Ko Te ʼu Kaumeʼa ʼo Te ʼAtua ʼe Nātou Fai Te Meʼa ʼAē ʼe Lelei

Ka koutou kaumeʼa mo he tahi ʼe koutou ʼofa ki ai pea mo fakaʼapaʼapa ki ai, pea ʼe koutou faiga ke koutou hage ko ia. ʼE ʼui e te Tohi-Tapu “ko Sehova ʼe agalelei pea mo faitotonu.” (Pesalemo 25:8) Kapau ʼe tou fia kaumeʼa mo te ʼAtua, pea ʼe tonu ke tou agalelei pea mo faitotonu. ʼE ʼui fēnei e te Tohi-Tapu: “Koutou liliu ko he kau faʼifaʼitaki ʼo te ʼAtua, ohage ko he fānau ʼofaina, pea koutou haga haʼele ʼi te ʼofa.” (Efeso 5:1, 2, MN) Koʼeni tona ʼu faʼahiga fai:

Koutou tokoni ki te hahaʼi. “Tou fai ia te lelei ki te tagata fuape.”—Kalate 6:10.

Koutou gāue kinakina. “Ko ae e kaihaa, aua tana toe kaihaa, kae ke mamahi o gaue lelei i ona nima.”—Efeso 4:28.

Koutou maʼa ʼi te faʼahi fakasino pea mo fai he ʼu aga maʼa. “Tou fakamaʼa ia tatou mai te meʼa ʼuli fuli pe ʼo te kakano pea mo te laumālie, ʼo fakakatoa totatou maʼoniʼoni ʼi te manavasiʼi ki te ʼAtua.”—2 Kolonito 7:1, MN.

Koutou ʼofa ki tokotou famili pea mo fakaʼapaʼapa kia nātou. “Koutou tahi ofa ki tona ohoana o hage ko kita totonu, pea ko te fafine ohoana, ke fakaapaapa ki tona ohoana. U fanau koutou fakalogo ki [takotou ʼu] matua i te Aliki.”—Efeso 5:33–6:1.

Koutou fakahā tokotou ʼofa ki te hahaʼi. “Tou feʼofaʼaki koteuhi e haù te ofa mai te Atua.”—1 Soane 4:7.

Koutou fakalogo ki te ʼu lao ʼo te fenua. “Ke fakalogo te tagata fuli ki te [puleʼaga] . . . Koutou foaki ki te hahai fuape ia mea e maua ke natou mau: te tukuhau kia ia ae e tukuhau.”—Loma 13:1, 7.