokotou fakapale.+ He ʼe natou “falala ki”* te ʼu meʼa ʼae neʼe natou sisio ki ai. Pea ʼe natou fiameʼalahi ʼi ʼanatou manatu fakatagata kae ʼe mole hona tupuʼaga. 19 ʼE mole pipiki te hahaʼi ʼaia ki te ʼulu,+ ʼae ʼe ina foaki ki te sino katoa te ʼu meʼa ʼae ʼe ʼaoga ki ai pea mo fakaʼaogaʼi te ʼu hokoga hui pea mo te ʼu ivi ke pipiki fakatahi te ʼu koga sino. ʼE ina fakatuputupu te sino, pea ko te tuputupu ʼaia ʼe haʼu mai te ʼAtua.+

20 Neʼe kotou mamate fakatahi mo Kilisito ʼo kotou liʼaki te ʼu manatu ʼa te malamanei.+ Kapau koia, he koʼe ʼe kotou maʼuʼuli ohage ʼe kei kotou kau ʼi te malamanei? Pea he koʼe ʼe kei kotou fakalogo ki te ʼu fakatotonu ʼaeni:+ 21 “ ʼAua naʼa ke toʼo, ʼaua naʼa ke ʼahiʼahi, ʼaua naʼa ke fāfā ki he meʼa”? 22 He ʼe ko te ʼu meʼa ʼaia ʼe maumauʼi anai moka ʼosi fakaʼaogaʼi pea ko te ʼu fakatotonu ʼaia ʼe ko te ʼu lekula pea mo te ʼu akonaki ʼa te tagata.+ 23 Ko te ʼu meʼa ʼaia ʼe hage ʼe fakapotopoto. Kae ko natou ʼae ʼe natou fai te ʼu meʼa ʼaia ʼe natou filifili totonu tanatou faʼahiga tauhi. Pea ʼe natou fakamamahiʼi ʼonatou sino+ koteʼuhi ʼe natou loto ke ui e te hahaʼi ʼe natou agavaivai. Kae ʼe mole he ʼuhiga ʼo te ʼu meʼa ʼaia moʼo tauʼi ʼo te ʼu holi ʼo te kakano.

3 Kae kapau neʼe fakatuʼuake koutou mo Kilisito,*+ kotou haga kumi te ʼu meʼa ʼae ʼi ʼoluga, te potu ʼae ʼe heka ai ia Kilisito ʼi te toʼomataʼu ʼo te ʼAtua.+ 2 Kotou manatu tuʼumaʼu ki te ʼu meʼa ʼae ʼi ʼoluga,+ kae mole ki te ʼu meʼa ʼae ʼi te kele.+ 3 He neʼe kotou mamate, pea neʼe fufu ʼokotou maʼuli ia Kilisito ʼo mulimuli ki te finegalo ʼo te ʼAtua. 4 Pea moka ha ia Kilisito, ʼae ʼe ina foaki te maʼuli,*+ ʼe kotou toe ha foki anai mo ia ʼi tona kololia.+

5 Koia kotou tamateʼi ʼokotou koga sino*+ ʼae ʼe tupu ai te ʼu holi ki te ʼu felaveʼi fakasino heʼe ʼaoga,* mo te ʼu aga heʼe maʼa, mo te ʼu holi fakavalevale ki te ʼu felaveʼi fakasino,+ mo te ʼu holi kovi, pea mo te manumanū, ʼae ʼe ko te tauhi taula ʼatua. 6 ʼE hoko mai la te hauhau ʼo te ʼAtua ʼuhi ko te ʼu meʼa ʼaia. 7 Neʼe kotou toe fai foki mo koutou te ʼu aga ʼaia ʼi ʼokotou maʼuli ʼae ʼi te temi muʼa.+ 8 Kae ʼi te temi nei, kua tonu ke kotou liʼaki ia te ʼu meʼa fuli ʼaeni: te hauhau, mo te ita, mo te agakovi,+ mo te ʼu laukovi,+ pea mo te ʼu palalau heʼe ʼaoga+ ʼae ʼe haʼu mai ʼokotou gutu. 9 ʼAua naʼa kotou feloiʼaki.+ Kae kotou liʼaki ia te ʼuluagaaga* ʼafeā+ pea mo te ʼu meʼa ʼae neʼe kotou fai ʼi te temi muʼa. 10 Pea kotou kofuʼi ia te ʼuluagaaga foʼou,+ ʼae ʼe fakafoʼou ʼaki te ʼatamai malama totonu, ʼo mulimuli kia Ia ʼae neʼe ina fakatupu.+ 11 ʼAki te ʼuluagaaga foʼou ʼaia, ʼe mole ʼi ai he Keleka peʼe ko he Sutea, he tagata silikosisio* peʼe ko he tagata heʼe silikosisio, he matapule peʼe ko he Site,* he tagata kaugana peʼe ko he tagata ʼe ʼateaina, kae ʼe liliu ia Kilisito ko meʼa fuli pea ko tatou ʼe tou fakatahi fuli mo ia.+

12 Neʼe filifili koutou e te ʼAtua+ pea ko koutou ko ʼana fanau maʼoniʼoni pea mo ʼofaina, koia kotou kofuʼi te ʼofa mamahi, mo te manavaʼofa,+ mo te agaʼofa, mo te agavaivai,+ mo te agamalū+ pea mo te kataki fualoa.+ 13 Kotou haga fekatakiʼaki, pea mo fefakamolemoleʼaki ʼaki he lotolelei,+ tatau aipe pe ʼe ʼi ai hokotou fihifihia mo he tahi.+ Ohage pe ko te lotolelei ʼa Sehova* ke fakamolemole kia koutou, ʼe tonu ke kotou toe fai feia mo koutou.+ 14 Kae ʼo hilifaki ki te ʼu meʼa fuli ʼaia, kotou kofuʼi te ʼofa,+ he ʼe ina fakatahiʼi te hahaʼi ʼi hona faʼahiga aluʼaga ʼe lelei tukupau.+

15 Pea ke pule ʼi ʼokotou loto te tokalelei ʼo Kilisito,+ koteʼuhi neʼe pauʼi koutou e te ʼAtua ke kotou liliu ko he sino ʼe tahi pea ke kotou tokalelei. Ke kotou fakaha tokotou lotofakafetaʼi. 16 Ke nofo te folafola ʼa Kilisito ia koutou ke kotou liliu ai ʼo popoto. Ke kotou haga akoʼi pea mo kotou haga fakalotomalohiʼi ʼihi ʼaki ni pesalemo,+ mo ni fakavikiviki ki te ʼAtua, mo ni katiko ʼe kotou hiva ʼaki he lotofakafetaʼi, pea mo kotou hiva kia Sehova* ʼaki ʼokotou loto katoa.+ 17 Tatau aipe pe kotea te ʼu palalau peʼe ko te ʼu gaue ʼe kotou fai, kotou fai ia meʼa fuli ʼi te huafa ʼo te ʼAliki ko Sesu, ʼo fakafetaʼi ki te ʼAtua te Tamai ʼaki ia ia.+

18 ʼU fafine ʼohoana, kotou fakalogo ki ʼokotou ʼohoana,+ he ʼe ko te meʼa ʼaia ʼe lelei ki te ʼAliki. 19 ʼU tagata ʼohoana, kotou haga ʼoʼofa ki ʼokotou ʼohoana,+ pea ʼaua naʼa kotou iita kovi* kia natou.+ 20 ʼU fanau, kotou fakalogo ʼi te ʼu meʼa fuli ki ʼakotou matuʼā,+ he ʼe ko te faʼahi ʼaia ʼe lelei ki te ʼAliki. 21 ʼU tamai, ʼaua naʼa kotou fakatupu ita ki ʼakotou fanau,+ naʼa natou lotovaivai ai. 22 ʼU kaugana, kotou fakalogo ia meʼa fuli ki ʼokotou pule fakatagata,*+ ʼo mole gata pe moka sioʼi koutou ke leleiʼia koutou e te hahaʼi, kae ke kotou fakalogo ʼaki he loto katoa, ʼo kotou manavasiʼi kia Sehova.* 23 Ko he meʼa pe ʼe kotou fai, kotou gaue ʼaki ʼokotou loto* katoa, ohage ʼe kotou gaue kia Sehova*+ kae mole ki te tagata. 24 He ʼe kotou iloʼi ʼe kotou maʼu anai mai ia Sehova* te tofiʼa ohage ko he fakapale.+ Kotou kaugana ki te Pule, ia Kilisito. 25 ʼE mahino papau ia, ko ia ʼae ʼe ina fai te kovi ʼe toe liufaki age anai ʼo mulimuli ki te kovi ʼae neʼe ina fai,+ pea ʼe mole fai he fakapalatahi.+

4 ʼU pule, kotou aga fakahagatonu ki ʼakotou kaugana pea mo toʼo fakatatau natou, he ʼe kotou iloʼi ʼe ʼi ai mo tokotou Pule ʼi selo.+

2 Kotou kataki ʼi te faikole+ pea ʼi takotou fai te faʼahi ʼaia, kotou nonofo ʼalaʼala pea mo momoli he ʼu fakafetaʼi ki te ʼAtua.+ 3 Kotou toe faikole maʼa matou,+ ke foaki mai e te ʼAtua he faigamalie ke matou tala ai te folafola pea mo te meʼa fakalilo tapu* ʼo ʼuhiga mo Kilisito,* ʼae ʼe tupu ai toku pilisoniʼi.+ 4 Kotou faikole maʼaku ke mahino lelei taku fakamafola te logo ʼaia he ʼe ko toku maʼua.

5 Kotou haga maʼuʼuli fakapotopoto ʼi takotou felogoi mo natou ʼae ʼo tuʼa, ʼo kotou fakaʼaogaʼi lelei tokotou temi.*+ 6 Ke lelei tuʼumaʼu ʼakotou palalau, ʼo konakonaʼi ʼaki te masima,+ ke kotou iloʼi ai te faʼahiga tali ʼae ʼe tonu ke kotou fai ki he tahi.+

7 ʼE fakaha atu anai e Tisike+ te ʼu logo fuli ʼo ʼuhiga mo au. ʼE ko toku tehina ʼofaina mo faifekau agatonu pea mo kaugana fakatahi mo matou ʼi te ʼAliki. 8 ʼE au fekauʼi atu ia ia, ke ina fakaha atu tomatou aluʼaga pea ke ina fakafimalieʼi ʼokotou loto. 9 ʼE alu atu anai mo Onesimo,+ toku tehina agatonu mo ʼofaina, ʼae neʼe haʼu mai ia koutou. ʼE nā fakaha atu anai ia meʼa fuli ʼae ʼe hoko ʼi heni.

10 ʼE ʼofa atu ia Alisitake,+ ʼae ʼe pilisoni fakatahi mo au, ʼo feia aipe mo Maleko+ (te tehina mataʼi tama ʼo Palenapa), ʼae neʼe kotou maʼu te ʼu fakatotonu ʼo ʼuhiga mo tona fakatalitali+ mo kapau ʼe alu atu kia koutou, 11 pea mo Sesu ʼae ʼe toe higoa ko Susito. Ko natou ʼaia ʼe natou kau ʼi te kau silikosisio.* ʼE ko natou pe ʼaia ko ʼoku kaugā gaue ki te Puleʼaga ʼo te ʼAtua, pea neʼe natou liliu ko he tokoni malohi kia au. 12 ʼE ʼofa atu ia Epafalasi,+ ko he faifekau ʼa Kilisito Sesu neʼe haʼu mai ia koutou. ʼE faikole fakamalotoloto tuʼumaʼu maʼa koutou, ke kotou tutuʼu malohi ohage ko he hahaʼi kua fotufotuʼa* pea mo tui malohi kia meʼa fuli ʼo ʼuhiga mo te finegalo ʼo te ʼAtua. 13 ʼE au fakamoʼoni ki tana gaue kinakina maʼa koutou, mo natou ʼae ʼi Laotise, pea mo natou ʼae ʼo Ielapolisi.

14 ʼE ʼofa atu ia Luka,+ te toketa ʼofaina, ʼo feia aipe mo Temasi.+ 15 Kotou ʼoʼofa age ki te ʼu tehina ʼo Laotise, mo te tuagaʼane ko Nimefa pea mo te kokelekasio ʼae ʼe fakatahitahi ʼi tona ʼapi.+ 16 Pea ka kotou ʼosi lau te tohi ʼaeni, kotou fakatuʼutuʼu ke toe lau+ ʼi te kokelekasio ʼo Laotise pea ke kotou lau foki te tohi ʼae neʼe au fai ki Laotise. 17 Pea tahi ʼae, kotou ui age kia Alikipo:+ “Tokaga ʼo fakahoko lelei te minisitelio ʼae neʼe ke tali ʼi te ʼAliki.”

18 Ko au Paulo, ʼe au ʼofa atu.*+ Kotou manatuʼi taku nofo pilisoni.+ Ke nofo te ʼofa makehe ʼo te ʼAtua mo koutou.