TE LUA TOHI KI TE KAU TESALONIKA

1 Ko au Paulo, pea ʼe fakatahi mo au ia Siliva* mo Timoteo.+ Ko te tohi ʼaeni ʼe momoli ki te kokelekasio ʼo te kau Tesalonika ʼae ʼa te ʼAtua tatatou Tamai pea mo te ʼAliki ko Sesu Kilisito:*

2 Ke foaki atu e te ʼAtua te Tamai pea mo te ʼAliki ko Sesu Kilisito ia te ʼofa makehe pea mo te tokalelei.

3 ʼE maʼua ke matou fakafetaʼi tuʼumaʼu ki te ʼAtua ʼo ʼuhiga mo koutou, ʼu tehina. Pea ʼe tonu te faʼahi ʼaia, koteʼuhi ʼe ʼaʼasili malohi takotou tui pea ʼe toe tuputupu mo takotou feʼofaʼaki ia koutou fuli.+ 4 Koia ʼe matou fiameʼameʼa ai ʼo ʼuhiga mo koutou+ ʼi te ʼu kokelekasio ʼa te ʼAtua, ʼuhi ko takotou faʼa kataki pea mo takotou tui ʼi te ʼu fakataga pea mo te ʼu ʼahiʼahi* fuli ʼae ʼe kotou tau mo ia.*+ 5 ʼE ko te fakamoʼoni ʼaia ʼe faitotonu te fakamau ʼa te ʼAtua, ʼo kotou liliu ai ʼo tuha mo te Puleʼaga ʼo te ʼAtua, ʼae ʼe kotou mamahi ai.+

6 Ko te fakamau ʼaia ʼa te ʼAtua ʼe faitotonu koteʼuhi ʼe ina liufaki te mamahi kia natou ʼae ʼe natou fakamamahiʼi koutou.+ 7 Kae ko koutou ʼae ʼe mamahi, ʼe fakafimalieʼi anai koutou moka ha te ʼAliki ko Sesu+ mai te lagi mo tana kau ʼaselo malolohi+ 8 ʼi he afi kakaha. ʼI te temi ʼaia, ʼe lagavaka anai kia natou ʼae ʼe mole natou iloʼi te ʼAtua, pea mo natou ʼae ʼe mole fakalogo ki te logo lelei ʼo ʼuhiga mo totatou ʼAliki ko Sesu.+ 9 ʼE fakamauʼi anai e totatou ʼAliki te hahaʼi ʼaia. ʼE tauteaʼi anai natou ki te fakaʼauha heʼe gata.+ ʼE pulihi anai natou ia muʼa ʼo te ʼAliki pea ʼe mole natou toe sisio anai ki te kololia ʼo tona malohi. 10 ʼI te temi ʼaia, ʼe haʼu anai ke fakakololiaʼi ia ia fakatahi mo tana kau maʼoniʼoni. ʼI te ʼaho ʼaia, ko natou fuli ʼae neʼe tui kia te ia ʼe natou mamata anai kia te ia, pea ʼe kotou toe mamata anai mo koutou kia te ia, koteʼuhi neʼe kotou tui ki te fakamoʼoni ʼae neʼe matou foaki atu.

11 ʼE ko te tupuʼaga la ʼaia ʼo tamatou faikole tuʼumaʼu maʼa koutou. ʼE matou kole ki totatou ʼAtua ke kotou tuha mo tana pauʼi,+ pea ke ina fakahoko katoa ʼaki tona malohi te ʼu meʼa fuli ʼae ʼe ina leleiʼia pea mo te ʼu gaue fuli ʼo takotou tui. 12 ʼE feala ai ke fakakololiaʼi te huafa ʼo totatou ʼAliki ko Sesu ʼaki ia koutou pea ke fakakololiaʼi fakatahi koutou mo ia. ʼE ha ai anai te ʼofa makehe ʼo totatou ʼAtua pea mo te ʼAliki ko Sesu Kilisito.

2 Kae ʼu tehina, ʼo ʼuhiga mo te ʼi heni* ʼo totatou ʼAliki ko Sesu Kilisito*+ pea mo tatatou fakatahi mo ia,+ ʼe matou kole atu te faʼahi ʼaeni: 2 ʼAua naʼa kotou tuku he tahi ke ina haga ʼo fetogi takotou manatu ʼae ʼe totonu, peʼe kotou hoha moka ina ui atu kua hoko mai te ʼaho ʼo Sehova.*+ ʼAua naʼa kotou hoha, tatau aipe pe ʼe natou ui atu ko te logo ʼaia ʼe haʼu mai te ʼAtua,*+ peʼe kotou logo ki ai mai he tahi kehe, peʼe kotou lau ʼi he tohi neʼe ui e ʼihi hahaʼi neʼe matou tohi.

3 ʼAua naʼa kakaʼi* koutou ʼi he faʼahiga aluʼaga pe, koteʼuhi ʼe mole feala ke hoko mai te ʼaho ʼaia kae heʼeki ha te apositasia*+ pea mo te tagata ʼae ʼe ina maumauʼi te lao,+ ʼae ko te foha ʼo te fakaʼauha.+ 4 Pea ʼe ko he tagata fakafeagai ʼe ina fakamaʼuhigaʼi ia ia totonu ia natou ʼae ʼe ui ko he ʼu ʼatua peʼe ko he ʼu meʼa ʼe tauhi* ki ai te hahaʼi, pea heka leva ʼi te fale lotu ʼo te ʼAtua, mo ina fakaha ai ki te hahaʼi ʼe ko ia totonu ko he ʼatua. 5 ʼE mole kei kotou manatuʼi koa la ʼi taku nofo mo koutou, neʼe au palalau atu ʼo ʼuhiga mo te ʼu meʼa ʼaia?

6 Pea ʼi te temi nei, kua kotou iloʼi te meʼa ʼae ʼe ina taʼofi te tagata ʼae ʼe ina maumauʼi te lao, ke hoki fakaha ia ia ʼi tona temi totonu. 7 ʼE moʼoni, kua lolotoga gaue ia pea ʼe fai fakafufu te gaue ʼaia,+ ʼo kaku ki te puli ʼo ia ʼae ʼe ina taʼofi ia ia ʼi te temi nei. 8 Pea ʼe ha anai te tagata ʼae ʼe ina maumauʼi te lao, ʼae ka pulihi e te ʼAliki ko Sesu ʼaki te malohi* ʼae ʼe haʼu mai tona gutu+ pea ʼe ina molehi anai ʼi te temi ʼae ka ha lelei ai+ tana ʼi heni. 9 Pea ka ha te tagata ʼae ʼe ina maumauʼi te lao, ʼe hoko anai te faʼahi ʼaia ʼaki te malohi ʼo Satana,+ pea ʼe ina fai anai he ʼu tuʼuga milakulo, mo he ʼu fakailoga loi, mo he ʼu meʼa fakaofoofo,*+ 10 pea mo he ʼu kaka ʼe tupu mai te heʼe faitotonu.+ Ko te ʼu meʼa fuli ʼaia ʼe hoko anai kia natou ʼae ka pulihi, he ʼe tauteaʼi anai natou koteʼuhi neʼe mole natou tali pea mo ʼoʼofa ki te moʼoni ke tupu ai honatou haofaki. 11 Ko te tupuʼaga la ʼaia ʼo te tuku e te ʼAtua ke kakaʼi natou ʼo natou tui ai ki te loi,+ 12 ke fakamauʼi ai natou fuli koteʼuhi neʼe mole natou tui ki te moʼoni kae neʼe natou fakafiafia ʼi te heʼe faitotonu.

13 Kae ʼe maʼua ke matou fakafetaʼi tuʼumaʼu ki te ʼAtua ʼo ʼuhiga mo koutou, ʼu tehina ʼe ʼofainaʼi e Sehova,* koteʼuhi neʼe ina filifili koutou talu mai te kamataʼaga+ ke haofaki koutou. Neʼe ina fakamaʼoniʼoniʼi koutou+ ʼaki tona laumalie koteʼuhi neʼe kotou tui ki te moʼoni. 14 Neʼe ina pauʼi koutou ki te fakatuʼutuʼu ʼaia ʼaki te logo lelei ʼae ʼe matou tala atu, ke kotou maʼu ai te kololia ʼo totatou ʼAliki ko Sesu Kilisito.+ 15 Koia ʼu tehina, kotou tutuʼu malohi+ pea mo taupau maʼu te ʼu talatisio ʼae neʼe akoʼi atu,+ pe neʼe akoʼi gutu atu, pe neʼe kotou lau ʼi he tohi neʼe matou tohi. 16 Koia ko te ʼAtua tatatou Tamai ʼe ʼofa ia tatou,+ pea ʼuhi ko tona ʼofa makehe ʼe ina foaki mai kia tatou he fakafimalie heʼe gata pea mo he ʼamanaki.+ ʼE matou faikole kia Ia pea mo totatou ʼAliki ko Sesu Kilisito 17 ke nā fakafimalieʼi ʼokotou loto pea ke nā fakamalohiʼi koutou ke kotou fai tuʼumaʼu te ʼu gaue pea mo te ʼu palalau ʼae ʼe lelei.

3 Koia ʼu tehina, kotou haga faikole maʼa matou,+ ke mafola vave te folafola ʼa Sehova*+ pea ke haga fakakololiaʼi, ohage pe ko takotou fai, 2 pea ke haofaki matou mai te ʼu tagata ʼae ʼe agakovi ʼaupito,+ koteʼuhi ʼe mole tui te hahaʼi fuli.+ 3 Kae ko te ʼAliki ʼe agatonu, pea ʼe ina fakamalohiʼi anai koutou pea mo haofaki koutou mai te Agakovi.* 4 Pea tahi ʼae, ʼe matou falala ki te ʼAliki ʼo ʼuhiga mo koutou, ʼe kotou fai te ʼu meʼa ʼae ʼe matou fakatotonu atu pea ʼe kotou haga fai anai. 5 ʼOfa pe ke tokoni atu te ʼAliki ke kotou ʼoʼofa ki te ʼAtua+ pea ke kotou faʼa kataki+ maʼa Kilisito.*

6 Pea ʼe matou fakatotonu atu, ʼu tehina, ʼi te huafa ʼo totatou ʼAliki ko Sesu Kilisito, ke kotou fakamamaʼo mai te ʼu tehina fuli ʼae ʼe maʼuli maveuveu+ pea ʼe mole natou mulimuli ki te ʼu talatisio* ʼae neʼe kotou* maʼu mai ia matou.+ 7 He ʼe kotou iloʼi pe ʼe tonu ke feafeaʼi takotou faʼifaʼitakiʼi matou,+ he neʼe mole matou maʼuli maveuveu ia koutou, 8 neʼe mole matou kai noa he meʼa kai ʼa he tahi.+ Kailoa ia, kae neʼe matou gaue kinakina ʼi te ʼaho mo te po ke ʼaua naʼa matou liliu ko he kavega mamafa ki he tahi pe ia koutou.+ 9 ʼE matou maʼu te pule+ ke matou kole atu ke kotou tokoni mai, kae ʼe mole matou fakaʼaogaʼi he ʼe matou fia tuku atu he faʼifaʼitaki ke kotou mulimuli ki ai.+ 10 Pea ʼi tamatou nonofo mo koutou, neʼe matou fai atu te fakatotonu ʼaeni: “Kapau ʼe mole fia gaue he tahi, ke ʼaua naʼa kai.”+ 11 Pea ʼe matou logo ʼe ʼi ai ʼihi ia koutou ʼe natou maʼuli maveuveu,+ ʼo mole natou gaue, kae ʼe natou tokakaga ki he ʼu meʼa ʼe mole natou kau ai.+ 12 Ki te taʼi hahaʼi ʼaia, ʼe matou foaki te fakatotonu pea mo te fakalotomalohi ʼaeni ʼi te huafa ʼo te ʼAliki ko Sesu Kilisito: Ke natou gaue ʼi te tokalelei pea ke natou kai te fua ʼo tanatou gaue.+

13 Pea kia koutou, ʼu tehina, ʼaua naʼa kotou fiu ʼi te fai ʼo te meʼa ʼae ʼe lelei. 14 Kae kapau ʼe mole fakalogo he tahi ki te meʼa ʼae neʼe matou fakaha atu ʼi te tohi ʼaeni, kotou tokakaga kia* ia pea ʼaua naʼa kotou fakatahi mo ia,+ ke tupu ai hana ufiufi. 15 Pea ʼaua leva naʼa kotou fakaʼuhiga ia ia ko he fili, kae kotou haga tokoniʼi ia ia+ ohage ko he tehina.

16 Ke foaki tuʼumaʼu atu te tokalelei e te ʼAliki ʼo te tokalelei ʼi te ʼu aluʼaga fuli pe.+ Ke nofo te ʼAliki mo koutou fuli.

17 Ko au Paulo, ʼe au ʼofa atu,*+ ʼe ko te fakailoga ʼaia ʼo ʼaku tohi fuli. Pea ʼe ko taku faʼahiga faitohi ʼaeni.

18 Ke nofo mo koutou fuli te ʼofa makehe ʼo totatou ʼAliki ko Sesu Kilisito.