TE LUA TOHI KIA TIMOTEO

1 Ko au Paulo, te apositolo ʼa Kilisito* Sesu ʼuhi ko te finegalo ʼo te ʼAtua, moʼo fakaha ia te fakapapau ʼo te maʼuli ʼae ʼe foaki kia natou ʼae ʼe fakatahi mo Kilisito Sesu.+ 2 ʼE au faitohi kia Timoteo, taku fanau ʼofaina:+

Ke foaki atu e te ʼAtua te Tamai pea mo Kilisito Sesu totatou ʼAliki ia te ʼofa makehe, mo te manavaʼofa pea mo te tokalelei.

3 ʼE au fakafetaʼi ki te ʼAtua, ʼae ʼe au foaki ki ai he tauhi taputapu ohage ko tona fai e ʼaku kui, ʼo au fai ʼaki he leʼo ʼo loto ʼe maʼa, pea mo au manatuʼi tuʼumaʼu pe ia koe ʼi ʼaku kolekole ʼi te ʼaho mo te po. 4 Pea ka au manatuʼi ʼou loʼimata, ʼe au fakaʼamu ai ke au sio kia koe, ke lahi ai toku fiafia. 5 Koteʼuhi ʼe au manatuʼi tau tui ʼae ʼe mole malualoi,+ neʼe ʼuluaki maʼu e tau kui fafine ia Loise pea mo tau faʼe ia Enise, pea ʼe au tui papau ʼe ke toe maʼu foki mo koe.

6 Koia ʼe au fakamanatuʼi atu kia koe ke ke haga fakaʼaogaʼi te meʼa ʼofa ʼo te ʼAtua ʼae neʼe ke maʼu ʼi te temi ʼae neʼe au hili ai ʼoku nima kia koe.+ Pea ke ke fai ʼaki he faʼafai ohage ko hau fakaulo he afi. 7 Koteʼuhi ʼaki te laumalie maʼoniʼoni* ʼae ʼe foaki mai e te ʼAtua, ʼe mole tou liliu ai ʼo fula,+ kae ʼe tou liliu ʼo malolohi,+ mo ʼoʼofa pea mo fakapotopoto. 8 Koia ʼaua naʼa ke ufiufi ʼi te fakamoʼoni ʼo ʼuhiga mo totatou ʼAliki+ peʼe ke ufiufi ia au, ʼae ʼe pilisoni ʼuhi ko ia, kae ke ke tali ke ke mamahi+ ʼuhi ko te logo lelei, ʼo ke falala ki te malohi ʼo te ʼAtua.+ 9 Neʼe ina haofaki tatou pea mo pauʼi tatou ke tou liliu ko he kau maʼoniʼoni,+ mole ʼuhi ko ʼatatou gaue kae ʼuhi ko tona finegalo pea mo tona ʼofa makehe.+ Neʼe ina fakaha mai tona ʼofa makehe ʼaia ʼaki ia Kilisito Sesu talu mai fualoa, 10 kae ʼi te temi nei kua ina fakaha lelei te ʼofa makehe ʼaia ʼaki te ha ʼo totatou Fakamaʼuli, ia Kilisito Sesu,+ ʼae neʼe ina pulihi te mate+ pea mo ina fakaha mai ʼaki te logo lelei+ pe ʼe feafeaʼi hatatou maʼu te maʼuli+ pea mo he sino ʼe mole pala.+ 11 Neʼe hinoʼi au ke au liliu ko he tagata faifakamafola, mo he apositolo pea mo he tagata faiako ʼo te logo lelei.+

12 Ko te tupuʼaga la ʼaia ʼo taku mamahi,+ kae ʼe mole au ufiufi.+ Koteʼuhi ʼe au iloʼi te ʼAtua ʼae ʼe au tui ki ai, pea ʼe au falala ʼe feala ke ina taupau te ʼu meʼa ʼae neʼe au foaki age ki ai, ʼo kaku ki te ʼaho ʼo te fakamau.+ 13 Ke ke haga mulimuli ki te faʼifaʼitaki ʼo te ʼu folafola ʼae ʼe lelei*+ neʼe au fakaha atu, pea mo ke fakaha te tui mo te ʼofa ʼae ʼe ke maʼu ʼuhi ko tau fakatahi mo Kilisito Sesu. 14 Ke ke taupau ʼaki te tokoni ʼa te laumalie maʼoniʼoni ʼae ʼe nofo ia tatou,+ te meʼa maʼuhiga ʼae neʼe foaki atu.

15 ʼE ke iloʼi te faʼahi ʼaeni: ʼI te potu fenua ʼo Asia,+ neʼe lituʼa mai kia au te ʼu tagata fuli, ʼo kau ai ia Fiselo mo Elemosene. 16 ʼOfa pe ke manavaʼofa te ʼAliki ki te loto fale ʼo Onesifolo,+ koteʼuhi neʼe ina tautau fakalotomalohiʼi au, pea neʼe mole ufiufi ʼuhi ko taku pilisoni. 17 Kailoa ia, kae ʼi tana haʼu ki Loma, neʼe ina kumi fakalelei au pea neʼe ina maʼu au. 18 ʼOfa pe ke fakafealagia age e te ʼAliki ko Sehova* ke ina maʼu tona manavaʼofa ʼi te ʼaho ʼo te fakamau. Pea ʼe ke iloʼi lelei te ʼu gaue fuli ʼae neʼe ina fai ʼi Efeso.

2 Koia siʼaku fanau,+ ke ke haga fakamalohiʼi ia koe ʼaki te ʼofa makehe ʼae ia Kilisito* Sesu. 2 Pea ko te ʼu meʼa ʼae neʼe ke logo ki ai mai ia au pea neʼe fakamoʼoni ki ai te tokolahi,+ ke ke akoʼi te ʼu meʼa ʼaia ki he ʼu tagata agatonu, ke natou liliu mo natou ʼo popoto ʼi te akoʼi ʼo te ʼu meʼa ʼaia ki ʼihi age. 3 Pea ke ke tali ke ke mamahi+ ohage ko he tagata solia lelei+ ʼa Kilisito Sesu. 4 Ko he tahi ʼe hu ki te solia ʼe mole ina fai* he tahi age gaue moʼo taupau tona maʼuli,* koteʼuhi ʼe ina loto ke leleiʼia ia ia e te tagata ʼae neʼe ina fakahu ia ia. 5 Pea ʼi te ʼu faigaoʼi, ʼe fakapale pe anai* te tagata faigaoʼi mo kapau neʼe mulimuli ki te ʼu lekula.+ 6 Ko te tagata gaue kele ʼae ʼe gaue kinakina, ʼe tonu ke ina ʼuluaki maʼu te ʼu fua ʼo tana gaueʼaga. 7 Ke ke fakakaukauʼi tuʼumaʼu te ʼu meʼa ʼae ʼe au ui atu, pea ʼe fakafealagia atu anai e te ʼAliki ke ke mahino kia* meʼa fuli.

8 Ke ke manatuʼi ko Sesu Kilisito neʼe fakatuʼuake mai te kau mate+ pea neʼe ko te hakoga ʼo Tavite,+ ʼo mulimuli ki te logo lelei ʼae ʼe au fakamafola,+ 9 ʼo tupu ai toku mamahi pea mo toku pilisoniʼi ohage ko he tagata agakovi.+ Kae ʼe mole feala ke seiniʼi te folafola ʼa te ʼAtua.+ 10 Koia ʼe au ʼutakiʼi te ʼu meʼa fuli ʼuhi ko natou ʼae neʼe filifili,+ ke fakamaʼuli ai mo natou ʼaki ia Kilisito Sesu, ʼo natou maʼu te kololia heʼe gata. 11 Ko te folafola ʼaeni ʼe tuha mo te falala: Kapau neʼe tou mamate fakatahi mo ia, pea ʼe tou toe maʼuʼuli fakatahi anai mo ia.+ 12 Kapau ʼe tou haga kataki, pea ʼe tou kaugā hau anai mo ia.+ Kae kapau ʼe tou fakafisi kia te ia, pea ʼe toe fakafisi anai kia tatou.+ 13 Kapau ʼe mole tou agatonu, ʼe agatonu pe anai ia, he ʼe mole feala ke fakafisi kia ia totonu.*

14 Ke ke haga fakamanatuʼi age kia natou te ʼu meʼa ʼaia, ʼo ke fakatotonu age* kia natou ia muʼa ʼo te ʼAtua ke ʼaua naʼa natou fihi ki he ʼu kupu. ʼE ko he meʼa ia ʼe mole hona ʼaoga pea ʼe fakatupu kovi kia natou ʼae ʼe fagono. 15 Ke ke faiga malohi ke ke tuʼu ia muʼa ʼo te ʼAtua ohage ko he tagata ʼe ina tali leleiʼi, ko he tagata gaue ʼe mole feala ke valokiʼi tana gaue, ʼe ina fakaʼaogaʼi lelei te folafola ʼo te moʼoni.+ 16 Kae ke ke tekeʼi te ʼu palalau ʼae ʼe mole hona ʼaoga, ʼe ina moamoagaʼi ia te ʼAtua,+ pea ʼuhi ko te ʼu faʼahiga palalau ʼaia, ʼe ʼaʼasili fakamamaʼo anai te hahaʼi mai te ʼAtua, 17 pea ʼe mafola te ʼu faʼahiga palalau ʼaia ohage ko he meʼa ʼe pala ʼi te sino. Pea ʼe kau ia Imeneo mo Fileto ia natou ʼae ʼe natou fakamafola te ʼu faʼahiga palalau ʼaia.+ 18 Neʼe fakamamaʼo te ʼu tagata ʼaia mai te moʼoni, koteʼuhi ʼe nā ui kua ʼosi hoko te fakatuʼuake,+ ʼo puli ai te tui ʼa ʼihi. 19 Logo la te faʼahi ʼaia, kae ʼe kei tuʼu pe te fakatafitoʼaga malohi ʼae neʼe hili e te ʼAtua, pea ʼe tuʼu ai te fakailoga ʼaeni: “ ʼE iloʼi e Sehova* ia natou ʼae ʼaʼana,”+ pea “Ke liʼaki e ia ʼae ʼe ina fua te huafa ʼo Sehova*+ te aga heʼe faitotonu.”

20 ʼI he fale lahi, ʼe mole maʼu ai pe he ʼu ipu aulo pea mo siliva, kae ʼe toe maʼu ai foki mo he ʼu ipu ʼakau pea mo kele. ʼE fakaʼaogaʼi ʼihi ki te ʼu gaue maʼuhiga, kae fakaʼaogaʼi ʼihi ki te ʼu gaue mahani. 21 Kapau ʼe fakamamaʼo he tahi mai te ʼu ipu ʼae ʼe fakaʼaogaʼi ki te ʼu gaue mahani, pea ʼe liliu anai ia ko he ipu ʼe fakaʼaogaʼi ki te ʼu gaue maʼuhiga, kua fakamaʼoniʼoniʼi, mo ʼaoga ki tona pule, pea kua tokalelei moʼo fai te ʼu gaue lelei fuli. 22 Koia ke ke hola mai te ʼu holi ʼo te temi tupulaga, kae ke ke faiga fakamalotoloto ke ke fakaha te faitotonu, mo te tui, mo te ʼofa pea mo te tokalelei, fakatahi mo natou ʼae ʼe fetapa ki te ʼAliki ʼaki he loto ʼe maʼa.

23 Tahi ʼae meʼa, ke ke fakafisi ki te ʼu fihi fakavale mo laulaunoa,+ he ʼe ke iloʼi ʼe fakatupu kē. 24 Koteʼuhi ko te tagata kaugana ʼa te ʼAliki ʼe mole tonu ke kē, kae ʼe tonu ia ke agalelei* ki te hahaʼi fuli,+ mo poto ʼi te faiakonaki, mo faʼa kataki moka gaohi koviʼi ia ia,+ 25 pea mo ina akoʼi ʼaki he agamalū ia natou ʼae ʼe fakafeagai.+ ʼE lagi fakafealagia anai e te ʼAtua ke natou fakahemala* ke feala hanatou maʼu te ʼatamai malama totonu ʼo ʼuhiga mo te moʼoni,+ 26 mo natou toe maʼu tonatou ʼatamai pea mo mavae mai te hele ʼa te Tevolo, he neʼe ina puke maʼuli natou moʼo fakahoko tona finegalo.+

3 Kae ke ke iloʼi te faʼahi ʼaeni: ʼI te ʼu ʼaho fakamuli,+ ʼe ʼi ai anai he ʼu temi makehe pea mo faigataʼa. 2 Koteʼuhi ʼe ʼoʼofa pe anai te hahaʼi kia natou totonu, mo manako ki te paʼaga, mo laupisiʼi pe ia natou totonu, mo fialahi, mo laukovi ki te ʼAtua mo te hahaʼi, mo talagataʼa ki ʼanatou matuʼā, mo maʼuli galo, mo heʼe agatonu, 3 mo heʼe ʼofa, mole natou maʼuli felogoi, mo faifasituʼu, mole natou lotololomi, mo agafekai, mo fehihiʼa ki te lelei, 4 mo agakaka, mo logogataʼa, mo fiameʼalahi, mo ʼoʼofa ki te ʼu fakafiafia kae mole ki te ʼAtua, 5 pea ʼe natou fia fakaha ʼe natou pipiki ki te ʼAtua kae ʼe mole iloga ʼi ʼonatou maʼuli.+ Ke ke fakamamaʼo mai te hahaʼi ʼaia. 6 Ko ʼihi ia natou ʼaia, ʼe natou feulufi ki te ʼu loto fale, ʼo fakahalaʼi ni fafine ʼe hoko tui, ʼe lahi ʼanatou agahala pea mo natou mulimuli ki ʼonatou holi kehekehe, 7 ʼe kei natou ako pe te moʼoni kae ʼe mole feala ke natou maʼu te ʼatamai malama totonu.

8 Pea ohage ko te fakafeagai ʼa Sanese pea mo Sapelese kia Moisese, ʼe toe fakafeagai te ʼu tagata ʼaia ki te moʼoni. Kua ʼulihi katoa ʼonatou ʼatamai, pea ʼe mole tali natou e te ʼAtua koteʼuhi ʼe mole natou haʼele ʼo mulimuli ki te tui. 9 Kae ʼe gata ai anai tanatou aga, koteʼuhi ʼe ha anai tonatou vavale ki te hahaʼi, ohage ko te meʼa ʼae neʼe hoko ki te ʼu tagata ʼaia ʼe toko lua.+ 10 Kae ko koe, neʼe ke mulimuli lelei ki taku akonaki, mo toku faʼahiga maʼuli,+ mo taku fakatuʼutuʼu, mo taku tui, mo taku kataki fualoa, mo toku ʼofa, mo taku faʼa kataki, 11 pea ʼe ke iloʼi te ʼu fakataga mo te ʼu mamahi ʼae neʼe au tau mo ia ʼi Atiokia,+ mo Ikoniome+ pea mo Lisitia.+ Neʼe au katakiʼi te ʼu fakataga ʼaia, pea neʼe haofaki au e te ʼAliki mai te ʼu aluʼaga fuli ʼaia.+ 12 ʼI tona fakahagatonu, ko natou fuli ʼae ʼe fia pipiki ki te ʼAtua ʼi ʼonatou maʼuli, ʼi tonatou ʼuhiga tisipulo ʼa Kilisito* Sesu, ʼe toe fakatagaʼi anai mo natou.+ 13 Kae ʼe ʼaʼasili kovi age anai te hahaʼi agakovi pea mo kaka. ʼE natou fakahalaʼi anai te hahaʼi pea mo fakahalaʼi natou e ʼihi.+

14 Kae ko koe, ke ke haga mulimuli ki te ʼu meʼa ʼae neʼe ke ako pea neʼe fakalotoʼi koe ke ke tui ki ai,+ he ʼe ke iloʼi te hahaʼi ʼae neʼe natou akoʼi atu te ʼu meʼa ʼaia, 15 pea talu mai tau kei meamea,+ ʼe ke iloʼi te ʼu Tohi Taputapu+ ʼae ʼe feala ai ke ke liliu ʼo poto. ʼE haofaki ai anai koe ʼuhi ko tau tui kia Kilisito Sesu.+ 16 Ko te ʼu Tohi Taputapu katoa ʼe haʼu ia mai te ʼAtua.+ ʼE ʼaoga moʼo akoʼi te hahaʼi,+ moʼo fakatonutonu te hala, moʼo fakatokatoka te ʼu aluʼaga kehekehe, moʼo akonakiʼi ʼo mulimuli ki te faitotonu,+ 17 ke liliu ai te tagata kaugana ʼa te ʼAtua ʼo faiva, pea mo tokalelei ke ina fai te ʼu gaue lelei fuli.

4 ʼE au fakatotonu atu ia muʼa ʼo te ʼAtua pea mo Kilisito* Sesu, ʼae ka ina fakamauʼi+ te hahaʼi maʼuli pea mo te kau mate,+ ʼi te temi ʼae ka ha lelei ai+ pea mo haʼu anai ʼi tona Puleʼaga:+ 2 Ke ke fakamafola+ ʼaki he faʼafai ia te folafola, ʼi te temi faigamalie pea mo te temi faigataʼa. Ke ke valoki,+ mo fakatonutonuʼi pea mo fakalotomalohiʼi ʼaki te kataki fualoa pea mo te faiva ʼi te faiakonaki.+ 3 Koteʼuhi ʼe ʼi ai anai he temi ʼe mole fia logo anai te hahaʼi ki te akonaki ʼae ʼe lelei,*+ kae ʼe natou fia mulimuli pe anai ki ʼonatou holi, ʼo natou kumi he kau faiako ʼe natou ui age te meʼa ʼae ʼe natou fia logo ki ai.+ 4 ʼE mole natou toe fagono anai ki te moʼoni kae ʼe natou tokagaʼi anai te ʼu fakamatala loi. 5 Kae ko koe, ke ke fakaʼaogaʼi tuʼumaʼu ʼou fealagia fakakaukau, mo ke ʼutakiʼi te mamahi,+ mo ke fai te gaue ʼa he tagata faifakamafola ʼo te logo lelei, pea ke ke fakahoko katoa tau minisitelio.+

6 Koteʼuhi ʼe au hage ko he molaga vino* ʼe liligi ki te ʼaletale,+ pea kua ovi mai pe te temi ʼo toku fakaʼateainaʼi.+ 7 Neʼe au fakahoko te tau matalelei,+ neʼe au fakaʼosi te lele+ pea mo au taupau te tui. 8 Koia kua taʼofi maʼaku te pale ʼo te faitotonu,+ ʼae ka foaki mai e te ʼAliki, te tuʼi fakamau faitotonu,+ ohage ko he fakapale ʼi te ʼaho ʼo te fakamau.+ ʼE mole ina foaki mai pe anai kia au, kae kia natou fuli ʼae ʼe natou fakaʼamu ki te temi ʼae ka ha ai.

9 Faiga malohi ke ke foimo haʼu. 10 Koteʼuhi neʼe liʼaki au e Temasi,+ he neʼe manako ia ki te malama* ʼaeni pea neʼe alu ia ki Tesalonika. Neʼe alu ia Keleseni ki Kalate pea alu ia Tito ki Talamasia. 11 ʼE ko Luka pe ʼae ʼe nofo mo au. Pea ke ke haʼu mo Maleko, koteʼuhi ʼe ʼaoga ia kia au ʼi te minisitelio. 12 Kae neʼe au fekauʼi ia Tisike+ ki Efeso. 13 Ka ke haʼu, pea ke toʼo mai te pulupulu ʼae neʼe au tuku ʼi Toloasi io Kalepusi, ʼo feia mo te ʼu takaiga tohi, kae tafito te ʼu takaiga tohi ʼae neʼe fai ʼaki te kiliʼi manu.

14 Ko Alesatelo, te tagata tufuga kapa, neʼe agakovi lahi mai kia au. ʼE liufaki age pe anai e Sehova* kia ia ʼo mulimuli ki ʼana gaue.+ 15 Ke ke tokaga foki mo koe kia ia, koteʼuhi neʼe fakafeagai malohi ki tamatou logo.

16 ʼI toku ʼuluaki fakamauʼi, neʼe mole he tahi neʼe nofo mo au, kae neʼe natou liʼaki fuli au. Ke ʼaua naʼa manatuʼi e te ʼAtua tanatou aga ʼaia. 17 Kae neʼe tokoni mai te ʼAliki pea neʼe ina foaki mai te malohi, ke feala ai ke au fakahoko katoa taku fakamafola te logo lelei pea ke logo ki ai te ʼu puleʼaga fuli.+ Pea neʼe haofaki au mai te gutu ʼo te laione.+ 18 ʼE haofaki anai au e te ʼAliki mai te ʼu gaue kovi fuli pe pea mo ina fakamaʼuli anai au, ʼo ina ʼave au ki tona Puleʼaga ʼae ʼi selo.+ Ke fakakololiaʼi totatou ʼAliki ʼo talu ai. Ameni.

19 ʼOfa age kia Pilisika mo Akila+ pea mo te loto fale ʼo Onesifolo.+

20 Neʼe nofo ia Elaseto+ ʼi Kolonito kae neʼe au tuku ia Tolofime+ ʼi Mile he neʼe mahaki. 21 Faiga malohi ke ke tau mai ʼi muʼa ʼo te temi momoko.

ʼE ʼofa atu ia Epulose, ʼo feia mo Potenesi, mo Lino, mo Kolotia pea mo te ʼu tehina fuli.

22 Ke tapuakiʼi te faʼahiga manatu ʼae ʼe ke fakaha. Ke nofo mo koutou te ʼofa makehe ʼo totatou ʼAliki.