TE ʼULUAKI TOHI ʼA PETELO

1 Ko au Petelo, ko te apositolo+ ʼa Sesu Kilisito,* ʼe au faitohi atu kia koutou ʼae ʼe nonofo fakatemi ʼi te malama ʼaeni pea mo mavetevete ʼi te ʼu koga meʼa ʼo Ponito, mo Kalate, mo Kapatosia,+ mo Asia pea mo Pitinia, kia koutou ʼae neʼe filifili 2 ʼo mulimuli ki te meʼa ʼae kua iloʼi fakatomuʼa e te ʼAtua te Tamai.+ Neʼe ina foaki atu kia koutou te laumalie maʼoniʼoni ke kotou maʼoniʼoni,+ mo kotou fakalogo pea ke afuhi koutou ʼaki te taʼataʼa ʼo Sesu Kilisito:+

Ke tuputupu ia koutou te ʼofa makehe ʼo te ʼAtua pea mo te tokalelei.

3 Ke vikiʼi te ʼAtua mo Tamai ʼo totatou ʼAliki ko Sesu Kilisito koteʼuhi, ʼo mulimuli ki tona manavaʼofa lahi, neʼe ina toe fakatupu ake tatou+ ke tou maʼu he ʼamanaki ʼe tologa+ ʼaki te fakatuʼuake ʼo Sesu Kilisito mai te kau mate,+ 4 pea mo maʼu he tofiʼa ʼe mole feala ke popo, mo ʼuli pea mo puli.+ Pea kua taʼofi ia maʼa koutou ʼi selo,+ 5 ia koutou ʼae ʼe taupau e te malohi ʼo te ʼAtua ʼuhi ko takotou tui, ke haofaki ai koutou. ʼE fakaha anai te haofaki ʼaia ʼi te temi fakaʼosi. 6 ʼE kotou fiafia lahi ʼuhi ko te faʼahi ʼaia, logo la ʼe tonu ke kotou mamahi ʼi he kiʼi temi nounou ʼaki ni ʼahiʼahi kehekehe.+ 7 ʼE feala ʼaki te ʼu ʼahiʼahi ʼaia, ke vikiʼi, mo fakakololiaʼi pea mo fakaʼapaʼapaʼi koutou ʼi te ha ʼa Sesu Kilisito,+ ʼuhi ko takotou tui ʼae kua ʼahiʼahiʼi,+ pea mo maʼuhiga ʼaupito age ʼi te aulo ʼae ʼe popo logo la tona fakamaʼa ʼi te afi. 8 Logo la neʼe heʼeki kotou sisio kia te ia, kae ʼe kotou ʼoʼofa kia te ia. Logo la ʼe mole kotou sisio kia te ia ʼi te temi nei, kae ʼe kotou tui kia te ia pea mo fakafiafia lahi ʼi he fiafia ʼe mole feala hona fakafuafua, 9 ʼi takotou kaku ki te ikuʼaga ʼo takotou tui, ʼae ko te haofaki ʼo ʼokotou maʼuli.*+

10 Ko te kau polofeta ʼae neʼe faifakakikite ʼo ʼuhiga mo te ʼofa makehe ʼae ʼe tonu ke fakaha atu kia koutou, neʼe natou faifehuʼi pea mo fai fakalelei ni fekumi ʼo ʼuhiga mo te haofaki ʼaia.+ 11 Neʼe natou faiga ke natou iloʼi te temi ʼae ka hoko ai kia Kilisito te ʼu meʼa ʼae neʼe fakaha age e te laumalie maʼoniʼoni ʼae neʼe ia natou.+ Koteʼuhi neʼe fakamoʼoni fakatomuʼa e te laumalie ʼo ʼuhiga mo te ʼu mamahi ʼae neʼe tonu ke tau mo Kilisito+ pea mo te ʼu meʼa fakakololia ʼae ka hoko ki muli age. 12 Neʼe fakaha age kia natou ʼe mole natou fakakikite maʼa natou totonu kae maʼa koutou. Neʼe natou tohi te ʼu meʼa ʼae kua fakaha atu kia koutou ʼi te temi nei e natou ʼae neʼe natou tala atu te logo lelei ʼaki te laumalie maʼoniʼoni ʼae ʼe haʼu mai selo.+ ʼE ko te ʼu meʼa ʼaia ʼe loto moʼoni e te kau ʼaselo ke natou vakavakaʼi.

13 Koia, kotou teuteuʼi ʼokotou ʼatamai moʼo fakahoko he toe gaue lahi.+ Kotou haga fakaʼaogaʼi katoa ʼokotou fealagia fakakaukau.+ Kotou falala ki te ʼofa makehe ʼae ʼe fakaha atu anai kia koutou moka ha ia Sesu Kilisito. 14 Ohage ko he ʼu fanau fakalogo, tuku takotou mulimuli ki te ʼu holi ʼae neʼe kotou maʼu ʼi te temi muʼa ʼi takotou kei ʼi te fakapoʼuli, 15 kae ke kotou liliu ʼo maʼoniʼoni ʼi takotou aga katoa,+ ohage ko te ʼAtua Maʼoniʼoni ʼae neʼe ina pauʼi koutou, 16 he neʼe tohi: “ ʼE tonu ke kotou maʼoniʼoni, he ʼe au maʼoniʼoni.”+

17 Pea kapau ʼe kotou fetapa ki te Tamai ʼae ʼe mole fakapalatahi ʼi tana fakamauʼi+ te hahaʼi takitokotahi ʼo mulimuli ki ʼanatou gaue, ke ha takotou manavasiʼi ʼi takotou aga+ lolotoga takotou nonofo fakatemi ʼi te malama ʼaeni. 18 Koteʼuhi ʼe kotou iloʼi neʼe mole ko he ʼu meʼa popo, ohage ko te siliva peʼe ko te aulo, ʼae neʼe fakaʼateainaʼi* ai koutou+ mai tokotou faʼahiga maʼuli vaʼiganoa ʼae neʼe tuku holo atu e ʼakotou kui.* 19 Kae neʼe fakaʼateainaʼi koutou ʼaki te taʼataʼa maʼuhiga+ ʼo Kilisito, ʼae ʼe hage ko te toto ʼo he akeno ʼe heʼe mele mo maʼa.+ 20 ʼE moʼoni, neʼe kua filifili* fakatomuʼa ia ia ʼi muʼa ʼo te kamataʼaga ʼo te malamanei,*+ kae neʼe fakaha ia ia ʼi te ʼu temi fakaʼosi, ʼuhi ko koutou.+ 21 ʼAki ia ia, ʼe kotou tui ai ki te ʼAtua,+ ʼae neʼe ina fakatuʼuake ia ia mai te kau mate+ pea mo foaki age te kololia,+ ke kotou tui mo falala ai ki te ʼAtua.

22 ʼI takotou kua fakamaʼa ia koutou* ʼaki takotou fakalogo ki te moʼoni ʼo iku ai ki he ʼofa fakatautehina ʼe mole malualoi,+ ke kotou feʼofamamahiʼaki mo he loto katoa.+ 23 Koteʼuhi neʼe toe fakatupu ake koutou,+ mole ʼaki he pulapula ʼe popo, kae ʼaki he pulapula ʼe heʼe popo,*+ pea mo te folafola ʼa te ʼAtua maʼuli pea mo heʼe gata.+ 24 Koteʼuhi “ ʼe hage te hahaʼi fuli ko te luna, pea ʼe hage tonatou kololia ko te fisiʼi teu ʼo te vao. ʼE moamoa te luna pea to te fisiʼi teu, 25 kae ko te folafola ʼa Sehova* ʼe tuʼu ia ʼo talu ai.”+ Pea ko te “folafola” ʼaia ʼe ko te logo lelei ʼae neʼe tala atu kia koutou.+

2 Koia, kotou liʼaki te ʼu agakovi fuli,+ mo te kaka, mo te malualoi, mo te manumanū pea mo te ʼu fasituʼu fuli. 2 Pea ohage ko he ʼu fanau kei meamea,+ kotou holi ki te huʼa pipi ʼae ʼe haʼu mai te folafola pea ʼe heʼeki huʼi,* ke feala ai hakotou tuputupu pea ke haofaki ai koutou.+ 3 ʼE kotou lava fai anai te faʼahi ʼaia mo kapau kua kotou iloʼi* ko te ʼAliki ʼe agalelei.

4 ʼI takotou fakaovi kia ia, te maka maʼuli ʼae neʼe liʼaki e te tagata+ kae neʼe filifili e te ʼAtua pea ʼe maʼuhiga kia te ia,+ 5 ko koutou, ohage ko he ʼu maka maʼuli, ʼe lolotoga laga koutou ko he fale fakalaumalie+ ke kotou liliu ko he kau pelepitelo maʼoniʼoni, ke kotou momoli ai he ʼu sakilifisio fakalaumalie+ ʼe leleiʼia e te ʼAtua ʼaki ia Sesu Kilisito.*+ 6 Koteʼuhi ʼe ui ʼi te ʼu Tohi Taputapu: “ ʼE au fakatuʼu ʼi Sione he maka neʼe filifili, he maka agele maʼuhiga ʼo te fakatafito, pea ko ʼae ʼe tui ki ai, ʼe mole lotomamahi* anai.”+

7 Koia ʼe maʼuhiga ia ia kia koutou, koteʼuhi ʼe kotou tui. Kae ʼe tohi ʼo ʼuhiga mo natou ʼae ʼe mole tui: ‘Ko te maka ʼae neʼe liʼaki e te kau tufuga,+ kua liliu ko te maka tafito ʼo te agele’*+ 8 pea ʼe ko “he maka fakatupu tukia pea mo he ʼutu ke natou tukia ai.”+ ʼE natou tukia he ʼe natou talagataʼa ki te folafola. Pea ʼe ko tonatou ikuʼaga ʼaia. 9 Kae ko koutou ko “he faʼahiga hahaʼi neʼe filifili, he kau pelepitelo ʼe gaue ohage ko he ʼu hau, he puleʼaga maʼoniʼoni,+ he hahaʼi makehe ʼa te ʼAtua,+ ke kotou tala ʼi te potu fuli pe te ʼu kalitate”*+ ʼo Ia ʼae neʼe ina pauʼi koutou mai te fakapoʼuli ki tona malama taulekaleka.+ 10 Koteʼuhi ʼi te temi muʼa, neʼe mole ko koutou te hahaʼi ʼa te ʼAtua,+ kae ʼi te temi nei kua kotou liliu ko Tana hahaʼi. ʼI te temi muʼa neʼe mole fakaha atu te manavaʼofa, kae ʼi te temi nei kua kotou maʼu te manavaʼofa.+

11 Kau ʼofaina, ʼuhi ko koutou ko he kau matapule pea mo he ʼu hahaʼi ʼe nonofo fakatemi ʼi te malama ʼaeni,+ ʼe au uga koutou ke kotou haga tekeʼi te ʼu holi ʼo te kakano,+ ʼae ʼe fakafeagai kia koutou.*+ 12 Ke lelei tuʼumaʼu takotou aga ʼi te lotolotoiga ʼo te hahaʼi ʼo te malama,+ ke feala ai, moka natou ui ʼe kotou fai he ʼu meʼa ʼe kovi, ke natou sisio mata ai ki ʼakotou gaue lelei,+ pea ke natou fakakololiaʼi te ʼAtua ʼi te ʼaho ʼae ka haʼu ai ʼo ʼaʼahi te malamanei.

13 Kotou fakalogo, ʼuhi ko te ʼAliki, ki te ʼu pule fuli ʼae neʼe fakanofo e te tagata,*+ peʼe ki te hau+ he ʼe maʼoluga age ia koutou, 14 peʼe ki te ʼu kovana, he neʼe fakanofo natou e te hau ke natou tauteaʼi te hahaʼi agakovi kae ke natou vikiʼi ia natou ʼae ʼe natou fai te ʼu meʼa ʼae ʼe lelei.+ 15 Koteʼuhi ko te finegalo ʼo te ʼAtua ke kotou fakagata te ʼu palalau vaʼiganoa ʼae ʼe fai e te ʼu tagata vavale, ʼaki takotou fai te ʼu meʼa ʼae ʼe lelei.+ 16 Ke kotou hage ko he hahaʼi ʼateaina,+ kae ʼaua naʼa kotou fakaʼaogaʼi tokotou ʼateaina moʼo fai te ʼu meʼa ʼae ʼe kovi,+ kae ke kotou maʼuʼuli ohage ko he ʼu kaugana ʼa te ʼAtua.+ 17 Kotou fakaʼapaʼapa ki te ʼu faʼahiga tagata fuli pe,+ kotou ʼoʼofa ki te fale tau tehina katoa,+ kotou manavasiʼi ki te ʼAtua,+ kotou fakaʼapaʼapa ki te hau.+

18 Ke fakalogo te hahaʼi faifekau ki ʼonatou pule ʼaki he fakaʼapaʼapa katoa,+ ʼo mole gata pe kia natou ʼae ʼe agalelei pea mo fakapotopoto, kae kia natou foki ʼae ʼe agafefeka. 19 Koteʼuhi moka ʼe ʼutakiʼi e he tahi te ʼu faigataʼaʼia* pea mo mamahi kae neʼe mole ina fai he meʼa ʼe kovi, ʼe ko he meʼa ʼe lelei he ʼe faiga ke ina maʼu he leʼo ʼo loto ʼe maʼa ia muʼa ʼo te ʼAtua.+ 20 Koteʼuhi ʼe tonu koa ke vikiʼi koutou mo kapau ʼe kotou katakiʼi tokotou ta he neʼe kotou agahala?+ Kae kapau ʼe kotou ʼutakiʼi te mamahi he neʼe kotou fai te meʼa ʼae ʼe lelei, ʼe ko te meʼa ʼaia ʼe leleiʼia e te ʼAtua.+

21 ʼI tona fakahagatonu, neʼe pauʼi koutou ki te faʼahi ʼaia, koteʼuhi neʼe toe mamahi foki mo Kilisito maʼa koutou,+ ʼo ina tuku atu kia koutou he faʼifaʼitakiʼaga ke kotou mulimuli fakalelei ki ai.*+ 22 Neʼe mole agahala+ pea neʼe mole maʼu he kaka ʼi tona gutu.+ 23 ʼI te temi ʼae neʼe leakoviʼi* ai ia ia e te hahaʼi,+ neʼe mole ina toe leakoviʼi* ia natou.+ ʼI te temi ʼae neʼe fakamamahiʼi ai,+ neʼe mole ina fakamatakuʼi ia natou, kae neʼe ina tuku ia meʼa fuli kia Ia ʼae ʼe ina fakamauʼi+ ʼi te faitotonu. 24 ʼAki tona sino, neʼe ina ʼamo ʼatatou agahala+ ʼi te temi ʼae neʼe tutuki ai ki te pou,*+ ke fakaʼateainaʼi ai tatou mai* ʼatatou agahala pea ke tou maʼuʼuli ʼo fai te meʼa ʼae ʼe faitotonu. Pea “ ʼaki ʼona lavea neʼe fakamalolo ai koutou.”+ 25 Koteʼuhi neʼe kotou hage ko he ʼu ovi kua hehe,+ kae ʼi te temi nei kua kotou toe liliu ki te tagata tauhi ovi+ ʼae ʼe ina taupau* ʼokotou maʼuli.*

3 ʼO toe feia foki mo koutou, ʼu fafine ʼohoana, kotou fakalogo ki ʼokotou ʼohoana,+ ke feala ai, mo kapau ʼe mole fakalogo ʼihi ki te folafola, ke natou tafoki mole ʼaki ʼakotou palalau kae ʼaki takotou aga,+ 2 koteʼuhi ʼe natou sisio mata ki takotou agamaʼa+ pea mo takotou fakaʼapaʼapa lahi. 3 ʼAua naʼa kotou matalelei pe ʼi tuʼa, ʼaki takotou fi ʼokotou lauʼulu pea mo tau ni meʼa aulo+ peʼe kotou tui he ʼu kofu matalelei, 4 kae ke kotou fakamatalelei te ʼu meʼa ʼae ʼi ʼokotou loto, ʼaki te ʼu meʼa matalelei ʼae ko te agamalū mo te tokalelei,+ ʼae ʼe mole popo pea ʼe maʼuhiga ʼaupito kia mata ʼo te ʼAtua. 5 Koteʼuhi neʼe fakamatalelei feia te ʼu fafine maʼoniʼoni ʼo te temi muʼa ʼae neʼe falala ki te ʼAtua, ʼo natou fakalogo ki ʼonatou ʼohoana, 6 ohage ko Sala, ʼae neʼe fakalogo kia Apalahamo, ʼo ina fakahigoaʼi ia ia ko tona ʼaliki.+ Pea ko koutou ko ʼana fanau mo kapau ʼe kotou haga fai te meʼa ʼae ʼe lelei pea ʼe mole kotou matataku ʼi he meʼa.+

7 ʼO toe feia foki mo koutou, ʼu tagata ʼohoana, kotou haga nonofo mo ʼokotou ʼohoana ʼo kotou mahino kia natou.* Kotou fakaʼapaʼapa kia natou,+ koteʼuhi ʼe vaivai age te hahaʼi fafine ohage ko he ipu ʼe pelepelegesi, pea ʼe natou toe maʼu fakatahi foki mo koutou ia te tofiʼa+ ʼo te ʼofa makehe, ʼae ko te maʼuli. Kotou fai feia ke ʼaua naʼa taʼofi ʼakotou faikole.

8 Pea ke kotou manatu tahi fuli,+ mo kaugā mamahi fakatahi, mo kotou maʼu te ʼofa fakatautehina, mo te manavaʼofa+ pea mo te agavaivai.+ 9 ʼAua naʼa kotou tauʼi te kovi ʼaki te kovi,+ peʼe ko te leakovi ʼaki te leakovi.+ Kae ke kotou fai he ʼu palalau lelei,*+ he neʼe pauʼi koutou ki te faʼahi ʼaia, ke feala hakotou maʼu he tapuakina.

10 Koteʼuhi “ko ia ʼae ʼe ʼofa ki te maʼuli pea mo fia maʼuli fiafia, ʼe tonu ke ina taʼofi tona ʼalelo mai te kovi+ pea ke ʼaua naʼa ina fai he ʼu palalau kaka. 11 Ke fakamamaʼo mai te meʼa ʼae ʼe kovi+ ʼo fai te meʼa ʼae ʼe lelei.+ Ke ina kumi tuʼumaʼu te tokalelei.+ 12 Koteʼuhi ʼe sio te ʼu mata ʼo Sehova* ki te kau faitotonu pea ʼe fagono ʼona taliga ki ʼanatou kolekole,+ kae ʼe fakafeagai ia Sehova* kia natou ʼae ʼe natou fai he ʼu meʼa ʼe kovi.”+

13 Pea ko ai anai ka ina fakamamahiʼi koutou mo kapau ʼe kotou liliu ʼo faʼafai ki te meʼa ʼae ʼe lelei?+ 14 Kae ʼe kotou fiafia tatau aipe pe ʼe kotou mamahi ʼuhi ko te faitotonu.+ Pea ke ʼaua naʼa kotou matataku ʼi te ʼu meʼa ʼae ʼe natou matataku ki ai* pea ʼaua naʼa kotou hoha.+ 15 Kae ke kotou fakamoʼoni ʼi ʼokotou loto ko Kilisito* ʼe ko te ʼAliki pea ʼe maʼoniʼoni, mo kotou nonofo teuteu tuʼumaʼu ke kotou tali ki he tahi ʼe ina fakalavelave atu te tupuʼaga ʼo takotou ʼamanaki, kae ke kotou fai ʼaki he agamalū+ pea mo he fakaʼapaʼapa lahi.+

16 Kotou taupau he leʼo ʼo loto ʼe lelei.+ Pea ʼe ufiufi anai ia natou ʼae ʼe palalau kovi ʼo ʼuhiga mo koutou,+ ʼuhi ko takotou aga ʼae ʼe lelei ʼi tokotou ʼuhiga tisipulo ʼa Kilisito.+ 17 Koteʼuhi ʼe lelei age hakotou mamahi, mo kapau ʼe fakagafua e te ʼAtua, he ʼe kotou fai te meʼa ʼae ʼe lelei,+ ʼi hakotou mamahi he ʼe kotou fai te meʼa ʼae ʼe kovi.+ 18 Koteʼuhi neʼe mate ia Kilisito tuʼa tahi ʼo talu ai moʼo pulihi te ʼu agahala,+ ko he tagata faitotonu maʼa he kau heʼe faitotonu,+ ke taki ai koutou ki te ʼAtua.+ Neʼe matehi ia ia ʼi te kakano+ kae neʼe fakamaʼuli ake ko he laumalie.+ 19 Pea neʼe alu ai ʼo faifakamafola ki te ʼu laumalie ʼae ʼi te fale pilisoni,+ 20 ʼae neʼe natou talagataʼa ʼi te temi muʼa ʼi te ʼu ʼaho ʼo Noe. ʼI te temi ʼaia, neʼe atalitali ia te ʼAtua ʼaki he kataki fualoa,*+ ʼi te lolotoga faʼu ʼo te aleka,+ ʼae neʼe haofaki ai mai te vai te tokosiʼi, neʼe natou* toko valu.+

21 Ko te faʼahi ʼaia ʼe ko he fakata ʼo te papitema, ʼae ʼe ina toe haofaki mo koutou ʼi te temi nei ʼaki te fakatuʼuake ʼo Sesu Kilisito. ʼE mole molehi e te papitema te ʼuli ʼo te kakano, kae ʼe ko te kole ʼe fai ki te ʼAtua ke maʼu he leʼo ʼo loto ʼe lelei.+ 22 Koteʼuhi kua heka ia Kilisito ʼi te toʼomataʼu ʼo te ʼAtua+ he neʼe hake ki selo, pea ʼe fakalogo kia ia te kau ʼaselo, mo te ʼu pule pea mo te ʼu malohi.+

4 Mai tona aluʼaga ʼae neʼe mamahi ia Kilisito* ʼi te kakano,+ mo koutou foki, kotou fakamalohiʼi ia koutou ʼaki takotou maʼu te faʼahiga manatu ʼa Kilisito. Koteʼuhi ko ʼae kua mamahi ʼi te kakano kua ina liʼaki te ʼu agahala,+ 2 ke feala ai ʼi te temi ʼae ʼe kei maʼuli ai, hana maʼuli moʼo fakahoko te finegalo ʼo te ʼAtua+ kae mole ko te ʼu holi ʼo te tagata.+ 3 Koteʼuhi kua feʼauga takotou fai ʼi te temi muʼa te finegalo ʼo te hahaʼi ʼo te malama,+ ʼi takotou fakahoko he ʼu aga fakalialia,* mo he ʼu holi heʼe ʼaoga, mo kotou inu kava fakavalevale, mo fai he ʼu fakafiafia fakavalevale, mo konahihia, pea mo te tauhi fakalialia ki te ʼu taula ʼatua.+ 4 ʼE natou punamaʼuli ʼi takotou mole kei kau mo natou ʼi tonatou faʼahiga maʼuli heʼe ʼaoga, koia ʼe natou laukoviʼi ai koutou.+ 5 Kae ʼe fakamauʼi anai natou e ia ʼae kua tokalelei ke ina fakamauʼi te kau maʼuli pea mo te kau mate.+ 6 Ko te tupuʼaga la ʼaia ʼo te toe tala foki ʼo te logo lelei ki te kau mate,*+ ke feala hanatou maʼuʼuli pea mo takitaki natou e te laumalie ʼo te ʼAtua, tatau aipe pe ʼe fakamauʼi natou ohage ko te tagata fuli.

7 Kae kua ovi mai te fakaʼosi ʼo te ʼu meʼa fuli. Koia ke kotou fakapotopoto+ pea mo tokakaga* ʼo faikole tuʼumaʼu.+ 8 Kae tafito ke kotou feʼofamamahiʼaki,+ koteʼuhi ʼe ʼuʼufi e te ʼofa he ʼu tuʼuga agahala.+ 9 Ke kotou fakaha te tali kaiga ia koutou, ʼo mole kotou meo.+ 10 Kotou mulimuli ki te ʼu fealagia* ʼae neʼe foaki atu kia koutou takitokotahi, ʼo kotou fakaʼaogaʼi te ʼu fealagia ʼaia moʼo fetokoniʼaki ohage ko he kau tagata tauhi lelei ʼo te ʼofa makehe ʼo te ʼAtua, ʼae ʼe ha ʼi he ʼu aluʼaga kehekehe.+ 11 Kapau ʼe palalau he tahi, ke palalau moʼo fakaha te ʼu folafola ʼa te ʼAtua. Kapau ʼe tokoni he tahi ki ʼihi, ke falala ki te malohi ʼae ʼe foaki e te ʼAtua,+ ke fakakololiaʼi ai te ʼAtua ia meʼa fuli pe+ ʼaki ia Sesu Kilisito. ʼE ʼa te ʼAtua te kololia pea mo te mafimafi ʼo talu ai. Ameni.

12 Kau ʼofaina, ʼaua naʼa kotou punamaʼuli ʼo ʼuhiga mo te ʼu ʼahiʼahi faigataʼa ʼae ʼe tau mo koutou,+ ohage ko he meʼa foʼou ʼe hoko kia koutou. 13 Kae ke kotou fakafiafia+ tuʼumaʼu ʼi takotou tau mo te ʼu mamahi ʼae neʼe tau mo Kilisito,+ ke feala foki hakotou toe fakafiafia pea mo fiafia lahi lolotoga te fakaha ʼo tona kololia.+ 14 Kapau ʼe fakalainoaʼi* koutou ʼuhi ko te huafa ʼo Kilisito, ke kotou fiafia,+ he ʼe nofo mo koutou te laumalie ʼo te kololia, ʼei, te laumalie ʼo te ʼAtua.

15 Kae ke mole mamahi he tahi ia koutou ʼuhi he ʼe ko he tagata faifakapo, peʼe ko he tagata kaihaʼa, peʼe ko he tagata agakovi, peʼe ko he tahi ʼe fia iloʼi meʼa fuli.+ 16 Kae kapau ʼe mamahi he tahi ʼuhi he ʼe ko he Kilisitiano, ke ʼaua naʼa ufiufi,+ kae ke ina haga fakakololiaʼi te ʼAtua ʼi tana maʼuli ohage ko he Kilisitiano. 17 Koteʼuhi kua hoko mai te temi ʼae kua ʼosi fakatuʼutuʼu fakatomuʼa ke kamata ai te fakamau pea ʼe tonu ke kamata ʼi te ʼapi ʼo te ʼAtua.+ Pea kapau ʼe kamata muʼa ia tatou,+ kotea anai ka hoko kia natou ʼae ʼe mole fakalogo ki te logo lelei ʼae mai te ʼAtua?+ 18 “Pea kapau ʼe tonu ke gaue kinakina he tagata faitotonu ke haofaki ai ia ia e te ʼAtua, pea kotea anai ka hoko ki te tagata ʼae ʼe mole fakaʼapaʼapa ki te ʼAtua pea mo te tagata agahala?”+ 19 Koia ko natou ʼae ʼe mamahi he ʼe natou fai te finegalo ʼo te ʼAtua, ke natou haga fai te meʼa ʼae ʼe lelei pea mo natou tuku ʼonatou maʼuli* kia nima ʼo te Tupuʼaga, ʼae ʼe agatonu.+

5 Koia ʼe au fai te kole* ʼaeni ki te kau tagata ʼafeā ʼae ʼe nonofo ia koutou, koteʼuhi ʼe au tagata ʼafeā ohage ko natou, pea neʼe au sio ki te ʼu mamahi ʼo Kilisito* pea ʼe au toe maʼu foki anai mo au te kololia ʼae ʼe tonu ke fakaha:+ 2 Kotou tauhi te faga ovi ʼa te ʼAtua+ ʼae neʼe tuku atu kia koutou, ʼo kotou gaue ohage ko he ʼu tagata taupau,* ʼo mole kotou fai ʼaki he fakakinau kae ʼaki he lotolelei ia muʼa ʼo te ʼAtua,+ ʼo mole ʼaki he lotomanumanū ki te paʼaga+ kae ʼaki he faʼafai, 3 ʼo mole kotou puleʼi ia natou ʼae ʼe ko te tofiʼa ʼo te ʼAtua,+ kae ke kotou liliu ko he ʼu faʼifaʼitakiʼaga maʼa te faga ovi.+ 4 Pea ʼe foaki atu anai kia koutou te pale ʼo te kololia ʼae ʼe mole feala ke fefe,+ ʼi te temi ʼae ka fakaha ai anai te pule ʼo te ʼu tauhi ovi.+

5 ʼO toe feia foki mo koutou, kau tupulaga, kotou fakalogo ki te kau matuʼa.*+ Kae ko koutou fuli, kotou kofuʼi mo fefakahaʼaki ia te agavaivai,* koteʼuhi ʼe mole leleiʼia e te ʼAtua te kau fialahi, kae ʼe ina fakaha tona ʼofa makehe ki te kau agavaivai.+

6 Koia, ke kotou fakamalaloʼi ia koutou totonu ʼi te lalo nima malohi ʼo te ʼAtua, ke feala hana hikihiki koutou ʼi tona temi totonu,+ 7 ʼo kotou tuku* kia te ia ʼakotou tuʼania* fuli,+ he ʼe tokaga ia kia koutou.+ 8 Kotou fakapotopoto pea mo nonofo tokaga!+ ʼE fealuʼaki tokotou fili, te Tevolo, ohage ko he laione ʼe gugulu, ʼe ina kumi he tahi ke ina kai.+ 9 Kae ke kotou fakafeagai kia ia+ ʼaki he tui ʼe malohi, ʼi takotou iloʼi ʼae ʼe mamahi ʼokotou tehina fuli ʼi te malamanei ohage pe ko te ʼu mamahi ʼae ʼe tau mo koutou.+ 10 Kae hili takotou mamahi ʼi he kiʼi temi, ko te ʼAtua ʼae ʼe fonu ʼi te ʼofa makehe, ʼae neʼe ina pauʼi koutou ki tona kololia heʼe gata+ ʼaki ia Kilisito, ʼe ina fakakatoa anai e ia totonu takotou akoako. ʼE ina fakalotomalohiʼi anai koutou,+ ʼe tokoni atu anai ke kotou nonofo agatonu, pea mo ina fakatuʼu malohi anai koutou.+ 11 Ke ina maʼu ʼo talu ai te mafimafi. Ameni.

12 ʼAki ia Siliva,*+ ʼae kia au ʼe ko he tehina agatonu, neʼe au tohi fakanounou atu te ʼu palalau ʼaeni, moʼo fakalotomalohiʼi koutou pea mo fakamoʼoni neʼe fakaha atu e te ʼAtua kia koutou tona ʼofa makehe. Kotou pipiki maʼu ki ai. 13 ʼE ʼofa atu kia koutou te fafine* ʼae ʼi Papiloni, ʼae neʼe filifili ohage ko koutou, pea ʼe toe ʼofa atu mo Maleko,+ toku foha. 14 Kotou feʼalofaʼaki ʼaki he fekita, moʼo fakaha tokotou ʼofa.

Ke foaki atu e te ʼAtua kia koutou fuli ʼae ʼe ko te ʼu tisipulo ʼa Kilisito ia te tokalelei.