TE TOHI ʼA SAKOPO

1 Ko au Sakopo,+ ko te kaugana ʼa te ʼAtua pea mo te ʼAliki ko Sesu Kilisito,* ʼe au ʼofa atu ki te ʼu telepi fuli ʼe 12 ʼae ʼe mavetevete ʼi te ʼu koga meʼa kehekehe.

2 ʼOku tehina, kotou fakafiafia moka kotou felaveʼi mo te ʼu ʼahiʼahi kehekehe,+ 3 ʼi takotou iloʼi ʼae ko te ʼahiʼahiʼi ʼaia ʼo takotou tui ʼe tupu mai ai te faʼa kataki.+ 4 Pea kotou tuku ke katoa te gaue ʼo te faʼa kataki ia koutou, ke feala ai ke kotou liliu ʼo katoa pea mo haohaoa ia faʼahi fuli, pea ke mole puli he meʼa ia koutou.+

5 Koia kapau ʼe ʼi ai he tahi ia koutou ʼe ʼaoga ki ai te poto, ke ina haga kole ki te ʼAtua,+ pea ʼe foaki age anai ki ai,+ koteʼuhi ʼe foaki lahi e te ʼAtua ki te hahaʼi fuli ʼaki tona loto katoa pea ʼe mole ina fai he valoki.+ 6 Kae ke ina haga kole ʼaki te tui,+ ʼo mole lotolotolua ʼi he meʼa,+ koteʼuhi ko ia ʼae ʼe lotolotolua ʼe hage ko he peau ʼo te tai ʼe feʼaveʼaki e te matagi. 7 Koia ke ʼaua naʼa ʼamanaki te tagata ʼaia ʼe ina maʼu anai he meʼa mai ia Sehova,* 8 ʼe ko he tagata lotolotolua ia,+ pea ʼe fetogi tuʼumaʼu pe tana aga.

9 Kae ke fakafiafia* te tehina ʼae ʼe malalo ʼi tona hikihiki,+ 10 pea ko te tagata maʼu koloa ʼi tona kua fakamalaloʼi ia ia.+ Koteʼuhi ko te tagata maʼu koloa ʼe pulihi anai ia ohage ko he fisiʼi teu ʼi te vao. 11 Ohage pe ko te hopo ake ʼa te laʼa mo te kovi ʼo te vevela ʼo moamoa ai te vao, pea to te fisiʼi teu ʼo puli ai tona matalelei, ʼo toe feia pe, ʼe pulihi anai te tagata maʼu koloa ʼi tana lolotoga kumi koloa.+

12 Fiafia te tagata ʼae ʼe haga kataki ʼi te ʼahiʼahi,+ koteʼuhi ʼi tona kua leleiʼia e te ʼAtua, ʼe foaki anai ki ai te pale ʼo te maʼuli,+ ʼae neʼe fakapapauʼi e Sehova* kia natou ʼae ʼe haga ʼoʼofa kia te Ia.+ 13 Moka ʼahiʼahiʼi he tahi, ʼaua naʼa ina ui: “ ʼE lolotoga ʼahiʼahiʼi au e te ʼAtua.” Koteʼuhi ʼe mole feala ke ʼahiʼahiʼi te ʼAtua ʼaki he ʼu meʼa ʼe kovi, pea ʼe mole ina ʼahiʼahiʼi he tahi ʼaki he ʼu meʼa ʼe kovi. 14 Kae ʼe ʼahiʼahiʼi te tagata takitokotahi moka ina tuku tona holi totonu ke ina taki pea mo fakahalaʼi ia ia.*+ 15 Pea ka fafaga* te holi, ʼe ina fakatupu te agahala, pea ka fakahoko te agahala, ʼe ina fanauʼi te mate.+

16 ʼAua naʼa kotou faihala, ʼoku tehina ʼofaina. 17 Ko te ʼu meʼa ʼofa lelei fuli mo haohaoa ʼe haʼu mai ʼoluga,+ ʼe hifo mai te Tamai ʼo te ʼu malama ʼae ʼe ʼi selo,+ ia ia ʼae ʼe mole fetogi ohage ko te fetogi ʼo te malumalu.+ 18 Neʼe ko tona finegalo ke ina fakatupu tatou ʼaki te folafola moʼoni,+ ke feala ke tou liliu, ʼi hona faʼahiga aluʼaga, ko he ʼu ʼuluaki fua ʼo te malamanei.+

19 Ke kotou iloʼi te faʼahi ʼaeni, ʼoku tehina ʼofaina: ʼE tonu ki te tagata fuli ke lotolelei ʼo fagono, ke tuai ʼi te palalau,+ mo tuai ʼi te ita,+ 20 koteʼuhi ʼe mole fakahoko e te ita ʼo te tagata te faitotonu ʼa te ʼAtua.+ 21 Koia kotou liʼaki te ʼu meʼa ʼuli fuli pea mo te ʼu agakovi fuli,+ kae kotou tali ʼaki he agamalū te folafola ʼae ʼe to e te ʼAtua ki ʼokotou loto, ʼae ʼe feala ke haofaki ai koutou.*

22 Koia ke kotou maʼuliʼi te folafola+ kae ke mole kotou fagono pe ki ai, ʼo kotou kakaʼi pe ia koutou totonu ʼaki ni manatu hala. 23 Koteʼuhi kapau ʼe fagono he tahi ki te folafola kae mole ina maʼuliʼi,+ ʼe hage ia ko he tagata ʼe sio ki tona fofoga ʼi he sioʼata. 24 He ʼe sio ia kia ia, pea ka alu ia ʼe ina galoʼi atu aipe pe ʼe ko te faʼahiga tagata feafeaʼi ia ia. 25 Kae ko ia ʼae ʼe sio loloto ki te lao haohaoa+ ʼae ʼe ina taki ki te ʼateaina, pea mo ina maʼuliʼi, ʼe mole liliu ia ko he tahi ʼe fagono mo lotogalogalo, kae ko he tahi ʼe ina maʼuliʼi te folafola, pea ʼe fiafia anai ʼi te ʼu meʼa ʼae ʼe ina fai.+

26 Koia kapau ʼe ui e he tagata ʼe tauhi ki te ʼAtua* kae ʼe mole ina puleʼi tona ʼalelo,+ ʼe ina kakaʼi tona loto totonu, pea ʼe mole he ʼaoga ʼo tana tauhi. 27 Koʼeni te manatu ʼo totatou ʼAtua pea mo Tamai ʼo ʼuhiga mo te faʼahiga tauhi* ʼae ʼe maʼa pea mo heʼe mele: ke tokaga kia natou ʼae ʼe hala mo tamai pea mo faʼe+ pea mo te kau vitua+ ʼae ʼe mamahi,+ pea mo fakamamaʼo mai te ʼu aga ʼuli ʼo te malamanei.+

2 ʼOku tehina, ʼe lava feafeaʼi hakotou tui ki totatou ʼAliki ʼo te kololia ko Sesu Kilisito* kae ʼe kotou aga fakapalatahi?+ 2 Ohage la, ʼe haʼu he tagata ki takotou fono mo hona ʼu mama aulo pea mo hona kofu matalelei, pea ʼe toe hu mai mo he tagata masiva ʼe ʼuli tona kofu. 3 ʼE kotou fakamaʼuhigaʼi anai koa ia ia ʼae ʼe kofu matalelei ʼo kotou ui age ki ai: “Heka koe ʼi heni ʼi te nofoʼaga lelei”? Pea ʼe kotou ui age anai koa kia ia ʼae ʼe masiva: “Tuʼu koe,” peʼe “Heka koe ʼi hena ʼo ovi ki toku hiliʼaga vaʼe”?+ 4 Kapau koia, ʼe mole kotou aga fakapalatahi koa la ia koutou,+ pea ʼe mole kotou liliu koa ko he ʼu tuʼi fakamau ʼe natou fai he ʼu tonu agakovi?+

5 ʼOku tehina ʼofaina, kotou fagono mai. Neʼe mole filifili koa la e te ʼAtua ia natou ʼae ʼe masisiva ʼi te manatu ʼa te malamanei, ke natou maʼu he tui ʼe lahi+ pea mo maʼu te Puleʼaga ohage ko he tofiʼa, ʼae neʼe ina fakapapauʼi kia natou ʼae ʼe ʼoʼofa kia te ia?+ 6 Kae ʼe kotou fakalainoaʼi te tagata masiva. ʼE mole koa la ko te hahaʼi maʼu koloa ʼae ʼe natou fakamamahiʼi koutou+ pea mo taki koutou ki te ʼu fakamauʼaga? 7 ʼE mole natou laukoviʼi koa la te higoa lelei ʼae neʼe foaki atu? 8 Kapau leva ʼe kotou fakahoko te lao fakahau ʼo mulimuli ki te vaega ʼaeni ʼo te ʼu Tohi Taputapu: “ ʼE tonu ke ke ʼofa ki tou tatau ohage pe ko koe totonu,”+ pea ʼe lelei. 9 Kae kapau ʼe hoko atu takotou aga fakapalatahi,+ ʼe kotou agahala ai, pea ʼe fakaha lelei* e te lao ko koutou ko he kau talagataʼa.+

10 Koteʼuhi kapau ʼe fakalogo he tahi ki te Lao katoa kae ʼe lakahala ʼi he fakatotonu pe ʼe tahi, kua lakahala ia ki te Lao katoa.+ 11 Koteʼuhi ko ia ʼae neʼe ina ui: “ ʼE mole tonu ke ke tono,”+ neʼe ina toe ui: “ ʼE mole tonu ke ke faifakapo.”+ Koia kapau ʼe mole ke tono kae ʼe ke faifakapo, kua ke talagataʼa ki te lao. 12 Kotou haga palalau mo maʼuli ohage ko ni tagata ka fakamauʼi anai e te lao ʼo te ʼateaina.+ 13 Koteʼuhi ʼe mole fai anai te fakamau ʼaki te manavaʼofa kia ia ʼae ʼe mole manavaʼofa.+ ʼE malo te manavaʼofa ʼi te fakamau.

14 ʼOku tehina, kotea tona ʼaoga mo kapau ʼe ui e he tahi ʼe tui kae ʼe mole ina fakaha ʼaki hana ʼu gaue?+ Ko te tui ʼaia ʼe mole feala ke ina haofaki ia ia.+ 15 Kapau ʼe masiva ni tehina peʼe ko ni tuagaʼane ʼi te meʼa laofi pea ʼe mole feʼauga tanatou meʼa kai ʼi te ʼaho fuli, 16 pea ʼe ui age e he tahi ia koutou: “Olo ʼi te fimalie. ʼE au fakaʼamu pe ʼe kotou maʼu anai hokotou meʼa laofi pea mo hakotou meʼa kai feʼauga,” kae ʼe mole kotou ʼavage kia natou te meʼa ʼae ʼe ʼaoga ki tonatou maʼuli, ʼe kotea koa tona ʼaoga?+ 17 Koia, ʼo toe feia pe mo te tui, kapau ʼe mole fakaha ʼaki he ʼu gaue, ʼe mate ia.+

18 Kae ʼe ui anai e he tahi: “ ʼE ke maʼu koe te tui, kae ʼe au fai au te ʼu gaue. ʼE lava feafeaʼi hau fakaha mai tau tui mo kapau ʼe mole ke fai hau ʼu gaue lelei? ʼE au fakaha atu anai taku tui ʼaki te ʼu gaue lelei ʼae ʼe au fai.” 19 ʼE ke tui ʼe ʼi ai te ʼAtua pe ʼe tahi, pea ʼe lelei. Maʼia mo te kau temonio ʼe natou tui ki ai pea mo matataku.*+ 20 Kae ʼe ke fia iloʼi koa, tagata vale, ko te tui ʼae ʼe mole fakaha ʼaki he ʼu gaue ʼe mole hona ʼaoga? 21 Neʼe mole faitotonu koa la ia Apalahamo tatatou tamai ia muʼa ʼo te ʼAtua ʼuhi ko ʼana gaue? ʼEi, neʼe faitotonu ia muʼa ʼo te ʼAtua ʼi tana ʼosi hili ia Isaake tona foha ki te ʼaletale.+ 22 ʼE ke sio ai neʼe ina fakaha tana tui fakatahi mo ʼana gaue pea neʼe liliu tana tui ʼo haohaoa ʼaki ʼana gaue.+ 23 Koia neʼe fakahoko te vaega ʼaeni ʼo te ʼu Tohi Taputapu: “Neʼe tui ia Apalahamo kia Sehova,* koia neʼe faitotonu ai ia muʼa ʼo te ʼAtua,”+ pea neʼe fakahigoaʼi ko te kaumeʼa ʼo Sehova.*+

24 ʼE kotou sisio ai ʼe faitotonu anai he tagata ia muʼa ʼo te ʼAtua ʼaki ʼana gaue kae mole gata ʼaki pe tana tui. 25 ʼO toe feia aipe, neʼe mole faitotonu koa la ia Laape te fafine paomutu, ia muʼa ʼo te ʼAtua ʼaki ʼana gaue, ʼi tana ʼosi tali leleiʼi te ʼu tagata ʼave logo pea mo ina fakamavae naua ʼi he tahi age ala?+ 26 Koia ohage pe ko te sino, kapau ʼe mole manava* ʼe mate ia,+ ʼo toe feia pe mo te tui, kapau ʼe mole fakaha ʼaki he ʼu gaue, ʼe mate ia.+

3 ʼOku tehina, ʼaua naʼa hahaʼi he kau faiako ia koutou, he ʼe kotou iloʼi ʼe mamafa age anai totatou fakamauʼi.+ 2 He ʼe lahi te ʼu lakaga ʼe tou lakahala* fuli ai.+ Kapau ʼe mole lakahala he tahi ʼi hana palalau, ʼe ko he tagata haohaoa ia, ʼe feala ke ina toe puleʼi mo tona sino katoa. 3 Kapau ʼe tou ʼai he fakagutu ki te ʼu hosi ke natou fakalogo mai kia tatou, pea ʼe tou toe taki mo ʼonatou sino katoa. 4 Kotou toe tokagaʼi mo te ʼu vaka: Logope la tonatou lalahi pea mo tonatou ʼave e te ʼu matagi malohi, kae ʼe taki natou e te kiʼi foe veliveli ki te potu ʼae ʼe fia alu ki ai te tagata ʼae ʼe ina puke te foe.

5 Koia, ʼo toe feia pe, ko te ʼalelo ʼe ko he kiʼi koga ia ʼo te sino, kae ʼe lahi tana laupisi. Kotou tokagaʼi pe ʼe lava feafeaʼi ki he kiʼi afi hana tutu he toe vao matuʼa lahi. 6 Pea ko te ʼalelo ʼe toe hage ko he afi.+ ʼE ko he koga ʼo te sino ʼe ina fai te kovi pea ʼe ina ʼulihi te sino katoa.+ ʼE ina tutu te maʼuli ʼo he tahi ʼaki te afi ʼae ʼe haʼu mai te Seʼeni.* 7 Koteʼuhi ko te faʼahiga manu fekai fuli, mo te ʼu manulele fuli, mo te ʼu manu totolo fuli, mo te ʼu manu fuli ʼo te tai ʼe feala ke fakalalata pea kua fakalalata e te tagata. 8 Kae ʼe mole he tagata ʼe feala ke ina puleʼi te ʼalelo. ʼE mole feala hona taʼofi, ʼe agakovi, mo fonu ʼi te kafokona ʼe fakatupu mate.+ 9 ʼAki te ʼalelo ʼe tou vikiʼi ia Sehova,* te Tamai, pea ʼe tou toe faitutuku ʼaki ki te tagata ʼae neʼe fakatupu “ki te pāki ʼo te ʼAtua.”+ 10 ʼE haʼu mai te gutu ʼe tahi te tapuakina pea mo te faitutuku.

ʼOku tehina, ʼe mole tonu ke hoko te ʼu meʼa ʼaia.+ 11 ʼE feala koa ke mapuna mai te vai malie mo te vai kona mai he matapuna vai ʼe tahi? 12 ʼOku tehina, ʼe feala koa ki he fuʼu fiku ke fua mai ko he ʼu foʼi oliveto, peʼe ki he fuʼu vite ke fua mai ko he ʼu foʼi fiku?+ Pea ʼe mole toe feala foki ke haʼu he vai malie mai he matapuna vai kona.

13 Ko ai koa ʼae ʼe poto mo ʼatamai ia koutou? Ke ina fakaha te faʼahi ʼaia ʼaki hana aga ʼe lelei pea mo he ʼu gaue ʼe ina fai ʼaki te agamalū ʼae ʼe haʼu mai te poto. 14 Kae kapau ʼe maʼu ʼi ʼokotou loto he maheka+ pea mo he lotofakafifihi,*+ ʼaua naʼa kotou laupisi+ pea mo kotou loi ki te moʼoni. 15 Ko te poto ʼaia ʼe mole haʼu ia mai ʼoluga. Kae ʼe fakakelekele,+ mo fakakakano, pea mo fakatemonio. 16 Koteʼuhi ka maʼu e he tahi te maheka mo te lotofakafifihi,* ʼe hoko ai te maveuveu pea mo te ʼu meʼa kovi fuli.+

17 Kae ko te poto ʼae mai ʼoluga, ʼuluaki ʼe maʼa,+ pea tokalelei,+ mo aga fakapotopoto,+ mo fakalogo ʼaki he lotolelei, mo fonu ʼi te manavaʼofa pea mo te ʼu fua lelei,+ ʼe mole fakapalatahi,+ pea ʼe mole malualoi.+ 18 Pea tahi ʼae, ko te fua ʼo te faitotonu ʼe nunusi ʼi te tokalelei+ maʼa* natou ʼae ʼe natou kumi te tokalelei.+

4 Kotea koa te tupuʼaga ʼo te ʼu fihi pea mo te ʼu kē ʼae ia koutou? ʼE mole tupu koa la mai te ʼu holi ʼo te kakano ʼae ʼe fetauʼaki moʼo puleʼi ʼokotou sino?*+ 2 ʼE kotou holi ki he meʼa, kae ʼe mole kotou maʼu. ʼE kotou haga faifakapo pea mo manumanū, kae ʼe mole feala ke kotou maʼu. ʼE hoko atu pe takotou kē mo takotou fihi.+ ʼE mole kotou maʼu koteʼuhi ʼe mole kotou kole ki te ʼAtua. 3 Pea ka kotou kole, ʼe mole kotou maʼu koteʼuhi ʼe kotou kole ʼaki he fakatuʼutuʼu kovi, he ʼe kotou loto ke kotou fakaʼaogaʼi te ʼu meʼa ʼaia moʼo fakahoko te ʼu holi ʼo te kakano.

4 Hahaʼi heʼe agatonu,* ʼe mole kotou iloʼi koa la kapau ʼe kotou fakakaumeʼa mo te malamanei ʼe kotou liliu ai ko he ʼu fili ʼo te ʼAtua? Koia, ko ʼae ʼe fia kaumeʼa mo te malamanei ʼe liliu ia ko he fili ʼo te ʼAtua.+ 5 Peʼe manatu koa koutou ʼe mole he ʼuhiga ʼo te ui ʼi te vaega ʼo te ʼu Tohi Taputapu: “ ʼE uga tatou e totatou loto ke tou manumanū ʼo tupu ai tatatou holi malohi ki he ʼu meʼa kehekehe”?+ 6 Kae, ko te ʼofa makehe ʼae ʼe Ina foaki, ʼe lahi age ia. Koia ʼe ui ʼi te ʼu Tohi Taputapu: “ ʼE mole leleiʼia e te ʼAtua te kau fialahi,+ kae ʼe ina fakaha te ʼofa makehe ki te kau agavaivai.”+

7 Koia, kotou fakalogo ki te ʼAtua,+ kae kotou fakafeagai ki te Tevolo,+ pea ʼe hola mamaʼo anai mai ia koutou.+ 8 Kotou fakaovi ki te ʼAtua, pea ʼe fakaovi atu anai kia koutou.+ Kotou fakamaʼa ʼokotou nima, kau agahala,+ pea mo ʼokotou loto,+ hahaʼi lotolotolua. 9 Kotou lotomamahi, mo putu, pea mo fetagihi.+ Ke liliu takotou kata ko he putu, pea mo takotou fiafia ko he lotomamahi. 10 Kotou fakamalalo ia muʼa ʼo Sehova,*+ pea ʼe ina hikihiki anai koutou.+

11 ʼU tehina, tuku takotou fepalalaukoviʼaki.+ He ʼe ko ia ʼae ʼe palalau kovi ʼo ʼuhiga mo he tehina peʼe ina fakamauʼi hona tehina, ʼe palalau kovi ia ʼo ʼuhiga mo te lao pea ʼe ina fakamauʼi te lao. Kapau leva ʼe ke fakamauʼi te lao, ʼe ko koe ko he tuʼi fakamau, kae ʼe mole kei ke maʼuliʼi te lao. 12 ʼE ko te tokotahi pe ʼae ʼe Ina fai te ʼu lao pea mo Tuʼi Fakamau,+ ia ia ʼae ʼe feala ke ina haofaki pea mo fakaʼauha.+ Kae ko ai koa ia koe ke ke fakamauʼi tou tatau?+

13 Kotou fagono mai, ia koutou ʼae ʼe kotou ui: “ ʼI te ʼaho nei peʼe ko apogipogi ʼe matou olo anai ki te kolo ʼae, ʼo nonofo ai ʼi he taʼu katoa, pea ʼe matou faikoloa anai pea mo maʼu paʼaga,”+ 14 kae ʼe mole kotou iloʼi pe ʼe feafeaʼi anai tokotou maʼuli apogipogi.+ Koteʼuhi ʼe kotou hage ko he hahau ʼe ha ʼi he kiʼi temi pea puli leva ia.+ 15 Kae ʼe tonu ke kotou ui: “Kapau ʼe loto ki ai ia Sehova,*+ ʼe tou maʼuʼuli anai pea ʼe tou fai anai te meʼa ʼaeni peʼe ko te meʼa ʼae.” 16 Kae ʼi te temi nei ʼe kotou fiameʼameʼa pea ʼe kotou laupisiʼi pe ia koutou totonu. Ko te faʼahiga laupisi ʼaia ʼe kovi. 17 Koia, kapau ʼe iloʼi e he tahi te fai ʼo te meʼa ʼae ʼe lelei kae ʼe mole ina fai, ʼe agahala ia.+

5 Kotou fagono mai, ʼu hahaʼi maʼu koloa, kotou fetagihi mo lauga ʼo ʼuhiga mo te ʼu malaʼia ʼae ka hoko mai kia koutou.+ 2 Kua popo ʼokotou koloa, pea kua kai e te ʼu kiʼi manu ʼokotou mutuʼi meʼa.+ 3 Kua ukaukamea ʼakotou aulo mo ʼakotou siliva, pea ko tonatou ukaukamea ʼaia ʼe fakaha ai anai takotou hala pea ʼe ina kai anai ʼokotou kakano. Ko te ʼu meʼa ʼae neʼe kotou tanaki ʼe hage anai ko he afi ʼi te ʼu ʼaho fakamuli.+ 4 Koʼeni, ʼe haga kalaga te kau gaue ʼae neʼe natou utu ʼakotou gaueʼaga koteʼuhi neʼe mole kotou li age ʼonatou totogi, pea ko te ʼu kole tokoni ʼa te kau gaue tanaki taʼukai kua kaku ki te ʼu taliga ʼo Sehova* ʼo te ʼatu kautau.+ 5 Neʼe kotou maʼuʼuli lelei ʼi te kele pea mo kumi te ʼu meʼa ʼae ʼe lelei kia koutou. Neʼe kotou kakai pea mo kotou liliu ʼo sisino* ohage ko he faga manu ki te ʼaho ʼae ka tamateʼi ai natou.+ 6 Neʼe kotou tauteaʼi mo fakapogi ia te tagata faitotonu. ʼE mole fakafeagai koa la kia koutou?

7 Koia, ʼu tehina, kotou kataki fualoa ʼo kaku ki te ʼi heni* ʼa te ʼAliki.+ Koʼeni, ʼe haga atalitali te tagata gaue kele ki te fua maʼuhiga ʼae ka homo ake mai te kele. ʼE kataki fualoa ʼo kaku ki te to ʼo te ʼua ʼo te temi fakato lau mo te ʼua ʼo te temi mātala ʼo te ʼu fisiʼi ʼakau.+ 8 Pea mo koutou foki, kotou kataki fualoa+ pea mo fakamalohiʼi ʼokotou loto, koteʼuhi kua ovi mai te ʼi heni ʼa te ʼAliki.+

9 ʼU tehina, ʼaua naʼa kotou felaugaʼaki,* ke mole fakamauʼi ai koutou.+ Koʼeni, ʼe tuʼu te Tuʼi Fakamau ia muʼa ʼo te ʼu matapa. 10 ʼU tehina, kotou mulimuli ki te faʼifaʼitaki lelei ʼo te kau polofeta ʼae neʼe natou palalau ʼi te huafa ʼo Sehova,*+ ia tanatou ʼutakiʼi te ʼu mamahi+ pea mo tanatou kataki fualoa.+ 11 Koʼeni, ʼe tou tala ʼe fiafia* ia natou ʼae neʼe faʼa kataki.+ Neʼe kotou logo ki te faʼa kataki ʼa Sopo+ pea, ʼuhi ko te meʼa ʼae neʼe fai e Sehova* maʼa ia,+ neʼe kotou iloʼi ai ko Sehova* ʼe fonu ʼi te ʼofa mamahi pea mo manavaʼofa.+

12 Kae tafito, ʼoku tehina, tuku takotou fai he fakapapau ʼo fakamoʼoni ʼaki te lagi, peʼe ʼaki te kele, peʼe ʼaki he tahi age meʼa. Kae ko takotou “ ʼIo” ke ʼio pea ko takotou “Kailoa” ke kailoa,+ ke ʼaua naʼa fakamauʼi ai koutou.

13 ʼE ʼi ai koa he tahi ia koutou ʼe ina ʼutakiʼi te mamahi? Ke haga faikole ia.+ ʼE ʼi ai koa he tahi ʼe fiafia? Ke ina hiva ni katiko.*+ 14 ʼE ʼi ai koa he tahi ia koutou ʼe mahaki? Ke ina pauʼi mai kia ia te ʼu tagata ʼafeā+ ʼo te kokelekasio, pea ke natou faikole ʼo ʼuhiga mo ia, ʼo tākai lolo+ ia ia ʼi te huafa ʼo Sehova.* 15 Pea ko te faikole ʼae ʼe fai ʼaki te tui ʼe ina fakamalolo anai ia ia ʼae ʼe mahaki,* pea ʼe lagaʼi ake anai ia ia e Sehova.* Pea kapau neʼe ina fai hana ʼu agahala, ʼe fakamolemole anai ki ai.

16 Koia, kotou feveteveteʼaki ʼakotou agahala+ pea mo kotou fefaikoleʼaki, ke kotou malolo ai. Ko te kole mamahi ʼa he tagata faitotonu ʼe malohi.*+ 17 Ko Elia neʼe ko he tagata neʼe tatau te ʼu meʼa ʼae neʼe ina logoʼi mo te ʼu meʼa ʼae ʼe tou logoʼi, kae ʼi tana faikole fakamalotoloto ke mole ʼua, neʼe mole ʼua ai ʼi te fenua ia taʼu ʼe tolu mo mahina ʼe ono.+ 18 Pea neʼe toe faikole, pea neʼe to ai te ʼua mo fua ai te fenua.+

19 ʼOku tehina, kapau ʼe ʼi ai he tahi ia koutou ʼe fakamamaʼo mai te moʼoni pea ʼe fakatafoki mai ia ia e he tahi, 20 ke kotou iloʼi ko ia ʼae ʼe ina fakatafoki mai he tagata agahala mai tana aga ʼae ʼe kovi,+ ʼe ina haofaki anai te maʼuli* ʼo te tagata ʼaia mai te mate, pea ʼe ina ʼuʼufi anai he ʼu tuʼuga agahala.+