TE ʼULUAKI TOHI KI TE KAU TESALONIKA

1 Ko au Paulo, pea ʼe fakatahi mo au ia Siliva*+ mo Timoteo.+ Ko te tohi ʼaeni ʼe momoli ki te kokelekasio ʼo te kau Tesalonika ʼae ʼa te ʼAtua te Tamai pea mo te ʼAliki ko Sesu Kilisito:*

Ke foaki atu e te ʼAtua ia tona ʼofa makehe pea mo te tokalelei.

2 ʼE matou fakafetaʼi tuʼumaʼu ki te ʼAtua moka matou manatuʼi ia koutou fuli ʼi ʼamatou faikole,+ 3 koteʼuhi ʼe matou manatuʼi tuʼumaʼu pe ia muʼa ʼo totatou ʼAtua mo Tamai takotou gaue agatonu, mo takotou gaue kinakina ʼaki te ʼofa pea mo takotou faʼa kataki ʼuhi ko takotou falala+ ki totatou ʼAliki ko Sesu Kilisito. 4 Koteʼuhi, ʼu tehina ʼae ʼe ʼofainaʼi e te ʼAtua, ʼe matou iloʼi neʼe ina filifili koutou, 5 he neʼe mole matou fakaha atu te logo lelei ʼaki pe te palalau, kae ʼaki te malohi, mo te laumalie maʼoniʼoni pea mo he tui ʼe malohi. ʼE mole puli kia koutou te ʼu gaue ʼae neʼe matou fai ke fua lelei kia koutou. 6 Pea neʼe kotou faʼifaʼitakiʼi matou+ pea mo te ʼAliki,+ ʼi takotou tali te folafola ʼaki te fiafia ʼae ʼe tupu mai te laumalie maʼoniʼoni, logo la te lahi ʼo te ʼu fakataga,+ 7 ʼo kotou liliu ai ko he faʼifaʼitakiʼaga maʼa te hahaʼi fuli ʼae ʼe tui ʼi Masetonia mo Akaia.

8 ʼAki takotou faifakamafola, neʼe logo te folafola ʼa Sehova* ʼi Masetonia mo Akaia pea neʼe toe logo foki ʼi te ʼu koga meʼa fuli pe ki takotou tui ki te ʼAtua,+ ʼo mole ʼaoga ai ke matou palalau ki ai. 9 Koteʼuhi ʼe natou fakamatala tuʼumaʼu pe tamatou ʼuluaki felaveʼi ʼae mo koutou, pea mo takotou liʼaki ʼakotou taula ʼatua+ kae kotou kaugana ki te ʼAtua ʼae ʼe maʼuli mo moʼoni. 10 Pea ʼe natou toe fakamatala foki mo takotou fakaatalitali ki te haʼu ʼo tona ʼAlo mai te lagi,+ ia Sesu, ʼae neʼe ina fakatuʼuake mai te kau mate. ʼE ko ia ʼae ka ina haofaki anai tatou mai te hauhau ʼo te ʼAtua ʼae ka hoko mai.+

2 ʼU tehina, ʼe kotou iloʼi e koutou totonu, neʼe ʼi ai te ʼu fua ʼo tamatou olo atu kia koutou.+ 2 Koteʼuhi ohage pe ko te meʼa ʼae kua kotou iloʼi, hili tamatou mamahi pea mo tomatou gaohi koviʼi ʼi Filipe,+ neʼe foaki mai e te ʼAtua te lototoʼa ke matou fakaha atu te logo lelei,+ logo la te lahi ʼo te ʼu fakafeagai.* 3 Koteʼuhi ko te tokoni ʼae ʼe matou fai ʼe mole haʼu ia mai he manatu ʼe hala, peʼe heʼe maʼa, peʼe kaka. 4 Kae ʼuhi ʼae neʼe sio ia te ʼAtua ʼe tuha mo matou ke matou fakamafola te logo lelei, koia ʼe mole matou palalau ke leleiʼia matou e te tagata, kae ke leleiʼia matou e te ʼAtua, ʼae ʼe ina vakavakaʼi ʼomatou loto.+

5 ʼE kotou iloʼi neʼe mole he temi neʼe matou fai atu ai he ʼu palalau fakaoloolo. Neʼe mole he temi neʼe matou loiʼi ai koutou ke matou maʼu mai ia koutou he meʼa,+ pea ʼe fakamoʼoni ki ai te ʼAtua. 6 Neʼe mole matou toe kumi foki ke fakamaʼuhigaʼi matou e te tagata, peʼe ko koutou peʼe ko he tahi age hahaʼi, logo la ʼi tomatou ʼuhiga apositolo ʼa Kilisito,* neʼe feala pe ke matou kole atu he tokoni fakapaʼaga.+ 7 Kae neʼe matou tokakaga ʼaki he agamalū kia koutou, ohage ko te tokaga ʼofa ʼa he faʼe ki* ʼana fanau ʼae ʼe ina fafaga. 8 Koia ʼi tamatou ʼoʼofa lahi ia koutou, neʼe matou fakatotonu ai ke mole gata pe tamatou fakaha atu kia koutou te logo lelei ʼo ʼuhiga mo te ʼAtua, kae ke matou toe foaki foki mo ʼomatou maʼuli* moʼo tokoni atu,+ koteʼuhi neʼe matou ʼoʼofa mamahi ia koutou.+

9 ʼE mahino ia ʼu tehina, ʼe kotou manatuʼi tamatou gaue kinakina. Koteʼuhi ʼi tamatou fakamafola atu te logo lelei ʼo ʼuhiga mo te ʼAtua, neʼe matou gaue ʼi te ʼaho mo te po ke matou maʼu te ʼu meʼa ʼae ʼe ʼaoga kia matou, pea ke ʼaua naʼa matou liliu ko he kavega mamafa ki he tahi pe ia koutou.+ 10 ʼE kotou fakamoʼoni, ʼu tehina, ʼo feia mo te ʼAtua, ki tamatou agatonu mo faitotonu kia koutou pea neʼe mole matou fai he meʼa ʼe kovi kia koutou. 11 ʼE mole puli kia koutou tamatou haga fakalotomalohiʼi mo fakalotofimalieʼi koutou, pea mo fai he ʼu fakatokaga kia koutou takitokotahi,+ ohage ko tona fai e he tamai+ ki ʼana fanau. 12 Neʼe matou fai te faʼahi ʼaia ke feala hakotou haga haʼele ʼi hona aluʼaga ʼe tuha mo te ʼAtua,+ ʼae ʼe ina pauʼi koutou ke kotou hu ki tona Puleʼaga+ pea mo kotou maʼu te kololia.+

13 Koia ʼe matou fakafetaʼi tuʼumaʼu mo matou ki te ʼAtua,+ he neʼe kotou tali te folafola ʼa te ʼAtua ʼae neʼe matou tala atu. Pea neʼe mole kotou tali ohage ko te folafola ʼa te tagata, kae ohage ko te folafola ʼa te ʼAtua, ʼae ʼe toe gaue foki ia koutou. 14 Pea ʼu tehina, neʼe kotou faʼifaʼitakiʼi te ʼu kokelekasio Fakakilisitiano ʼa te ʼAtua ʼae ʼi Sutea, he neʼe fakamamahiʼi koutou e ʼakotou hahaʼi totonu+ ohage pe ko te fakamamahiʼi ʼo te ʼu kokelekasio ʼaia e te kau Sutea, 15 ʼae neʼe natou matehi ia te ʼAliki ko Sesu,+ mo te kau polofeta pea mo natou fakatagaʼi matou.+ Tahi ʼae meʼa, ʼe mole leleiʼia natou e te ʼAtua, pea ʼe natou fakafeagai ki te ʼu meʼa ʼae ʼe ʼaoga ki te tagata fuli, 16 he ʼe natou faiga ke natou taʼofi tatou ke mole tou faifakamafola ki te hahaʼi ʼo te ʼu puleʼaga kehekehe, ia te gaue ʼae ʼe feala ke ina haofaki te hahaʼi ʼaia.+ ʼE natou fai tuʼumaʼu ai he ʼu tuʼuga agahala. Kae kua vave hoko kia natou tona hauhau.+

17 Kae ʼu tehina, ʼi tamatou mavae mai ia koutou ʼi he kiʼi temi nounou pe (neʼe mole feala hamatou sisio atu kae neʼe matou manatuʼi tuʼumaʼu pe koutou), neʼe matou faiga malohi ke matou olo atu he neʼe matou fia sisio atu kia koutou. 18 Koia neʼe matou fia olo atu ai kia koutou, ʼei, ko au Paulo neʼe mole au faiga tuʼa tahi pe, kae tuʼa lua. Kae neʼe taʼofi matou e Satana. 19 Kotea koa tamatou ʼamanaki, peʼe ko tomatou fiafia, peʼe ko tomatou pale ʼae ʼe matou fiameʼameʼa ai ia muʼa ʼo totatou ʼAliki ko Sesu lolotoga tana ʼi heni?* ʼE mole koa la ko koutou?+ 20 ʼEi, ko koutou tomatou kololia pea mo tomatou fiafia.

3 Koia ʼi tamatou mole kei lava katakiʼi te mole maʼu ʼo ni logo mai ia koutou, neʼe matou manatu ai ʼe lelei ke matou nonofo ʼi Ateni,+ 2 kae matou fekauʼi atu ia Timoteo,+ tomatou tehina pea mo tagata faifekau ʼa* te ʼAtua, ʼae ʼe ina tala te logo lelei ʼo ʼuhiga mo Kilisito.* Neʼe matou fekauʼi atu ia ia ke ina fakalotomalohiʼi pea mo fakafimalieʼi koutou ʼo ʼuhiga mo takotou tui, 3 pea ke ʼaua naʼa vaivai he tahi ʼuhi ko te ʼu mamahi ʼaia. He ʼe kotou iloʼi e koutou totonu, ʼe mole feala ke tou hao mai te ʼu mamahi ʼaia.*+ 4 Pea ʼi tamatou nonofo mo koutou, neʼe matou tala fakatomuʼa atu ʼe tonu ke tou tau mo he ʼu mamahi, pea neʼe hoko ia, ohage pe ko takotou kua iloʼi.+ 5 Neʼe mole kei au lava katakiʼi te mole maʼu ʼo ni logo mai ia koutou. Koia neʼe au fekauʼi atu ia Timoteo ke au maʼu mai ni logo ʼo ʼuhiga mo takotou agatonu,+ he neʼe lagi feala pe ke fakahalaʼi koutou e te Tevolo,+ ʼo to noa ai tamatou gaue kinakina.

6 Kae ko te hoki tau mai ʼaeni ʼa Timoteo mai ia koutou.+ Neʼe ina fakaha mai kia matou te logo lelei ʼo ʼuhiga mo takotou agatonu pea mo tokotou ʼofa, mo tokotou fiafia ʼi takotou manatuʼi tuʼumaʼu pe ia matou, pea mo takotou fakaʼamu lahi ʼae ke kotou sisio kia matou, ohage pe ko matou. 7 Koia ʼu tehina, logo la tamatou tau mo te ʼu faigataʼaʼia pea mo te ʼu mamahi, kae neʼe fakafimalieʼi matou ʼuhi ko koutou pea mo takotou agatonu.+ 8 Koteʼuhi ʼe matou toe maʼu te malohi* mo kapau ʼe kotou tutuʼu malohi ʼi te ʼAliki. 9 Koia ʼe matou fakafetaʼi ki te ʼAtua ʼo ʼuhiga mo koutou, ʼuhi ko te fiafia lahi ʼae ʼe matou maʼu ia muʼa ʼo totatou ʼAtua ʼuhi ko koutou. 10 Pea ʼi te ʼaho mo te po, ʼe matou kolekole fakamalotoloto ke feala hamatou sisio kia koutou pea mo fakaha atu te ʼu meʼa ʼae ʼe ʼaoga kia koutou moʼo fakamalohiʼi takotou tui.+

11 ʼOfa pe ke fakafealagia mai e totatou ʼAtua mo Tamai pea mo totatou ʼAliki ko Sesu ke matou olo atu kia koutou. 12 Tahi ʼae meʼa, ʼofa pe ke fakatuputupu e te ʼAliki tokotou ʼofa, ʼei ke lahi ʼaupito takotou feʼofaʼaki+ pea mo takotou ʼoʼofa ki te hahaʼi fuli, ohage pe ko tamatou ʼoʼofa lahi kia koutou, 13 ke feala hana fakamalohiʼi ʼokotou loto, ke kotou heʼe mele pea mo maʼoniʼoni ia muʼa ʼo totatou ʼAtua+ mo Tamai lolotoga te ʼi heni ʼo totatou ʼAliki ko Sesu+ pea mo tana kau maʼoniʼoni fuli.

4 Pea ʼu tehina, neʼe matou akoʼi atu kia koutou pe ʼe tonu ke feafeaʼi takotou haʼele ke leleiʼia koutou e te ʼAtua,+ pea ʼe kotou lolotoga fai nei te faʼahi ʼaia. Koia ʼe matou fakalotomalohiʼi koutou pea mo kole mamahi atu ʼi te huafa ʼo te ʼAliki ko Sesu, ke kotou haga fai te faʼahi ʼaia ʼo laka age. 2 Koteʼuhi ʼe kotou iloʼi te ʼu fakatotonu ʼae neʼe matou foaki atu ʼi te huafa ʼo te ʼAliki ko Sesu.

3 He ʼe koʼeni te finegalo ʼo te ʼAtua: Ke kotou maʼoniʼoni+ pea ke kotou fakamamaʼo mai te ʼu felaveʼi fakasino heʼe ʼaoga.*+ 4 Ke kotou tahi popoto ʼi te puleʼi ʼo tona sino,*+ ke kotou maʼoniʼoni ai pea ke fakaʼapaʼapaʼi ai koutou,+ 5 pea ke ʼaua naʼa kotou hage ko te hahaʼi ʼae ʼe mole natou iloʼi te ʼAtua+ pea mo natou holi fakavalevale ki te ʼu felaveʼi fakasino.+ 6 Ke ʼaua naʼa fai e he tahi he aga ʼe mole tuha ke mole ina fakamamahiʼi ai hona tehina, koteʼuhi ʼe tauteaʼi anai e Sehova* ia natou ʼae ʼe natou fai te ʼu meʼa fuli ʼaia, ohage pe ko tamatou kua fakaha atu pea mo fakatokaga malohi atu. 7 Koteʼuhi ʼe mole pauʼi tatou e te ʼAtua ke tou heʼe maʼa, kae ke tou maʼoniʼoni.+ 8 Koia ko ʼae ʼe ina meʼa noaʼi te ʼu fakatokaga ʼaia, ʼe mole ina meʼa noaʼi te tagata, kae ko te ʼAtua,+ ʼae ʼe ina foaki atu kia koutou tona laumalie maʼoniʼoni.+

9 Pea ʼo ʼuhiga mo te ʼofa fakatautehina,+ ʼe mole ʼaoga ke matou faitohi atu, koteʼuhi ʼe akoʼi totonu koutou e te ʼAtua ke kotou feʼofaʼaki.+ 10 ʼI tona fakahagatonu, ʼe kotou fai te faʼahi ʼaia ki te ʼu tehina fuli ʼi Masetonia katoa. Kae ʼu tehina, ʼe matou fakalotomalohiʼi koutou ke kotou haga fai te faʼahi ʼaia ʼo laka age. 11 Kotou faiga malohi ke kotou maʼuʼuli ʼi te tokalelei,+ mo kotou tokakaga ki ʼakotou meʼa totonu+ pea mo kotou gaue,+ ohage pe ko tamatou akoʼi atu, 12 ke ha ai ki te hahaʼi ʼo tuʼa+ ʼe kotou haʼele fakapotopoto pea ʼe mole kotou hala ʼi he meʼa.

13 Tahi ʼae meʼa ʼu tehina, ʼe mole matou loto ke kotou nonofo ʼi te fakapoʼuli ʼo ʼuhiga mo natou ʼae kua mamate,*+ ke ʼaua naʼa kotou lotomamahi ohage ko te hahaʼi ʼae ʼe mole hanatou ʼamanaki.+ 14 Koteʼuhi kapau ʼe tou tui neʼe mate ia Sesu pea kua toe maʼuli,+ ʼo toe feia aipe, ko te ʼu tisipulo ʼae neʼe mamate agatonu kia Sesu, ʼe ʼave anai natou e te ʼAtua ke natou fakatahi mo ia.+ 15 Koʼeni te meʼa ʼae ʼe matou tala atu ʼo mulimuli ki te folafola ʼa Sehova:* Ko natou ʼae ia tatou ʼe kei maʼuʼuli anai lolotoga te ʼi heni ʼa te ʼAliki, ʼe mole natou muʼamuʼa anai ia natou ʼae kua mamate. 16 ʼE hifo mai anai ia te ʼAliki mai te lagi. ʼE ina foaki anai he ʼu fakatotonu ʼaki te leʼo ʼo he alekaselo+ pea mo ina puke te fakatagi pupuhi ʼa te ʼAtua. Pea ʼe ʼuluaki fakatuʼuake anai ʼana tisipulo ʼae kua mamate.+ 17 Hili ʼaia ko tatou ʼae ʼe kei maʼuʼuli anai, ʼe ʼave anai tatou ʼi te ʼu ʼao+ ke tou fakatahi mo natou pea ke tou felaveʼi mo te ʼAliki+ ʼi te lagi, pea ʼe tou nonofo tuʼumaʼu anai mo te ʼAliki.+ 18 Koia kotou haga fefakafimalieʼaki ʼaki te ʼu folafola ʼaeni.

5 Pea ʼu tehina, ʼe mole ʼaoga ke matou faitohi atu ʼo ʼuhiga mo te ʼu temi pea mo te ʼu fasiga taʼu. 2 Koteʼuhi ʼe kotou iloʼi lelei ko te ʼaho ʼo Sehova*+ ʼe haʼu anai ohage ko he tagata kaihaʼa ʼi te poʼuli.+ 3 Moka ui anai e te hahaʼi: “Tokalelei pea mo fimalie!” pea ʼi te temi pe ʼaia, ʼe hoko fakafokifa anai kia natou te fakaʼauha,+ ohage ko te ʼu mamahi fanau ʼa he fafine ʼe faitama, pea ʼe mole natou hao anai. 4 Kae ko koutou, ʼu tehina, ʼe mole kotou nonofo ʼi te fakapoʼuli, ke kotou punamaʼuli ai moka hoko mai te ʼaho ʼaia, ohage ko te maʼutoka ʼo te hahaʼi kaihaʼa moka kamata ʼaho, 5 he ʼe ko koutou fuli ko te ʼu foha kua fakamalamaʼi pea mo te ʼu foha ʼo te ʼaho.+ ʼE mole tou kau ki te poʼuli peʼe ki te fakapoʼuli.+

6 Koia ʼaua naʼa tou momoe ohage ko ʼihi,+ kae ke tou nonofo ʼalaʼala+ pea mo tou fakaʼaogaʼi ʼotatou fealagia fakakaukau.+ 7 Koteʼuhi ko natou ʼae ʼe momoe, ʼe natou momoe ʼi te poʼuli, pea ko natou ʼae ʼe konana, ʼe natou konana ʼi te poʼuli.+ 8 Kae ko tatou ʼae ʼe kau ki te ʼaho, tou fakaʼaogaʼi ʼotatou fealagia fakakaukau, pea mo kofuʼi te kofu ukamea ʼo te tui mo te ʼofa, pea mo ʼai te puloga tau ʼo te ʼamanaki ki te haofaki+ 9 he neʼe mole fakatuʼutuʼu e te ʼAtua ke hoko kia tatou tona hauhau, kae ke ina haofaki tatou+ ʼaki totatou ʼAliki ko Sesu Kilisito.* 10 Neʼe mate maʼa tatou+ ke tou maʼuʼuli fakatahi mo ia, tatau aipe pe ʼe tou maʼuʼuli peʼe tou mamate.+ 11 Koia kotou haga fefakalotomalohiʼaki* pea mo fetokoniʼaki,+ ohage pe ko takotou fai.

12 ʼU tehina, ʼe matou kole atu leva ke kotou fakaʼapaʼapa kia natou ʼae ʼe gaue kinakina ia koutou, mo natou takitaki koutou ʼi te ʼAliki pea mo faitokoni atu kia koutou. 13 Kotou ʼoʼofa lahi kia natou pea mo fakamaʼuhigaʼi natou ʼuhi ko tanatou gaue,+ pea ke kotou fetokaleleiʼaki.+ 14 Tahi ʼae meʼa ʼe matou fakalotomalohiʼi koutou, ʼu tehina, ke kotou fakatokaga natou ʼae ʼe maʼuli maveuveu,+ mo kotou fai he ʼu palalau fakalotofimalie kia natou ʼae ʼe lotomamahi,* mo kotou tokoni ki te kau vaivai, pea mo kataki fualoa ki te hahaʼi fuli.+ 15 Kotou tokakaga ke ʼaua naʼa liufaki e he tahi te kovi ʼaki te kovi,+ kae ke kotou kumi tuʼumaʼu pe te meʼa ʼae ʼe lelei ki ʼokotou tehina pea mo te hahaʼi fuli.+

16 Kotou fakafiafia tuʼumaʼu.+ 17 Kotou faikole tuʼumaʼu.+ 18 Kotou fakafetaʼi kia meʼa fuli pe.+ ʼE ko te finegalo ʼaia ʼo te ʼAtua ʼo ʼuhiga mo koutou, ʼi tokotou ʼuhiga tisipulo ʼa Kilisito Sesu. 19 ʼAua naʼa kotou taʼofi te gaue* ʼo te laumalie ʼo te ʼAtua.+ 20 ʼAua naʼa kotou meʼa noaʼi te ʼu lea fakapolofeta.+ 21 Kotou vakavakaʼi fakalelei ia meʼa fuli,+ ʼo kotou taupau maʼu te meʼa ʼae ʼe lelei. 22 Kotou fakamamaʼo mai te ʼu faʼahiga agakovi fuli.+

23 ʼOfa pe ke fakamaʼoniʼoniʼi katoa koutou e te ʼAtua ʼo te tokalelei. Pea ʼu tehina, ʼofa pe ke haohaoa mo heʼe mele ʼakotou aga, mo ʼokotou maʼuli* pea mo ʼokotou sino lolotoga te ʼi heni ʼo totatou ʼAliki ko Sesu Kilisito.+ 24 ʼE agatonu ia ia ʼae ʼe ina pauʼi koutou, pea ʼe mahino papau ia ʼe ina fakahoko anai te faʼahi ʼaia.

25 ʼU tehina, ke hoko atu takotou hufakiʼi matou.+

26 Kotou ʼoʼofa age ki te ʼu tehina fuli ʼaki he fekita.*

27 ʼE au kole mamahi atu ʼi te huafa ʼo te ʼAliki, ke lau te tohi ʼaeni ki te ʼu tehina fuli.+

28 Ke nofo mo koutou te ʼofa makehe ʼo totatou ʼAliki ko Sesu Kilisito.