TE TOHI KI TE KAU HEPELEO

1 ʼI te temi muʼa, neʼe palalau te ʼAtua ʼi he ʼu temi mo he ʼu aluʼaga kehekehe ki ʼatatou kui ʼaki te kau polofeta.+ 2 Pea ʼi te fakaʼosi ʼo te ʼu ʼaho ʼaeni, neʼe palalau mai kia tatou ʼaki tona ʼAlo,+ ʼae neʼe ina fakanofo ke ina maʼu ia meʼa fuli ohage ko he tofiʼa,+ pea ʼaki ia ia neʼe ina fakatupu te ʼu meʼa ʼae ʼi te lagi mo ʼae ʼi te kele.*+ 3 ʼE ina fakaʼata te kololia ʼo te ʼAtua+ pea ʼe ko te fakata totonu ʼo te ʼuhiga ʼo te ʼAtua.+ ʼE ina taupau ia meʼa fuli ʼaki te malohi ʼo tana folafola. Pea ʼi te hili ʼo tana fakamaʼa ʼatatou agahala,+ neʼe heka ʼi te toʼomataʼu ʼo te ʼAtua ʼi selo.+ 4 Kua liliu ai ʼo maʼoluga age ʼi te kau ʼaselo+ koteʼuhi neʼe ina maʼu he higoa ʼe lelei ʼaupito age ʼi ʼonatou higoa.+

5 Ohage la, ko ai ʼi te kau ʼaselo neʼe ui age e te ʼAtua ki ai: “Ko koe toku ʼalo, pea kua au liliu ʼi te ʼaho nei ko tau tamai”?+ Pea: “ ʼE au liliu anai ko tana tamai, pea ʼe liliu anai ko toku ʼalo”?+ 6 Kae ka ina toe fekauʼi mai tona ʼUluaki Tupu+ ki te kele, ʼe ina ui: “Ke hu kia te ia te kau ʼaselo fuli ʼa te ʼAtua.”

7 Pea ʼe ina ui ʼo ʼuhiga mo te kau ʼaselo: “ ʼE ina fakaliliu ʼana ʼaselo ko ni laumalie malolohi,* pea mo ʼana kau faifekau+ ko he ʼu uloʼi afi.”+ 8 Kae ʼe ina ui ʼo ʼuhiga mo te ʼAlo: “ ʼE foaki atu e te ʼAtua te pule fakahau+ ʼo talu ai, pea ko tou tokotoko fakahau ʼe ko te tokotoko ʼo te faitotonu. 9 Neʼe ke ʼofa ki te faitotonu kae neʼe ke fehiʼa ki te maumauʼi ʼo te lao. Koia, ko te ʼAtua, tou ʼAtua, neʼe ina fakanofo koe+ ʼaki te lolo mo ina foaki atu he fiafia ʼe lahi age ʼi te tahi ʼu hau.”+ 10 Pea: “ ʼI te kamataʼaga, ʼAliki, neʼe ke fakatuʼu te ʼu fakatafito ʼo te kele, pea ko te ʼatu lagi ko te ʼu gaue ʼo ʼou nima. 11 ʼE pulihi anai te kele mo te lagi, kae ko koe ʼe ke maʼuli anai, ʼe popo fuli anai ohage ko te popo ʼo he kofu, 12 pea ʼe ke takatakai anai te kele mo te lagi ohage ko he pulupulu, pea ʼe fetogi anai ohage ko te fetogi ʼo he kofu. Kae ko koe, ʼe mole ke fetogi pea ʼe mole gata anai ʼou taʼu.”+

13 Kae ko ai ʼi te kau ʼaselo neʼe ui age e te ʼAtua ki ai: “Heka ʼi toku toʼomataʼu ʼo kaku ki taku tuku ʼou fili ki ʼou lalo vaʼe”?+ 14 Pea ko te ʼu ʼaselo fuli ʼe mole koa la ko he ʼu laumalie ʼe natou tauhi ki te ʼAtua,+ ʼe fekauʼi ke natou tokoni kia natou ʼae ka haofaki?

2 Koia la ʼae ʼe tonu ai ke lahi age tatatou tokakaga ki te ʼu meʼa ʼae kua tou ʼosi logo ki ai,+ ke ʼaua naʼa tou tafea.+ 2 Koteʼuhi kapau neʼe tuha mo te falala ia te folafola ʼae neʼe tala e te kau ʼaselo+ pea kapau ko ia ʼae neʼe ina maumauʼi he lao pea mo talagataʼa ki ai neʼe tauteaʼi ia ʼo mulimuli ki te faitotonu,+ 3 ʼe tou hao feafeaʼi anai mo kapau neʼe tou meʼa noaʼi te haofaki lahi ʼaia?+ Koteʼuhi neʼe kamata fakaha e totatou ʼAliki+ pea neʼe fakamoʼoni ki ai e natou ʼae neʼe fagono kia te ia, 4 pea neʼe toe fakamoʼoni ki ai te ʼAtua ʼaki he ʼu fakailoga, mo he ʼu meʼa fakaofoofo,* mo he ʼu milakulo kehekehe+ pea mo tana foaki ia te laumalie maʼoniʼoni ʼo mulimuli ki tona finegalo.+

5 Koteʼuhi neʼe mole ina tuku ki te kau ʼaselo ke natou puleʼi te malama ka haʼu,+ ʼae ʼe matou talanoa ki ai. 6 Kae ʼi te temi muʼa, neʼe tala e te tagata: “Kotea te ʼuhiga ʼo te tagata ke tupu ai hau manatuʼi ia ia, peʼe ko te foha ʼo te tagata ke tupu ai hau tokaga ki ai?+ 7 Neʼe ke tuku ia ia ke malalo ifo ʼi te kau ʼaselo, neʼe ke fakapale ia ia ʼaki te kololia mo te fakaʼapaʼapa, pea neʼe ke fakanofo ia ia ke pule ki te ʼu gaue ʼo ʼou nima. 8 Neʼe ke tuku ia meʼa fuli ki ʼona lalo vaʼe.”+ ʼI te tuku e te ʼAtua ke fakalogo te ʼu meʼa fuli kia ia,+ neʼe mole ina tuku he meʼa ʼe tahi ke mole fakalogo kia ia.+ Kae ʼi te temi nei, heʼeki tou sio kua fakalogo ia meʼa fuli kia ia.+ 9 Kae ʼe tou sio kia Sesu, ʼae neʼe tuku ke malalo ifo ʼi te kau ʼaselo,+ kua fakapale ʼaki te kololia mo te fakaʼapaʼapa koteʼuhi neʼe mamahi ʼo kaku ki tona mate.+ Pea ʼuhi ko te ʼofa makehe ʼo te ʼAtua, neʼe mate maʼa te hahaʼi fuli pe.+

10 Neʼe fakatupu e te ʼAtua ia meʼa fuli pea mo tokaga lelei ki ai. Koia moka ina fakakololiaʼi ʼona foha ʼe tokolahi,+ ʼe lelei ke ina fakaliliu ʼo haohaoa ia Ia ʼae ʼe ina taki natou ki te haofaki+ ʼo ina fakagafua ke mamahi.+ 11 Koteʼuhi ko ia ʼae ʼe ina fakamaʼoniʼoniʼi pea mo natou ʼae ʼe fakamaʼoniʼoniʼi,+ ʼe natou ʼomai fuli mai te tamai ʼe tahi,+ koia ʼe mole ufiufi ai ʼi tana fakahigoaʼi natou ko ʼona tehina,+ 12 ʼi tana ui: “ ʼE au fia fakaha tou huafa ki ʼoku tehina. ʼI te lotolotoiga ʼo te hahaʼi* ʼe au vikiʼi anai koe ʼaki ni hiva.”+ 13 Pea ʼe ina toe ui: “ ʼE au falala anai kia te ia.”+ Pea: “Koʼeni au mo te ʼu fanau ʼae neʼe foaki mai e Sehova.”*+

14 Koia ʼuhi ʼae ʼe kakano* “te ʼu fanau,” neʼe toe liliu foki mo ia ʼo kakano+ ke feala ai ʼaki tona mate, ke ina pulihi ia ia ʼae ʼe feala ke ina fakatupu te mate,+ ia te Tevolo,+ 15 pea ke feala hana fakaʼateainaʼi ia natou fuli ʼae neʼe popula ʼi tonatou maʼuli katoa ʼuhi ko tanatou matataku ki te mate.+ 16 Koteʼuhi ʼe mole tokoni ia ki te kau ʼaselo, kae ʼe tokoni ia ki te hakoga ʼo Apalahamo.+ 17 Koia neʼe tonu ai ke liliu ohage ko ʼona “tehina” ʼi te ʼu faʼahi fuli pe,+ ke feala hana liliu ko he pelepitelo lahi ʼe manavaʼofa pea mo agatonu ʼo ʼuhiga mo te ʼu meʼa ʼa te ʼAtua, pea ke ina momoli he sakilifisio faifakalelei+ maʼa* te ʼu agahala ʼa te hahaʼi.+ 18 Mai tona aluʼaga ʼae neʼe mamahi ʼi te temi ʼae neʼe ʼahiʼahiʼi ai,+ ʼe feala ai hana tokoni kia natou ʼae ʼe ʼahiʼahiʼi.+

3 Koia ʼu tehina maʼoniʼoni, ʼae ʼe kau ki te pauʼi* ki selo,+ kotou tokagaʼi te apositolo pea mo te pelepitelo lahi ʼae ʼe tou fakamoʼoni* ki ai, ia Sesu.+ 2 Neʼe agatonu kia Ia ʼae neʼe ina fakanofo ia ia,+ ohage pe ko te agatonu ʼa Moisese ʼi te ʼapi katoa ʼo te ʼAtua.+ 3 Koteʼuhi ʼe lahi age tona* kololia+ ʼi te kololia ʼo Moisese, he ʼe ko ia ʼae ʼe ina faʼu he ʼapi ʼe maʼuhiga age ia ʼi te ʼapi ʼae ʼe ina faʼu. 4 ʼE mahino ia, ko te ʼu ʼapi fuli neʼe faʼu e he tahi, kae ko ia ʼae neʼe ina faʼu ia meʼa fuli ʼe ko te ʼAtua. 5 Pea ko Moisese, ʼi tona ʼuhiga tagata tauhi ʼapi, neʼe agatonu ʼi te ʼapi katoa ʼo te ʼAtua, moʼo fakamoʼoni ki te ʼu meʼa ʼae neʼe tonu ke tala ki muli age. 6 Kae ko Kilisito,* ʼi tona ʼuhiga ʼalo, neʼe agatonu ia+ ʼi tana tokaga ki te ʼapi ʼo te ʼAtua. Pea ko tatou ko te ʼapi ʼo te ʼAtua+ mo kapau ʼe tou haga palalau fakahagatonu pea mo taupau maʼu ʼo kaku ki te fakaʼosi tatatou ʼamanaki ʼae ʼe tou fiameʼameʼa ai.

7 Ko te tupuʼaga la ʼaia ʼo te ui e te laumalie maʼoniʼoni:+ “ ʼI te ʼaho nei, kapau ʼe kotou fakalogo ki tona leʼo, 8 ʼaua naʼa kotou lotofefeka ohage ko ʼakotou kui, ʼi te ʼaho ʼae neʼe natou fakatupu ai toku ita pea mo natou ʼahiʼahiʼi au ʼi te toafa.+ 9 Neʼe natou ʼahiʼahiʼi au logo la neʼe natou sisio ki ʼaku gaue lolotoga taʼu ʼe 40.+ 10 Koia neʼe au fakalialia ai ki te taʼiake ʼaia pea mo au ui: ‘ ʼE natou lotokaka tuʼumaʼu pe, pea ʼe mole natou mahino ki ʼaku gaue.’ 11 Koia neʼe au fakapapau ai ʼi toku ita: ‘ ʼE mole natou hu anai ki toku maloloʼaga.’ ”+

12 ʼU tehina, kotou tokakaga naʼa maʼu e he tahi ia koutou he loto ʼe agakovi mo tuigataʼa ʼuhi ko tana fakamamaʼo mai te ʼAtua maʼuli.+ 13 Kae ke kotou haga fefakalotomalohiʼaki ʼi te ʼaho fuli, ʼi tatatou kei maʼuʼuli ʼi te ʼaho ʼae ʼe ui ʼe ko “te ʼaho nei,”+ ke ʼaua naʼa liliu he tahi ʼo lotofefeka ʼuhi ko te malohi kaka ʼo te agahala. 14 Koteʼuhi ʼe foaki moʼoni mai anai te meʼa ʼae kua foaki kia Kilisito mo kapau ʼe tou taupau maʼu ʼo kaku ki te fakaʼosi ia te falala ʼae neʼe tou maʼu ʼi te kamata.+ 15 Ohage ko tona ui: “ ʼI te ʼaho nei, kapau ʼe kotou fakalogo ki tona leʼo, ʼaua naʼa kotou lotofefeka ohage ko ʼakotou kui, ʼi te ʼaho ʼae neʼe natou fakatupu ai toku ita.”+

16 He neʼe ko ai koa ia natou ʼae neʼe logo ki te leʼo ʼo te ʼAtua kae natou fakatupu pe tona ita? Neʼe mole koa la ko natou fuli ʼae neʼe mavae mai Esipito ʼi te takitaki ʼa Moisese?+ 17 Pea ko ai koa ia natou ʼae neʼe fakalialia ki ai te ʼAtua lolotoga taʼu ʼe 40?+ Neʼe mole koa la ko natou ʼae neʼe agahala pea neʼe mamate ʼi te toafa?+ 18 Pea ko ai koa ia natou ʼae neʼe ina fakapapau age ki ai ʼe mole natou hu anai ki tona maloloʼaga? Neʼe mole koa la ko natou ʼae neʼe talagataʼa? 19 Koia ʼe tou sio ai neʼe mole feala ke natou hu ki tona maloloʼaga ʼuhi ko tanatou tuigataʼa.+

4 Koia ʼi te kei tuʼu ʼo te fakapapau ʼae ke hu te hahaʼi ʼa te ʼAtua ki tona maloloʼaga, tou tokakaga* naʼa mole tuha he tahi ia tatou mo te fakapapau ʼaia.+ 2 Koteʼuhi neʼe toe tala mai foki kia tatou te logo lelei,+ ohage pe ko natou. Kae neʼe mole hona ʼaoga kia natou te folafola ʼae neʼe natou logo ki ai, koteʼuhi neʼe mole tatau tanatou tui mo te tui ʼa natou ʼae neʼe fakalogo. 3 He ʼe ko tatou ʼae ʼe tui ʼe tou hu ki te maloloʼaga, ohage pe ko tana ui: “Koia neʼe au fakapapau ai ʼi toku ita: ‘ ʼE mole natou hu anai ki toku maloloʼaga,’ ”+ logo la neʼe kua ʼosi ʼana gaue talu mai te kamataʼaga ʼo te malamanei.*+ 4 Koteʼuhi ʼi te tahi vaega, neʼe ina ui ʼo ʼuhiga mo te fitu ʼaho: “Pea neʼe malolo leva te ʼAtua ʼi te fitu ʼaho mai ʼana gaue fuli,”+ 5 pea ʼe ina toe ui: “ ʼE mole natou hu anai ki toku maloloʼaga.”+

6 Ko natou ʼae neʼe ʼuluaki tala age ki ai te logo lelei, neʼe mole natou hu ki te maloloʼaga ʼaia ʼuhi ko tanatou talagataʼa.+ Kae ʼe kei feala ki ʼihi ke natou hu ki ai. 7 Koia hili ki ai he temi loaloaga, neʼe ina toe fakailoga he tahi ʼaho ʼi tana ui ʼi te pesalemo ʼa Tavite: “ ʼI te ʼaho nei.” Ohage ko tona ui ki muʼa atu ʼi te tohi ʼaeni: “ ʼI te ʼaho nei, kapau ʼe kotou fakalogo ki tona leʼo, ʼaua naʼa kotou lotofefeka.”+ 8 Koteʼuhi kapau neʼe taki natou e Sosue+ ki he maloloʼaga, ka na ʼaua la neʼe mole palalau te ʼAtua ki muli age ʼo ʼuhiga mo he tahi age ʼaho. 9 Koia ʼe kei maʼu he malolo maʼa te hahaʼi ʼa te ʼAtua, ohage ko te malolo ʼi te ʼaho ʼo te sapato.+ 10 Koteʼuhi ko te tagata ʼae kua hu ki te maloloʼaga ʼo te ʼAtua, kua toe malolo mo ia mai ʼana gaue, ohage ko te kua malolo ʼa te ʼAtua mai ʼana gaue.+

11 Koia tou faiga malohi ke tou hu ki te maloloʼaga ʼaia, ke ʼaua naʼa mulimuli he tahi ki te faʼifaʼitaki ʼaia ʼo te talagataʼa.+ 12 Koteʼuhi ko te folafola ʼa te ʼAtua ʼe maʼuli pea mo malohi,+ ʼe masila age ia ʼi he heleta matalua.+ ʼE ulu loloto ki te tagata ʼo feala ke ina fakakehekeheʼi te meʼa ʼae ʼe ha ki tuʼa* pea mo tona ʼuhiga ʼi loto,* mo vaheʼi te ʼu hokoga hui mai ʼonatou gakoʼi hui pea ʼe feala ke ina fakaha te ʼu manatu pea mo te ʼu fakatuʼutuʼu ʼo te loto. 13 Pea ʼe mole he meʼa neʼe fakatupu ʼe ʼūgia kia mata ʼo te ʼAtua,+ kae ko meʼa fuli ʼe telefua pea mo ha kia mata ʼo ia ʼae ʼe ina fakamauʼi anai tatou ʼo mulimuli ki ʼatatou gaue.+

14 Koia ʼi tatatou maʼu he pelepitelo lahi mo maʼoluga kua hu ki selo, ia Sesu te ʼAlo ʼo te ʼAtua,+ tou haga tala tatatou tui ʼae kia te ia.+ 15 Koteʼuhi ʼe tou maʼu he pelepitelo lahi ʼe lotomahino ki ʼotatou vaivaiʼaga,+ he ʼe ko he tahi kua ʼahiʼahiʼi ʼi te ʼu faʼahi fuli pe, ohage ko tatou, kae neʼe mole agahala.+ 16 Koia tou fakaovi ki te ʼafioʼaga ʼo te ʼAtua ʼae ʼe ina foaki ia te ʼofa makehe, ʼo tou faikole ʼaki he lotofalala kia te ia,+ ke tou maʼu ai te manavaʼofa pea mo te ʼofa makehe moʼo tokoni mai ʼi tona temi totonu.

5 Koteʼuhi ko te pelepitelo lahi ʼae neʼe fili mai te tagata, ʼe fakanofo ke ina fakahoko te tauhi ki te ʼAtua maʼa te hahaʼi,+ ke ina momoli ni meʼa ʼofa pea mo ni sakilifisio ʼo ʼuhiga mo te ʼu agahala.+ 2 ʼE feala ke lotomanavaʼofa* kia natou ʼae ʼe mole natou iloʼi te meʼa ʼae ʼe lelei pea mo natou agahala* ai, koteʼuhi mo ia pe la ʼe ʼi ai ʼona vaivaiʼaga, 3 pea ʼe tonu ai ke ina fai ni molaga ʼo ʼuhiga mo ʼana agahala ohage pe ko tana fai ʼo ʼuhiga mo te ʼu agahala ʼa te hahaʼi.+

4 ʼE mole he tahi ʼe ina fakanofo ia ia totonu ki te tuʼulaga ʼaia, kae ʼe ina maʼu pe mo kapau neʼe pauʼi ia ia e te ʼAtua, ohage ko Alone.+ 5 ʼO toe feia foki mo Kilisito,* neʼe mole ina fakakololiaʼi ia ia totonu+ ʼo ina fakanofo ia ia ko he pelepitelo lahi, kae neʼe fakakololiaʼi ia ia e Ia ʼae neʼe ina ui age ki ai: “Ko koe toku ʼalo, pea kua au liliu ʼi te ʼaho nei ko tau tamai.”+ 6 Pea ʼe ina toe ui ʼi te tahi age vaega: “ ʼE ke pelepitelo ʼo talu ai ohage ko Melekiseteke.”+

7 ʼI te maʼuli ʼa Kilisito ʼi te kele, neʼe ina momoli he ʼu kole mamahi mo he ʼu kole ʼaki ni kalaga malohi mo ni loʼimata,+ kia Ia ʼae neʼe feala ke ina haofaki ia ia mai te mate, pea neʼe tali ʼana faikole ʼuhi ko tana manavasiʼi ki te ʼAtua. 8 Logo la neʼe ko te ʼalo ʼo te ʼAtua, kae neʼe ina ako te fakalogo ʼaki te ʼu meʼa ʼae neʼe ina ʼutakiʼi.+ 9 Pea ʼi tana kua liliu ʼo haohaoa,+ neʼe feala ai ke ina haofaki ʼo heʼe gata ia natou fuli ʼae ʼe fakalogo kia te ia,+ 10 he neʼe hinoʼi ia ia e te ʼAtua ko he pelepitelo lahi ohage ko Melekiseteke.+

11 ʼE lahi te ʼu meʼa ʼe tonu ke matou fakaha atu ʼo ʼuhiga mo ia, kae ʼe faigataʼa tona fakamahino atu he ʼe kua kotou liliu ʼo logogataʼa. 12 Koteʼuhi ʼi te temi nei,* kua tonu ke kotou liliu ko he kau faiako, kae kua toe ʼaoga ia ke akoʼi atu te ʼu ʼuluaki akonaki+ ʼo te ʼu folafola taputapu ʼa te ʼAtua, pea kua toe ʼaoga kia koutou te huʼa pipi, kae mole ko te meʼa kai fefeka. 13 Koteʼuhi ko ia ʼae ʼe kei inu ki te huʼa pipi ʼe mole ina iloʼi te folafola faitotonu ʼa te ʼAtua, he ʼe ko te kiʼi tamasiʼi ia.+ 14 Kae ko te meʼa kai fefeka ʼe ʼa te hahaʼi ʼae kua fotufotuʼa, natou ʼae kua akoako ʼonatou fealagia fakakaukau moʼo fakakehekeheʼi te meʼa ʼae ʼe lelei mo te meʼa ʼae ʼe kovi, he ʼe natou fakaʼaogaʼi tuʼumaʼu.

6 ʼI te temi nei kua tou fakalaka ʼi te ʼu ʼuluaki akonaki+ ʼo ʼuhiga mo Kilisito.* Koia tou haga faiga malohi ke tou liliu ʼo fotufotuʼa ʼi te faʼahi fakalaumalie,+ ʼo mole tou toe hili te fakatafito, ʼae ko te fakahemala ki te ʼu gaue mate, mo te tui ki te ʼAtua, 2 mo te akonaki ʼo ʼuhiga mo te ʼu faʼahiga papitema, mo te hili ʼo te ʼu nima,+ mo te fakatuʼuake ʼo te kau mate+ pea mo te ʼu tonu faifakamau heʼe gata. 3 Pea ʼe tou fai feia anai, mo kapau ʼe fakafealagia e te ʼAtua.

4 Ko natou ʼae kua fakamalamaʼi,+ mo natou maʼu noa te meʼa ʼofa ʼae mai te lagi, mo te laumalie maʼoniʼoni, 5 mo te folafola lelei ʼa te ʼAtua, pea mo te ʼu tapuakina* ʼo te malama* ʼae ka hoko mai, 6 kae neʼe natou maliu kehe mai te tui,+ ʼe mole feala he tokoni kia natou ke natou fakahemala, koteʼuhi ʼe hage ʼe natou toe tutuki te ʼAlo ʼo te ʼAtua ki te pou, pea mo natou fakalainoaʼi ia ia ia muʼa ʼo te hahaʼi.+ 7 Ka ʼua tuʼumaʼu, ʼe ko he tapuakina mai te ʼAtua maʼa te kele, koteʼuhi ʼe ina fakavai te kele ʼo maʼuli ai te ʼu gaueʼaga ʼae ʼe ʼaoga kia natou ʼae neʼe natou gaueʼi. 8 Kae kapau ʼe homo te vao talatala, ʼe liʼaki e te tagata gaue kele ia te kele, he ʼe kua vave malaʼia, pea ʼi te fakaʼosi ʼe tutu anai ia.

9 Logope la tamatou palalau feia atu, kae ʼe matou tui papau ʼu tehina ʼofaina ʼe lelei age tokotou aluʼaga, pea ʼe kotou fai te ʼu meʼa ʼae ʼe feala ke haofaki ai koutou e te ʼAtua. 10 Koteʼuhi ʼe mole heʼe faitotonu te ʼAtua ke ina galoʼi takotou gaue mo te ʼofa ʼae neʼe kotou fakaha ki tona huafa+ ʼi takotou tauhi ki te kau maʼoniʼoni ʼi muʼa atu pea mo takotou haga fai ʼi te temi nei. 11 Kae ʼe matou loto ke kotou tahi maʼu te faʼafai ʼaia ke kotou tui papau ai ki te ʼamanaki+ ʼo kaku ki te fakaʼosi,+ 12 ke ʼaua naʼa kotou pipiko,+ kae ke kotou faʼifaʼitakiʼi ia natou ʼae ʼe natou maʼu te ʼu fakapapau, ʼuhi ko tanatou tui pea mo tanatou kataki fualoa.

13 ʼI te fai e te ʼAtua tana fakapapau kia Apalahamo, neʼe ina fakamoʼoni ʼaki ia ia totonu,+ koteʼuhi neʼe mole feala ke ina fakamoʼoni ʼaki he tahi ʼe lahi age, 14 ʼo ina ui: “ ʼE au tapuakiʼi moʼoni anai ia koe pea ʼe au fakahahaʼi moʼoni anai ia koe.”+ 15 Pea ʼi te ʼosi kataki fualoa ʼa Apalahamo, neʼe fai age leva ki ai te fakapapau ʼaia. 16 Ka faifakapapau te tagata pea ʼe fakamoʼoni ʼaki he tahi ʼe lahi age. ʼE gata ai te ʼu fihi fuli koteʼuhi ʼe ko te fakamoʼoni ʼaia ʼe moʼoni te meʼa ʼae ʼe ina tala.+ 17 ʼO toe feia pe, ʼi te fakatotonu ʼae e te ʼAtua ke ina fakaha lelei ki te kau maʼu tofiʼa ʼo te fakapapau+ ʼe mole feala ke fetogi tana fakatuʼutuʼu,* neʼe ina fai te fakamoʼoni ki tana fakapapau. 18 Koia ʼaki te ʼu meʼa ʼaia ʼe lua ʼae ʼe mole fetogi pea ʼe mole feala ai ke loi te ʼAtua,+ ko tatou ʼae neʼe feholaki ki te nonoʼaga ʼe tou maʼu ai te fakalotomalohi ke tou puke maʼu tatatou ʼamanaki. 19 ʼE tou maʼu te ʼamanaki ʼaia+ ohage ko he foʼi tau ki ʼotatou maʼuli,* ʼe tuha mo te falala pea mo tuʼu malohi, pea ʼe ina taki tatou ki te tahi faʼahi ʼo te lito.*+ 20 Neʼe ʼuluaki hu ia Sesu ki ai, ʼo ina avahi mo teuteuʼi te ala maʼa tatou,+ pea mo liliu ai ko he pelepitelo lahi ʼo talu ai ohage ko Melekiseteke.+

7 Ko te Melekiseteke ʼaia, hau ʼo Salemi, mo pelepitelo ʼa te ʼAtua Maʼoluga, neʼe alu ia ʼi te liliu mai ʼa Apalahamo mai tana matematehi te ʼu hau ʼo fakafelaveʼi ki ai, pea neʼe ina tapuakiʼi ia Apalahamo.+ 2 Pea neʼe foaki age e Apalahamo kia ia te vahe tahi ki te hogofulu ʼo meʼa fuli. ʼUluaki, ko te fakaʼuhiga ʼo tona higoa ko te “Hau ʼo Te Faitotonu,” pea neʼe toe fakahigoa ko te hau ʼo Salemi, ko tona fakaʼuhiga, “Hau ʼo Te Tokalelei.” 3 ʼE pelepitelo ʼo talu ai, koteʼuhi neʼe hala mo tamai pea mo faʼe, neʼe mole iloʼi tona haʼuʼaga, pea neʼe mole tohi te ʼaho ʼae neʼe tupu ai mo te ʼaho ʼae neʼe mate ai, kae neʼe liliu ia ohage ko te ʼAlo ʼo te ʼAtua.+

4 Neʼe maʼuhiga te tagata ʼaia ʼae neʼe foaki ki ai e Apalahamo, te pule famili,* te vahe tahi ki te hogofulu ʼo te ʼu koloa ʼae neʼe ina maʼu ʼi te tau.+ 5 ʼE moʼoni, ʼo mulimuli ki te Lao, neʼe fakatotonu kia natou ʼae ʼe kau ki te ʼu foha ʼo Levi+ ʼae neʼe fakanofo ko he ʼu pelepitelo, ke natou tae he vahe tahi ki te hogofulu mai te hahaʼi,+ ko tona fakaʼuhiga, mai ʼonatou tehina, tatau aipe pe ʼe ko natou te hakoga* ʼo Apalahamo. 6 Kae ko te tagata ʼaia ʼae neʼe mole kau ki te famili ʼo Levi, neʼe ina tali te vahe tahi ki te hogofulu mai ia Apalahamo pea neʼe ina tapuakiʼi ia ia ʼae neʼe ina maʼu te ʼu fakapapau.+ 7 Pea ʼe mole he fakafihi ʼe fai ki ai, ko ia ʼae ʼe lahi ʼe ina tapuakiʼi ia ia ʼae ʼe veliveli. 8 Ko te hahaʼi ʼae ʼe natou tali te vahe tahi ki te hogofulu ʼe ko he hahaʼi ʼe mamate, kae ko te tagata ʼae ʼe hage ko Melekiseteke ʼe ina tali te vahe tahi ki te hogofulu, ʼe fakamoʼoni ia ʼe maʼuli.+ 9 Pea ʼe feala pe ke ui ʼaki ia Apalahamo, maʼia mo Levi, ʼae neʼe ina tali te vahe tahi ki te hogofulu, neʼe ina totogi te vahe tahi ki te hogofulu, 10 he neʼe heʼeki tupu ia ʼi tona ʼuhiga hakoga* ʼo tana kui ko Apalahamo, ʼi te temi ʼae neʼe felaveʼi ai ia Melekiseteke mo ia.+

11 Ko te fakatuʼutuʼu ʼo te gaue fakapelepitelo ʼa te kau Levite neʼe kau ki te Lao ʼa Moisese ʼae neʼe foaki ki te kau Iselaele. Koia kapau ʼe feala ki te kau pelepitelo Levite ke natou tokoni ki te hahaʼi ke natou liliu ʼo haohaoa,+ ʼe ʼaoga koa he pelepitelo ohage ko Melekiseteke?+ ʼE mole feʼauga pe koa mo he pelepitelo ohage ko Alone? 12 Koteʼuhi kapau ʼe fetogi te gaue fakapelepitelo, ʼe toe ʼaoga foki ke fetogi mo te Lao.+ 13 He ʼe ko te tagata ʼae ʼe talanoa ki ai neʼe haʼu ia mai te tahi telepi, ʼae neʼe heʼeki ʼi ai he tahi ia natou kua gaue ʼi te ʼaletale.+ 14 Koteʼuhi ʼe tou iloʼi lelei ko totatou ʼAliki neʼe tupu mai Suta,+ kae neʼe mole fakaha mai e Moisese he meʼa ʼo ʼuhiga mo he ʼu pelepitelo ʼe ʼomai mai te telepi ʼaia.

15 Pea kua ʼaʼasili tatatou iloʼi lelei age te ʼu faʼahi ʼaia koteʼuhi kua ha he tahi pelepitelo+ ʼe hage ko Melekiseteke,+ 16 pea ʼe mole ina fai tana gaue fakapelepitelo ʼuhi ko te telepi ʼae neʼe tupu mai ai ohage ko tona fakamaʼua ʼi te Lao, kae ʼuhi ko te malohi ʼae ʼe feala ai ke ina maʼu he maʼuli ʼe mole feala ke pulihi.+ 17 Koteʼuhi ʼe fai te fakamoʼoni ʼaeni ʼo ʼuhiga mo ia: “ ʼE ke pelepitelo ʼo talu ai ohage ko Melekiseteke.”+

18 Koia ko te fakatotonu ʼafeā ʼe molehi koteʼuhi ʼe ʼi ai ʼona tuʼakoi pea ʼe mole hona ʼaoga.+ 19 Ko te Lao neʼe mole feala ke ina fakahoko ia meʼa fuli ʼae neʼe fakamaʼua mai e te ʼAtua,+ kae ʼe feala pe ʼaki te ʼamanaki ʼe lelei age+ ʼae ʼe foaki mai e te ʼAtua, ʼo feala ai ke tou fakaovi kia te ia.+ 20 Neʼe hoko te faʼahi ʼaia ʼaki te fakamoʼoni ʼa te ʼAtua. 21 (Koteʼuhi ʼe ʼi ai te ʼu tagata neʼe liliu ʼo pelepitelo pea neʼe mole fakamoʼoni ki ai te ʼAtua, kae ʼe ʼi ai he tagata neʼe fai e te ʼAtua te fakamoʼoni ʼo ʼuhiga mo ia ʼi tana ui ʼae: “Neʼe fakamoʼoni e Sehova,* pea ʼe mole ina fetogi anai tana manatu,* ‘ ʼE ke pelepitelo ʼo talu ai.’ ”)+ 22 ʼUhi ko te faʼahi ʼaia neʼe liliu ai ia Sesu ko te fakamoʼoni ʼo he fuakava ʼe lelei age.+ 23 Pea tahi ʼae, tokolahi te kau pelepitelo neʼe mole feala ke natou hoko atu tanatou gaue ʼuhi ko te mate, koia neʼe fetogi natou e ʼihi.+ 24 Kae ʼe maʼuli ia Sesu ʼo talu ai,+ koia ʼe mole ʼaoga ke fetogi e he tahi tana gaue fakapelepitelo. 25 Koia ʼe toe feala ai foki ke ina fakaʼateaina mai te agahala ia natou ʼae ʼe fakaovi ki te ʼAtua ʼaki ia ia, koteʼuhi ʼe maʼuli tuʼumaʼu ʼo kole ki te ʼAtua ke tokoni kia natou.+

26 Ko he meʼa lelei maʼa tatou, ke tou maʼu he pelepitelo lahi feia, ʼe agatonu, ʼe mole maʼu he meʼa ʼe kovi ia ia, ʼe heʼe mele,+ ʼe mavae kehe mai te kau agahala pea mo maʼoluga age ʼi te ʼatu lagi.*+ 27 Pea ʼe mole ʼaoga ia ke ina momoli he ʼu sakilifisio ʼi te ʼaho fuli,+ ohage ko te kau pelepitelo lahi ʼae, ʼo ina fai ʼuluaki maʼa ʼana agahala totonu pea mo ʼae ʼa te hahaʼi,+ koteʼuhi neʼe ina fai tuʼa tahi pe ʼo talu ai ʼi te temi ʼae neʼe ina momoli ai ia ia totonu.+ 28 Koteʼuhi ko te Lao neʼe ina fakanofo he ʼu tagata agahala ko he ʼu pelepitelo lahi,+ kae ko te fakamoʼoni ʼo te fakapapau+ ʼae neʼe muli mai ʼi te Lao neʼe ina fakanofo te ʼAlo ʼo te ʼAtua ʼae ʼe haohaoa+ ʼo talu ai.

8 Pea koʼeni te manatu tafito ʼo te ʼu faʼahi ʼae ʼe tou lolotoga palalau ki ai: ʼE tou maʼu he pelepitelo lahi feia,+ kua heka ʼi te toʼomataʼu ʼo te ʼafioʼaga ʼo te ʼAtua ʼi selo,+ 2 ʼe ko he tagata faifekau ʼo te Potu Taputapu ʼAupito+ pea mo te fale la moʼoni, ʼae neʼe fakatuʼu e Sehova* kae mole ko te tagata. 3 Koteʼuhi ʼe fakanofo te ʼu pelepitelo lahi fuli ke natou momoli ni meʼa ʼofa pea mo ni sakilifisio. Koia neʼe tonu ai foki ke maʼu e ia ʼaia he meʼa ke ina momoli.+ 4 Ka na pau la neʼe ʼi te kele, neʼe mole feala ia ke pelepitelo,+ koteʼuhi kua ʼi ai ni tagata ʼe natou momoli ni meʼa ʼofa ʼo mulimuli ki te Lao. 5 Ko te tauhi taputapu ʼae ʼe fai e te ʼu tagata ʼaia, ʼe ko he faʼifaʼitaki pea mo he fakata+ ʼo te ʼu meʼa ʼae ʼi selo.+ Ohage la ko Moisese, ʼi tana ʼamanaki fakatuʼu te fale la,* neʼe fakatotonu age e te ʼAtua: “Tokaga ʼo fai ia meʼa fuli ʼo mulimuli ki te pāki ʼae neʼe fakaha atu ʼi te moʼuga.”+ 6 Kae ʼi te temi nei kua foaki age kia Sesu he gaue ʼe lelei ʼaupito age, koteʼuhi ʼe ko ia foki te tagata fakafelogoi+ ʼo he fuakava ʼe lelei age,+ neʼe fakatafito ki te lao pea mo he ʼu fakapapau ʼe lelei age.+

7 Ka na neʼe haohaoa la te ʼuluaki fuakava, neʼe mole ʼaoga ke ʼi ai hona lua.+ 8 Koteʼuhi neʼe valokiʼi e te ʼAtua ia te hahaʼi ʼaki te ʼu palalau ʼaeni: “ ʼE ui e Sehova:* ‘Koʼeni, ʼe hoko mai anai te ʼaho ʼae ʼe au fai ai mo te puleʼaga ʼo Iselaele mo te puleʼaga ʼo Suta ia he fuakava foʼou.’ 9 ʼE toe ui e Sehova:* ‘ ʼE mole hage anai ko te fuakava ʼae neʼe au fai mo ʼanatou kui ʼi te temi ʼae neʼe au puke ai ʼonatou nima ʼo fakamavae mai te fenua ʼo Esipito,+ koteʼuhi neʼe mole natou nonofo agatonu ki taku fuakava, koia ʼae neʼe mole kei au tokaga ai kia natou.’

10 “ ʼE ui e Sehova:* ‘Koʼeni te fuakava ʼae ʼe au fai anai mo te puleʼaga ʼo Iselaele hili te ʼu ʼaho ʼaia: ʼE au ʼai anai ʼaku lao ki ʼonatou ʼatamai, pea mo au tohi anai ʼi ʼonatou loto.+ ʼE au liliu anai ko tonatou ʼAtua pea ʼe natou liliu anai ko taku hahaʼi.+

11 “ ‘Pea ʼe mole toe akoʼi anai e he tahi kia ia ʼae ʼe nā fenua tahi pea mo tona tehina ʼo ui: “ ʼE tonu ke kotou iloʼi ia Sehova!”* Koteʼuhi ʼe natou iloʼi fuli anai ia au, mai ia ia ʼae ʼe malalo kia ia ʼae ʼe maʼuhiga. 12 Koteʼuhi ʼe au fakamolemole anai ʼanatou aga heʼe faitotonu, pea ʼe mole au toe manatuʼi anai ʼanatou agahala.’ ”+

13 ʼI tana ui ʼae “fuakava foʼou,” kua ina fakaliliu ia te fuakava ʼafeā ʼo mole kei ʼi ai hona ʼaoga.+ Koia ko te fuakava ʼae ʼe mole kei ʼi ai hona ʼaoga pea kua ʼafeā, ʼe kua vave puli ia.+

9 Koia neʼe maʼu ʼi te fuakava ʼafeā he ʼu fakamaʼua ʼo ʼuhiga mo te tauhi taputapu pea mo tona koga meʼa taputapu+ ʼi te kele. 2 Koteʼuhi neʼe fakatuʼu te fale la mo ʼona faʼahi ʼe lua. Neʼe tuku ʼi te ʼuluaki faʼahi te tuʼulaga malama,+ mo te laupapa pea mo te ʼu pane ʼae neʼe molagaʼi,+ pea neʼe higoa te faʼahi ʼaia ko te Potu Taputapu.+ 3 Kae ʼi muli ʼo te lua lito,+ neʼe ko te faʼahi ʼo te fale la ʼae neʼe higoa ko te Potu Taputapu ʼAupito.+ 4 Neʼe maʼu ai te tutuʼaga iseso aulo,+ mo te aleka ʼo te fuakava+ ʼae neʼe ʼaofi katoa ʼaki te aulo,+ pea neʼe tuku ʼi te loto aleka te tokotoko ʼo Alone ʼae neʼe fisi,+ mo te ʼu lauʼi maka+ ʼo te fuakava pea mo te ipu aulo ʼae neʼe ʼai ai te mane.+ 5 Pea ʼi te fuga aleka, neʼe ʼi ai te ʼu kelupimi* gigila neʼe nā fakamalumaluʼi te tapunu.*+ Kae ʼe mole ko te temi ʼaeni ke tou palalau ki te ʼu meʼa fuli ʼaia.

6 ʼI te ʼosi fakatuʼu ʼo te ʼu meʼa ʼaia, neʼe hu tuʼumaʼu pe te kau pelepitelo ki te ʼuluaki faʼahi ʼo te fale la moʼo fai te ʼu gaue taputapu.+ 7 Kae tuʼa tahi ʼi te taʼu, neʼe hu tokotahi ia te pelepitelo lahi ki te lua faʼahi,+ pea neʼe tonu ke hu mo te toto+ ʼae ka ina liligi maʼa ia+ pea mo te ʼu agahala ʼae neʼe fai e te hahaʼi+ ʼi tanatou fakapoʼuli. 8 ʼE fakamahino ai e te laumalie maʼoniʼoni neʼe heʼeki ava te ala ki te Potu Taputapu ʼAupito ʼi te kei tuʼu ʼo te ʼuluaki fale la.+ 9 Ko te fale la ʼaia ʼe ko te fakata ʼo te ʼu meʼa ʼae ʼe lolotoga hoko ʼi te temi nei,+ pea ʼo mulimuli ki te fakatuʼutuʼu ʼaia, ʼe momoli ni meʼa ʼofa pea mo ni sakilifisio.+ Kae ʼe mole feala, ʼaki te ʼu meʼa ʼaia, ke fakamaʼa katoa ai te leʼo ʼo loto ʼo te tagata ʼae ʼe ina fai he tauhi taputapu.+ 10 Kae neʼe fakaʼuhiga pe te ʼu meʼa ʼaia ki te meʼa kai, mo te meʼa inu pea mo te ʼu faʼahiga toʼotoʼoga ʼo te fakamaʼa.*+ Neʼe ko he ʼu fakatotonu ʼo ʼuhiga mo te fakamaʼa ʼo te sino+ pea neʼe fakamaʼua ʼo kaku ki te temi ʼae kua ʼosi fakatuʼutuʼu moʼo fakatokatoka te ʼu meʼa.

11 Kae neʼe haʼu ia Kilisito* ʼi tona ʼuhiga pelepitelo lahi moʼo foaki te ʼu meʼa lelei ʼae ʼe tou maʼu ʼi te temi nei, pea neʼe hu ki te fale la ʼe lahi age pea mo lelei age, neʼe mole faʼu e te tagata, ko tona fakaʼuhiga ʼe mole tuʼu ʼi te kele. 12 Neʼe hu tuʼa tahi ʼo talu ai ki te Potu Taputapu ʼAupito ʼaia, mole ʼaki te toto ʼo he ʼu tao pea mo he ʼu vitulo mui, kae ʼaki tona taʼataʼa+ pea neʼe ina haofaki tatou ʼo talu ai.+ 13 Koteʼuhi ko te toto ʼo te ʼu tao pea mo te ʼu vitulo+ pea mo te lefulefu ʼo he pipi fafine* ʼae neʼe afuhi kia natou ʼae ʼe heʼe maʼa, ʼe ina fakamaʼoniʼoniʼi natou he ʼe ina fakamaʼa te sino.+ 14 Kae ko te taʼataʼa ʼo Kilisito ʼe lahi age ia ʼi te meʼa ʼaia.+ ʼAki te gaue ʼo te laumalie maʼoniʼoni ʼae ʼe heʼe gata, neʼe momoli e Kilisito ia ia totonu ki te ʼAtua, ohage ko he sakilifisio ʼe heʼe mele. ʼE fakamaʼa e tona taʼataʼa ʼotatou leʼo ʼo loto pea ʼe mole tou toe fai te ʼu gaue mate,+ ʼo feala ai ke tou foaki he tauhi taputapu ki te ʼAtua maʼuli.+

15 Ko te tupuʼaga la ʼaia ʼo tana liliu ko te tagata fakafelogoi ʼo te fuakava foʼou,+ ke maʼu ai e natou ʼae neʼe pauʼi ia te fakapapau ʼo ʼuhiga mo te tofiʼa ʼae ʼe heʼe gata.+ Neʼe feala ke hoko katoa te faʼahi ʼaia ʼaki tona mate, ʼo ina foaki he totogi*+ pea mo fakaʼateainaʼi natou mai te ʼu agahala ʼae neʼe natou fai ʼi tanatou kei nonofo ʼi te fuakava ʼafeā. 16 Koteʼuhi ka fai he fuakava mo te ʼAtua, ʼe maʼua ke mate te tagata ʼae ʼe ina fai te fuakava* ʼaia, 17 he ʼe fakamoʼoni ia he fuakava moka mate he tahi,* koteʼuhi kapau ʼe kei maʼuli te tagata ʼae ʼe ina fai te fuakava* pea ʼe mole feala ke hoko te fuakava. 18 Koia ka na neʼe mole liligi la te toto, neʼe mole hoko te fuakava ʼafeā. 19 Koteʼuhi ʼi te ʼosi fakaha age e Moisese ki te hahaʼi katoa ia te ʼu fakatotonu fuli ʼo te Lao, neʼe ina toʼo te toto ʼo te ʼu vitulo mui pea mo te ʼu tao, mo te vai, mo te fuluʼi ovi kula pea mo te ʼu vaʼa isope, pea neʼe ina afuhi ʼaki te tohi* pea mo te hahaʼi katoa, 20 ʼo ina ui: “ ʼE ko te toto ʼaeni ʼo te fuakava ʼae neʼe fakatotonu atu e te ʼAtua ke kotou taupau.”+ 21 ʼO toe feia aipe, neʼe ina afuhi te toto ki te fale la pea mo te ʼu meʼa gaue fuli ʼae neʼe fakaʼaogaʼi ki te tauhi taputapu.+ 22 ʼEi, ʼo mulimuli ki te Lao, ʼe teitei pe ko meʼa fuli ʼe fakamaʼa ʼaki te toto,+ pea kapau ʼe mole liligi te toto, ʼe mole feala ke fai he fakamolemole.+

23 Koia neʼe maʼua ai ke fakamaʼa te ʼu meʼa ʼae ʼe natou fakata+ te ʼu meʼa ʼae ʼi selo ʼaki te ʼu sakilifisio manu,+ kae ʼe maʼua ke fakamaʼa te ʼu meʼa ʼae ʼi selo ʼaki he ʼu sakilifisio ʼe lelei age. 24 Koteʼuhi neʼe mole hu ia Kilisito ki te Potu Taputapu ʼAupito ʼae neʼe faʼu e te tagata,+ ʼae ʼe ko he fakata ia ʼo te Potu Taputapu ʼAupito moʼoni,+ kae neʼe hu ia ki selo,+ ke ha ʼi te temi nei ia muʼa* ʼo te ʼAtua maʼa tatou.+ 25 Pea neʼe mole ina fai te faʼahi ʼaia ke ina momoli tuʼa lahi ia ia totonu, ohage ko te hu ʼa te pelepitelo lahi ki te Potu Taputapu ʼAupito ʼi te taʼu fuli+ ʼaki he toto kae ʼe mole ko tona toto. 26 Ka na ʼaua la ia neʼe tonu ke mamahi tuʼa lahi talu mai te kamataʼaga ʼo te malamanei.* Kae ʼi te temi nei, ʼi te fakaʼosi ʼo te ʼu tuʼu ʼo te ʼu faʼahiga meʼa* ʼaeni, kua ha tuʼa tahi ʼo talu ai moʼo pulihi te agahala ʼaki tana sakilifisioʼi ia ia totonu.+ 27 Pea ohage ko te mate tuʼa tahi pe ʼa te tagata, pea hili ʼaia ʼe fakamauʼi, 28 ʼo toe feia pe, neʼe momoli ia Kilisito tuʼa tahi ʼo talu ai ke ina ʼamo te ʼu agahala ʼa te tokolahi.+ Pea ʼi tana ha tuʼa lua leva, ʼe mole haʼu anai moʼo toʼo te agahala, pea ʼe sio anai ki ai ia natou ʼae ʼe fakaatalitali kia te ia ke haofaki natou.+

10 Ko te Lao ʼe ko he ʼata pe ia+ ʼo te ʼu meʼa lelei ʼae ka hoko mai,+ kae ʼe mole ko te moʼoni ʼo te ʼu meʼa ʼaia. Koia ʼe mole feala ʼi he temi ki te Lao* ʼaki te ʼu sakilifisio ʼaia ʼae ʼe momoli tuʼumaʼu ʼi te taʼu fuli, ke haohaoa ai te hahaʼi ʼae ʼe fakaovi ki te ʼAtua.+ 2 Ka na pau la neʼe natou haohaoa ʼaki te ʼu sakilifisio ʼaia, neʼe mole he ʼaoga ke momoli he tahi ʼu sakilifisio, koteʼuhi ko natou ʼae ʼe natou fai he tauhi taputapu, ʼi te temi pe ʼae kua fakamaʼa ai natou, ʼe mole kei natou tukugakoviʼi natou. 3 Kae ko te ʼu sakilifisio ʼaia ʼe ko he fakamanatu ʼo te ʼu agahala ʼi te taʼu fuli,+ 4 he ʼe mole feala ki te toto ʼo te ʼu vitulo pea mo te ʼu tao ke ina toʼo te ʼu agahala.

5 Koia ʼi tana haʼu ki te malamanei, neʼe ina ui ki te ʼAtua: “ ‘Neʼe mole ke loto ki he sakilifisio mo he molaga, kae neʼe ke teuteuʼi he sino maʼaku. 6 Neʼe mole ke tali he ʼu holokoseta* pea mo he ʼu molaga ʼo te agahala.’+ 7 Pea neʼe au ui: ‘Koʼeni, neʼe tohi ʼi te takaiga tohi ʼo ʼuhiga mo au, kua au haʼu ʼo fai tou finegalo, siʼoku ʼAtua.’ ”+ 8 ʼI tana ʼuluaki ui: “Neʼe mole ke loto pea neʼe mole ke tali he ʼu sakilifisio, mo he ʼu molaga, mo he ʼu holokoseta, pea mo he ʼu molaga ʼo te agahala,” ko te ʼu sakilifisio ʼaia neʼe momoli ʼo mulimuli ki te Lao, 9 neʼe ina ui leva: “Koʼeni, kua au haʼu ʼo fai tou finegalo.”+ ʼE ina toʼo te ʼuluaki fakatuʼutuʼu ke ina fakatuʼu te lua. 10 ʼAki te “finegalo” ʼaia+ kua fakamaʼoniʼoniʼi tatou ʼaki te molaga ʼo te sino ʼo Sesu Kilisito* ʼae neʼe momoli tuʼa tahi ʼo talu ai.+

11 Pea ko te kau pelepitelo fuli ʼe tutuʼu ʼi te ʼaho fuli moʼo fai he gaue taputapu+ pea mo momoli tuʼumaʼu te ʼu sakilifisio ʼaia,+ ʼae ʼe mole feala ʼi he temi ke ina toʼo katoa ai te ʼu agahala.+ 12 Kae ko te tagata ʼaia neʼe ina momoli he sakilifisio ʼe tahi maʼa te ʼu agahala ʼo talu ai pea neʼe heka leva ʼi te toʼomataʼu ʼo te ʼAtua,+ 13 pea talu mai ai ʼe talitali ʼo kaku ki te tuku ʼo ʼona fili ki ʼona lalo vaʼe.+ 14 Koteʼuhi ʼaki he sakilifisio ʼe tahi, neʼe ina fakaliliu ʼo haohaoa+ ʼo talu ai ia natou ʼae kua fakamaʼoniʼoniʼi. 15 Pea ʼe toe fakamoʼoni mai foki ia te laumalie maʼoniʼoni kia tatou, ʼi tana ui: 16 “ ‘Koʼeni te fuakava ʼae ʼe au fai anai mo natou hili te ʼu ʼaho ʼaia,’ ko te ui ʼaia ʼa Sehova.* ‘ ʼE au ʼai anai ʼaku lao ki ʼonatou loto pea mo au tohi anai ki ʼonatou ʼatamai.’ ”+ 17 Pea ʼe ina ui: “ ʼE mole au toe manatuʼi anai ʼanatou agahala pea mo ʼanatou aga ʼae ʼe kovi.”+ 18 Koteʼuhi ka fakamolemole e te ʼAtua te ʼu agahala fuli ʼaia, ʼe mole kei ʼaoga he molaga ki te ʼu agahala.

19 Koia ʼu tehina, ʼaki te taʼataʼa ʼo Sesu ʼe mole tou matataku* ʼi te fakaʼaogaʼi ʼo te ala ʼae ʼe ina taki ki te loto Potu Taputapu ʼAupito.+ 20 Pea ko te ala ʼaia, ʼae neʼe ina avahi maʼa tatou ʼe ko he ala foʼou ʼe ina taki ki te maʼuli. Pea neʼe ina fai te faʼahi ʼaia ʼi tana fakalaka ʼi te lito,+ ʼae ʼe ko tona kakano, 21 pea ʼe tou maʼu ai he pelepitelo maʼoluga ʼe tokaga ki te hahaʼi ʼa te ʼAtua.+ 22 Koia tou fakaovi ʼaki he ʼu loto fakamalotoloto pea mo he tui ʼe malohi, koteʼuhi kua fakamaʼa* ʼotatou loto mai he leʼo ʼo loto ʼe kovi,+ pea kua fufulu ʼotatou sino ʼaki he vai ʼe maʼa.+ 23 Tou taupau maʼu tatatou tala ia muʼa ʼo te hahaʼi tatatou ʼamanaki ʼo mole tou lotolotolua,+ koteʼuhi ʼe agatonu ia ia ʼae neʼe ina fai te fakapapau. 24 Pea tou fetokagaʼaki ke tou feugaʼaki* ki te ʼofa pea mo te ʼu gaue lelei,+ 25 ʼo mole tou liʼaki ʼatatou fono,+ ohage ko te agamahani ʼa ʼihi, kae ke tou fefakalotomalohiʼaki,+ pea ke laka age tatatou fai te ʼu faʼahi ʼaia koteʼuhi kua ovi mai te ʼaho ʼo te ʼAtua.+

26 Koteʼuhi kapau ʼe tou haga fai faʼifaʼitaliha te agahala ʼi tatatou ʼosi maʼu te ʼatamai malama totonu ʼo te moʼoni,+ ʼe mole kei ʼi ai he sakilifisio maʼa ʼatatou agahala,+ 27 kae ʼe tou atalitali ʼi te mataku ki te fakamau pea mo te hauhau ʼo te ʼAtua ʼae ʼe hage ko he afi, ka ina tutu ia natou ʼae ʼe fakafeagai kia te ia.+ 28 Kapau neʼe maumauʼi e he tahi te Lao ʼa Moisese, neʼe tonu ia ke matehi moka ʼe fakamoʼoni ki ai he toko lua peʼe toko tolu,+ pea neʼe mole tonu ia ke manavaʼofa ki ai. 29 Kotea la takotou manatu? Ko he tahi ʼe ina malamalaki te ʼAlo ʼo te ʼAtua, pea ʼe mole faʼa maʼuhiga kia ia te taʼataʼa ʼo te fuakava+ ʼae neʼe fakamaʼoniʼoniʼi ʼaki ia ia, pea mo laukovi ki te laumalie ʼo te ʼAtua ʼae ʼe ina foaki te ʼofa makehe, ʼe mole koa la tuha anai mo ia he tautea ʼe lahi age?+ 30 Koteʼuhi ʼe tou iloʼi ia Ia ʼae neʼe ina ui: “ ʼAʼaku te lagavaka, ʼe au liufaki anai.” Neʼe toe ui: “ ʼE fakamauʼi anai e Sehova* tana hahaʼi.”+ 31 ʼE ko he meʼa fakamataku moka tauteaʼi he tahi e te ʼAtua maʼuli.

32 Kae kotou haga manatuʼi te temi muʼa, ʼi te ʼosi fakamalamaʼi ʼo koutou,+ neʼe kotou katakiʼi he tau lahi ʼi te mamahi. 33 ʼI ʼihi temi neʼe fakahaha koutou ia muʼa ʼo te hahaʼi* ke nukinukiʼi pea mo fakatagaʼi koutou, pea ʼi ʼihi temi neʼe kotou vaevae te ʼu mamahi* ʼo natou ʼae neʼe fakalaka ai. 34 Koteʼuhi neʼe kotou manavaʼofa ki te ʼu tehina ʼae neʼe pilisoniʼi, pea neʼe kotou tali fakafiafia te puli ʼo ʼokotou koloa,+ ʼi takotou iloʼi ʼae ʼe kotou maʼu he tofiʼa ʼe lelei age pea mo tologa.+

35 Koia ʼaua naʼa puli takotou lototoʼa,* ʼae ʼe maʼu ai anai he fakapale lahi.+ 36 Koteʼuhi ʼe ʼaoga kia koutou te faʼa kataki,+ ke feala ai ʼi takotou ʼosi fai te finegalo ʼo te ʼAtua, hakotou maʼu te meʼa ʼae neʼe ina fakapapauʼi atu. 37 Koteʼuhi ʼe kei toe “he kiʼi temi veliveli,”+ pea “ko ia ʼae ʼe haʼu ʼe haʼu moʼoni anai pea ʼe mole tuai anai.”+ 38 “Kae ʼe maʼuli anai taku tagata faitotonu ʼuhi ko tana tui,”+ pea “kapau ʼe holomuli, ʼe mole au* fiafia anai ia ia.”+ 39 ʼE mole tou kau ia natou ʼae ʼe holomuli ʼo mamate,+ kae ʼe tou kau ia natou ʼae ʼe tui ke haofaki ai ʼotatou maʼuli.*

11 Ko te tui ʼe ko te falala malohi ʼe hoko anai te ʼu meʼa ʼae ʼe tou ʼamanaki ki ai,+ ʼe ko te fakamoʼoni lelei ʼo te ʼu moʼoni ʼae ʼe heʼeki tou sisio ki ai. 2 Neʼe maʼu e te ʼu tagata ʼo te temi muʼa* te tui ʼaia, koia neʼe fakaha ai e te ʼAtua neʼe ina leleiʼia ia natou.

3 ʼAki tatatou tui ʼe tou mahino ai ko te ʼu meʼa ʼae ʼi te lagi mo ʼae ʼi te kele* neʼe fakatuʼutuʼu ia e te folafola ʼa te ʼAtua, koia ko te ʼu meʼa ʼae ʼe tou sisio ki ai neʼe haʼu ia mai te ʼu meʼa ʼae ʼe fakapulipuli.

4 ʼAki tana tui, neʼe momoli e Apele ki te ʼAtua he sakilifisio ʼe maʼuhiga age ʼi ʼae ʼa Kaino,+ pea ʼaki tana tui ʼaia neʼe ina maʼu te fakamoʼoni mai te ʼAtua neʼe faitotonu, koteʼuhi neʼe tali e te ʼAtua ʼana meʼa ʼofa,+ pea logope la kua mate, kae ʼe kei akoʼi pe tatou+ e tana tui.

5 ʼAki tana tui, ko Enoke+ neʼe ʼave ia ke ʼaua naʼa mamahi moka mate, pea neʼe mole maʼu ia ia ʼi he potu he neʼe ʼave ia ia e te ʼAtua,+ koteʼuhi ʼi muʼa ʼo tona ʼave neʼe ina maʼu te fakamoʼoni mai te ʼAtua ʼe ina leleiʼia ia ia. 6 Koia ʼe mole feala ke leleiʼia e te ʼAtua he tahi ʼe mole tui, koteʼuhi ko ia ʼae ʼe fakaovi ki te ʼAtua ʼe tonu ke tui ʼe maʼuli ia ia pea ʼe ina fakapale ia natou ʼae ʼe natou kumi fakamalotoloto ia ia.+

7 ʼAki tana tui, ko Noe+ ʼi tana ʼosi maʼu te fakatokaga mai te ʼAtua ʼo te ʼu meʼa ʼae neʼe heʼeki sio ki ai,+ neʼe manavasiʼi ki te ʼAtua pea neʼe ina faʼu he aleka+ moʼo haofaki ia tona loto fale. Pea ʼaki tana tui ʼaia, neʼe ina fakaha ai ʼe tuha te malama ʼaia mo te tautea,+ pea neʼe ina maʼu ai ia te faitotonu ʼae ʼe tupu mai te tui.

8 ʼAki tana tui, ko Apalahamo+ ʼi te temi ʼae neʼe pauʼi ai ia ia e te ʼAtua, neʼe fakalogo ʼo mavae ʼo alu ki he koga meʼa neʼe tonu ke ina maʼu ohage ko he tofiʼa. Pea neʼe mavae ai, logope la neʼe mole ina iloʼi te koga meʼa ʼae ka alu ki ai.+ 9 ʼAki tana tui neʼe maʼuli ohage ko he matapule ʼi te fenua ʼo te fakapapau,+ ʼo maʼuli ʼi te ʼu fale la+ mo Isaake pea mo Sakopo, pea neʼe fai e te ʼAtua kia natou he fakapapau ʼe tatau.+ 10 Koteʼuhi neʼe talitali ki he kolo ʼe ʼi ai hona ʼu fakatafito moʼoni, ʼae neʼe fai e te ʼAtua tona pāki pea mo ina laga.+

11 ʼAki tana tui, neʼe foaki age kia Sala te malohi ʼae ke ina fuafatuʼi he hakoga, kae neʼe kua finematuʼa,*+ he neʼe tui ʼe agatonu* ia Ia ʼae neʼe ina fai te fakapapau. 12 Ko te tupuʼaga la ʼaia, mai he tagata ʼe tahi ʼae neʼe hage pe kua mate,+ neʼe tupu mai ai he ʼu fanau+ kaugamalie ohage ko te ʼu fetuʼu ʼo te lagi pea ohage ko te ʼu fisiʼi ʼone ʼo te matatai ʼae ʼe mole feala ke lau.+

13 Neʼe mamate ia natou fuli ʼaia ʼi te tui, logope la neʼe mole hoko te ʼu fakapapau ʼi tonatou temi,+ kae neʼe natou sisio mai mamaʼo ki ai+ pea mo tali fakafiafia, pea neʼe natou tala ia muʼa ʼo te hahaʼi neʼe natou matapule pea mo nonofo fakatemi ʼi te fenua. 14 Koteʼuhi ko natou ʼae ʼe palalau feia ʼe natou fakaha lelei ai ʼe natou kumi fakamalotoloto te koga meʼa ʼae ka liliu ko honatou nofoʼaga. 15 Pea kapau la neʼe natou manatuʼi tuʼumaʼu te koga meʼa ʼae neʼe natou mavae mai ai,+ neʼe feala pe ke natou maʼu he faigamalie ke natou toe liliu ki ai. 16 Kae neʼe natou holi ki he koga meʼa ʼe lelei age, ko tona fakaʼuhiga, he nofoʼaga ʼe ʼi ai hona pikipikiga mo selo. Koia ʼe mole ufiufi te ʼAtua kia natou ʼi tanatou fakahigoaʼi ia Ia ko tonatou ʼAtua,+ koteʼuhi neʼe ina teuteuʼi he kolo maʼa natou.+

17 ʼAki tana tui, ko Apalahamo, ʼi te temi ʼae neʼe ʼahiʼahiʼi ai,+ neʼe hage neʼe ina momoli ia Isaake ko he sakilifisio. Ko Apalahamo, ʼae neʼe ina tali fakafiafia te ʼu fakapapau neʼe meihiʼi pe ke ina momoli tona foha ʼulu tokotahi,+ 18 logope la neʼe ui age kia ia: “Ko natou ʼae ka fakahigoaʼi ko tou hakoga ʼe natou hifo anai mai ia Isaake.”+ 19 Kae neʼe ina fakakaukauʼi neʼe feala ki te ʼAtua ke ina fakatuʼuake tona foha mai te kau mate, pea neʼe haofaki ia ia e te ʼAtua mai te mate ʼo liliu ai ohage ko he faʼifaʼitaki.+

20 ʼAki tana tui, ko Isaake neʼe ina tapuakiʼi ia Sakopo+ pea mo Esau+ ʼo ʼuhiga mo te ʼu meʼa ʼae ka hoko mai.

21 ʼAki tana tui, ko Sakopo ʼi tana kua vave mate,+ neʼe ina tapuakiʼi te ʼu foha takitahi ʼo Sosefo,+ pea neʼe atolasio ki te ʼAtua ʼo tapiki ki tona toko.+

22 ʼAki tana tui, ko Sosefo ʼi tana kua vave mate, neʼe palalau ʼo ʼuhiga mo te fakaʼateaina ʼo te ʼu foha ʼo Iselaele, pea neʼe ina foaki he ʼu fakatotonu* ʼo ʼuhiga mo ʼona hui.*+

23 ʼAki tanā tui, ko te ʼu matuʼā ʼa Moisese neʼe nā fufu ia ia lolotoga mahina ʼe tolu ʼi tana ʼosi tupu,+ koteʼuhi neʼe nā sisio ki te talavou ʼa te kiʼi tamasiʼi+ pea neʼe mole nā matataku ki te fakatotonu ʼa te hau.+ 24 ʼAki tana tui, ko Moisese ʼi tana kua lahi,+ neʼe fakafisi ke fakahigoaʼi ia ia ko te tama ʼa te ʼofafine ʼo Falaone,+ 25 kae neʼe ina filifili ke gaohi koviʼi ia ia mo te hahaʼi ʼa te ʼAtua, ʼi hana maʼu te ʼu fakafiafia fakatemi ʼo te agahala, 26 koteʼuhi neʼe maʼuhiga age kia ia te falalainoaʼi ʼo Kilisito ʼi te ʼu koloa ʼo Esipito, he neʼe sio fakamamaʼu ia ki te fakapale. 27 ʼAki tana tui neʼe mavae ʼi Esipito,+ kae neʼe mole mataku ia ki te ita ʼo te hau,+ koteʼuhi neʼe haga faʼa kataki fualoa ohage pe neʼe sio kia Ia ʼae ʼe fakapulipuli.+ 28 ʼAki tana tui, neʼe ina fai te Pasikate pea mo vali te toto ʼi te ʼu kaumatapa, ke mole matehi e te ʼaselo ʼa te ʼAtua ʼanatou ʼuluaki tupu.+

29 ʼAki tanatou tui, neʼe natou fakalaka ʼi te Tai Kula ohage ʼe natou haʼele ʼi he kele moamoa,+ kae ʼi te faiga ʼa te kau Esipito ke natou fakalaka ai, neʼe natou malelemo ai.+

30 ʼAki te tui ʼa te hahaʼi neʼe holo te ʼu kaupa ʼo Seliko, ʼi tanatou ʼosi foli ia te kolo ia ʼaho ʼe fitu.+ 31 ʼAki tana tui, ko Laape te fafine paomutu neʼe mole mate mo natou ʼae neʼe talagataʼa, koteʼuhi neʼe ina tali ʼi te tokalelei te ʼu tagata ʼae neʼe fekauʼi fakafufu moʼo vakaʼi te fenua.+

32 Pea kotea he tahi age meʼa ke au palalau atu ki ai? Koteʼuhi ʼe mole feʼauga anai te temi mo kapau ʼe au haga palalau atu ʼo ʼuhiga mo Seteone,+ mo Palake,+ mo Samisoni,+ mo Sefeteo,+ mo Tavite,+ mo Samuele,+ pea mo te tahi ʼu polofeta. 33 ʼUhi ko tanatou tui, neʼe natou malo ʼi he ʼu puleʼaga,+ mo fakahoko te faitotonu, mo maʼu te ʼu fakapapau,+ mo mapunuʼi te ʼu gutu ʼo te ʼu laione,+ 34 mo matehi te afi,+ mo hao mai te heleta.+ Ko natou ʼae neʼe vaivai neʼe liliu ʼo malolohi,+ mo natou liliu ʼo toʼa ʼi te tau,+ pea mo natou kapu te ʼu kautau ʼae neʼe natou ʼohofi tonatou fenua.+ 35 Pea ko ʼihi fafine neʼe fakatuʼuake ʼonatou kaiga mai te mate,+ kae ko ʼihi tagata neʼe tamateʼi natou koteʼuhi neʼe mole natou tali ke fakaʼateaina natou ʼaki he totogi,* koteʼuhi neʼe natou loto ke natou maʼu ia he fakatuʼuake ʼe lelei age. 36 ʼE moʼoni, ko ʼihi neʼe ʼahiʼahiʼi, mo nukinukiʼi, pea mo huipiʼi, pea neʼe toe seiniʼi+ mo pilisoniʼi.+ 37 Neʼe tuki makaʼi natou,+ neʼe ʼahiʼahiʼi natou, neʼe tuʼusi lua* natou ʼaki te tutuʼu, neʼe matehi natou ʼaki te heleta,+ neʼe natou feoloʼaki mo he ʼu kiliʼi ovi, mo he ʼu kiliʼi tao,+ neʼe natou nonofo ʼi te faigataʼaʼia, mo mamahi,+ pea neʼe gaohi koviʼi natou,+ 38 pea neʼe mole tuha te malamanei mo natou. Neʼe natou feoloʼaki ʼi te ʼu toafa, mo te ʼu moʼuga, mo te ʼu ʼana,+ pea mo te ʼu luo ʼo te kele.

39 Pea ko natou fuli ʼaia, logope la neʼe natou maʼu te fakamoʼoni mai te ʼAtua ʼe ina leleiʼia ia natou ʼuhi ko tanatou tui, kae neʼe mole hoko te ʼu fakapapau ʼi tonatou temi, 40 koteʼuhi neʼe kua manatu te ʼAtua ke ina foaki mai kia tatou he meʼa ʼe lelei age,+ ke mole feala ai ke natou liliu ʼo haohaoa ʼi tuʼa atu ia tatou.

12 Koia ʼuhi ʼae ʼe ʼa takatakai tatou e te kau fakamoʼoni ʼaia ohage ko he ʼao lahi, tou toe liʼaki foki mo tatou ia meʼa mamafa fuli mo te agahala ʼae ʼe ina taʼofi gafua tatou,+ pea mo tou faʼa kataki ʼi te lele ʼae neʼe tuku mai ki ʼotatou muʼa,+ 2 ʼo tou sioʼi fakamamaʼu ia Sesu, ʼae ʼe Ina takitaki tatatou tui pea mo Ina fakakatoa.+ ʼUhi ko te fiafia ʼae neʼe tuku ki ʼona muʼa, neʼe ina katakiʼi he pou fakamamahi,* ʼo ina meʼa noaʼi te ufiufi, pea kua heka leva ʼi te toʼomataʼu ʼo te hekaʼaga fakahau ʼo te ʼAtua.+ 3 Koia kotou tokagaʼi lelei ia ia ʼae neʼe ina katakiʼi te ʼu palalau fakafeagai mai te kau agahala+ ʼo fua kovi pe kia natou totonu, ke mole kotou gaʼegagaʼe ai pea mo lotovaivai.+

4 Neʼe kotou tauʼi te agahala, kae neʼe heʼeki kotou tauʼi ʼo kotou mamate ai. 5 Pea neʼe kotou galoʼi katoa te tokoni ʼaeni neʼe fai atu kia koutou ʼi tokotou ʼuhiga foha: “Siʼoku foha, ʼaua naʼa ke meʼa noaʼi tou akonakiʼi e Sehova,* peʼe ke lotovaivai moka ina fakatonutonuʼi koe, 6 koteʼuhi ʼe akonakiʼi e Sehova* ia natou ʼae ʼe ʼofa ai, pea ʼe ina ta* ia natou fuli ʼae ʼe ina tali ohage ko ʼona foha.”+

7 Kotou katakiʼi ʼokotou mamahi pea mo kotou fakaʼuhiga te faʼahi ʼaia ohage ko hokotou akonakiʼi.* Ki te ʼAtua ko koutou ko ʼona foha.+ Pea ko ai koa te foha ʼae ʼe mole akonakiʼi e tana tamai?+ 8 Kae kapau ʼe mole akonakiʼi koutou, pea ko koutou ko he ʼu fanau taka, kae ʼe mole ko ʼona foha moʼoni. 9 Pea tahi ʼae, neʼe ko te agamahani ʼo ʼatatou tamai fakakelekele tanatou akonakiʼi tatou, pea neʼe tou fakaʼapaʼapa kia natou. ʼE mole tonu koa la ke lahi age tatatou fakalogo ki te Tamai ʼo totatou maʼuli fakalaumalie pea mo tou maʼuʼuli ai?+ 10 He neʼe natou akonakiʼi tatou ki he kiʼi temi nounou ʼo mulimuli ki te meʼa ʼae neʼe lelei maʼa natou. Kae ko tatatou Tamai ʼae ʼe ʼi selo ʼe ina akonakiʼi tuʼumaʼu tatou ke fua lelei kia tatou, ke feala ai ke tou liliu ʼo maʼoniʼoni ohage ko ia.+ 11 ʼE moʼoni, ʼe mole tou fiafia moka akonakiʼi tatou, kae ʼe tou lotomamahi ai, kae ki muli age leva, ʼe ina foaki te tokalelei pea mo te faitotonu kia natou ʼae neʼe akoʼi ʼaki.

12 Koia kotou fakamalohiʼi te ʼu nima ʼae kua vaivai pea mo te ʼu tuli ʼae kua gaʼegaʼe,+ 13 pea kotou haga haʼele ʼi te ala ʼae ʼe totonu,+ ke ʼaua naʼa kovi age ia ia ʼae ʼe ketu, kae ke malolo ai. 14 Kotou haga kumi te tokalelei mo te hahaʼi fuli+ pea mo te maʼoniʼoni,+ koteʼuhi kapau ʼe mole maʼoniʼoni he tahi, ʼe mole feala anai ia ke sio ki te ʼAliki. 15 Kotou tokakaga fakalelei naʼa ʼi ai he tahi ʼe mole ina maʼu te ʼofa makehe ʼo te ʼAtua, ke ʼaua naʼa homo he aka ʼe kona ʼe fakatupu maveuveu pea mo ʼulihi ai te tokolahi.+ 16 Pea kotou tokakaga naʼa ʼi ai he tahi ia koutou ʼe ina fai he ʼu felaveʼi fakasino heʼe ʼaoga,* pea mo he tahi ʼe ina meʼa noaʼi te ʼu meʼa taputapu, ohage ko Esau, ʼae neʼe ina fetogi tona ʼuhiga ʼuluaki tupu ʼaki he pa meʼa kai ʼe tahi.+ 17 Koteʼuhi ʼe kotou iloʼi ki muli age ʼi tana loto ʼae ke ina maʼu te tapuakina, neʼe liʼakina ia ia. ʼAki he ʼu loʼimata neʼe faiga fakamalotoloto ke fetogi te tonu,*+ kae neʼe mole hona fua.

18 Koteʼuhi neʼe mole kotou fakaovi ki he meʼa ʼe feala ke kotou fāfā ki ai,+ neʼe kakaha,+ pea neʼe ʼi ai he ʼao fakapoʼuli, mo he fakapoʼuli gaogao, mo he afā,+ 19 mo te pupuhi ʼo te fakatagi pupuhi,+ pea mo te leʼo ʼe palalau.+ ʼI te logo ki ai ʼa te hahaʼi, neʼe natou kole mamahi age ke ʼaua naʼa hoko atu te palalau age kia natou.+ 20 Koteʼuhi neʼe natou matataku ʼi te fakatotonu ʼaeni: “Tatau aipe pe ʼe lave he manu ki te moʼuga, ʼe tonu ke taumakaʼi.”+ 21 Pea ʼi te fakamataku ʼo te ʼu meʼa ʼaia neʼe hoko, neʼe ui e Moisese: “ ʼE au mataku pea mo tekelili.”+ 22 Kae neʼe kotou fakaovi ki te Moʼuga ʼo Sione+ pea mo te kolo ʼo te ʼAtua maʼuli, ʼae ʼe ko te Selusalemi ʼi selo,+ pea mo te ʼu lauʼi miliate* kau ʼaselo 23 ʼae kua fakatahitahi.+ Neʼe kotou fakaovi ki te kokelekasio ʼo te kau ʼuluaki tupu ʼae kua tohi ʼonatou higoa ʼi selo, pea mo te ʼAtua te Tuʼi Fakamau ʼo te hahaʼi fuli,+ pea mo te ʼu maʼuli fakalaumalie+ ʼo te kau faitotonu ʼae kua liliu ʼo haohaoa,+ 24 pea mo Sesu te tagata fakafelogoi+ ʼo te fuakava foʼou,+ pea mo te taʼataʼa ʼae neʼe afuhi, ʼae ʼe lelei age ia ʼi te toto ʼo Apele.+

25 Kotou tokakaga naʼa kotou fakafisi ke kotou fakalogo kia* ia ʼae ʼe palalau atu. Koteʼuhi kapau neʼe mole hao ia natou ʼae neʼe mole fakalogo kia ia ʼae neʼe ina fai te fakatokaga fakaʼatua ki te hahaʼi ʼo te kele, pea ʼe mole feala anai ke tou hao mo kapau ʼe tou maliu kehe mai ia ia ʼae ʼe palalau mai te lagi.+ 26 ʼI te temi ʼaia neʼe luluʼi e tona leʼo ia te kele,+ kae ʼi te temi nei neʼe ina fakapapau: “ ʼE au toe luluʼi anai te kele ʼo feia mo te lagi.”+ 27 Ko te ui ʼae “ ʼE au toe luluʼi anai” ʼe fakaha ai ʼe pulihi anai e te ʼAtua te ʼu meʼa ʼae neʼe luluʼi, te ʼu meʼa ʼaia neʼe mole ina fakatupu, ke feala ai ke tuʼu maʼu te ʼu meʼa ʼae neʼe mole luluʼi. 28 Koia ʼuhi ʼae ʼe tonu ke foaki mai he Puleʼaga ʼe mole feala ke luluʼi, tou hoko atu tatatou maʼu te ʼofa makehe, ke feala ai hatatou momoli he tauhi taputapu ʼe tali leleiʼi e te ʼAtua ʼaki he manavasiʼi pea mo he fakaʼapaʼapa. 29 He ʼe ko totatou ʼAtua ʼe ko he afi kakaha.+

13 Ke kotou haga fakaha ia te ʼofa fakatautehina.+ 2 ʼAua naʼa kotou galoʼi te tali kaiga,*+ he ʼe ko ʼihi, ʼi tanatou fai te faʼahi ʼaia neʼe natou fakaʼapi te ʼu ʼaselo kae neʼe mole natou iloʼi.+ 3 Kotou manatuʼi ia natou ʼae ʼe pilisoni,*+ ohage pe ʼe pilisoniʼi koutou mo natou,+ pea mo natou ʼae ʼe gaohi koviʼi, koteʼuhi ʼe kei kotou maʼuʼuli foki mo koutou ʼi te kele.* 4 Ke fakaʼapaʼapaʼi e te hahaʼi fuli ia te nofo ʼohoana, pea ke ʼaua naʼa ʼulihi ia te moeʼaga fakataumatuʼa,+ koteʼuhi ʼe fakamauʼi anai e te ʼAtua ia te hahaʼi ʼae ʼe natou fai he ʼu felaveʼi fakasino heʼe ʼaoga* pea mo te kau tono.+ 5 ʼAua naʼa kotou manako ki te paʼaga,+ kae ke kotou fakafeʼauga pe ʼi te ʼu meʼa ʼae ʼe kotou maʼu.+ Koteʼuhi neʼe ina ui: “ ʼE mole au tuku anai koe ʼi he temi, pea ʼe mole au liʼaki anai koe ʼi he temi.”+ 6 Koia ʼe tou falala ai pea mo ui: “Ko Sehova* ʼe ko toku haofakiʼaga. ʼE mole au mataku anai. Kotea ʼae ʼe feala ke fai mai e te tagata?”+

7 Kotou manatuʼi ia natou ʼae ʼe natou takitaki koutou,+ ʼae neʼe natou akoʼi atu te folafola ʼa te ʼAtua, pea ʼi takotou tokagaʼi te ʼu fua lelei ʼo tanatou aga, kotou faʼifaʼitakiʼi tanatou tui.+

8 ʼE heʼeki fetogi ia Sesu Kilisito* talu mai ʼanafi ʼo kaku mai ki te ʼaho nei, pea ʼo talu ai.

9 ʼAua naʼa fakahehe koutou ʼaki te ʼu akonaki kehekehe pea mo matafaikehe, he ʼe lelei age ke fakamalohiʼi te loto ʼaki te ʼofa makehe kae mole ʼaki he ʼu meʼa kai.* Ko natou ʼae ʼe natou fakamaʼuhigaʼi fau te meʼa kai ʼe mole fua lelei ia kia natou.+

10 ʼE ʼi ai totatou ʼaletale. Kae ko natou ʼae ʼe natou fai he tauhi taputapu ʼi te fale la, ʼe mole fakagafua age ke natou kai te meʼa ʼae ʼe hili ai.+ 11 Koteʼuhi ʼe ʼave e te pelepitelo lahi te toto ʼo te ʼu manu ki te Potu Taputapu ʼAupito ohage ko he molaga ʼo te agahala. Pea ko te ʼu sino ʼo te ʼu manu ʼaia ʼe tutu ia ʼi tuʼa atu ʼo te nofoʼaga.+ 12 Koia neʼe toe mamahi foki mo Sesu ʼi tuʼa atu ʼo te matapa ʼo te kolo+ moʼo fakamaʼoniʼoniʼi te hahaʼi ʼaki tona taʼataʼa.+ 13 Tou olo kia te ia ʼi tuʼa atu ʼo te nofoʼaga, ʼo fua te ufiufi ʼae neʼe ina fua,+ 14 he ʼe mole tou maʼu he kolo ʼi heni ʼe tuʼu maʼu, kae ʼe tou kumi fakamalotoloto te kolo ʼae ka fakatuʼu ʼi te ka haʼu.+ 15 ʼAki ia Sesu, tou momoli tuʼumaʼu ki te ʼAtua he sakilifisio fakavikiviki,+ ko tona fakaʼuhiga, te fua ʼo ʼotatou laugutu+ ʼae ʼe tou tala ai ia muʼa ʼo te hahaʼi tona huafa.+ 16 Pea tahi ʼae, ʼaua naʼa galo kia koutou te fai ʼo te meʼa ʼae ʼe lelei pea mo vaevae mo ʼihi te meʼa ʼae ʼe kotou maʼu,+ he ʼe leleiʼia e te ʼAtua te taʼi ʼu sakilifisio ʼaia.+

17 Kotou fakalogo kia natou ʼae ʼe natou takitaki koutou+ pea mo kotou talagafua,+ he ʼe natou haga tokakaga kia koutou* pea ʼe fakamauʼi anai natou e te ʼAtua ʼo mulimuli ki ʼanatou gaue.+ Kapau ʼe kotou fai feia, ʼe natou fai anai tanatou gaue ʼaia ʼi te fiafia kae mole ʼi te lotomamahi, ke mole fua kovi ai kia koutou.

18 Kotou haga faikole maʼa matou, he ʼe matou tui papau ʼe matou maʼu he leʼo ʼo loto ʼe maʼa,* pea ʼe matou loto ke matou aga fakahagatonu ia meʼa fuli.+ 19 Kae ʼe au fakalotomalohiʼi tafito koutou ke kotou faikole ke feala haku alu vave atu.

20 ʼOfa pe ki te ʼAtua ʼo te tokalelei, ʼae neʼe ina fakatuʼuake mai te kau mate te tagata tauhi ovi lahi,+ totatou ʼAliki ko Sesu, ʼaki te taʼataʼa ʼo he fuakava heʼe gata, 21 ke ina foaki atu ia meʼa lelei fuli moʼo fai tona finegalo. ʼAki ia Sesu Kilisito, ʼe ina uga tatou ke tou fai te meʼa ʼae ʼe ina leleiʼia. Ke fakakololiaʼi ia te ʼAtua ʼo talu ai. Ameni.

22 Pea ʼe au kole atu, ʼu tehina, ke kotou tali mo he kataki te ʼu palalau fakalotomalohi ʼaeni, he neʼe au faitohi fakanounou atu pe. 23 ʼE au fia fakaha atu kua fakaʼateainaʼi totatou tehina ko Timoteo. Kapau ʼe tau vave mai, ʼe ma olo fakatahi atu anai ʼo fakasiosio koutou.

24 ʼOfa age kia natou fuli ʼae ʼe natou takitaki koutou pea mo te kau maʼoniʼoni fuli. ʼE ʼoʼofa atu te ʼu tehina ʼo Italia+ nei.

25 Ke nofo mo koutou fuli te ʼofa makehe ʼo te ʼAtua.