TE ʼULUAKI TOHI KIA TIMOTEO

1 Ko au Paulo, te apositolo ʼa Kilisito* Sesu ʼuhi ko te fakatotonu ʼa te ʼAtua totatou Fakamaʼuli pea mo Kilisito Sesu, te fakatafitoʼaga ʼo totatou ʼamanaki.+ 2 ʼE au faitohi kia Timoteo,*+ taku fanau agatonu+ ʼi te tui:

Ke foaki atu e te ʼAtua te Tamai pea mo Kilisito Sesu totatou ʼAliki ia te ʼofa makehe, mo te manavaʼofa pea mo te tokalelei.

3 ʼI taku teuteu alu ʼae ki Masetonia, neʼe au kole atu ke ke nofo ʼi Efeso. Pea ʼi te temi nei, ʼe au toe kole atu ke ke fakatotonu ki ʼihi ke ʼaua naʼa natou akoʼi he tahi age akonaki, 4 pea ke ʼaua naʼa natou tokagaʼi te ʼu fakamatala loi+ pea mo te ʼu fekumi ʼo ʼuhiga mo te ʼu hologa. ʼE mole he ʼaoga ʼo te ʼu meʼa ʼaia,+ kae ʼe fakatupu palalau pe ia. Pea ʼe mole kau ia ki te ʼu meʼa ʼae ʼe foaki mai e te ʼAtua moʼo fakamalohiʼi te tui. 5 ʼE au fai te fakatotonu ʼaia ke tou maʼu ai te ʼofa+ ʼae ʼe haʼu mai he loto ʼe maʼa, mo he leʼo ʼo loto ʼe lelei pea mo he tui+ ʼe mole malualoi. 6 Neʼe fakafisi ʼihi ki te ʼu meʼa ʼaia, kae ʼe natou kau ki te ʼu faipalalau ʼe mole hona ʼuhiga.+ 7 ʼE natou fia liliu ko he kau faiako+ ʼo te lao, kae ʼe mole natou mahino pe la ki te ʼu meʼa ʼae ʼe natou ui peʼe ko te ʼu meʼa ʼae ʼe natou haga akonakiʼi.

8 ʼE tou iloʼi ʼe lelei te Lao mo kapau foki ʼe totonu tona fakaʼaogaʼi, 9 ʼo tou mahino neʼe mole fakatuʼu te lao maʼa he tagata faitotonu, kae maʼa natou ʼae ʼe natou maumauʼi te lao+ pea mo agatuʼu, mo natou ʼae ʼe mole fakaʼapaʼapa ki te ʼAtua pea mo natou fai he ʼu agahala, mo natou ʼae ʼe heʼe agatonu* pea mo natou moamoagaʼi te ʼu meʼa taputapu, mo natou ʼae ʼe natou fakapogi ʼanatou tamai, peʼe ko ʼanatou faʼe, peʼe ko ʼihi atu hahaʼi, 10 mo te hahaʼi ʼae ʼe natou fai he ʼu felaveʼi fakasino heʼe ʼaoga,* mo te kau faitagata,* mo natou ʼae ʼe natou kaihaʼa pea mo puke fakamalohi he hahaʼi, mo te kau gutuloi, mo natou ʼae ʼe mole natou fakahoko ʼanatou fakapapau,* pea mo te ʼu meʼa fuli ʼae ʼe fakafeagai ki te akonaki ʼae ʼe lelei.*+ 11 Ko te akonaki ʼaia ʼe fakatafito ki te logo lelei taulekaleka ʼae ʼe haʼu mai te ʼAtua fiafia, pea neʼe tuku mai kia au.+

12 ʼE au fakafetaʼi kia Kilisito Sesu totatou ʼAliki, ʼae neʼe ina foaki mai kia au te malohi, he neʼe sio ʼe au agatonu ʼo ina hinoʼi au ki he gaue taputapu,+ 13 logo la ʼi te temi muʼa neʼe au laukovi ki te ʼAtua, mo fakatagaʼi tana hahaʼi pea mo agapauʼu.+ Kae neʼe manavaʼofa ia Kilisito kia au he neʼe au fai te ʼu meʼa ʼaia ʼi te fakapoʼuli pea neʼe mole au maʼu te tui. 14 Pea neʼe lahi ʼaupito te ʼofa makehe ʼae neʼe fakaha mai kia au e totatou ʼAliki, pea ʼe au maʼu te tui mo te ʼofa ʼi toku ʼuhiga tisipulo ʼa Kilisito Sesu. 15 Ko te folafola ʼaeni ʼe moʼoni pea ʼe tuha ke tou tui katoa ki ai: Neʼe haʼu ia Kilisito Sesu ki te malamanei moʼo haofaki te kau agahala.+ Pea ʼe au kovi age au ia natou fuli ʼaia.+ 16 Kae neʼe manavaʼofa ia kia au, ʼae ʼe kovi age ʼi te kau agahala, ke feala ai ʼaki ia au ke fakaha e Kilisito Sesu tana kataki fualoa, ʼo au liliu ai ko he faʼifaʼitakiʼaga kia natou ʼae ka tui kia te ia pea mo natou maʼu te maʼuli heʼe gata.+

17 Pea ke fakaʼapaʼapaʼi pea mo fakakololiaʼi ʼo talu ai te Hau ʼae ʼe heʼe gata,+ mo maʼuli tuputupua+ pea mo fakapulipuli,+ te ʼAtua pe ʼe tahi.+ Ameni.

18 ʼE au tuku atu te fakatotonu ʼaia kia koe, Timoteo taku fanau, ʼo mulimuli ki te ʼu fakakikite ʼae neʼe fai ʼo ʼuhiga mo koe. ʼE tokoni atu anai te ʼu fakakikite ʼaia ke ke hoko atu te tau ʼae ʼe lelei.+ 19 ʼI tau fakahoko ia te faʼahi ʼaia, ke ke taupau te tui pea mo he leʼo ʼo loto ʼe lelei,+ ʼae neʼe liʼaki e ʼihi, ʼo puli ai tanatou tui ohage ko he vaka ʼe mou. 20 ʼE kau ia natou ʼaia ia Imeneo+ pea mo Alesatelo, pea neʼe au tuku ia naua kia Satana,*+ ke fakatonutonuʼi naua pea ke nā ako ai ʼe mole tonu ke nā laukovi ki te ʼAtua.

2 ʼUluaki, ʼe au fakalotomalohiʼi koutou ke kotou fai he ʼu kolekole, mo he ʼu faikole, mo hufakiʼi pea mo fai he ʼu fakafetaʼi ʼo ʼuhiga mo te faʼahiga tagata fuli pe, 2 ʼo feia mo te ʼu hau pea mo natou fuli ʼae ʼe maʼu tuʼulaga maʼoluga,*+ ke feala ke hoko atu tatatou maʼuli fimalie pea mo tokalelei, ʼo tou pipiki ki te ʼAtua pea mo fai fakamalotoloto ia meʼa fuli pe.+ 3 ʼE lelei te ʼu faʼahi ʼaia kia mata ʼo te ʼAtua, totatou Fakamaʼuli,+ pea ʼe ina tali lelei, 4 he ʼe ina loto ke haofaki te faʼahiga tagata fuli pe+ pea ke natou maʼu te ʼatamai malama totonu ʼo te moʼoni. 5 Koteʼuhi ʼe ko te ʼAtua pe ʼe tahi,+ pea mo te tagata fakafelogoi pe ʼe tahi+ ʼi te ʼAtua mo te hahaʼi,+ ia Kilisito* Sesu.+ ʼE ko te tagata ʼaia 6 neʼe ina foaki ia ia totonu ko te totogi* ʼae neʼe ʼaoga moʼo fakaʼateainaʼi te hahaʼi fuli* mai te agahala.+ ʼE palalau anai te hahaʼi ʼo ʼuhiga mo te faʼahi ʼaia ʼi tona temi totonu. 7 Neʼe hinoʼi au e te ʼAtua ke au fakamoʼoni ki te faʼahi ʼaia,+ ke au liliu ko he tagata faifakamafola pea mo he apositolo,+ ko tona fakaʼuhiga ko he tagata faiako ʼo te ʼu puleʼaga,+ ke au akoʼi age kia natou te tui pea mo te moʼoni. ʼE mole au loi kae ʼe au fakaha te moʼoni.

8 Koia ʼe au loto ai ʼi te ʼu koga meʼa fuli pe ʼae ʼe kotou fakatahitahi ai, ke faikole te tagata fuli, ʼo natou hiki ʼonatou nima ʼaki he agatonu ki te ʼAtua,+ ʼo mole natou iita+ pea mo fihi.+ 9 ʼO toe feia, ʼe tonu ke teuteu te hahaʼi fafine ʼaki he teu ʼe lelei,* mo fakapoipoi pea mo fakapotopoto, kae mole ʼaki he faʼahiga fi ʼo te ʼu lauʼulu pea mo te aulo peʼe ko he ʼu mataʼi tofe peʼe ko ni mutuʼi meʼa ʼe totogi kovi.+ 10 Kae ʼe tonu ke natou teuteu ʼi hona aluʼaga ʼe tuha mo te hahaʼi fafine ʼae ʼe natou ui ʼe natou pipiki ki te ʼAtua,+ ko tona fakaʼuhiga ke natou fai he ʼu gaue ʼe lelei.

11 Ke tali e te fafine te ʼu akonaki ʼi te fakalogologo pea ke fakalogo katoa.+ 12 ʼE mole au fakagafua ki te fafine ke faiakonaki peʼe ke ina puleʼi te tagata, kae ʼe tonu ke nofo fakalogologo.+ 13 Koteʼuhi ko Atama ʼae neʼe ʼuluaki fakatupu, pea hoa leva ki ai ia Eva.+ 14 Pea neʼe mole ko Atama ʼae neʼe kakaʼi, kae neʼe ko te fafine ʼae neʼe kakaʼi+ pea mo talagataʼa. 15 Kae ʼe hao anai te hahaʼi fafine moka ʼe natou maʼu fanau,+ mo kapau foki ʼe natou haga tui, mo ʼofa, mo maʼa pea mo fakapotopoto.+

3 ʼE tuha mo te falala ia te folafola ʼaeni: Kapau ʼe faiga he tagata ke liliu ko he taupau,*+ pea ʼe faiga ia ki he gaue ʼe lelei. 2 Koia ʼe tonu ki te tagata taupau ke lelei tona maʼuli ke mole valokiʼi ia ia, ke ʼohoana mo he fafine ʼe tahi, ke lotololomi ʼi te ʼu aluʼaga fuli ʼo tona maʼuli, ke fakapotopoto,+ ke aga fakatokatoka, ke tali kaiga,+ ke poto ʼi te faiakonaki.+ 3 ʼE mole tonu ke inu kava fakavale,+ mo agamalohi,* mo faiga ke tuʼu tana manatu,+ mo fakatupu kē,+ mo manako ki te paʼaga.+ 4 ʼE tonu ke ina takitaki lelei* tona loto fale pea ke fakalogo ʼana fanau ʼaki he aga fakaʼapaʼapa+ 5 (he ʼe kapau ʼe mole poto ʼi te takitaki ʼo* tona loto fale, ʼe feafeaʼi anai hana tokaga ki te kokelekasio ʼa te ʼAtua?). 6 ʼE mole tonu ko he tahi neʼe hoki tafoki age pe,+ naʼa liliu ʼo fiameʼalahi pea mo fakatuʼā ia ia ohage ko te fakatuʼā ʼo te Tevolo. 7 Pea ʼe tonu ke lelei te ʼu palalau ʼae ʼe fai e te hahaʼi ʼo tuʼa ʼo ʼuhiga mo ia,*+ ke mole manukiʼi ia ia e te hahaʼi* pea mo to ai ki te hele ʼa te Tevolo.

8 ʼO toe feia pe, ʼe tonu ki te ʼu tagata faifekau fakaminisitelio ke natou tuha mo te fakaʼapaʼapa, ke mole natou malualoi,* ke mole natou inu fakavale te vino, ke mole natou holi ki he paʼaga ʼe maʼu ʼaki he agakaka.+ 9 Pea ʼe tonu ke natou taupau te meʼa fakalilo tapu* ʼo te tui ʼaki he leʼo ʼo loto ʼe maʼa.+

10 Pea ʼe tonu ke ʼahiʼahiʼi muʼa ia natou ʼaia pe ʼe natou tuha mo te pilivilesio ʼaia. Pea hoki feala leva ke natou gaue ohage ko he ʼu tagata faifekau mo kapau ʼe mole fai he tukugakovi ʼo ʼuhiga mo natou.+

11 ʼE tonu foki ki te hahaʼi fafine ke natou tuha mo te fakaʼapaʼapa, ke mole natou faifasituʼu,+ ke natou lotololomi ʼi te ʼu aluʼaga fuli ʼo ʼonatou maʼuli, pea ke natou agatonu ʼi te ʼu meʼa fuli.+

12 ʼE tonu ke ʼohoana te tagata faifekau fakaminisitelio mo he fafine ʼe tahi, mo ina takitaki lelei ʼana fanau pea mo tona loto fale. 13 Koteʼuhi ko te ʼu tagata ʼae ʼe natou fakahoko lelei tanatou gaue, ʼe natou maʼu ai he matagafua ʼe lelei pea ʼe mole natou matataku ʼi te palalau ʼo ʼuhiga mo te tui kia Kilisito* Sesu.

14 ʼE au tohi atu te ʼu meʼa ʼaia kia koe, logo la ʼe au fakaʼamu ke au alu vave atu, 15 kae kapau ʼe au tuai atu, kua ke iloʼi pe te aga ʼae ʼe tonu ke ke fai ʼi te fale ʼo te ʼAtua,+ ʼae ko te kokelekasio ʼo te ʼAtua maʼuli, pea ko te pou pea mo te fakatafitoʼaga ʼo te moʼoni. 16 ʼEi, ʼe mahino ia, ʼe maʼuhiga te meʼa fakalilo tapu ʼaeni ʼo ʼuhiga mo te pipiki ʼae ki te ʼAtua: “Neʼe ha ʼi te kakano,+ neʼe tala tana faitotonu ʼi tana liliu ʼae ko he laumalie,+ neʼe ha ki te ʼu ʼaselo,*+ neʼe fakamafola ia ia ʼi te ʼu puleʼaga,+ neʼe tui ʼihi ʼi te malamanei kia te ia,+ neʼe toʼo ake ki selo ʼi te kololia.”

4 Kae ʼe ui fakalelei e te folafola ʼae ʼe haʼu mai te ʼAtua,* ʼi te temi ka haʼu, ʼe liʼaki anai e ʼihi te tui, ʼo natou fagono ki te ʼu folafola kaka+ mo te ʼu akonaki ʼa te kau temonio 2 pea mo te ʼu loi ʼa te kau malualoi,+ ʼae ʼe mole gaue ʼonatou leʼo ʼo loto he ʼe hage kua fakailoga ʼaki he ukamea vela. 3 ʼE natou fakatotonu ki te hahaʼi ke ʼaua naʼa natou ʼohoana+ pea ke ʼaua naʼa natou kai ki ʼihi meʼa kai.+ Kae neʼe fakatupu e te ʼAtua te ʼu meʼa kai ʼaia ke kai+ ʼaki he lotofakafetaʼi e natou ʼae ʼe tui+ he ʼe natou maʼu te ʼatamai malama totonu ʼo ʼuhiga mo te moʼoni. 4 Koteʼuhi ko meʼa fuli ʼae neʼe fakatupu e te ʼAtua ʼe lelei,+ pea ʼe mole tonu ke liʼaki he meʼa+ mo kapau ʼe toʼo ʼaki he lotofakafetaʼi, 5 he ʼe kua fakamaʼoniʼoniʼi ʼaki te folafola ʼa te ʼAtua pea mo te faikole.

6 ʼI tau foaki te tokoni ʼaia ki te ʼu tehina, ʼe ke liliu anai ko he tagata gaue lelei ʼa Kilisito* Sesu, ko he tahi neʼe akoʼi ki ai te ʼu folafola ʼo te tui pea mo te akonaki lelei ʼae ʼe ke mulimuli lelei ki ai.+ 7 Kae ke ke liʼaki te ʼu fakamatala loi ʼae ʼe ina moamoagaʼi te ʼAtua,+ ohage ko te ʼu fakamatala ʼae ʼe fai e ʼihi kau finematuʼa. ʼI te tahi age faʼahi, ke ke faiga fakamalotoloto* ke ke pipiki ki te ʼAtua. 8 Koteʼuhi ko te faigaoʼi ʼe ʼaoga veliveli pe, kae ko te pipiki ki te ʼAtua ʼe ʼaoga ia kia meʼa fuli, he ʼe maʼu ai te fakapapau ʼo te maʼuli ʼi te temi nei pea mo ʼae ʼi te ka haʼu.+ 9 Ko te folafola ʼaia ʼe moʼoni pea ʼe tuha ke tou tui katoa ki ai. 10 Koia ʼe tou gaue kinakina pea mo faiga malohi+ he ʼe fakatafito tatatou ʼamanaki ki te ʼAtua maʼuli, te Fakamaʼuli+ ʼo te faʼahiga tagata fuli pe,+ kae tafito te kau agatonu.

11 Ke hoko atu tau fakatotonu mo akoʼi te ʼu meʼa ʼaia. 12 Ke ʼaua naʼa meʼa noaʼi koe e he tahi ʼuhi ko tau kei tupulaga. Kae ke ke liliu ko he faʼifaʼitakiʼaga maʼa te kau agatonu, ʼi te palalau, mo te aga, mo te ʼofa, mo te tui pea mo te agamaʼa. 13 ʼO aʼu ki taku alu atu, ke ke haga fai fakamalotoloto tau lautohi ia muʼa ʼo te kaugamalie,+ mo tau faitokoni* pea mo tau faiakonaki. 14 ʼAua naʼa ke meʼa noaʼi te meʼa ʼae neʼe foaki atu e te ʼAtua ʼi te ʼosi fai ʼo te ʼu fakakikite ʼo ʼuhiga mo koe pea ʼi te temi ʼae neʼe hili ai e te kau tagata ʼafeā kia koe ʼonatou nima.+ 15 Ke ke fakakaukauʼi lelei* te ʼu meʼa ʼaia, ke ke tokaga tafito ki ai, ke sisio lelei ai te hahaʼi fuli ki tau lakalaka ki muʼa. 16 Ke ke tokaga fakalelei kia koe mo tau faiakonaki.+ Ke ke kataki ʼi te ʼu meʼa ʼaia, he ʼe ʼi tau fai te faʼahi ʼaia, ʼe ke haofaki anai ia koe totonu pea mo natou ʼae ʼe fagono atu.+

5 ʼAua naʼa ke palalau fefeka ki he tagata kua matuʼa.+ Kae ke ke palalau ki ai ohage ko hau tamai, ki te ʼu tagata tupulaga ohage ko hou ʼu tehina, 2 ki te ʼu finematuʼa ohage ko hau ʼu faʼe pea ki te ʼu finemui ohage ko hou ʼu tokolua, ʼaki he agamaʼa.

3 Ke ke tokagaʼi* te ʼu fafine vitua ʼae ʼe vitua moʼoni.*+ 4 Kae kapau ʼe maʼu e he fafine vitua hana fanau peʼe ko hona ʼu mokopuna, ke ako muʼa e natou ʼaia ke natou fakaha tanatou pipiki ki te ʼAtua ʼi tonatou loto fale,+ ʼo natou liufaki ki ʼanatou matuʼā pea mo ʼanatou kui te meʼa ʼae ʼe tonu ke foaki kia natou.+ Ko te faʼahi ʼaia ʼe leleiʼia e te ʼAtua.+ 5 Ko te fafine ʼae ʼe vitua moʼoni pea mo masiva, ʼe falala ia ki te ʼAtua,+ mo haga kole mamahi pea mo faikole ʼi te ʼaho mo te po.+ 6 Kae ko te fafine vitua ʼae ʼe ina fakahoko te ʼu holi heʼe ʼaoga, kua mate ia logo la ʼe kei maʼuli. 7 Koia ke hoko atu tau fakatotonu kia natou te ʼu meʼa ʼaia, ke mole valokiʼi ai natou e he tahi. 8 ʼE moʼoni, kapau ʼe mole tokaga he tahi ki ʼona kaiga totonu, kae tafito natou ʼo tona loto fale, kua fakafisi ia ki te tui pea ʼe kovi age ia ʼi he tahi ʼe mole tui.+

9 Ke ke tohi te higoa ʼo he fafine vitua mo kapau kua taʼu 60 tupu, neʼe ʼohoana mo he tagata ʼe tahi, 10 ʼe iloʼi ia ia e te hahaʼi ʼuhi ko te ʼu gaue lelei ʼae neʼe ina fai,+ ohage la neʼe ina pusiaki fakalelei ʼana fanau,+ neʼe tali kaiga,+ neʼe ina fufulu te ʼu vaʼe ʼo te kau maʼoniʼoni,+ neʼe tokoni ki ʼae ʼe mamahi+ pea neʼe faʼafai ʼi te ʼu gaue lelei fuli.

11 Kae ʼaua naʼa ke tohi te ʼu higoa ʼo te ʼu fafine vitua ʼae kei finemui, koteʼuhi ʼi te temi ʼae ʼe natou holi ai ki te ʼu felaveʼi fakasino, ʼe taʼofi ai tanatou gaue kia Kilisito,* ʼo natou fia ʼohoana leva. 12 Pea ʼe tauteaʼi anai natou he neʼe mole natou fakahoko te fakapapau ʼae neʼe natou fai ki muʼa atu. 13 Pea ʼe natou toe maʼu foki te agamahani ʼae ko te pulinoa ʼo tonatou temi, ʼo natou feoloʼaki ʼi te ʼu ʼapi. ʼE mole gata pe ki te pulinoa ʼo tonatou temi, kae ʼe natou toe faifatufatu mo fia iloʼi meʼa fuli,+ ʼo natou palalau ki he ʼu faʼahi ʼe mole tonu ke natou palalau ki ai. 14 Koia ʼe au loto ke ʼohoana te ʼu fafine vitua ʼae kei finemui,+ ke natou maʼu fanau,+ ke natou taupau ʼonatou loto fale, ke mole maʼu ai e ʼotatou fili he faigamalie ke natou valokiʼi ai tatou. 15 ʼI tona fakahagatonu, kua maliu kehe ʼihi fafine vitua ʼo muliʼi ia Satana. 16 Kapau ʼe maʼu e he fafine ʼe tui hona ʼu kaiga totonu kua vitua, ʼe tonu ke tokoni kia natou ke mole natou liliu ai ko he kavega ki te kokelekasio. Pea ʼe hoki feala leva ki te kokelekasio ke tokoni ki te ʼu fafine ʼae ʼe vitua moʼoni.*+

17 Ke lahi age te fakaʼapaʼapaʼi ʼo te kau tagata ʼafeā+ ʼae ʼe natou takitaki lelei te kokelekasio,+ tafito ia natou ʼae ʼe gaue kinakina ʼi te tala pea mo te akoʼi ʼo te folafola.+ 18 Koteʼuhi ʼe ui ʼi te ʼu Tohi Taputapu: “ ʼE mole tonu ke ke fakamaʼu te gutu ʼo te vitulo moka ina malamalaki te fulumeto”+ pea “Ko te tagata gaue ʼe tau mo tona totogi.”+ 19 ʼAua naʼa ke tui ki he tukugakovi ʼe fai ʼo ʼuhiga mo he tagata ʼafeā, gata pe mo kapau ʼe fakamoʼoni ki ai he toko lua peʼe ko he toko tolu.+ 20 Fakatonutonuʼi+ ia muʼa ʼo te kokelekasio* ia natou ʼae ʼe natou fai he agahala,+ ke liliu ai ko he fakatokaga kia natou ʼae.* 21 ʼE au fakatotonu atu kia koe, ia muʼa ʼo te ʼAtua, mo Kilisito Sesu pea mo te kau ʼaselo maʼoniʼoni,* ke ke mulimuli ki te ʼu fakatotonu ʼaia, ʼo vakavakaʼi fakalelei ia meʼa fuli ʼi muʼa ʼo tau fai he tonu pea ʼaua naʼa ke fakapalatahi.+

22 ʼAua naʼa ke foimo hili ʼou nima ki he tagata.*+ ʼAua naʼa ke kau ki te ʼu agahala ʼa ʼihi. Kae taupau ia koe ke ke maʼa.

23 ʼAua naʼa ke toe inu hau moʼi vai,* kae ke ke inu hau kiʼi moʼi vino, koteʼuhi ʼe lelei anai ki tou fatu pea ʼuhi ko tau tautau mahaki.

24 ʼE iloʼi e te hahaʼi te ʼu agahala ʼa ʼihi tagata pea ʼe fakamauʼi fakavilivili ai natou, kae ko te ʼu agahala ʼa ʼihi tagata ʼe hoki ha ia ki ʼamuli.+ 25 ʼO toe feia aipe, ʼe iloʼi e te hahaʼi te ʼu gaue ʼae ʼe lelei,+ pea ko te ʼu gaue lelei ʼae ʼe mole ha ki te hahaʼi ʼe mole feala ia ke fufu.+

6 Ko natou ʼae ʼe kaugana, ke natou fakaʼapaʼapa mo he loto katoa ki ʼonatou pule,+ ke ʼaua naʼa laukoviʼi te huafa ʼo te ʼAtua pea mo ʼana akonaki.+ 2 Pea ko natou ʼae ʼe kaugana ki he ʼu pule Kilisitiano, ke ʼaua naʼa natou agapauʼu kia natou ʼuhi he ʼe ko te ʼu tehina. Kae ʼe tonu ke lahi age tanatou gaue ʼaki he lotolelei, koteʼuhi ko natou ʼae ʼe natou maʼu te ʼu lelei ʼo tanatou gaue ʼe ko he kau Kilisitiano pea mo ʼonatou tehina ʼofaina.

Ke ke haga akoʼi te ʼu meʼa ʼaia pea mo ʼekenaki natou ke natou mulimuli ki ai. 3 Kapau ʼe akoʼi e he tahi he tahi age akonaki pea ʼe mole manatu tahi mo te akonaki ʼae ʼe lelei,*+ ʼae ʼe haʼu mai totatou ʼAliki ko Sesu Kilisito,* pea mo te akonaki ʼae ʼe alu tahi mo te pipiki ki te ʼAtua,+ 4 ʼe fiameʼalahi ia pea ʼe mole mahino ia ki he meʼa.+ ʼE loto tuʼumaʼu pe ia ke fihi ʼo ʼuhiga mo he ʼu kupu.+ ʼE tupu mai ai te manumanū, mo te kē, mo te fasituʼu,* mo te mahalohalo kovi. 5 Pea ʼe toe uga ai foki mo he ʼu tagata kua ʼulihi ʼonatou ʼatamai+ pea ʼe mole kei natou mahino ki te moʼoni, ke natou fihi tuʼumaʼu pe ʼo ʼuhiga mo he ʼu meʼa noa. ʼE natou manatu ʼe feala ke natou maʼu he ʼu lelei mai te pipiki ʼae ki te ʼAtua.+ 6 ʼE moʼoni ʼe lahi te ʼu lelei ʼe tou maʼu mai ai,+ mo kapau foki ʼe tou maʼuli fakafeʼauga. 7 Koteʼuhi neʼe mole tou ʼaumai he meʼa ki te malamanei, pea ʼe mole feala ke tou ʼave he meʼa.+ 8 Koia kapau ʼe tou maʼu he meʼa kai pea mo ni mutuʼi meʼa,* ʼe tou feʼauga anai ʼi te ʼu meʼa ʼaia.+

9 Kae ko natou ʼae ʼe fia maʼu koloa, ʼe natou higa ki te fakahala, mo te hele+ pea mo te ʼatu ʼu holi ʼe mole fakapotopoto pea mo fua kovi kia natou, pea ko te ʼu holi ʼaia ʼe ina taki natou ki te malaʼia pea mo te mate.+ 10 Koteʼuhi ko te manako ki te paʼaga ʼe ko te aka ʼaia ʼo te ʼu faʼahiga meʼa kovi fuli pe, pea ko ʼihi, ʼi tanatou taupau te manako ʼaia, neʼe natou fakamamaʼo mai te tui pea mo natou fakamamahiʼi lahi* natou.+

11 Kae kia koe, tagata ʼa te ʼAtua, ke ke hola mai te ʼu meʼa ʼaia. Pea faiga fakamalotoloto ʼo fakaha te faitotonu, mo te pipiki ʼae ki te ʼAtua, mo te tui, mo te ʼofa, mo te faʼa kataki pea mo te agamalū.+ 12 Ke ke fakahoko te tau matalelei ʼo te tui. Ke ke puke maʼu te maʼuli heʼe gata ʼae neʼe pauʼi koe ki ai pea neʼe ke fakamoʼoni lelei ki ai ia muʼa ʼo te hahaʼi kaugamalie.

13 Ia muʼa ʼo te ʼAtua, ʼae ʼe ina taupau maʼuli ia meʼa fuli, pea ia muʼa ʼo Sesu Kilisito, ʼae neʼe ina fai he fakamoʼoni lelei ia muʼa ʼo Posio Pilato,+ ʼe au fakatotonu atu kia koe 14 ke ke mulimuli fakalelei ki te ʼu fakatotonu ke mole valokiʼi ai koe, ʼo kaku ki te ha ʼo totatou ʼAliki ko Sesu Kilisito.+ 15 Pea ʼi te temi ʼae kua fakatuʼutuʼu ki ai, ʼe ha anai te Pule ʼae ʼe fiafia pea mo tokotahi. ʼE ko ia te Hau ʼo te ʼu hau pea mo te ʼAliki ʼo te ʼu ʼaliki,+ 16 te tokotahi ʼae ʼe ina maʼu te maʼuli tuputupua,+ pea ʼe nofo ʼi he potu* ʼe mole feala ke fakaovi he tahi ki ai ʼuhi ko tona gigila,+ pea neʼe heʼeki sio peʼe mole feala ke sio ki ai he tagata.+ Ke ina maʼu te fakaʼapaʼapa pea mo te malohi heʼe gata. Ameni.

17 Ke ke fakatotonu kia natou ʼae ʼe maʼu koloa ʼi te malama* ʼaeni, ke ʼaua naʼa natou fiameʼalahi pea mo falala ki te ʼu koloa ʼae ʼe fakatemi,+ kae ki te ʼAtua, ʼae ʼe ina foaki lahi mai kia tatou te ʼu meʼa fuli ʼae ʼe tou fiafia ai.+ 18 Ke ke fakaha age kia natou ke lahi ʼanatou gaue lelei, ke natou lotofoaki pea ke natou fia vaevae.+ 19 ʼI tanatou fai te ʼu faʼahi ʼaia, ʼe natou tanaki anai he ʼu koloa ʼe haʼu mai te ʼAtua. Ko tona fakaʼuhiga, ʼe natou fakatuʼu anai he fakatafito ʼe lelei ki te ka haʼu,+ ke feala hanatou puke maʼu te maʼuli moʼoni.+

20 Timoteo, ke ke taupau maʼu te meʼa ʼae neʼe foaki atu,+ ʼo ke maliu kehe mai te ʼu palalau ʼae ʼe mole hona ʼaoga, ʼe ina moamoagaʼi ia te ʼAtua, pea mo ke maliu kehe mai te ʼatamai malama hala, ʼae ʼe maʼu ai he ʼu manatu ʼe fefakafeagaiʼaki.+ 21 Neʼe hehe ʼihi mai te tui ʼuhi ko tanatou fia fakahaha te taʼi ʼatamai malama ʼaia.

Ke nofo mo koutou te ʼofa makehe ʼo te ʼAtua.