TE ʼULUAKI TOHI ʼA SOANE

1 ʼE matou faitohi atu kia koutou ʼo ʼuhiga mo ia ʼae ʼe ko te folafola ʼo te maʼuli,+ ʼae ʼe maʼuli talu mai te kamataʼaga, ʼae neʼe matou logo ki ʼana palalau, mo sisio mata ki ai, mo mamata ki ai pea mo fāfā ki ai, 2 (ʼei, neʼe ina fakaha lelei mai kia matou te maʼuli heʼe gata, pea neʼe matou sisio, mo fakamoʼoni+ pea mo tala atu te maʼuli heʼe gata+ ʼae ʼe haʼu mai te Tamai pea neʼe fakaha mai kia matou). 3 ʼE matou toe tala atu foki kia koutou ia ia ʼae neʼe matou sisio pea mo logo ki ai,+ ke feala mo koutou ke kotou fakatahi* mo matou. Pea ʼe tou fakatahi mo te Tamai pea mo tona ʼAlo ko Sesu Kilisito.*+ 4 ʼE matou tohi atu te ʼu meʼa ʼaia ke katoa ai totatou fiafia.

5 ʼE matou fia tala atu te logo ʼaeni neʼe ina tala mai kia matou: Ko te ʼAtua ʼe ko te malama+ pea ʼe mole he fakapoʼuli ia te ia. 6 Kapau ʼe tou ui: “ ʼE tou fakatahi mo ia,” kae ʼe hoko atu pe tatatou haʼele ʼi te fakapoʼuli, ʼe tou loi pea ʼe mole tou maʼuliʼi te moʼoni.+ 7 Kae kapau ʼe tou haʼele ʼi te malama, ohage ko ia totonu ʼe nofo ʼi te malama, ʼe tou logo tahi fuli anai, pea ʼe fakamaʼa tatou mai te ʼu agahala fuli ʼaki te taʼataʼa ʼo tona ʼAlo ko Sesu.+

8 Kapau ʼe tou ui: “ ʼE mole ʼi ai hatatou agahala,” ʼe tou kakaʼi pe ia tatou totonu+ pea ʼe mole nofo te moʼoni ia tatou. 9 Kae kapau ʼe tou vete ʼatatou agahala, ʼe ina fakamolemole anai ʼatatou agahala pea mo fakamaʼa tatou mai te ʼu aga heʼe faitotonu fuli, koteʼuhi ʼe agatonu mo faitotonu.+ 10 Kapau ʼe tou ui: “Neʼe heʼeki tou agahala,” ʼe tou fakaliliu ia ia ko he tahi ʼe gutuloi pea ʼe mole nofo tana folafola ʼi ʼotatou loto.

2 Siʼaku ʼu fanau, ʼe au tohi atu te ʼu meʼa ʼaia ke ʼaua naʼa kotou agahala. Kae kapau ʼe agahala he tahi, ʼe ʼi ai totatou tokoni ia muʼa ʼo te Tamai, ʼe ko Sesu Kilisito,*+ te tagata faitotonu.+ 2 Pea ʼe ko he sakilifisio faifakalelei+ maʼa* ʼatatou agahala,+ kae ʼe mole gata pe maʼa ʼatatou agahala, kae maʼa te ʼu agahala ʼa te malamanei katoa.+ 3 Pea ʼaki te faʼahi ʼaeni ʼe tou mahino ai kua tou iloʼi ia ia: mo kapau ʼe tou haga fakalogo ki ʼana fakatotonu. 4 Ko ia ʼae ʼe ina ui: “Kua au iloʼi ia ia,” kae ʼe mole fakalogo ia ki ʼana fakatotonu, ʼe ko he tagata ʼe gutuloi pea ʼe mole nofo te moʼoni ia ia. 5 Kae ko ia ʼae ʼe fakalogo ki tana folafola, kua liliu moʼoni tona ʼofa ʼae ki te ʼAtua ʼo katoa.+ ʼAki te faʼahi ʼaia, ʼe tou iloʼi ai ʼe tou fakatahi mo ia.+ 6 Ko ia ʼae ʼe ina ui ʼe fakatahi mo ia ʼe tonu ke haga maʼuli ohage pe ko te maʼuli ʼo Sesu.+

7 Kau ʼofaina, ʼe mole au tohi atu he fakatotonu foʼou, kae ʼe ko he fakatotonu ʼafeā kua kotou maʼu talu mai te kamataʼaga.+ Ko te fakatotonu ʼafeā ʼaia ʼe ko te folafola ʼae neʼe kotou logo ki ai. 8 Kae ʼe au tohi atu he fakatotonu foʼou, ʼae neʼe muliʼi e Sesu ʼo feia mo koutou, koteʼuhi ʼe fakalaka te fakapoʼuli kae kua gigila te malama moʼoni.+

9 Ko ia ʼae ʼe ina ui ʼe nofo ʼi te malama kae ʼe fehiʼa+ ki tona tehina, ʼe kei nofo ia ʼi te fakapoʼuli.+ 10 Ko ia ʼae ʼe ʼofa ki tona tehina ʼe nofo ia ʼi te malama,+ pea ʼe mole pe maʼu ia ia he meʼa fakatupu tukia. 11 Kae ko ia ʼae ʼe fehiʼa ki tona tehina ʼe nofo ia ʼi te fakapoʼuli, mo haʼele ʼi te fakapoʼuli,+ pea ʼe mole ina iloʼi pe ʼe alu kifea,+ koteʼuhi kua fakakiviʼi ʼona mata e te fakapoʼuli.

12 ʼU fanau, ʼe au faitohi atu koteʼuhi kua fakamolemole ʼakotou agahala ʼuhi ko tona huafa.+ 13 ʼU tamai, ʼe au faitohi atu koteʼuhi kua kotou iloʼi ia ia ʼae ʼe maʼuli talu mai te kamataʼaga. ʼU tupulaga, ʼe au faitohi atu koteʼuhi kua kotou malo ʼi te Agakovi.*+ ʼU fanau, ʼe au faitohi atu koteʼuhi kua kotou iloʼi te Tamai.+ 14 ʼU tamai, ʼe au faitohi atu koteʼuhi kua kotou iloʼi ia ia ʼae ʼe maʼuli talu mai te kamataʼaga. ʼU tupulaga, ʼe au faitohi atu koteʼuhi ʼe kotou malolohi+ pea ʼe nofo te folafola ʼa te ʼAtua ʼi ʼokotou loto+ pea kua kotou malo ʼi te Agakovi.*+

15 ʼAua naʼa kotou manako ki te malamanei peʼe ki te ʼu meʼa ʼae ʼi te malamanei.+ Kapau ʼe manako he tahi ki te malamanei, ʼe mole ʼofa ia ki te Tamai.+ 16 Koteʼuhi ko te ʼu meʼa fuli ʼae ʼi te malamanei, te holi ʼo te kakano,+ mo te holi ʼo te ʼu mata+ pea mo te fakahaha e he tahi* ʼona koloa, ʼe mole haʼu ia mai te Tamai kae ʼe haʼu ia mai te malamanei. 17 Pea tahi ʼae, ʼe fakalaka te malamanei pea mo ʼona holi,+ kae ko ia ʼae ʼe ina fai te finegalo ʼo te ʼAtua ʼe nofo anai ia ʼo talu ai.+

18 ʼU fanau, ʼe ko te hola fakaʼosi ʼaeni, pea ohage pe ko takotou logo ki ai, ʼe haʼu anai ia ia ʼae ʼe fakafeagai kia Kilisito,*+ pea ʼi te temi nei kua kaugamalie ia natou ʼae ʼe fakafeagai kia Kilisito,+ ʼo tou iloʼi ai ʼe ko te hola fakaʼosi ʼaeni. 19 Neʼe natou mavae atu ia tatou koteʼuhi neʼe mole natou kau mo tatou.+ Ka na pau la neʼe natou kau mo tatou, neʼe kei natou nonofo pe mo tatou. Kae neʼe natou mavae, ke fakaha ai ʼe mole kau mo tatou ia natou fuli ʼae ʼe natou ui ʼe natou tui.+ 20 Pea kua fakanofo koutou e ia ʼae ʼe maʼoniʼoni+ pea ʼe kotou maʼu fuli ia te ʼatamai malama. 21 ʼE mole au faitohi atu ʼuhi he ʼe mole kotou iloʼi ia te moʼoni,+ kae ʼuhi he ʼe kotou iloʼi pea ʼe mole haʼu he loi mai te moʼoni.+

22 Ko ai koa te tagata gutuloi? ʼE mole koa la ko ia ʼae ʼe fakafisi ko Sesu ʼe ko Kilisito?+ Ko ia ʼae ʼe fakafeagai kia Kilisito,*+ ʼe ko ia ʼae ʼe fakafisi ki te Tamai pea mo te ʼAlo. 23 Ko ia ʼae ʼe fakafisi ki te ʼAlo ʼe mole fakatahi ia mo te Tamai.+ Kae ko ia ʼae ʼe fakamoʼoni ki te ʼAlo,+ ʼe toe fakatahi foki mo te Tamai.+ 24 Kae kia koutou, ʼe tonu ke nofo ʼi ʼokotou loto te meʼa ʼae neʼe kotou logo ki ai talu mai te kamataʼaga.+ Kapau ʼe nofo ʼi ʼokotou loto te meʼa ʼae neʼe kotou logo ki ai talu mai te kamataʼaga, pea mo koutou foki, ʼe kotou haga fakatahi anai mo te ʼAlo pea mo te Tamai. 25 Pea tahi ʼae, koʼeni te faʼahi ʼae neʼe ina fakapapauʼi mai: te maʼuli heʼe gata.+

26 ʼE au tohi atu te ʼu meʼa ʼaia ʼo ʼuhiga mo natou ʼae ʼe faiga ke natou fakaheʼi koutou. 27 Kae kia koutou, ʼuhi ʼae neʼe fakanofo* koutou e te ʼAtua ʼaki te laumalie maʼoniʼoni+ pea mo nofo ia koutou te laumalie, ʼe mole ʼaoga ai ke akoʼi koutou e he tahi. Kae ko te fakanofo ʼaia ʼaki te laumalie ʼe moʼoni, pea ʼe mole loi pea ʼe ina akoʼi atu kia koutou ia meʼa fuli.+ Kotou haga fakatahi mo ia ohage pe ko tona akoʼi atu e te laumalie.+ 28 Koia ʼi te temi nei, ʼu fanau, kotou haga fakatahi mo ia, ke feala ai moka ha anai ia ia lolotoga tana ʼi heni,* ke tou palalau faʼifaʼitaliha+ pea ke mole tou fakamamaʼo mai ia te ia ʼi tatatou ufiufi. 29 Kapau ʼe kotou iloʼi ʼe faitotonu, pea ʼe kotou toe iloʼi foki ko ia ʼae ʼe faitotonu neʼe tupu mai te ʼAtua.+

3 Kotou tokagaʼi age muʼa te toe ʼofa lahi ʼae neʼe fakaha mai e te Tamai kia tatou,+ ke fakahigoaʼi ai tatou ko te ʼu fanau ʼa te ʼAtua!+ Pea ko tatou ko ʼana fanau. Koia ʼe mole iloʼi tatou e te malamanei,+ koteʼuhi ʼe mole ina iloʼi ia te ʼAtua.+ 2 Kau ʼofaina, ko tatou ko te ʼu fanau ʼa te ʼAtua ʼi te temi nei,+ kae neʼe heʼeki ina fakaha mai ia meʼa fuli ʼo ʼuhiga mo totatou maʼuli ʼi te temi ka haʼu.+ Kae ʼe tou iloʼi ʼe tou hage anai ko ia ʼi te temi ʼae ka ha ai ia ia, koteʼuhi ʼe tou sisio moʼoni anai kia te ia. 3 Pea ko ia ʼae ʼe falala kia te ia, ʼe ina fakamaʼa ia ia totonu+ ohage pe ko te maʼa ʼo ia ʼaia.

4 Ko ia ʼae ʼe hoko atu tana agahala ʼe ina toe maumauʼi foki ia te lao, pea ko te agahala ʼe ko te maumauʼi ʼo te lao. 5 ʼE kotou toe iloʼi foki, neʼe haʼu* ia Sesu ke ina toʼo ʼatatou agahala,+ pea ʼe mole he agahala ia te ia. 6 Ko ia ʼae ʼe haga fakatahi mo ia ʼe mole hoko atu tana agahala.+ Kae ko ia ʼae ʼe hoko atu tana agahala neʼe mole sio ia kia te ia pea ʼe mole ina iloʼi ia ia. 7 ʼU fanau, ʼaua naʼa fakaheʼi koutou e he tahi. Ko ia ʼae ʼe ina maʼuliʼi ia te faitotonu ʼe faitotonu ia, ohage pe ko te faitotonu ʼo ia ʼaia. 8 Ko ia ʼae ʼe hoko atu tana agahala ʼe haʼu ia mai te Tevolo, koteʼuhi ʼe agahala te Tevolo talu mai te kamataʼaga.*+ Neʼe haʼu* te ʼAlo ʼo te ʼAtua ke ina maumauʼi te ʼu gaue ʼa te Tevolo.+

9 Ko ia ʼae neʼe tupu mai te ʼAtua ʼe mole hoko atu tana agahala,+ koteʼuhi ʼe nofo Tona laumalie maʼoniʼoni* ia ia, pea ʼe mole feala ke hoko atu tana agahala, koteʼuhi neʼe tupu ia mai te ʼAtua.+ 10 ʼE iloga kehe pe te ʼu fanau ʼa te ʼAtua mai te ʼu fanau ʼa te Tevolo ʼi te faʼahi ʼaeni: Ko ia ʼae ʼe mole ina maʼuliʼi te faitotonu ʼe mole haʼu ia mai te ʼAtua, ʼo feia pe mo ia ʼae ʼe mole ʼofa ki tona tehina.+ 11 Koteʼuhi ʼe ko te logo ʼaeni neʼe kotou logo ki ai talu mai te kamataʼaga: Ke tou feʼofaʼaki.+ 12 Kae ʼe mole tonu ke tou hage ko Kaino, ʼae neʼe haʼu mai te Agakovi* pea neʼe ina matehi tona tehina.+ He koʼe neʼe ina matehi ia ia? Koteʼuhi neʼe kovi ʼana gaue,+ kae neʼe faitotonu te ʼu gaue ʼo tona tehina.+

13 ʼU tehina, ʼaua naʼa kotou punamaʼuli ʼi te fehiʼa ʼa te malamanei kia koutou.+ 14 ʼE tou iloʼi neʼe tou fakalaka mai te mate ki te maʼuli,+ koteʼuhi ʼe tou ʼoʼofa ki te ʼu tehina.+ Ko ia ʼae ʼe mole ʼofa ʼe nofo ia ʼi te mate.+ 15 Ko ia ʼae ʼe fehiʼa ki tona tehina ʼe ko he tagata faifakapo ia,+ pea ʼe kotou iloʼi ʼe mole he tagata faifakapo ʼe ina maʼu anai te maʼuli heʼe gata.+ 16 Kua tou iloʼi te ʼofa ʼuhi ko te faʼahi ʼaeni: Neʼe foaki e Sesu Kilisito tona maʼuli* maʼa tatou,+ pea ʼe maʼua ke tou foaki ʼotatou maʼuli* maʼa ʼotatou tehina.+ 17 Kae ko ia ʼae ʼe ina maʼu te ʼu meʼa ʼae ʼe ʼaoga ki tona maʼuli pea sio ki tona tehina ʼae ʼe faigataʼaʼia, kae ʼe mole ina fia fakaha age tona manavaʼofa, ʼe lava feafeaʼi hana ui ʼe ʼofa ki te ʼAtua?+ 18 ʼU fanau, ʼe mole tonu ke tou fakaha totatou ʼofa ʼaki pe he ʼu palalau,+ kae ʼaki he ʼu gaue+ pea mo te moʼoni.+

19 Koia ʼe tou iloʼi ai anai ʼe tou kau ki te moʼoni, pea ʼe tou fakafimalieʼi anai ʼotatou loto ia muʼa ʼo te ʼAtua 20 ʼo ʼuhiga mo te ʼu meʼa fuli ʼae ʼe fakatuʼā ai tatou e ʼotatou loto, koteʼuhi ʼe maʼoluga age te ʼAtua ʼi ʼotatou loto pea ʼe ina iloʼi ia meʼa fuli.+ 21 Kau ʼofaina, kapau ʼe mole fakatuʼā tatou e ʼotatou loto, pea ʼe feala ke tou palalau faʼifaʼitaliha ki te ʼAtua.+ 22 Pea ko he meʼa pe ʼe tou kole, ʼe ina foaki mai+ koteʼuhi ʼe tou fakalogo ki ʼana fakatotonu pea mo fai te ʼu meʼa ʼae ʼe lelei kia te ia. 23 Koia, koʼeni tana fakatotonu: Ke tou tui ki te huafa ʼo tona ʼAlo ko Sesu Kilisito*+ pea mo tou feʼofaʼaki,+ ohage pe ko tana fakatotonu mai. 24 Pea tahi ʼae, ko ia ʼae ʼe fakalogo ki ʼana fakatotonu ʼe haga fakatahi mo te ʼAtua, pea ʼe fakatahi te ʼAtua mo ia.+ Pea ʼaki te laumalie ʼae neʼe ina foaki mai kia tatou, ʼe tou iloʼi ai ʼe haga fakatahi mo tatou.+

4 Kau ʼofaina, ʼaua naʼa kotou tui ki te ʼu folafola fuli ʼae ʼe ui ʼe haʼu mai he laumalie,*+ kae ke kotou vakavakaʼi lelei pe ʼe haʼu te ʼu folafola* ʼaia mai te ʼAtua,+ koteʼuhi kua kaugamalie te kau polofeta loi ʼi te malamanei.+

2 ʼE kotou iloʼi anai pe ʼe haʼu te ʼu folafola mai te ʼAtua mo kapau ʼe fakamoʼoni te ʼu folafola ʼaia neʼe haʼu ia Sesu Kilisito* ki te kele ohage ko he tagata.+ 3 Kae kapau ʼe mole fakamoʼoni te ʼu folafola ʼaia kia Sesu, ʼe mole haʼu ia mai te ʼAtua.+ Tahi ʼae, neʼe kotou logo ʼe tonu ke haʼu te folafola ʼaia, pea ʼe haʼu mai ia ia ʼae ʼe fakafeagai kia Kilisito,+ pea kua mafola nei ʼi te malamanei.+

4 ʼU fanau, ʼe kotou ʼomai mai te ʼAtua pea kua kotou malo ʼi te kau polofeta loi ʼaia,+ koteʼuhi ko ia ʼae ʼe fakatahi mo koutou+ ʼe malohi age ia ʼi ʼae ʼe fakatahi mo te malamanei.+ 5 ʼE natou ʼomai natou mai te malamanei.+ Koia, ʼe natou palalau ai ʼo ʼuhiga mo he ʼu meʼa ʼe haʼu mai te malamanei pea ʼe fagono te malamanei kia natou.+ 6 ʼE tou ʼomai tatou mai te ʼAtua. Ko ia ʼae ʼe ina iloʼi te ʼAtua, ʼe fagono mai kia tatou.+ Ko ia ʼae ʼe mole haʼu mai te ʼAtua, ʼe mole fagono mai ia kia tatou.+ ʼAki te faʼahi ʼaia, ʼe tou iloʼi ai te folafola ʼae ʼe moʼoni mai te folafola ʼae ʼe hala.+

7 Kau ʼofaina, tou haga feʼofaʼaki,+ koteʼuhi ʼe haʼu te ʼofa mai te ʼAtua, pea ko ia ʼae ʼe ʼofa neʼe tupu ia mai te ʼAtua pea ʼe ina iloʼi te ʼAtua.+ 8 Ko ia ʼae ʼe mole ʼofa ʼe mole ina iloʼi ia te ʼAtua, koteʼuhi ko te ʼAtua ʼe ko te ʼofa.*+ 9 Neʼe fakaha mai e te ʼAtua tona ʼofa kia tatou ʼi te aluʼaga ʼaeni: Neʼe ina fekauʼi mai tona ʼAlo ʼulu tokotahi+ ki te malamanei ke feala ai hatatou maʼu te maʼuli ʼaki ia ia.+ 10 Ko te fakaʼuhiga ʼaeni ʼo te ʼofa: Neʼe mole ko tatou ʼae neʼe ʼoʼofa ki te ʼAtua, kae neʼe ko ia ʼae neʼe ʼofa kia tatou pea neʼe ina fekauʼi mai tona ʼAlo ko he sakilifisio faifakalelei+ maʼa* ʼatatou agahala.+

11 Kau ʼofaina, kapau neʼe ʼofa feia te ʼAtua kia tatou, ʼe toe maʼua foki ke tou feʼofaʼaki.+ 12 Neʼe heʼeki ʼi ai he tahi kua sio ki te ʼAtua.+ Kapau ʼe tou haga feʼofaʼaki, ʼe nofo te ʼAtua mo tatou pea ʼe katoa tona ʼofa ia tatou.+ 13 ʼE tou iloʼi ʼe tou haga fakatahi mo ia pea ʼe fakatahi ia ia mo tatou, he neʼe ina foaki mai kia tatou tona laumalie. 14 Pea neʼe matou sisio mata pea ʼe matou fakamoʼoni neʼe fekauʼi mai e te Tamai tona ʼAlo ko te fakamaʼuli ʼo te malamanei.+ 15 Ko ia ʼae ʼe fakamoʼoni ko Sesu ʼe ko te ʼAlo ʼo te ʼAtua,+ ʼe haga fakatahi te ʼAtua mo ia pea ʼe fakatahi ia ia mo te ʼAtua.+ 16 Pea kua tou iloʼi pea mo tui ʼe ʼofa te ʼAtua ia tatou.+

Ko te ʼAtua ʼe ko te ʼofa,*+ pea ko ia ʼae ʼe ina fakaha tuʼumaʼu ia te ʼofa, ʼe haga fakatahi mo te ʼAtua pea ʼe haga fakatahi te ʼAtua mo ia.+ 17 Koia ʼe liliu ai te ʼofa ʼo katoa ia tatou, ke feala ai hatatou palalau faʼifaʼitaliha*+ ʼi te ʼaho ʼo te fakamau, koteʼuhi ʼi te malama ʼaeni ʼe tou hage ko Kilisito. 18 Ko natou ʼae ʼe katoa ia natou te ʼofa, ʼe mole natou matataku,+ ʼe natou liʼaki ia te mataku koteʼuhi ko te mataku ʼe ina taʼofi tatou. Ko ia ʼae ʼe mataku ʼe mole katoa ia ia te ʼofa.+ 19 ʼE tou ʼoʼofa, koteʼuhi neʼe ʼuluaki ʼofa ia ia tatou.+

20 Kapau ʼe ui e he tahi: “ ʼE au ʼofa ki te ʼAtua” kae ʼe fehiʼa ia ki tona tehina, ʼe ko he tagata gutuloi.+ Koteʼuhi ko ia ʼae ʼe mole ʼofa ki tona tehina+ ʼae ʼe sio ki ai, ʼe mole feala ke ʼofa ki te ʼAtua ʼae ʼe mole sio ki ai.+ 21 Pea ʼe tou maʼu te fakatotonu ʼaeni mai ia te ia: Ko ia ʼae ʼe ʼofa ki te ʼAtua ʼe tonu foki ke ʼofa ki tona tehina.+

5 Ko ia ʼae ʼe tui ko Sesu ʼe ko Kilisito* neʼe tupu ia mai te ʼAtua,+ pea ko ia ʼae ʼe ʼofa ki te tamai, ia te ʼAtua, ʼe ʼofa ia kia ia ʼae neʼe tupu mai te ʼAtua. 2 ʼE tou iloʼi ʼe tou ʼoʼofa ki te ʼu fanau ʼa te ʼAtua+ moka tou ʼoʼofa ki te ʼAtua pea mo fakahoko ʼana fakatotonu. 3 Koteʼuhi ko te fakaʼuhiga ʼaeni ʼo te ʼofa ki te ʼAtua: Ke tou mulimuli ki ʼana fakatotonu+ pea ko ʼana fakatotonu ʼe mole faigataʼa fau,+ 4 koteʼuhi ko ia* ʼae neʼe tupu mai te ʼAtua ʼe malo ia ʼi te malamanei.+ Pea neʼe feala ke tou malo ʼi te malamanei ʼaki tatatou tui.+

5 Ko ai koa ʼae ʼe feala ke malo ʼi te malamanei?+ ʼE mole koa la ko ia ʼae ʼe tui ko Sesu ʼe ko te ʼAlo ʼo te ʼAtua?+ 6 Neʼe haʼu ia Sesu Kilisito ʼaki te vai mo te taʼataʼa, ʼo mole gata ʼaki pe te vai,+ kae ʼaki te vai mo te taʼataʼa.+ Pea ʼe fakamoʼoni ki ai te laumalie maʼoniʼoni,+ he ʼe ko te laumalie ʼe ko te moʼoni. 7 Koteʼuhi ʼe ʼi ai fakamoʼoni ʼe tolu: 8 ko te laumalie,+ mo te vai+ pea mo te taʼataʼa,+ pea ʼe fai e te ʼu faʼahi ʼaia ʼe tolu he fakamoʼoni ʼe tatau.

9 ʼE tou tali te fakamoʼoni ʼae ʼe fai e te tagata, kae ʼe lahi age te fakamoʼoni ʼae ʼe fai e te ʼAtua. Koteʼuhi koʼeni te fakamoʼoni ʼae ʼe fai e te ʼAtua, ʼe ko te fakamoʼoni ʼo ʼuhiga mo tona ʼAlo. 10 Ko ia ʼae ʼe tui ki te ʼAlo ʼo te ʼAtua, ʼe ina tali ʼi tona loto te fakamoʼoni ʼae neʼe fai age kia ia. Kae ko ia ʼae ʼe mole tui ki te ʼAtua, ʼe ina fakaliliu ia ko he tahi ʼe gutuloi,+ he ʼe mole tui ia ki te fakamoʼoni ʼae neʼe fai e te ʼAtua ʼo ʼuhiga mo tona ʼAlo. 11 Koʼeni te fakamoʼoni ʼae ʼe fai e te ʼAtua: Neʼe ina foaki mai kia tatou te maʼuli heʼe gata,+ pea ʼe tou maʼu te maʼuli ʼaia ʼaki tona ʼAlo.+ 12 Ko ia ʼae ʼe ina tali te ʼAlo, ʼe ina maʼu ia te maʼuli ʼaia. Kae ko ia ʼae ʼe mole ina tali te ʼAlo ʼo te ʼAtua, ʼe mole ina maʼu te maʼuli ʼaia.+

13 ʼE au tohi atu te ʼu meʼa ʼaia, ke kotou iloʼi ai ʼe kotou maʼu ia te maʼuli heʼe gata,+ ia koutou ʼae ʼe tui ki te huafa ʼo te ʼAlo ʼo te ʼAtua.+ 14 Pea ʼe tou falala,*+ ko he meʼa pe ʼe tou kole ki te ʼAtua ʼo mulimuli ki tona finegalo, ʼe fagono mai kia tatou.+ 15 Pea kapau ʼe tou iloʼi ʼe fagono mai kia tatou ʼo ʼuhiga mo he meʼa pe ʼe tou kole age, ʼe tou iloʼi ʼe tou maʼu anai, he neʼe tou kole kia te ia.+

16 Kapau ʼe sio he tahi ki tona tehina ʼe ina fai he agahala, kae ʼe mole ko he agahala ʼe tuha mo te mate, ʼe faikole anai maʼa ia, pea ʼe foaki anai e te ʼAtua kia ia te maʼuli,+ ʼei, kia natou ʼae ʼe mole natou fai he agahala ʼe tuha mo te mate. Kae ʼe ʼi ai he agahala ʼe tuha mo te mate.+ ʼE mole au ui age ke faikole ʼo ʼuhiga mo ia ʼae ʼe ina fai te agahala ʼaia. 17 Ko te ʼu aga heʼe faitotonu fuli ʼe ko he agahala,+ kae ʼe ʼi ai te ʼu agahala ʼe mole tuha mo te mate.

18 ʼE tou iloʼi ko natou ʼae neʼe tutupu mai te ʼAtua ʼe mole hoko atu tanatou agahala, kae ko ia* ʼae neʼe tupu mai te ʼAtua, ʼe ina leʼoleʼo natou, pea ʼe mole feala ki te Agakovi* ke ina fai he meʼa ʼe kovi kia natou.+ 19 ʼE tou iloʼi ʼe tou ʼomai mai te ʼAtua, kae ʼe nofo te malamanei katoa ʼi te malohi ʼo te Agakovi.+ 20 Kae ʼe tou iloʼi neʼe haʼu te ʼAlo ʼo te ʼAtua+ pea neʼe ina foaki mai kia tatou te fakasiosio poto* ke feala hatatou maʼu te ʼatamai malama ʼo ʼuhiga mo ia ʼae ʼe moʼoni. Pea ʼaki tona ʼAlo ko Sesu Kilisito, ʼe tou fakatahi ai mo ia ʼae ʼe moʼoni.+ ʼE ko te ʼAtua moʼoni ʼaia pea mo te matapuna ʼo te maʼuli heʼe gata.+ 21 ʼU fanau, kotou fakamamaʼo mai te ʼu taula ʼatua.+