Kapite 59

Ko Ai Moʼoni Koa Ia Sesu?

KO TE vaka ʼaē ʼe ina ʼave ia Sesu pea mo tana kau tisipulo kua tau ki Petesaita. ʼI te koga meʼa ʼaia, neʼe ʼaumai kia Sesu he tagata kivi pea mo kole age ki ai ke fāfā ki te tagata ʼaia ke feala ai hona fakamālōlō. Neʼe puke e Sesu tona nima pea ina taki ia ki tuʼa ʼo te kolo; pea ʼi tana ʼosi ʼaʼanu ki ʼona mata, neʼe ina fehuʼi age ki ai: “ ʼE ke sio koa ki he meʼa?”

“ ʼE ʼau sio ki te ʼu tagata, heʼe ʼau sio ʼe hage he ʼu fuʼu ʼakau, kae ʼe nātou haʼeʼele.” Pea hili ai e Sesu ʼona nima ki te ʼu mata ʼo te tagata kivi pea ava ai ʼona mata ʼo feala ai tana sio lelei. ʼOsi ʼaia pea ina fekau ia ke liliu ki tona ʼapi mo fakatotonu age ki ai ke ʼaua naʼa hū ki te loto kolo.

ʼI te temi leva ʼaē, ʼe ʼalu ia Sesu mo ʼana tisipulo ki te ʼu kolo liliki ʼo Sesalea ʼo Filipo, ʼi te potu tokelau taupotu ʼo Palesitina. Ko Sesalea ʼe tuʼu ʼi te faʼahi matamatalelei ko tona māʼoluga ko meta e 350 ʼi te fuga tai, pea, ko te kaku ki te faʼahi ʼaia, ko te ala ʼe hakehake ia kilometa e nimagofulu. Ko te fualoa ʼo tanatou fagona ko ʼaho e lua.

ʼI tanatou ʼolo ʼi te ala, neʼe fakatoto kehe ia Sesu ke faikole. Kei toe pe māhina e hiva peʼe hogofulu ki tona mate, pea ʼe tuania ia ʼo ʼuhiga mo tana ʼu tisipulo. Kua tokolahi ia nātou ʼe mole kei mulimuli ia te ia. ʼE ʼiloga mai ko ʼihi ʼe punamaʼuli pea mo meo. Koteʼuhi, neʼe fakafisi ia ki te faiga ʼaē ʼa te hahaʼi ke fakanofo ia ko he hau; pea tahi, ʼi te fakalaga meʼa age ʼo tona ʼu fili ki ai ke ina fakamoʼoni tona ʼuhiga hau, neʼe mole ina fia foaki age he fakaʼiloga ʼo te lagi. Ka ko ai koa ia ia ki tana ʼu ʼapositolo? ʼI tanatou aʼu atu ki te faʼahi ʼaē ʼe faikole ai, neʼe fehuʼi age e Sesu kia nātou: “Ko ai ia ʼau, ʼi te ʼui ʼa te hahaʼi?”

Neʼe nātou tali age: “ ʼE ʼui e ʼihi: Ko Soane Patita; maʼa ʼihi: Ko Elia; ko ʼihi ʼatu: Ko Selemia pe ko he tahi ʼi te ʼu polofeta.” ʼE moʼoni, ʼi te manatu ʼa te hahaʼi ko ia ko he tahi ʼi te ʼu tagata ʼaē neʼe fakatuʼuake ʼi te mate!

“Kae kia koutou, ʼe koutou ʼui ko ai ia ʼau?” ko te fehuʼi age ʼaia ʼa Sesu.

ʼI te temi pe ʼaia neʼe tali age e Petelo ki ai: “Ko koe ko Kilisito, te ʼAlo ʼo te ʼAtua maʼuli.”

ʼI tana ʼosi ʼio ki te tali ʼa Petelo, neʼe tala age e Sesu: “Ko koe Petelo, pea ʼi te mata maka nei ʼe ʼau laga ai anai taku kokelekasio, pea ʼe mole lavaʼi anai ia e te ʼu matapā ʼo te Hatesi.” Ko tana hoki fakahā ʼaenī ʼe ina laga anai he kokelekasio pea māʼiape la mo te mate ʼe mole feala ke ina tāʼofi ia nātou ʼo te kokelekasio ʼaia ʼaē neʼe maʼuʼuli agatonu ʼi te kele. ʼOsi ʼaia pea ina toe ʼui age kia Petelo: “ ʼE ʼau foaki atu anai kia te koe te ʼu kalavi ʼo te puleʼaga ʼo selo.”

ʼE fakahā e Sesu ʼi henī ko Petelo ʼe tonu ke ina maʼu he ʼu pilivilesio makehe. Kailoa, ʼe mole ko he tuku ia kia Petelo he ʼuluaki tuʼulaga ʼi te kau ʼapositolo, peʼe ko he fakanofo ʼo ia ko he fakatafito ʼo te kokelekasio. Heʼe ko Sesu ia ʼaē ko te Mata maka totonu ʼaē ka laga ai anai tana kokelekasio. Kae ko Petelo ʼe foaki age anai ki ai te ʼu kalavi e tolu ke ina avahi ʼaki, ki niʼihi faʼahiga hahaʼi te fealagia ʼaē ʼo te hū ki te Puleʼaga ʼo selo.

ʼE fakaʼaogaʼi anai e Petelo te ʼuluaki kalavi ʼi te Penikosite ʼo te taʼu 33 ʼi totatou temi, moʼo fakahā ki te kau Sutea ʼaē ʼe fakahemala te meʼa ʼaē ʼe tonu ke nātou fai ke nātou maʼu ai te maʼuli. ʼE ina fakaʼaogaʼi anai te lua kalavi ki muli age, moʼo foaki ki te kau Samalitana ʼaē ʼe tui, te fealagia ʼo te hū ki te Puleʼaga ʼo te ʼAtua. Pea, ʼi te taʼu 36 ʼo totatou temi, ʼe ina fakaʼaogaʼi anai te tolu kalavi moʼo foaki ki te kau Senitile ʼaē ʼe mole silikosisio te fealagia ʼaia, kia Kolonelio pea mo tona ʼu kaumeʼa.

Neʼe hoko atu te palalau ʼa Sesu mo tana ʼu ʼapositolo. Neʼe ina fakaloto mamahiʼi ia nātou ʼi tana ʼui age ʼaē kua vave tona mamahi pea mo tona mate ʼi Selusalemi. ʼI tanatou mole mahino ʼaē ʼe toe fakatuʼuake anai ia Sesu ki te maʼuli ʼi selo, neʼe toʼo kehe age ai leva ia ia e Petelo ʼo ina ʼui age ki ai: “Agalelei kia te koe, ʼAliki; kailoa, ʼe mole hoko anai kia te koe he meʼa feiā.” Kae neʼe mafuli age ia Sesu ʼo ʼui maʼana: “Haʼu ʼi ʼoku tuʼa, Satana! ʼE ko koe ko te maka fakatupu tūkia kia te ʼau, heʼe mole ke maʼu te ʼu manatu ʼa te ʼAtua, kae ko te ʼu manatu ʼa te tagata.”

ʼE ʼiloga mai ia, ʼe ʼi ai te tahi ʼu hahaʼi kehe pea mo te kau ʼapositolo ʼe fagona fakatahi mo Sesu. Neʼe ina pāui foki ia nātou pea ina fakamahino age kia nātou fuli ʼe mole faigafua anai te liliu ko hana ʼu tisipulo. “Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi pea ke muli tuʼumaʼu ia te ʼau. He ko ʼaē ʼe ina fia hāofaki tona nefesi ʼe ina pulihi anai ia; kae ko ʼaē ʼe ina pulihi tona nefesi ʼuhi ko ʼau pea mo te logo lelei ʼe ina maʼu anai ia.”

ʼIo, kapau ʼe nātou loto ke tau mo nātou tona ʼofa, ko te ʼu tisipulo ʼa Sesu ʼe tonu ke ia nātou he lototoʼa pea mo he loto faka sakilifisio. Neʼe ʼui fēnei e Sesu: “He ko ʼaē ʼe ufiufi ʼuhi ko ʼau pea mo taku ʼu folafola ʼi te taʼiake fai feʼauʼaki pea mo agahala ʼaenī, ko te Foha ʼo te tagata ʼe toe ufiufi anai mo ia ki ai mokā haʼu anai ʼi te kolōlia ʼo tana Tāmai pea mo te kau ʼaselo maʼoniʼoni.” Maleko 8:22-38; Mateo 16:13-28; Luka 9:18-27.

▪ He koʼe ʼe tuʼania ia Sesu ʼo ʼuhiga mo tana ʼu tisipulo?

▪ ʼI te ʼui ʼa ʼihi, ko ai ia Sesu?

▪ Ko te ʼu kalavi fea ʼaē neʼe foaki age kia Petelo, pea ʼe feafeaʼi anai tana fakaʼaogaʼi?

▪ Koteā te akonaki ʼaē neʼe fai kia Petelo, pea koteā tona tupuʼaga?