Mai Te Fakatupu ʼo Aʼu Ki Te Tulivio

Neʼe tupu feafeaʼi te lagi pea mo te kele? Mo te laʼā, mo te māhina pea mo te ʼu fetuʼu, ʼo feiā aipe ki te ʼu meʼa ʼi te kele? ʼE foaki mai e te Tohi-Tapu te tali moʼoni, heʼe ina ʼui neʼe fakatupu te ʼu meʼa ʼaia e te ʼAtua. Koia ʼe kamata tatatou tohi ʼaki te ʼu hisitolia faka Tohi-Tapu ʼo ʼuhiga mo te fakatupu.

ʼE tou ako ai, ko te ʼu meʼa ʼaē neʼe ʼuluaki fakatupu e te ʼAtua, neʼe ko te ʼu laumālie ʼe teitei tatau mo ia. Ko te ʼu laumālie ʼaia ʼe ko te kau ʼaselo. Kae neʼe fakatupu te kele maʼa te hahaʼi ohage ko tatou. Koia neʼe fakatupu e te ʼAtua ia te tagata pea mo te fafine neʼe higoa ko Atama mo Eva, pea neʼe ina tuku ia nāua ki te ʼōloto taule­kaleka. Kae neʼe nā talagataʼa ki te ʼAtua pea neʼe mole kei tāu mo nāua ke nā maʼuʼuli.

Koia, mai te fakatupu ʼo Atama ʼo aʼu ki te Tulivio lahi, neʼe ko taʼu e 1 656. ʼI te lolotoga ʼo te temi ʼaia neʼe lahi ai te hahaʼi agakovi. ʼI te lagi, neʼe ʼi ai te ʼu laumālie fakapulipuli, ko Satana pea mo tana kau ʼaselo agakovi. ʼI te kele, neʼe ʼi ai ia Kaino pea mo te tahi ʼu hahaʼi agakovi, ʼo kau ai mo te ʼu tagata neʼe makehe ʼaupito tonatou mālohi. Kae neʼe toe ʼi ai foki mo te hahaʼi agalelei ʼi te kele—ko Apele, mo Enoke pea mo Noe. ʼI te ʼULUAKI Faʼahi ʼe tou lau anai te ʼu fakamatala ʼo ʼuhiga mo te ʼu hahaʼi fuli ʼaia pea mo te ʼu meʼa ʼaē neʼe hoko ʼi te temi ʼaia.